الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Oct 10, 2008

النهاردة عيد ميلادى ....دخوووووووووووووول

السلام عليكم و رحمة الله و بركاته

إزيكم يا شباب ؟؟؟ أخباركم ايه ؟؟؟

شوفتوا الخبر الهام دا ؟؟... آآآآآه النهاردة عيد ميلادى ..

و طبعا بالنيابة عن البخلا اللى بيمروا و مش بيرضوا يعلقوا

هأقول لنفسى : "كل عام و أنا إلى الله أقرب و على طاعته أدوم ، و للجنة أرجى و من النار أخوف "

هه ..غصب عنكو بئا ..هههههههههههههههههههه

بس مش عاوزة حد يقولى عقبال ميت سنة ... أيوا أنا بأقولكم اهو ..اللى يخش يقولى عقبال من 60 – 70 سنة ..كفاية عليا

و ياريت تقولولى عقبال 63 سنة عشان أكون زى رسول الله – صلى الله عليه و سلم - : )


طيب و بما إن أنا دعياكم من بدرى ...فدا مش عشان تلحقوا تاكلو لا سمح الله ، و إنما دا عشان تساعدونى فى التجهيزات ...آه أمال تاكلو بسسسسسسس ...دا حتى يبئا عييييييييييب ...هههههههههههه

طب خلاص خلاص ماتهربوش ...كنت بأهزر معاكو ... دا أنا بئالى أسبوع بأحضر لكم الحاجات ...لحد ما خلاص خلصت

بس فداكم بردوا ... هو صحيح مش اول عيد ميلاد ليا فى المدونة ...بس أول عيد ميلاد ليا و أنتو معايا ...: )

بالحق ...محدش يسأل عيد ميلادك الكام ....عشان طبعا انتوا عارفين ان البنات سنها بييجى عند 16 سنة و بيضرب فرامل و مابيرضاش يتحرك بعد كدا ...هههههههههههههههههههه

ياللا شايفين بئا حجزالكم مكان حلو إزاى ؟؟؟

معلش بئا حاجة على ما قسم ...ههههههههه

و طبعا جايبالكم عشااااااااااااااااااا معتبر إزاى ؟؟؟؟


و دى بئا تورتة عيد الميلاد .....

و دى كمان للحبايب ،

و العصاير كمان ركن كااااااامل.....

و طبعا عشان أنا عاشقة للشيكولاته ..فأنا هأستأثر بدول لوحدى ...ماليش دعوة

و اللى بيحب الشيكولاته زييى ، جبت له دول

استنوا استنوووووو .....

ايه يارب المفاجيع دول ؟؟؟ .... طب مش لما نئيد الشموع و تقولولى ياللا حالاحالا بالا هنوا ابو الفصاد ...يوووووه قصدى هنوا سول ويسبر ...هيكون عيد ميلادها الليله اجمل الاعياد ..فلتحيا سول ويسبر...هههههههههههههههههه

و هابى بيرث داى تو يو ..هابى بيرث داى تو يوووووو ..هابى بيرث داى تو يو سوووول ...هابى بيرث داى تو يوووو ..ههههههههههههههههههه ...

هوووووووووووووووووووووووووووووووف

هييييييييييييييييييييييييييييييه

هههههههههههههههههههههههههههه

شكرا شكرا يا جماعة متشكرة خالص ، والله بتحرجونى بذوقكم ،

بس ملحوظة بئا ...كل واحد ياخد صحابه ، و كل واحدة تاخد صحباتها و يقعدوا على ترابيزة

آه ...عشان ماحدش يحرج من التانى ، و يقوللى ماعرفتش آكل ...اه ، الاكل دا لازم يخلص النهاردة

مش أكلف نفسى و أدفع دم قلبى ، و فى الاخر ادبس فيه ...

عن نفسى ...أنا حاجزة ترابيزة ليا أنا وعاشقة الفردوس و بنات أفكارى و أنا مسلمة ...عشان نقعد نلكلك براحتنا و احنا بناكل

و كل واحد يختار صحابه بئا ....ههههههههههههههه

طبعا فطستو ...بس من جمال الاكل مش قادرين تبطلو ...هههههههههههههههههه

و بهذه المناسبة السعيدة ...كنت عاوزة أكتب لكم حاجة من أشعارى أو خواطرى

بس مالحقتش ، بس لقيت نفسى بأخربش و أقول ....

أمسكت قلمى ....

و بسطت كراسى ...

الآن سأكتب بمدادٍ

تخطه كلماتى ...

نعم .....

سأكتب و أكتب ،

و سأظل أكتب ...

حتى تنهى النقطة

صدى كلماتى ...

نسمات الربيع ،

و همسات السحر ...

و عطور الزهور ،

و عبقات المطر ....

أعيش الآن أحلامى ،

و أطوى أرض أيامى ...

فهناك ...

و هناك فقط ....

وددت لو أعيش ....

طبعا أنتوا ملاحظين أثر الأكل على الكلمات ،

و ماحدش يسألنى فين ؟؟

لأن طبعا المعنى فى بطن الشاعر ،

و الشاعر الوقتى بطنه مشغولة بحاجات تانية ،

فمش فاضى يدور على المعنى الوقتى ...هههههههههههههههههه

و بمناسبة بردوا ان الاكل لسه مأثر عليا حبيت أرغى معاكو شوية و أقولكو

خلاصة تجاربى فى الحياااااة << دا بمناسبة إننى من عهد أرسطو مثلا ..

1- أكتر شئ بئا صعب فى الزمان دا ..إنك تحافظ على علاقاتك بناس بتحبهم أو تحترمهم ، و اصبحت أعباء الحياة بتحتم البعد ، و طبعا مابئناش بنعذر لبعض ...فلو واحد غاب عنك حبة ، تقول دا نسانى و اللى ينسانى أنساه ، و مش معبره و لا سائل عليه ...و من هنا و من موقعى هذا ..بأقول لكل شخص أنا دخلت مدونته أو حتى كان مابنا كلام فى يوم و بعدين مادخلتش تانى أو ماتكلمناش تانى ... إنى لا أقصد القطيعة ... و ياريت أى حد زعلان منى يسامحنى ...عشان أحنا دماغنا بتقعد تودى و تجيب و بناخد قرارات بناء على هواجس ..فياريت نتأكد الاول قبل ما ناخد اى قرار.

2- إن الانسان هيفضل طول عمره انسان ..<< أيوا هو عند حضرتك احتمال انه يتحول لشئ تانى و لا ايه ؟؟

ههههههههههههههه ... لا مش قصدى ، أقصد إنه هيفضل دايما فيه النزعة الانسانية و الرغبات البشرية ، حتى الملتزمين ...فحب المال مثلا محدش يقوللى إن الملتزمين مش بيحبوا المال ،لأ بيحبوه لكن الفارق إن بيكون فى خشية من ربنا انهم يجيبوه من مصدر حرام أو يصرفوه فى حراااام ، إنما لو أتفتح لهم مورد رزق أوسع بيمسكوا فيه بإيديهم و اسنانهم ، و الرغبة فى الحب مثلا ...بردوا فى كل البشر و ماحدش يقوللى لا

3- إن مافيش حد أكبر من الخطيئة ..مهما كان ، و عشان كدا ربنا قال لنا و لا تقربوا ... يعنى حتى ما نمشيش خطوة واحدة فى سبيل دا ..و آدى احنا شايفين كل يوم و التانى ناس بتذنب و تقول : " أنا عمرى ما كنت فى يوم اتوقع إنى أذنب الذنب الفلانى " .... "أنا إزاى عملت كدا " ... و غيره من الكلام ..و دا بردوا يمكن لأننا شايفين إن عشان احنا ملتزمين شوية فخلاص شايفين إن أمرنا بإيدنا و نسينا ان الامور بإيد ربنا ، و إننا مالناش فى نفسنا شئ .. فمش بنسأل ربنا و نستعيذه من كل شئ سأله و أستعاذ منه حبيبنا محمد – صلى الله عليه و سلم - ...و السبب : أصل أنا لا يمكن أعمل كدا ؟؟!!..

4- فعلا فعلا ...مافيش بيت مافيش فيه مشاكل ... و الناس اللى احنا شايفنها سعيدة و مبسوطة و راضية بحياتها ، دول مش ربنا مصطفيهم و مش مبتليهم بمشاكل ...بالعكس ،فعلا زى ما بيقولو " المؤمن مصاب" ... لكن ربنا بيبئا رازقهم الرضا أولا ... ثانيا : حكمة الابوين خصوصا فى إخفاء المشاكل دى و أنهم يعيشوا أولادهم فى جو صافى و هادى ... فبيطلعو اسوياء ، إنما المعالجة الغلط ..بتطلع نبته غلط ... فربنا يرزقنا الرضا و الحكمة فى تصريف امورنا ..اللهم آمين

5- إن عيوب الناس قسمين : عيوب ظاهرة ، و عيوب باطنة .. و الاتنين ما بينهم علاقة عكسية ...يعنى الواحد اللى تشوف عيوبه ظاهرة أوى .. أعرف انه من جوا أبيض ... يعنى مثلا واحد عصبى ، واحد ربنا ابتلاه بفقد بصره مثلا أو فقد عضو من أعضاؤه .. الناس دى بأفضلها عن الناس اللى أنت شايفها مثالية و مافيش فيها عيب ...لأن الناس دى بتبئا عيوبها من جوا و احنا مش شايفينها ...صحيح ربنا ساتر عليهم ...بس الله اعلم بئا عيوبهم ايه .. فياريت مانعبش على الناس اللى عيوبها ظاهرة أولا لأنهم فى ابتلاء ظاهر ...ثانيا لأنهم من جوا فعلا بيبئوا أبيييييييييييييييض .

6- كمان ماشفتش حد ما بيبطلش ضحك ، إلا و بيكون جواه هم كبير أوى ...إنما الناس اللى على طول مكتئبة دى غالبا ما بيكون همها على أدها ... لكن شايفين إن محدش حاسس بيهم و إن المفروض الناس كلها تساعدهم و تواسيهم و كمان واجب عليهم يشيلوهم من على الارض شيل .. إنما اللى بيضحك دا فعلا بيكون همه كبير ، و صعب عليه ..لكن : لا يسألون الناس إلحافا ..و دول اللى بيبئا ربنا راضيهم بحالهم ... اللهم أرزقنا الرضا

7- أعرف انت مين فى الدنيا ...هتعرف أنت عاوز ايه و طريقك منين ... و على فكرة دا شئ مش سهل و لا بسيط بالعكس عاوز بحث كبير أوى ،و أنك تعرف نفسك و قدراتك ، و تفهم دورك فى الحياة .. ساعتها هتعرف أنت مين و عاوز ايه ...و طريقك منين ...و بجد أنا ماعرفتش أنا عاوزة ايه إلا لما ربنا منّ عليا و عرفت أنا مين ، ساعتها شفت و عرفت ...و يااااارب يرزقنا الاخلاص و الهمة العالية ...اللهم آمين

8- مشكلتنا اننا عايشين فى حياتنا بمشاعرنا ...قليل أوى اللى بيتعامل بعقله و بيوزن الامور قبل ما يتخذ قرار ، و نتيجة لدا بنفقد حاجات كتير أوى ... فرص لحياة أفضل ، علاقات مع ناس ، و غيره ... و بتكون فى أغلب الاحيان رؤيتنا للامور مشوشة ، و غالبا بردوا بيكون رأى الناس له عامل كبير انك تتراجع عن قرارك او تمضى فيه ..بيبئا ودنى يعنى .

9- إن الحب عكسه .... لا مش الكره ، عكسه اللامبالاة ... فأنت عندما تحب شخص فأنت تكن له مشاعر جميلة ، و عندما تكرهه أيضا تكن له مشاعر ، و لكن سيئه وهو فى هذه الحالة أيضا يشغل حيز من تفكيرك و مشاعرك ، لكن عندما تقرر أن هذا الشخص لا يستحق حبك ..فتأكد أيضا أنه لا يستحق كرهك ... فقط ، اللامبالاة ..و هى أصعب و اشد .

10- إن الدافع الأعظم لكل تصرفات الناس هو الحب ...بس مش الحب اللى هو واحد يحب واحدة أو العكس ، لا .. الأب عندما يقسو على أبنائه فهو بدافع حب تعليمهم الصح ، و الشخص عندما يبحث عن فرصة عمل أفضل فهو بدافع حب العيش فى مستوى أفضل ، و عندما نقضى معظم اليوم و الليلة فى أعمالنا فهو بدافع حب النجاح ، و الراشى عندما يأخذ رشوته فهو بدافع حب المال ، و الحقود عندما يحقق ما يتمنى فيمن يكره فهو بدافع حب الاتنقام .... طبعا لا تعليق .

11- أن نظرتنا لأمورنا و حياتنا تنبع من داخلنا نحن ، يعنى لو أنت عايش فى سلام نفسى و الجو حواليك كويس ..بتبئا شايف الدنيا حلوة و مش همك حاجة ،و دايما جواك أمل إن بكرة أحلى ، و حتى إن كان حواليك مش متظبط أوى بس ربنا رازقك الرضا بردوا هتبئا شايف الدنيا حلوة ... إنما لما تبئا ناقم على الدنيا كلها و مافيش حد يستاهل انك تقدم له شئ ...تلاقيك شايف الدنيا سودة و الدنيا غابة ... و إنك فاقد الأمل فى الحياة ...و بهذه المناسبة بأدعوكم كلكم للتفاؤل ...ياللا ، تفاؤل تفاؤل ...ههههههههههههههه

12- أحيانا بتقابل ناس كتير أوى و فى شتى مجالات الحياة و تلاقيهم مناسبين و كويسين ، لكن للأسف مش بيكونوا مناسبين لك أنت ..و دا مش عيب فيهم و لا فيك .. إنما مافيش توافق بينكم ، فياريت دا مايكونش دافع إننا نشيل من بعض ، أو نبص لهم بنظرة إنهم اللى غلطانين لأنهم مش عارفين يتعاملو معانا ... لكن أنسب شئ فى المواضع دى إن التعامل لضرورة ...و يا دار مادخلك شر ... : )

13- كله كوم و كلام الناس كوووووووووووم ... بجد المشكلة بتبئا بسيطة و مش محتاجة حاجة و تلاقى كل واحد أفتى برأيه ..و تلاقى الدنيا شعللت و الموضوع انتهى نهاية مؤسفة ..و كل دا ليه ؟؟ لأن بردوا زى ما قلت إننا بنتعامل بمشاعرنا .. ياريت فعلا كل مشكلة تواجهنا فى حياتنا ، نقعد مع نفسنا وورقة و قلم و نكتب المشكلة ايه ، و اسبابها ايه و الحلول المقترحة و مميزات و عيوب كل مشكلة ..عارفة انه صعب فى الاول ، لكن صدقونى فى الاخر بناخد القرار الصح و عن اقتناع و مش بنرجع نندم تانى

ياااااااااااااااااااه ...طولت عليكو و قلبتها غم معلش ...بس دا كان تأثير الأكل ،

هو دايما الاكل الكتير بيعمل تخمة ...سواء فى البطن أو العقل ...ههههههههههههههههه

بالحقققققققققق ...فين الهدايا بتاعتى ...عااااااااااااااااااااا ، ماليش دعوة كل واحد يقب بالهدية بتاعتى ...ههههههههههههههه

ياللا كملوا أكل براحتكو ، بس ماتنسوش تغسلوا ايديكو و وشكوا أحسن شكلكوا وحش أوىىىىىىىىى ...هههههههههه


بالحق كان المفروض إن أنا مجهزالكو هدية بردوا ... آه دا غير الاكل ، عشان ماتقولوش عليا بخيلة .. بس لسه بتجهز ...دعواتكم ، يارب على البوست الجاى تكون جهزت ...

ياللا ....خالص تحياتى

15 comments:

Dr.Mohammed Gohary said...

ألحق أول كومينت
كل سنة وانتي طيبة

أنا هاخد الشيكولاتاية اللي علي شكل قلب دي
طالعة من عيني
أنقي بقاااااا منا أول كومينت
هكمل قراية وآجي

Dr.Mohammed Gohary said...

عؤبال عيد الميلاد الـ 62و355وتلاته وعشرين ساعة وتسعة وخمسين دقيقة وتسعة وخمسين ثانية وشوية فيمتوهاااات كدا علي ذوقك
ههههههههههههههههههههه

كووووووووول دي حاجات
إحسبيها صح تعيشيها صح
مبتشوفيش الإعلان ههههههه

يا ستي كل سنة وانتي طيبة
والسنة الجاية تبقي أجمل وفي صحة أحسن وبال أوفر يااااااارب

حلو حوار البنات عند 16 سنة عمرها بيقفش فرامل ههههههههههه
آه والله عندك حق ههههههههه

يا سيدي
إيه المكان الجامد دا
وبلالين بقاااااا وبتاع
ماشي ياعم الل يسهلووووو
هههههههههههههههههه
هي دي مكونة
فين دي أنا مش شايف مكرونة
هههههههههههههه
بس شكلو عشا حلو ههههههههه

ياسيدي عالتورته
ايه يابنتي الذوق دا رهيبة بجد
طاب عينيلي نايبي هههههههههه

ركن عصاير
ههههههههههههههههههههه
دانتي رهيبة
الحمد لله كدا الدايت باظ ياولدي
ههههههههههههههههههه

خلاص آخد الشيكولاته اللي عالطرف كماااااان اللي علي شكل قلب
هههههههههههه
يبقا اليكولاتيتين القلب بتوعي
محدش ياخدهم


يالا حالا بالا بالا هنوا أم الفصاد ويك ويك
ههههههههههههههههه
كان يوم اسود يوم ما جيتي
ههههههههههههههههههه

أنا بهزر

كل سنة وانتي طيبة

المعني في كرش الشاعر
هههههههههههههههههههههههه

هههههههههههههههههه

حلوة الكلمات
بجد
ياااااارب تعيشي هناك
هههههههههههههه

ايه دا
الكلام اللي بالروصاصي دا
دي طلق ولا ايه
انتي قلبتيها دراما ليه
ماكنا بناكل
أله لاااااااازم تخلونا نفكر ونبذل مجهووووود ونهضم
ياااااااادي النيله
ههههههههههههههههههههههههه

أوباااااااا
الهدايا
ألحق أفلسع قبل ما تركز
هههههههههههههههههه


أبقااااااا آخد الهودية لما أرجع
أوعي تنسيني

أشوفك علي خير

كل سنة وانتي طيبة

وعقبال 163 سنة

خالص تقديري

Ahmed Al-Sabbagh said...

بجد انا مش عارف اقول ايه
على الروعة والجمال اللى انا شايفة
الديزاين جميييييييل كتيييير
وكل سنة وانتى طيبة
صور اخر روعة
ويارب دايما كل حياتك تبقى خير وسعادة وحب وانطلاقة وصحة ونجاح وكل شئ جميل تتمنية

تقديرى ومحبتى
احمد

mohamed said...

كل عام وأنتى بخير وسعاده
وشيكولاته وجاتوه
المشكله أننا أكلناهم شفوى
كان نفسنا نأكلهم تحريرى
المهم أنك تكونى سعيده

kafrawy said...

كل سنه و انتى طيبه يا افندم


تحياتى

الباحث عن الحقيقة said...

كل سنة وانتى طيبة
انا جيت متأخر
بس عارف نايبي محفوظ
مش كده ولا ....؟
اه هي عافية
كل سنة وانتي طيبة
ومبروك التامبلت اللي مش شايف منه حاجه ده

مهندس مصري said...

كل سنة و انتي طيبة
و ربنا يبارك ليكي في عمرك
:)

Soul.o0o.Whisper said...

Dr.Mohammed Gohary

و انت طيب يا دوك
عقبال ما نردهالك يارب

و ربنا يوفقك و يكرمك كدا فى الامتحانات
و ترجع منها سالم غانم يارب

و بما انك اول و تانى كومينت
فدا معناه انك اول واحد هتشاكل معاه على الشيكولاته

يعنى ايه اول كومينت يعنى ؟؟
مانا اللى كاتبه البوست
هههههههههههههه

و لا يعنى عشان طيبة و هادية
و عيد ميلادى النهاردة
فتقوم تضحك عليا و تاخد الشيكولاته منى ؟؟؟

لا مليش دعوة
عااااااااااااااااا

طب خلاص ابئا سيبلى حته
ههههههههههههههههههههههه


متشكرة جدا على الكومينت الجامد دا
و عقبال ما نبارك لك على النتيجة يارب
<< و ابئا افلسع بردوا من الهدية هههههههه


خالص تحياتى

Soul.o0o.Whisper said...

Ahmed Al-Sabbagh

خالو عندنا ... يامرحبا يا مرحبا

متشكرة جدا يا خالو والله
دايما بتحرجنى بذوقك

و الحمد لله ان الاستايل عجبك
و كل سنة و انت بخير و سعادة يارب

و ربنا يتقبل دعاءك يارب و لك مثله

منور يا خال


خالص تحياتى

Soul.o0o.Whisper said...

mohamed

و أنت طيب يارب و بصحة و سعادة

خلاص هاقبل العزومة منك عملى
ههههههههههههههههههه
دى تدبيسة دى و لا ايه ؟؟
اه ..باين شكلها كدا


ربنا يكرمك يارب



خالص تحياتى

Soul.o0o.Whisper said...

kafrawy

و أنت طيب يا دوك و بصحة و سعادة




خالص تحياتى

Soul.o0o.Whisper said...

الباحث عن الحقيقة

ايه النور دا كله
و انت طيب يارب و بصحة و سلامة



ايوة اومال ايه ؟؟؟
أكيد نايبك محفووووظ
هو صحيح التورتة خلصت
و صحيح الجاتوه افترسوه
و بردوا العصير مافضلش منه حاجة


بس كفاية انك جيت شفتنى
صح؟؟؟
بمية مناب
هههههههههههههههههههههههههههههههه





كدا و ماشفتش منه حاجة
طب الحمد لله

أومال لو كنت شفت بئا
ربنا يستر
هههههههههههههه




خالص تحياتى

Soul.o0o.Whisper said...

مهندس مصري


و حضرتك طيب و بصحة و سلامة يارب
أول زيارة اعتقد
و يارب ماتكونش الاخيرة

حضرتك شرفتنى جدا
و ربنا يتقبل دعاءك و لك مثله



خالص تحياتى

Dr.Mohammed Gohary said...

أله أله
بس إحنا ضيووووف والضيف بينقي أحسن حاجة

أنا هاخد الشيكولاتيتين اللي على شكل قلب

بسسسسسسسسس

كل سنة وانتي طيبة ربنا يستر

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت