الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Mar 9, 2009

مـــــــحـــــــــمــــــد ..... الإنـــســـان




الجو النهاردة كان هادئ و لطيف ، و حسيت بشئ من السعادة يداعبنى فى صمت ..

ابتسمت بهدوء ،و سرحت بخيالى بعيييييييييييد ، أحاول اتنسم عبير الحبيب ...

بكره هيكون يوم مولده ، حبيبى يا رسول الله –صلى الله عليه و سلم – ياإلهى ..

أكيد هيكون يوم راااااااائع ..


ياه لو ييجى يزورنى كدا و احتفل بيوم زى دا معاه ؟؟!!.. أكيد هيبئا يوم مختلف ..

و بعدين رجعت قلت ، و ليه لا .. خلاص أنا هأتخيل إنه جايلى بكرة ، و أشوف ممكن أعمل ايه لو فعلا هيزورنى ،

و آخد النهاردة تدريب عملى .. ياااااااه ، هيبئا يوم تحفة ..



قعدت أفكر بئا .. ياترى حبيبى –صلى الله عليه و سلم- لما يجيلى بكرة ، ايه اللى يخليه مبسوط و سعيد بيا؟؟

اوباااااااااا .. هو هيدخل الاوضة بمنظرها دا .. لالالا ، لازم تنظيم و رواقة عن كدا ، قمت جرى رتبت الاوضة و روقتها ،


امممممممم طب ايه تانى ؟؟.. احم احم ..اه لو سأل بابا و ماما عليا ، هتبئا فضايح ..اه والله .

قمت راحة جرى صبحت عليهم و عاملين ايه ؟؟.. و بوستهم و راضيتهم ، يعنى انتوا عارفين الواحد لازم يعمل حسابه للظروف دى .. : )


امممممممم .. طب ايه تانى ؟؟ ايه تانى ؟؟ صحييييييييييح ، هأقابله ازاى ؟؟

مش لازم حاجة كدا تبسطه و تفرحه .. اممممممم اعتقد دا كويس و مناسب ..


طيب كدا احنا خلصنا الحاجات الظاهرية .. لازم بئا يا سول بجد تحاولى تعملى كل حاجة تفرحه و تسعده ، فى اليوم دا كله،

يعنى تفضلى طول اليوم بشوشة و مبتسمة ، و اسلوب ودود كدا ، مش تزعلى مهما حاول اى حد يزعلك ..ماشى ؟؟

امممممممممم .. تحاولى وقت فراغك تشغليه بذكر الله بردوا ، اولا عشان ربنا بيحب كدا ، ثانيا رسول الله صلى الله عليه و سلم كان بيعمل كدا .. ماشى؟؟

تبئى لطيفة و كويسة كدا مع كل الناس .. اوعى تزعلى لنفسك او تظلمى حد ظلمك .. خليكى كدا امورة و عسولة ..ماشى؟؟


اقعدت اجهز و اشحن نفسى كدا شوية .. و بجد كنت حاسة احساس جميل اوى و انا عمالة اعطى نفسى الطاقة الايجابية دى ..


كان لازم انزل الكلية النهاردة أخلص شوية ورق قبل الشغل .. لبست سريع سريع ، و ...

" أنا نازلة مش عاوزين حاجة ؟؟ .. سلااااااااام "

و أخدت السلم قفزات متتالية ..و كان بجد شعور غريب بالسعادة ..


المهم .. وصلت للمحطة استنى مواصلة .. مفيش ، استنى .. بردوا مفيش ..

" و بعديييييييييين بئاااااااااا ؟؟؟..." بدأت أتعصب .. " سووووول ..أنا قلت لك ايه ؟؟... ممنوع الغضب ، ممنوع النرفزة "

" يعنى عاجبك كدا ؟؟ مانا هأتأخر على الشغل !!.. "

" خير .. كل تأخيرة و فيها خيرة ، و بعدين بدل مانتى واقفة كدا .. أمشى للمحطة الجاية ،و بعدين اشغلى وقتك بذكر الله ، بدل مانتى واقفة كدا مالكيش لازمة .. "

" حاضر .. حاضر ياست سول ...لما نشوف "

مشيت من محطة لمحطة ، و من محطة لمحطة .. لحد ما خلصت أكتر من نص الطريق مشى .. طبعا و الحمد لله كنت بأذكر ربنا بردوا .. فهكذا يحب أن يرانى .... : )


كنت ماشية جنب النيل .. بجد كان منظره جميل ، و كمان الوقت صبح بدرى مش زحمة أوى ،و الناس لحد ما مبتسمين ، لسه ماعانوش من ضغط الشغل و الحياة ..


المهم بعدها ركبت المواصلة لحد الجامعة ،وطبعا أتأخرت ... عاااااااااااادى ، أنت فى مصر ..

" سول .. تتعاملى مع الموظفين كويس و بلاش نرفزة ، هدوء و ابتسامة ..ماشى؟؟" ضحكت و قلت لنفسى : " حاضر يا سولو .. ربنا ييسر "

بجد دخلت المكان بابتسامة كدا و اسلوب مرح ..دقايق و كنت مخلصة ، و كمان حصل موقف لطيف خلى الكل يضحك ،

أصل كان مطلوب دمغة باتنين جنيه و نص ، فأعطيت واحدة من العمال تلاتة جنيه تجيب لى الدمغة و أعطتنى النص جنيه ..

و الموظفة جابت لى ورقة و قالت لى امضى هنا .. انا بئا أقوم معطياها النص جنيه ،و آخد القلم عشان أمضى ..

و بعد ما مضيت ، قفلت القلم و راحة أحطه فى الشنطة ..<<توهاااااااان .. المهم افتكرت ان القلم مش بتاعى قمت عطيتهولها

هى بتاخده منى لقت النص جنيه فى ايدها ..بتقولى ايه دا ...مين اللى اعطانى النص جنيه دا ؟؟ ..<< توهااااااااااان احنا الاتنين والله

قلت لها :" سورى معلش والله .. آسفة ، بتاعى " و فطسنا احنا الاتنين من الضحك و الباقيين ضحكوا بالتبعية ..هههههههههههههه


المهم بعد ما مشيت اقعدت افكر سبحان الله .. موقف من غير ماحد ياخد باله و يخلينا كلنا نضحك ،و خلصت ورقى بسرعة ..بجد كان شعور حلو ..


بابص فى الساعة .. ان ان ااااااااااااااااااااااااااان .. باقى ربع ساعة بس على الشغل ..

" و بعديييييييييييين .. قولنا اهدى و ربنا هييسرها "

" حاضر يا ست الشيخة .. هأهدى خالص اهو .. كدا كويس ؟؟ "

"كويس خالص ... شطووووووووورة يا سول ...عسوووووووووولة "

" شكرا شكرا ... احرجتينى .."

عادى عادى .. دا أنا و نفسى .. دا الطبيعى ، مفيش أى مشاكل ..


استنيت شوية .. و جت مواصلة ، صحيح أتأخرت خمس دقايق على الشغل .. بس بجد سبحان الله ، كانت متيسرة الحمد لله ،

دانا أحيانا بأقف بالساعات ..عادى يعنى ..هههههههههههههه


المهم .. كنت مبسوطة إنى قدرت أهدى نفسى النهاردة و مش اتنرفز و لا اتعصب .. شعور حلو لما تقعد تهدى نفسك كدا و تهزر معاها و تضحك ..و ماحدش يضحك عليا ... اه باقولكم اهو ... و بعدين أنا أصلا كنت باعمل كل دا عشان هو يحب يشوفنى كدا ..

مش كفاية انه يبئا فرحان و مبسوط لما يشوفنى بآخد بوصيته ألا أغضب ؟؟!!... : ))


و حاولت النهاردة اتعامل مع الناس بأفضل الاساليب صراحة .. ماهو النهاردة تدريب عملى بئا و لازم أثبت جدارة ..

مر على أصناف كتير و مندوبين بردوا منهم كدا و منهم كدا .. بس الحمد خرجوا كلهم و على وشهم ابتسامة حلوة ،

و كان ألطف واحد مر عليا .. "محمد" ...سبحااااااااان الله ..ههههههههههههههههه


دخل عليا بيقولى :" لو سمحت عاوز الدوا اللى فى الورقة دا " ، قلت له :" حاضر "

و رحت آخد الورقة منه .. قاللى :" انتى عارفة أنا اسمى ايه ؟؟" قلت له :"لا"

قاللى :" اسمى محمد" .. قلت له :" أهلا بيك يا محمد "

قاللى :" انتى شفتى الدوا اللى فى الورقة دا .. أنا عاوزه بئا الدوا دا عشان ماما تعبانة "

قلت له :" حاضر يامحمد ".. قاللى :" و كمان الفلوس اهى اتفضلى "

" شكرا يامحمد .. بس كدا لسه نص جنيه ... هتقول لماما؟؟"

"ماشى .. انتى بئا اسمك ايه ؟؟"

"سووووووول" .. ضحك

الواد عجبنى صراحة .. متكلم كدا و لبق .. عسسسسسسسسل


جبت الدوا و جيت ..."و أنت ساكن فين بئا يا محمد ؟؟"

" فى شارع بغداد ..تعرفيه؟؟" ... الاسم مش غريب عليا ، بس مافتكرتش .. " لا "

" شارع بغداد ..اللى هو جنب مدرسة الـ... مدرسة الـ... الـ... "

" الـ.. ايه يا محمد ؟؟نسيت !!" ... " اه"

و قعد يفكر كدا شوية ، " ها افتكرت و لا لسه ؟؟ " " لا لسه "

" بعيد يعنى و لا قريب ؟؟" " لا بعيييييييييييييييييييد .. بس على العموم البيت اللى باخد فيه درس اهو ، فى البيت اللى هناك داهو " و شاورلى عليه ..

أنا مش أخدت بالى إنه بيقول على مكان الدرس ، باحسب انه بيتهم ، فبأقوله .." بس دا البيت قريب اهو .. أنت بتضحك عليا ؟؟"

"لاااااااااااااااااا .. أنا مابكذبش " بجد انبسطت اوى " شاطر يا محمد ، ياللا خد الدوا اهو " ... ومشى ..


عسسسسسسسسسسل بجد ، و قعدت أضحك اوى .. ربنا يحميه يارب ، بس قعدت أقول يارب فى سنة كام؟؟ آخره تالتة ابتدائى ..


و لسه يادوب راحة اقعد ... " جنب مدرسة الزراعة ... أنا افتكرت فجيت أقولك "

ياربىىىىىىىىىىىىىى ..فطست من الضحك بجد ...عسل عسل بجد .. " ماشى يامحمد خلاص عرفت " ساعتها بس افتكرت إن الشارع دا اللى فيه عمتو .. شفتوا الزهايمر ..عاااااااااااااادى ..هههههههههههههه

" ألا أنت فى سنة كام يا محمد ؟؟" ... " فى اولى تالت " .. " ماشى .. ياللا بئا ذاكر كويس " .."ماشى "

و مشى ...


أولى ابتدائى ؟؟!!.. بجد ربنا يحميه و يبارك فيه .. الواد عسل عسل بجد ..

المهم بعدها على طول جت لى واحدة عاوزة دوا فـ وأنا واقفة معاها ..لقيته معدى و معاه الكتب بتاعته فى ايده كدا ، و بيبص لى ، و لما لقانى بصيت له قام رافع ايده ، قال بيسلم يعنى .. بجد كنت هأتجنن عليه .. عسسسسسسسسسسسل ، ربنا يبارك فيه يارب ..


بجد روحت البيت فرحانة اوىىىىىىىىى ، و مبسوطة .. و قعدت أقول سبحانك يارب .. بجد اليوم كان راااااااائع ..

فعلا .. أنت بس خللى نيتك لله ،ولو فعلا بتحبه ، و بتحب رسول الله ... محمد .. ذلك الرسول الانسان .. صلى الله عليه و سلم

و تحاول إنك تكون زي ما يحب إنه يشوفك ، أد ايه بتحس بقيمتك كإنسان ، و أد ايه الحياة أحلى ..

و فعلا بتحس إن الدنيا حواليك بتضحك ..

بسسسسسسسسسس .. تلتزم بشرعه ، و تعيش فعلا تصرفاته و حياته فى يومك ..

فعلا بيكون مختلف ، و كمان بئا لما تحتسب يومك دا .. تخيل ييجى اليوم الجميل دا فى ميزان حسناتك ..

بجد سعادة الدنيا و الاخرة ... : )))


و لما روحت البيت .. اتجمعنا على الغدا .. و قعدنا نتكلم و نضحك ... << أكيد لو كان وسطنا كان يحب انه يشوفنا كدا


خلصنا غدا .. و دخلت اوضتى ، لازم بئا أخلى له وقت لوحده ..

و دا صراحة بيكون أحب وقت ليا .. لما أغمض عينى ،و أسرح بعيييييييييييييييد هناك اوىىىىىىى ..


و أتخيل البساتين و الأشجار و الثمار ..

و بعدين أنا قاعدة بئا فى القصر بتاعى ، و قدامى الحديقة ، و كمان النهر بتاعى ..

و فيه اليخت << ماحدش يضحك عليا ..

و بعدين بئا أنا عازمة الرسول –صلى الله عليه و سلم- النهاردة هو و أبو بكر و جماعة كدا من الصحابة ..

و قاعدين بئا فى اليخت فى النهر ، و ياسلاااااااااام لو بالليل بئا

هو صحيح مفيش ليل ، بس أكيد حلاوة النور هناك أحلى من الليل ، بس دا تخيلى بئا ، سيبونى أتخيل ..

و قاعدين نحكى و نضحك .. و الرسول يحكى له عن غزواته ،و الصحابة يحكوا مواقفهم فى كل غزوة ..

ياااااااااااااااااااااااه ..بجد ببئا مش عاوزة أفتح عنيا ..


بأحس إنى أتشحنت ليوم جديد .. حقيقى " أحبك يا رسول الله "

أحب فيك الانسان .. لأنك فعلا بتحسسنى بقيمتى كانسان لما باتبع تعاليم الاسلام ، الدين الجميل اللى جيت بيه ،

و اللى أنت طبقته بجد ، و كل واحد فينا بيحاول يطبقه و يمشى وراك و يعمل زيك ..


بجد الحمد لله على نعمة الاسلام .. و على نعمة إن ربنا هو ربنا فعلا ..

و الحمد لله إنه أرسلك لينا نموذج حى طبق شرع ربنا ..عشان نمشى وراك و نعرف ازاى نعيش



بجد .. بأحبك يا رسول الله –صلى الله عليك و سلم- .. و شكرا لك بجد ، لأنك خليت لحياتى معنى ..


Mohammed – peace be upon you-

Thanks soooooooo much , you had made a sense for my life.



66 comments:

اسماء واحلام فى وجدانى said...

اول تعليق

ولو لسة فيا نفس هارجع تانى

عاشقه الرومانسيه said...

والله كنت باكتب اول تعليق فى نفس الوقت مع احمد
عااااااااا
راح فى الوبا
انا الاول مكرر ماليش فيه بقى هه

عاشقه الرومانسيه said...

هاقرا وارجع

اسماء واحلام فى وجدانى said...

نظرا لحساسية الموضوع

ساكتفى بانا اقول لك ولكل المسلمين

كل عام وانتم بخير

ويارب وفق كل من يريد التقرب منك

ومن العمل الصالح

واستجب لدعائنا باعمالنا

ووفقنا الى كل ما تحبه وترضاه

انك انت السميع العليم

*******************************

اعلن لك رسميا بمناسبة هذا الاحتفال

الكريم اننى قد عفوت عنكى

واخرجت نهائيا من دائرة الشك

والله الموفق

Soul.o0o.Whisper said...

اسماء واحلام فى وجدانى


منور والله
لالالالا ... أشحن أشحن

أنا جيبتلك تورتاية اهو لوحدك و عصير

هههههههههههههههههه

اسماء واحلام فى وجدانى said...

عاشقة الرومانسية

والله ما يغلا عليكى

اتفضلى بالمناسبة الطيبة دى

بنات افكارى said...

السلام عليكم

مالحقتش احجز الجهاز علق
وكمان معايا تليفون :))

كل عام وانتي على طاعة
حبيبتي يارب وربنا يزقك رؤيته
صلى الله عليه وسلم ويوردنا
واياكي حوضه اللهم امين

انا كمان حبيت محمد اوي
لما تشوفيه تاني سلميلي عليه
:) مرة تانية كل عام وانتي بخير
يارب ويرزقك الاخلاص ديما يارب

Soul.o0o.Whisper said...

عاشقه الرومانسيه

الأول مكرر يا باشا ولا تزعل

يااااااااااه
مانقدرش على زعلك أبدا


ياللا مستنياكى

اسماء واحلام فى وجدانى said...

تورتة الساعة اتنين

انا طول النهار باتحيل على دودو

كوبية شاى ولا سندوتش

ابدا مفيش

استنى كده انا هاكل حتة والباقى اشيله لبكرة

الايام اللى مش بيضة جاية كتير

Soul.o0o.Whisper said...

اسماء واحلام فى وجدانى

هييييييييييييييييه
هيييييييييييييييه

أحمدك يارب

أخدت براءة
أخدت براءة

ههههههههههههههههههههههه



شكرا يافندم
ربنا ما يحرمنا منك يارب




دمت بود

اسماء واحلام فى وجدانى said...

يظهر كده اننا خدنا مدونتك لحسابنا

ايوا كده يا اسكندرية

كلك رجالة

يا ترا دودو فين دلوقتى

اكيد راحت تعمل الشاى

علشان اشربه مع التورتة

Soul.o0o.Whisper said...

بنات افكارى

بنوتى الجميلة
كل عام و أنتى فى طاعة أيضا
و إلى الله أقرب


و حاضر هأسلملك عليه لما أشوفه

ههههههههههههههههههه

خالص ودى

Soul.o0o.Whisper said...

اسماء واحلام فى وجدانى



أخدتوا المدونة لحسااااابكم؟؟؟
احم احم

طبعا البيت بيتكم
بس يعنى.....

طب اعتبرونى ضيفة طيب
اكرام الضيف واجب
ههههههههههههههههههههههههه





منور

اسماء واحلام فى وجدانى said...

يا فرج الله

ايه الليلة المفترجة دى

Soul.o0o.Whisper said...

اسماء واحلام فى وجدانى

ههههههههههههههههههههههه
اه شفت ازاى؟؟؟



دى بركة الحبيب
صلى الله عليه و سلم

Soul.o0o.Whisper said...

يا دودو؟؟؟

رحتى فين؟؟؟
ياعينى الراجل هيموت من الجوع

هاتى الشاى (( مع ان فى عصير بس مش مشكلة
زى ما يحب

ياللا تعالى بسرعة
ههههههههههههههههههههههههه

ريمان said...

السلام عليكم


حبيبتى

كل سنه وانتى طيبه


انتى هتخلينى بقه اغير منك واعمل زيك

بجد انتى راعه والله

وجميل اوى اللى انتى قولتيه ده


وبجد نفسى اشوفه بقى

اللهم ارزقنا شفاعته واحشرنا معه فى الفردوس الاعلى

امين يااااااااااا رب

تحياتى ليكى يا قمر

Soul.o0o.Whisper said...

ريمان

ريمىىىىىىى

و عليكم السلام و رحمة الله و بركاته
هلا يا جميل

و كل سنة و انتى طيبة

احم احم
تعملى زيى ماشى
انما تغيرى ؟؟؟
هنقطع على بعض و لا ايييييه؟؟؟
ههههههههههههههههههههههههههههههه


ربنا يرزقنا جميعا رؤيته
اللهم آمين



منورة يا جميل بجد
ربنا ما يحرمنى منك ابدا

mohamed ghalia said...

ربنا يرزقنا حسن الإتباع
كل سنة وانتى طيبة
دمتى فى سعادة

mohamed ghalia said...

ربنا يرزقنا حسن الإتباع
كل سنة وانتى طيبة
دمتى فى سعادة

Soul.o0o.Whisper said...

mohamed ghalia

اللهم آمين

و كل سنة و أنت طيب

منور


دمت بود

اسماء واحلام فى وجدانى said...

انا جيت تانى

التورتة كانت لذيذة

بس الحلو عمره ما بيكمل

دودو ماجابتش الشاى

Soul.o0o.Whisper said...

اسماء واحلام فى وجدانى

ويلكم باك


معلش بئا
يبئا العيب على دودو

أنا خلصت ذمتى
هههههههههههههههههه

adel said...

كل سنة و انتي طيبة :)

Soul.o0o.Whisper said...

عادل

و أنت طيب
مالكش حس يعنى


ايه؟؟
مالك؟؟؟


استنى جيالك اهو

اسماء واحلام فى وجدانى said...

تصدقى انا فعلا حسيت بويلكم باك فى

التورتة بس معرفتش تبقا ايه فاكلتها

ورزقى على الله

المهم دودو

دورها بكرة معايا

بس انتى لازم تحضرى القاعدة

Soul.o0o.Whisper said...

اسماء واحلام فى وجدانى


هههههههههههههههههههه
اللى يفوتك احسن من اللى تفهمه
هههههههههههههههههههههه


بس قولى القاعدة هتبئا فين و امتى؟؟
أنا عندى شغل بكرة

يعنى تبدئوا بعد المغرب يادوب أكون جيت
ماشى...؟؟


او زى الوقتى
حتى نكون روقنا
هههههههههههههههههههه

د.خالدأمين said...

مش عارف


انتي بتلحقي تكتبي المواضيع امتي


والناس دي كلها بتيجي منين



ايه نمل>كان عندنا كتكوت وكبر<...


عارف عارف انك هتقولي كده


بس عموما ياستي




ربنا يجازيكي خير بالمناسبه الحلوه دي
طبعا المناسبه هي انك كاتبه موضوع جديد


ويارب دايما كده فيكي خير وتذكره للعالمين والناس بمولد حبيبي وحبيبنا سيد الخلق



تعجبني جمله في ذكر دائما من هانوا الرسول ويبوه

جمله احبها جدا

تقريبا في مدونه الجوهري


________________
لو عرفوه ما سبوه}
________________




اشكرك بشده



نتمني ان يجعلك ومن مثلك ونحن انشاء الله وسيله لتعريف البشريه بسيد الخلق صلي الله عليه وسلم

عاشقه الرومانسيه said...

انا جييييييييت
اه متاخره شويتين بس كان عندى ظروف والله ياسول هبقى احكيلك عليها
احم احم
خليكى شاهده على احمد
انا عامله الشاى عندى وهو سايبه لما برد
وجاى يسيح لى هنا ويقول انى مش باعمل شاى ولا سندوتشات ولا اى حاجه
ده احنا اسكندرانيه يابابا
يعنى اذا ذكر للكرم عنوان ذكرت الاسكندريه
(بكل فخر وفشخره)
ههههههههههههههههه


كل سنه وانتى طيبه ياقمر

هذه حياتي said...

السلام عليكم ورحمة الله وبركاته

الأخت همسة روح

فعلا بارك الله فيكِ علي ذلك الإبداع الذي زرعتيه في سهولة ويسر فأضحت نبتاته تملأ صدورنا بهجة وفرحة وتشع في جوانبنا نشاطا أخاذا يسير حياتنا في حب وصفاء .... ربنا يكرمك يا أختي العزيزة ويجعله في ميزان حسناتك وما أسمي مثل هذا الشعور الجميل ... خالص شكري وتقديري

حررروووف said...

كل سنة وانتي طيبة وبصحة وسعادة
واللهم ماصلي وسلم علي سيدنا محمد وعلي ال وصحبة وسلم
يارب ارحمنا برحمتك واهدنا الي ماتحبة وترضاة

*البت المشمشية *حلوة بس شقية * said...

عليه الصلاة والسلام
بوست بجد جميل عن اعظم شخصية فى الوجود

smilyrose said...

كل سنة وانتى طيبة يا أجمل سووووووووول

فى الدنيا وربنا يزيد علينا محبة

حبيبة رسول الله ويوعدنا بزيارته

اللهم آمين

حبيبى يا رسول الله لك شوق القلوب

المشتاقه للقياك

حبيبى يا رسول الله

smilyrose

وردشان

روح الحب الصادق

اسماء واحلام فى وجدانى said...

Soul.o0o.Whisper

انا ولا اخد عين ولا واخد عقد شراكة مع الاحزان

لان بصريح العبارة

الاحزان بتستمد قوتها منى

وبعدين ممكن اطلب منك طلب

بالعربى الفصيح

النبى عربى

فممكن تختارى اسمك عربى

اناديكى بيه

اصل كلامك الجميل ده انا مش حسه مع اسمك

و دمتم

marmar said...

سوسسسسسسسسستي العسسسل
كل سنه وانتي طيبه يا سكره التدوين ويزيدك نجاح يارب اكتر واكتر ويحققلك كل امانيكي في ظل هذا اليوم الكريم وفي كل الايام ياااارب
ويطمن قلبك ويهنيكي يا جميله
كل سنه وانتي طيبه
لا اله الا الله

marmar said...
This comment has been removed by the author.
mahasen saber said...

اللهم صل وسلم وبارك على محمد وعلى اله وصحبه وسلم

كل سنه وانتى بالف خير يا سولو
وكل من تحبين بالف خير

وجميل قوى انك فهمتى وترجمتى حبك للحبيب واحتفالك بعيده صلى الله عليه وسلم بالشكل الراقى ده

mosooz said...

صلى الله علية حبيبى ورسولى صلى الله علية وسلم
رحمة للعالمين وامام المرسلين
وجميل جدا الموضوع
واللهم فع سيدنا محمد فينا يارب
وان يسقينا من يجة الشريفة شربة هنيئة لانظمأبعدها ابدا

اقصوصه said...

اللهم صلي على محمد وال محمد

ايوشة said...

واللهم صلى وسلم وبارك على افضل خير خلق الله


كل سنة وانتى بالصحة والسلامة يارب
مش عارفة الريدر بيقرا اخر رسالة فى مدونتك من شهر ومش بيقرا اى بوست جديد بينزل :(

Dr.Mohammed Gohary said...

اللهم صل وسلم وبارك على أشرف خلق الله

بجد ربنا يوفقك

بوست أكثر من رائع

كعادتك دوما

تحياتي
وتمنياتي لك بكل خير

أحمد عمر said...

أحجز مكان و لى عودة ان شاء الله

الشاعر محمد عبدالرحمن علي شحا ته said...

شكراً على هذه الكتابات ...وأكيد لو الحبيب النبي موجود الاَن مش بس حالك أنت هيكون في أحسن حال ولكن أحوال المسلمين هتكون كلها في أحسن حال ومشكور على كتا باتك الرائعه

أحمد عمر said...

السلام عليكم و رحمة الله و بركاته

أهلا و مرحباً بك سول

و كنا ف انتظار تدونيتك الجديدة و بصراحه اتخضيت قلت ايه دا كللللللللللللله ؟ هقرأ كل دا:-(

لكن ما ان بدأت حتى القتنى انتهيت .. أسلوبك قصصى ممتع ...

ف البدايه تعالى نأصل حاجتين :

الاولى: أعتقد ان الاصح اننا نكتب (صل) الله عليه و سلم بدل من (صلى)الله عليه و سلم ..

تانى شئ :
أن الرسول صل الله عليه و سلم لم يثبت اثبات قاطع مولدة ف هذا اليوم ع التحديد و اختلف فيه الرواه و ان حتى ثبت فانه لم يثبت انه احتلف بيه او احد من الصحابه رضوان الله عليهم .. و لا التابعين و لا تابعيهم باحسان الى يوم الدين .. و احنا زى ما انت عارفه امرنا باننا نعبد ربنا زى ما ربنا عاوز مش زى هوانا ما يقولنا .. بمعنى لا يجوز كذا فلا يجوز و ان قال يجوز يبئه يجوز و هكذا .. و احنا عارفين ان الزياده ف الدين كالنقص فيه بالظبط و كله تحريف لا يقبله الله و لا رسوله ..


لكن دا ما يمنع ان طرقتك و نظرتك للامر كانت مختلفه تماماً و انك تميزت كثيراً ف طرقتك اسأل الله ان يهيدنا جميعاً الى سواء السبيل و فعلا لو حب كل انسان يعمل زيك كده راح ينصلح احوال حاجات كتير اووى اوووى ف حياتنا ..

تدونيه رائعه و متميزه كما عوديتنا دايما ..

شكرا لكِ

ن said...

السلام عليكم
أختى الحبيبة ..سول
أناإتأخرت عنك كتير لكن رغماً عنى وقد عدت اليوم وقد اشتقت الى عالم التدوين وحاولت التغلب على الاحزان بالصبر والعمل
جزاك الله كل خير وغفر لك وبشرك بلقاء المصطفى صل الله عليه وسلم ومنحك أمنيتك بجنة تسعدين بها بلقاء الانبياء و الشهداء والصدقين .
مع خالص تحياتى

Beram ElMasry said...

الاخت العزيزة Soul.o0o.Whisper
السلام عليكم ورحمة الله وبركاته
و اوعد حضرتك بكرة ان شاء الله أعلق على القصيدة
سلام مؤقت
ارجو من الله ذلك
لك تحياتى والسلام عليكم ، ولا سلام مع اليهود

mahasen saber said...

سولو بخصوص بوست عاشقة وركيارا

هو فيه ايه اصل المضروبه دى مقلتليش حاجه

هيا بتتصل بيا فى كل مصيبه الا دى خير

من غير عنـــوان said...

فكرة البوست جميله وأصليه

والحبيب المصطفى... هو قدوتنا عليه أفضل الصلاة والسلام

Soul.o0o.Whisper said...

د.خالد أمين

و بعدين بئاااااااااااااا
إحنا هنقطع على بعض و لا ايه؟؟


و بعدين نمل ايه؟؟
أنت هتوقع الناس فيا و لا ايه؟؟
(( طبعا باهدى النفوس
ههههههههههههههههههه

ربنا يجازيكي خير بالمناسبه الحلوه دي *
جزانا و اياك يارب

ويارب دايما كده فيكي خير وتذكره للعالمين والناس بمولد حبيبي وحبيبنا سيد الخلق*
اللهم آمين ..جميعا يارب

لو عرفوه ما سبوه*
بل لو عرفوه لاحبوه
و لاطاعوه



حقيقى منورنى
و آسفة على التأخير

Soul.o0o.Whisper said...

عاشقه الرومانسيه

ههههههههههههههههههههه
ياااااااااه
انتى لسه فاكرة الشاى؟؟

امممممممممممم
على العموم يعوضها فى حفلة تانية بئا
هههههههههههه


كل سنة و انتى طيبة يا قمر
و مبروك عليكى كيتى
و مبروك عليها انتى



خالص ودى يا قمرى

Soul.o0o.Whisper said...

هذه حياتي

و عليكم السلام و رحمة الله و بركاته

و فيك بارك الله أخى الفاضل
و جزاك الله خيرا على كلماتك



دمت بود

Soul.o0o.Whisper said...

حررروووف

حروفى الجميلة
و انتى طيبة يا قمرة

و صل اللهم و سلم على نبينا محمد
و على آله و صحبه أجمعين



منورة يا جميل
:)

Soul.o0o.Whisper said...

*البت المشمشية *حلوة بس شقية

مشمشة الجميلة
منورة يا قمرة



خالص ودى

Soul.o0o.Whisper said...

smilyrose

سمايلتى الجميلة
و انتى طيبة يا قمرتى

فينك يا وردتى؟؟
وحشتينى بجد


ياللا تعالى بئا
مستنياكى

Soul.o0o.Whisper said...

اسماء واحلام فى وجدانى

بصريح العبارة

الاحزان بتستمد قوتها منى*

ياااااااااه يااااااه
باحب انا الناس الصريحة
اللى روحها رياضية كدا
ايوا كدا
اهم شئ ان فى حاجة بتستمد قوتها منك
عشان تعرف انك مهم فى البلد دى
هههههههههههههههههههههه


النبى عربى
فممكن تختارى اسمك عربى
اناديكى بيه*

خلاص
مش عاجبك سووول
قول همس
تعريب الاسم
ها؟؟؟
كدا ماشى و لا ايه؟؟


يارب ينفع
:)
دمت بود

Soul.o0o.Whisper said...

marmar

مرمرتى الجميلة
و انتى طيبة يا قمراية

و معلش على التأخير
و ربنا يكرمك يارب على كلامك الجميل دا

اللهم لا تؤاخذنى بما يقولون
و أغفر لى مالايعلمون
و اجعلنى خيرا مما يظنون



خالص ودى يا قمر

Soul.o0o.Whisper said...

mahasen saber

سنسنتى الجميلة
و انتى طيبة يا حبيبة قلبى

و معلش على التأخير
و بالنسبة لكيتى و دودو

خلاص الحمد لله
ادعيلهم بئا ربنا يديم حبهم و صداقتهم
:)



و يديم حبنا كلنا فيه
و مش يفرقنا عن بعض أبداااااااااا




خالص ودى يا قمرتى
و اظهرى بئا وحشانى

Soul.o0o.Whisper said...

mosooz


صلى الله عليه و سلم

بجد منورنى
و كل سنة و انت طيب




دمت بود

Soul.o0o.Whisper said...

اقصوصه

صل الله عليه و سلم


منورة يا جميل

Soul.o0o.Whisper said...

أيوشة

ايوش الجميل
و انتى طيبة يا قمرة

فينك من مدة مش بتظهرى؟؟


بصى يا ستى
قد يكون الريدر معلق
اعملى ريفرش




خالص ودى يا جميل

Soul.o0o.Whisper said...

Dr.Mohammed Gohary

صل الله عليه و سلم

متشكرة خالص يا دوك على كلماتك
و ربنا يوفقنا جميعا
و يهدينا لدرب حبيبه




دمت بود

Soul.o0o.Whisper said...

أحمد عمر

أستاذى العزيز
بجد سعيدة جدا بتواجد حضرتك

و بتعليقك المميز

بالنسبة للنقطة الاولى
طبعا حاضر
و إن شاء الله أكتبها بعد كدا صل الله عليه و سلم
:)

بالنسبة للنقطة التانية
و احنا عارفين ان الزياده ف الدين كالنقص فيه بالظبط و كله تحريف لا يقبله الله و لا رسوله *
دا صح جدا
و ان شاء الله لى وقفة مع تنويهات حضرتك دى


و جزاك اله خيرا على كلماتك المشجعة
و عذرا على التأخير



و دمت بود

Soul.o0o.Whisper said...

الشاعر محمد عبدالرحمن علي شحا ته

حقيقى انت نورتنى بزيارتك دى
و يارب مش تكون الاخيرة


بانتظارك دائما

Soul.o0o.Whisper said...

ن

غاليتى العزيزة / ا.امل

حقيقى حضرتك اللى وحشتينى جداااااااااا
و يارب تكونى الوقتى بخير
و باحسن صحة

و ربنا يصبرك و يأجرك ان شاء الله


و جزانا و اياكى كل خير
و جمعنى بك و بهم فى الفردوس الاعلى ان شاء الله




بانتظار روائعك


خالص ودى

Soul.o0o.Whisper said...

Beram ElMasry

و عليكم السلام و رحمة الله و بركاته

آسفة جدا يا أستاذى والله على التأخير
و الله ظروف غصب عنى


بس جاية ان شاء الله
لا تقلق
:)





خالص ودى

Soul.o0o.Whisper said...

من غير عنـــوان

استاذى الفاضل /

نعم بلا شك أن الحبيب هو قدرتنا المطلقة
سعيدة جدا بزيارة حضرتك

و دمت بكل خير