الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Sep 22, 2009

+ تحديييييييييييث^^ ذ كــــــر يـــــــــــا ت ^^


تحدييييييييث : خلاص يا ولاد ... اهئ اهئ

بكرة راجعة الشغل من تانى ... و ربنا يستر من بكرة و بعده ،و كمان الاسبوع الجاى هيبئا شغل نااااااار

دعواتكم بئا ربنا يعديهم على خير

و طبعا قبل مامشى قلت أحل الفوازير ...

طبعا المعظم قال حل رقم 4 و إن ماكنش كامل يعنى و دول عادل و أيوشة

و مصطفى (درش)و تأثير الفراشة

و اضافوا عليهم حل رقم 3 و اللى ضد قالت انها عارفاه و ماقلتهوش ... لما أشوفك يا ضد

و عاشقة الرومانسية اللى قالت انها عارفة رقم 2 و بردوا ماقلتش الحل ... صبرك عليا يا دودو


طب نشوف الحل:

1- يا بنّى ابنى .. اللى هو بيبنى البنت بتقوله يا بنّا ... ابنى

و بنىّ ابنى ... يعنى ابنى بالطوب النىّ

الواد دا أخويا ... معروفة خلاص ، و أنا بنت (مش ولد يعنى ) أخته ... يعنى هما اخوات

<< يااااااااااه نورتى المحكمة يا سول والله ... شكرا شكرا أخجلتم تواضعنا والله

2- ما رأيك يا قاضى تُها ... هو القاضى اسمه تها

فى امرأة تزوجتها .. يعنى انت اتجوزتها

هى امى ... معروفة ، و أنا ولد تُها .. يعنى أنا ابنك ... و الست دى تبئا مرات القاضى :)

3- جبنا جبنا .. يعنى اشترينا جبنة

بقعت جبنا .. بقعيت الجيب فى الهدوم :)

4- طرقت الباب حتى كلّ متنى .. قعدت أخبط على الباب لحد ما دراعى وجعنى

فلما كل متنى كلمتنى .. يعنى و لما دراعى وجعنى ردت عليا

قالت يا اسماعيل صبرا ... قالت له يا اسماعيل اصبر شوية

قلت يا اسما عيل صبرى .. هى اسمها اسما ، فيقول لها يا اسما نفد صبرى


و دمت جميعا بكل الخير ... اتمنى أشوفكم قريب ، ابئوا اسألوا عليا يا ولاد ... ربنا يستر اهئ اهئ

......................................


كل سنة و انتوا طيبين يا شباب و عيد سعيد عليكوا يارب و على كل الامة الاسلامية ...

و ربنا يعفو عنا جميعا و يعافينا من كل شر و سوء ، و يجعل أيامنا كلها أعياد ... اللهم آمين



و طبعا داخلين على العيد كان لازم أجيب تامبلت جديد للمدونة ، يعنى الناس تعيد و هى لا ؟؟

من نفسها مرة ... اللا ...

بس يعنى ماتخدتش على كدا هو العيد دا و بس ، اه باقولك اهو .... اتفقنا؟؟؟

طييييييييييييييب

ها؟؟ ايه رأيكوا فى الطقم الجديد؟؟؟


******


طبعا زى ماحنا متعودين كل عيد ... هنقعد نلكلك شوية و نحكى عن ذكرياتنا ،

و طبعا بردوا أنا أحلى لحظات حياتى لما باقعد مع نفسى و استعيد ذكرياتى مع الناس اللى باحبها

ياااااااااااه بجد احساس تانى خااااااااالص


و النهاردة بئا قررت إنى هأحكى عن شخصية من أغلى و أحب الشخصيات لقلبى و اللى أثرت فيا جدا جدا جدا

و هى .......... جدتى لوالدى اللى فقدتها من حوالى 9 سنين تقريبا ربنا يغفر لها و يرحمها ... اللهم آمين


و تيتة بئا يا ولاد كانت شخصية مميزة أصلا فى العائلة و كان لقبها ( أديبة العائلة )

و دا لأنها كانت بسم الله ما شاء الله موسوعة أدبية متنقلة ، شعر .. قصص .. حكايات .. مواعظ .. حكم

كل كل حاجة ، و كانت مثقفة و مطلعة ما شاء الله عليها ، و طبعا كان لى النصيب الأوفر منها

و طبعا لقبى كان و مازال ( الخليفة )

و دا لأنى ورثت منها حب الشعر و الأدب عموما ... و القراءة و الكتابة بالنسبة لى متعة لا تفوقها متعة بصراحة

هى مش سمة ليا لوحدى ... هى متأصلة فى العيلة كلها ، بس يمكن زيادة عندى شوية


نرجع لمرجوعنا الاساسى و هى تيتة ...

تيتة بجانب كدا كانت موسوعة فى الطب الشعبى ، و ماكنتش ترضى تاخد دوا ابدااااااا << وريثتها بردوا فى الموضوع دا

و كانت دايما تحب كل حاجة من الطبيعة و تعمل خلطات كدا غريبة و مش عارف ايه على ايه ... بس بصراحة كانت بتجيب نتيجة


دا طبعا غير الاكلات المميزة ليها ، افتكر و أنا صغيرة يمكن كنت 3 سنين و لا حاجة ، و كانت تعمل لى العيش بالعسل الاسود كان بجد جنااااااااان ... تقوم مسيحة حتة سمنة صغيرة على النار و بعدين تقطع العيش حتت صغيرة و تحمصه فى السمن و بعدين هوب تحط العسل الاسود و تقعد تقلب شوية و بعدين تسيبه يبرد حبة و مع نفسى بئا ... آكل ماكلش ، ماكنتش تقعد فوق راسى زى ما كانت ماما تعمل معايا ... اصلى كنت مجنناهم فى الاكل دا ...ماكنتش باكل خاااااااااااالص ههههههههههه

و كمان الرز بالطماطم ياااااااه كان خطير بجد بس للاسف مش عارفة لحد الوقتى كانت بتعمله ازاى ، كل محاولاتى بعد كدا بائت بالفشل فى حاجة كدا كانت مميزه فيه بس مش عارفة هى ايه ؟؟!!!...


و طبعا مش هأحكى على كمية القصص اللى كانت بتتحكالى ، و قصة قبل النوم دى كانت شئ مقدس و حكايات سندريلا و الشاطر حسن و ذات الرداء الاحمر ، و ذات الرداء القشى ،و حكاية التلت بجعات ،و ... و... و.... كتييييييييييييييير جدااااااااا


بس بصراحة اكتر حاجة كنت باحبها منها كانت قصيدة صراع بين الملايكة و الشياطين و الانسان ... بس للأسف تلت أرباعها طار من الذاكرة ... كنت كاتباها بس للاسف بردوا ضاعت منى ..

هاكتب لكم اللى فاكراه منها و عادى جدا لما تلاقوا الارسال قطع فى النص ...


أولها كان الشيطان بيقول للانسان :

أيها الانسان دوما ... كن ظلوما للعباد

إن تركت الظلم يوما ... لم تنل منهم مراد

يقوم الملاك يقول :

أيها الانسان حاذر ... إن للناس إله

و الارسال قطع ...........

فى النص يعنى صراع بين وسوسة الشيطان و نصح الملاك

و بعدين الشيطان يستغيث :

يا شياطين الجبال ... يا عفاريت الظلام

ساعدونا فى القتال ... نحن نخشى الانهزام

<< طبعا فى الحتة دى كنت باضحك اوىىىىى .. أصلى كنت باتخيل الشيطان وهو لا حول له و لا قوة و عمال ينادى و صوته مقطوع و مش قادر ياعينى ... ههههههههههه

يقوم الملاك يقول :

ربى يارب البرية ... ليس للعبد سواك

فاهده فعلا و نية ... رب و ارزقه رضاك

ييجى الانسان فى الاخر بئا يقول القول الفصل :

أءقتل الناس و هم اخوانى ... و اظلم الناس وهم أعوانى << هى تقريبا كانت كدا

و كيف ألقى نعمة الأمان ... إن قابلوا العدوان بالعدوان

و بردوا الارسال يقطع

بس التكملة كانت دعاء بئا ان ربنا يثبته على الخير و يبعد عنه الشيطان

معلش عارفة انها بتبئا رخمة أوى قطع الارسال بس دا اللى فاكراه منها بئا


و طبعا يا ولاد كان فضل من ربنا ان تيتة كانت معايا معظم طفولتى بصراحة ، و دايما كانت تربط لى كل حاجة بربنا ، عشان ربنا يحبك ... لا كدا ربنا يزعل منك ، و كانت ماشاء الله عليها لازم ختمة للقرآن كل أسبوع ، و السنن الرواتب طبعا ...


دا غير خفة دمها اللى كانت محببة كل الناس فيها صراحة ، و بجد ماقبلتش حد عرفها إلا حبها جدا

بس طبعا مش قد حبى لها ... و كانت خاتمتها اللى ربنا يرزقها لنا جميعا فى العشر الاواخر من رمضان و قبل الفطار بحاجة بسيطة خالص ، فكرتنى بعثمان لما شاف فى الرؤية رسول الله و قال له ستفطر عندنا اليوم ، فهى أحسبها على خير و لا أزكيها على الله ، احسبها تمرح فى جنان الخلد ان شاء الله


و طبعا الفترة اللى فقدتها فيها كنت اصلا فى فترة امتحانات الاعدادى دا غير شوية ظروف كدا و خبوا عليا فترة بس قلبى كان حاسس ، و كل ما اسألهم عليها يقلولى بخير و كويسة ... بس بعد كدا لما عرفت ، عرفت ان احساسى كان صح ، طبعا كان حزنى عليها شديد ، و على طول بادعى لها ربنا يجازيها عنى كل خير ، و يغفر لها و يرحمها و يدخلها جنات و نهر فى مقعد صدق عند مليك مقتدر ... اللهم آمين

انتوا كمان ادعولها ... و لجميع موتى المسلمين


معلش طولت عليكوا بس انا لما بافتح بافتح بئا ... حظكوا

و اختم معاكوا بئا بكام فزورة من اللى كانت بتقولهالى ، طبعا كانت أغلب الفوازير لعب بالكلمات ولف و مش مباشرة و أنا عليا اعرف الحل

ياللا نبدأ و أول واحدة سهلة خالص طبعا هأكتبلكوا الكلمات زى ما بتتنطق و انتوا اعرفوا الحل ...

1- يا بنّا ابنى و بنىّ ابنى ، الواد دا أخويا و أنا بنت أخته ... فسروا

2- ما رأيك يا قاضى تُها ، فى امرأة تزوجتها ، هى أمى و أنا ولدتها ؟؟

3- جبنا جبنا بقعت جبنا !!!

4- طرقت الباب حتى كلمتنى فلما كلمتنى كلمتنى ...

قالت يا اسماعيل صبرا قلت يا اسماعيل صبرى


و طبعا هاستنى الاجابات فى التعليقات ، أوعوا تنسوا

ياللا سلااااااااااااااام


55 comments:

Sweet Violet said...

كل سنة و انت طيبة ياقمر
وحشاااااانى موووووت

بس تعالى هنا
انا عارفةرقم 3 لانى سمعتها قبل كده
اما بقى الباقى
هفكر و اشوف ولو مش عرفت يبقى اعرف من التعليقات بقى
^_^

Sweet Violet said...

و كمان اول تعليق بعد غياب

نيهاهاهاهاهاهاهاهاهاها

Sweet Violet said...

شوفتى نسيت اقولك
شكل المدونة جميل بجد

كل سنه و هى كمان طيبة
^_^

adel said...

كل سنة و انتي طيبة
وعيد سعيد

و مبروك شكل المدونة

وتعيشي و تفتكري كده
:)

الفوازير دي معرفش منهم الا بتاع اسماعيل صبري

طرقت الباب حتي كل متني
والكل الي هو التعب ..الخ
وهو اساسا اسمه اسماعيل ثبري و هي اسمها اسما
فتقولوا يا اسماعيل صبرا يعني استني
فقلها يا اسما
عيل صبري
يعني تعبت من الصبر

اي خدمة

احساس طفلة محبة للرومانسية بس واقعية said...

و كمان الرز بالطماطم ياااااااه كان خطير بجد بس للاسف مش عارفة لحد الوقتى كانت بتعمله ازاى

طيب لو عرفتى ازاى قوليلى
انا كمان محتارة فيه

عارفة الناس الكبار اللى هم اجدادنا وجداتنا موسوعة دى كلمة بسيطة لو اطلقت عليهم فى كل المجالات زى ما قولتى
انا اللى كان بالنسبالى جدى رحمه الله عشان كدا حاسة بكلامك جامد

الفوازير دى عايزة تتسمع اكتر منها تتقرى وتتفهم اعتقد الحكاية كلها فى النطق

كل سنة وانتى طيبة
وحشانى جدا
و عيد مبارك عليكى
يارب تكونى بخير
تقبلى مرورى

أحمد سعيد بسيوني said...

بسم الله الرحمن الرحيم

تقبل الله طاعاتكم

وكل عام وانت بخير

جعله الله عيد حب وسعادة وهناء

دمتم بود

عاشقه الرومانسيه said...

والله كنت هابقى اول تعليق بس النت عملها معايا
عااااااااااااااااااا
الفوازير سهله جداااااااااااااا
بدليل انى مش عرفت احلها
بس رقم اتنين انا عارفاها
شفتى الشطاره بقى؟

كل سنه وانتى طيبه

وربنا يرحم جدتك يارب ويسكنها فسيح جناته

mahasen saber said...

عيد سعيد عليكى وعلى كل احبابك يا سولو

ويا رب كل ايامك سعاده واعياد

Unknown said...

كل سنة و انتى طيبة يا دكتورة
و عيد فطر سعيد عليكى
و تعيشى و تفتكرى
واضح ان جدتك كان جدة كلاسيكية
من اللى بنشوفها فى الأفلام
الجدة الجميلة ديه
اصلى انا جدتى موعاش عليها خااااالص
:-(
ربنا يرحمها و يحسن ختامنا جميعاً

romansy said...

كل سنه وانتى طيبه
يا دوك
عيد سعيد مليان بالخب والخير والامان

♥نبع الغرام♥♪≈ said...

السلام عليكم

كل سنه وحضرتك طيب ما احلى الذكريات الجميله
ربنا يرحمها يارب وتعيشى وتفتكرى ياقمرى
وربنا يجعله عيد سعيد علينا وعلى الامة الاسلاميه جمعاء
مودتى

♥نبع الغرام♥♪≈ said...

مبروك اللوك الجديد تحفه ورقيق

اموووواة

اقصوصه said...

كل عام وانتم بخير

تمنياتي بقضاء عيد سعيد

ستيتة said...

كل سنة وانتي طيبة يا همسة
تقبل الله منا ومنكم رمضان
وربنا يرحم تيتة وجميع اموات المسلمين
ويرحمنا اذا صرنا الى ما صاروا اليه
ويجعل لنا ذكرا طيبا على الأرض بعد الرحيل
عيد سعيد

marmar said...

مش معنى ان العيد جه والايام الحلوه بنتذكرها وووو يبقى تطلعي عنينا على الفوازير دي :@ ايه الصعوبه دي يا بت انتي هااااااااا :@:@
كل سنه وانتي طيبه يا قمرررر وحشتيييييييييني وحشششششششششتيني ولله وبفتكرك دايما كل ما بفكر في المدونه اللي كانت مغلقه بتاعتي لظروف رخمه بس يلا الحمدلله عدت على خير المهم انا غشيت حل الفوازير من عادل ههههههههههههههههه
وعرفت اتنين منهم :d

د. ياسر عمر عبد الفتاح said...

كل عام وأنتم جميعا بخير

كل عام والأمة الإسلامية إن شاء الله منتصرة

كل عام ونحن جميعاً إلي الله أقرب وعلي طاعته أدوم

تقبل الله منا ومنكم صالح الأعمال

رحلتنا في الحياة said...

كل سنة وانتى طيبة ياسول وربنا يرحم جدته ويسكنها فسيح جناته يارب
اما للاسئلة انا معرفتش اللى واحدةوقف على الباب حتى كل متنى فلما كلل متنى كلماتنى
كل متنه يعنى تعب ضهر فضل بابها لغاية ما ضره تعبه فلما ضهره تعبه كلمته :))

مسدس صغير said...

ذكريات جميلة
كل سنة وانتى طيبة
عيد سعيد

ghorBty said...

كل عامـ وانتمـ في قائمة الابرار الخاشعين

كل عامـ وانتمـ عون للضعفاء والمحتاجين

كل عامـ والسنتكمـ تلهج بذكر الله الجليل

كل عامـ وهناكـ ملك ينادي ان الله قد جعلكمـ من المعتوقين ..

كل عامـ وانتمـ بخير ..

رحــــيـل said...

ههههههههه
عسل ياسووول انتى وجدتك
جميل قوى ان الواحد ييكون فى حياته شخصيه كده فعلا

كل سنه وانى طيبه دايما
عيد سعيد عليكى

قلم رصاص said...

كل سنة وانتي طيبة يادكتورة

وعيد سعيد عليكي وعلى الأسرة الكريمة وسائر المسلمين

عيش وعسل

رز وطماطم

ماهذه الطفولة التي ارى

هههههههههههههههههههههه

وتحية من القلب الى جدتك .. الموسوعة

وكل سنة وانتي طيبة

وبالنسبة للفوازير .. انا مش عاوز اكسب .. هسيب غيري ياخد رزقه

هههههههههههههههه

جلال كمال الجربانى said...

كل سنه وأنت طيبه والى الله أقرب
وقلبتِ علينا الذكريات الجميله
ودمتِ بحير

ليس فقيرا من يحب said...

السلام عليكم

كل سنه وانتى طيبه ياروح قلبى

عيد سعيد عليكى وعلى كل حبايبك

ربنا يرحم جدتك وجميع موتى المسلمين

وبعدين ايه الفوازير الصعبه دى

オラアルス said...

تقبل الله طاعتكم وجعلنا واياكم من هو لثواب الصيام والقيام حائز في عيد الجوائز
والله أكبر الله أكبر لا إله إلا الله الله أكبر الله أكبر ولله الحمد الله أكبركبيرا والحمدلله كثيرا وسبحان الله بكرة وأصيلا وصلى الله على سيدنا محمد وعلى آله وصحبه وسلم تسليما كثيرا

اسماء واحلام فى وجدانى said...

التعليق ده عشان جدتك ربنا يرحمها
وعلى فكرة انا كنت عايش زيك بالظبط
بمعنى انى كنت قريب جدا من والدة ماما
وطبعا اعرف كتير اوى عن الملك فاروق واللى قبله وكان فاضلى حاجات بسيط واوصل للخديوى بس مفيش نصيب

اسماء واحلام فى وجدانى said...

كل سنة وانتى طيبة

اسماء واحلام فى وجدانى said...

الواحد من زمان اوى مش بيحتل

وجت فيكى

حظك بقى

اسماء واحلام فى وجدانى said...

هو التعليق هنا بكام

وياترا خالصة الضرايب

ولا لالالالالالالالالالالالالالالالالالالالالالالالالالالا

اسماء واحلام فى وجدانى said...

فى مثل بيقولك

من عمل يعمل ولو بعد ايه حين

لالالالالالالالالالالالالالالالالالالالالالالا

ولو بعد ثوانى

والدليل

قالوله

اسماء واحلام فى وجدانى said...

حقك عليا

بس انا والله باهزر

يلا ارجعى بقى

بدل ما نقيم عليكى الحد

اسماء واحلام فى وجدانى said...

حق مين والناس نايمين

اسماء واحلام فى وجدانى said...

هانت كلها سهم واحتلك حضرتك رسمى

وساعتها مش فى اى اعتراض

من اى شخص

اظن الكلام واضح وصريح

ده قانونى وكنت افضل انه يكون ودى

سلامى لياسمين

اوى
اوى

وشذى طبعا

اوى اوى

blue-wave said...

هههههههههههههههههههه
حلوة الكام فزورة اللى فى الآخر دول
كل سنه وانتى طيبه

salma mohamed said...

تقبل الله منا ومنكم,
وكل عام وانت بخير وقرب منه سبحانه.

Darsh Basha said...

اولا كل سنة وانتى طيبة وبالف خير
وبالنسبة للاسئلة
فانا قولت اجاوب واحدة كفاية
طرقت الباب حتى كلمتنى فلما كلمتنى كلمتنى ...

دى يعنى انا خبط الباب لغاية ما ايدرى وجعتنى ..ولما ايدى وجعتنى ..هى كلمتنى

جبنا جبنا بقعت جبنا !!!
يعنى جبنا جينة وبقعت علينا جبنة

كفاية ..ويعودة عليككى الايام دايما بخير

اسماء واحلام فى وجدانى said...

اولا انا ليا حق فى المدونة دى وحق كبير اوى وتشهد على كده تعليقاتى واحتلال حضرتك عندى كام مرة اطلب منك جلوكوز وانتى مطنشة طيب على العموم انا هاهجم على المدونة دى بالليل بمعاونة القطط وهنعمل الواجب وزيادة

mohamed ghalia said...

كل سنة وانتى طيبة يادكتور
ربنا يسعدك دايما

اسماء واحلام فى وجدانى said...

حااااااااااااااااااااااااااااااضر
مفيش هجوم بالقطط مع إن والله القطط طيبة اوى وعلشان اكون جد هى مش بتحب الاذية خالص بس لو حد اتهور عليها ممكن تكون أسد من غير عقل كمان
اقرى انتى بس المعوذتين كل ليلة قبل ما تنامى علشان ربنا يحفظك من اى شىء
وباذن الله مفيش مشاكل كله يمشى بالود والاسهم بتاعتى اللى هنا تسلميها ودى وانا لسة عندى عشم بردة
ياترا سلامى لياسمين وشذى وصل ولا لسة
على العموم السلام ده امانة فى رقبتك وانتى حرة بقى

اسماء واحلام فى وجدانى said...

مدونتك من غيرك طبعا ولا حاجة لانك روحها اللى بتحركها
انا كلامى بشكل معنوى يعنى ممكن نتفاهم هى مش مشكلة يعنى

وبعدين ربنا يطولنا فى عمرك يااااااااااارب وانا سحبت الامانة اللى فى رقبتك وكفاية تبقى رسالة بسيطة اذا قدرتى توصليها يبقى خير وبركة واذا مش قدرتى مش مشكلة كفاية انى فاكرها وباسال عليها دايما واذا اذن المولى انك تشوفيها قوللها
اظن كده انا ريحتك على الاخر
الا بالحق فين العيدية

تأثير الفراشة said...

وحشتينى يا سول ، يا رب تكونى بخير

ما شاء الله بإذن الله فى الجنة و نعيمها، ربنا يكثر من أمثالها و يرزقنا جميعا حسن الخاتمة

بالنسبة للفوازير ، أنا عرفت 3 و 4
بصراحة لأنى سمعتهم زمااااااااااان ، بس ربنا يكرمك نشطتى لى الذاكرة علشان افتكرهم

رقم 3
إننا أحضرنا جبنه و وضعناها فى جيبنا (اللى فى الهدوم)

و رقم 4، إنه طرق الباب حتى كلّ متنه يعنى تعب، فلما تعب، راحت هى مكلّماه
:)

كل سنة و انت طيبة و فى أحسن حال

ملأ الله عيدكم بالسعادة
و رزقكم الحسنى و زيادة
و حبب فيكم ملائكته و عباده
تقبل الله منكم رمضان
و كل عام و أنتم بخير و إلى الله أقرب و فى طاعته أدوم إن شاء الله

عيــــــد سعيــــــد

Unknown said...

و عليكم السلام ورحمه الله وبركاته ...
هكذا أنت دائما ...حاضره البديه قارئه ما بين السطور ...و تحرقيلي موضوعاتي دائما .
اشكرك علي الزياره يا دكتوره وكل لحظه وحضرتك بصحه وعافيه .

أحــوال الهـوي said...

كل سنه و انت طيبه
و يارب تتحقق كل امانيك و تسعدي باحبابك و اصحابك

تحياتي

romansy said...

انا سايب ليكى عيديه ع المدونه
كل سنه وانتى طيبه
وان شاء الله محد حوش

yasmina said...

السلام عليكم
بجد مبسوطة باول زيارة ليا
وان شاء الله ما تكون الاخيرة
بالنسبة للبوست هو جميل اوى وحلو انك تكونى دايما فاكره ذكرياتك وتفضلى فاكراها على طول
اما بقى بالنوسبة للفوازير
لأ بصراحة دة تعقيد ومن اولها دة انا لسة اولى ثانوى يعنى بالراحة عليا شوية ههههههههههههههه
وبكل فخر معرفتش احلها
بس الغلط مش منى هى اللى ملهاش حل
مش كدة هههههههههه
ولو يعنى ليها حل اريت يكون فى البوست اللى جاى
كل سنة وحضرتك طيبة
وعيد سعيد
ياريت تقبلى مرورى وتنرينى كمان فى اى وقت

اسماء واحلام فى وجدانى said...

طيب مفيش جوايز للفوازير دى

قطة هدية

كليو كحك من غير سكر

طب حتى دعوة منك

اى حاجة

قلم رصاص said...

ربنا يعينك ويقدرك على الشغل ان شاء الله

مسدس صغير said...

كل سنة وانتى طيبة
والعائلة الكريمة
وربنا يرحم تيتا
ويرحم اموات المسلمين
ذكريات جميلة خاصة العيش ابو عسل
ههههههههه
اما الفوازير فأنا جيت متأخر
خلاص
بقى العيد الجاى
هههههههه
عيد سعيد

عطش الصبار said...

سوووووووووووووووول
كل سنه وانت طيبه
الله يرحم جدتك
الجده اللى زى دى بتزرع جوانا الاسطوره اللى بنخزنها داخل سراديب القلب ونستدعيها كلما احتاجت ارواحنا لااستراحه من قتامه الحياه انا بعمل كدا احيانا بهرب لمخزون الزكريات عشان اقوى روحى فى مواجهه جفاف الحياه دمتى بكل خير

اسماء واحلام فى وجدانى said...

نسبة الاسهم الخاصة بيا هنا 49% وانا محتاج بس سهمين فقط مش اكتر ولا اقل واوعدك حضرتك انك عمرك ما تحسى ان المدونة شخص واحد يملك 51 % لوحده وده اول شروط التفاوض

طبعا النهاردة اول ايام الشغل بعد رمضان والعيد واكيد هتكونى مضيقة شوية من حاجات كانت موجودة فى رمضان فانا بانصحك سيتك التريث فى التفكير حتى لا تتخذى قرار تاتى بسببه احتلالات غير متوقعة

والله الموفق
والسلام عليكم ورحمة الله وبركاته

تامر علي said...

تقبل الله منا ومنكم الأعمال ومبارك عليكم العيد أنتم ومن تحبون :)

فكرتيني بفوازير نيللي وشريهان واحنا صغيرين :(

تحياتي

أبو العريف said...

كل سنه وانت بألف خير

انا اول مره اجي هنا

بس مش هتكون الاخيره

بس ايه رأيك انا كنت عارف حل الاربعه

ولو جيت قبل التحديث كنت جاوبتهم


يالا مالكوش نصيب

mahasen saber said...

شغل ايه ده اليى بتعيطى عشان رايحاه

انتى بيعذبوكى فى الشغل ولاا ايه يا سوبو

طب تعالى نعيط جنب بعض بئا عشان اتلغت عندنا اجازة السبت

يا عينى

فشكووول said...

القاضى اسمه تها او من بلد اسمها تها
والمرأه التى تزوجت الراجل اللى اسمه تهاوهى امى لا تعرف القراؤة ولا الكتابه وبنت رجل آخر اسمه تها

هاتى بقى ربع جنيه

فشكووول said...

على فكره يا سول
المدونه بقت تقيله والواحد بيقعد فيها ربع ساعه وهى مش راضيه تتحرك وبتعمل حاجات غريبه والجهاز عندى كذا مره يهنج ... يا ريت تشوفى حاجه اسهل من كد
ا

نونو said...

كل سنة وانتى طيبة كتتير كتتتير

بس بصراحة انا مش فاهمة فوازيرك خاالص


سلام بقى