الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Sep 2, 2008

أستر يااااااااااااااارب؟؟!!..


السلام عليكم و رحمة الله و بركاته
إزيكم يا شباب أخباركم ايه؟؟
أخبار رمضان معاكو ؟؟؟

معلش عارفة إنى مقصرة معاكو لسه مافتش على الكل وهنيته
أنتوا عارفين المواصلات ....فباخد منطقة منطقة كل يوم يعنى منها توفير فلوس و توفير وقت
هههههههههههههههههههههه
بس إن شاء قبل نهاية رمضان يكون كل واحد وصلته التهنئة

و لا أقولكم .....
أنا هأعمل زى واحدة صاحبتى بعتالى تقولى :
رمضان كريم و فطر سعيد و أضحى مبارك و كدا ملكيش حاجة عندى طول السنة
هههههههههههههههه
شايفين الناس الاقتصادية .... والله ناس دماغها عالية

المهم ... عملتو ايه امبارح و النهاردة ؟؟؟
والله مش مصدقة إن النهاردة تانى يوم
و فاكرة ان النهاردة أول يوم لسه ...
والله رحت صليت التراويح ، بس بردوا ....
حاسة يومين كتير اوى ..كفاية يحسبوه يوم واحد :(

يارب بارك لنا فى رمضان و اخرجنا منه من عتقائك من النار
بصراحة أنا كنت جاية النهاردة أتكلم معاكو شوية على حاجة كدا اول مرةآخد بالى منها
يوم الاحد لما كنا بنصلى ... والشيخ بيقرأ فى بداية سورة البقرة
اول مرة يدخل فى بالى الفهم دا
أفتحوا كدا معايا المصحف من أول آيه 8 ...
من اول هنا ربنا بيتكلم عن المنافقين ...
اقرؤوا كدا الايات بتأنى لحد ايه 20 طب بلاش لحد ايه 16
بصراحة أنا اتخضيت و خفت جدا لما فكرت فيها شوية ... هو لازم المنافق دا يكون عارف انه منافق و مخبى
طب ماحنا لما بنحلف بغير الله عن غير قصد مننا كدا بنكون أشركنا شرك أصغر و احنا مش عارفين
طب مش ممكن نكون منافقين من غير منكون عارفين؟؟؟
و للأسف دا اللى اكتشفته و يارب يكشف عنا الجهل ويعلمنا
تعالوا كدا لاول السورة و شوفوا شروط الايمان ...

1 - الايمان بالغيب

2- اقام الصلاة

3- الانفاق مما رزقنا الله

4- الايمان بما انزل على محمد و ما قبله .

داغير حاجات تانية مذكورة فى سور تانية .
طب تعالوا للشروط المذكورة هنا و نقول هى دى اللى تفرق بين المؤمن و الكافر و المنافق
أول شئ الغيب .. كلنا بنقول مؤمنين و الحمد لله .. بس هل فعلا احنا مؤمنين بالغيب

طب تعالى للناس فى زماننا دا اللى ماعدتش بيمشى غير بالرشوة و نقولهم اتقوا الله عشان يرزقكم رزق حلال و يبارك لكم فيه يقولولك العيال و الدروس و أكل العيش و غيره ... طب ماهو لو أنت مؤمن ان ربنا مقسم الارزاق و ان رزقك كدا كدا هيجيلك لكن انت اللى مستعجل عليه عشان كدا بتاخده بالحرام ..هيقولك ياعم سيبك دا واحد عايش فى المثالية و لا يمكن واقع علينا من قرنين فاتوا ...

طب بلاش ... تشوفواحد مبتأس تقوله ماتزعلش ربنا اكيد هيفرجها عليك بس أنت أصبر بس ، و الدنيا مش بتفضل وحشة على طول و لا حلوة على طول ... و ربنا عدل ، أكيد هتاخد نصيبك ، يقولك ... هى اصلا سودة سودة ، و بعدين هو نصيبى كدا ناس تفرح و تتهنى و ناس تشقى و تفضل شايفة الويل .. طب ياعم الحاج فين الرضا بقضاء الله ...يقولك ..ماهو الواحد راضى هو أنا قلت حاجة ، راضيين بالهم و الهم مش راضى بينا ...لا اله الا الله ..

هو دا الايمان و الرضا ؟؟؟
هو الغيب دا ياجماعة اللى هو الملائكة وأهوال القيامة و خلاص ؟؟؟
لا ... الغيب دا كل ما غاب عنا ، و القضاء و القدر من ضمن الغيب ... طب فين بئا الايمان بيه ؟؟
و فين الرضا؟؟

أهو دا بئا اللى ربنا بيقوله لنا فى الايات دى ... " و من الناس من يقول آمنا بالله و باليوم الاخر و ما هم بمؤمنين "
لأننا فعلا ماحققناش الايمان عملى ..بس بنقوله نظرى ... فشوفوا بئا العقاب بيكون ايه فى الايتين اللى بعدها ..فعلا الناس مابقاش يكفيها شئ و لا راضية و لا قنوعة

" و إذا قيل لهم لاتفسدوا فى الارض قالوا انما نحن مصلحون "
تعالى قول لواحد بياخد رشوة دا حرام و افساد فى الارض ...يقولك يا عم القرشين اللى باخدهم يمشوا حالى و أدينى باخلص له مصلحته .. يعنى بنفيد بعض ..
تعالى للى بيسرق .. يقولك ياعم انا باسرق بس من الناس الهاى..يعنى هما يفرحوا و ينبسطوا لوحدهم ؟؟؟ طب و احنا فين ؟؟
و غيرها حاجات بنقابلها فى حياتنا اليومية ...هى غلط و افساد لكن بقت عادى جدا لا و كمان شايفينها صح ،

و "إذا قيل لهم آمنوا كما آمن الناس قالوا أنؤمن كما آمن السفهاء "
تعالى الوقتى قول لواحد من اللى هما مش ناوى تلتزم بئا ؟؟ ...يقولك ياعم دا الملتزمين كلهم وحشين ، دا الملتزمين دول كلهم لسانهم آآآآآآآآآآد كدهو .. و معاملتهم أعوذ بالله ..شاطرين بس قال الله و قال الرسول و مش بيعملوا حاجة .. ياعم دا أنا كدا أحسن منهم ..

" و إذا خلوا الى شياطينهم قالوا انا معكم إنما نحن مستهزؤن "
و ساعة بئا لما الشلة تتلم ... ياخدوا الناس كلهم تريقة ، و سخرية ..و شايفين انهم فوق الكل و ماحدش قدهم ..

للأسف أنا اول مرة أفهم الايات دى بالشكل دا ، طبعا احنا فاهمين ان المنافقين دول عارفين نفسهم و إننا و الحمد لله مؤمنين لكن بجد لما بنقف مع نفسنا فى لحظات صدق بنكتشف اننا مش كدا خالص
عارفة إنى لكيت كتير ، بس بجد كان نفسى أقولكم اللى وصلت له ... أنتوا معايا و لاايه ؟؟

ربنا يارب يكشف عنا الجهل ، و يعلمنا و يفهمنا و يرشدنا الى الحق و يرزقنا اتباعه و يرنا الباطل باطلا و يرزقنا اجتنابه
...
ورمضان كريم ، و أشوفكم قريب على خير :)؟

4 comments:

كـــيــــــــارا said...

ربنا يجعله في ميزان حساناتك يارب

اسلوب الكتابه مشوق جدا

كل سنه وانت طيب

Soul.o0o.Whisper said...

كــيـــارا


شرفتينى و نورتينى بمرورك الرقيق
و بأشكرك أكتر على كلماتك الجميلة

كل سنة وأنتى طيبة و رمضان كريم

خالص تحياتى

3ala asm masr said...

رمضان كريم
كل سنه وانتى طيبه
انا كمان اول مره افهم الايات زى ما انتى قولتيها كده
واضح ان احنا محتاجين نقف مع نفسنا كتير اوى

Soul.o0o.Whisper said...

على اسم مصر

أولا متأسفة جدا على التأخير

ثانيا :فعلا محتاجين نقف مع نفسنا جامد جدا

بأشكرك و أتمنى تشرفينى دايما بزياراتك