الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Sep 12, 2009

وعد الله ... و وعد الشيطان (2)


كيفكم يا شباب ؟؟.. و أخبار رمضان معاكم ؟؟؟

إنا لله و إنا إليه راجعون ... خلاص الشهر بيودع

ربنا يااااااااااارب يتقبل منا جميع أعمالنا و يجعلها خالصة لوجهه ، و يوفقنا و يبارك لنا فيما بقى ... اللهم آمين


و سريع سريع نكمل مع بعض ان شاء الله الجزء التانى من وعد الله ... و وعد الشيطان ، و وقلنا ان الشيطان عمره ما كان صادق و انه بيغرر بينا عشان نعصى و بعدين يوم القيامة يتنصل مننا و يقولنا ان وعد ربنا هو الحق و انه ماكنش له علينا سلطان ، و قلنا ان هدى الله واصلنا كلنا ، و ان الاختيار بايدنا مش بمعجزة إذ فجأتن ..


و شفنا ان الاعراض عن امر من اوامر ربنا بيدخلنا فى دائرة الكفر ..اللى هو مش الكفر المخرج من الملة ، بس يكفى انه كفر يغضب ربنا علينا و ندخل بسببه النار ، ولو حتى مش خلود فيها ... ربنا يعافينا جميعا من عذاب النار ..


و طبعا اللى يسمع الكلام و يطبق الكتالوج – على رأى د.اسلام – دول سماهم ربنا مؤمنين ، واللى ربنا قال عنهم فى القرآن " و ما كان لمؤمن و لا مؤمنة إذا قضى الله و رسوله أمرا أن يكون لهم الخيرة من أمرهم " يعنى ربنا يقول اعملوا كذا .. يعملوا على طول ، ماتعملوش كذا ينتهوا فورا ... و دول بردوا اللى مفروض نكون منهم .. و طبعا اوامر ربنا فى القرآن و صفات المؤمنين دول مذكورة منها واحدة أو اتنين تقريبا فى كل سورة ، و اللى مايعملش او مايتصفش بالصفات دى غالبا مذكور بالظلم او الكفر .. و احيانا بيذكر بالنفاق ، ربنا يعافينا جميعا يارب ..


طيب ... مش هاستفيض حاليا فى ذكر صفات المؤمنين ، كل واحد يقعد مع نفسه يطلعها و يشوف فعلا بيعمل كدا و لا لا ...ماشى؟؟؟ عشان مانرجعش نقول ليه يارب ليه؟؟ ليه الظلم ليه؟؟؟... حاشا لله ان يكون ظالم ..



طيب الاول نشوف قول الله فى حقيقة هذه الدنيا ، يقول تعالى : " اعلموا أنما الحياة الدنيا لعب و لهو ( و اعتقد محدش فينا يقدر ينكر دا ، كلنا نفسنا نجرى و نلعب و حياتنا كلها لهو و محدش يقولنا نعمل حاجة ، و اللعب : اللى بيكون فى مرحلة الطفولة ، اما اللهو فكل تمتع بحلال لهو .. و اللهو مش عيب و لا حرام ، لكن ان كل حياتنا تبئا كدا بس ، طبعا حياة بلا معنى ، و اعتقد اتكلمت فى النقطة دى قبل كدا ) و زينة و تفاخر بينكم ( صح ... مين فينا مش نفسه فى كل زينة ، و اللى بيجيب حاجة جديدة بيبئا نفسه كل الناس تتكلم عن الحاجة دى ، ولو واحد متكبر شوية بيبئا فكره انه ملك الناس باللى عنده ..مش كدا و لا ايه؟؟ ) و تكاثر فى الاموال و الاولاد ( طبعا محدش هينكر انه بئا بيعمل اى حاجة بس عشان خاطر الفلوس ،و ماعندوش مانع يشتغل 24 ساعة مدام هيجيله فلوس ..مش كدا و لا ايه ؟؟، و اللى معاه قرش يساوى قرش و الكلام اللى كلنا حافظينه دا ، و طبعا الاولاد اللى لو ربنا اراد لشخص يتأخر شوية بيصرف كل الفلوس اللى بيجرى عليها دى عشان يجيله ولد ..مش كدا بردوا؟؟؟) كمثل غيث أعجب الكفار نباته ( تمام زى الفلاح اللى بيحط البذرة فى الارض و يستنى المطر لما ييجى يسقيها عشان يشوف نتيجة تعبه ... لكن النتيجة بتكون ايه؟؟؟) ثم يهيج فتراه مصفرا ثم يكون حطاما ( و دا طبعا يا جماعة للى بيجرى على الحاجات دى دون طاعة لربنا و عاوز الدنيا بس ... لأننا طبعا قلنا ان كل الحاجات دى لنا التمتع بيها فى الحلال ...المشكلة تكون لما نسعى ليها فى الحرام لإننا كدا بنغضب ربنا علينا فيكون الجزاء فى النهاية ...) و فى الآخرة عذاب شديد ( واخدين بالكم .. عشان الناس اللى بتعمل حرام و تقولك ان الله غفور رحيم .... لا ، هنا قدّم العذاب لأن ربنا عدل ، اللى هيعمل غلط أو حرام هيتعاقب ، و ان ماكنش فى الدنيا ففى الاخرة ) و مغفرة من الله و رضوان ( اللا ... ماهى المغفرة اهى و الرضوان !!!... ماحنا قلنا يا جماعة ان ربنا أمرنا بيهم فى الحلال ، فاللى هيسعى ليهم فى الحلال دا اللى ليه المغفرة و الرضوان ... بدليل انه قال بعدها ) و ما الحياة الدنيا إلا متاع الغرور ( يعنى اللى هيتغر بيها و يقولك ياعم اضمن اللى فى ايدى و لما نبئا نروح عند ربنا يبئا يحلها ألف حلال ... غلطان ، و غلطان جدا كمان ، لأنه خلاص الدنيا بالنسبة له هى المتعة و الاخرة دى مش فى حساباته )" الحديد <20>


طيب بعد كدا نشوف بئا وعد ربنا للمؤمنين دول على مر الحياة كاملة ...الحياة الدنيا و حياة البرزخ و الحياة الاخرة ، و طبعا مش هاقول تانى ان المؤمنين اللى ربنا ذكر صفاتهم و أفعالهم فى القرآن ، و لما نلاقينا مابنعملش حاجة من الافعال دى و لا متحلين بالصفات اللى ربنا قال عليها ، يبئا لا نلومن إلا أنفسنا ... مش كدا و لا ايه؟؟؟


تعالوا نشوف فى الحياة الدنيا ربنا وعد المؤمنين بإيه ، و دا تأكيد للآية اللى فاتت ... يقول تعالى : " قل من حرم زينة الله التى أخرج لعباده و الطيبات من الرزق ( تانى؟؟؟ ... الاية دى تانى؟؟ ... ايوا تانى و تالت ، عشان بس نعرف ان القرآن مش فيه تضاد ... و مش معنى ان ربنا قال ان الحياة الدنيا متاع الغرور انها محرمة على المؤمنين ، بالعكس المؤمنين اولى بيها لأنهم بيطيعوا ربنا ، و آدى وعد ربنا ليهم أهو ) قل هى للذين آمنوا فى الحياة الدنيا خالصة يوم القيامة ( و دا وعد من ربنا ،و طبعا لا يخلف الله وعده ... يعنى فعلا اللى هيؤمن هيتمتع مش ربنا هيضيق عليه و حياته دايما ابتلاءات بس زى ما الناس فاكرة ) " الاعراف<32>


و كمان إيه ... الحكاية مش بس اكل و شرب و متعة ، عشان الناس اللى بردوا بترتاح على كدا و تنام ، لا كمان " وعد الذين ءامنوا منكم و عملوا الصالحات ( واخدين بالكوا بردوا من عملوا الصالحات دى؟؟.. أصل فى ناس تقولك أهم حاجة القلب ، طالما القلب أبيض خلاص اعمل اللى انا عاوزه ... لا غلط ، العمل بيدل على قلبك فعلا ، بتعمل صالح يبئا قلبك فعلا صالح ، بيتعمل فاسد بيئا قلبك فاسد ) ليستخلفنهم فى الأرض كما استخلف الذين من قبلهم ( اه .. أصل كان من ضمن عملهم الصالح انهم بيسعوا انهم يكونوا الاوائل فى كل شئ ، أخدوا بالاسباب انهم يكونوا قادة رغم كل الظروف السيئة اللى حواليهم ، فربنا عمل ايه؟؟... حقق لهم وعده ، نوح عمل ايه ؟؟ بنى السفينة رغم انهم فى بيئة صحراوية ، فربنا عمل ايه؟؟؟ نجاهم من الطوفان .. لوط سار بأهله من اول الليل و مبصش وراه ..فربنا عمل ايه؟؟؟ نجاه من مطر السوء ...و هكذا ، أنت عليك تؤمن بربنا ، تعمل اللى قالك عليه ، هو هينفذ وعده ليك ) و ليمكنن لهم دينهم الذى ارتضى لهم ( ايوا هيمكن ليهم و بإديهم ، مش هيستبدلهم ) و ليبدلنهم من بعد خوفهم أمنا ( ناس بئت قادة الارض ، هتخاف من حد؟؟ هيخافوا من مين و خلاص بئوا هما المتحكمين فى كل شئ ... بسسسسسسسسس اييييييييه؟؟ ) يعبدوننى لا يشركون بى شيئا ( أيوا يعنى ماينسوش نفسهم و ينساقوا مع الدنيا و يبعدوا عن ربنا ... لالالا دايما فاكرينه و يعبدوه وحده لا شريك له ، انما اللى هينسى ) و من كفر بعد ذلك فاؤلئك هم الفاسقون ( و طبعا عقابهم معروف مش محتاج تفاصيل ) " النور <55>


" إنا لننصر رسلنا و الذين ءامنوا فى الحياة الدنيا ( وعد من ربنا اهو ... و للذين ءامنوا فى اى زمان و مكان ، و مش فى الدنيا بس ) و يوم يقوم الأشهاد ( أيوا على رؤوس الخلائق كمان يوم القيامة )" غافر <52>


طيب الشيطان بئا بيوعدنا ايه؟؟؟.... يقول تعالى : " الشيطان يعدكم الفقر و يأمركم بالفحشاء ( و الفقر مش اللى هو نقص الفلوس بس ، لا الفقر فقر مادى و معنوى ... بلاش تتصدق او تزكى ، ليه؟؟؟... اصل الفلوس تخلص ، و بعدين هتجيب منين ؟؟ و اللى يعوزه البيت يحرم على الجامع و الكلام الغريب اللى كلنا بنتحجج بيه دا .... بلاش تروح الجامع ، ليه؟؟ أصل كل اللى بيروحوا الجوامع ارهابيين و متعصبين و أمن الدولة بيخدوهم تحرى ... يا سلاااااام .... اوعى تبئا طيب و تقابل الاساءة باحسان ، ليه؟؟ اصل هيقولوا عليك اهبل و عبيط و بعد كدا هيعاملوك دايما وحش لأنهم عارفين انك ساذج ...مممم ، نظرية بردوا ....و غيره و غيره و غيره ، طب نشوف على النقيض ) و الله يعدكم مغفرة منه و فضلا ( أصلك لما بتعمل حاجة بتعملها لله ، فأكيد ربنا هيغفر لك لو غلطت فى شئ ، لا و كمان هيعطيك من فضله ، يعنى مش هتعمل الخير و ترميه فى البحر ، بجد هتلاقى المقابل لعملك دا من ربنا ، و كمان بزيادة لانه هيعاملك بفضله مش بعدله ، و شوف ختم الاية بإيه؟؟) والله واسع عليم ( واااااااااااسع ، و الملك كله بإيده ، هيعطيك و لا يقلل ذلك من ملكه شئ ، و عليم .. عليم انك فعلا عملت كدا ليه ن فيجازيك بيه ، و عليم ان فلان دا قابل الاحسان بالاساءة فيعاقبه عليها ، عليم انك بتجاهد رغم كل شئ غلط حواليك فيساندك و يساعدك )" البقرة <>


و يحذرنا ربنا " إنما ذلكم الشيطان يخوف أولياءه ( أولياءه ،ها؟؟ واخدين بالكم ... اللى سمحوله انه يكون له سلطان عليهم ) فلا تخافوهم و خافون ( يعنى اللى يخوفك من عمل الخير و الطاعة سواء من الشيطان او من اولياؤه من الانس ... ماتسمعوش كلامهم و لا تخافوا ... أنا معاكم ، و افتكروا انكم لو سمعتوا كلامهم كدا هأغضب عليكم فخافوا غضبى ...اللى هو طبعا أشد من ألف وسوسة ، أصلا الوسوسة دى و لا شئ جنب غضب ربنا ) إن كنتم مؤمنين ( مؤمنين ... لو مؤمنين فعلا مش هتخافوا إلا منى ، و محدش هيقف فى طريقكم ) " آل عمران <175>


و يرجع ربنا يفكرنا تانى " يا ايها الناس إن وعد الله حق ( ربنا مابيخلفش وعده ، و مدام قال هيوفى ) فلا تغرنكم الحياة الدنيا ( أوعوا تمشوا فى غلط و لا تعملوا حاجة حرام عشان هدف عاوزينه ) و لا يغرنكم بالله الغرور ( و لا الشيطان يضحك عليكم ، اه أصل هو اللى بيغريكم بالدنيا عشان كدا هو غَرور)* إن الشيطان لكم عدو فاتخذوه عدوا ( و دى طبعا حقيقة محدش ينكرها ) إنما يدعو حزبه ليكونوا من أصحاب السعير ( آدى كلمة ربنا فاللى هيتبعوه ... حزب الشيطان ، اللى هيسمعوا كلامه ، دول أصحاب السعير) " فاطر <5-6>


طبعا القرآن مليان وعود من ربنا للمؤمنين ، و تحذير من الشيطان و توضيح لوعوده الكاذبة ، و دا بئا الواجب بتاعكوا ... تطلعوا انتوا بئا بئيت الوعود و نحاول تكون حافز لينا عشان بجد نمشى على طريق الطاعة ... ربنا يهدينا جميعا الى صراطه المستقيم و يسددنا لطاعته و يثبتنا عليها ... اللهم آمين


و المرة الجاية إن شاء الله نشوف وعد ربنا فى حياة البرزخ و يوم القيامة ... دعواتكم

سلاااااااااااااااام

11 comments:

ميمى واحمد said...

اول تعليق

يا مسهل كده نسبة الاسهم عليت اوى

وعلى اخر الشهر اكيد باذنه هاكون صاحب كلمة هنا بس طبعا كلمتى بعد كلمتك ما هو لازم نراعى الواجب والاصول

Unknown said...

آخذ مكان الأول

♥نبع الغرام♥♪≈ said...

احجززززززززززززز
تالت تعليق

♥نبع الغرام♥♪≈ said...

تعرفى بجد انا حزينه قووى ان الشهر عدى بسرعه معتش غير اسبوع بس والوحده حاسة انها مقصرة قووى مع ربنا ربنا يرحمنا برحمته الواسعه ويغفر لنا ويسمحنا ويبلغنا ليلة القدر قادر ياكريم

ومتشكرين على جهدك وجزاكى الله عنا كل الخير وجعل كل حرف بميزان حسانتك

تقبلى مودتى

سلالالالالالالالالالالامى
ايناس

كيكى عوووووو said...

وحشة وحش وحشه@@@ دة طبعا مش انتى!!!
********************
رمضااااااااااان جرى جرى يااااااااه فين اول يوم رمضان وانا قاعدة متنحة قدام الساعه واقول هى الساعة وقفت ليه...وفين دلوقتى وانا بتمنى بجد تكون كل ايامنا رمضان

dr_samarmar said...

السلام عليكم
يا جماعة انتو عارفين خطر انفلونزا الخنازير اللى بيهددنا كلنا و ممكن جدا يتحول لوباء قاتل و يبيد مننا كتير.. و اكيد محدش عايز دا يحصل ابدا و لا عايز حاجة وحشة تحصل ليه أو لأى حد بيحبه.. فى حملة اننا كلنا نوحد الدعاء يوم سبعةو عشرين27 رمضان ع الفطار بالرحمة من وباء انفلونزا الخنازير.. تخيل لما مسلمين كتير يدعو نفس الدعوة.. هيبقى فى ساعة متواصلة ناس بتدعى نفس الدعوة منهم صالحين ا ش ا.. و مفيش حاجة بعيد عن ربنا.. دا لينك الجروب ع الفيس بوك اشترك و ابعت دعوات و انشر الفكرة على قد ماتقدر ارجوك http://www.facebook.com/group.php?gid=124302732892&ref=ts

وردشان smilyrose said...

السلام عليكم

اخبارك يا نسيانى فى الشهر الكريم

وحشانى جدا جدا جدا

وربى اعلم بما فى قلبى

وياريت تطمنينى عليكى

لو انا قصرت مش تبعدى ولا ايه

رمضان كريم

د.خالدأمين said...

كل سنه وانتي طيبه


رمضان كريم مع انه عدي جري جدااااااااااا


وبعدين بجد انا استفدت واتاثرت كتير بكلامك

واحب اخبرك بانني من ضيعوا رمضان هذا العام



ولكني ساحاول ان اعوض وربنا يستر


ادعيلي

د. ياسر عمر عبد الفتاح said...

جزاكِ الله خيراً
وربنا يتقبل منا جميعاً صالح الأعمال

وكل عام ونحن إلي الله أقرب

mahasen saber said...

الايام المباركه بتمر بسرعه وبتسابق بعضها

ربنا يتقبل منا ومنكم ومن الجميع صالح الاعمال والقيام والصيام

وكل ايام مباركه وانتى بكل خير يا سولو يا جميله

فارس عبدالفتاح said...

ازيك يا سول كل سنة وانت طيبة ورمضان كريم