الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Feb 20, 2009

مقتنع و لا متكتف؟؟( تحدييييييييييث )!!

تحدييييييييييث :
معلش يا جماعة أنا الفترة دى مش متظبطة
شوية حاجات كدا حصلت اليومين اللى فاتوا دول مأثرين عليا جامد

حاسة إنى عاوزة أقف مع نفسى حبة
و كمان ياريت تدخلوا تقرؤوا اللينك دا عشان تعرفوا احنا اد ايه بئينا وحشيييين اوى

وبأعتذر للناس اللى أنا مش رديت عليها
لما أرجع ان شاء الله هأرد عليكو و أزور مدوناتكو
و مش هأبئا موجودة ميل كمان

بجد ياريت تدعولى كتير
........................................................


مقتنع و لا متكتف؟؟!!

لا أكيد مقتنع طبعا ...

اممممم .. أشك ، بتهيألى إنك متكتف ، ولو اتفكت التكتيفة دى ، هتعملها ..

لا طبعا .. إنتى بتتكلمى إزاى؟؟ .. مقتنع ، مقتنع ..

مقتنع؟؟!!... متكتف؟؟!!.. في ايه يا جماعة ؟؟ ماتفهمونا !!..

الحكاية يا جماعة باختصار هى .. إيه اللى مانعك من الغلط؟؟

إيه اللى مانعك إنك تغلط أيا كان الغلط دا؟؟

هل لأنك مؤمن فعلا إنه غلط ؟؟.. و لا لأنه عيب و مايصحش ، و نظرة الناس؟؟..

طب يعنى إيه مقتنع و لا متكتف دى ؟؟

يعنى لو أتفتح لك مجال إنك تمارس الغلط دا بحرية ، و مافيش رقيب عليك ، هل هتعمله ؟؟ يعنى كنت متكتف و اتفكت التكتيفة؟؟ و لا عندك مبدأ و مش هتعمله ؟؟ يعنى مقتنع؟؟


طب تعالو نبتدى عشان تفهمو قصدى أكتر ..

تعالو نبتدى بأقل الأشياء فى حياتنا و بعد كدا نتدرج ..

مثلا .. أيام زماااااااااااااان زمان ، أيام جدودنا كدا و لا حاجة .. كان ماينفعش إن حد يشتم حد ، عشان كدا عيب و قلة أدب ، ولو حد شتمك .. خليك أنت الكبير و مش ترد عليه ، و طبعا كنت أنت فى نظر الناس ساعتها بتكون شهم و بتكبر فى نظر الناس ..

و فعلا اللى كان يتشتم ماكنش يرد الشتيمة دى ، بل بالعكس كمان ، دا ممكن يحسن للى شتمه ..

تعالو بئا النهاردة .. و الأحوال إتغيرت ، ياترى لو حد شتمك بيكون رد فعلك إيه؟؟ و ياترى الأهل الوقتى بيعلموا أولادهم إيه؟؟

أقل حاجة بنشوفها .. اللى يشتمك تشتمه ، و اللى يضربك تضربه ، و خد حقك ..

هو بغض النظر عن إن " و جزاء سيئة سيئة مثلها " ، "و لمن انتصر من بعد ظلمه " .. فالناس أصلا لو حد شتم ، مش بترد عليه اللفظة بمثلها بس .. لا دا بيتحول لموشح محترم .. و لا مانع لو وصل لتشابك بالأيدى و الاسلحة ، و الحمد لله إن لسه ماوصلناش لمرحلة الدمار الشامل ..


بس تعالو بجد نبص ليه اللى بيتشتم بيشتم ، هيقولك : اه طبعا أرد عليه ، هو أنا أقل منه فـ حاجة؟؟ و بعدين الناس تقول عليا ضعيف ، و طيب و أهبل ؟؟ لا طبعا ..ماسكتش

طيب .. إذن اللى كان مانع الناس قبل كدا بردوا هى نظرة المجتمع و شكلهم قدام الناس؟؟ و لا اقتناع؟؟ و الوقتى لما الوضع اتغير ،و البيئة بئت بتدفعنا للغلط دا ، و نظرة الناس اتغيرت تجاه رد الفعل للموقف دا ، احنا كمان سايرنا المجتمع و أصبح من لوازمنا أن نتطلع على كل جديد فى قاموس السب و القذف ، و لا مانع من اختراع الجديد أيضا ، حتى نفحم من تسول له نفسه بكلمة فى حقنا؟؟؟

و هل ياترى اللى الوقتى فعلا لسه مابيشتمش اللى شتمه ، بيعمل دا عن اقتناع منه؟؟ و لا عشان اتربى انه عيب و بتكسف يرد ، و بيتمنى لو كان جرئ شوية عشان يرد؟؟؟

يا ترى دا صح و لا غلط؟؟ يا ترى متكتف بمؤثر خارجى ؟؟ و لا مقتنع من جوايا؟؟


طب تعالو نطلع لغلط أكبر شوية ، و حاجة بردوا فى كل مكان ، و هى ... الرشوة اللى ماليه كل المصالح و المؤسسات ..

كان زمان .. زمااااااااااااااااااااان ، استحالة تلاقى الكلام دا ، و ممكن كمان اللى يعملها ، يعملها فى الخفا و على استحياء ، و يخاف أوى عشان محدش يعرف .. لأنه –مش هأقول كان مقتنع إنه غلط – كان ضميره لسه حى شوية ، و كمان نظرة الناس ..

تعالو بئا النهاردة ، دى بئت الحاجة الطبيعية ، تلاقى الموظف فاتح الدرج و يقولك " هز جيبك يا سيد " أو " شخشخ الدرج " و حاجات كدا غرييييييييييبة ، اه والله ، و يمكن كمان حاجات أكبر من كدا ، بس دا آخر اللى وصلنى ..


لا الأحلى بئا من كدا ، إن الناس نفسها بئت أول ما تدخل عند أى موظف ، لازم تبدأ له بفتح نفس .. والله مش عارفة ايه اللى بيفتح نفسهم ، دا حتى الفلوس بتبئا قديمة و مقطعة و حالتها حالة يعنى ..

المهم .. و فى كل خطوة تلاقيه لازم يكرم الموظف ،و فى الآخر يبئا ليه الحلاوة .. والله حاجة حلوة خااااااااااااالص ،

و آه بئا لو موظف لسه ثابت على مبادؤه و قيمه و رفض ياخد ، والله الناس نفسها تقعد تقنعه إن دا عادى ، و لازم ياخد ، و بلاش تكبر الحكاية ، و دى مجاملات و....


بجد سبحان الله ، أد كدا المجتمع أتغير و اتغيرت نظرته للأشياء ...

هل فعلا الموظفين الوقتى اللى بيعملوا كدا دول مقتنعين إنه غلط .. بس عشان ظروف الحياة؟؟

ولا الحمد لله ، رزق و ربنا جبهولنا ، هنرفض النعمة بنفسنا ؟؟


يا ترى فعلا عندهم مبادئ – و المبادئ لاتغيرها الظروف- ؟؟ و لا كانوا متكتفين بنظرة المجتمع و الناس و دلوقتى لما الباب اتفتح لهم و بئا طبيعى جدا إنك تاخد ، بل و تطلب بالفم المليان ، و إذا ماطلبتش أصلا بيجيلك من نفسه .. فهل هتقبله؟؟؟

و يا ترى لو ماقبلتش دا .. مش هتقبله عشان مقتنع ؟؟ و لا عشان فى حد مراقبك ، و لا يارتنى كنت فى مصلحة من إياهم اللى بيكحوشوا اد كدا ؟؟؟


تعالو نروح لحاجة تالتة بردوا .. و اللى بئت عادى جدا فى مجتمعنا ، و هى صداقة البنات و الولاد .. ياكلوا مع بعض ، يشربوا مع بعض ، يهزروا و يضحكوا عادى .. أصل إحنا اخوات ،

هل فعلا لو ليك أخت ، هترضى إنها تتعامل كدا؟؟


يا ترى بتتعامل بمنطلق أنا مارضاش لأختى ايه ؟؟ و تعامل البنت بيه ..

و كذلك البنت .. أنا مارضاش لأخويا يعامل اى بنت ازاى .. و تعاملى الولد على أساسه ؟؟؟

و لا بمنطلق أخويا بعامله إزاى ، و أعامل بيه أى حد يقولى ممكن نبئا إخوات ؟؟


و يا ترى زمان رغم إن كان فيه بردوا نسبة اختلاط ، و الازياء بردوا كان بعضها خارج .. كان حاكمهم نظرة الناس ؟؟ و لا مقتنعين إن أصلا دا غلط؟؟

و يا ترى الوقتى لما بئا دا فى المجتمع عادى و بدعوى التحرر و الحرية ، يا ترى أنا مقتنع إن دا غلط و مش هأعمله ؟؟و لا كانت تكتيفه ، و الحمد لله بئا سهل إنى أكلم أى بنت و أى ولد ...عادى ؟؟


و بردوا فى النقطة دى مهم جدا إنى أذكر إن مش الشباب وحدهم بس اللى فى المشكلة دى، بل من أحدث التفسيرات لأزمة منتصف العمر التى يعانى منها الرجال و بعض النساء أيضا ، إنهم كانوا محكومين بفعل المجتمع ، و غلط و عيب ، و لأنهم أصلا ماكنوش مقتنعين ، انما متكتفين ، فلما انفتح المجتمع و دخلنا عصر الفضائيات و الانترنت .. خلاص اتفكت التكتيفة ، و كل واحد بيدور إزاى يرضى نفسه و شهواته و ..عادى ، إحنا فى عصر الحرية !!...


طب تعالو لمثل أخير ، و معلش طولت عليكو أوى .. وهو السجاير و المخدرات ..

كان زماااااااااااااااااان .. الواحد ما يقدرش يدخن السجاير دى ، و عيب .. و اللى كان يشربها يروح يشربها فى حته مايشفهوش فيها حد ، فضلا عن المخدرات اللى ماكنش بيعرف ينطقها أصلا مش يشربها ..


تعالو بئا الوقتى ، بئا السمت العادى جدا إنك تشرب سجاير ، و اللى مايشربهاش أصلا عيل .. ولو يجربها ، يعيش أحلى دماغ .. و لا أقولكو ، دى بئت قديمة ، ماعدتش تنفع .. يشرب مخدرات على طول .. يعيش أحلى دماغ ، و أحلى احساس ..

يمكن صحيح المخدرات لسه عليها رقابة شوية ، بس لو فعلا بئت عادى إن أى واحد يطلعها و يشربها زى السجاير كدا ..

هل فعلا هتشربها ؟؟ و لا مقتنع إنها غلط و مش هأشربها أيا كان؟؟

و ياترى ايه اللى مخلى شباب كتير الوقتى لما بيسافر برا ، أو يروح لأى منطقة سياحية ، و اتعرض عليه يشرب بيشرب عادى ؟؟

هل يا ترى فعلا مقتنع ؟؟ و لا كانت تكتيفه و الحمد لله اتفكت؟؟



هل فعلا إحنا عايشين بمبادئ و قيم؟؟ و لا بئينا عايشين برد فعل الناس و قيود المجتمع ؟؟

هل فعلا من جوانا مقتنعين إننا بنعامل ربنا ،و مقتنعين بشرعه ؟؟.. و إن دا حلال و إن دا حرام ، و بنراعيه ، وهو اساس مبادئنا و قيمنا اللى مؤمنين بيها؟؟؟ و لا متكتفين برد فعل الناس و قيود المجتمع اللى لو اتفكت معندناش مانع نجرب و نعمل ؟؟؟ ماهو بئا ..عادى

معلش طولت عليكو أوى .. بس الموضوع فعلا مهم جدا جدا – فى وجهة نظرى-



خالص ودى


52 comments:

Anonymous said...

امسك بوست امسك بوست

Anonymous said...

ههههههههههههه اول تعليق

Anonymous said...

بحجز وجايه

وردشان smilyrose said...

والله

ايه دا بقى خيانة عظمى

لابد من القبض عليكى

اياكى ان تهربى

وردشان smilyrose said...

بت يا حروف

قلت سلمى نفسك

احترسى نفسك واستسلمى

احسن

Soul.o0o.Whisper said...

حررررررررروف

ههههههههههههههههههههه


احجزى احجزى

امسك بوست
و احجز تعليق


انتى بتشتغلى فين يا بنتى؟؟؟

وردشان smilyrose said...

نكلم بجد بقى

عارفة يا سول حاجات كتيرة قوى

فقدها مجتمعنا وضاعت وسط الزحام

المشكلة اننا بنرمى دا على الزمن

مع اننا مشكلة زماننا دا

وناس كتير بتقول الظروف بتحكم

ودى حجة او مبرر عشان بغلطو

ويعملو اللى هما عاوزين

بس لو كلنا اتمسكنا بالمبادئ الصحيحه

مش هيبقى فيه مشكله

ونحل عن زمانا بقى هو زنبه ايه

نعيب زماننا والعيب فينا

وما لزماننا عيب سوانا

والله احنا العيب اللى فيه

وردشان

smilyrose

روح الحب الصادق

Soul.o0o.Whisper said...

سمايلى

هههههههههههههههههههههه


أيوا أيوا أنا باقول كدا بردوا


شكلها خطر على الامن القومى


هههههههههههههه

وردشان smilyrose said...

انتى شايفة كدا يا سول

خلاص نقبض عليها

ونتحفظ عليها فى مكان

امن لحين صدور اوامر اخرى

ههههههههه



♥ ♥ ♥

smilyrose

♥ ♥ ♥


روح الحب الصادق

Soul.o0o.Whisper said...

وردتى الجميلة

تسلمى يارب

جبتى الخلاصة فعلا
احنا عيب زماننا

ماهو الزمن مش اللى بيطبع الناس
الناس هى اللى بتطبع نفسها

و بتستهل بئا ان القيود مرفوعة
و مفيش رقيب




تحياتى لمروك الجميل يا وردتى



دمتى بكل ود

Soul.o0o.Whisper said...

ههههههههههههههههههههه


خلاص علم و ينفذ

جارى القبض عليها


ههههههههههههههههههه

د.خالدأمين said...

انا مقنع


اه والله




فاهم وجهه نظرك

بس منين جبتي اسم البوست


غريب قوي



انتي مشروع اديبه هايله

بجد




العواف

القلم السكندري said...

السلام عليكم

صاحب الشخصية القوية لا تقيده نظرات الناس.. ولا معتقدات الناس.. ولا أفعال الناس


بل يفعل ما يقتنعُ به تماماً .. ولو اعترضت عليه الأرض بأسرها.. ولو طردته الدنيا منها.. فسيختارُ قبرهُ قبل أن ينحني


هذه هي النقطة الأولي.. والنقطة الثانية ولن أتعرض لتفصيلها حتي لا أشوش روح العرضِ ومضمونه بالتطرق لنقاش حول مثل معروض

وهو المثل الأول من رد السباب

لا يختلف أحد حول فضيلة العفو والصفح وأنه (الأولي والمستحب).. ولكن كذلك لا نستطيعُ تحريم ما أجازه النبيُ صلي الله عليه وسلم بقوله: (المستبان ما قالا فعلي الأول منهما ما لم يعتدِ الثاني).. أي أنه لو سبّ رجلٌ رجلاً فرد عليه سبته دون أن يتعدي ويزيد فالإثمان علي الأول منهما وعلي البادئ.. والمسلم لا يملكُ أن يحرمّ ما أجازه صلي الله عليه وسلم تحت مسمي العيب أو اي مسمي آخر من مسميات المنع

باقي الموضوع شكلاً ومضمونا أوافقك عليه قلباً وقالباً


تقبلي وافر التحية

mohamed ghalia said...

إحنا بقينا فعلا فى زمن غريب
كل حاجة فيه عادى وكل حاجة فيه مباحة
بجد موضوع هايل
دمتى بكل الود أختى

Dr.Mohammed Gohary said...

أنا مقتنع من زوماااااان
أظن انتي عارفة اني مقتنع من زوماااان

هههههههههههه

بجد والله موضوع أكثر من رائع

أنا عن نفسي بحب أترك الضار وأنا مقتنع إنه ضار زي التدخين مثلا

تحياتي
وبجد بجد
ربنا ما يقصف قلمك
ولا يبوظ جاك كي بوردك

يلا بقا
العوااااااف على رأي خالد باشا

adel said...

قيم ايه و مبادئ ايه ؟؟

انتي واضح انك مسافرة من زمان

----------------
سيبك من كل ده
ده مش هيتغير

المهم اللي مضايق يغير نفسه واحدة واحدة احتمال نرجع زي زمان
ايام الفراعين الملاعين

Soul.o0o.Whisper said...

د.خالدأمين

أنا مقتنع*
طيب الحمد لله
دى بداية كويسة
:)


منين جبتى اسم البوست*
مش عارفة صراحة
هو الموضوع اوحى لى بكدا
و انت عارف بئا الوحى لما ييجى




مشروع؟؟؟
ربنا يتممه بخير يارب
دعواتك






الله يعافيك

Sweet Violet said...

اولا اللى مقتنع مبدأ معين مش هيتغير بتغير الزمن

اما بقى اللى بيتغير فده زى ماقولتى كان متكتف او مكنش لاقى فرصه و الحمدلله جتله

عموما اى شئ كان فى زمن ما غلط و عيب و بيتعمل فى الخفاء فى الزمن اللى بعده بيبقى عاده عاديه جداااا و على العلن

Soul.o0o.Whisper said...

القلم السكندري

و عليكم السلام و رحمة الله

اولا : صح
عندك حق بكل كلمة
حتى فى ثانيا



عندك حق ان الاسلام قال بأخذ الحق
و أنا ماقلتش تسامح و تعفو
بالعكس أنا ذكرت الايتين من القرآن نفسه
اللى ربنا أمرنا فيها بأخذ الحق


لكن بشرطه ..
اللى هو ايه؟؟؟؟
عدم الاعتداء

يعنى ترد الكلمة بكلمة
لكن هل فعلا دا اللى بيحصل؟؟؟


اعتقد ماحدش بيرد الكلمة بكلمة
و لا انت ايه رأيك؟؟؟






دمت بود

Soul.o0o.Whisper said...

mohamed ghalia


فعلا
زمن غريب جدااااااااا
بس دا لا يمنع اننا مطالبين بردوا بالمحافظة على قيمنا و مبادئنا


دمت بكل ود

القلم السكندري said...

اه منا نوهت لحضرتك علي الموضوع ده في كلمتي فوق وقلت::

).. أي أنه لو سبّ رجلٌ رجلاً فرد عليه سبته دون أن يتعدي ويزيد فالإثمان علي الأول




تقبلي وافر التحية

Soul.o0o.Whisper said...

Dr.Mohammed Gohary

أنا مقتنع من زوماااااان*

طيب كويس والله
الحمد لله


وبجد بجد
ربنا ما يقصف قلمك
ولا يبوظ جاك كي بوردك*

ياااااااااااااااااااارب
اللهم آمييييييييييين



الله يعافيك

Soul.o0o.Whisper said...

adel


قيم ايه و مبادئ ايه ؟؟
انتي واضح انك مسافرة من زمان*

؟؟؟؟؟؟؟
تقريبا بردوا كدا

مشش عارفة
أنا كنت فى زمن جميل والله
و بعدين إذ فجأتن
لقيت نفسى هنا

ربنا يستر؟؟
ربنا ما يجبش إذ فجأتن أخرى



المهم اللي مضايق يغير نفسه واحدة واحدة احتمال نرجع زي زمان*
ايوااااااااااااااااا
هو فعلا كدا
ربنا ييسر





منور يا حضرة جناب المدير

Soul.o0o.Whisper said...

Sweet Violet

سويتىىىىىى

صح كلامك
و دا اللى بنقول عليه التعود على الغلط
و بردوا دا بيرجع بنسبة كبيرة للتربية

إن الوالدين مش بيزرعوا دا جوا ولادهم
و بيسيبوهم للمجتمع

منورة



ودمتى بكل ود يا قمرى

Soul.o0o.Whisper said...

القلم السكندري



أهلا بيك مرة تانية
و شكرا على التنويه


أنا بس حبيت أقولك
إن مش معنى كلامى انى باقول سامحوا
لكن يبئا على اد الكلمة بس





تحياتى ليك

و دمت بود

قيس بن الملووووح said...

اولا انا مقدر وشاكر وممنون لزيارتكم الكريمة ولفهمكم العالي ةتفكيركم المتزن ومنطقيتكم في النقاش ولكن اود لن اورد بعض الملاحظات.
1- مادفعني لكي اسجل تلك الاحداث في مدونة باسم مستعار هو انني من احرص الناس علي ان لا اتحدث في خلافاتي الزوجية مع احد حتي اقرب الاصدقاء لي الوحيدين الذين اتحدث امامهم هم والدتها واخواتها وكثيرا ما يكونون حياري بيننا وليس لديهم سوي تقديم النصائح.
2- ليست هي التي كانت السبب في عودتي الي الدراسة وصنعت مني صلبا قويا يتحدي الظروف.
3-ابنتي اعدك بان احاول واحاول ونسأل لله ان يأتي بالفرج

blue-wave said...

بجد بجد
بوست رائع
بس انا متهيألى
ان اللى بيمنعنا من الغلط
قبل قيمنا وتقاليدنا
هو خوفنا من ربنا
بمعنى
لو انت مقتنع بدينك
ومقتنع بربك
هاتنفذ اوامرة
وتبعد عن نواهييه
وبكدة تحمى نفسك من الدخول فى دوامة العلمانيه من حيث يا ترى انا مش بعمل دا علشن مقتنع ولا علشان متكتف؟
تحياتى ليكى

dr_samarmar said...

ممممممممممممممممممممممممممممممممم

موضوع مهم اوى أوى أوى يا سولتى

للأسف الشعب المصرى من أكبر الشعوبل التى تعانى من الاذدواجية

يقولو كلام و يعملو عكسه
يقنعو نفسهم انهم مقتنعين ببعض المبادىء و القيم و عند أول فرصة مافيهاش حد مراقبنى بنسى كل دا

و بينسو ان ربنا رقيييبنا كلنا

ممممممممم

انا مش عارفة أنا وحشة أوى كدا و لا لا :$ :$

و لأنى صريحة بقولك مش عارفة يا سول

ياترى أنا لو فى مكان تانى كنت هفضل نفس سمر دى بكل صفاتها

و أرجع و أقول الحمد لله ان مجتمعنا مازالت فيه بعض القيم و مازال فيه بعض الشدة فى نظرة الناس لبعضها

لأن تسيب المجتمع و ان كل بنى أدم يكون مسئول عن نفسه فقط دى فتنة كبيرة أوى أوى ماعرفش اذا كنت قدها و لا لا

كل الأمثلة اللى طرحتيها حلوة اوى
السجاير و المخدرات و الالتزام فى اللبس و الرشاوى و الاختلاط.. كلها قضايا مهم تتناقش جدا

بس سيبك انتى.. عجبتنى أوى حكاية ممكن نبئا خوات دى
هههههههههههههههههههه

Beram ElMasry said...

الاخت العزيزة Soul.o0o.Whisper
السلام عليكم ورحمة الله وبركاته
اسعد الله صباحك بكل الخير
ابنتى العزيزة قرات موضوعك الطويل جدا ، وهوجيد استحق المعاناة ، ولانى اكره التطويل ساختصر واقول :
المبادئ ادوات تكتيف باختيار المجتمع ولا يتخطاها الا سفيه
الرشوة قديمة والاختلاف فى الاسم والتوقيت وهى
1- النذور رشوة لخدام صاحب المقام بعد تحقيق امنية اى مؤجلة
2- الزيارة رشوة سابقة على الطلب علشان يخلى فى عينة حصوة ملح
3- العزومة رشوة عملا بالمثل اطعم الفم تستحي العين
4- حتى اهداء وردة لمن نحب رشوة عشان يخلى ايده فرطة شوية
لك تحياتى والسلام عليكم ، ولا سلام مع اليهود
بالخطا وضعت التعليق فى مكان اخر واعيد وضعه فى المكان الصحيح

*البت المشمشية *حلوة بس شقية * said...

قيم ومبادئ
ايه يبنتى
انتى نمتى كام سنة
خلاص الزمن ده بقه زمن اخبر

Anonymous said...

اعتذر جدا عن الغياب والتاخير

والى ان اصل

اتمنا لك التوفيق باذن الله تعالى

فى كل شىء

كلنا مقاومة said...

السلام عليكم

زمان كان يمنع الخروج عن الآداب هو العيب فالعادات والتقاليد كانت أقوى من الدين أما الآن فما يمنعك عن فعل أى شىء هو الدين لأنه لم يعد هناك عيب

Kiara said...

بخخخخخخخخخخ

انا جيييييييييييت يابسر

انا حندي مبدا ومس اي مبدا

ايه دا هو لسه التهيس ماثر ولا ايه

لالالا جد بقي

الحمد لله مش بعمل حاجه الا وانا مقتنعه والحمد لله مش متكتفه خالص :)

Darsh Basha said...

ربنا معاكى بجد..

والموضوع جميل فعلا..بس يمكن من اسباب الانفتاح الوقتى..زعلى فعل الاخطاء..هى عملية ..كل واحد حر ..يعمل اللى عايز يعملة...حكاية الحرية الشخصية ..دون النظر للأخرين للمجتمع ولا للدين

رغم ان الانسان مهما فعل..ففى اشياء بتحكمة..ان لم تكن بأختيارة..ففى بعض الاشياء ...هو مجبر على فعل اشياء معينة

واسف للأطالة

Sweet Violet said...

ايه الحكايه

كل شويه غياب غياب

)):

ربنا يهديك لطريق الصواب

و مش تتاخرى بقى

):

فشكووول said...

شاطره يا حلوه يا بت انت يا دكتوره يا شقيه تبعتينا للمواضيع المحزنه والمبكيه .. آهو انا طاوعتك ورحت ولقيت البت الصغيره ولقيت سواق السرفيس ضربها وقعدت اعيض .. يعنى مبسوطه انت كدا عشان انا بعيط .. ماشى ياايمى شايلها لك
تحياتى

Anonymous said...

يا رب تكون احوالك اتظبطت

وتكون احوالك الجوية مستقرة

باذن الله

Anonymous said...

السلام عليكم و رحمة الله

أهلا بك

مدونه رائعه و ممتميزه حقاً

لكن تعالى نقف شويه معاها


لا يعنى انتشار الغلط بشكل فاحش ف مجتمعاتنا اليومين دول

انها كانت"استحالة" نشوفها ف السابق


لكن المساله فعلا اليومين دول اكثر وضوحاً

اقولك

اصل كل شئ ف اعتقادى

هو التربية

اغلبنا اتربى ع ان دا صح و دا غلط !! او حرام و حلال!
لكن ليه؟

دا سؤال اى طفل ممكن يسأله بتلقائيه

لكن تعالى نشوف الجواب؟

بس يا ولد بلاش قلة ادب ..دا اقل تقدير طبعا
و يكون محظوظ الولد لو ما نال "قلم" معتبر "فوقه" و خلاه "يحرم " يسأل تانى .. ^_*

يعنى اغلبنا اتكتف و ما كان مقتنع ف مرحلة ما من مراحل حياته

لذلك ان لم يكن الله رفيقاً به ف الكبر ف"تلم" الشاب او الرجل "و اللى كان طفل قليل ادب لانه سأل" و طبعاً لا يبعد عن مخيلته "القلم" اللى ع وشه .. فالشب و الرجل اللى بنوع دا

ف حال و جود اى فرصه للمعصيه او "عمل الغلط"
هيعملها

لانه بكل بساطه

اما مكبوت و عاوز "يفك" او مش فاهم "وحابب يتعلم بالتجربه"


و للعلم ان انظمة التعليم لدينا و التى يفترض ان يسبقها"تربيه" ليست متوفره بالقدر الكافى بدما طغى الحفظ و التحفيظ و اصبح مجموع يدخل"تب" فى "السانوى" هو قل اختزال طبيعى لهذه العملية ..

حاسس انى طولت

لكن "اجبلك الخلاصه
"

احنا ف حاجه للتغير

و زى ما قال اوباما ف حملة yes we can
فنحن ف حاجه الى نعم نستطيع اكثر من حاجة الامريكان لها
..

و البداية

من قول الفاروق عمر

"نحن قوم اعزنا الله بالاسلام فان باتغينا العزة ف غيرة ازلنا الله"

و التربية ف عصر النبوبه كانت " ما يجازى الله على شئ اكثر من الرفق" او كما قال صل الله عليه و سلم ..
و ان كان "تعليق العصايه"واجب تربوى "فمن امن العقوبه ساء الادب" فان الفهم و اقامه علاقة حواريه مع الطفل لازمة لنشأه صحيحه

وقتها

و لمايفهم الطفل ان دا غلط مش علشان"وجدنا ابائنا عليها عاكفين" لكن علشان " كذا و كذا" و قتها ووقتها فقط

لو اتيح للولد فرصه للغلط مش هيتركبه ..

يتبقى ان اشكرك لمدونتك الرائعه

و فى انتظار جديدك ان شاء الله

و اعتذر للاطااااااااااااااااااااالة

دمتى كما توين
http://www.tief3abr.blogspot.com/

فشكووول said...

ازيك يا ايمىسول .. تحياتى
انا مقتنع .. مقتنع اما ما اردش الشتمه يبقى دا شهامه منى وادب وتربيه طيبه .. ولما ارد الشتمه او ابتدأ بالشتيمه ابقى قليل الادب وعديم التربيه
كمان مقتنع ان الرشوه والبرطله حرام .. ومن غير حرام هى بتاخد من رجولة الانسان وكرامته كمان .. بس المجتمع الان اصبح غير الامس .. بالامس كنا متسامحين وكانت سماحتنا بتأخذ لنا حقنا وكان من يقف بجانبك اذا انت تسامحت .. اما الان فلا .. لكن جيلنا تربى على السماحه وعلى الادب ..
والدى مات وانا سنى 51 سنه وما كنتش اقدر اولع سيجاره قدامه .. حتى هو عشان كان عارف ان احنا ما نقدرش نعمل كدا كان بيسيب لناالقعده ويروح بعيد عشان نكون على راحتنا ولما كانت القعده تحكم ما كناش نقدر نولعها خالص ومش والدى بس ولحد الان مش بنقدر نولعها قدام اى حد كبير عننا
زمان والزمن بيتشقلب وعلى العموم دى فترة انحطاط مجتمعى وحتروح مع الايام
تحياتى

Soul.o0o.Whisper said...

قيس بن الملووووح


أستاذى العزيز
أولا بأشكر لحضرتك الزيارة الجميلة دى
ثانيا بأعتذر لحضرتك عن التأخير فى الرد
ثالثا بئا
بجد مبسوطة ان حضرتك تقبلت كلامى بسعة صدر
لا و كمان وعد بالمحاولة
ربنا يكرمك حضرتك يارب
و ييسرلك كل امورك

أما بالنسبة لها
فحاول أن تجعل حسناتها شفيعا لسيئاتها
و ربنا يكرمكم جميعا يارب
و نسمع عنكم أخبار جميلة :)


خالص ودى

Soul.o0o.Whisper said...

blue-wave

أهلا أهلا يا دوك
حقيقى شرفتنى بزيارتك
و يارب نشوفك على طول


و كلامك فعلا مظبوط جدا
و دا أنا ذكرته فى آخر البوست لما قلت ان خوفنا من ربنا هو مصدر قيمنا و مبادئنا اللى مقتنعين بيها

بجد بأشكرك لزيارتك الجميلة



و دمت بود

Soul.o0o.Whisper said...

dr_samarmar

سمورتى العزيزة
بجد أنا بأشكرك لأنك ناقشتى بكل وضوح
فعلا إحنا بنقول مقتنعين مقتنعين
بس لما بنتحط فى موقف فاصل
و ماحدش رقيب علينا
ياترى فعلا بيكون ايه التصرف؟؟

هى المشكلة اعتقد فى الطريقة اللى اتربينا بيها

اعتقد عاوزين عمق فى التربية اكتر من كدا





باشكرك بجد تانى
و منورانى دايما يارب






خالص ودى يا قمر

Soul.o0o.Whisper said...

Beram ElMasry


أستاذى العزيز
المبادئ ادوات تكتيف ...ممكن
انما لما يكون فى مبدئ غلط .. يبئا اللى يتعداه مش سفيه

و بعدين أنا لما أكون مقتنع ان المبدئ نفسه صح
هأقبل التكتيفة دى بطيب خاطر
و هأفضل مكتف نفسى بيها حتى لو تغيرت الظروف
انما لو كارهه و مش مقتنع بيه
ماهصدق يتفك عشان أمارس حريتى


و طبعا المثال اللى حضرتك ذكرته صح جدا




خالص ودى

Soul.o0o.Whisper said...

*البت المشمشية *حلوة بس شقية *

ايه دا ؟؟؟؟
بجد؟؟؟؟

اممممممممممم
مش عارفة انا نمت كام سنة
بس تفتكرى فعلا ؟؟



منورة يا مشمشتى
:)

Soul.o0o.Whisper said...

اسماء واحلام فى وجدانى

أتمنى لك حظا سعيدا
و باللتوفيق دائما

و أن تعود بنفس أكثر اطمئنانا




دمت بود

Soul.o0o.Whisper said...

كلنا مقاومة

أولا باشكركم لى زيارتكم الكريمة

ثانيا : قديما و حديثا
كان لابد أن يحكمنا الدين اولا

لأن لما كانت قيود من غير ما تكون محفورة جوانا اتمردنا عليها
انما الوقتى لما فهمنا
كتير مننا فعلا ماعدتش بيعمل الغلط عشان فعلا مقتنع





سعيدة بالزيارة الجميلة
و بانتظاركم دائما


دمتم جميعا بكل ود

Soul.o0o.Whisper said...

كيــــــــــــارا

خيارا
الحمد لله ان عندك مبدأ
و مقتنعة بيه مش متكتفة
هههههههههههههههههههه



سلامى ليكى يا قمرتى
و كمان خالص ودى

Soul.o0o.Whisper said...

mosooz

بالعكس مافيش اطالة و لا حاجة
و سعيدة بزيارتك حقيقى

صح كلامك كله
بس بردوا دا بييجى نتيجة اهمال فى التربية
اتمنى فعلا نهتم احنا بئا بتربية اولادنا تربية صح




شكرا لك
و دمت بود

Soul.o0o.Whisper said...

Sweet Violet


حاااااااااضر يا سويتىىىىىى

أدينى جيت أهو
لما نشوف بئا
ههههههههههههههه




دمتى بود يا قمرى

Soul.o0o.Whisper said...

fashkool


فيلسوفى العزيز
معلش آسفة
لا طبعا مش يرضينى انك تزعل وتعيط

معلش معلش
حقك عليا

شيلهالى ؟؟؟؟
هو احنا فينا من كدا ؟؟؟
لالالالالالا
خلاص سماح بئا
ماشى ماشى
طيب شكرا خاااااااااالص
كنت عارفة ان قلب حضرتك ابيض و مش هيزعل منى
:)



و جميل خالص يا عمو فشكول
فعلا جيلكم كان جيل جميل

بس ايه اللى يخليك تدخن بئا؟؟؟؟
مش قلنا مقتنعين؟؟
كدا ينفع؟؟؟


لالالالالالا
ماكنتش أتوقع منك كدا ابدا
شيلهالك يا عمو فشكول
ههههههههههههههههههههه





خالص ودى

Soul.o0o.Whisper said...

انت تسال والكمبيوتر يجيب

بأشكر لكم الزيارة
و أتمنى أن آتيكم فى أقرب وقت






دمتم سالمين

Soul.o0o.Whisper said...

أحمد عمر

حقيقى بجد نورتنى بالزيارة
و بجد حقيقى بأشكرك على كلامك
و مافيش اطالة و لا حاجة

انت قلت كل اللى نفسى أقوله بايجاز جميل جدا

و صح فعلا البداية من التربية

ياريت فعلا نهتم بتربية اولادنا بعد كدا
عشان مش يكونوا متكتفين




خالص ودى