الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Mar 13, 2009

تعليقا على المولد النبوى



أولا: بأعتذر على التأخير فى الرد و التعليق على بوستاتكم

معلش الكام يوم اللى فاتوا كانوا ارهاق و تعب كدا

و كمان التكليف قرب .. و فى ورق لازم يخلص

فمعلش أستحملوا تقصيرى فى حقكم


ثانيا: أنا فعلا ماكنتش مجهزة البوست دا

و كنت باجهز لبقيت الموضوع اللى كنا بناقشه

بس أنا شايفة ان موضوع البوست دا مهم بردوا

و لازم نقوله الاول ....


الموضوع هو إن استاذى العزيز / أحمد عمر ( أبو سما )

تفضل جزاه الله كل خير بالتنويه على نقطتين فى غاية الاهمية

ياريت فعلا ناخد بالنا منهم ..


الاولى .. هى إننا لما نيجى نصلى على رسول الله نكتبها كدا

( صلّ ) الله عليه و سلم ... مش (صلى ) الله عليه و سلم

اعتقد انها ناحية نحوية بحته .. مش كدا و لا ايه؟؟


و النقطة التانية ...

هى حرمة الاحتفال بالمولد النبوى أساسا ..

لأنها مش من الدين ، و النبى صلى الله عليه و سلم

و لا الخلفاء الراشدين و لا أهل الثلاثة قرون احتفلوا بيه ،

و بما ان الزيادة فى الدين كالنقص فيه ... تحريف لا يقبله الله و رسوله .


و الحقيقة إننا كلنا عارفين الكلام دا .. لكن بنقعد نقول يعنى هو الاحتفال بالمولد حاجة وحشة ؟؟

و بما انه يوم أجازة و بناكل الحلاوة ، و أغلبنا بيصوم اليوم دا فاحنا مش بنعمل حاجة وحشة .. صح؟؟


الحقيقة يا جماعة إنى بردوا دورت فى الموضوع دا وسألت .. و يارب أقدر أوصلكم اللى عرفته

و فعلا نقتنع بيه


أولا : خلينا فى نقطة ان يوم 12 ربيع أول هو يوم مولد الحبيب ..

هو فى الحقيقة لم يثبت أصلا ان الحبيب ولد فى يوم 12 ربيع الاول ، بل و لا حتى فى شهر ربيع اول اصلا

بل اختلف العلماء فمنهم من قال ربيع اول و منهم من قال رجب ، و اللى قال ربيع اول اختلفوا بردوا ،

فمنهم اللى قال يوم 2 ، و منهم قال 8 و منهم قال 10 و منهم 12 و منهم 17 و منهم 18 و منهم 22 ..

يعنى مفيش يوم ثابت بالدليل ..


طب ايه حكاية 12 ربيع اول دى بئا ؟؟!!..

قالك اللى طلع الحكاية دى مجموعة اسمهم العبيديون وهم من الرافضة فى القرن الرابع الهجرى ،

و ان العبيديين دول منهم اللى ادعى الالوهية و منهم جماعة قتلوا الحجاج فى عرفات و عند الكعبة المشرفة،

و هدموا جزء من الكعبة و اخدوا الحجر الاسود منها ، و لم يعيدوه إلا بعدها بأعوام ..


المهم ان الثابت فى الشهر دا هى وفاته عليه الصلاة و السلام ،و لان الناس دول حاقدين على الاسلام و اهله ،

فقد احتفلوا بذكرى وفاته ، مش مولده ... بس لما الناس سألت ،قالوا دى ذكرى مولده ..

فالناس بئت تحتفل بانها ذكرى مولده ، و هى ذكرى وفاته عليه السلام ..


لكن صراحة اوقفنى كلام احدهم : احنا ازى اصلا نقول عليها ذكرى؟؟

هو مش المفروض ان الرسول صلى الله عليه و سلم نستحضره معانا فى كل حدث من حياتنا؟؟

كل موقف من حياتنا ؟؟؟ المفروض نشوف هو كان بيعمل ايه و نعمل زيه؟؟؟

يبئا ازاى اصلا نقول عليها ذكرى؟؟ الذكرى دى للحاجة اللى ننساها و بعدين نعمل لها ذكرى عشان نفتكرها

مش كدا و لا ايه؟؟؟ ...

صراحة الكلام كان منطقى


كمان ان تخصيص عبادة بذاتها لليوم دا ... هو دا الغلط ، لان كدا بنكون احنا زودنا شئ فى الدين مش منه

انما مثلا اللى كان متعود يصوم الاتنين و الخميس ، و صام الاتنين لأنه متعود ..ماشى

انما نيجى السنة كلها مش نصوم .. و نصوم اليوم دا؟؟؟ طب ليه بئا؟؟؟


طب نقطة الحلويات اللى بنشتريها و ناكلها فى اليوم دا ، أو بتجيلنا؟؟

معنى كدا ان الحلويات كمان حراااااااام ؟؟؟ ... مش ناكلها؟؟؟


لا عادى .. بس مش ناكلها على انها حلاوة المولد ، لا هى حلويات بتظهر فى الوقت دا

بنشتريها و ناكلها عادى ..لانها مش بتظهر الا الوقت دا

يعنى اهم شئ مش يكون فى نيتك اى شئ انت بتعمله فى اليوم دا انك بتعملها عشان دا يوم المولد النبوى

لا ... انا باعمل لله ، و اشوف الرسول عمل ايه ، و اعمل زيه ..


يعنى بدل احتفال و اقعد اليوم كله ادام التليفزيون عمال اشوف افلام بتحكى السيرة << دا لو لسه فى حد بيعمل كدا

أشوف سنة أو فعل من أفعال الرسول صلى الله عليه و سلم ، و أبدء فعلا أنفذها ... و استمر عليها طول السنة و كل مرة أضيف اضافة جديدة ، و نيتى طبعا هى ارضاء الله عز و جل ،و الاقتداء بسنة رسوله صل الله عليه و سلم ... مش عشان هو المولد النبوى .


نيجى بئا لتالت نقطة و أهم نقطة فى اعتقادى ..

و هى اطلاق لفظ (عيد ) على كل مناسبة فى حياتنا ،

عيد المولد النبوى

عيد الحب

عيد الام

عيد اليتيم

عيد الاسرة

عيد الصداقة

عيد الـ....

و طبعا كل ما نسأل حد فى الموضوع يقولنا : حراااااااااااااااااااااااااااااااااااام


طب ايه اللى دخل عيد الام فى الدين ؟؟!!!.. هو احنا بنقول انه من الدين؟؟؟

و لا عيد الحب و لا عيد الاسرة و الحاجات دى ؟؟؟

دى كلها معانى حلوة بنحتفل بيها ..


مش الكل بيقول كدا ؟؟!!..

ويقولوا على اللى يقول بدعة تشدد ؟؟؟


اممممممممممممممم ... أصل يا جماعة أنا اكتشفت ان المشكلة فى حاجة

المشكلة فى كلمة ( عيد ) ، لأن لفظ عيد أصلا لفظ دينى .. يطلق على مناسبة تعبدية

زى مثلا لما نقول صلاة كذا ..

مثلا مش ينفع أقول هاصلى ركعتين لماما و لا لبابا و لا لليتيم و لا كدا ..

اهو نفس الحاجة ، ماينفعش نقول عيد الام و لا عيد الاب و لا عيد اليتيم ..


دا حتى لما تيجى تشوفهم هما فى الغرب بيقولوا ايه تستغرب مننا والله

هما يقولوا Mother`s Day , Valentine`s Day , Orphan`s Day, Birth Day

مش Mother`s Feast , Valentine`s Feast , Orphan`s Feast , Birth Feast

يعنى بيقولوا يوم الام ، يوم الحب ، يوم اليتيم ، يوم الميلاد ..

مش عيد الام ،و لا عيد الحب ، و لا عيد اليتيم و لا عيد الميلاد ..


لان دى الفاظ تعبدية .. لا تطلق إلا على الاحتفالات التعبدية ..

اللى هيا عيد الفطر و عيد الاضحى ..


انما الباقيين عاوزين نحتفل بيه كذكرى لشئ جميل ، أو مشاعر حلوة ماشى

بس من غير ما نقول عيد ... اتفقنا؟؟؟؟


و دا طبعا بمناسبة ان يوم الام جاى ..

و الناس اللى بتحتفل بيوم ميلادها ، او ميلاد اى شئ فى حياتها ،

ياريت نتعود نقول يوم كذا ... ، بدل عيد كذا ...

و مرة تانية باشكر استاذى العزيز على ملحوظاته

ربنا يجعلها فى ميزان حسناته ...


و ... سلام على نقطتين فى غاية الاهمية




22 comments:

وردشان smilyrose said...

مفيش فايدة

مهما حاولت ابعد

مش هعرف اللى ليه اصحاب زيكم صعب

يكون فى ازمته لوحده

ومهما حاول يكون وحيد صعب تسيبوه

بجد ربنا ما يحرمنى منك

ولا من كيارا ولا حروف

وكل مناسبة حلوة وانتى بخير

محمد said...

السلام عليكم ورحمة الله وبركاته

اختي العزيزة

جزاك الله خيرا علي هذا التوضيح والتفصيل في هذه المسألة المنتشرة فيما بيننا

وخيركم من تعلم علما وعلمه

خالص شكري وتقديري

Soul.o0o.Whisper said...

وردتى الجميلة

الصديق ..وقت الضيق
:)

طبعا مين هيسمحلك أصلا

ربنا ما يحرمنا منك
و لا منك وجودك معانا


و كل سنة و انتى على طول طيبة

Soul.o0o.Whisper said...

هذه حياتى

و عليكم السلام و رحمة الله و بركاته

أخى الفاضل
جزانا و اياك كل خير


و منور دايما



دمت بود

mohamed ghalia said...

اللهم ارزقنا حسن الإتباع

Darsh Basha said...

الموضوع بجد جميل ورائع
ومفيد فى نفس الوقت

ولكن لى تعليق على شئ واحد
اخر نقطة خالص..هى اسمها عيد او يوم
ان احنا نخصص للأم يوم ..او الحب يوم
يبقى كدة احنا بنقصر فى حفهم جدا
فالام ليها 365 يوم فى السنة مش يوم بس

والاحتفال اعتقد انة مش بيحرم علشان
كلمة عيد ..ولكن الاشياء اللتى نتشابة فيها..مع الغرب او اليهود والنصارى

ففى امريكا مثلا ظهر عيد الام ..لان الواحد بعد سن 16 سنة بيتركب ابة وامة ..ويرجع اليهم يوم واحد بس فى السنة ..علشان كدة عملوة عيد
احنا الحمد لله معندناش الموضوع دة

وكذلك باقى الاعياد ارتباط عيد الحب بالفلانتين

وشم النسيم بعيد الربيع عند النصارى
وهكذا
حتى تلاقى الاعياد الوطنية مفهاش حاجة
ومفيش حد بيتكلم عنها انها بدعة او غيرة

وشكرا على الموضوع

sakayar said...

استاذتتنا مدونتك شيقة فعلاً وأسلوبها بسيط وممتع
وعجبني الحديث عن الاحتفال بالمولد
وممكن لو حبيتي تقرأي اللينك ده ممكن برضه ليه علاقة بكلام حضرتك

http://www.yaqob.com/site/docs/articles_view.php?a_id=65&cat_id=13

لكن خلينا نقول كام نقطة كده تعليقاً على موضوع عيد ويوم وكده
أولاً : نفتكر قول ربنا
وما خلقت الجن والانس إلا ليعبدون
يبقى نخلينا أي حاجة بنعملها نعملها بنية التعبد لربنا ... حتى المذاكرة حتى النوم حتى الأكل ..بذاكر علشان أكون مسلم نافع لاسلامي ءأدي شكر نعمة ربنا عليا إنه أنعم عليا بالحياة
باكل علشان أقوى على الحياة وشئونها اللي هي أصلاً كلها خالصة لربنا
قل إن صلاتي ونسكي ومحياي ومماتي لله رب العالمين
بنام علشان أعطي جسمي بعض الراحة
إن لنفسك عليك حقاً
فأقوم أقوى وأنشط
ثانياً : لو عرفنا إن حياتنا كلها ملك لربنا ... وإننا هنعمل كل حاجة لربنا ... حتى ركوب السيارة المرسيدس والبي إم ... تخيلي حتى البي إم لربنا؟؟
آه والله
ع الأقل مش هركب ف تاكسي ممكي يطلع سواق مش تمام ... أو أركب في ميكروباص وأزاحم الرجالة والستات وده يخبطني ودي تلمسني وكده
ومش هركب عربية أي كلام تقف مني ف الطريق وتخليني أغضب ... لأ هركب عربية مكيفة كمان علشان وانا راكبها احس بالراحة واقعد اذكر ربنا واشكر نعمته كمان
إيه رأيك ف الدين بالطريقة دي؟؟
متهيألي لا ينافي الدين إني أكون ملتزم وشاكر لنعمة ربنا
الآية كانت بتقول لقارون
ولا تنس نصيبك من الدنيا
لكن للأسف هو نسي نصيبه من الآخرة وانشغل بالدنيا بس

نرجع لموضوعنا إنه نخلي كل حاجة خالصة لربنا
وقتها هندخل ف نقطة تالتة
العمل في الدين على الاتباع
أخذ بهدي القرآن .. واتباع لسنة الرسول وسنة الخلفاء الراشدين وأصحاب الرسول
طيب لو جينا مثلاً وقلنا احنا بنتعبد لربنا بإننا هنعطف على اليتيم أو هنبر أمنا ... أكيد هنشوف الرسول كان بيعمل إزاي وهنعمل زيه صح؟
طيب لو خصصنا يوم معين ف السنة يبقى تاج للعمل ده؟؟
مش هنقول عيد بقى احنا اتفقنا يوم
هييجي ف بالي سؤال ... طب هو الرسول معملش اليوم ده ليه طالما حاجة حلوة؟؟
هل الرسول جه بالشريعة ناقصة؟؟
لو قلنا كده يبقى احنا طلعنا بره الشرع خالص
ولو قلنا الرسول كان عارف انها حاجة حلوة بس مقلناش عليها يبقى طعننا ف رسالةالاسلام كليةً لان كده يبقى الرسول - نستغفر الله - مكانش أمين على الرسالة
طيب لما نعمل يوم لليتيم ويوم للأم احنا هنتبع مين .. أو هنقلد مين؟؟
طالما احنا اتفقنا انه أمر تعبدي ... لو أمر دنيوي فعلاً يبقى مش هناخد عليه ثواب ويبقى العمل بقى مالوش لازمة عند ربنا ... ويبقى مش محياي ومماتي لله رب العالمين ولا حاجة
لكن طالما أمر تعبدي ولله رب العالمين يبقى هنشوف بنتبع وبنقلد مين

واخيراً على يوم الحب او عيد الحب
فالقصة بتاعته مشهورة لكن حسب ظني إنها لم تصل لحضرتك فاسمحيلي وآسف مسبقاً على الاطالة
خليني أختم بيها
كانوا بيقولوا انه ف عصر الاغريق او الرومان الملك مانع جنوده من الزواج نهائي علشان كانوا ف حرب دائمة وكان بيشوف ان الزواج هيعطل الجنود انهم يبقوا افضل ف الحرب وكده
فكان هناك قس اسمه فلانتين
saint valentine
كان بيعمل عقود زواج سرية بين الجنود والنساء اللي هما عاوزين يتجوزوهم
ولما عرف الملك بكده سجن القس فلانتين ده
وطبعاً القساوسة ممنوعين من الحب والزواج
لكن فلانتين وقع ف حب بنت السجان
ولما حصل ده واكتشفوا ده الملك أمر بإعدامه وأعدم بالفعل ف يوم 14/2
وبعد فترة طويييلة جداً بعد الاغريق بقى والناس القديمة دي
ظهر البابا وجعل يوم 14/2 يوم ذكرى للشهيد فلانتين
وأسماه بعيد الحب
أعتقد محدش من النصارى أو الغرب هيعمل عيد التقوى مثلاً بمناسبة إن عثمان بن عفان اتقتل وهو صائم وبيقرأ ف القرآن ... يبقى ازاي احنا نقلدهم
متهيألي يبقى عيب علينا اووي

آسف تاني على الاطالة
وأرجو تقبل تعليقي ولم أقصد بالتعليق شخصك الكريم لكن أردت توضيح بعض الأفكار من وجهة نظر متواضعة
تحياتي لحضرتك
ودام ودك

*البت المشمشية *حلوة بس شقية * said...

فيه بعض المعلومات اللى قولتيهاانا عرفاها
كويس انك وضحتى للناس عشان فيه ناس عندها جهل بحاجات كتير
ربنا يجعلو فى ميزان حسناتك يا قمرة

kafrawy said...

شكرا لتنويهك بالاخطاء الشائعه ف العقيدة

دوك

ادخلى عندى هتلاقى حاجه معلقه عندى باسم
خادم المسيح ياريت تتبعى اللينك وتقوليلى ايه رايك

Hanan Elshafey said...

ربنا يجعله في ميزان حسناتك
وجزاك الله خيرا
تحياتي

الباحث عن الحقيقة said...

كل سنة وانتي طيبه

شايفه مش باجي على سيرة ال ... بس

وكل سنة واحم احم ..شذى طيبة
:)

الباحث عن الحقيقة said...

معلش ماليش مزاج اتخانق النهارده

يوم , عيد مش هتفرق

واسألي استاذنا النحوي عن معنى لفظة عيد

وكيف يكون في الاحتفاء بذكرى مولده ابتداع او زيادة في الدين ورسول الله كان يحتفي بيوم مولده بانه كان يصومه وسئل عن سبب صيام يوم الاثنين فقال ذاك يوم ولدت فيه
اي ان النبي كان يحتفل بيوم مولده كل اسبوع وليس كل عام
واختلاف مظاهر الاحتفال من جيل الى جيل لا حرج طالما اجتنبت البدع المخرجة عن الملة ويبقى الاصل قائما وهو استحباب صيام يوم الاثنين من كل اسبوع

بس خلاص

Sweet Violet said...

بعتذر و بشده على عدم المتابعه فى الفتره اللى فاتت

)):

نيجى بقى للموضوع

انا فعلا عارفه ان الاحتفال بمولد النبى بدعه اصلا

و طبعا انتى شرحتى السبب

جزاك الله خيرا على التوضيح ده

تحياتى

(:

فارس عبدالفتاح said...

طبعاً أنا معجب بالطريقة التي تتبعيها في تغطيتك للأحداث والتعليقات والردود واهتمامك بهذا الأمر وجعله أسلوب لمشاركة الآخرين في النقاش وجعله متعدد الأطراف وأريد أن اعرف هل هذا نظام الشورى ولا نظام الديمقراطية ... ولا حاجة في نفس يعقوب

اههههاهاههههه

وعلى كلامك الذي يكون على مستوى الحدث والحديث وهذا أمر جميل جداً وهذا ما جعلني أتجرأ على طلب وضع احد المواضيع على مدونتك ولكن لم يصلني الرد بالقبول أو الرفض فقلت لابد وان أبادر بتعريف الموضوع حتى تعلمي ماذا أريد وتأخذي قرارك فيه سواء بالرفض أو القبول


وأخيراً

أنا ليس لدي أي تحفظ على أي شيء سواء موضوع مولد النبي أو عيد مولد النبي أو عيد الأم أو عيد الأمم المتحدة ومجلس الأمن

ليس لدي أي اعتراض لأني لا اهتم أصلاً بهذه الأعياد وليست موجودة في ثقافتنا العائلية مطلقاً

ولكن ما يستفزني وثير سخطي هو عيد الحب

طبعا أو أي حد يقول لي أن عيد الحب أقيم بخصوص الحب في الله سبحانه وتعالي وان كل من يقيمون هذا العيد يحبون بابا ومامه وميكي صديقي وعمتو حبيبت قلب وتيتا روح فؤادي ... إلى آخر الترهات والخزعبلات والتخاريف والالتفاف حلول جوهر الحقيقة بان هذا العيد مخصص للمرأة والرجل وجوهره الجنس بلا نقاش أو حوار في الموضوع


ايوه حتى نكون موضوعيين في طرحنا ... كل الشباب والفتيات كل واحد يحاول يثبت للتاني في هذا الوقت انه هو السباق في أظاهر عاطفته تجاه الآخر

وخاصة الفتيات لان العاطفة لديه واضحة وهي تتفنن في إظهارها بشكل ملفت ومستنكر

وهنا مربط الفرد أو بيت القصيد أو كبد الحقيقة أو إي شيء تريدين


إذا ذكر عيد الحب ذكرت المرأة والرجل أو الشاب والفتاة وإذا ذكر الاثنان فبالحتمية الطبيعية يكون في مخيلة كل واحد منهم موضوع الجنس

وهذا أمر فطري عادي حتى لا يقال أننا سطحيين ونبالغ وان الموضوع مش موضوع جنس وان المشاعر والأحاسيس وكل حاجة حاسين بيها والكلام الفاضي ده الذي يخلو من الموضوعية والمنهجية

نعم هذه حقيقة وواقع

ولكن قد يخرج علينا أو تخرج علينا فتاة وتقول .... لا .... انأ ما ببصش للموضوع ده من منطلق الجنس وان العاطفة هي الغالبة .

اهههاهاهاهههههها

طبعا هذا مخالف للمنهجية والموضوعية ولكن لدي الرد

أقول ليس هناك شهوة أو لذة أو استمتاع أو أي شي في أخلاقيات الإنسان سواء المذمومة أو المحمودة إلا وفيه عاطفية واستمتاع ولذة

العاطفة المنفردة وحده لذة ولكن مع الأسف الشديد ليس للحب العذري أو العاطفة المجردة مكان على ظهر هذا الكوكب وبين بني البشر وهذا من واقع القرآن والسنة

لأن كل ابن ادم خطأ وان ما اجتمع رجل وإمرة وانه ليس احد معصوم حتى بين الأخ وأخته والرجل وابنته والولد وأمه الم نسمع عن زنا المحارم ... الخ

كل هذه الأمور ظهرت لمخالفتنا للموضوعية والمنهجية السلمية في التربية وفي تعليم الفرد وتنشئته تنشئة سليمة تظهر الأم عارية على أبنائها في البيت أو شبه عارية وتقول أنا في البيت وليس هناك حرج في إظهار زينتي على أبنائي وهذا أمر مغلوط وفيه لبس شديد

ويظهر الأب وهو يرتدي شورت أو لمؤخذه لباس وداير به في الشقة أو البيت وسط بناته هذا أمر لا يبيحه الدين أو يبيحه العقل أو الفضيلة والأخلاق


فانا ارفض هذا العيد واستنكر ومن يعترفون به أو يحاولون أن ينِّظروا ويقننوا له بأي حاله وبأي طريقة

وأظن أن هذا حق يستند إلى حقيقة


مع كل الاحترام والتقدير وأتأسف على طرح هذا الموضوع لأنك أشرت إليه في حديثك فالشيء بالشيء يذكر

Anonymous said...

فرق بين صل بصيغة الامر وهذه يحذف منها حرف الياء
وبين صلى بصيغة فعل الماضي وهذه لا تحذف منها الالف المقصورة

mohamed said...

أشكرك على زيارتك
================
قال المصطفى صلى الله عليه وسلم
كل محدثه ضلاله وكل ضلاله فى النار
أرجو أن تنتبهى
محدثه-------- وليس حادثه
محدثه على وزن مفعله
حادثه على وزن فاعله
ما الفرق بينهم؟
حادثه تعنى كل ما يجد بعد الرسول
أما محدثه فهى شىء تم أفتعاله فى أصول الدين ,فقد أكتمال الدين فى وجود الرسول ولا زياده بعد الاكتمال
فلو كان الرسول قال حادثه لكن ذلك معناه ان كل ما بستجد بعده محرم
والرسول لم يقل ذلك
-------------------------
أتفق معكى فى أن الالفاظ تحمل من المفاهيم ما قد يجعل الناس تنحرف عن الطريق السليم
-----------------------------

الاحتفال بالرسول يجب أن يكون
أقتداء بسلوكه وبقيمه ووليس بالجلباب القصير وطول اللحيه
نحن تركنا المنهج وأهتممنا بالمظهر
ويليتنا حتى أهتممنا بالمظهر بالشكل الصحيح ,فقد فشلنا فى الجانبين عدا قله
لانميزهم بالشكل ولكن يميزوا بالسلوك والفعل
---------------------------مثال لذلك من يزوج أبنته لصاحب الدين والخلق السليم والامانه ولايهتم بالاموال والجاه
أو من يعلم فقراء ويعالجهم على حسابه
وهناك أفاضل كثيرين مثلهم
يؤدوا الحق الذى عليهم برضى نفس
وليس خوفا من القانون أو من قوه
==============================
هناك حديث للرسول يقول فيما معناه
يأتى قوم من بعدى تستصغرون صلاتكم بجوار صلاتهم وصيامكم بجوار صيامهم
وهم من أهل النار
سؤال الرسول من هم
قال أكرم الخلق
المتنطعون
جعلنا الله تعالى
من أحباب المصطفى
عليه الصلاة والسلام
لكى تحياتى على مجهودك
وبارك فيكى وعليكى ولكل أحبائك

mahasen saber said...

سولو كل مولد نبوى وانتى بالف خير

وجزاكى الله كل خير على المعلومات اليى قدمتيها ولو فيه حاجه غلط
جل من لا يسهو يا جميله

Anonymous said...

أول مرة أزور مدونتك الشيقة

ولى بعض التحفظات .. فهم فى الغرب لايستخدمون كلمة
Feast
عموما مثلا عندهم
Thanks giving
ومعناه عيد الشكر
Christmas
وهو عيد الميلاد وهكذا

المشهور أيضا ان الرسول عليه السلام كان يحب ان يجتمع صحابته على الخير .. فمن رزق بمولود يحتفل .. ومن رزق بخير أو من تحتفل بزواجها .. كان يقول كلمته الشهيرة " أولم" حتى ان أى وليمة تلغى صيام النافلة

دعينا اذا نتفق على ان الاجتماع على خير هو شئ جيد بعيدا عن المسمى كما يقول علماء المسلمين .. اى شئ قبيحه قبيح وحسنه حسن

فما الخطأ فى الاجتماع على شئ جميل بنشر التحاب والسرور؟

غير ان التشدد والتفرع المبالغ فيه وهو سمة هذا العصر الصعب بأن هذه بدعة وتلك لاادرى ليس من سماحة ديننا الجميل

وصدقينى معظم هؤلاء لايدرون الكثير عن ديننا واليك سؤال بسيط .. كيف كان يتوضأ المسلمون اذا كانت آية الوضوء نزلت فى نهاية الدعوة فى سورة المائدة وهى من أواخر السور التى نزلت فى نهاية الرسالة؟

واذا كان الله تعالى يقول " ويل للمصلين" فى سورة الماعون وهى التاسعة فى ترتيب النزول .. فمن هم المصلون اذا كانت الصلاة بهيئتها فرضت فى نهاية العهد المكى أثناء الاسراء؟

وغيرها الكثير الذى سيقف عنده الكثيرون لاينطقون امام تجارة الأعضاء فى العصر الحديث وبيع الـ
genpets
فى محلات لعب الاطفال

هناك قضايا كثيرة أولى بجهودنا وعقولنا .. وآسف للإطالة

فشكووول said...

ازيك يا سوول ..
تحياتى

عارفه .. انا قرأت التعليقات عندى وجيت لك على طول واستثنيتك من دورك فى الرد على التعليقات .. اصل مش عارف انا ليه بحب البت سول وكمان سمكه واحده وهس خلاص والبت الحلوه دودو ومرمر وكل كل البناتات الحلوينات اللى بيفكرونى ببنتى الهام اللى سايبانى وقاعده فى السعوديه ومش بشوفها اللى كل سنه .. بس انت واللى زيك بينسونى الهام بنتى

المهم يا سوول .. الاعراض دى بانت عليك امتى
انت صيدليه ولا فيلسوفه
انا حابلغ فيك لقسم الشرطه (ابوك) واقول له بنتك ظهرت عليها اعراض العبقريه وخد بالك العبقريه نصف ..... العبقريه برضه
عايزه تحرمينا من مولد النبى ليه .. هو احنا بناكل الحلاوه طول عمرنا اللى فى المولد ده وخلاص
ومش عايزه عيد الام ليه .. عشان انت اتخرجت وحتتكلفى وبعدين من السنه دى يبقى عليك هدية عيد الام ...آه يا لئيمه عايزه تزوغى من هدية ماماتك السنه دى ..

الله يقويك فى تحضير الاوراق والحاجات دى ويارب يكون تكليفك فى حته كويسه وأقول لك على سر (هيئة التأمين الصحى احلى حاجه واحلى من الجامعه كمان)
اوعى تقولى السر ده لحد خالص

تحياتى

Beram ElMasry said...

الاخت العزيزة . Soul.o0o.Whisper
السلام عليكم ورحمة الله وبركاته

أولا / بأعتذر لحضرتك جداااااااااا
على التأخير
يا فندم لا داعى للاعتذلر ، المدونة دى معمولة للشباب الذكى من امثالك ، ومكفول لكم حق الدخول والخروج فى اى وقت ، وكلى امل فى نيل الرضى والدعاء لى بحسن الختام ، والمهم ان لا اقاطع ممن احببت واعادوا لى الحياة
لك تحياتى والسلام عليكم ، ولا سلام مع اليهود

القلم السكندري said...

السلام عليكم

بل انا من يعتذر عن تأخر الزيارت ايضاً لعللٍ مشابهةٍ من حيث العموم:)


ما شاء الله موضوعك أثلج صدري وأسعدني كثيراً


جزاكم الله عنا خيراً


وأرجوا قبول العذر:)



وتقبلي وافر التحية

Anonymous said...

السلام عليكم و رحمة الله و بركاته

ف البدايه كعادتى .. أعتذر عن التأخير لعدم استطاعتى التواجد خلال الفتره الفائته ..

----

الفرق بين صل و صلى بالظبط مثل الفرق ف المناداه بالضمير الغائب هو او هى

فالله سبحانه و تعالى قال : " الله لا إله إلا (هو)الحى القيوم .."

لذلك ففعل الامر ينبغى ان يكون صل المناسب للضمير "هو" لا صلى المناسب للضمير " هى" و نحن لا نأمر الذات العليه لكن هو" رجاء" كما ف " اللهم "أغفر و أرحم" اى انى ارجو ان يغفر اللى لى و يرحمنى ..

اتمنى تكون المسأله اتضحت ..
-----

بخصوص باقى الموضوع فهى تدوينه متميزه للغايه و من اروع ما قرأت لك لما فيها من معلومات كان بعضها جديد على حقيقى ..

---

تمنياتى لكم بدوام الصحه و العطاء ابداً ما حييتم :-)