الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

May 25, 2009

صدمات !!! ... و تساؤلات ؟؟؟




فى الجامعة .. طبعا حياة تانية ، و مجتمع تانى ..

و بالتبعية كان بردوا مفهوم تانى للاسلام خالص ..


فترة الجامعة أنا باعتبرها فترتين

فترة صدمات و تساؤلات ..و بعد كدا فترة البحث و المعرفة ..


هأبتدى معاكوا فترة الصدمات و التساؤلات ، و اللى ابتدت تقريبا مع لبسى للنقاب ،

طبعا يوم مالبست النقاب كان يوم مميز جدا بحياتى لأنه كان فى رمضان و كمان ليلة القدر ..

فبصراحة عزيز عليا جدا ، وبأعتبره هدية من ربنا ليا .. ربنا يثبتنى عليه ياااارب


المهم بئا أنا كنت قلت لكم إنى كنت متصورة بمجرد لبسى ليه ، إنى هأتحول إنسانة تانية خالص ،

و أكون إنسانة مثالية ، بلا أخطاء بلا ذنوب ، بلا مناقشة فى أوامر الله ..

هو حلال حلال ، حرام حرام ، متع و هوى النفس دول سيذهبوا إلى غير رجعة .. حاجات كتير أوى ،

و كأن عدم لبسى ليه يعطينى رخصة للغلط ، إنما لما ألبسه خلاص هيحمينى من أى غلط ..


و هنا نقطة عاوزة أقولها بردوا إن للأسف الناس واخدة الفكرة دى عن الملتزمين ،

يعنى فى مرة شخص ملتحى كان بيحكى بيقول أنه لما أكرمه و ربى لحيته بئا زمايله فى الشغل يستفزوه أوى و يعملوا فيه حركات مش حلوة ، و لما يفيض بيه و يقول كلمة كدا و لا كدا ..

يقولك شوف.. آدى الملتزمين ،

اللـه .. طب مانتوا اللى استفزتوه ،

يقولك لا بردوا .. الملتزمين ما يطلعش منهم كدا ،

و كأن الملتزمين دول بئوا ملايكة بقدرة قادر ..


المهم بئا لما لبسته و ربنا ثبتنى عليه الحمد لله ..

آه ، أصل أى حد فينا ييجى يعمل أى خطوة تقربه من ربنا يلاقى شوشو قاعدله بين عيدان الدرة ..

عشان مش يرجعه خطوة ، لا دا يرجعه عشرة عشرين خطوة ..


المهم إنى لقيتنى لسه باعمل حاجات غلط ؟؟!! .. لسه فى معاصى و ذنوب فى حياتى ؟؟؟!!..

اللـه ،لالالا أكيد أنا وحشة ، و أصلا ماينفعنيش النقاب اللى أنا لبساه دا ..

أنا فعلا لو ملتزمة معملش غلط .. معصاش ربنا ..


لما آجى أعمل طاعة جديدة ألاقى لها ثقل على نفسى لسه ،و عاوزة مجاهدة ..

لالالا على فكرة أنا مش كويسة خالص ، لو كنت فعلا مخلصة مكنتش الاقى الطاعة تقيلة على نفسى كدا ..


لما ألاقى نفسى رايحة لأى متعة من متع الدنيا ..

الطاااااااااااااامة الكبرىىىىىىىى ..

لسه عاوزة حاجة من الدنيا ؟؟ لالالا .. ثكلتك أمك يا فتاة .. إيه اللى بتعمليه دا ؟؟ ..


لما حد يعمل فيا موقف مش ظريف ، أو يقول كلام مش ولابد ..

إيه دا؟؟ أنا لسه بيأثر فيا الكلام دا؟؟ يبئا أنا نفسى دونية،

و هأفضل على طول كدا إن شاء الله و لا ايه؟؟


و بجد كانت نفسيتى بتتعب جدا جدا يعنى ..

هو أنا ليه لسه كدا؟؟ وهو أنا لوحدى اللى كدا ،و لا كل اللى بيلتزموا زيي كدا؟؟ طب هى فترة و لا هاستمر كدا على طول ؟؟


و فى خضم هذه المعركة .. يشاء الله سبحانه و تعالى إنى أسمع لبعض الدعاة

اللى كانوا بيتكلموا إزاى نُحيى الدنيا بالدين ، و إن الدين و الدنيا مش حاجتين منفصلتين ، بل هما شئ واحد ..


و البعض الاخر بيتكلم فى جوهر الاسلام ، و يعنى ايه مسلم بجد .. مش مجرد الفروض و السنن و خلاص .. يعنى ايه الاسلام دين عالمى ، و كيف أن الاسلام تكلم فى الحياة الاجتماعية و الثقافية و العلمية و العملية و السياسية و الاقتصادية و .. و .. و .. كل كل مناحى الحياة ..


إنتوا عارفين اللى عمال ياخد بالبوكس فى وشه و لسه مش مستوعب إنه بيتضرب ؟؟!! ..و حتى مش لاقى وقت إنه يركز و لا يفوق بين بوكس و التانى ؟؟!! .. اهو أنا كنت حاسة كدا ..


كنت حاسة إن الجرعة أكبر من مقدرتى ، و كان كم التساؤلات جوايا بيكبر بطريقة رهيييييييييبة .. حاجة جوايا بتقولى فى حاجة غلط ، أكيد فى حاجة غلط ..


مش معقول دول كلامهم صح ،و اللى أنا سمعته قبل كدا غلط ..

طب اللى فات كان الصح ، و دول اللى غلط؟؟؟!! ..

لالالا الناس دى كلامها يتقبله عقل أى انسان سوى .. طب ليه محدش بيتكلم عن الاسلام من النواحى دى ؟؟..

ليه مابنسمعش عن عالمية الاسلام إلا الاسم بس ، فى حين الحيز اللى بيوصل لنا منه ضيق جدا؟؟ و حاسين انه غير متناسب اطلاقا مع متطلبات العصر؟؟


هو أكيد الاسلام فيه الشق التعبدى ، دا لازمن و لابدن ..

بس أكيد الامور التانية دى لازم يكون لها حيز من وقتنا .. مش معقول وقتنا كله صلاة و طاعات بس ؟؟



و هكذا ظلت التساؤلات تتوالى ..و غيرها و غيرها الكثير ..

بس نكمل بئا المرة الجاية عشان طولت عليكم : )


سلااااااااااااااام

.............................

بالحق ... لازم تروحوا عند سالى .. مدونة حاجات جوايا
عاملة حرب شاملة على شوشو ;)


120 comments:

Unknown said...

أول تعليق
---------
هو مشكلتنا دلوقتى
هى حضرتك المظاهر الدينية
اللى للاسف مفيش قصادها اى التزام بمبادىء الإسلام الصحيحة
مش بتكلم على حضرتك طبعاً
انا بتكلم بصفة عامة

الإسلام مقالش صلى و صوم و البس لبس محترم
و بس
لأ كمان قال نعمر الكون و منسرقش
و منرتشيش

للأسف الفترة المسماة بالصحوةالدينية
رجعنا فيها للدين بشكل غلط

يمكن عشان كدة انا بعتبر ان مفيش صحوة دينية لسة
مع الأسف

الكلام عن الدين زيادة
و الأخلاق تقريباً قربت تختفى
---
مع تحياتى

Soul.o0o.Whisper said...

بدراوى

مبروووووك عليك أول تعليق
:)
دا شرف ليا

بأوافقك أن فعلا بئا الاهتمام بالمظاهر أصبح يشغل الكل

و ليس المتدينين فقط

بل المعظم أصبح يحكم على الشخص من مظهره
و رغم انه ممكن يعطى انطباع مبدئى

لكن بالتأكيد ماينفعش آخد قرارى بناء على لبس


و بأتفق معاك جدا
ان مفهوم الاسلام أرقى بكثير مما نراه اليوم من حال المسلمين
و من مفهومهم له

الصحوة الاسلامية -فى نظرى- مش معناها شيوخ يطلعوا على المنابر يتكلموا فى آفاق جديدة بس

بل ان كل انسان مسلم لازم يكون مقتنع من جواه انه لازم يفهم دينه صح

لازم يكون الدافع من جوا كل شخص فينا
و دا يحركه للبحث و المعرفة بالاضافة إلى التلقى


حقيقى صدق ربنا لما قال " اليوم أكملت لكم دينكم ..و أتممت عليكم نعمتى ..و رضيت لكم الاسلام دينا "


شرفتنى بجد
و سعيدة بتعليقك



دمت بود

رحلتنا في الحياة said...

اجمل سووووووول فى الدنيا كلها ازيك ياقمر اخبارك ايه يارب بخير دايما يارب
بجد البوستات اللى بتنزليها بتغيرنى كتير ربنا يجعلها فى ميزان حسناتك يارب ويثتبتك دايما على الحق
للاسف كتير مننا بيشوف الاسلام صلاة وصوم وعبادات وبس وبينسى اهم حاجة المعاملات اللى هى فى الاصل هتظهر الاسلام صح العبادات بينا وبين ربنا ولازم تاثر فى معاملاتنا
بس اعتقد مهما حاولنا نفهم الاسلام مش هنقدر لانه بحره كبير اوى واسع

د. ياسر عمر عبد الفتاح said...

فعلاً الإسلام مش مجرد دين
الإسلام منهج حياة متكامل
عبادة وعمل وأخلاق وحكم وسياسة وعلم وفن وأدب .. وكله كله

إحنا ضعنا لما الدين عندنا حطيناه في الجامع زي العلمانيين ما بيقولوا

دي حتة من أخر قصيدة كتبتها

بَـاتَ التَّدَيُّنُ تُهْمَـةً نُكْـرَا .. وَشَـرِيعَةُ الإِسْلامِ تُخْتَـزَلُ
فِي صَوْمِ شَهْرٍٍ أَوْ صَلاةِ ضُحَي .. وَفَضَائِلُ الأَخْلاقِ تُنـْتَعَـلُ
لِلْجَهْلِ آلافُ الـدُّرُوبِ هُنَا .. وَالعِلْمُ قَدْ ضَلَّـتْ لَهُ السُّبُلُ

الدين مش بس لحية ونقاب
االحية والنقاب من شرائع الإسلام ..لكن مش همه الإسلام
الأمر واقع زي غيره بين الإفراط والتفريط
وربنا يهدي الجميع
جزاكِ الله خيراً
وربنا يثبتك علي الحق

فارس عبدالفتاح said...

الفاضلة / سول

كل ابن ادم خطأ وهذه قاعدة وهناك قاعدة اخرى وهي ان تستغفر من الخطأ وان لا تعود اليه ثانية وان تحاول ان تفعل الثواب في نفس موقف الخطأ الذي فعلته حتى تتأكد على نفسك انه لن اعود اليه مرة ثانية

وهذا يكون في حوار داخلي مع مع النفس وذاتها حتى تستطيع ان يكون هناك الفكر او الفعل والفعل المضاد

يعني النفس اللمريضة والنفس الصحيحة ثم في مرحلة صعبة ومريرة يصل بها الانسان الى النفس المطمأنة وهذه مرحلة على ما اعتقد انه لا يوجد بيننا من لديه هذه النفس


هكذا اعتقد

بس حلوه اوي ثكلتك امك دي

فكرتني بفيلم الارهاب والكباب لما بعتوا الواد الصغير بجهاذ اللاسلكي مش عارف كان اسمه حنكور وحنكش يعني اسماء من هذا القبيل

فعادل امام وهو البطل طلب من الموظف اللى كان يمثل الاسلاميين بصورة سيئة وهذا اسلوب عادل امام الحقير في مناهضة الاسلاميين

المهم طلب منه ان يزجر الواد ويخوفه عشان يرجع للحكومة ويقلهم انهم ناس مربيين دقون وعصبيين ومبيتفهموش فطلع عليه هذا الراجل وقل بعد ما اخد اللاسلكي قال له


خسئت ثكلتك امك


اهاهاهاهااااهاهاهاهاه

الواد ياعيني طلع يجري لتحت وراح قال لكمال الشتناوي اللى هو مدير امن او وزير داخلية نفس الكلمة


وبعدين عايز يتجسس على الاسلاميين المستولين على المبنى من مأذنة مسجد مجاور فدخل المسجد فرائه شيخ المسجد وهو من الازهريين

فكان يلقي درس فاخذ هذا الشيخ يقول وهو يضمر الحقد على وزير الداخلية او مدير الامن المتمثل في كمال الشناوي


ويقول


اللهم لا اتاخذنا بما فعل السفهاء منا

اهاهاهاهاهاهاهاهاهاهاهاهاه


فكمال الشناوي بيقول لمساعدية هو بيقول على مين



فرد عليه مساعدية قالو له انه ميقصدش سعادتك


اهههاهاهاههههااهاهههه


معلش طلبت معاية لكلك ولت وعجن مش عارف ليه بس هو ده اللى حصل


سلام عليكم

احساس طفلة محبة للرومانسية بس واقعية said...

عارفة اجمل حاجة يا سووول
هو انك بتنقلى واقع كان جواكى فى مراحل مختلفة
ممكن يكون اى حد حاليا فى مرحلة منهم ويتعلم حاجة تفيدة فى اجتيازها
او تكونى بتجاوبى على الاسئلة اللى بتدور فى عقلة والفائدة الكبيرة فى الرسالة اللى عايزة توصليها هى معنى الاسلام اللى وصلتيله وقد اية المعنى دا غنى مش بس بالطاعة والفروض
وازاى الدين والدنيا مرتبطين مش منفصلين وان فى حاجات تانية تخلينا اقوى واقدر على الموازنة

ربنا يثبتك ويثبتنا
متبعاكى
تقبلى مرورى

سما أحمد said...

انا حاسه انك بتوصفي فعلا صراعات داخل نفسك وتناقضات عشتيها ومحتارة فيها
في النهايه وصلتي للاجابات على تساؤلاتك واقتنعتي وهون الاهم
تسلم ايدك
متابعينك

hasona said...

السلام عليكم

ربنا يكرمك ويوفقك
ويثبتك علي الخير


ولينصرن الله من ينصره

وان شاء الله خطوة خطوة تكوني أكثر ثباتا
جميل جدا أن نحاسب أنفسنا
وان نرغمها علي الطريف الصحيح حتي تعتاده وتألفه وتحبه
وتشتاق الي المزيد والقرب من رحاب الله


لا تنسينا من صالح دعواتك

تحياتي

ريمان said...

اول مره اعرف انك منقبه

ربنا يثبتك يا رب


المراحل اللى انتى مريتى بيها تشبه لحد كبير المراحل اللى مريت بيها برضه

ونفس التساؤلات


سبحان الله



تحياتى ليكى


وحشانى كتير يا حبيبتى

♥نبع الغرام♥♪≈ said...

السلام عليكم
حبيبتى سووووووووووووووول
ربنا يكرمك يارب ويسعدك ومتشكره قووى لسؤالك عنى وربنا يجعل كلامك الجميل فى ميزان حسانتك اللهم امين
وبجد سعيده بيكى قووى وبمعرفتك ياقمر ويبقا الود والتواصل بيننا
ربنا يبارك فيك ويسعدك
تحياتى لكى
اختك انوسه

mimi said...

قطتي الجميلة ... ربنا يثبت ايمانك في قلبك ... ويجعل كلماتك في ميزان حسناتك ... ويتقبل منك إن شاء الله

فأنتي سفيرة الأسلام لدي الأخرين ...

تحياتي

محمد said...

السلام عليكم ورحمة الله وبركاته

أختي العزيزة

بسم الله ماشاء الله

عرض شيق واسلوب جميل

ومراحل منطقية والكثير منا يمر بها وفقك الله وجعلك سببا في الهداية


ودمت علي الدرب


خالص مودت وصادق دعائي

رحــــيـل said...

سول حبيبتى

معاكى كتير فى كلامك
المشكله فعلا ان الواحد لما يلتزم الناس بتشوفه ملاك
مع ان احنا فى الاول والاخر بشر
والنفس البشريه معفده جدا ومتناقضه جدا جدا

حاسه بكلام كتير انتى بتقولى جايز لانى مريت فى وقت قبل كده
نفس الحيره والتساؤلات والصح والغلط

بجد ربنا يثبتك يارب
فى انتظار البقيه
دمتى بكل الخير والود

Ramy Wasel said...

يقول سيدا رسول الله

ان الدين لمتين فاوغلوا فيه برفق
وهى دى المشكله
ان الناس بتاخد جرعات كبيره جدا من الدين
اكبر من قدرتهم
فيأتى بنتائج عكسيه تماما
اما بالتطرف
او الابتعاد عن الدين والوصول اى مرحله الكره والابتعاد التام عن الدين
لانهم فهوا الدين خطأ

marmar said...

حبيبه قلبي سووووووولتي الرقيقه
ربنا يثبتك يارب عل نقاب ويقربك من طريق الخير دايما يارب
انا زمان كنت بفتكر كده ولله لحد ما اتعرفت على بنات في الجامعه منقبات وعليكي ولقتهم زينا عاديين يعني مش معقدنها وزي الفل وسكررررررر واغلبهم بيكونو زي العسسسسسسسسل ودمهم خفيف جدا زيك كده يا حبيبتي ولله
طمنيني عليكي وعلى الحياه معاكي
وسامحيني عل تأخير والتقصير وكل الهم ده ربنا يخلصني على خير من الامتحانات اللي لسه هتبدأ الحد ادعييلي يا سوووووووووووولتي
بحبك في الله

مسدس صغير said...

انتى كده هتتحسدى
هههههه
ربنا يثبتك
ربنا يهديكى ويهدى بيكى
ويجعلك سببا لمن اهتدى
امين

ghorBty said...

السلام عليكم

نسأل الله لنا ولك الثبات

انا حسيت بكل كلمة انت قولتيها بس الموضوع مش بيكون بسبب الالتزام بالمظهر يبقي خلاص هنكون ملايكه هو الاحساس بيكون انك حسيتي بقربك من ربنا وحبك ليه بطاعتك ديه فبتحاولي تعمل كل شئ علي اتم وجهه وبتحاولي دايما ما تغلطيش وطبعا احنا بشر وبنغلط ومهما عملنا مقصريين فيحصل الضيق واللوم والعتاب الدائم علي نفسك انك تقولي ازواي انا لابسه كدا وبغلط وازاي انا اعمل كدا وممكن يكون دا اصلا وسواس من الشيطان ومدخل من مدخله فلازم دايما نفتكر
(كل ابن ادم خطاء وخير الخطائين التوابون)
و (إن الله يحب التوابين )

وفي الحديث
(و لو لم تذنبوا لجاء الله بقوم يذنبون كى يغفر لهم )
طبيعي ان احنا نعمل ذنوب بس ذنب عن ذنب بيفرق وتقصير عن تقصير برضوه بيقرق
وكما قال الله تعالي
(الَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ إِلا اللَّمَمَ إِنَّ رَبَّكَ وَاسِعُ الْمَغْفِرَةِ)

ربنا يغفرنا جميعا ويردنا اليه ماردا جميلا

موفقه ان شاء الله .. نفع الله بك

assafo anaroze said...

سلام
في البداية عذرا على الغياب الطويل عن مدونتك بس للظروف احكامها
*********
طريق طويلة سلكتها من اجل ان تلتزمي بالحجاب و النقاب و انا بحيكي ليس على ارتدائك للحجاب بل على الاقتناع الذي لم ياتي من فراغ بل من اعتقاد راسخ بان ده هو الصح
سيدتي
انا اصلا من المسلمين المعتدلين و المنادين بالعلمانية و الغير المعتقدين بصحة الحجاب و ده نقاش كنت حاولت اناقشه مع ايوشة صاحبة مدونة تخاريف ايوشة من قبل لما تناولت نفس الموضوع و لن ادخل ليه مش مقتنع به
بس اللي حاب اقوله اني مهما اختلفت مع اي كان في التوجهات الا اي اقدره التقدير اللازم لشخصه و احترم اختيارته
متمنياتي لك بالتوفيق
وفي انتظار الحلقة القادمة من السلسلة اللي عاملاها عن الحجاب
مودني

قلم رصاص said...

السلام عليكم ورحمة الله وبركاته

البوست رائع جدا يادكتورة

بارك الله فيكم

حقيقة الأمر فعلا تجربتك مع النقاب رائعة

والله تعالى أسأل ان يثبتك على دينه دين الحق الى يوم الدين

اتمنى لحضرتك التوفيق

في حفظ الله

صوت من مصر said...

ممكن تعليقى مش مستحب بالنسبه ليكى بس
النقاب مش بحبه لان بعض الجرائم ترتكب من خلفه
انا على سبيل المثال قابلت رجلين فى المترو بيشحتوا على انه ستات منقبات وبغرض التعاطف الدينى

شمس النهار said...

المشكله مش في الحجاب والنقاب
المشكله ان اغلب المسلمين مش عارفين ان دينا عباده وتعاملات
يعني مااصليش وانم واشتم
مااروحش الجامع واخد اطفالي معايا يضايقوا المصليين بعياطهم ويخرجوهم عن روحانيتهم
وعلي فكره نفسيا الطفل مش بيتعود علي الجامع زي مابيقولوا لا نفسيا مابيفضلوش عشان هو قهر علي عدم التكلم والبكاء والزن بحريه
وحاجات كتير الناس بتعملها
فاكرين الدين صيام وصلاه وخلاص
الدين اكبر واشمل من كده بكتييييييير
دينا جميل جدا جدا في كل حاجه

ياناس الرسول كان بيصدر زاعه الشريف في الباب عشان ستنا عائشه تتفرج علي السرك والا مش عارفه كان اسمه ايه

ربنا يكرمنا جميعا

ماجيتيش ليه اللقاء

فشكووول said...

بتفكرى كتير يا ايمى
وتاعبك نفسك جدا
وبتحملى نفسك فوق طاقتها
وانت انسانه وربنا سبحانه وتعالى قال (انا عرضنا الامانة على السماوات والارض والجبال فأبين ان يحملنها وملها الانسان انه كان ظلوما جهولا).
والامانة طبعا هى العقل وربنا عرف ان الانسان ضعيف وعشان كدا قال انه ظلوما جهولا
يعنى الانسان ظلم نفسه بنفسه
والرسول قال) كل ابن آدم خطاء وخير الخطائين التوابين)
ربنا ورسوله عارفين ضعفنا وعشان كدا سمحوا لنا بالخطأ ولما بنتوب بنبقى خير الخطائين وكل ابن ادم خطاء يعنى كل البشر ومعنى خير الخطائين ليس عينه من الخطائين فقد ولكن كل الانسان بلا استثناء خطاء
كمان ربنا قال فى وصية لقمان لابنه (ولا تنسى نصيبك من الدنيا .. بس بشرط تحسن كما احسن الله اليك والاحسان هنا ليس حسنه او صدقه او بر وانما الاحسان فى العمل وفى الحياه وفى العباده
المهم ان تكون النفس كما هى اماره بالسوء تكون لوامه ايضا وعقله يميل الى الخير
يا سوول انت لم ترى الشباب فى السبعينات والثمانينات واللبس العارى والشابونيز والمينى والميكروجوب والحمد لله ان هناك فى هذه الايام التزام والاهم فكر دينى سائد بين الشباب ولكن مشكلة هذه الايام هى اوقات الفراغ الرهيبه التى يعيش فيها الشباب نتيجه للبطاله وسهولة الحياه اكثر من السابق فكر شيئ ميسر واسهل من الاول لهذا ترى مظاهر انحلال كثيره وخدى بالك مظاهر وليست جوهر والحمد لله انه يوجد حاله كبيره من التدين والالتزام لم نكن نراها فى ايام شبابنا
والسلام عليكم بقى

VÖltaa said...

ربنا يثبتك على الطريق الصحيح ان شاء الله ويهدينا جميعا

ومنتظرين تكملة الصدمات

د/على خميس said...

السلام عليكم و رحمة الله و بركاته
د (سول)
عرض جميل يقترب كثيرا مما مر به الكثيرون و قد مررت به بشكل أو بآخر..
لكنى اقتنعت بعد كده أن وجود من يزهدك فى الدنيا أبضا ضرورى ..
فأنا بعد مرحلتك دى و بعد ما أصبحت أتعامل مع الإسلام على أنه دين حياة..
بدأ مع الوقت قلبى يقسو و أنسى الأخرة و هذا حالى إلى الآن و أحاول أن أعود أسمع محاضرات و أقرأ كتب عن الآخرة و عن القبر و عن الزهد و عن الجنة و النار...
أعتقد الواحد لازم يتأرجح ما بين الناحيتين حتى لا ينجرف إلى أحدهما دون الأخرى و حتى يحافظ على توازنه النفسى ...
قلب معلق مع الآخرة يرى الموت فى كل لحظة و جوارح متعلقة بالعمل فى الدنيا لله طبعا و إن كان العمل ظاهره دنيوى و يفعله الكثيرون غيرى دون نية فقط للدنيا ...
كما قيل : اعمل لدنياك كأنك تعيش أبدا و اعمل لآخرتك كأنك تموت غدا ..
أرجو أن تكون فكرتى وصلت بالشكل الذى أريد..
بارك الله فيك
ثبتك الله و أعانك
تقبلى وافر التحيةو التقدير

ستيتة said...

الحقيقة متعت عيني بقراءة الموضوع ورد بدراوي وردك عليه ورد يا سر عمر عبد الفتاح واستاذنا فشكول ودول قالوا اي كلام كنت ها اقوله

اتفق معهم اتفاقا تاما في كل كلمة

يالا كملي مش بحب انا السسبنس

الأكشن هي هي هي مليش فيه

rssamet_algera7 said...

و فى خضم هذه المعركة .. يشاء الله سبحانه و تعالى إنى أسمع لبعض الدعاة
اللى كانوا بيتكلموا إزاى نُحيى الدنيا بالدين ، و إن الدين و الدنيا مش حاجتين منفصلتين ، بل هما شئ واحد ..


انا حاسة انه فى هون شوية توازن


لابنها يهدي الجميع ويوفقه

بانتظارك

احترامي

اسماء واحلام فى وجدانى said...

انا قلت اجىء احجز تعليق فى الاول مع انه ال28 بس مش مشكلة اسمحلى امشى واجىء بكرة اقرا براحتى

حاجات جوايا said...

السلام عليكم ورحمة الله وبركاته


والله يا سول انتى عسسسسسسسسسسل

لسه عاوزة حاجة من الدنيا ؟؟ لالالا .. ثكلتك أمك يا فتاة .. إيه اللى بتعمليه دا ؟؟

هههههههههههههههههههه
موتينى من الضحك


أنا سعيدة جدا بالمراحل اللى مريتى بيها قبل قرارك بالنقاب .. وبالالتزام

وسعيدة جدا بفكرك المعتدل وإسلامك الصحيح


فيه كتير منقبات تلاقى عندهم تطرف دينى .. لما تكلميهم يحسسوكى انك داخلة النار حالا مش كمان شوية حتى


ونوع تانى من المنقبات شكلا ومتبرجات مضمونا
يعنى ملهمش اى علاقة بالنقاب غير انهم لابسينه
وغالبا بيكونوا لابسينه عن عدم اقتناع لارضاء الزوج .. او لانها مش جميلة مثلا ..أو عشان تحمى بشرتها من الشمس ... كده يعنى


لكن انتى ما شاء الله حققتى المعادلة الصعبة
لطيفة ومرحة وعشرية واجتماعية وعلى خلق وعلم .. دنيويا

وفاهمة وواعية لدورك واسلامك وواجباتك وحقوقك .. دينيا



ربنا يبارك فيكى يارب
ويكثر من امثالك

حاجات جوايا said...

سول يا جميلة

شكرا يا قمر على التنويه عن البوست
جزاكِ الله كل الخير
أسأل الله ان ينفع به اكبر قدر من المسلمين
ويقبلنا لنكون من عباده الصالحين


سلامى لشذا
أخبارها ايه دلوقت ؟

اسماء واحلام فى وجدانى said...

بسم الله الرحمن الرحيم

الاخت الفاضلة

همس الروح

اولا الخطا غير مقصود وتم اصلاحه انا فاكر ان واحد هو اللى قال كده وبعد ردك رجعت لاقيت حضرتك صاحبة الكلام على العموم يا افندم زودت حرفين على الكلام

وممكن حضرتك ترجعى وتتاكدى

اعتذر جدا جدا

فشكووول said...

يعنى ايه يا سوول انعكاسى فى الوورد برس

عايز افهم

arsenalwy said...

معاكى حق الواحد لما ينوى عالالتزام بيطلعول مليون فتنة بس لو ايمانه قوى واعتقاده فى رحمة ربنا كبير ولا هتأثر فيه الحاجات دى

ربنا يثبتك وانا كمان

موفقه

Anonymous said...

السلام عليكم

المدونة بتاعتك اللى شوفته فيها لحد دلوقتى جميل اوى ياسووووووووول

بصى انا هقلك على حاجة

الصراعات دى بتمر علينا كلنا فى اول طريق الالتزام وده عادى جداااااا بس اللى مش عادى انها لاما تبعدنا عن الطريق او تاخد وقت اطول من حقها معانا

والوقت اللى تاخده ده احنا اللى بنحدده

وفعلا الاسلام دين شامل كامل الدين مش حجاب شرعى بس لا ده معاملات وعلم ودعوة وخدمة المسلمين
يعنى ممكن نخرج ونتفسح ونسافر ونشتغل وننام واحنا بناخد ثواب

لكن هاتيجى نقطة طب اعمل ايه ولا ايه ؟؟ كده الموضوع كبر علينا اوى ووسع علينا اوى

انا هحضر دروس ولا هقرأ قران ولا هصل رحمى ولا هتعلم واذاكر كويس ولا ولا ولا .........الخ

هنا ييجى فقه الاولويات يرتبلنا كل القصة دى

وعايزة اقلك انى عشت الصراعات دى انا كتير اكتر من 4 سنين ومشكلتنا والله كلها تكمن فى العلم انصحك تقرى فى فقه الاولويات

فى كتاب صغير فى فقه الاولويات لدكتر مجدى الهلالى وفى ليسوف القرضوى وفى لناس تانية كتير

وكمان

افتكرى حاجات م السيرة اللى ينفعلك بظروفك ببلدك بسنك مينفعش لغيرك ولكنا فى الاخر بنشكل دايرة لازم نكملها سوا

يعنى لو كل الناس دعاة مين هيصلح البلد
ولو كل الناس بتشتغل مين هينصح الناس

ولو.الخ

هختم بقصة صغيرة م السيرة

السرول صلى الله عليه وسلم جالو اكتر من صحباى يسألو عمل او ذكر لا يضل بعده ابدا او يوجب دخخول الجنة

وكل واحد فيهم الرسول جاوبه اجبه مختلفة منهم الل وصاه بكثرة السجود ......الخ

صلى الله عليه وسلم

فعليه احنا اللى بنحدد اللى اللى بيتطلبه منا الاسلام فى الوقت الحالى بالظروف الحالية اللى احنا بنعيشها ونرتب اولياتنا عليه وكل وقت هتختلف فيه اولوياتنا تبعا لاحتياجات الاسلام

واسفة جدا على الاطالة

سلام عليكم

Anonymous said...

السلام عليكم

المدونة بتاعتك اللى شوفته فيها لحد دلوقتى جميل اوى ياسووووووووول

بصى انا هقلك على حاجة

الصراعات دى بتمر علينا كلنا فى اول طريق الالتزام وده عادى جداااااا بس اللى مش عادى انها لاما تبعدنا عن الطريق او تاخد وقت اطول من حقها معانا

والوقت اللى تاخده ده احنا اللى بنحدده

وفعلا الاسلام دين شامل كامل الدين مش حجاب شرعى بس لا ده معاملات وعلم ودعوة وخدمة المسلمين
يعنى ممكن نخرج ونتفسح ونسافر ونشتغل وننام واحنا بناخد ثواب

لكن هاتيجى نقطة طب اعمل ايه ولا ايه ؟؟ كده الموضوع كبر علينا اوى ووسع علينا اوى

انا هحضر دروس ولا هقرأ قران ولا هصل رحمى ولا هتعلم واذاكر كويس ولا ولا ولا .........الخ

هنا ييجى فقه الاولويات يرتبلنا كل القصة دى

وعايزة اقلك انى عشت الصراعات دى انا كتير اكتر من 4 سنين ومشكلتنا والله كلها تكمن فى العلم انصحك تقرى فى فقه الاولويات

فى كتاب صغير فى فقه الاولويات لدكتر مجدى الهلالى وفى ليسوف القرضوى وفى لناس تانية كتير

وكمان

افتكرى حاجات م السيرة اللى ينفعلك بظروفك ببلدك بسنك مينفعش لغيرك ولكنا فى الاخر بنشكل دايرة لازم نكملها سوا

يعنى لو كل الناس دعاة مين هيصلح البلد
ولو كل الناس بتشتغل مين هينصح الناس

ولو.الخ

هختم بقصة صغيرة م السيرة

السرول صلى الله عليه وسلم جالو اكتر من صحباى يسألو عمل او ذكر لا يضل بعده ابدا او يوجب دخخول الجنة

وكل واحد فيهم الرسول جاوبه اجبه مختلفة منهم الل وصاه بكثرة السجود ......الخ

صلى الله عليه وسلم

فعليه احنا اللى بنحدد اللى اللى بيتطلبه منا الاسلام فى الوقت الحالى بالظروف الحالية اللى احنا بنعيشها ونرتب اولياتنا عليه وكل وقت هتختلف فيه اولوياتنا تبعا لاحتياجات الاسلام

واسفة جدا على الاطالة

سلام عليكم

ن said...

السلام عليكم
الدكتورة .. سول
الم أقل أن معالجة الفطرةدائما تحتاج الى الحكمةوالعقل والتأنى فى الحكم على الامور .. ولكن من ينظرون الى المتدين بأنه يجب أن يترفع عن الخطايا والذنوب مما يصل الامر أحيانا الى حد الاستفزاز فهم لم يحتكموا الى عقولهم من الاساس ونسوا أن الخلق بنى فى ستة أيام
والصبر على الطاعات لكى يستوى الفرد وينضج إيمانيا يلزمه حكمةوتأنى ونسى الناس بأن آدم عليه السلام نسى وعصى الامر وهو فى الجنة
قال تعالى

وَيَا آدَمُ اسْكُنْ أَنتَ وَزَوْجُكَ الْجَنَّةَ فَكُلاَ مِنْ حَيْثُ شِئْتُمَا وَلاَ تَقْرَبَا هَذِهِ الشَّجَرَةَ فَتَكُونَا مِنَ الظَّالِمِينَ

فَوَسْوَسَ لَهُمَا الشَّيْطَانُ لِيُبْدِيَ لَهُمَا مَا وُورِيَ عَنْهُمَا مِن سَوْآتِهِمَا وَقَالَ مَا نَهَاكُمَا رَبُّكُمَا عَنْ هَذِهِ الشَّجَرَةِ إِلاَّ أَن تَكُونَا مَلَكَيْنِ أَوْ تَكُونَا مِنَ الْخَالِدِينَ

وَقَاسَمَهُمَا إِنِّي لَكُمَا لَمِنَ النَّاصِحِينَ

فَدَلاَّهُمَا بِغُرُورٍ فَلَمَّا ذَاقَا الشَّجَرَةَ بَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ وَنَادَاهُمَا رَبُّهُمَا أَلَمْ أَنْهَكُمَا عَن تِلْكُمَا الشَّجَرَةِ وَأَقُل لَّكُمَا إِنَّ الشَّيْطَانَ لَكُمَا عَدُوٌّ مُّبِينٌ

قَالاَ رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ

قَالَ اهْبِطُواْ بَعْضُكُمْ لِبَعْضٍ عَدُوٌّ وَلَكُمْ فِي الأَرْضِ مُسْتَقَرٌّ وَمَتَاعٌ إِلَى حِينٍ

قَالَ فِيهَا تَحْيَوْنَ وَفِيهَا تَمُوتُونَ وَمِنْهَا تُخْرَجُونَ

يَا بَنِي آدَمَ قَدْ أَنزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا وَلِبَاسُ التَّقْوَىَ ذَلِكَ خَيْرٌ ذَلِكَ مِنْ آيَاتِ اللَّهِ لَعَلَّهُمْ يَذَّكَّرُونَ

الاعراف (19 ـ 26 ) وهذه هى قصة الانسانية من البداية
يا ابنتى ..مازلنا كل يوم فى اختبار دائم فى مجاهدة النفس وأرى فى نفسك الطيبةروح الجهاد وهو أصعب جهاد يحتاج قائد خبير فى إدارة هذه المعركة الا وهى معركة الانسان مع النفس التى هى نفسه
أدعوا لك بالثبات
مع خالص تحياتى

Beram ElMasry said...

Soul.o0o.Whisper
عزيزتي وابنتي والله مش حركات اصلي قرات ان البلوجر سيغلق لعدد من الساعات للتصليح فخفت اتاخر قلت ابدر كام ساعة في نشر البوست علي العموم انت عرفة ان تعليقك من التعليقات التي ابحث عنها وانتظرها بعد كل نشر
("حصن الامان انهـدم ونبت الامـل ماينزرع فى قلب كان موجـوع"
بأختلف مع حضرتك فى النقطة دى القلب اللى كان موجوع ..هو أكتر قلب بيبئا عاوز يقوم و يرفض اللى هو فيه
انما القلب اللى خلاص فقد الاحساس منه
هو اللى ماعدت بيهمه)

والله كلام معقول برده
اشكرك علي دعاءك وادام الله عليك السعادة وراحة البال
والسلام عليكم ولا سلام مع اليهود

ahimsa said...

لا بئه حرام,انا قاعده اقرء في امان الله واكسيتد ومستنيه حتت البحث والمعرفه واذ فجأتا نكمل المره الجايه,): ماشي

ماعلينا,اسلوبك حلو قوي ياسول,والموضوع بجد مفيد جدا
احلى حاجه ان التساؤلات بتنقلك الى مرحله احسن لان في ناس التناقضات والتساؤلات دي بتقلب معاهم بالعكس
ربنا يثبتك ديما

وعجباني جمله انتي قولتيها في تعليق هنا:
ان كل انسان مسلم لازم يكون مقتنع من جواه انه لازم يفهم دينه صح
لازم يكون الدافع من جوا كل شخص فينا
و دا يحركه للبحث و المعرفة
كلامك صح ميه في الميه بس المشكله ان الواحد ساعات بيكون مش عارف يبدأ من فين

عطش الصبار said...

بوست جميل قوى
ياريت من خلاله نطرح سؤال الاسلام سلوك ولامظاهر للاسف احنا بنعانى من ان الاسلام اتحول لمظاهر اكتر منه سلوك
شكرا على زيارتك وارجو ان تتكرر وتتواصل تقبلى تحياتى

غروب said...

يعايه يا بنتى كملى كلامك كنت عاوزاه اسمع للاخر

بجد الكلام جميل اوى وحساه جدا

وكتير اوى بيجي ليه الاحساس ده فعلا

والاكتر منه احساس بقه تانى

لما بحس انى اتاخرت في البكي والندم على الذنوب بحس انى خلالالالالاص مطروده من رحمه ربنا

خلاص مش بقت تفرق معايا ؟ يا لهوووى

هو ربنا خلاص رمى طوبتى يعنى ؟؟؟؟؟

احساس فعلا بشع

بس الحمد لله بعيط بعدها وبحس براحه كبيره

فعلا فكره الالتزام ووضع ضوابط صاارمه ومليون خط احمر عند الملتزمين شئ غريب جدا

الناس بتعاملهم فعلالالالا على انهم ملايكه

او بمعنى ادق مطلوب منهم يكونوا ملايكه

والالالالا يبقوا بيشوهوا صوره الاسلام ودنويين والخ الخ من اللى بنسمعه

انا شكلى طولت اوى

بس بجد انتى وحشانى جدااااااا

واسفه للتاخير ادعيلي علشان بذاكر وقافله مدونتى احتمال بلا رجعه

بس اكيد هاجيلك دايما يا قمر

مواااه

وحي القلم said...

السلام عليكم
حن قلمي لأن يري تدويناتكم الرائعة وفعلا صدق حينما طلب مني أن أدخل لارى تلك التدوينة
حلوة بجد وأنا كمانكنت منتظر حاجة زي كده
ثانوية عام وفي أمس الحاجة لمعرفة ايام الجامعة اللي جاية ان شاء الله
وياريت فعلا الفهم السليم لشمولية الدين توصل للناس
تقبلي خالص تحياتي

Darsh Basha said...

صحيح الفكرة عن شاب ملتزم ..متاخدة عن كثير من الناس ..انه المفروض ميغلطش دى حاجة منتشرة جدا.
بس تفريق الانسان الى ملتزم وغير ملتزم دى فيها مشكلة شوية ..
يعنى يطلق الشاب الملتزم ..هو من رب لحيتة وقصر إزارة..فاصبح عند الناس ملتزم ..هذا جانب من حانب الدين ..قام بة ..ولكنة قد يكون عندة اخطأ برضة ..زى اى انسان
ولو شخص عادى لو عمل بلاوى ..محدش يتكلم عنة..لاة غير ملتحى او مقصر للثياب

فانا لا احب ان اقول عن شخص ملتزم او غير ملتزم ...وافرق بين احد

فالدين مظهر وجوهر...وانت تحقق الاثنين معا ..المظهر والجوهر..والكل يدعة من اقوال الناس ..ويثبت على ان يجعل مظهرة وجوهرة افضل .

تحياتى لموضوعك

كيكى عوووووو said...

انا مبسوطة انك مبسوطة**
فهمتى قصدى او مفهمتيش
بس مبسوطة عشانك
ولا انزلك تحديث
عوووووو

تأثير الفراشة said...

السلام عليكم و رحمة الله و بركاته

ربنا يكرمك و يثبتك على الحق دوما،

و الحقيقة إن النقطة اللى ذكرتيها دى مهمة جدا ، لأن فى التدين زى ما الانسان محتاج يعمل العبادات الظاهرة زى الصوم و الصلاة و الحجاب و ما إلى ذلك كمان يحتاج يعمل عبادات أخرى مثل ترقيق القلب و حسن معاملة الناس و التعلم لأن طلب العلم فريضة و حسن التصرف و الفطنة و و و و،

و اللى هيشعر بالطمأنينة فعلا هو من يأخذ الدين من جمييييييييع جوانبه

و الطمأنينة هتستمر مع السعى المستمر لأن محدش هيوصل لمرحلة و يكون أنا خلاص كويس قوى كده

ربنا يرزقنا جميعا أن تكون نفوسنا من النفوس المطمإنة

و عندى احساس إنك هتذكرى الكثير من المعانى الجميلة فى تدويناتك القادمة كمان ،إن شاء الله

أعجبتنى مدونتك ، بالتوفيق لك دائما
و ربنا يوفقك فى الامتحانات

جزاك الله خيرا

Israa El-sakka said...

بصي يا سول يا أختي
أنا بقى لسه لحد دلوقتي بعيش الصدمات اللي أنتي بتتكلمي عنها بعيشها في كل ثانية يمكن لأني لسه بتشكل بس بأنا
بتفق معاكي لازم الإنسان يتحط في إطاره الإنساني مش كانه ملاك و فعلا بعض الناس مش بتحترم الرموز الدينية اللي هي بتلبسها و بصي في الشارع
تحياتي

۩ Nour ۩ said...

السلام عليكم..

عزيزتى.. ..إن الحياة ابتلاء كبير وحينما يتم المواجهةبين الطريق وضده تكون الحرب الداخلية مدوية !!
وأن كانت القرارات باليسيرة ..فأن الافعال لا يستهان بطريقها ..وأن كانت الافعال
كلمات فما كان الحال هو الحال..

ولكن الافعال تحتاج ارادة ودعاء للتثبت..
وحياة التناقضات بين المظهر والمخبأ
تلك اصبحت عادية فى ظل وقت العادية ..ونظل نلوم الجميع كان من التزم كانه اصبح ملائكى الطباع ..

وتظل النصيحة ليت مظهرك كمخبأك ..!!
ثبتك الله يا همس ..وربنا يوفقك.. دمتِ بكل الخير

Anonymous said...

انا جييييييييييت
بس هخرج تانى اصل يكون حد خالع راسه أصلى جاى ازور يدوب مرور ومعايا كيس تسالى لقيت كلام عن النقاب قلت يا واد اختشى واستنى لما تستأذن عموما هزوركم تانى

اسماء واحلام فى وجدانى said...

اكيد طبعا علشان ندخل الجنة لازم نلتزم بحاجات كتير اوى
الجنة دخولها بسيط وربنا ميسره لينا بس ممكن احنا اللى نكون بنحب الحاجة السهلة كلامى ليس موجه لشخصك انما موجه للبشر اجمعه مع احترامى لكل شخص موجود هنا طبعا المفروض اول حاجة نعملها نبعد عن الدرة خالص لان الشيطان فعلا خبيث جدا وحركاته قد تبدو مقنعة ولكنها البداية دوما تكون مقنعة والنفس الضعيفة هى من تستلم بسرعة
كلامك رغم قسوته الا انك جعلتينا نراه بنظرة بسيطة بروحك الخفيفة
يا رب ارزقنا الجنة وصحبة اهل الجنة
ويثبت ايمانك ويقويكى على الدنيا وما فيها

ميرام said...

تعرفي
انتي شخصية جميلة قوي بجد ماشاء الله
ربنا يكرمك بجد ..
وسعيدة ان في حد كده ..
منتظرة جديدك
تحيــــاتي

تامر علي said...

أعتقد المشكلة مش في الشخص الملتزم فقط لكن في المحيطين به كذلك فبمجرد وجود شخص تظهر عليه مظاهر الدين حتى يأخذ لقب "شيخ" ويقدم في كل أمور الدين وإن كان أجهل من الدابة :)

وكمان يجب على المسلم أم يتوازن نفسياً ويتوائم مع البيئة المحيطة حتى لا "يشاد الدين" فيغلبه ..

تحياتي للطرح المثمر

د. ياسر عمر عبد الفتاح said...

السلام عليكم يا دكتورة
ياريت ترجعي تشوفي ردي علي مدونة بدراوي

انا مقصدتش نهائياً أذمك لرأيك بوجوب النقاب

جلال كمال الجربانى said...

السلام عليكم ورحمه الله وبركاته

وياسلام لو يكون الإسلام فينا نتنفسه مع كل معامله دينيه ودنيويه لأن ديننا لم يترك لنا شيئاً إلا وجهنا فيه للأفضل والأحسن دنيا ودين وأسلوب حياه
لكن للأسف المظهريه والطقوسيه الشكليه غالبه فى كل معاملاتنا
والثبات والإنتظام فى الطاعات أصعب من الخطوات الأولى
وربنا يثبتك ويعزك

ويوفقنا جميعاً الى ما يحب ويرضى

د. ياسر عمر عبد الفتاح said...

معلش يا دكتورة .. يبقي أنا فهمت غلط
انا اسف

وهوه عامةً النقاش انتهي تقريباً .. بدون فائدة تذكر

الحمد لله

Soul.o0o.Whisper said...

أيوشة ...

هلا بيك يا جميلة
أنا الحمد لله بخير و يارب تكونى انتى كمان بخير

و بجد مبسوطة ان الحمد لله البوستات لها صدى عندك
ربنا يرزقنا جميعا الحق
اللهم آمين

وفعلا يا ايوشة
كل ما بتعرفى فى الاسلام أكتر
كل ما بتكتشفى انك لسه ماعرفتيش فيه حاجة

ربنا يعلمنا جميعا يارب

دمتى بود يا جميل

Soul.o0o.Whisper said...

د. ياسر عمر عبد الفتاح

فعلااااااااا
الاسلام منهج حياة متكامل

بالفعل احنا كنا السبب فى ضياع الدين
بس يارب نكون أسباب فى عودته مرة تانية بحق


ثبتنا الله و اياكم على الحق
و جزانا و اياكم كل خير



دمت بود

Soul.o0o.Whisper said...

فارس عبدالفتاح

"كل ابن ادم خطأ وهذه قاعدة وهناك قاعدة اخرى وهي ان تستغفر من الخطأ وان لا تعود اليه ثانية وان تحاول ان تفعل الثواب في نفس موقف الخطأ الذي فعلته حتى تتأكد على نفسك انه لن اعود اليه مرة ثانية"

رائع جدا هذه القواعد
:)

و ربنا يرزقنا جميعا يااااااارب نفوسا مطمئنة

بس بجد ضحكتنى على موقف الفيلم دا
هو طبعا مش فاكرة ولا لقطة من اللى قلتهم
رغم انك شرحت بالتفصيل
غير بس بتاعت : هو بيقول على مين
هههههههههههههه


و بعدين خد راحتك
بيتك و مطرحك
قصدىىىىىىىى
مدونتك و تعليقك

دمت بود

Soul.o0o.Whisper said...

احساس طفلة محبة للرومانسية بس واقعية

تعرفى ..

أنا فعلا باحاول أطلع اللى جوايا زى ماكان عشان عارفة ان فى ناس فى اى مرحلة من دول

فيارب تكون محاولة انهم يوصلوا للحق
و ربنا يرزقنا جميعا رؤية الحق و اتباعه


ثبتنا الله و اياك يا جميل
و دمتى دائما بكل ود

Soul.o0o.Whisper said...

سما أحمد

باحاول والله يا سما أنى اوصف الصراعات اللى كانت جوايا

و رغم ذلك فكل مابأعرف كل ما باتكتشف ان لسه الرحلة ما بداتش
و لسه المشوار طويل


ربنا يعلمنا جميعا ياقمر

و دمتى دائما بكل ود

Soul.o0o.Whisper said...

hasona

و عليكم السلام و رحمة الله و بركاته

"ربنا يكرمك ويوفقك
ويثبتك علي الخير"
اللهم آمين
و اياكم


والله يا اخى الفاضل
كله بفضل الله و بتوفيقه
لكن ..
علينا ان نثبت حسن نوايا بس
:)
و هتلاقى ربنا معانا فى كل خطوة


و لا تنسانا انت ايضا بدعوة بظهر الغيب


دمت بود

Soul.o0o.Whisper said...

ريمان

ريمىىىىىىىىىى

"اول مره اعرف انك منقبه"

!!!!!!!!!!!!!!!!!!

ربنا يثبتنا جميعا حبيبتى و يرشدنا إلى الحق دائما


منورانى
و هتخلصى امتحانات امتى؟؟


دمتى بكل الود يا قمر

Soul.o0o.Whisper said...

عاشقة الأحزان

و عليكم السلام و رحمة الله و بركاته

هلا أنووووس

ربنا يرمنا جميعا يا قمر
و لا شكر على واجب احنا اخوات

و إن شاء الله يبئا الود و التواصل بيننا


دمتى بكل الود يا قمر

Soul.o0o.Whisper said...

mimi

هلا يا ميمايتى العزيزة

ربنا يثبت الايمان فى قلوبنا جميعا
و يتقبل منا اللهم آمين

"فأنتي سفيرة الأسلام لدي الأخرين ... "

أن أن اااااااااااااان
دى مسئولية كبيرة جدااااااااااااااااا


دمتى بكل الود يا قمر

Soul.o0o.Whisper said...

هذه حياتي

و عليكم السلام و رحمة الله و بركاته

متشكرة جدا بكلماتك الطيبة

و ربنا يوفقنا جميعا
و يجعلنا أسباب لاقامة دينه اللهم آمين


دمت بود

Soul.o0o.Whisper said...

جريدة الصباح العربي

متشكرة جدا على الدعوة الجميلة
و ان شاء الله يكون التواصل


دمتم بود

Soul.o0o.Whisper said...

رحــــيـل

صح يا جميل
نظرة الناس للملتزم انه ملاك
أو يمكن بتحكه فى صورة مثالية و بتنكر عليه الغلط

لكن فعلا فى الاول و الاخر احنا بشر


ربنا يثبتنا جميعا يا جميل
و يعلمنا


دمتى بكل ود

Soul.o0o.Whisper said...

Ramy Wasel

"ان الدين لمتين فاوغلوا فيه برفق"
صدق رسول الله صل الله عليه و سلم

صححححح
و بأوافقك ان فعلا احيانا لما بناخد جرعات كبيرة فى وقت قصير

بنحس إن الدين صعب و شاق
و فى فعلا ناس بترجع عنه

ربنا يهدينا جميعا
و يثبتنا على الحق


دمت بود

Soul.o0o.Whisper said...

marmar

مرمرتى الجمييييييييييييلة
وحشانى بجد يا مرمر

يا رب تكونى بخير
هتخلصى امتحانات امتى؟؟

ربنا يوفقك يا رب يا قمر
و يذلل لك كل صعب
و ييسر لك كل عسير


و أحبك الذى احببتنى فيه يا جميل
و أشهد الله أنى أحبك فيه
:)

ترجعيلنا بألف سلامة يارب

Soul.o0o.Whisper said...

مسدس صغير

"انتى كده هتتحسدى"

مممممممممم
مين دا؟؟؟
كدا هأشك فى ناس !!!

:)

"ربنا يثبتك
ربنا يهديكى ويهدى بيكى
ويجعلك سببا لمن اهتدى"

اللهم آمين و اياكم


دمت بود

moory-mero said...

السلام عليكم و رحمة الله وبركاته

كل اللي اتمنهولك ربنا يثبتك على موقفك ويقوي ايمانك ويبعد عنك اي شر وكلام وموش يهمك من الناس
لان كده او كده هتتكلم
ربنا يجعلك افضل من اللي بيتكلموا ويستفزوكي لان اكيد بلسان شوشو بيستفزوكي

وربنا يهدينا جميعا لما يحبه ويرضاه

في رعاية الله

Soul.o0o.Whisper said...

ghorBty

و عليكم السلام و رحمة الله و بركاته

هلا غربتى الجميلة

بالظبط يا جميل زى ما قلتى
ان احساسك انك بتقربى من ربنا و مش عاوزةتغلطى

فأى ذنب تعمليه
تحسى بسياط تجلدك

و الخطأ طبيعة بنى آدم
لكن للأسف الواحد كان واخد تصور غلط خالص
بس بعد كدا ربنا الحمد لله علمنى

"ربنا يغفرنا جميعا ويردنا اليه ماردا جميلا "

اللهم آمين


دمتى بكل الود يا جميل

Soul.o0o.Whisper said...

assafo anaroze

و عليكم السلام و رحمة الله و بركاته

أهلا اسافو و نورت المدونة
يارب تكون بخير
.........

طبعا نقطة الحجاب لن اتناقش معك فى فرضيتها
و قناعاتك شئ خاص بيك

و طالما ان احدنا لا يتعدى على الاخر
يبقى الود بيننا ان شاء الله

و بأشكرك على كلماتك بجد

وربنا يهدينا جميعا و يوفقنا للحق


دمت بود

Soul.o0o.Whisper said...

قلم رصاص

و عليكم السلام و رحمة الله و بركاته

متشكرة جدا
و ربنا يبارك لك يارب

و يثبتنا جميعا على الحق

و ربنا ييسرلك الامتحانات ان شاء الله
ذاكر كويس
:)


دمت بود

Soul.o0o.Whisper said...

صوت من مصر

كون انك تحب النقاب او مش تحبه دا طبعا شئ خاص بيك

لكن موضوع اننا نكره النقاب عشان فى اشخاص بيستخدموه غلط

فدا بيدل انهم بيستخدموه لانهم شايفين انه شئ النا مستحسناه
فبيستخبوا فيه

و ياما سمعنا حكايات عن استخدام النقاب غلط

و ياما سمعنا حكايات عن استخدام زى مشابه لرجال الشرطة

و ياما سمعنا عن ملتحين عملوا جرايم

فدا مش دافع ابدا اننا نترك النقاب
او زى الشرطة
او اللحية

فالأمر أولا و أخيرا متوقف على الشخص


:)
دمت بود

Soul.o0o.Whisper said...

شمس النهار

أولا أهلا و سهلا بيكى
و بجد نورتينى

و سعيدة جدا بزيارتك دى

و عندك حق فى اللى قلتيه
إننا للاسف أصبح الدين مختزل لدينا فى مظاهر و عبادات و تركنا باقى الجوانب


ربنا يعلمنا جميعا يارب

و معلش بئا كنت تعبانة
ان شاء الله نتقابل قريب على خير


دمتى بكل الود

Soul.o0o.Whisper said...

فشكووول

عمو العزيييييييييز فشكوووووووول

أنا اللى بتأسف لك جدا جدا معلش مقصرة معاك
يارب تكون بخير و مش زعلان منى


و بالنسبة للتفكير
اه ..
بافكر كتير جداااااااااااااا

و عندك حقك يا عمو
بجد أنا باقعد كدا و بافكر فى حكاية الذنب و التوبة
باحس أد ايه ربنا رحيم بينا


و بالنسبة لنقطة التدين
فالحمد لله أصبح يوجد الكثير من الدعاة و العلماء

لكن يا عمو المسألة أكبر من كدا


ربنا يعلمنا جميعا يارب


دمت بكل الود يا سيادة الرئيس
:)

د/على خميس said...

د / سول
السلام عليكم
اوعى تكتبى موضوع جديد إلا لما أكون اون لاين ...
علشان احجز اول تعليق :)


بارك الله فيك

Soul.o0o.Whisper said...

Mo7ammed

أهلا بيك
و شرفتنى بالزيارة
و يارب مش تكون الأخيرة

و ربنا يثبتنا جميعا يارب و يهدينا للحق


دمت بود

Soul.o0o.Whisper said...

dr aly khamis

و عليكم السلام و رحمة الله و بركاته

"لكنى اقتنعت بعد كده أن وجود من يزهدك فى الدنيا أبضا ضرورى ..
فأنا بعد مرحلتك دى و بعد ما أصبحت أتعامل مع الإسلام على أنه دين حياة..
بدأ مع الوقت قلبى يقسو و أنسى الأخرة و هذا حالى إلى الآن و أحاول أن أعود أسمع محاضرات و أقرأ كتب عن الآخرة و عن القبر و عن الزهد و عن الجنة و النار..."

:(
نعمممممممممممم
أوافقك تماماااااااااا

لأنى بردوا كدا

فعلا لازم الواحد يحافظ على غذاء أجزاؤه
كلها
عشان يحس بالتوازن

"اعمل لدنياك كأنك تعيش أبدا و اعمل لآخرتك كأنك تموت غدا "

كنت لسه هأقولها والله
بس لقيتك كتبتها

و أعتقد الحمد لله الفكرة وصلت
و ربنا يهدينا جميعا و يثبتنا


دمت بود

Soul.o0o.Whisper said...

ستيته حسب الله الحمش

يا هلا يا هلا بدكتورتنا الغالية

:)
حاضر يا فندم

علم و جارى التنفيذ



دمتى بكل ود

Soul.o0o.Whisper said...

rasamet_algera7

نورتى المدونة يا جميل

و ربنا يهدى الجميع
اللهم آمين


دمتى بود

Soul.o0o.Whisper said...

اسماء واحلام فى وجدانى

يا أهلا يا أهلا

ماشى ال28 ال28

و كمان تمشى؟؟
ماشى

فى انتظارك

دمت بود

Soul.o0o.Whisper said...

حاجات جوايا

و عليكم السلام و رحمة الله و بركاته

سالىىىىىىىىىى

احرجتينى بجد

اللهم لا تؤاخذنى بما يقولون
و اجعلنى خيرا مما يظنون
و اغفر لى مالا يعلمون


ربنا يكرمك حبيبتى يارب
و يثبتنا جميعا على الحق




دمتى بكل الود يا قمر

Soul.o0o.Whisper said...

حاجات جوايا

جزانا و اياكى كل خير يارب
و ربنا يجعله فى ميزان حسناتك اللهم آمين


و شذى الحمد لله بخير
بتسلم عليكى
:)



منورة يا جميل

Soul.o0o.Whisper said...

اسماء واحلام فى وجدانى

و لا يهمك يافندم

و شكرا على الاستدراك السريع دا
:)



دمت بود

Soul.o0o.Whisper said...

عمو العزيز فشكول

انعكاسى فى الوورد برس
دى مدونتى التانية الاحتياطى

نسخة من دى تمام
عشان كدا سمتها انعكاس
:)

بسسسسسسسس
دى كل الحكاية

Soul.o0o.Whisper said...

arsenalwy

ربنا يهدينا جميعا و يعيننا على شيطاننا
و يثبتنا على الحق

و شد حيلك ذاكر كويس


دمت بود

Soul.o0o.Whisper said...

noha

نهى
و عليكم السلام و رحمة الله و بركاته

هلا يا جميل
نورتينى بجد

و كمان طلعنا بلديات
دى حاجة جميلة جدااااا

ربنا يكرمك يا قمر ..انتى كمان مونتك جميلة جدا
و تعليقك رائع بجد

و انتى اجملتى فى هذه الجملة
"ومشكلتنا والله كلها تكمن فى العلم انصحك تقرى فى فقه الاولويات"

فعلا ربنا يعلمنا جميعا يارب

و أنا كنت قرأت فيه أجزاء
و باكمل ان شاء الله

ربنا يكرمك يا قمر يارب


دمتى بكل ود

فشكووول said...

يا سلام يا حلوه
افادكم الله
مدونه تانيه صوره من مدونتك
افادك الله يا دكتوره
كسبنا صلاة النبى
والله انا عارف انها صوره من المدونه
انا قصدى بتعمليها ازاى عشان انا بواجه ساعات مشاكل فى المدونه وعايز اعمل زيها بس ازاى
تضحكى عليى وتقولى كلمتين وبس
انا عايز تفصيلات ازاى تعمليها عشان اعمل زيها وانت تردى على بكلمتين وبس
لا يا حلوه
قولى لى بالتفصيل اعمل زيك ازااااااائ
تحياتى

فشكووول said...

يا سوول ابعتى لى تانى اللينك بتاع الصيادله
عشان انا رحت له من الايميل وبعدين ضاع منى تانى
ولى انى مش صيدلى لكن احط تعليق اقول فيه السلام عليكم وخلاص
تحياتى

عطش الصبار said...

دكتوره سووووووووووول
شكرا جزيلا على مرورك على مدونتى اللى نورت
اما بخصوص التساؤلات فالاجابه داخل البوست الجميل بتاعك(
الاسلام مش دين فقط لكن الاسلام منهج واسلوب حياه ومش مطلوب نبقى ملائكه لكن مطلوب معرفه الخير والشر والفرق بينهم وعشان نعرف الفرق يبقى لازم نمارس الحياه مش نهرب منها المهم اننا نكون صادقين مع نفسنا والايكون الزى فقط هو دليل التدين
شكرا على مرورك
تقبلى تحياتى

قلب ارهقته الاحلام said...

السلام عليكم

ازززيك ياقمرر وحشاني

ربنا يثبتك يارب

معلش انا متأخرة عليكي بأة :$

دمتي بألف خيرر يارب

جارة القمر said...

أتمنى ان تكوني بخير


احترامي

Anonymous said...

تسالىىىىىىىىىىىى
انا اصلى بحب التسالى ودى مدونتى من غير مدونة هى تعليقات وبس
موضوع مدونتى زى ما انتو شايفين انا عابر سبيل بستمتع جدا بيكم وبأفكركم وبرأيكم
وشعارى كلمات ابونا صلاح جاهين
«غمض عينك وامشي بخفة ودلع..
الدنيا هي الشابة وانت الجدع..
تشوف رشاقة خطوتك تعبدك....
لكن انت لو بصيت لرجليك تقع...عجبي!»
اهتماماتى
الازأزة .. يعنى .. لب وسودانى حمص وترمس وحب العزيز
ولما بكون متريش فستق هاهاها
انا بضحك لأنى دايما على الحديدة بس بردوا بلاقى
تسالىىىىىىىىىىى

Soul.o0o.Whisper said...

ن

و عليكم السلام و رحمة الله و بركاته
هلا أستاذتى الغالية

"الم أقل أن معالجة الفطرةدائما تحتاج الى الحكمةوالعقل والتأنى فى الحكم على الامور ."
صدقتى
لكن للاسف لا يصل الانسان إلى هذا الاستنتتاج إلا بعد تجربة


"يا ابنتى ..مازلنا كل يوم فى اختبار دائم فى مجاهدة النفس "

نعم والله
ربنا يعيننا جميعا على جهاد النفس
و يثبتنا على الحق



دمتى بكل ود

Soul.o0o.Whisper said...

Beram ElMasry

أستاذى العزييييييييييز

ألف ألف ألف حمدلله ع السلامة و نورت مدونتك
يارب تكون بخير و صحة و سعادة

"والله مش حركات اصلي قرات ان البلوجر سيغلق لعدد من الساعات للتصليح فخفت اتاخر قلت ابدر كام ساعة في نشر البوست"
و لا يهم حضرتك كنت باضحك والله
و ربنا يطمنا عليك يارب


دمت بكل ود

Soul.o0o.Whisper said...

ahimsa

أهلا بيكى
و نورتى المدونة

و يارب تنورينى على طول
و معلش بئا انتى لوازم الحبكة
;)

و متشكرة جدا لكلماتك الجميلة
و يارب يكون وصلك المعنى

و بالنسبة لنقطة البداية
صدقينى ماكنتش على بالى
بس بجد كنت بأسأل ربنا من قلبى اوى انه يعلمنى و يعرفنى

عشان بجد عاوزة أكون صح و أكون على الحق

و الحمد لله ربنا وفقنى
على العموم تابعى البوستات الجاية
و يارب تكون نقطة بداية ليكى


متشكرة خالص على مرورك الجميل يا قمر
و بانتظارك دائما


دمتى بود

Soul.o0o.Whisper said...

عطش الصبار

أهلا بحضرتك
و بجد نورتينى

بالنسبة للاسلام فبالفعل الاسلام مش مظاهر
و لا سلوكيات و تعاملات بس كمان

الاسلام دا منهج حياة متكامل فعلا
بس احنا نفهمه صح


و ان شاء الله يدوم التواصل


دمتى بكل ود

Soul.o0o.Whisper said...

غروب

غروب الجميلة
بجد ربنا يكرمك يا قمر
و ما يحرمكيش من القرب منه
و لا لذة الانس بيه

و لا يحرمنا جميعا يارب

أما بالنسبة لنقطة المتدينييين
فالنقطة دى عند المتدينين كمان
بيكونوا فاكرين انهم خلاص ملايكة و مش بيغلطوا

بس للاسف بيكتشفوا انهم لسه بشر!!
و هما فعلا كدا


ربنا ييسرلك كل عسير يارب يا قمر
و ترجعى تشرفينا و تنورينا
و مستنياكى

بلاش حكاية هأقفل المدونة دى


دمتى بكل ود يا جميل

Soul.o0o.Whisper said...

مصعب صلاح

و عليكم السلام و رحمة الله و بركاته

اهلا بالخال الهمام
و مبروك عليك الاجازة

بس ماتنساش تطمنا على النتيجة :)

متشكرة بجد على زيارتك و كلماتك الجميلة
و أنا تحت أمرك فى أى شئ عاوز تعرفه عن الجامعة و حياة الجامعة - فى مستوى خبرتى:)-


دمت بود

Soul.o0o.Whisper said...

mosooz

بأتفق معاك فى نقطة المسمى
أنا فعلا بأكره المسميات

و فعلا الالتزام مش بالنقاب و اللحية
والله أنا عارفة ناس مش منتقبين و لا ملتحين
و قمة فى الدين ما شاء الله و لا قوة إلا بالله

و أنا لما بأقول ملتزمين -لشيوع المسمى ليس إلا- فأنا قصدى اللى اختاروا اانهم يلتزموا بتعاليم الدين
مش مظهر معين منه

ربنا يرزقنا جميعا حلاوة الجوهر و المظهر جميعا


دمت بود

Soul.o0o.Whisper said...

كيكى

عوووووووووووو
و أنا مبسوطة انك مبسوطة إنى مبسوطة
نياهاهاهاها

ربنا يكرمك يارب يا كيكى
و مايحرمنيش من عووووووو
أبداااااااااااااا


دمتى بكل ود يا جميل

Soul.o0o.Whisper said...

تأثير الفراشة

و عليكم السلام و رحمة الله و بركاته
أهلا د.نهى

نورتى المدونة

و ربنا يكرمك يارب يا قمر
و يثبتنا جميعا على الحق

و فعلا لكى نصل لمرحلة السكينة و الاطمئنان
لابد من بحث دائم
و ثقة فى الله اولا و أخيرا و حسن توكل عليه

و أرجو أن تستمر زيارتك دايما و تقوليلى رأيك فى اللى جاى


و جزانا و إياكم كل خير يا جميل

دمتى بود

Soul.o0o.Whisper said...

Israa El-sakka

هلا اسراء
نورتى المدونة يا جميل

بصى يا قمر
أولا بجد ادعى ربنا اوى انه يعلمك و يهديكى للحق

و بجد مش تبصى لحد
لأن كل انسان مسئول عن نفسه
فشوفى تحبى تككون الاجابة بايه
:)


دمتى بكل ود
و بانتظارك دائما

Soul.o0o.Whisper said...

Nour

و عليكم السلام و رحمة الله و بركاته
هلا نور الغالية
:)

"ولكن الافعال تحتاج ارادة ودعاء للتثبت.."

صدقتى يا نور والله
ربنا يهدينا جميعا للحق و يثبتنا عليه


دمتى بكل الود يا جميل

Soul.o0o.Whisper said...

Anonymous

ياريت نتعرف بيك

Soul.o0o.Whisper said...

اسماء واحلام فى وجدانى

"اكيد طبعا علشان ندخل الجنة لازم نلتزم بحاجات كتير اوى"

صدقنى مش اكتر من اننا نلتزم بفطرتنا
بس الفطرة الصحيحة
مش الفطرة اللى لوثتها الدنيا

"المفروض اول حاجة نعملها نبعد عن الدرة خالص لان الشيطان فعلا خبيث جدا وحركاته قد تبدو مقنعة ولكنها البداية دوما تكون مقنعة والنفس الضعيفة هى من تستلم بسرعة"

صحححححححح
لازم فعلا اول شئ نبعد عن الدرة
و نسأل الله أن يعيننا على أنفسنا


"يا رب ارزقنا الجنة وصحبة اهل الجنة
ويثبت ايمانك ويقويكى على الدنيا وما فيها"

اللهم آمين ..لنا جميعا
:)

دمت بود

Soul.o0o.Whisper said...

ميرام

ربنا يكرمك يارب يا جميلة
بجد احرجتينى

و أنا أسعد والله بيكى
و بانتظارك دائما


دمتى بود

Soul.o0o.Whisper said...

تامر علي

باشكرك بجد على زيارتك
و على تعليقك الجميل

صح .. نقدر نقول ان المحيطين فعلا بيساعدوا على رسم صورة غلط و تصديقها فى نفس الشخص الملتزم



و فعلا لازم الانسان المسلم يوازن بين جميع أغذية النفس و الجسد و العقل و القلب و كل شئ
ساعتها فعلا بيحس بالاتزان


دمت بود

Soul.o0o.Whisper said...

د. ياسر عمر عبد الفتاح

و عليكم السلام و رحمة الله و بركاته

أعتقد انه كان سوء تفاهم و خلاص راح لحاله
:)


دمت بود

Soul.o0o.Whisper said...

واحد من العمال

و عليكم السلام و رحمة الله و بركاته

اهلا بحضرتك
و حمدلله ع السلامة

"وياسلام لو يكون الإسلام فينا نتنفسه مع كل معامله دينيه ودنيويه لأن ديننا لم يترك لنا شيئاً إلا وجهنا فيه للأفضل والأحسن دنيا ودين وأسلوب حياه"

فعلا صدقت والله
ربنا يعلمنا جميعا يارب

و يثبتنا و يسددنا



دمت بود

Soul.o0o.Whisper said...

د. ياسر عمر عبد الفتاح


أبدا و لا يهمك
بس فى نقطة عاوزة أقولهالك

إحنا بنتناقش عشان اظهار حق فقط
أما مسألة القناعات
فدى مش لينا فيها

دمت بود

Soul.o0o.Whisper said...

mero-moory

و عليكم السلام و رحمة الله و بركاته
أهلا بيكى يا ميرو و نورتى المدونة

ربنا يكرمك يارب يا جميل
و ربنا يثبتنا جميعا على الحق

و يهدينا إليه صراطا مستقيما


دمتى بود

Soul.o0o.Whisper said...

dr aly khamis

و عليكم السلام ورحمة الله و بركاته

ربنا يكرمك يا دكتور يارب
:)

حاااااااااااضر
بإذن الله أنزل البوست لما تكون أونلاين

بس بتكون أونلاين امتى؟؟



دمت بود

Soul.o0o.Whisper said...

فشكووول

عمو العزيز / فشكول
يا هلا يا هلا

"يا سلام يا حلوه
افادكم الله
مدونه تانيه صوره من مدونتك
افادك الله يا دكتوره
كسبنا صلاة النبى "

احم احم
احرجتنى والله يا عمو

"والله انا عارف انها صوره من المدونه
انا قصدى بتعمليها ازاى عشان انا بواجه ساعات مشاكل فى المدونه وعايز اعمل زيها بس ازاى
تضحكى عليى وتقولى كلمتين وبس "

مش بأقولك أحرجتنى
هههههههههههههه


"انا عايز تفصيلات ازاى تعمليها عشان اعمل زيها وانت تردى على بكلمتين وبس
لا يا حلوه
قولى لى بالتفصيل اعمل زيك ازااااااائ"

حاضر حاضر والله
بس بلاش ضرب
اصلى باخاف
:)



دمت بكل ود يا عمو العزيز

Soul.o0o.Whisper said...

فشكووول

حاضر يا عمو
هأبعت لحضرتك اللينك حاضر

بس دا منتدى
مش مدونة

مش مشكلة
:)
ما علينا

Soul.o0o.Whisper said...

عطش الصبار

العفوووووووو
دا شرف ليا إنى أزور حضرتك


فعلا .. زى ما حضرتك قلتى
ان الدين منهج حياة
و نحاول نعرف الحق و نلزمه
و نعرف الباطل
و نبعد عنه


ربنا يكرم حضرتك يارب

دمتى بكل ود

Soul.o0o.Whisper said...

قلب ارهقته الاحلام

و عليكم السلام و رحمة الله و بركاته

هلا بالجميل
أنتى كمان وحشتينى

فينك؟؟


ربنا يثبتنا جميعا يا قمر
و ماتتأخريش تانى علينا
:)


دمتى بكل ود

Soul.o0o.Whisper said...

جارة القمر

هلا يا جميل
الحمد لله بخير

يارب انتى كمان تكونى بخير



دمتى بكل ود

صوت من مصر said...

م بقول ان النقاب وحش لكن فعلا مبحبوش وتعددت وجهات النظر ولا ايه

rovy said...

السلام عليكم
ازيك يا سول
ربنا يثبتك على الحق حبيبتى
لكن اللى نفسى كل مسلم و مسلمه يفهموه ان دينا دين معامله اكثر من انه مظهر يعنى مع الاسف فيه ناس بتلبس النقاب لكن معاملتها مع الناس وحشه .. !! و فيه برضه ناس وحشه مش منقبه و نفس الحكاية بالنسبة للرجل هناك ملتحين لا يستطيع احد ان يتعامل معهم و منهم من تشعر انه ملاك
الخلاصه ان الدين عباده و معامله و ماينفعش افصلهم ..
المهم فين بقية الحكايه و وصلتى لفين
ربنا يحفظك ويثبتك على ما يحبه و يرضيه

تحياتى

hasona said...
This comment has been removed by the author.