الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Feb 24, 2009

صــرخـــة ألـــــــــــم



أنا آسفة جدا يا جماعة على غيابى المرة دى ، صدقونى غصب عنى ..

طبعا بأعتذر لأستاذى العزيز / بيرم المصرى أولا لأن المفروض من البوست اللى فات كنت ناقشت موضوع أنا وعدته بيه .. بس والله أنا مش ناسية ، و معلش سامحنى فى البوست دا كمان ..

ثانيا أنا كنت فاكرة إنى هآخد يومين أجازة أستريح فيهم .. للأسف جدت امور زيادة ،

بجد يا جماعة طالبة منكم طلب .. أدعو من قلبكو أوى لـ أ/ محمد مدير المخزن ،و أخو صاحب الصيدلية .. لأنه بجد تعبان أوى أوى ، و طبعا كالمعتاد فالدكاترة المخضرمين لسه مش وصلوا لتشخيص حالته ،و ياعينى بئاله يومين مش بينام و صراخ من الالم .. بجد أنا بس سمعت صوته حسيت قلبى بيتقطع .. آه والله ،ماعرفتش صوته من شدة الالم و بيخرج بصعوبة و بعد مجهود ، معقول دا اللى ماكنش بيبطل ضحك و هزار!!.. بجد ربنا يكون فى عون والدته و زوجته و أولاده .. فعلا احساس العجز وحش و أنت شايف انسان قريب منك بيتألم ...

اللهم أشف مرضى المسلمين جميعا ..

لا و كمان جانى مندوب النهاردة بيسأل عليه ، فلما قلت له على حالته ، قعد يشكى لى هو كمان ، ان بئاله أسبوعين تعبان و احواله مش مستقرة ، و زوجته كانت فى المستشفى بتولد ، كانت حامل فى توأم الولد مات و البنت فى الحضانة .. حاولت أواسيه ، قلت معلش ماتعرفش الخير فين ، و يمكن كان هيكون مش بار بيك ..قاللى الحمد لله والله ..أنا باحمد ربنا على كل حال ، بس كان حلم جميل بئالى 13 سنة باحلم بيه ،و لما خلاص هيتحقق يروح منى ؟؟!!.. بجد حاولت اقوله اى حاجة، قلت له والله كل شئ بحكمة ماتعرفش حكمة ربنا فين و أهم شئ ربنا يبارك لك فى البنت و تبئا قرة عين لك ، قالى البنت فى الحضانة بئالها 3 أيام دفعت فيهم 10 آلاف جنيه ،و مش عارفة 11 ألف تانيين فى ايه ، و حالتى صعبة خالص .. طبعا اتكتمت و معرفتش أقوله ايه !!..


أما بئا بالنسبة لليومين اللى فاتوا ، فطبعا بعد زن الاخوة الاصدقاء قلت هأقولكم انا كنت متضايقة فى الاول ليه ،عشان تعذرونى ..

طبعا أنا كنت من أسبوعين تقريبا مسافرة دمنهور ..أزور انسانة ،تعتبر عمتى ..

و أد ايه باكون سعيدة لما باكون عندهم .. لأن حقيقى عندهم باحس الحب الصافى

باحس انى فى عالم تانى خااااااااااااالص غير الكرة الارضية دى

سواء هى أو أولادها و أحفادها .. ياااااااااااااااه ، بجد بأحس ان لسه فى بشر فى الدنيا دى

المهم ان يوم الجمعة أختى بترن عليهم عادى ، لقيت ابنها بيتصل و يقول البقاء و الدوام لله

طبعا اتصدمت .. امتى؟؟ ... لسه حالا اهو ..

كان جوايا احساس مش قادرة اوصفه من قبل مانسافر ، وهو انى هافقد حد ، و بصراحة لسه جوايا ..ربنا يستر..

قعدت أهيئ نفسى ، بابا ممكن؟؟ -بعد الشر عليه يا رب و يخليه ليا -..

طب ماما ؟؟ -بعد الشر عليها و يخليها ليا يارب- ..

المهم لما سمعت الخبر دا .. قعدت اقول معقول الاحساس دا كان ليها؟؟ ، سبحان الله ..

لينا نصيب نشوفها ، و تشوفنا قبل ما تنتقل إلى رحاب الله ..

ياااااااااااااه لو قلت لكم يوم الجمعة مر عليا ازاى ،و أنا لسه مش مستوعبة ،

حاولت أهرب و مافكرش فى الموضوع خاااااااااالص .. دخلت اتكلم مع صافى (بنات أفكارى )

لقيتها بتحكيلى حكاية البنت اللى حطيت اللينك ليه فى البوست اللى فات ..

طبعا نفسيتى بئت تحت الصفر .. و افتكرت نماذج كتييييييييير للاهمال والسلبية

و قصص اتحكت لى خلتنى عاوزة أهرب من الدنيا دى ..

أولها واحد معرفة حكالى انه كان فى مرة هو وواحد صديقه فى زيارة لبلدة ما ،

و بعدين كان ساعة صلاة فدخلوا مسجد يصلو .. فلقو واحد فى ركن المسجد بيتأوه و بينزف

الراجل كان بيموت ...و الناس حواليه اللى بيصلى –قال بيصلى قال – و اللى بيتوضا ، و اللى ...

و سايبين الراجل ينزف .. بيقول أنا مصدقتش اللى شايفه ، جريت على الراجل قعدت ازعق فيهم ان حد يلحقنا بعربية او تاكسى

مافيش ..

المهم صاحبه اللى كان معاه وقف تاكسى و أخدوه للمستشفى ..و الحمد لله الراجل كان لسه له عمر ..

بجد أنا كنت مذهولة و أنا باسمعه ... فى مسجد ؟؟!!!.

وفى ناس واقفة تصلى ؟؟ بيصلوا بأنهى وش دووول ؟؟

و لا العبادة بئت حركات بتتأدى و خلاص؟؟... فين الشهامة و النخوة بتاعتنا؟؟؟

أد كدا بئينا بنهون على بعض؟؟؟

يعنى لولا كرم ربنا بإنه كان معدى ..كان الراجل دا راح فيها ..

كمان حكاية طنط اللى قلت لكو انها تعبانة و دا قد يتوقف عليه كل حياتها ..

طنط طلع عندها ورم على الحبل الشوكى .. دا خلاها ماعدتش قادرة تحرك جسمها اطلاقا

و كمان عامل التهاب فى كل اعصاب جسمها ..اى حركة تصرخ منها

و لو كانت فضلت شوية ،كان لاقدر الله عمل لها شلل كامل

بس الحمد لله كانت عناية ربنا ألطف بيها ، و عملت العملية الحمد لله وهى الوقتى افضل و ان كانت الخطورة لسه

و شوف تصريف ربنا ..ان يوم ماكنت بازورها ، كان سكشن طب داخل و الدكتور شرح حالتها ،

و قال طبعا هى وصلت لمرحلة متأخرة جدا ،و كل دا بسبب اهمال الدكتور اللى عالجها فى الاول

و قعد يقولها دى خشونة .. لحد ما الورم ما كبر ،و بئت بالحالة دى ..

فعلا .. الدكتور قعد يقولها دى خشونة ..دى خشونة ،و يعطيها مسكنات مسكنات ،

و جلسات ، و غيره و بعد كااااااااااااام شهر ، لما اكتشف ان حضرته تشخيصه غلط

قالها : أنا متأسف يا حاجة .. دى مطلعتش خشونة ..

والله ؟؟!!.. طب صح النوم يا دكتور .. و سلام للنوم فى العسل ، و الاستهانة بحياة انسان كان ممكن يصاب بشلل كامل بسبب استهانة حضرتك ... طب بلاش ، مش مقدر حالة الناس اللى بتحبه؟؟ حالة اولادها ممكن تكون عاملة ازاى .؟؟

طب سيبكو من دا ، دا اعترف بغلطه و الحمد لله لحقناها ..

الاسوء بئا ..حكاية قالتهالى جارة لى ، أخوها دكتور و كان بيشتغل فى مستشفى ، المفروض انها من أنظف المستشفيات –طبعا خاصة -،

دخلت حالة مستعجلة ، كان لازم يعملولها عملية ،أو رجله تتبتر ، قام بسرعة اتصل بالرئيس بتاعه ، اللى هو مفروض أستاذ دكتور فى الجامعة .. قام سعادته قال له عين الحالة للصبح – دا مثلا بمناسبة انه كيس دم هيحفظوه فى التلاجة لحد الصبح – المهم هو قعد يفكر لو سابه للصبح ، كدا هيبئا بتر بتر ،من غير رجعة ..

قام اتصل بجراح زميله جه و عملوا العملية للراجل و أنقذوه من بتر محقق ، يقوم ييجى الاستاذ الدكتور الصبح ، يزعق و يهدد و يتوعد ، يقوله يا دكتور كانت رجله هتتبتر ، يقوله ما تتبتر ، أنا قلت لك عينه للصبح يبئا تعينه للصبح ، و قام محوله للتحقيق ، تخيلو !!..

عارفين بئا قاله تعينه للصبح ليه؟؟ عشان كل ساعة بالشئ الفلانى ..دا أولا ، ثانيا هياخد فى عملية البتر أكتر ماكان هياخد فى العملية اللى أخو جارتى دى عملهاله !!!!!...

فأخو جارتى ماسكتش رفع عليه قضية ، قامت الست الدكتورة مديرة المستشفى لما لقت ان الموضوع هيكبر و ممكن يجر ناس كبيرة فى الموضوع قامت شاهده ضده ، و طبعا قضيته اتحفظت ، بل كمان اخد جزا هو و زميله .. و الاستاذ الدكتور اتكرم و خد اللى فيه النصيب ..

بجد ، أنا أسوء انسان عندى فى الدنيا دى ، هو الطبيب اللى بيبيع ضميره ، أصله انسان شال بارادته امانة حياة الناس ، و أقسم على كدا ، يبئا لما يدوس على الحلفان دا عشان خاطر مادة .. معلش سامحونى ، يبئا واحد لا يستحق أن يطلق عليه لفظ آدمى ..

دا انا ساعة ما كنا بنقسم القسم .. والله حسيت الدنيا لفت بيا ، و لسانى تقل ، و قعدت أقول يارب قوينى ، أنا مش أد الامانة دى ..

ما بالك بئا وهو طبيب ؟؟؟

بجد كنت هأتجنننننننننننننننننننننن ..

طب سيبنا من الدكاترة و الناس اللى نقول انها مالهاش صلة بينا فعادى مش مقدرين ،

تعالو بينا و بين بعض ، بين ناس المفروض العلاقة بينهم تخليهم يخافو علي بعض من نسمة الهوا ...

صديقتى بتحكيلى عن زميل لها.. حكالها ، انه تعبان و مخنوق و مش طايق حد ، و لما سألته قالها أصلى باحب بنت ، بس مش هينفع .. قالت له ازاى يعنى ؟؟

طبعا هو لسه بيدرس ، وهى لسه بتدرس بردوا .. قالت له الحكاية بدأت ازاى ؟؟.. قالها كدهو ، لوحدها .. كانت تسلية فى الاول بس قلبت بجد ، قالت له يا سلاااام ،كانت تسلية؟؟ طب ماكنتش عارف انها بتقلب بجد .؟؟... قالها لا كنت حاسس ، بس كنت سايبها ، كان احساس حلو .. و بعدين اكتشفت فى البنت حاجات حلوة اوى اوى ..مش متخيل انى ممكن ألاقيها فى بنت ..

قالت له و بعدين ؟؟.. قالها بس انا لما فكرت فيها بئا بجد الوقتى ،لقيت مش هينفع ،أنا لسه بأدرس و هى كمان ، يعنى حتى لو تم الموضوع هأفضل رابطها جنبى لحد ماكون نفسى .. و ماكنتش عارف ابلغها ازاى .. و سبحان الله ساعتها حصلت خناقة ، و سيبنا بعض ، بس رجعت ترن عليا تانى ..و أنا عاوز اكلمها .. اعمل ايه؟؟

تعمل اييييييييييييه؟؟.. والله ماعرفت أجاوب عليها أقولها ايه ؟؟.. قلت لها الحكاية من الاول غلط ، بس مش وقت أولها ، احنا فى الوقتى نعمل ايه؟؟ قلت لها يكلم اهله لو فعلا عاوزها؟؟.. حكى لمامته على انه واحد صاحبه ، مامته قالت له صاحبك دا هايف .. طبعا سكت ماتكلمش ، طب ايه العمل ؟؟ و ايه شعور البنت ؟؟ هى كمان غلطت ، طبعا مافيش غير انه يسيبها ..

بس ليه بنستهين بمشاعر بعض اوى كدا ؟؟؟ ليه بنلعب على بعض و ساعة الجد ننجرح اوى ؟؟

كمان موقف لواحد جالى الصيدلية طلب ازازة و شريط دوا ..جبتهومله ، قام مفرغ الشريط فى ساعتها و فتح ازاة الدوا و خدها جرعة واحدة .. طبعا انا اتصدمت و فضلت مذهولة ..ايه اللى حصل ادامى دا؟؟؟ قاللى هترميها يا دكتورة و لا أخدها معايا ؟؟ أنا ماحستش غير و الازازة فى ايدى ؟؟ازاى ؟؟؟ماعرفش ... لما لقانى كدا ، قاللى والله يا دكتورة غصب عنى ، أصل أهلى عودونى عليه من صغرى .. أوعى يا دكتورة تقربى ناحية الحاجات دى ، والله ماهى حلوة .. و مشى ...

انا محستش غير جسمى بيتهز جامد و بارتعش و قعدت اعيط .. ايييييييييييه داااااااااااااااااا؟؟؟ مش مصدقة ، و مش مستوعبة .. أهله؟؟!!..هو طبعا بيكون مش قصدهم ، بس ماحاولوش يعالجوه ؟؟ والله صعب عليا ..

و اللى افظع و أفظع .. حكاية بنت ، فى يوم لقيت أخت –فاعلة خير- جايبة لى روشتة من مصحة نفسية ، الروشتة كلها ادوية للاكتئاب الشديد بتاع حوالى 8 أصناف

و لما سألت عن الحكاية ، قالت البنت دى والدها مدمن ، و كان دايما يضرب مامتها و هى و أخوها ، بس مامتها دايما تحوش عنهم ، المهم أول ما بلغت السن القانونية جوزها على طول ، بس الصراحة زوجها انسان قمة فى الاخلاق .. المهم بعدها بفترة مامتها اتوفت ، قام ابوها فضل بينها و بين جوزها لحد ماطلقها منه ، و زوجها صراحة اعطى لها كل حقها ..

يقوم ايه ؟؟ يقوم الاب الهمام حابس بنته فى اوضه ،و بعد ما يظبط الدماغ يخش عليها يعاشرها ..نعمممممممممممممممممممممممممممم؟؟؟

بجد اتصدمت دى كلمة قليلة .. ماصدقتش ، قالت والله ، و فضل على كدا فترة لحد ما البنت جالها اكتئاب شديد و حاولت تنتحر بانها ترمى نفسها من البلكونة ، بس الحمد لله لحقوها و نقلوها المستشفى و ركبولها شرايح فى الضهر و الرجلين ، و الوقتى هى فى المصحة بتتعالج من الاكتئاب بئالها شهور ...

و طبعا أخوها هرب من البيت أصلا ، لا و غير كدا أبوها مارضاش يضمنها ، و خلاها مرمية كدهو فى المصحة ، لا و الاحلى بئا خد كل عفشها و حاجتها و راح محافظة تانية اتجوز بيهم واحدة اد بنته ..

بصو انا مش هأعلق على القصة دى ..

أنا عاوزاكو تستوعبو ان فى ناس كدا .. انا بجد اول ما سمعت القصة دى حسيت أنى مش فى وعيى ، بجد حسيت باضطراب جوايا شديد خلانى زى ماكون ذاهلة عن كل حاجة حوليا ...

و نرجع نشتم فى الحكومة و أعوان الحكومة , حكومة ايه و بتاع ايه؟؟؟ مانشوف احنا بنعمل فى بعض ايه الاول ؟؟

بجد أنا باسمع حاجات و باشوف حاجات ..

باقول يارب استرنى فوق الارض و تحت الارض ... اييييييييييييييييييه دااااااااا بجد ؟؟؟ هو احنا بئينا فين؟؟؟

والله حتى الحيوانات فى الغابة مش بيعملوا كدا !!....

و لما رحت اجتماع المدونين يوم السبت لقيتهم بيحكوا عن الوحدة و الناس اللى الوحدة جابت لهم امراض نفسية و حاجات كدا ..انا بجد كنت راجعة باقول : لاااااااااااااااا .. أكيد فى حاجة مش طبيعية .. مش معقولة يومين ورا بعض بالشكل دا ؟؟!! ..

بجد كنت عاوزة فترة استرجع فيها نفسى ، احس انى لسه عايشة ، و ان لسه فى بشر ..فى بنى آدميين ..

معلش أنا آسفة إنى عكننت عليكو بالبوست دا .. بس بجد دول بس بعض مواقف ،و ما خفى كان أعظم ..

و لسسسسسسسه ... القادم أحلى .. : ((((((

أنا الحمد لله كويسة و والله مش باحاول استسلم للحالة دى ، بس المواقف كلها جت ورا بعضها ، فعاوزة بس شوية وقت اشعر بالاتزان تانى ..

بجد ادعولى كتير و ادعو لكل مريض ربنا يشفيه ، ولكل مكروب ربنا يكشف كربته ..


سلام


24 comments:

Anonymous said...

ماللك وفينك ووحشاني

*البت المشمشية *حلوة بس شقية * said...

القمر بتاعنا مالو

mahasen saber said...

لا حول ولاا قوة الا بالله

بئه كل ده عندك يا سول وكنتى بتدخلى تواسينى وتخففى عنى فى غياب ابنى
يا ربى انتى جميله قوى وعندك احساس عالى قوى قوى بالغير

ربنا يكرمك على روحك الطيبه دى

وربنا يرحم عمتك ويسكنها فسيح جناته وكفايه كلامك الطيب عليها وعلى اولادها دى شهاده ليها عند ربنا

mahasen saber said...

موضوع الراجل اليى كان بينزف فى المسجد
والبنت اليى والدها مدمن متتخيليش عملوا فيا ايه

واستاذ محمد كلامك عن المه وجعنى
ربنا يعافيه ربنا يعافيه
ويخفف المه

وربنا يقويكى ويصبرك على كل اليى بتسمعيه وبتتعايشيه وبتشوفيه ويطمنا على مديرك قريب
اللهم امين
بس ابقى طمنينا على المندوب وعلي بنته وزوجته وعمل ايه فى فلوس الحضانه ربنا يعينه
وتطمنينا على مديرك اكيد

ربنا يعافى الجميع يا سولو

د.خالدأمين said...

بجد حرام عليكي


ايوه حرام عليكي



ايه كميه القصص والماسي دي


انا النهارده كنت مكتئب مووووووووووووووت
وحاسس ان الدنيا كلها عليه وضدي وشايع وحاجات كده

بس بجد بعد ماقريت البوست ده
مش عارف


المفروض اني استريح لاني بشوف ناس في مشاكل اكبر مني
بس بجد انا تعبت اكتر واكتر ووالله كل جسمي كان مركز وانا بقرا البوست لدرجه ان الموبيل لما رن اتنفضت واتخضيت جامد جدا

معقول الدنيا فيها كل ده

وانتي قابلتي كل ده في فتره صغيره قوي كده

معقول

بجد ربنا يكون في عونك ويرحم عمتك
ويشف ويرحم وينصر كل المظلومين اللي حكيتي عنهم
ويهدي كل ظالم

سلام

الجواز و سنينه said...

يااااااااااااه يا بنتى
و الله فعلا اللى يشوف بالوه غيره تهون عليه بلوته
ايه كميه المأسى اللى بتشوفيها دى
تعرفى بعد ما قريب البوست حمدت ربنا انى مش بشتغل انا نفسيتى بتتعب بصوره فظيعه
دا انا لما بشوف الناس اللى بتلم الزباله بيبقى هاين عليه اعيط
عمان هاشوف الحاجات دى
تعبتينى بالليل و انا رايحه انام

Sweet Violet said...

لا حول ولا قوة الا بالله

بجد انا مش عارفه احنا بقينا عايشين فين

انا كنت بقول الدنيا اتحولت لغابه بس للأسف حتى الغابه ارحم من اللى احنا بقينا فيه

ربنا يصبرك يارب على اللى بتسمعيه ده

انا بجد بقرا و مش مستوعبه اللى بشوفه ده

بس هنقول ايه ربنا يرحمنا برحمته امين

و يشفى مرضى المسلمين و يرحم امواتنا و اموات المسلمين جميعا

):

د.خالدأمين said...

وتاكيدا لكلام سول ياريت الكل يشوف اللينكين دول ويشوف احنا بقينا ازاي
http://www.masrawy.com/News/Cases/General/2009/february/25/kid.aspx

وده كمان
http://www.masrawy.com/News/Cases/General/2009/January/5/servant.aspx

محمد أبو الفتوح said...

وحدى الله كده و صلي على سيدنا النبي
علشان كده جيتى متأخر و مشيتى بسرعه من غير متكلمى حد
على فكره أنا لو واخدها كده كنت انتحرت من زمان
طبعا مش هاقولك بصى لنصى الكوباية المليان و الكلام ده
و طبعا برضه المقصر لازم ياخد جزائه و عشان كده ربنا عمل جنه و نار .. علشان اللى ماتعاقبش فى الدنيا يتعاقب فى الآخره و اللى ماخدش حقه ف الدنيا ياخده فى الآخره
أنا عارف طبعا انك عارفه الكلام ده كله بس بذكر .. إن التذكره تنفع المؤمنين
و بعدين تعالى هنا .. هو فيه حاجه اسمها موت أصلا .. طبعا فيه بس الموت ده للجسد إنما الروح خالده و منعمه لو مسلمه إن شاء الله
و الأحاديث اللى وردت فى الرحمه و الشفاعه تخليكى تحسى إن ماحدش هايتعزب إلا لو ظلم حد بشر غيره يعنى إنما الذنوب اللى ف حق الله دى ماتخافيش منها قوى علشان هو غفور رحيم و يغفر الذنوب جميعا طبعا مالم يكن الفعل يُأتى بإصرار فما تزعليش قوى ع اللى ماتوا .. داحنا اللى عايشين اللى مصيبتنا كبيره لأننا لسه ف دار الإختبار
و بعدين بصراحه كده بدل ما نقعد نعدد نستغل الوقت ده فى إننا نصلح أى حاجه و لو قامت القيامه على أحدكم و في يده فسيله فليزرعها أو كما قال صلى الله عليه و سلم
و كمان استعينوا بالصبر و الصلاه .. خلى بالك الصبر جت قبل الصلاه
أتمنى إنى أكون قدرت أصبرك و لو شويه صغيرين
و بعدين و انتى داخله اللقاء الجاى تبسمى دى صدقه و بلاش الحزن ده
سلاااااااام

وردشان smilyrose said...

سول وحشتينى يا قلبى الموجوع

غصب عنى يا حبيبة قلبى

وربنا يصبركم ويرفع عنكم الهم والحزن

ويشفى استاذك ويرفع عنه

اعذرنى عن البعد كنت تعبانة ومضغوطة

الفترة اللى فاتت

بس قلقتينى عليكى بجد

ربنا يعدى الأحزان دى ويبعدها عنك

smilyrose

روح الحب الصادق

صمت المشاعر said...

يارب يرحم عمتك ويسكنها فسيح جناته

ويرحمنا برحمته ياااارب

Anonymous said...

اللهم اغفر لمؤمنين والؤمنات




غيبتك طولت اوى اوى اوى

Kiara said...

منه له

منه له

يالهوي

هو انا ناقصه ياختي

ياالهووووووووووي

بت

بت غوووووووووووووووووووووووووووري


غوري غوري غوري هه بس

ليككككككككككي حق تقوليلي مش تقريه

ليكي حق

جالك قلب تكتبي كل دا

يالهوي

امشي يابت من هنا

مش عاوزه اشوووووووووووفك تاني












































الا وانتي بتضحكي وناسيه كميه المشاكل العجيبه المتركبه والمتداخله وا بعضيها وعامله زي البت اللي مش سرحت شعرها لمده قرن وبقي شعرها كتله واحده

سلام يامحلم افتنري

دي منبي منبي يامحلم

انا ماشيه الضغط شكله علي عليا

Soul.o0o.Whisper said...

حرووووووووفى
:)


أنا الحمد لله بخير يا جميل
و هنا اهو
مش واخدة بالك ولا ايه؟؟؟
ههههههههههه


أنتى كمان وحشانى أكتر
يارب تمونى بخير
و آسفة إنى قلقتك


ماتحرمش منك ياااااااااارب




خالص ودى

Soul.o0o.Whisper said...

*البت المشمشية *حلوة بس شقية *


مشمشتى العسولة
أنا الحمد لله بخير يا جميل

ماتحرمش من سؤالك ياااااااارب




خالص ودى يا جميل

Soul.o0o.Whisper said...

mahasen saber

سنسنتى الغااااااااااااااااالية

بجد بجد بجد أنا سعيييييييييدة إنك أخيرا خرجتى من الشرنقة و جيتى علقتى عندى

ياااااااه
ماكنش البوست دا ينزل من بدرى شوية
هههههههههههههههه


حبيبتى بجد اللى يشوف مشاكل الناس
يحس بجد أد ايه هو فى نعمة
ربنا يرزقنا جميعا الرضا بما كتبه لنا
و يعافينا من كل بلاء


ا.محمد
والله شوية شوية
ربنا يعافيه يارب
و بردوا لسه مش وصلوا للتشخيص
والله ماعارفة ايه دا؟؟!!
أما المندوب فلسه مش جه تانى



ربنا يفرج كرب كل مكروب يااااااارب


و ماتغبيش عليا كدا تانى

خالص ودى يا قمرى

Soul.o0o.Whisper said...

د.خالدأمين

معلش متأسفة جدا إذا كنت زودت ألمك
و جبتلك اكتئاب

و كمان اتخضيت
لالالالالالا
ابئا اعمل الموبايل سيلنت و أنت داخل المدونة
هههههههههههه



ربنا يرحم موتى المسلمين جميعا
و يشفى كل مريض
و يفرج كل مكروب



و متشكرة بجد على اللينكات
و مانتحرمش من زيارتك أبدا






دمت بود

Soul.o0o.Whisper said...

الجواز و سنينه


معلش يا دودو آسفة
فعلا ربنا بيدى كل واحد على اد ما يتحمل

ربنا يفرج كرب كل مكروب يارب


و معلش يارب تكونى نمتى كويس







خالص ودى يا جميل

Soul.o0o.Whisper said...

Sweet Violet

سويتىىىىىىىىى

اللهم آمين يااااااااااارب

بجد فعلا الغابة بئت أرحم من اللى بنشوفه
بس بردوا عشان نعرف إنه كله بإيدنا
و إن ربنا بيسلط علينا بذنوبنا


اللهم عافنا و اعف عنا يااااااااارب




منورة يا جميل
و خالص ودى

Soul.o0o.Whisper said...

محمد أبو الفتوح


حقيقى حقيقى بجد
بأشكرك على كلامك
و مانتحرمش من زيارتك ابدا


وحدى الله كده و صلي على سيدنا النبي*
لا اله إلا الله
اللهم صلى و سلم و بارك على نبينا محمد
صلى الله عليه و سلم


علشان كده جيتى متأخر و مشيتى بسرعه من غير متكلمى حد *
أنا جيت متأخر عقبال ما خلصت شغل
إنما فعلا مشيت عشان اتقفلت جامد
بس دا طبعا لا يمنع إن الاعمال كانت قمة فى الروعة
و حقيقى كنت سعيدة بيها



حقيقى مش عارفة أرد على كلامك أقولك ايه
بس بجد ربنا يكرمك
صح
و ذكر فإن الذكرى تنفع المؤمنين
ربنا يجعلنا منهم

و بعدين بصراحه كده بدل ما نقعد نعدد نستغل الوقت ده فى إننا نصلح أى حاجه و لو قامت القيامه على أحدكم و في يده فسيله فليزرعها أو كما قال صلى الله عليه و سلم
و كمان استعينوا بالصبر و الصلاه .. خلى بالك الصبر جت قبل الصلاه*
صح بجد
ووجهة نظر سليمة جدا


ربنا بجد يكرمك و يجعله فى ميزان حسناتك
و معلش متأسفة على التأخير
و حاضر فابتسم المرة الجاية





دمت بود

Soul.o0o.Whisper said...

smilyrose

وردتى الجميلة
أنا اللى آسفة إنى قلقتك عليا

يارب تكونى بخير يا وردتى
و ربنا يخفف عنك يا رب


بجد عاوزة أطمن عليكى ضرورى
أشوفك قريب يارب



سلام يا قمرى

Soul.o0o.Whisper said...

صمت المشاعر



اللهم آمين يارب

سعيدة بزيارتك
و يارب مش تكون الأخيرة



دمتى بود

Soul.o0o.Whisper said...

اسماء واحلام فى وجدانى

اللهم آمين يااااااارب



معلش آسفة بجد
أنتوا كمان وحشتونى جدا يعلم الله

و بإذن الله مش يجيب غياب تانى





دمت بود

Soul.o0o.Whisper said...

كيــــــــــــارا

خيــــــــــــارا


أنتى بالذات ما تتكلميش خالص خالص
تقعدى ساكتة
ضغطك يرتفع و انتى ساكته بردوا

و تمشى بردوا و انتى ساكتة

هههههههههههههههههههههههه





ياللا سلام