الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Aug 31, 2009

وعد الله ... و وعد الشيطان (1)


كيفكم يا شباب ؟؟؟ أخباركم ايه؟؟؟

و أخبار رمضان ايه؟؟؟

جرى جرى فات تلت الشهر ... سبحان الله ، فعلا الايام الحلوة بتعدى بسرعة اوى

ربنا يبارك لنا فيما بقى منه ، و يرزقنا فيه القول و العمل الصالح .. اللهم آمين


النهاردة ان شاء الله هنكمل مع بعض ، و زى ما وعدتكم هنتكلم النهاردة عن وعد الله و وعد الشيطان ...

نروح الاول بسرعة بسرعة لآآآآآآآآآخر لقطة فى القصة كلها ، حدث النهاية ... حيث يقول الله تعالى على لسان ابليس : " و قال الشيطان لما قضى الامر ( يعنى خلاص ربنا فصل بين العباد و أهل الجنة راحوا الجنة و أهل النار راحوا النار ) إن الله وعدكم وعد الحق و وعدتكم فأخلفتكم ( يعنى الناس دى وصلها كلام ربنا؟؟.. اه وصلها كلام ربنا ، و عرفوا الحق و عرفوا الباطل ، لكنهم عجبهم كلام ابليس ، فمشوا وراه ، و دا تقرير من ابليس اهو ان وعد ربنا هو الحق ، و ان كلامه باطل ... ) و ما كان لى عليكم من سلطان إلا أن دعوتكم فأستجبتم لى ( فاكرين البوست اللى فات لما ابليس قال لربنا لا أقدر عليهم إلا بتسليطك ، فقاله انت مسلط عليهم ، لكن أعطى لآدم الادوات اللى تعينه على التغلب على اغواؤه دا ؟؟؟.... اهو ، آدى تقرير تانى من ابليس انه مالوش غير الوسوسة بس ، و انه ما يقدرش علينا ، عشان الناس اللى بتقول : نعمل ايه بس الشيطان غلبنى ، لا الشيطان مش غلبك ، انت اللى مشيت وراه ... و هو نفسه اتبرأ منك اهو ) فلا تلومونى و لوموا انفسكم ( ماتقعدوش بئا تقولوا دا الشيطان و ما الشيطان ... لا أنا قلت لكم ايه رأيكم فى كذا؟؟؟ انت لقيت فى نفسك هوى للحاجة دى و عملتها ، أنا ماقلتش لك اعملها ، لوم نفسك ، كان فين عقلك؟؟؟ ) ما أنا بمصرخكم و ما أنتم بمصرخىّ ( يعنى لا أنا هأخفف عنكم و لا أنتم هتخففوا عنى ) إنى كفرت بما أشركتمون من قبل ( و آدى حسرة كمان لأهل النار لما اللى قاعدين يعلقوا عليه الامال ، و يقولوا و احنا مالنا هو اللى خلانا نعمل كدا ، ييجى فى لحظة واحدة يقولهم أنا ماليش دعوة بيكم و لا اعرفكم ) إن الظالمين لهم عذاب أليم ( واخدين بالكم ؟؟؟ الظالمييييييييين ... ايوا ظالمين ، ظلموا نفسهم ، و بشهادة ابليس نفسه ظلموا نفسهم ، لما استحبوا السيئات و المعاصى و هوى النفس على كلام ربنا و قعدوا يقولوا ياعم إن الله غفور رحيم ، ياعم هى يعنى جت علينا ؟؟ما كل الناس بتعمل كدا ، و غيره و غيره ) * " ابراهيم <>

و من الجهة التانية نشوف قول الله تعالى على لسان أهل الجنة :" و نادى أصحاب الجنة أصحاب النار ان قد وجدنا ما وعدنا ربنا حقا ( و طبعا مش هأستفيض فى ذكر تنعم أهل الجنة يمكن فى مرة تانية ، لكن شوفوا الحسرة الزيادة لاهل النار بنعيم اهل الجنة و ان الشيطان خلفهم وعده ، و فرحة أهل الجنة بإن ربنا حقق وعده ليهم ، شوفوا من فرحتهم حاسين ان وعد ربنا دا جه ليهم هما بس فقالوا : ما وعدنا ربنا ... وعدنا احنا ، و ربنا احنا) فهل وجدتم ما وعد ربكم حقا ( اه .. ماقالوش وعدكم ، أصل ربنا ماوعدهمش هما بعينهم ، هو قال اللى هيطيع له كذا و اللى هيعصى له كذا ، و هما اختاروا انهم يعصوا ، بس برغم كدا ... هو ربكم غصب عنكم ، و هتشهدوا بكدا يوم القيامة ) قالوا نعم ( بكل ذل و انكسار و ندم ... اه ، وجدنا اللى ربنا قال عليه ) فأذّن مؤذن بينهم أن لعنة الله على .... ( على ميييييييين؟؟؟ ) الظالمين ( خدوا بالكم اوىىىىىىىى ... هما اللى ظالمين )*" الأعراف <>

طب يا ترى هو ايه وعد ربنا ؟؟؟ و ايه هو وعد الشيطان ؟؟؟

تعالوا بئا المرة دى نروح للاووووول خااااااااالص ، و أول لحظة لهبوط آدم للأرض ، و ندمه على معصيته و توبته ..ربنا وعده الوعد ، ايه هو ؟؟؟ " قلنا اهبطوا منها جميعا فإما يأتينكم منى هدى فمن تبع هداى ( و هنا الاساس و القاعدة اللى معظمنا ان ماكنش كلنا مش واخدين بالنا ، حتى أنا ماكنتش واخدة بالى منها ، بس الحمد لله اللى فهمهانى ، وهى ... ان كل واحد فينا مستنى ربنا يهديه !!.. طب يعنى ايه يهديك ؟؟ يعنى بقدرة قادر سبحان الله يتغير حالى فى ثانية بعد ماكنت عاصى و مذنب أبئا رضى الله عنى .... لا يا جماعة غلط ، و غلط اوى ، ربنا قالك اهو ... فإما يأتينكم منى هدى ، و الهدى انك تعرف ان دا حلال ، ان دا حرام ، ان دا يقربك من ربنا ، ان دا يغضب ربنا ... طب و بعديييييين؟؟؟ فمن تبع هداى ... اه ، يعنى انت بعد كدا لك حرية الاختيار اهو ، عرفت ان دا حرام ؟؟ اه عارف ، و بردوا يتعمله؟؟؟ ان شاء الله لما ربنا يهدينى مش هأعمله ... لا غلط حضرتك ، ربنا هداك اهو لما عرفك ان دا حرام ... مصمم تعمله يبئا انت كدا ماتبعتش هدى الله لما جالك ، و ادى انت كدا ظلمت نفسك ... ماحدش ظلمك عشان ما ترجعش تقول يا ريتنى ، و دايما هتلاقوا فى القرآن آيات كتير بتخاطب الرسول صل الله عليه و سلم بالمعنى دا ، ان ربنا أرسله مبشر و نذير ، و انه مش مسئول عن ان الناس تعمل الصح او الغلط ، هو عليه يعرفهم بس ، و بعد كدا كل واحد حر فى نفسه طالما عرف ... هاااااا عرفتوا؟؟؟؟..... طب شوفوا جزاء اللى هيتبع؟؟) فلا خوف عليهم و لا هم يحزنون ( طبعا .. ناس مع ربنا و ماشيين عن نهجه ، إزاى يتخاف عليهم و معاهم ملك الملوك ؟؟.. و إزاى يحزنوا و هما عارفين انه الرزاق فمش هيحزنوا على رزق ، و انه القوى فمش هيحزنوا و لا يخافوا من متكبر ، و انه العادل ، فمش هيحزنوا من ظلم ظالم و غيره و غيره ... بعكس اللى مش هيتبع !! )* و الذين كفروا و كذبوا بآياتنا أولئك اصحاب النار هم فيها خالدون ( و خلوا بالكوا بردوا ، أصل أول ما نقول كافر ... نقول الحمد لله مش علينا ، خلوا بالكم ان الكفر انواع ، و عدم سمعان كلام ربنا دا كفر بأوامره و بالتالى دخلنا فى دائرة الكفر ، و الكافر اصلا يعنى السواد الحالك ، و كمان المزارع بنقول عليه كافر ..اللى هو فى قول ربنا " كمثل غيث أعجب الكفار نباته" الكفار اللى هما الزراع ، و دا لأنهم بيغطوا بذور النبات بالتربة فمش بتبان ، و كدا الامر بالظبط للى بيجيه أمر ربنا ان دا حلال او حرام فيعدى الامر و لاااااا كأنه سمعه فهو كافربأمر الله )*" البقرة <38>

و بيتوقف الوعد عند هنا؟؟؟ ...لالالالا ،

" قال اهبطا منها جميعا بعضكم لبعض عدو ، فإما يأتينكم منى هدى فمن اتبع هداى ( لتانى مرة اهو .. انت ليك حرية الاختيار ،عشان اللى بيقول ربنا هو اللى ماهدانيش ، لا حضرتك انت اللى فاهم غلط ) فلا يضل و لا يشقى ( فاكرين؟؟ فاكرين لما ربنا قال لآدم فى الايات اللى قبل دى على طول " إن هذا عدو لك و لزوجك فلا يخرجنكما من الجنة فتشقى " و قلت لكم ان بردوا دا فى الدنيا ، و اللى هيطيع ربنا بجد هيعيش حياة حلوة ... آدى بئيت وعد ربنا ، ماهو طالما متبع الهدى يبئا أكيد مش هيضل ، و طالما اننا موقنين ان ربنا هو الرزاق ، هو الغنى ، هو الواسع ، هو القوى ، هو العزيز ، وهو ... وهو ... يبئا طالما بأطيعه يبئا أنا ضامن نصيب من كل اسم من دول ان شاء الله ... يبئا هأشقى إزااااااااى؟؟؟ ، طبعا بعكس اللى بعيد عن امر ربنا )* و من أعرض عن ذكرى فإن له معيشة ضنكا و نحشره يوم القيامة أعمى ( اهو ... مش بيسمع كلام ربنا ، يبئا إزاى عاوز نصيب من اسماء الله وهو بيعصيه أصلا ؟؟؟ .. و بعدين دا مش هيكون دنيا بس ، لا دا دنيا و آخرة ) *" طه <>




و المرة الجاية بإذن الله نكمل وعد الله ، و نشوف وعد الشيطان ...

......................................

معلش أنا مقصرة فى حقكم .. بس حقيقى الشغل طحن فى رمضان و نفس مواعيد الشغل تقريبا ، فمعلش سامحونى

و دعواااااااااااتكم ... ماتنسوش


سلااااااااااااااام


19 comments:

Anonymous said...

سول الحبيبة
ليكى وحشة كبيرة قوووووووووووى
والحمد لله انى اول تعليق
علشان اقولك عاملة ايه ياحبيبتى
ربنا يعينك بالنسبة للعمل
طبعا يمكن اكون بعيدة بالتعليقات
ولكن لاانساكى من الدعوات
البوست رائع كذلك ماقبله
وانتى جبتى من الاخر من اتبع
فلا خوف عليهم ولاهم يحزنون
تحياتى

فشكووول said...

السلام عليكم

هى ام مالك كانت قاعده معاكى ولا ايه .. انا بس حجزت التعليق التانى وبعدين اروح اقرأ

"أحلام حقيقية" said...

السلام عليكم
جزاكى الله خيرا على البوست واللى قبله ماشاء الله مجهود ممتاز ربنا يجعله فى ميزان حسناتك يارب
و ربنا يعينك على الشغل ومواعيده

د. ياسر عمر عبد الفتاح said...

جزاكِ الله خيراً
السلسلة كلها بجد كانت رائعة

بالنسبة لتخريج الحديث اللي فات
فأنا بصراحة متأكد من بطلانه
ولولا إني مشغول دلوقت شوية كنت جبتلك التخريج كامل

فيه مواقع وبرامج كثير بتعمل الكلام ده
وأكيد إنتي عارفاها
فاستخدميها
لأن من الخطر زي ما إنتي عارفة إننا ننقل الكلام الباطل ده ونثبت نسبه للرسول صلي الله عليه وسلم

مستنين سلاسل تاني كثير
وربنا يوفقك في شغلك

وحي القلم said...

السلام عليكم
جزاكم الله خيرا مجهوووووووود في طاعة الله فاللهم اجعله في حسناتك
-------

من قال اننا سنعادي النصارى !!
نحن نسالم من يسالمنا ونعادي من يعادينا
إذا عاش اليهود في مصر جنبا غلى جنب معنا فسنرحب بهم مواطنين مصريين
ولكن اتكلم عن كفر النصارى وليس عداواتهم
جزاكم الله خيرا ع الاهتمام
تقبلي مروري
ورمضان كريم

قلم رصاص said...

السلام عليكم

في ميزان حسناتك ان شاء الله يادكتورة هذه السلسلة الرائعة

بارك الله فيكي يارب

وتقبل الله منا ومنكم

واعانك الله على الشغل

في حفظ الله

rssamet_algera7 said...

السلام عليكم ورحمة الله وبركاتهـ

جزاكي ربي كل خير يا اجمل سول
فى ميزان حسناتك ان شاء الله
الف عافية لعيونك عزيزتي

احترامــيّ..

assafo anaroze said...

سول
يسعد الله ايامك
قرأت البوست عجابني اوي
مش حضيف غير مسألة واحدة اني اصلا لما بعمل حاجة بقتنع بها حتى و ان كانت حرام لا اقوم بها حتى اقتنع ممكن ده غلط اه بس مقتنع به و لا ادعي ابدا ان الشيطان هو اللي زقني علشان اعمل كده
انا اللي عملت كده و ممكن اصلح اوي الغلط ده بنفسي انا و عن اقتناع تام به
مودتي

Unknown said...

شكراً ليكى
ربنا يجازيكى كل خير
على الكلام ده

أحــوال الهـوي said...

فتح الله عليك من علمه و افادنا من سعيك و جزاك الله عنا خيرا

تحياتي

♥نبع الغرام♥♪≈ said...

وحشتنى قووووووووووووى حبيبتى
ربنا يبارك فيكى وشكرا على البوست الجميل ده

ربنا يتقبل منا ومنكم صالح الاعمال
مودتى

وردشان smilyrose said...

سول الحبيبة

وحشانى يا نسيانى

وسيبانى وحيدة

كل سنة وانتى بالف خير

لا تنسينى من دعواتك

بوست جميل جدا اختى الغالية

وكعادتك تفتحين الباب

لكل قلب تائهه للعودة الى ربه

Unknown said...

يسم الله الرحمن الرحيم
السلام عليكم ورحمه الله وبركاته
كل عام وانتم بخير
ورمضان كريم
كعادتك رائعه
قرأت لكم فيما سبق تعليق عن معني الخلافه التي يقصدها المولي عز وجل في
قوله (اني جاعل في الأرض خليفه
يبقي جميل جدا لو عرفنا ماذا يعني ان يكون آدم خليفه الله في الأرض .
لك كل التقدير والأحترام.

اقصوصه said...

رمضان كريم :)

Asmaa Fathi said...

جزاكِ الله خير وجعله في ميزان حسناتك

وكل سنه وانتِ طيبة ورمضان كريم

دمتِ بود

تحياتي

blue-wave said...

بجد
جزاكى الله كل الخير

جلال كمال الجربانى said...

دائما رائعه فى إختياراتك وعرضك
جزاكِ الله كل خير
وكل عام وأنتِ بخير حال

رئيس التحرير said...

بسم الله الرحمن الرحيم
سلام الله عليكم و رحمته وبركاته
كل عام وانتم بخير
بلاش كسل و بسرعه كملي لنا الموضوع
عرضكم للموضوع رائع وشيق
يبارك الله لكم

mahasen saber said...

ربنا يكرمك يا سولو كل بوستاتك رائعه ومفيده

وهنستناكى نتطمن عليكى بعد رمضان
متنسنيش من صالح دعاكى

وحشانى جدا جدا ربنا يتقبل منك صالح الاعمال يا حبيبتى