الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Jun 5, 2009

مرحلة البحث .. و المعرفة

بداية عاوزة أنوه على موضوع سرقة المدونات دى
ياريت كلنا ندخل عند حامى حمى الاوطان ( أسماء و أحلام فى وجدانى )
و بوسته .. ( ولا بيهمنا )
بجد ربنا يكرمه يارب أنا نوهت و قلت المصدر و اللينك اهو
مالكش حاجة عندى *_^

.................................................


ندخل بئا فى المهم

طبعا يا جماعة زى ما قلت لكم قبل كدا فى البوست قبل اللى فات إنى فضلت فى حيرة و تساؤلات ..

مش رفض لجانب من الجوانب اللى ذكرتها ،و اعتباره صح و الباقيين غلط ..

لكن كنت باحاول اوصل ازاى الاسلام جمع بين كل الجوانب دى فى وئام ..


طب لما هو جمع بين كل مناحى الحياة ، ليه مش بناخد منه غير الشق التعبدى بس ، لا و كمان بنحكم بالمظاهر ؟؟؟


المهم إن التساؤلات دى خلتنى بئيت أنظر فى القرآن نظرة مختلفة .. بئيت مش باقرأ الآيات كدا و خلاص ..

و أسأل ربنا إنه يهدينى للحق ...


حقيقى اكتشفت إنى مش فاهمة و لا حاجة فى القرآن ، و إنى كنت باقرؤه كدا بركة .. ياااااه بجد ، حقيقى كتابإيمان و عمل .

بس اللى فعلا وقفت عنده و فضل شاغل بالى ، وبأحاول ادور فيه ، قوله تعالى لملائكته فى سورة البقرة " إنى جاعل فى الأرض خليفة " و قوله فى سورة الذاريات " و ما خلقت الجن و الانس إلا ليعبدون "

يا ترى ايه معنى العبادة ؟؟ و ايه معنى الخلافة ؟؟ و ازاى نوفق بينهم ؟؟

و لما ربنا خلقنا خليفة فى الارض ، أكيد قالنا إزاى نبئا كدا ، و أعطانا مقومات الخلافة دى ..


.. بجد يا جماعة –أنا طبعا مش خبيرة و لا عالمة- بس بعد ما بدأت رحلة البحث بأقولكم عن يقين جازم ان فعلا القرآن فيه الحل لكل مشاكلنا

و فيه اللى يناسب كل عصر ، بس المهم نفهمه .. والله بجد نفهمه ، و نسقطه على واقعنا ،و كذلك السنة النبوية .. بئيت فعلا موقنة بقول رسول الله صل الله عليه و سلم " تركت فيكم ما إن تمسكت به لن تضلوا بعدى ابدا ..كتاب الله و سنتى " و خلوا بالكوا من ( به ) دى يعنى هما الاتنين حاجة واحدة .. يعنى ما ينفعش نقول قرآن بس أو سنة بس .. الله المستعان .

بعد كدا صديقة ليا أهدتنى كتاب" جدد حياتك " للمفكر الرائع ..الشيخ / محمد الغزالى ، و اللى فعلا كان بداية لتجديد حياتى لا أنكر ..

لقيت فيه إجابات لبعض التساؤلات اللى كانت فى دماغى ، و بداية لطريق انى أعرف بجد يعنى ايه اسلام ؟؟!!


قرأت له عدة مؤلفات بجد غيرت فهمى خالص ، و لا أنكر فضله عليا ، ربنا يعلمنا جميعا ياااااااارب ،

قرأت لناس تانية غيره بردوا، و لما بدأت أعرف يعنى ايه اسلام و اتوغل .. أيقنت ان رحلة البحث لا تنتهى ، و إن فعلا كل ما الواحد بيعرف ، بيكتشف إنه لسه ماعرفش حاجة خالص ..


لما الصورة بدأت توضح ادامى بشموليتها ، بئيت باسمع كلام الشيوخ اللى كنت باسمعهم قبل كدا بمفهوم تانى خالص ، بجد أكتشفت ان الغلط مننا احنا بنسبة كبيرة ، لأنى اكتشفت انى كنت بافهم على مزاجى و بأطبق حسب ما بافهم ، واللى شايفة انه صح .. و لما حد يسأل نقول الشيخ الفلانى هو اللى قال ..


صحيح يمكن –من وجهة نظرى يعنى – غلط اننا ندخل فى الحلال و الحرام على طول .. أعتقد لازم تكون فى مرحلة قبلها ، تمهيد لتلقى التكاليف الشرعية .. زى ما الرسول قعد 13 سنة من 23 سنة بيمهد للناس و يأصل لهم يعنى ايه اسلام و يعنى ايه الله .. بعد كدا لما قالهم هذا حلال .. ائتمروا ، و لما قالهم هذا حرام .. انتهوا ، فاعتقد دى نقطة هتسهل كتير فى فهم كلام الشيوخ بطريقة احسن و أوضح ..


فى بئا نقطة مهمة جدا جدا جدا يا جماعة بجد ، عشان أنا وقعت فيها فترة ، و مش عاوزة حد يقع فيها ..

لأنى استغرقت فى الفكر الاسلامى ، و بئيت زى المدمنة لأى كتاب أو مفكر بيتكلم فيه ، و مش قادرة أمنع نفسى..و بعدت عن كتب الوعظ و الجانب التعبدى ، بل أحيانا كانت تيحى عليا فترة أحس بالنقمة على بعض الشيوخ إنهم مش بيتكلموا إلا فى العبادة بس ..


لكن الحمد لله انه لم يوكلنى لنفسى ،بس حسيت قلبى مش زى الاول ، حسيته قسى ، و فعلا مشتاقة لأيام الالتزام الاولى ، كان الواحد حاسس ان قلبه طاير ، و قريب من ربنا قوى ..


فعلا ما ينفعش أهتم بغذاء جزء على حساب جزء .. يعنى ماينفعش اهتم بغذاء العقل على حساب القلب ،و لا الجسد على حساب الروح أو العكس .. و فعلا الاسلام اهتم بكل جانب من دا و اعطى له الغذاء فى وجبة متوازنة .. فلازم نهتم بكل الجوانب بجد ، لأن التقصير فى جانب بيحصل فيه ضمور..


و بجد ماينفعش إننا نفضل بس مستنيين إن حد ييجى يعلمنا ،و يقولنا دا الصح و دا الغلط ..لأن ببساطة بتلاقيك تحولت لتابع ليه و أصبح كلامه له هيئة القدسية عندك .. لا ، المفروض إننا ندور ، صحيح مش كل الناس عندها وقت .. بس صدقونى ولو ساعة أسبوعيا ..

حقيقى هتفرق معاكو اوى ..


و كمان نصيحة تانية << طبعا الشيخة سول قعدت و اتسلطنت بئا .. مش عاوزة اسمع نفس لحد ماخلص خالص.. مفهووووم

طااااااايب نكمل ..

بجد بجد لازم كلنا ندرس عقيدة صح .. لأن فى بعض العلماء – طبعا انا مش حد اصلا عشان اتكلم فيهم – بس فعلا بتلاقى كلمة اتكتبت سهوا منهم .. لا يجوز انها تتقال ، أو أحيانا يخرج عليك حد يقولك عارف الشيخ الفلانى أو الداعية العلانى؟؟ مش لقيته امبارح بيقول كذا ؟؟ و تلاقيك شكيت فيه ..خاصة انها بئت موضة الايام دى ، أى حد عاوزين يشيلوه من الساحة يقولك دا شيعى ، لا صوفى ، لا مش عارفة ايه !!.. وهو سبحان الله برئ من هذا الاتهام ..

و أحيانا أخرى قد يكون كتاب رائع فيه علم غزير ، لكن كاتبه على غير الملة ، فيدخل فى قلبك شئ من كلامه ..


لكن ملحوظة كبيييييرة و كبيرة اوىىىىىىىىىىىىى كمان ... تحطوها حلقة فى ودانكوا ..

لالالالا كدا مش هتشوفوها علقوها سلسلة بخط كبير عشان تشوفوها ..

" نحن لا نتعلم لنتصيد أخطاء الاخرين .. بل نتعلم لكى لا نقع فيها "


مهمة جداااااااااااااااااا ..و اوعى مهما كان تخوض فى عرض عالم مهما كان .. لأن أكيد كل انسان فينا خطاء و محدش كامل ..

و كلٌ مجتهد فمن أجتهد و اصاب فله اجران ، و من اجتهد و أخطأ فله أجر .. المهم تكون النية فعلا خالصة لوجه الله.


كمان نصيحة << معلش طولت عليكم ، و شايفة ناس بدات تحضر حاجات مش ظريفة ..

ياريت فعلا كل واحد يحاول يشوف عالم يكون مرجع ليه ، شيخ للرجال أو شيخة للبنات ، بس انا بافضل اسميه معلم أو معلمة ..


بجد ماينفعش تمشى لوحدك ، لأنك كل ماهتمشى هتلاقى تساؤلات كتير فى دماغك ، و أحيانا حاجات داخلة مع حاجات ، فالمعلم فايدته هيشرح لك الامر و يفك الطلاسم اللى فى دماغك دى .. و كمان هيسقطهالك على الواقع فتفهم صح


ممممممممم .. ايه تانى ؟؟.. ايه تانى ؟؟...

كفاية عليكو كدا احسن فى حاجات بدات تتحدف ..والله ماشية أهو ..

بس عاوزة أعرف انطباعكوا عن الكام بوست اللى فاتوا دول ؟؟

هل كانوا مفيدين ؟؟و لا ماكنش لهم لازمة ؟؟


و ان شاء الله أبدا معاكو محور جديد من أول البوست اللى جاى بإذن الله

سلاااااااااااااااااااااام

57 comments:

adel said...

اول تعليق
هاقرا و اجي
:):)

adel said...

مبدئيا انا مش داخل اهرج
و مش معني اني مسيحي يبقي مقرتيش الكلام
او اني هنا داخل اتريق

-----------
عاجبني قوي اصرارك علي المعرفة و من نواحي كتير
في ناس بتستسهل و بتقول الشيخ الفلاني قل و عاد من غير مايرجعوا للقران او غيره للتاكد من صحة لمعلومة

و عاجبني قوي حتة الخلط بين الحلال و الحرام بس معزم الناس ده اللي بيفكروا فيه لما يسمعوا كلمة دين عموما
الحلال و الحرام لكن مش بيبص للدين بشكل اعم و اشمل
والفرق بين الايمان و التعبد بغرض المصلحة

----------
انا مش هتكلم في الباقي رغم معرفتي القليلة بحاجات من اللي قلتيها
بس بجد مواضيع كويسة و مفيدة و يمكن علي الاقل حد يستفاد منها
----------
مرة اخيرة عشان التاكيد
انا مش داخل اهرج عشان بس الناس متفهمنيش غلط

------------
وهعموما كلامك ده مش ينطبق علي دين معين دي ابسط قواعد الايمان السليم مهما اختلفت سبل التطبيق

تامر علي said...

فكرة الإيمان ومراحله المختلفة في نفس المسلم وتجديدة كل فترة بالعلم والرقائق فكرة واجبة التنفيذ طبعاً بلا شك ...لكن المشكلة الأساسية في إن البعض يرى نفسه غير محتاج وأن ما عنده يكفي وللأسف ده قطاع عريض ... والقسم الباقي يقع تحت كلمات التسويف والاعتراف بالتقصير بدون محاولة تغييره ودائماً ما يردد "ربنا يهدينا" بدون احساس بالمعنى الحقيقي للهدى

الموضوع جميل ويستحق القراءة أكثر من مرة .... تحياتي :)

صوت من مصر said...

جميل البحث عن النفس والمعرفه ايضا بالنفس لكن ربنا يهدينا

وحي القلم said...

السلام عليكم

جهد مشكور وشكرا ع التتمة

وفعلا الاصرار على المعرفة شيء مهم

تقبلي مروري

د/على خميس said...

فيه تقدم كبير اهو
السادس من غير وسايط
هاااااااانت

د/على خميس said...

السلام عليكم و رحمة الله و بركاته
ده انا كمان الخامس باعتبار ان ا / عادل معلق دوبل

و إنى كنت باقرؤه كدا بركة .. ياااااه بجد ، حقيقى كتابإيمان و عمل .

اقرئى كتاب دراسات قرآنية للشيخ محمد قطب ..هو اللى على بالى لأنه آخر كتاب قريته ...حلو فى فهم القرآن بصورة جميلة و لم كنت درستى و اتعلمتى عقيدة كويس فعليكى و على ( فى ظلال القرآن )
للأستاذ سيد قطب .....

بعد كدا صديقة ليا أهدتنى كتاب" جدد حياتك " للمفكر الرائع ..الشيخ / محمد الغزالى ، و اللى فعلا كان بداية لتجديد حياتى لا أنكر

سبحان الله ...هو فعلا أول كتاب غير تفكيرى ..رحم الله الشيخ

للمفكر الرائع ..الشيخ / محمد الغزالى
ملعوبة المفكر الرائع دى ;)


فعلا ما ينفعش أهتم بغذاء جزء على حساب جزء
فتح الله عليك ..معنى جميل و رأى صائب


أى حد عاوزين يشيلوه من الساحة يقولك دا شيعى ، لا صوفى ، لا مش عارفة ايه !!.. وهو سبحان الله برئ من هذا الاتهام ..
فعلا فيه ناس كل همها التصنيف و بتعتمد فى تصنيفها على نقط صغيرة قوى و بتظلم الكتير من الدعاة
بس برده فيه ناس تستحق تتصنف علشان فعلا كلامها خطر
و خاصة انى سمعت لناس و لقيتها بتكدب علشان تروج لمذهبها الشيعى أو غلاة الصوفية
و لو عايزة أمثلة أقول ....بس الطيب أحسن
يعنى الكلام مش مطلق كده

و أحيانا أخرى قد يكون كتاب رائع فيه علم غزير ، لكن كاتبه على غير الملة ، فيدخل فى قلبك شئ من كلامه ..

طبعا الكاتب اللى تم تصنيفه انه مش على منهج الكتاب و السنة خاصة فى العقيدة ...مينفعش أى حد يقرأ له لازم يكون فاهم علشان فيه منهم بيدلسوا و يكدبوا و يأصلوا بطرق مشبوهة و لو برده عايزة أمثلة ...بس برده الطيب أحسن

نحن لا نتعلم لنتصيد أخطاء الاخرين .. بل نتعلم لكى لا نقع فيها "
جميلةو أوى طبعا الأصل أن نتعلم حتى لا نقع فى الخطأ بس أحيانا بيكون علينا واجب النصح فنضطر اننا نقول عن أخطاء الأخرين

ياريت فعلا كل واحد يحاول يشوف عالم يكون مرجع ليه ، شيخ للرجال أو شيخة للبنات ، بس انا بافضل اسميه معلم أو معلمة ..

كلام جميل جدا جدا
و أهم شئ هو اختيار هذا المعلم ...أسأل الله أن يوفقنى و إياك و سائر المسلمين إلى معلمين صالحين

بس عاوزة أعرف انطباعكوا عن الكام بوست اللى فاتوا دول ؟؟

هل كانوا مفيدين ؟؟و لا ماكنش لهم لازمة ؟؟


و الله كانوا فى منتهى الروعة و الأهمية استفدت منهم كثير فعلا
أسأل الله أن يجعلهم فى موازين أعمالك

بارك الله فيك و نفع بك و زادك علما و خشية و تقى

تقبلى حقيقى تحياتى و تقديرى و احترامى

احساس طفلة محبة للرومانسية بس واقعية said...

امممممممم
احيانا بنحس اننا كدا تمام وعاملين اللى علينا واحيانا بنبقى عايزين نفكر وندور انا شخصيا بيجيلى وقت بيكون عندى حماس للقراءة والتدوير واحيانا لا وعارفة الفرق بين الاحساس بالراحة والامان والقلب النظيف اللى كأنه اتمحى منه اى احساس بالضيق والحزن
اللى بيتركموا فى قلوبنا فى ايام التقصير
الموازنة صعبة جدا يا سووول
بس هى دى مجاهدة النفس وطلب العلم
هو دى العمل والايمان الالتزام و العيش والاستمتاع بالحياة

عجبتنى البوستات واسلوبك فيها لانها بسيط ومش معقد وبيعدى على تفكير كل الناس

ربنا يبارك فيك
تقبلى مرورى

♥نبع الغرام♥♪≈ said...

السلام عليكم


الله عليكى ياسول

كلامك جميل قووى


ربنا يهدينا دايمآ للطريق السليم والصح

ويارب اغفر لنا ذنوبنا واخطائنا
اللهم امين يارب العالمين

ممممممممممممممممم
التاج مش هسيبك برده

ولاذم تجوبى عليه
هههههههههه
تحياتى ليكى ياحبيبتى

انوسه

mahasen saber said...

حرام حرام حرام التعليقات طلعت عينى عشان تفتح

حرام تعبت نفسيا قدامها

mahasen saber said...

بعد ما اعصابى هديت من تعب فتحان صفحة التعليقات

ندحل فى الكلام بئه

اولا وحشانى جدا جدا

ثانيا طول ما فيه نفس لوامه وتواقه لرضا ربنا هتلاقى بحثنا عن مفهوم دينا الصحيح مستمر
وهتلاقينا دايما فى اصرار عالى على تطبيق اليى بنخرج منه من المعرفه دى

برافو عليكى وربنا يجازيكى خير عن البوستات الروحيه الراقيه دى والمفيده

رحلتنا في الحياة said...

السلام عليكم ياقمر والله العظيم الكام بوست دول متعرفيش خلونى افكر ازاى
وكنت وصلت لمرحلة هتجنن فيها من كمية التساؤالات اللى فى دماغى ومازالت لسه فى المرحلة دى بس انا عندى اقتناع انى لازم اتعلم وافهم واقتنع مش اجبر على حاجة وتفضلى فى المرحلة دى تقسى على نفسك كتير وتحسى انك متخبطة فى كل شئ جواكى الصح فين
بس الحمد لله مش انا لواحدى اللى بتحس بكده اكيد كل الناس اللى عايزة تعرف الحق واجمل حاجة انك تعرف دينك
بالاقتناع
والمفروض فعلا االانسان يحاول يقرا ويتعلم ويكون ليه شخص يثق فيه يتعلم منه ويعرف اهم شئ الاساسيات اللى تعينه على فهم الدين
جزاكى الله خيرا يااااااااااارب

ستيتة said...

السلام عليكم يا سول
مش ها اقدر اقول ايه عجبني النهاردة لأن اللي عجبني كتير

عجبني ترتيبك للأفكار مع انك ما شاء الله حاطة حاجات كتير قوي قوي
عجبني كمان انك افتكرتي المراحل اللي مريتي بيها وخطوات منها كانت صح وخطوات تلخبط لكن حلو قوي لما قلتي ان ربنا بفضله لا يكلنا الى انفسنا والا كنا رحنا في خبر سين وجيم وعين

اهم كلمة في الموضوع قصة العقيدة
بمعنى انا عندي اعتقاد جازم إن الواحد مبدئيا يعرف العقيدة صح وتقر داخل نفسه ساعتها سهل قوي قوي يكمل الباقي حتى لو لم يلتزم بالكلية
ماهو يا عزيزتي لو كنا ملتزمين عقيدة وعبادات كانت الملائكة صافحت حد منا في الطرقات
بس العقيدة دي في زمن الخلطبيطا اللي احنا فيه هي الأهم على الإطلاق لأن كل ما تمشي في سكة ها تجدي اختبار ليها

مش عارفة اناقش البوست لأنه غنى جدا جدا وربنا يزيدك علم ويعلمنا ما جهلنا

تحياتي ودعواتي

محمد said...

السلام عليكم ورحمة الله وبركاته

الأخت العزيزة

همس الروح


بسم الله ماشاء الله تسلسل جميل وبديع وايراد موفق للأحداث


أجل بالفعل نستفيد ........ ونحن ننتظر موضوعاتك لنربط ما بين الماضي والحاضر لنصنع المستقبل الأفضل بإذن الله

دمت في رقي وتقدم

خالص مودتي وصادق دعائي

من غير عنـــوان said...

ماشاء الله
ربنا يهديك و يهدينا

تحياتي

Kiara said...

عجبني اصرارك اوي يااجمل سول

انا مستنيه التكمله بقي

salma mohamed said...

بجد ماشاء الله كلامك عاجبني جدا ودخل قلبي اوي من اول زيارة ليا
عارفه ليه لانه كلام صحيح ميه في المية وكمان
علشان عن تجربة وكلام خارج من القلب
ربنا يحفظك وينفع بيكِ
وان شاء الله لي عودة لقراءة اللي فات

د. ياسر عمر عبد الفتاح said...

أنا جااااااااااااي تاني إن شاء الله
محدش يمشي

Anonymous said...

الله ياسول
وانا اقول انا حبيتك ومعجبة بيكى ليه
اتارى من تميزك وطبيعتك
انا لما بدخل مدونتك بحس براحة نفسية غريبة
اهم مافى الموضوع ياابنتى هو معرفة الله
اقصد كما قلتى دراسة التوحيد او العقيدة وكلما تعلمناها واستوعبها العقل كانت نور فى القلب وجاء بعدها باقى البنيان
سلم يدك قرات كل تالبوستات
ربنا يبارك لك واحسبك على خير
وانى احبك فى الله يااجمل صيدلانية

Unknown said...

دكتورة سووول
----------
كتاب جدد حياتك للتحميل
http://www.alghazaly.org/index.php?id=116
---
اما كلامك فمش عارف اقول عليه ايه
يمكن لأن المواضيع مش بتثبت فى دماغى
مش عارف انا اسف

انا نفسى تحددى بالضبط نقاط محددة تتكلمى فيها
يبقى كلامك بعناوين و اكثر تنظيماً يمكن الفكرة توصل اسرع و افضل

romansy said...

اوقات بنحس اننا تايهين ومش عارفين احنا عاوزين ايه
اوقات اسلامنا بنكون مش مقضين الحقوق اللى علينا
ودا بسبب اننا اهملنا سنه النبى عليه الصلاه والسلام
والقران الكريم
المهم بعد كل دا اننا نحاول نقاوم نفسنا الاماره بالسؤ

د. ياسر عمر عبد الفتاح said...

طيب أعلق علي إيه ولا إيه

طيب أفكار كده سريعة

____
ألإسلام مش مجرد صلاة وصوم وعبادة .. وبس
لا الإسلام منهج حياة متكامل فيه كل حاجة
حتي _أعزكم الله _ قضاء الحاجة
----------
الدكتور الغزالي لم أقرأ له للأسف .. غير شوية حاجات معجبتنيش
بس شكلي هجيب كتاب جدد حياتك ليه
أنا سمعت إنه عمله بعد ما قرأ لديل كارنيجي
---------
موضوع الحلال والحرام فيه تفصيل أكبر من اللي حضرتك ذكرتيه
وطبعاً لأني مصدع وتعبان وقرفان وعندي اندستري .. فمش هبين حاجة
--------
برضه بقيت بستغرق في الكتب الفكرية أوي .. لحد ما بقيت بحس إن قلبي قسي
وبحاول كل فترة ألينه بأي قراءات تانية
--------
المعلم أو الشيخ أو الأخ الكبير ضروري للغاية
لكن للأسف مش دايماً متوافر
-------
ربنا يثبتنا جميعاً علي الصراط المستقيم
والسلسلة دي رائعة جداً
ومتابع إن شاء الله
________
والله العظيم أنا محدفتش حاجة
بس لو كان طول أكثر من كده بصراحة يعني
برضه مكنتش هحدف حاجة
الصيادلة لبعضيهم

عطش الصبار said...

العزيزه سول
رحلتك دى فكرتنى برحله مشابه قمت بيها فى نفس الفتره العمريه بس ييجى كدا من 25سنه طبعا مش عيزه ااقولك ان الفرق فى السن بينى وبينك مش كبير ييجى تلاتين سنه بس
المهم ان فعلا كان تاثير الشيخ الغزالى الله يرحمه بفكره المتطوروتفسيره الجميل والمقنع اثر جميل لانى بصراحه كنت فى الفتره دى كل ما اسمع تفاسير ايات العذاب كنت باحس ان مافيش فايده وان احنا هنتعذب لاتفه الاسباب
وكان داخلى فى الفتره دى رغبه فى الهروب من سماع خطب التهديد والوعيد والثعبان الاقرع وغيره مع انى كان جوايا احساس بالامان لان امى وابى اللى اللى اخدو جزء ضئيل من رحمه ربنا جواهم كل هذا الحنان والرحمه البشريه فما بالنا برحمه الرحمن ذهب الخوف من قلبى وساعد فى ذاللك الشيخ محمد الغزالى بكتبه وتفاسيره
عامامبروك عليك بدايه رحله الايمان
وفى انتظار المزيد ايتها الروح الرقيقه
تقبلى تحياتى

اسماء واحلام فى وجدانى said...

اينعم موضوع كبير جدا اقصد طبعا فى قرائته لكن ده ان دل فانه يدل على اصرارك على صدقك مع نفسك وانك فعلا عايزة توصلى شىء غايب عنا كتير
بس والله مجهدك ده ان شاء الله ربنا يجعله فى ميزان حسناتك
ان شاء الله
انا مش هاضحك عليكى انا جيت هنا كذا مرة وقراءت الموضوع على فترات علشان اقدر استوعبه لانى للاسف مش عارف ليه بافصل معاكى على طول
اكيد الفصل ده من شوشو
ربنا يبعدنا عنه
ويجزايكى خير
يارب

أم أحمد المصرية said...

حبيبتي الشيخة سول
دا انت شيخة زي العسل و الله
كلامك جميل جدا و الله و مفيد جدا للي لا يعرفه و لمن يعرفه ايضا فالذكري تنفع المؤمنين و احلي ما فيه انه خارج من القلب و يصل للقلب مش حد بيتكلم من فوق و حاسس ان الناس تحت
اكرمك الله و وفقك و جمعنا في جنته ان شاء الله
قبل ما امشي عجبتني جدا جدا الجملة دي
نحن لا نتعلم لنتصيد أخطاء الاخرين .. بل نتعلم لكى لا نقع فيها "
دمت بالف خير

maha zein said...

يااااااااااااه ده انا جيت متأخر بقه

يا سوول والله كلامك حلو جدا
بسيط جدا
مسني جدا
يعني صيغتي كلامك بسهولة و يسر وبساطة

لا بجد
انتي فدتيني انا شخصياً جدا
خاصة في الفترة دي من حياتي
بتمني تكتبي اكتر في المواضيع دي
واللى مريتي بيه
و اللى حسيتي بيه

انا بستفيد وبجد مش بقول كده كتعليق وخلاص
يا سول فعلا والله الواحد حاسس انه مكنش هو الشخص اللى فات
انا ببكي وانا بقولك كده الان
بجد انا مكنتش انا الان
مكنتش مها اللى بتتكلم دلوقت
انا بقيت حد سعيد اوي راضي وحاسة ان جوايا راحة
اه لسة موصلتش للدرجة اني اقول اني بقيت ملتزمة صح
لكني علي الاقل حسة اني ماشية في الطريق
واتمني افضل ماشية في الطريق وميجيش عليا اللحظة اللى اشعر فيها اني وقفت واني وصلت للنهاية
لان طريق الدين عمره ما بيخلص لحد ما ربنا يقبض ارواحنا

جزاكي الله خير عني وعن اي حد
بحبك في الله
اه والله بقيتي قريبة لقلبي اوي

Unknown said...

سلام الله عليكم ورحمته وبركاته
ماشاء الله بارك الله فيكم اختنا الفاضلة
بوست رائع فعلا نتعلم منه الكثير الكثير
واكثر ما اعجبني هو كثرة وقفاتكم مع انفسكم , فعلا نفتقدها هذه الايام
ان يعيد الانسان دوما نظرته الي نفسه ونظرته في حياته وطريقة تفكيره
ان لم يغيرها ويحسنها بعون الله ,, حتما سيجددها ويطورها ان شاء الله
كما قلتم ذكرتم ان الاسلام دين جامع وكامل وشامل
جمع العبادات و المعاملات و الاخلاق و التشريعات
ولن يقدر علي هذا الامر الا من احاده من جميع جوانبه
فلا يمكن ان نأخذ شيء ونترك الاخر ونأخذ جانب ونحيد جانب لا يمكن ان يستقيم الامر بهذه الطريقة
و الامر يحتاج دائما الي علم وعمل وجهد وجهاد لنصل الي ما يريده الله منا وما ينبغي علينا فعله
ولنتذكر دائما حديث رسول الله صلي الله عليه وسلم
من طلب العلم ليماري به السفهاء.أو ليباهي به العلماء.أو ليصرف وجوه الناس إليه ليعظموه فليتبوأ مقعده من النار
نسأل الله السلامة نسأل الله العفو والعافيه
--
بارك الله فيكم وجزاكم الله كل خير

Soul.o0o.Whisper said...

adel

مبروووووووووووك عليك أول تعلييييييييق

عقبالى عندك بئا

Soul.o0o.Whisper said...

adel

"و مش معني اني مسيحي يبقي مقرتيش الكلام"

حقيقى يا عادل رغم أنها المرة الاولى اللى اعرف فيها هذه المعلومة

لكن حقيقى فرحتنى

بس فى نفس الوقت زعلتنى

................

فرحتنى عشان مخلتش فرق الدين يخليك تحجم عن قراءة الموضوع

لا و كمان قلت رأيك


و زعلتنى عشان افتكرت انك لما هتقول انك مسيحى
انى مثلا افتكرك داخل بس تهرج او تتريق


بالعكس أنا احترمتك اكتر
:)

.................

"عموما كلامك ده مش ينطبق علي دين معين دي ابسط قواعد الايمان السليم مهما اختلفت سبل التطبيق"

فعلا يا عادل لما الواحد بيدور و يبحث
و يكون همه بس انه يوصل فعلا للحق
و الحقيقة
ربنا بيرزقه الايمان السليم

ربنا يرزقنا جميعا الايمان السليم



بجد نورتنى
و ياريت نشوفك على طول

:)


دمت بود كامل الدسم

Soul.o0o.Whisper said...

تامر علي

فعلا التجديد واجب
لان الواحد كل فترة بيحس انه قسى او بئا بالنسبة له عادى

لكن لازم يتعهد نفسه كل فترة و التانية


."لكن المشكلة الأساسية في إن البعض يرى نفسه غير محتاج وأن ما عنده يكفي وللأسف ده قطاع عريض ..."

دايما معلمتى تقول " لا تكن أبا شبر "
فى العلم يعنى
اصلهم بيقولوا العلم 3 أشبار
اللى يقف عند الشبر الاول
يحس انه عرف كللللللللل حاجة وهو أجهل الناس لانه لم يأخذ إلا أقل العلم

و الشبر الثانى يتعلم العلم أكثر
فيظن بنفسه الجهل
فيجتهد فى طلب العلم

أما من وصل للشبر الثالث
فيتأكد أنه أجهل الناس

ربنا يعلمنا جميعا يارب


" والقسم الباقي يقع تحت كلمات التسويف والاعتراف بالتقصير بدون محاولة تغييره ودائماً ما يردد "ربنا يهدينا" بدون احساس بالمعنى الحقيقي للهدى"

فعلا .. و على فكرة كلمات حضرتك دى وقفتنى والله
فعلا اللى عاوز شئ ماينفعش يستنى
خاصة فى أمورالدين



ربنا يبارك لحضرتك يارب

و بجد سعيدة جدا بالتعليق



دمت بود

Soul.o0o.Whisper said...

صوت من مصر

"جميل البحث عن النفس والمعرفه ايضا بالنفس لكن ربنا يهدينا"

فعلا يا كيمو
البحث بيخليك تقتنع و تعمل كل شئ عن حب

واللى عاوز شئ لازم يبدء فيه
لأن الهدايةمش بتيجى بمعجزة

مش كدا ولا ايه؟؟
:)



دمت بود

Soul.o0o.Whisper said...

مصعب صلاح


و عليكم السلام و رحمة الله و بركاته

شكرا جدا لكلماتك الجميلة يا مصعب
وربنا يعلمنا جميعا يارب


دمت بود

Soul.o0o.Whisper said...

dr aly khamis


"فيه تقدم كبير اهو
السادس من غير وسايط "


دا الخامس يا دكتور
مبرووووووك عليييييييك

:)

Soul.o0o.Whisper said...

dr aly khamis


"السلام عليكم و رحمة الله و بركاته"

و عليكم السلام و رحمة الله و بركاته

"ده انا كمان الخامس باعتبار ان ا / عادل معلق دوبل"

اه ..مش قلت لك

"اقرئى كتاب دراسات قرآنية للشيخ محمد قطب .."

ان شاء الله حاضر

"عليكى و على ( فى ظلال القرآن )
للأستاذ سيد قطب ....."

دا بئا من أجمل ما قرأت حقيقة
و مازلت
لكن المقدمة بتاعته مش بقدرعليها صراحة

لازم كل شوية ارجع لها
اكثر من رااااااااااااائعة

"للمفكر الرائع ..الشيخ / محمد الغزالى
ملعوبة المفكر الرائع دى ;)
"
:)


"بس برده فيه ناس تستحق تتصنف علشان فعلا كلامها خطر
و خاصة انى سمعت لناس و لقيتها بتكدب علشان تروج لمذهبها الشيعى أو غلاة الصوفية
و لو عايزة أمثلة أقول ....بس الطيب أحسن"

اه فعلا .. فى كدا و فى كدا
عندك حق "القاعدة مش مطلقة"


"الأصل أن نتعلم حتى لا نقع فى الخطأ بس أحيانا بيكون علينا واجب النصح فنضطر اننا نقول عن أخطاء الأخرين "

أيوا يا دكتور
بس دا لما فعلا نكون متمكنين من العلم
وبعدين عن نفسى باحجم عن الكلام إلى ان يقول العلماء كلمتهم فى شخص ما

انما انا اقول من نفسى
لا طبعا ماينفعش

"أسأل الله أن يوفقنى و إياك و سائر المسلمين إلى معلمين صالحين"
اللهم آمين ياااااااارب

"الله كانوا فى منتهى الروعة و الأهمية استفدت منهم كثير فعلا
أسأل الله أن يجعلهم فى موازين أعمالك"

الحمد لله رب العالمين
هذا من فضل ربى


ربنا يكرمك يارب يا دكتور و يبارك لك

دمت بود

Soul.o0o.Whisper said...

احساس طفلة محبة للرومانسية بس واقعية

"عارفة الفرق بين الاحساس بالراحة والامان والقلب النظيف اللى كأنه اتمحى منه اى احساس بالضيق والحزن
اللى بيتركموا فى قلوبنا فى ايام التقصير "

ربنا يرزقنا جميعا هذاالقلب النظيف
و يتجاوز عن تقصيرنا فى حقه

اللهم آمين


فعلا المجاهدة صعبة
و بتحتاج مننا العمر كله
لكن اللى يمشى زى ما ربنا بيقوله
أكيد بيحس بربنا معاه


"عجبتنى البوستات واسلوبك فيها لانها بسيط ومش معقد وبيعدى على تفكير كل الناس
"
الحمد لله رب العالمين
هذا من فضل ربى

ربنا يكرمك يارب ياقمر


دمتى بكل الود

Soul.o0o.Whisper said...

عاشقة الأحزان

و عليكم السلام و رحمة الله و بركاته

هلا أنوسة

"ربنا يهدينا دايمآ للطريق السليم والصح

ويارب اغفر لنا ذنوبنا واخطائنا
اللهم امين يارب العالمين
"

اللهم آمين يارب

.............


"التاج مش هسيبك برده

ولاذم تجوبى عليه"

عااااااااااااا
حاضر حاضر

بس واحدة واحدة
هأجاوب ايه و لا ايه

يارب رحمتك يارب
هههههههههههه


دمتى لى بالخير يا جميلة

Soul.o0o.Whisper said...

mahasen saber

محاسن
سنسنتىىىىى


بردوااااااا؟؟؟
لالالا معلش بئا
يبئا العيب من عندك

محدش اشتكى غيرك
:(

Soul.o0o.Whisper said...

mahasen saber

"بعد ما اعصابى هديت من تعب فتحان صفحة التعليقات
ندحل فى الكلام بئه
"

ماشى يا ستى
حمدلله على سلامة أعصابك
:)


بجد يا سنسن
انتى اللى وحشانى بجد
انتى و بيرو
يارب تكونوا بخير

"طول ما فيه نفس لوامه وتواقه لرضا ربنا هتلاقى بحثنا عن مفهوم دينا الصحيح مستمر
وهتلاقينا دايما فى اصرار عالى على تطبيق اليى بنخرج منه من المعرفه دى"

فعلا يا محاسن صح
لماالواحد بيدور و بيكون همه فعلا يوصل للحق
بيوصل له بإذن الله
و عن اقتناع و اصرار على التنفيذ


ربنا يكرمك يارب يا قمرى
و ما يحرمنيش منك أبدااااا


دمتى بكل الود

فارس عبدالفتاح said...

حمدله على السلامة كيف الحال نرجو من الله الصحة والسلامة لكم

اولاً : انا العبد الفقير لله سبحانه وتعالى احب اعرف اي شيء تقع عليه يدي او اذني او عيني من شتى المعارف

والدافع لهذا هو حب الاستطلاع عايز اعرف هو أيه ده واتشد وجدانيا لما اسمع عن فكر لم اقرأ عنه سواء كان ديني سياسيا اجتماعي فلسفي حتى اقتصادي .. الخ

المهم اعرف هو ده ايه بالظبط وبيقول ايه وهو قال كده ليه وازاي اتوصل الى هذه الفكرة

يعني قانون السببية

وتطور الامور الى ان اجد واحد يتكلم في نفس الموضوع اللى حاولت بشتى الطرق ان احتوي فكره واراءه حتى اغلق الباب عليه واعتبره امر منتهي باني عرفت كنهو


وألقيه بيخبط او مشعارف هو بيتكلم عن ايه بالظبط هنا بئا تصبح المعرفة ليست من اجل المعرفة تصبح المعرفة من اجل اصتياد أخطاء الاخرين

واثبت لانفسي اني اعرف وان ما قد عرفته له فائدة باني اذا تكلمت او سمعت يكون على بصيرة

وهنا قصة طريف جداً حاولت ان اعرف ما هو الفكر الشيوعي واخذت ابحث اكثر من ثلاثة سنوات حتى عرفت اصله وفصله وبدايته ونهايته ثلاثة سنوات تخيلي ثلاثة سنوات

لاني شدني قيام الاتحاد السوفيتي وانهياره واستخدام كلمة الشيوعية او شيوعي على كل واحد يتهمه اي انسان بانه ثوري في افكارة

حتى اصبحت كلمة يلوكها كل من هب ودب دون ان يعرف معنها واصلها وفكرها وفلسفتها ومن نظر لهذه الفلسفة وكيف نشأت وعلى اي اساس استندت .. الخ

المهم

المعرفة اولاً واخيراً سواء عملت بها او لم تعمل بها لان العلم بالشيء افضل من الجهل به

بعد هذا يأتي العمل ولكن بعد ان يقيم الفكر على اسس سليمة ونزيهة

Ramy Wasel said...

موضوع ممتاز
وشرح جميل جدا

انت لازم تكونى مدرسه

او تشتغلى فى التنميه البشريه
بتقدرى ترتبى افكارك كويس
وتشرحى ببساطه

جزاكى الله كل خير
ومنتظرين باقى الحلقات
لتكملى السلسله الممتازه

محمود ابوالعزم said...

السلام عليكم ورحمة الله
الأخت الكريمة
تشرفت بزيارة مدونتك
وقريت معظمها
عجبني فيها أوي انك بتكتبي على طبيعتك
من غير تكلف
وعجبني في البوست ده انك عبرتي عن اللي جواكي بمنتهي الشفافية
والموضوع جذبني اني أقراه لآخره رغم طوله
يمكن لإني متفق معاكي في كتير من كلامه
ربنا يوفقك ويثري مدونتك بأفكارك دايما
بالتوفيق دايما

ابو المفاصل الواصل said...

العدالة وجهة نظر
الكل يطالب بالعدالة ولكن من وجهة نظره
فالقاتل يطلب البراءة باعتبار القتل قدره
ويتناسى ســــــفكه للدماء وظلمه وغدره
ويتباهى بنفسه لتخليص القتيل من كدره
ويعتقد ان هذا دوره المعشعش فى صدره
فلا يخجل من ازهاق الارواح على مدى عمره
ولا يدرى انه بقتله للاخر بيستعجل حفر قبره
وسينال العقاب المناسب ولن يطول صبره
==========
ناجح يوسف فهمى

تأثير الفراشة said...

أختى سول
مش عارفة أقول لك إيه غير...لا فُضّ فوكِ يا بنتى

ما شاء الله رووووعة، ربنا يكرمك و يبارك فيكى و يرزقك و يرزقنا جميعا الإخلاص و الثبات على الحق

كمّلى و منتظرة جديدك

ربنا يوفقك ،تحياتى

د.محمد said...

Thanks for ur comments on my post,i wish u a lot of success and happiness in ur life.Best regards.Dr/Mohamed.

أحمد سعيد بسيوني said...

جميل جدا الكلام ومتعمق الى درجة كبيرة

نحن لا نتعلم لنتصيد أخطاء الاخرين .. بل نتعلم لكى لا نقع فيها

صدقت ورب الكعبة

جزاكم الله خيرا

Sweet Violet said...

تأخيييييييييييييير

بالذمة ده كلام ..لالا بجد ده كلام ياضد ؟؟

كل ده تأخير

طيب اعمل فيك ايه هه

اعمل فيك ايه

ماتردى اعمل اييييييييييييه فيك

اولع فى المدونة دى دلوقتى علشان ترتاحى ؟؟ هه

اياك تتاخرى تانى بدل ماولع فى المدونة دى

سامعة ياضد ؟؟

مش عايزة اسمع نفس بقى لحد ماارد

)):

^^^^^^^^
بجد نصائح جميلة ياسوووولتى

و بجد البوستات فعلا مفيدة جداااا

و انا متابعة .. مع انى عارفة انى متابعة متاخرة بس

بردو متابعة بقى هه

عااااااااااااااااااااااااا

منتظرة ياقمر الباقية

^_^

جلال كمال الجربانى said...

السلام عليكم ورحمه الله وبركاته

ربنا يكرمك ويعزك ويثبتك
ومتابعين رحلتك
وإصرارك على المعرفه

ودمتِ فى أمان الله وحفظه

فشكووول said...

مستنيك يا سوول عندى ضرورى

شمس النهار said...

الله ينور عليكي
دينا مش بس صلاه وصوم
لأ
دينا دين معامله وعباده
يعني تبسمك في وجه اخيك صدقه اماطت الازي عن الطريق صدقه
حق الجار
لما تكون سايق عربيتك ماترخمش علي الناس
حق الطريق
كل دي معاملات في صورة عبادات
احنا بنصلي حلو اوي
بس من لم تنهاه صلاته عن الفحشاء والمنكر لا صلاه له
يعني ماتصليش وترخم علي جارك
ماتطلعش من الجامع وتبصق في الارض واحده ماشيه بثوب طويل البصقه تيجي في ديلها انت كده اخدت سيئه علي الماشي
وحاجات كتير
ياريت تكتبي فيها
انت اقدر مني في ذلك والشاهد علي كده سلسلة البوستات اللي زي عقد الدر اللي عملتيها
تسلم ايدك

حنين القلب said...

ايه ده ؟؟؟
انا علقت هنا قبل كده
تعليقى راح فيييييييييييييين؟؟؟

ماشى نعلق تانى

كلامك بجد جميل
ونصايحك هايله
ربنا يكرمك ويجعل كلامك ده فى ميزان حسناتك

وحشتينى
موووووووووووووووه

Anonymous said...

السلام عليكم و رحمة الله و بركاته

بدايه اعتذر عن التقصير نحو مدونتك التى لطالما اعجبت بها ..

تانى شئ خلينى ابدأ معك من النقطه اللى ختمتى بيها تدونتك ..

ما ف شئ مش ليه لازمه !!

ف شئ رائع انت كتبيته عبرتى به عن انا عن سول لحظات مرت بها و استفادة فيها و افادة بنقلها وخاصه لما حملته من مشاعر صدقه فعلا و حيرة قد يمر بيها الكثيريييين الكثيريين ف المرحله دى ..

لا شك كان الامر جداا افاد و اثرى الموضوع تعلقات الرواد و بخاصه اخى ياسر و اتمنى توصلى

بوركتِ و بارك الله حياتك

rovy said...

السلام عليكم
ازيك ياسول
واضح انى اتأخرت جدا .. سامحينى لأنشغالى الفتره السابقه و ادعى كمان للبنات ربنا ينجحهم لأنهم بيمتحنوا و واخدين كل وقتى ..
ربنا يبارك فيكى بجد على هذا المجهود الرائع
جميل جدا انك تنقلى للناس احساسك و تجربتك اكيد ده حيفيد ناس كثير
كلامك كمان جميل جدا و بيخرج من القلب يدخل القلب فعلا..
جزاكى الله كل الخير و بارك فيكى و لكى
دمتى بكل الخير
تحياتى

فشكووول said...

ازيك يا سوول
تحياتى
ما قلتيش اول رغبه بقى تبقى ايه عشان اطمئن عليك
وكدا وكدا مبروك حتبقى موظفه قد الدنيا فى الدوله المصريه
الف مبروك يا سوول

z!zOoOo said...

السلام عليكم

يارب تكوني بخير

مبدئيا الله يفتح عليكي بجد

لكن عذرا التعليق دلوقتي مش هيبقي مطول او فيه نقاش

لكن لو ربنا أحيانا بإذن الله ليا عوده
ومناقشه مطوله مع محاوله فهم وتفسير كل نقطه

وكمان اكون قريت البوستات الي فاتت

ربنا يكرمك ويديكي من علمه

وربنا يفتح عليكي ويهديكي وإيانا

ويوفقنا لما يحبه ويرضاه

دمتي بكل ود

في رعايه الله

ذو النون المصري said...

الشيخ محمد الغزالي رحمه الله كان له نفس الاثر معي
كان الدين عندي له معني و صار له معني اخر بعد ان قرات له الكثير من كتبه
فالدين عنده و من خلال مؤلفاته يشمل جميع جوانب الحياة
فله مؤلفات في الاقتصاد و علاج الطاقات المعطله و كتب في السياسه ومثل الاسلام في وجه الزحف الاحمر و الاسلام و الاستبداد السياسي
و له في مجال الحقوق العامه و حقوق الانسان و حقوق المراه مؤلفات و له ايضا مؤلفات في التصوف مثل الجانب العاطفي من الاسلام
باختصار الشيخ الغزالي رجل موسوعي و فهم الاسلام الكامل صح
اما الكثير من مشايخنا فلم يعرفوا فيه الا العبادات و اغلبهم في اجهزة الاعلام و ما اكثرهم
تحياتي

Darsh Basha said...

كلامك جميل وبسيط ومفيد
فعلا
بجد انا استفد كتير وبالذات من البوست الاخير

تحياتى لكى
ولقلمك

د/عرفه said...

فعلا موضوع جميل

اوى

القرآن بتاعنا محتاج تدبر وكل ما الواحد تدبر فيه وجد الجديد دائما فلا عجب فهو صالح لكل زمان ومكان


عجبتنى اوى كلمة
نحن نتعلم ليس من اجل اصطياد اخطاء الاخرين
بل من اجل الا نقع فيه مرة اخرى

وجزاكم الله خيرا