الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Aug 27, 2009

بين آدم و الشيطان


يااااااااااااااااه ... اييييييييه دااااااااااا؟؟؟

جرى جرى بئينا 6رمضان ؟؟!!!... بجد بيجرى بسرعة أوى ، ايه دا؟؟!!!

ربنا ياااااااااااارب يعينا على الطاعة و يتقبلها منا و يتقبلنا ... اللهم آمين


طب نكمل مع بعض موضوع قصة الخلق اللى كنا بدئناه المرة اللى فاتت ، و احنا المرة اللى فاتت شفنا علاقة الشيطان بآدم و بذريته من بعده و حكم ربنا فى العلاقة ما بينا و بينه ، النهاردة هنكمل بردوا فى نفس النقطة تقريبا ، و كمان هنعرف يا ترى ايه هى أسلحة الشيطان و عدته....


هنكمل سرد الايات اللى اتكلمت عن خلق آدم و اغواء الشيطان له

يقول الله تعالى : " و إذ قال ربك للملائكة إنى خالق بشرا من صلصال من حمإ مسنون * فإذا سويته و نفخت فيه من روحى فقعوا له ساجدين * فسجد الملائكة كلهم أجمعون إلا إبليس أبى أن يكون مع الساجدين * قال يا إبليس مالك ألا تكون مع الساجدين ( رغم ان ربنا عارف هو ليه ماسجدش ، لكن سأله ... ليه؟؟؟ عشان يعملنا ان مهما كنت متأكد من أمر ما ، ماتحكمش إلا لما تسأل صاحب الشأن ، مش يمكن طلعت غلطان ؟؟، طب لو طلعت صح؟؟؟.. يبئا شهدته على نفسه .... و كدا بالظبط اللى حصل ، حتى مع الشيطان ، ربنا ماظلمهوش ، و اعطاه الفرصة عشان يبرر عدم طاعته ، يقوم بكل بجاحة يرد عليه و يقول ) * قال لم أكن لأسجد لبشر خلقته من صلصال من حمإ مسنون ( شايفين الكبر و الغطرسة ... ربنا يعافينا يارب ) * قال فأخرج منها فإنك رجيم * و إن عليك اللعنة إلى يوم الدين ( و طبعا عارفين ان اللعنة هى الطرد من رحمة الله ... تخيلوا حد اتطرد من رحمة الله ، اللى هيا متقسمه 100 جزء منها فى الارض بس جزء واحد ، ترحم به الام ابنها و غيره من انواع الرحمة اللى بنشوفها فى الحياة )* قال رب فأنظرنى إلى يوم يبعثون ( بجد انا ماشفتش كدا .. يعنى مش بس غلطان ، لا كمان بيعاند و بيتحدى ربنا ... يعنى انت لما تكون غلطان و فى وش اللى غلطت فى حقه بتبئا محرج منه ، لا دا كمان بيقوله و مش كدا بس ... انت بس اعطينى فرصة و هتشوف .. بجد بجاحة ، ربنا يعافينا يارب ) * قال فإنك من المنظرين * إلى يوم الوقت المعلوم ( شايفين حلم ربنا ، و رغم انه كان ممكن فى ساعتها يقضى عليه ... لكنه تركه لانه حكم بالعداوة بين آدم و الشيطان ، و حتى يخزيه يوم القيامة لما يلاقى ان فى بردوا ناس عبدت ربنا هتتنعم بالجنة و هو يدخل النار هو و من معه )* قال رب بما أغويتنى لأزينن لهم فى الأرض و لأغوينهم أجمعين ( بردوا شوفوا راجع يقول ان ربنا هو اللى اغواه ... لا مش ربنا ، دا نفسك اللى استكبرت عن أمر ربنا و كبرك و غرورك ، و مش بس كدا لا و بيتحدى انه هيغوينا و يزين لنا كل متاع فى الارض ، و دايما نشوف متاع الاخرة بعييييييييييد ، ياعم لما نبئا نيجى ليوم القيامة يبئا ربنا يحلها ... لا حول و لا قوة إلا بالله ، هى وصلت بينا الحال لكدا؟؟؟.!!)* إلا عبادك منهم المخلصين ( بسسسسسسسسسسسس إلا دول ... اللهم اجعلنا منهم يارب العالمين ، صحيح هيقعد يحاول و يحاول و يدخل لكل واحد منا من مدخل ، بس اللى شاطر بئا و فى كل مرة يجيب خيبة امل لشيطانه ،وميسمعش كلامه ، و يقوله لا هأسمع كلام ربنا بردوا ... دا ميقدرش عليه ، لأن ربنا أكيد مش هيتخلى عنه و لا هيسيبه فى مهب الريح للشيطان وهو طالب وجهه )* قال هذا صراط علىّ مستقيم ( أهو وعد ربنا اهو ... ماحدش له حجة ) * إن عبادى ليس لك عليهم سلطان إلا من اتبعك من الغاوين ( واخدين بالكوا ... عبادى ، يعنى اللى عرفوا ربنا و راحوله ، مش اللى يعملوا المعصية و يقولك ياعم ان الله غفور رحيم ... لا ماهو حضرتك مش واخد بالك بردوا ان ربنا قال انه شديد العقاب !!! )* و إن جهنم لموعدهم أجمعين ( مفيش مفر ... هتعاند و تعصى ربنا ، هى النار ... و انت اختار )*" الحجر <>

و تقريبا نفس الايات مذكورة فى سورة ص <>

و رغم كل دا ، ييجى ربنا بنفس الاسلوب الودود ليقول لآدم :" فقلنا يا آدم إن هذا عدو لك و لزوجك فلا يخرجنكما من الجنة فتشقى ( اوعوا الشيطان عدو ليكم ، اوعوا يخليكم تتبطروا على نعم الله عليكم و تخرجوا عن نطاق رحمته ... لأنكم بكدا هتتعبوا اوى )* إن لك فيها ألا تجوع و لا تعرى * و أنك لا تظمأ فيها و لا تضحى ( و إذا كان دا كان هيبئا حال آدم فى الجنة اللى كان فيها ، فدا حكم ربنا فينا بردوا فى الدنيا اللى عايشينها ، حتى احنا عندنا مثل بيقول محدش بيبات جعان ، و دا فعلا لأن ربنا تكفل لنا بالرزق و الكسوة ، لكن طبعا بتختلف ، يعنى مثلا ممكن واحد يتعشى بلقمة عيش بس ، لكن مش بيموت من الجوع .. هى دى النقطة ، و على حسب بئا ما بتتقى ربنا و تسعى حقيقى على رزقك ربنا بيعطيك )* فوسوس إليه الشيطان قال يا آدم هل أدلك على شجرة الخلد و ملك لا يبلى ( رغم تحذير ربنا لادم من الشيطان إلا انه مافقدتش الامل فى اغواؤه و فضل وراه بكل السبل لحد ما دخل له من المدخل اللى يحبه ...فحصل اييييييييه ؟؟) * فأكلا منها فبدت لهما سوءاتهما و طفقا يخصفان عليهما من ورق الجنة ( لما رغم التحذير اغتروا بكلام الشيطان و عصوا ربنا ... ربنا عاجلهم بالعقوبة على طول ، و افتكروا دايما ان المعصية و ستر ربنا و نعمه علينا دايما مرتبطين عكسيا ) و عصى آدم ربه فغوى ( طيب يعنى آدم الوقتى عصى ربنا اهو ... ليه ماتعاقبش زى الشيطان ؟؟... لا يا جماعة فى فرق ، ربنا قال عن آدم (فنسى ولم نجد له عزما) يعنى نسى تحذير ربنا له وماكنش له عزم و لا ارادة فى المعصية ، من جواه كان مطيع لربنا و ماكنش عاوز يعصى ربنا ، لكن لما فضل الشيطان وراه وراه لحد ماخلاه يعصى ... و عرف غلطه و ندم عليه حصل ايه؟؟؟)* ثم اجتباه ربه فتاب عليه و هدى ( ربنا اصطفاه عشان يكون نبى ... سبحان الله ، و كمان تاب عليه و هداه )*" طه <>

شوفوا بئا الشيطان مجهز لنا ايه عشان مايسبش و لا واحد فينا إلا لما يبعده عن طريق ربنا ...

" و إذ قلنا للملائكة اسجدوا لآدم فسجدوا إلا إبليس قال ءأسجد لمن خلقت طينا * قال أرءيتك هذا الذى كرمت علىّ ( أهو آدم ربنا كرمه على ابليس باعترافه ، بذمتكم مش عيب علينا لما نسمع كلام حد أقل مننا ؟؟!!... ) لئن أخرتنِ إلى يوم القيامة لأحتنكن ذريته إلا قليلا ( هأفضل وراهم وراهم ...بس ايييييييه ، إلا عبادك منهم المخلصين )* قال اذهب فمن تبعك منهم فإن جهنم جزاؤكم جزاء موفورا ( جزاء موفورا يعنى تخيلوا بئا لما يبئا الجزاء ... موفور ، من كل شكل و لون ، و مش هيخلص ... اللهم أجرنا من عذاب النار )* و استفزز من استطعت منهم بصوتك ( اول سلاح أهو ... و طبعا مش هأقول صوتك دا ايه ، كل واحد يفهمها بئا ) و أجلب عليهم بخيلك و رجلك ( مش باقولكم معركة .. فعلا هى معركة اهى ، و جايب الخيالة بتوعه و اللى ماشيين على رجليهم ، يعنى مش مخلى حد من اتباعه إلا هيستخدمه ضدك ، يبئا لما انت تقصر فى الاستعداد له ، لا و كمان تسمع كلامه و تسلم نفسك لجنوده ، يبئا العيب عليك مش عليه ) و شاركهم فى الاموال و الاولاد ( فى الاموال بانك تاخد مال حرام ، يزينهولك لحد ما تاخده ، و الاولاد بعدم ذكر الله لما تيجى تباشر زوجتك او حتى بالزنا ) و عدهم و ما يعدهم الشيطان إلا غرورا ( اهو .. ربنا بيقولنا اهو ، كل دا هباء ، بيضحك عليكوا حتى الشيطان نفسه هيقر بكدا فى آية تانية هنقولها بعدين )* إن عبادى ليس لك عليهم سلطان ( و بردوا رغم كللللللللللل الاسلحة دى فى ناس هتقف فى وشك و صحيح ممكن يغلطوا بس هيرجعولى ) و كفى بربك وكيلا ( للى هيتوكل على ربنا بجد ، و يسلم أموره ليه ... أكيد ان شاء الله ربنا مش هيخذله أبدا )*" الاسراء <>



يروى فى الأثر : أن إبليس قال : يارب أخرجتنى من الجنة لأجل آدم ، و أنا لا أقدر عليه إلا بتسليطك .. ( يعنى حتى الشيطان أهو بيعترف بقدرة ربنا عليه ،و انه مايقدرش يعمل حاجة إلا بأمره)

قال : أنت مسلط عليه ( يعنى هأسيبكم مع بعض لما أشوف مين هيغلب التانى ... مش انى حكمت عليهم بالغواية )... قال : زدنى

قال : لا يولد له ولد إلا ولد لك مثله ( تخيلوا بئا اتباعه أد ايه ) ... قال : زدنى

قال : صدورهم مكان تجرى منها مجرى الدم ( يعنى خلى بالك الوسوسة هتيجى بشئ تحبه و على هواك) ... قال : زدنى

قال : أجلب عليهم بخيلك و رجلك و شاركهم فى الأموال و الأولاد ...

قال آدم : يارب قد سلطته علىّ فلا أمتنع عنه إلا بك ( بردوا يارب انا كمان مقدرش مسمعش كلامه إلا إذا انت عنتنى ، يعنى كل امر فى حياتنا خير او شر مش هيحصل إلا بقدرة الله )

قال : لا يولد لك ولد إلا وكلت به من يحفظه من الملائكة ( يعنى ربنا ماسبناش اهو ... ماشى؟؟ محدش له حجة و يقول دا الشيطان ، لا مافى ملايكة بتحفظك اهو ) ... قال : زدنى

قال : الحسنة بعشر أمثالها ( يعنى لو عملنا عمل واحد خير ، كأنك عملته عشر مرات ..شايفين كرم ربنا ) ... قال : زدنى

قال : لا أنزع منهم التوبة مادامت أرواحهم فى أبدانهم ( يعنى حتى لو غلطت اوعى تيأس ..اجرى و توب لربنا و ارجع له هيقبلك ) ... قال : زدنى

قال : أغفر لهم و لا أبالى ( بجد دى فعلا اكبر نعمة ... مهما عملت و مهما بعدت اوعى تيأس ارجع و خلى فى ثقة فى ربنا ) ... قال آدم : اكتفيت

فقال إبليس : يارب جعلت فى بنى آدم رسل و أنزلت عليهم كتب ...

فما رسلى ؟ ... قال : الكهان

قال : فما كتابى ؟ ... قال : الوشم

قال : فما حديثى ؟ ... قال : الكذب

قال : فما قرآنى ؟ ... قال : المزمار

قال : فما مسجدى ؟ ... قال : الأسواق

قال : فما بيتى ؟ ... قال : بيت الخلاء

قال : فما طعامى ؟ ... قال : كل مالم يذكر اسمى عليه

قال : فما شرابى ؟ ... قال : السُكْر

قال : فما مصائدى ؟ ... قال : النساء


شفتوا بئا هو واقف لنا فى كل حتة ازاى ؟؟؟ و مش سايب لنا اى منفذ ؟؟؟ لكن رغم كدا ربنا قالنا انا معاكم- و اعطانا الطريقة اللى نتغلب بيها على كل حاجة من دول - خليكوا بس على طريقى و جاهدوا و لو غلطتوا ارجعوا ... هأغفر لكم على طول ...


انما بئا اللى هيسمع كلامه ، شوفوا حتى انكار ربنا عليه " أفتتخذونه و ذريته أولياء من دونى وهم لكم عدو ؟؟!!... بئس للظالمين بدلا ( الظالمين واخدين بالكوا ... لما آدم و زوجه غلطوا ،قالوا لربنا ايه؟؟ ربنا ظلمنا أنفسنا ، اهو .. اللى هيسمع كلامه هيبئا هو الظالم ) *" الكهف <50>


معلش عارفة انى طولت عليكوا المرة دى كمان .. بس كنت عاوزة أخلص النقطة دى على بعضها ... المرة الجاية بئا هنشوف وعد الله ، ووعد الشيطان ...

سلاااااااااااام


14 comments:

Darsh Basha said...

اول تعليق ياربى
انا مستنية بفارغ الصبر


هقرأ ثوانى وراجع

Soul.o0o.Whisper said...

مبروك عليك أول تعليق يا مصطفى

و كدا هتفطر النهاردة على 3 تمرات و تدعيلى دعوة

ماليش دعوة

لالالالالالا
ليا
ليا

أوعى تنسى
:)

Darsh Basha said...

الله يبارك فيكى

3تمرات وتر يعنى
مينفعش واحدة وتر برضة
ربنا يوفقك للى فية الخير دايما
ويهدينا ويهديكى للطريق المستقيم
وان شاء الله بس مش هنساكى ان شاء الله من دعائى ..بالكلام الجميل اللى انتى كتبتية دة
ومتنسيش تدعى انتى كمان يبعد عننا الشيطان
وانا بالذات علشان انا اول تعليق
علشان اول تعليق دة مش بالساهل كدة

اللهم اعنا على ذكرك وشكرك وحسن عبادتك

Soul.o0o.Whisper said...

حاضر

ان شاء الله

ربنا يبعده عننا جميعا يارب

Nostor Azzuro said...

رمضان كريم ومجهود عظيم ربنا يكرمك عليه

وفى انتظار وعد الشيطان

أحــوال الهـوي said...

احسنت احسن الله لك و قدرك علي الطاعة

اللهم تقبل اعمالنا

غفر الله لنا و لك و نعيذ به من وساوس الشياطين

تحياتي

rssamet_algera7 said...

السلام عليكم ورحمة الله وبركاتهـ
ربنا يهدينآويبعدنا عن غواية ابليس واعوانه واتباعه
ربنا يغفر لنا ظلمنا لانفسنا ويرحمنا ويعفو عنا
جزاكى ربي كل خير
الف عافية لعيونك سول
وشكرا كتييير على البوستات المعبرة جدا

احترامــيّ

Unknown said...

جميل الكلام
و مفيد
شكراً ليكى
و ربنا يجازيكى خير
----
كان ليا سؤال

هو الحوار اللى فيه كلمة زدنى
ده حوار ربنا مع الشيطان و لا مع سيدنا ادم
؟!!!

اصله فى الأخر قال ادم اكتفيت

بس فى بداية الحوار واضح انه بين الله و الشيطان

قلم رصاص said...

السلام عليكم ورحمة الله وبركاته

بارك الله فيكي يادكتورة سول

السلسلة رائعة بحق واتمنى تكون في ميزان حسناتك واسأل الله لذلك

وانا متابع معاكم ان شاء الله

وكل سنة وانتي طيبة

في حفظ الله

♥نبع الغرام♥♪≈ said...

السلام عليكم

جزاكى الله عنا كل الخير وربنا يجعل كل ما كتبتى بميزان حسانتك

تقبل الله منا ومنكم صالح الاعمال
مودتى

طيـــ الجنه ــــور said...

جزاك الله كل خير


****************

عاوز تعرف دينك اكتر

وكمان ازاى تكسب ثواب وحسنات فى نفس الوقت

تعالوا زروروا مدونه طــ الجنه ـــور

اللى هدفها زياده الثقافه الدينيه وكمان خدمه الاسلام

عاوزين تعرفوا ازاى تخدموا اسلامكم انتوا كمان وتكسبوا ثواب

تعالوا وهتشوفوا بنفسكوا

حنين القلب said...

تسلم ايدك يا سول بجد
طريقه سردك للقصه روعه

ربنا يجعل كل حرف فى ميزان حسناتك

د. ياسر عمر عبد الفتاح said...

جزاكِ الله خيراً
الموضوع جميل فعلاً

بس الحديث اللي في الأخر ده تقريباً مضروب
مش أصلي يعني
ياريت تراجعيه

ربنا يتقبل منا صالح الأعمال

وحي القلم said...

السلام عليكم
هكذا الشيطان كيده ضعيف ولكنه يبخ ثمومه في نفوس البشر ويصنع منهم أولياء