الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Nov 1, 2008

خمسة فضفضة


السلام عليكم و رحمة الله و بركاته
كيفكم يا شباب؟؟ إن شاء الله تكونوا بخير ....

تعرفوا ..فى بوست عندى من زمااااااااااان جدا ، بس سبحان الله كتبت فيه شوية
و كل ماجى أكمله تظهر حاجة تخلينى ماكملوش ...مش عارفة ليه؟؟
قدره بئا ...ههههههههههه

المهم ... مش عارفة!!..
حاسة جوايا كلام كتير جدا عاوز يطلع ،
بس مش عارفة هأتكلم فى ايه و لا ايه ؟؟؟
أفكار كتير ، و مواضيع كتير .. بس قلت هأتكلم و خلاص و اللى يطلع يطلع ..
اهو نكون خففنا الحمولة شوية .... : )

امممممممممممم ...طب خلونا نتكلم فى الشغل ،
بما إنه بئا محور حياتى الرئيسى حاليا ، و اللى طبعا واخد معظم وقتى ...

من مدة لما كنت لسه مش خلصت كلية ، و كان اى حد يحكى مشكلة ، أو من الواقع اللى عايشينه ... طبعا كانت الفزلكة لازم و حتما تاخد دورها فى إبداء النصح و الإرشاد للمتكلم ...و كان معظم الناس يقولولى : أنتى متفائلة اوى ، أو يابختك بالأمل اللى ماليكى ، بكرة لما تنزلى الشغل و تحتكى بالناس أكيد أفكارك هتتغير ...و نشوف بئا هتبئى عاملة أزاى .

و الحمد لله خلصت دراسة ...و النهاردة إن شاء الله هيكون أول يوم ليا فى الشهر الرابع من الشغل : ) ... هو صحيح من أول سنة ليا فى الكلية كنت بأنزل أتدرب ، و دا لأنى بأعشق مجالى جدا ، بأحبه برغم الويل اللى شفته فى الكلية ، برغم الشحططة و البهدلة و الذل اللى كنا بنشوفه ...

ملحوظة لأى حد لسه فى الكلية أى كلية ، و كلية صيدلة خصوصا ...بجد حاولوا تستفيدوا بكل لحظة فى الكلية ، و طبعا مش قصدى الماء و الخضرة و الوجه الحسن .. لا ، مش دا بس ، يعنى حاولوا تستفيدوا اوى من كل دكتور ، من كل معيد ، كونوا صداقات كتير بس فعلا تكون لله ...لأنها أحلى شئ بيبئالك بعد ما تخلص ..

و أنا من هنا ، و من موقعى هذا بأسجل أشتياقى للكلية و الدراسة ،و كل ماشوف كتاب من كتبى أو أى شئ بيتعلق بالدراسة من قريب أو بعيد بحس بحنين غريييييييييييييب ... حنين لدكاترتى اللى فعلا باحمد ربنا انهم كانوا دكاترتى ، بغض النظر عن أسلوب التعامل مع بعضهم ..لكن يكفى العلم اللى عندهم ... تحس أنك واقف قدام جبل أشم ...ربنا يبارك فيهم و يزيدهم علم يارب ...
و كمان المعيدين اللى يارب فعلا يقدروا يكونوا شئ ، لأنهم فعلا مجتهدين ، و فوق كدا و كدا يكفى التدين الواضح فيهم كلهم سواء دكاترة أو معيدين ..و طبعا ماحدش يقدر ينكر أن المنصورة معروفة من زمان انها مدينة الدين و الطب .... دى حقيقة
ياااااااااااااه و فيران المعامل و الضفادع << يعععععععععععععع ... برغم أنى بأخاف منهم و مش باقدر أقرب لهم ، لكن لما كنت تجرب عليهم الأدوية و تطلع بالنتيجة ، يااااااااااااااه ...قد إيه بتحس أنك أنجزت ...برغم ان النتايج أحيانا ممكن تجيبلك حالة هيستريا و أعصابك تبوظ ....بس عادى بئا ......هههههههههههه
لما باروح يوم و أطلع على السلالم يااااااااااااه بأقعد أبص على حيطة و كل لوحة متعلقة ... ودولابى القديم ، كل حاجة وحشتنى بجد ..
اووووووووووووووه ..لو قعدت أتكلم من هنا للسنة الجاية مش هأخلص ، خلونا فى المهم ..

آه بالحق نسيت أقولكم ان حفلة النقابة بيوم التخرج كانت رراااااااااائعة ، و ياه ساعة تأدية القسم ...كنت حاسة بحمل جااااااااامد جداااااااااااا و لسانى تقل و قعدت أعيييييييييييط و أعيييييييييييييط ... بجد المسئولية صعبة ، و مش هيحس بكدا الا اللى فعلا فاهم يعنى إيه أرواح البشر بئت أمانة فى ايدك .....صعبة ،صعبة بجد .

المهم ... خلونا نرجع تانى للشغل ، لما نزلت بئا للشغل ، طبعا أول شهر كان تدريب – برغم انى باتدرب من سنة أولى ، بس لما هاكون هامسك صيدلية غير طبعا – و طبعا كان شئ صعب عليا لما اشوف ان اللى بيشتغل فى الصيدلية ناس مش فى صيدلة أصلا و لا تمت لها بصلة –بس ناس محترمة بجد ، و بأحبهم جدا-.. بس على رأى صاحبة الصيدلية ،الخبرة فى مجالنا أحسن من اى دراسة نظرية .. بس طبعا لما تكون دارس و عندك خبرة طبعا بتفرق جامد ..

اممممممممممم ..بصراحة مش عارفة أبدا بأى محور بردوا فى الشغل ، بس خلونا نبتدى مع المرتب ...هههههههههههه
طبعا كان أول مرتب ايه ؟؟؟؟ حلو بشكلللللللللل ... طبعا هو مش كتير يعنى ، بس لما تلاقى أنك يتقدم شئ و بتلاقى مقابل .. يااااااه ، بجد احساس جميل أنك بدأت تكون مستقل ،و أنك بدأت تكون نفسك .. لكن عزيزى القارئ طبعا الشعور دا سريعا ما يذوب لما بتلاقى ان يادوب نص الشهر يفوت و تلاقيك بتستلف ...هههههههههه طبعا شعور مش حلو ..

و عرفت ليه الشباب الوقتى بيقضى كل يومه برا البيت بيدور على شغل تانى و تالت ،و اللى يادوب المرتب كله على بعضه يكفيه لآخر الشهر ... و دا طبعا وهو لوحده ، أمال يا ولداه لما يرتبط بئا هيعمل ايه ؟؟؟ ربنا يكون فى عونهم يارب ..و عونا بردوا ماحنا متبهدلين بردوا ...

فعلا أزمة طاحنة أزمة البطالة ، و فعلا عرفت يعنى ايه لما تكون مش لاقى شغل و مش عارف تبدأ حياتك ، دا أنا – و أنا بنت – لما بدأت أشتغل، حسيت بجد يعنى ايه تبئا شخص فعال فى الحياة ... ربنا يكون فى عون كل واحد مش لاقى شغل ، بجد ربنا يفرجها من عنده ، بس بردوا لازم كل واحد ياخد بالأسباب و يدور على أى شغل ، و صدقونى اللى بيدأ صغير بيكبر ، أنما اللى عاوز يبدأ كبير لا بيبدأ و لا بيمشى حتى إن بدأ ... غير إن احساسك انك بتكير بيعطيك حافز إنك تكمل و تكمل ..

بردوا نقطة .. إن المرتب فى حد ذاته ، أو الشغل فى حد ذاته مايكونش هو هدفك من النزول للشغل ..لا حاول يكون لك هدف من ورا نزولك للشغل .. و كل ماكان الهدف كبير ، كل ما بتلاقيك بتتقدم بسرعة ، مش محلك سر و الحمد لله باشتغل و فى مرتب ..

كمان نقطة الناس و الاحتكاك بيهم .. بجد يمكن أكتر شئ اتعلمته و لسه باتعلمه لحد الوقتى ،هو إنك ازاى تتعامل مع الناس ..خاصة و أنك كل يوم بيدخل عليك ناس من أول الهاى كلاس لحد اللى بيشاروا بإيدهم ويقولك دا دا ... من أول اللى داخل يروشن نفسه و اللى شايلينه من شدة المرض .. بجد ربنا يعافى جميع مرضى المسلمين ...

إحساس صعب لما بتلاقى واحد بيموت قدامك من شدة المرض و شدة الفقر و الدكتور كاتب له روشته ب300 او400 جنيه ، بجد حراااااااااااااااااااام ... و أنت مش عارف تعمل له ايه ، طبعا ماينفعش تمشيه من غير العلاج ، و بردوا انت مش صاحب الصيدلية عشان تعطيهوله بالمجان او بجزأ من التمن .. و طبعا حاجة من اتنين .. ياما هو بيمشى من نفسه ، و طبعا بتبئا بتتقطع عليه ، ياما بيدفع وهو بيموت و مش عارف هيجيب اكل لولاده منين ...
بسسسسسسسسس بئا عشان أنا أعصابى تعبت .. خلونا نغير الموضوع


خلونا نتكلم شوية عن الناس الــ ... شرررررييييييييييييييييرة ....ههههههههههههههه
أيوا ..الناس اللى قبل ما تدخل الصيدلية ... الخصم يادكتور ، والله ناس معلمين ..و مش بيرضوا حتى السرنجة ،لازم ياخدوها بالخصم و يقولك مش هامشى و هآخد الدوا وهتعطيهونى بالخصم .. شوف إزاى ؟؟.. ناس محترمة والله على رأى مدير الصيدلية

لا كمان الناس اللى مش طايقة نفسها ..خاصة بعض المندوبين ، يبئا داخل كدا ..تبئا بتقول فى نفسك : انصرف بأمر الله ...ههههههههههه بجد أنا شفت فى الصيدليات احلى ايام ...لا حياة حياة يعنى ..و روق على شبابك ... دا فى مواقف شفتها ..ياربىىىىىىىىىىى خلوا الطابق مستور ..

بالنسبة بئا للمبادئ و الأفكار و الأمل اللى كنت عايشة بيه ، الحمد لله لسه بأقاوم عشان يفضل جوايا ... صحيح الحياة طلعت أصعب مما كنت أتخيل ، و الواقع مررررررررر ياولدى ... و ناس بتشوفها من أول اللى مش شايف غير مادة الحياة ، ونفسه و بس .. لكن بردوا شفت اللى بيبئا عاوز يقطع من لحمه عشان يعطى .. و دا بيخلينى أجاهد أكتر عشان أحافظ على كل اللى اتعلمته و اتربيت عليه .

بردوا نقطة و كان المفروض تتحط فى الأول ... هى يقينك و إيمانك ان كل شئ بأمر الله ، و كل موقف بيعدى عليك هو عشان تتعظ و تعتبر .. يقينك إن ربنا لايمكن يظلم حد ، و إن برغم حال كل واحد لكن أكيد دا الخير ليه ، و الحياة مش على طول ضلمة و مش على طول نور .. تقلب بين هذا و ذاك ..

عارفة إنى طولت عليكو أوى ...
بس لسه الكلام ماخلصش .. يمكن دى أول مرة اتكلم عن شئ يخصنى - واغتنموا هذه الفرصة عشان مش بتتكرر كتير – فحاولت أقول أكبر كم ...ههههههههههههههه

ياللا أشوفكم فى فضفضة تانية قريب .... سلااااااااااااام

21 comments:

ضد التيار said...

مافيش طول ولا حاجه

بجد فضفضه مفيده جدااااااا

لكل واحد عايز يشتغل و لكل واحد بيحاول يحافظ على المبادئ انه مايضعفش

عجبنى قوى النقطه دى

(يقينك و إيمانك ان كل شئ بأمر الله ، و كل موقف بيعدى عليك هو عشان تتعظ و تعتبر)

بجد فعلا لو الواحد رضى عن حياته و عرف ان ربنا مش بيظلم حد

و ان اى حاجه بيشوفها بيبقى وراها حكمه و موعظه

حاجات كتير هاتتغير و هانلاقى الدنيا بتمر بسلام

لاننا وقتها هانصبر على الصعب

تحياتى

Beram ElMasry said...

الاخت الفاضلة . Soul.o0o.Whisper
السلام عليكم ورحمة الله
على مين (ورقيقة و من النوع الأليف ) واللا لو كنتى من النوع الداجن
( هأحضر متخفية و اتسحب ) ، اقسم براس العجل الكبير لوقفشتك وبتعملى شغب لاكون مكتفك ورانك علقة نصها موت ، والنص التانى اداويكى واستسمحك تسامحينى
( مش قصدى الماء و الخضرة و الوجه الحسن ) هما فين يا حسرة ، دول كانو من ربع قرن وزيادة
( من موقعى هذا بأسجل أشتياقى للكلية و الدراسة ) لا يا شيخة ، كويس والله العظيم والحقى وقدمى تمهيدى وحالا ان شاء الله ماجستير ودكتوراة واكون لسه عايش وابعت بوكيه ورد للدكتورة الكميائية
مش باقولك ان الانثى الذكية نعمة من الله بشرط الا تكون زوجة
ان كنت اثقلت عليك فسامحينى فانت اهل لهذا وعاودى الزيارة

القلم السكندري said...

أخيييرا

ده انا كنت داخل اصلا اقولك فين البوست؟؟.. وأنتي هتقضيها مشاركات بس؟؟؟

بس الحمد لله لحقتي نفسك


أصعب شئ طبعا التعامل مع الجمهور .. عايز صبر ايووووب


غير طبعا الثبات علي المبادئ فعلا اصعب شئ في الحياة العملية

ولكن من يتصبر يصبره الله

ومن يتق الله يجعل له مخرجا ويرزقه من حيث لا يحتسب


وطبعا من اصعب الاشياء برده موضوع الناس اللي بتشتري ادوية من قوت ابناءها .. ده لو لقيته طبعا

بيضيعو بين مافيا شركات الادوية ومافيا بعض الدكاترة ممن يتاجرون في ارواح البشر .. وبين انياب مجتمع لم يعد يرحم



الله المستعان


بوست جديد من نوعه

سلمتِ عليه

وثبتك الله علي مبادئك وموفقة ان شاء الله

وجزاكم الله خيرا علي زياراتك التي اسعد بها كثيرا

دمتِ بكل خير

احمد الجيزاوى said...

احيكى على الفضفضه الجميله دة
بصراحه حسيت انه ختنى من همومى

تحياتى

احمد الجيزاوى

كـــيــــــــارا said...

احلي فضفضه قرتها

حنين الكليه ده انا بحس بيه برده اوي اوووووووي وبحن لدكاترتي واصحابي

وكلمه تفاءل دي بتتقالي ولحد الان

مش عارفه هو لازم الواحد يياس عشان يبقي عايش

ربنا معكي في شغلك ومبادئك

تحياتي لكي ياقمر

kafrawy said...

ربنا يعينك يا دوك كمان و كمان

و يبعد عنكم شر ولاد....ف الصيدليه

انتى عارفه بقى

ههههههههههه


سلام

sociology said...

فى الغالب انا بعلق تعليق بحاول اتحذ فيه صفة الحياد السوسيولوجى , احيكى على صدق المشاعر والتعبير الصادق عن الاحاسيس التى تعتمل فى شباب الخريجين , الاشارة الى تلك المشاعر ودقة الوصف فى حد ذاته امر اكصر من هائل , تقبلى تحياتى

Soul.o0o.Whisper said...

ضد التيار


اولا شرفتينى بزيارتك الجميلة
و يارب تتكرر

ثانيا : اليقين فعلا بيخلى الواحد يصبر على حاجات كتير


لو فعلا نؤمن بعدل ربنا
و نبص للى اقل مننا
مش بس للأعلى

هنلاقى حاجات كتير أتغيرت





مرة تانية نورتينى

و خالص تحياتى

Soul.o0o.Whisper said...

Beram ElMasry

"على مين (ورقيقة و من النوع الأليف ) واللا لو كنتى من النوع الداجن"

<< وش محتار

"اقسم براس العجل الكبير لوقفشتك وبتعملى شغب لاكون مكتفك ورانك علقة نصها موت"

عاااااااااااااااااااااااا
يا ماما تعالى الحقينى
شوفى عمو بيرم بيعمل فيا ايه ،
عااااااااااااااااااااا

"والنص التانى اداويكى واستسمحك تسامحينى"


لأ مث هاثامحك
ماليث دحوة
عثان أنت بتدلبنى

طب نتفق على حاجة
عشان تعرف إنى طيبة و رقيقة كمان
هأعملك خصم 50%
تاخد أنت أول نص و أنا آخد النص التانى

ماشى ؟؟

كنت عارفة انك كمان طيب و مش هتزعلنى
هيييييييييييييييه ، هييييييييييه
<< توريطة


"( مش قصدى الماء و الخضرة و الوجه الحسن ) هما فين يا حسرة ، دول كانو من ربع قرن وزيادة"

ربنا يعطيك طولة العمر و يبارك فيه بالصالحات يارب

"الحقى وقدمى تمهيدى وحالا ان شاء الله ماجستير ودكتوراة واكون لسه عايش وابعت بوكيه ورد للدكتورة الكميائية"


بس أنت قول يارب
ياااااااااااااااااااااااااارب

صدقنى مش هأبخل عليك أنك تبعت لى البوكيه
و بما أنك حجزت أول بوكيه
فأوعدك ابلغك أول واحد
:)


"مش باقولك ان الانثى الذكية نعمة من الله بشرط الا تكون زوجة"

إذن حضرتك بتفضلها .......
طيب يارب ألاقى الشاذ عن القاعدة دى
و إلا كدا هأقضى حياتى صداقات بس
ههههههههههههههههه


"ان كنت اثقلت عليك فسامحينى فانت اهل لهذا"

بالنسبة للمسامحة
ماخلاص بئا احنا اتفقنا
انما بالنسبة لأهل
فهأحاول
أصلى ماتعودتش أشيل أثقال قبل كدا



خالص تحياتى

Soul.o0o.Whisper said...

القلم السكندرى


الحمد لله إنى لحقت نفسى
:)


اه فعلا التعامل مع الناس صعب
و الحفاظ على المبادئ أصعب

ربنا يثبتنا يارب


بالنسبة بئا للناس اللى مش لاقية
ففعلا بجد ربنا يكون فى عونهم
لكن بجد ماتعرفش ربنا بيحلها منين


ربنا بجد رحيم جدا ، حليم جدا، عدل جدا



وأنا أسعد والله بالزيارة
و بانتظارك دائما



خالص تحياتى

Soul.o0o.Whisper said...

احمد الجيزاوى


بأشكرك على الزيارة
و يارب تتكرر دايما

و الحمد لله ان البوست جه بفايدة
:)



خالص تحياتى

Soul.o0o.Whisper said...

كـــيـــارا

شرفتينى والله
و فعلا الحنين للكلية دا أعتقد كلنا بنحس بيه
كل اللى خلصو كانوا بيقولولى كدا
بس فعلا ماحستش بيه الا لما سبتها

اهئ اهئ اهئ


ربنا يثبتنا جميعا على الحق يارب




خالص تحياتى ليكى

Soul.o0o.Whisper said...

kafrawy



آه ... يارب
:)

ربنا يثبتنا جميعا على الحق يارب
و يبعد عنا اولاد الــ ...




خالص تحياتى

Soul.o0o.Whisper said...

sociology

حاول اتحذ فيه صفة الحياد السوسيولوجى"

"

و بعدين ؟؟
حضرتك عارف انك داخل مدونة بالعربى فياريت نتكلم عربى
<< أمال المكتوب دا بالعبرى؟؟

ههههههههههههههههههههه




بأشكرك على الزيارة و الكلمات الرقيقة


واتمنى ان تتكرر الزيارة






خالص تحياتى

mahasen saber said...

اولا وليس آخرا بشكرك على زيارتك الكريمه لمدونتى
.......
بعدين عاجبنى وفائك وانتمائك لكليتك ودراستك ربنا يكرمك ويسعدك ويوفق خطاكى
اما يا جميل المرتب بئه فانا ضحكت بشكل اصلى افتكرت مرتبى واليى نصه مصاريف حضانة ابنى تخيلى بئه ضآلته قد ايه ففعلا الله يكون فى عون الشباب
.......والشابات برضه وارباب الاسر والالتزامات
..........
بس اعتقد الدوا الغالى ممكن تصرفى للمريض بديل ولاا انا غلط
.........
ربنا يسعد الجميع ويبارك فى صحتهم ورزقهم
.....

Beram ElMasry said...

الاخت الكريمة ، Soul.o0o.Whisper
اسعد الله صباحك بكل الخير
صحيح هذا العمل كويس ؟ ام بصلة المحب خروف
خالص تحياتى وشكرا

م/ الحسيني لزومي said...

شارك في الحملة الشعبية للقيد بالجداول الانتخابية
ضع بنر الحملة علي مدونتك
البنر موجود علي مدونتي

Soul.o0o.Whisper said...

mahasen saber

أختى الكريمة / أم عبد الرحمن
بارك الله لك فيه


أنا اللى باشكرك ان برغم انك مش فاضية لكن جيتى تردى الزيارة
و يارب نطمن عليكى
و ماتقطعيش الزيارة ابدا

اللهم آمين يتقبل دعائك و لك مثله

عارفة أحلى حاجة انك دايما تلاقى أمثالنا تنفع فى كل المواقف
بيقولو "هم يبكى و هم يضحك "
بس الحمد لله فى كل همومنا بنضحك
أهم شئ ربنا يرضينا و يكتب لنا السعادة أينما كانت



و بالنسبة للبديل
بصراحة مش عارفة ...
أصوت ،و لا أولول ولا أعمل ايه

يا اختى الغالية
أى حد بيبئا داخل الصيدلية
بتبئا سابقاه عبارة
"مش عاوز بديل يا دكتور"

و ان شاء الله تنزل رسمى
و يشيلوها زى البطاقة الشخصية كدا


يمكن بعد كدا ابئا أنزلكو بوست عن المواقف اللى حصلت لى مع البديل


بس فى ساعات ناس بتقبل
بس لظروف قهرية جدا




نورتى المدونة


خالص تحياتى

Soul.o0o.Whisper said...

Beram ElMasry


"صحيح هذا العمل كويس ؟ ام بصلة المحب خروف"

و كيف لقلم مثل قلمى
أن يحكم على قلم مثل قلمك

إن لم يجد قلمى سوى التهليل فى ركب السائرين
فيكفيه هذا شرفا

حقيقى كصفتنى بذوقك
<< المرة الجاية تيجى ببراية لو سمحت :)




خالص تحياتى

Soul.o0o.Whisper said...

م/ الحسيني لزومي


أخى الفاضل
بالفعل لدى البطاقة الانتخابية
و أدليت بصوتى فى الانتخابات الماضية

و سأفعل كلما أراد الله لى ذلك


خالص تحياتى

م/ الحسيني لزومي said...

ممنون وشاكر اهتمامك ولكن اطمع في المزيد وذلك بدعوة الاخرين من علي مدونتك بالمشاركة