الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Oct 23, 2009

فضفضة ... ذكــــــــــــــــريات




يااااااااااااااااه .... الواحد رجع تانى للكلية ،

و رجع يفتكر تانى أيامه فى الكلية ....


بجد كانت أحلى أيام ...

و أحلى أصحاب ...

و أحلى ذكريات....


اه ... أصلى بدأت محاضرات التمهيدى << حقيقى مش عارفة أقول عقبالكم ، و لا بعيد عنكم ..:)


ياه لما عنيا وقعت على كل حنة فيها ،

شووووووق غريب لكل حاجة ، للمحاضرات ،

وشخط الدكاترة ، و انفجارات المعامل

و قرف الامتحانات ...هههههههههه


بجد والله أحلى أيام ، الواحد بفتكر و يقعد يضححححححححححك ،

و أحلى حاجة بجد ، كانت صحباتى ....


بجد أكتر حاجة مفتقداها هما صحباتى ، ياااااااااااه على أيامنا مع بعض ،

و أيام الامتحانات لما كنا بنعكسر فى بيت حد فينا ،

أو ليلة الامتحانات لما بنكون مع بعض برسايل على طول ...


كل واحدة مننا مرت بظروف كتير صعبة ، و وقفتنا مع بعض لحد ما كل واحدة فينا تجاوزت أزمتها


أحلامنا مع بعض ، و قد ايه بنحس ببعض أوى لما واحدة فينا تقول احساس حساه نفاجأ اننا كلنا كان عندنا نفس الاحساس


لما واحدة فينا تكون زعلانة و متضايقة ، و تحاول ماتبينش عشان ما تضايقناش ، و نلاقى نفسنا متضايقين فجأة و منرتاحش إلا لما تقول انها متضايقة و ايه اللى مضايقها و نخفف عن بعض ...


بوكيه الورد اللى عمره الوقتى سنة و 8 شهور بالظبط ، و لسه محتفظة بيه لأنه هدية من أحب الناس لقلبى ...


رسايل الحب الفظيعة اللى كنا بنبعتها لبعض :)


ذكرياتنا مع الدكاترة و المعيدين ، و اللى معظمهم بئا مسافر الوقتى .. ربنا يوفق الجميع ياااااااارب



يااااااااااه .. ياااااااااااااه .. ياااااااااااااه


و افتكر حياتنا الوقتى ، كل واحدة فى محافظتها ... أصلنا مش من مكان واحد

و بس على تليفونات ، حتى الوحيدة اللى قريبة منى ، مشوار عشان أوصلها


و كل واحدة مشغولة بشغلها و حياتها ... فين و فييييييييييين على ما بنشوف بعض

بس الحمد لله انها معايا فى الماستر ، فى نفس القسم :) ...


بجد فرحت أوى لما لقيت اللى معايا فى نفس القسم اتنين من أعز الناس لقلبى ، و الباقى علاقتى بيهم كويسة

و هنرجع لأيام الشحططة و البهدلة تانى ... و الجرى ورا الدكاترة من تانى ... :)



بأقعد افكر فى الحال الوقتى ، باستغرب أوى ....

الواحد ماكنش فاكر ان الحياة هتبئا كدا ، أتخرجت ، و أشتغلت

و مع الشغل ، بدأت الماستر ...


لأ و كنت هأتهبل و آخد شيفت فى صيدلية كمان ، بس زمايلى فى الشغل و صحباتى ربنا يكرمهم يارب عقلونى :)


و بأفكر فى حال الشباب اللى مش لاقى شغل ، أد ايه فعلا عنده حق فى شعوره بالضياع و انه مش لاقى نفسه

إذا كنت أنا ياللى بنت ، و حسيت بفرق بجد بين انك تكون عالة على أهلك ، و بين أنك تعتمد على نفسك ،

و ماتقولش لحد هاتلى حاجة << رغم انه مش فرض عليا


ما بالك بئا لو كان شاب ... و لسه مش عارف يبدأ ازاى ؟؟!!! بجد صعبة أوى


هييييييييييييييه ... والله يا ولاد مش عارفة أنا بأكتب ايه .. بس اهى فضفضة و خلاص

عشان وحشنى الكلام معاكم ... أصل أنا قلت هآخد شهر 10 دا << ماهو شهرى بئا و اعمل اللى أنا عاوزاه فيه

هو صحيح يعنى مش شهرى لوحدى ، و أخويا الكبير له نصيب معايا فيه << يوم ميلاده بكرة على فكرة :)

فقلت بئا آخده هدنة ، و أنزل لكم شوية أشعار و خواطر ... عشان كان بئالى فترة كبيرة

لكن وحشنى الكلام و الفضفضة ...


طبعا عارفة ان محدش رابط الكلام ببعضه ، و لا حتى أنا ، و مش عارفة أنا كتباه ليه ،

بس اهو اللى جه فى بالى ...



معلش إنى مقصرة فى حقكم فى الزيارات و التعليقات ، بس بدأت مذاكرة بئا ، و الدكاترة بيكلمونا كأننا بروفيشنال حقيقى ...

مش طلاب دراسات عليا ... يعنى فيت فى كل حاجة ... ربنا يسترررررررررررر


و ادعولى معاكو كتيييييييييير كتير ..

ياللا سلام


24 comments:

أحــوال الهـوي said...

تعرفي بعد التخرج رحت الكليه مرة واحده
لما كنت باقدم لابني فيها
بس حسيت بكل اللي قلتيه
ربنا يوفقك في دنيتك و عملك و تكوني اسرتك الصغيرة

تحياتي

Sweet Violet said...

و هتفضل اجمل الذكريات بجد بالنسبة ليا هى الايام دى
^_^
كل سنه و اخوك طيب

وحشانى موووت على فكرة
v_v

وردشان smilyrose said...

الف مبروك يا قمر

ربنا يعينا جميعا

ربنا يكرمنا يارب

انا بدات انا كمان التمهيدى

فى نظم معلومات الحاسب

ويارب يفوقك ويوفقنا

كل سنة واخوكى بخير

ودايما بخير

♥نبع الغرام♥♪≈ said...

السلام عليكم

اولا كل سنه واخوكى بالف خير لان اخويا كمان عيد ميلاده ربنا يحميهم يارب ويحفظهم
وبجد ما احلى الذكريات
ربنا يكرمك يارب ويفرحك
ويعزك
دمتى بكل خير
انوسه

romansy said...

كل واحد فينا
يا سول
بيعيش ذكريات جميله وبيتمنى انها ترجع تانى لان الماضى مهما كان حلو او قاسى
مش بيرجع بس احنا نستفاد منه كتير
كل حاجه حلوه عمرها قصير

marmar said...

ازيييييييييك يا سولتي يا سكره انتي
عامله ايه يا قمر ويارب ربنا يوفقك يارب يا حبيبتي في الماستر وعقبالي شدي حيلك وذاكري كويس وانا هدعيلك من قلبي
وحشاااااااني بجد يا بت انتي
خلي بالك من نفسك

ليس فقيرا من يحب said...

السلام عليكم

ربنا ييسرلك امرك ويكرمك يارب

ويوفقك تصدقى تعب الدراسه ده بيبقى

اجمل تعب فى الدنيا والله وحشتنى الدراسه وقرفها من تانى بس مكنش ليا مزاج السنه دى اقدم

ربنا يكرمك يارب وكل سنه واخو حضرتك

طيب يارب

تقبلى تحياتى

فى حفظ الله

Darsh Basha said...

ياااة ..ناس وحشتها الجامعة
وناس عايزة تخلص من الجامعة

وبعدين الف مبروك لاخوكى
انا برضة انا واختى فى الشهر دة
مش عارف البلد كلها عيد ميلادها فى الشهر دة ولا اية


على العموم ..دلوقتى بقى اقدر اتفشخر قدام شلتى واقولهم انا بدخل مدونة واحد بتحضر دراسات عليا
ربنا يكرمك
ويوفقك دايما يارب

mimi said...

همس الروح ( عارفة طبعا مين بيقوللك كده) ... ههههه

أولا ... الف مبروك وعقبالنا يارب مفيش أجمل من التعليم صدقيني

اللي لسة مش اتخرجوا هيقولوا ميمي دي مجنونة .. بس أنا خلصت ليسانس ودبلومة وهاخد بكالريوس تاني إن شاء الله ... يارب

طموحي ماجيستير ودكتوراه في الإعلام


ثانيا ... المدونة كده شكلها نيو لوك جميل أوي ..

ثالثا ... ربنا يوفقك في دراستك يارب

وأحلي حاجة في الدنيا الذكريااااات

كل يوم وأخوكي بخير ... يوم ميلاد سعيد علي الأسرة كلها
تحياتي يا سكرة

Anonymous said...

ربنا يوفقك ياااارب .. وتحققي كل اللي بتتمنيه ..:)

مسدس صغير said...

فعلا ايام الجامعهة مش هتتعوض
انا بحب ايام الجامعة بما فيها الامتحانات
بس ياريت يلغو ليلة الامتحان
اصلى بكرهها جدا
هههههه
ذكريات حلوة
ربنا يجمعكو ديما على الخير
وربنا يوفقك

صوت من مصر said...

فكرتينى والله مش هفتكر حاجه من دول خالص
لانى بروح اقعد على القهوه واللعب طاوله

قلم رصاص said...

ما اجملها أيام والله

أيام الجامعة ..وما اجملها الصداقة الحقيقية والزمالة الحقيقية اللي كلها صدق وحب لوجه الله

وفضفضي فضفضي ما احنا موريناش غيرك بقى ههههههههههههههههههه

وكل سنة واخوكي طيب وعقبال 100 سنة

---------

"ماهو شهرى بئا و اعمل اللى أنا عاوزاه فيه

هو صحيح يعنى مش شهرى لوحدى ، و أخويا الكبير له نصيب معايا فيه << يوم ميلاده بكرة على فكرة :)

"

ههههههههههههههههه

انا عارف شهرك .. وده تزوير في أوراق رسمية .. ويلا خلي المحاكم تشوف شغلها

هههههههههههههههه

اتمنى لك التوفيق يادكتورة سول

وربنا معاكي في الماستر

الحال من بعضه وربنا يوفقنا جميعا

دمتي في حفظ الله

اسماء واحلام فى وجدانى said...

ازيك يا همس
كل سنة وانتى طيبة
وكل يوم واخوكى
على راى حد قالها قبلى
وهو بخير
انتى قلتى فى اشعار وخواطر طب فين هى
ده الشهر قرب يخلص
وطبعا لامة نوفمبر يجىء هتقولى انا كنت باتكلم عن اكتوبر
طب فاكرة الجلوكوز فين هو
لو حصل والشهر عدى كده الـ 49 سهم
هيبقوا 50 اللهم بلغت اللهم فاشهد
والسلام عليكم ورحمة الله وبركاته

Hanan Elshafey said...

ربنا يوفقك ياااااااااااااارب
وايام ايه اللي وحشتك دي يا شيخه امتي نخلصوا بقي
يااااااااااااااااااااااه
اخلص انا كده
ولا هعتب هناك تاني وحشاااااااااااااااني جدا جدا
وربنا يوفقك يارب وتحققي كل احلامك

حياتي كلها لله said...

السلام عليكم

سول الجميلة
أخبارك إيه بجد وحشاني كتييييييييير
أنا مبسوطة جدااا لأن كلامك ده معناه إني أقدر أشوفك في الكلية يوم مش أنتي صيدلية إسكندرية برده

بجد ياريت أقدر أقابلك
منتظراكي
سلمي

كيكى عوووووو said...

عاملة ايه وحشانى
عقبالى زيك كدة يااارب بس ما اظنش هوصل دراسات عليا
انا اخرى مستنية سنه التخرج ع ما تفرج!!!

لو عرفوه هيحبوه said...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم للحمله لمعرفه باقى حياه الرسول صلى الله عليه وسلم

ذو النون المصري said...

لو سافرتي اكيد هتحبي اكتر ترجعي لذكريات زمان

mohamed ghalia said...

ربنا يعينك وبالتوفيق فى الى جاى

فارس عبدالفتاح said...

يا لليل أنت علي شاهد يا لليل هل تهنئ لواجد اشكوا المراقد للوسائد أم اشكوا الوسائد للمراقد

أنا بيني وبين هواي أبعاد تضل بها المراقد جعلوا قواعد للحياة فهل الحياة لها قواعد

يطاردني الأسى وتحيطني الذكريات فإلى متى والأوان قد ولى وفات

شغلتني همومي وودعتني الرحمات تائهاً حيران هائم ولهان ما بين حين آت

رابطة هويتي اسلامية said...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

سجود said...

السلااااام عليكم
ازيك
اسفه جدا علي التأخير انا كنت مشغوله وغبت عن التدوين مده مش قصيره بالنسبه ليا
وانا اصلا ليسا في الكليه وبتمني اخلص بس عارفه ان الايام ديه جميله وان انا هشتاق اليها بعد ما افقدها

أم أحمد المصرية said...

كلامك اللي بتقولي عليه مش مترابط ده اثر في جدا و فكرني بايااااااااااااااااام زمااااااان
لما كنا صغيرين :))
ياه فعلا ايام الكليه من احلي ايام العمر التي لا تعوض و اصدقائها لن تجدي مثلهم انا حتي الان لسه اصحابي من ثانوي و كليه هما هما اصحاب الشغل دول زمايل مش اصدقاء بجد اوعي الحياة تأخدك بعيد عن اصحابك اللي بجد
ربنا يوفقك و ينجحك و يسعد ايامك