الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Oct 30, 2009

عـبــــاد الرحـمـن ..+ لـقــــــــاء الجـبــــابرة



كيفكم يا شوباب؟؟؟ أخباراتكم؟؟؟

بادئا ذى بدء طبعا ، لازم أقولكم و بالبونط العرييييييييييض

إن ان شاااااااااااااء الله يوم الجمعة الجاى هيكون لقاء الجباااااااااابرة ....<< ضحكة شريرة جداااااا



لقاء المدونين فى المنصورة ... طبعا تحت رعاية ماما صبرها يارب ، و بابا مسدس صغير ..ههههههههههه

مع لفيف من الأهل و الأخوة من المحافظات الشقيقة بقيادة بت خيخة ، بس مش اى كلام :)


و طبعا بما اننا نعيش عصر الحرية و الديموقراطية ، فبابا مسدس صغير هيعلن الاحكام العرفية بكرة مع ماما صبرها يارب

و ستكون القوانين حاسمة و حازمة لردع أى محاولة لعدم المجئ ... و للى هييجوا بردوا ، عشان تعرفوا ان معندناش تفرقة عنصرية :)


و من هنا و من مكانى هذا بأناشد الاخوة الاعزاء فردا فردا انهم ييجوا بجد و بلاش الحجج اللى مالهاش معنى، و ياريت تعملوا حسابكم من قبلها بكام يوم و تفضلوا تاكلوا تاكلوا ... تاكلوا تاكلوا ... عشان هنجيب مصاصين دمااااااء ، قصدىىىىىىىىى هيكون فى حملة تبرع بالدم ... فمش عاوزين أى خسائر بشرية ... ماااااااشى؟؟


اياك اياك ماحدش ييجى ، أنا اللى هأعلن الاحكام العرفية عليكوا ... سامعين؟؟؟، أنا عاوزة الناس تتخض فى المنصورة ، تقول ايه دا؟؟ التتار هجموا؟؟؟ و النور يقطع بئا << طبعا عشان نوركم هيغطى على الكهربا ... و اييييييييييه هيييييييصة ههههههههه


خلاص؟؟؟ مش هأقبل أى أعذار ... التفاصيل هتلاقوها عند صبرنى فى خلال اليومين الجايين ان شاء الله

.................................



ندخل بئا فى موضوع النهاردة ،


عارفين لما بنحب حاجة اوى ... بنتخانق عليها و نقول اييييييييه.؟؟؟ دى بتاعتى ... صح؟؟

حتى الاطفال لما نحب نعاكسهم على لعبة ليهم مثلا نقولهم دى بتاعتى ، يقوم يبص لك شذرا كدا و يقولك لاء دى تاعتى


كمان لما شخص مثلا يأثر فينا ، مثلا مدرس أو دكتور فى الجامعة أو غيره ... بنكون فرحانين اوىىىىىىىىى لما يشاور علينا و يقولنا دول طلبتى ...


او لما يكون شخصية مشهورة مثلا ، أو كل الناس بتحبها ، تخيل لو ليه ابن مثلا هيكون فخور اد ايه ان اسمه قرن باسم والده .. و يمشى يتمختر كدا و يقول انا فلان الفلانى ... حاسين الاحساس الحلو دا ؟؟!!!



تخيلوا بئا لما ربنا يخص فئة معينة من الناس ، و يقول عليهم " عباد الرحمن "

يااااااااه أنا أمة الرحمن ، و دا عبد الرحمن ...ياااااه شعور تانى خاااااالص ... أنا بتاع ربنا ، ربنا يقول عليا ان انا بتاعه ... لا و دونا عن جميع اسماؤه يختار الرحمن ، الصفة اللى لا يمكن حد يتصف بيها إلا هو ...


كمان لما ربنا يختص مبانى معينة و يقول عليها " مساجد الله " اكيد اكييييييييد هتكون البيوت دى فيها حاجة غير بئيت البيوت ... و قيسوا على كدا بئا كل حاجة نسبها ربنا لنفسه .... والله بجد كفاية الواحد يحس كدا بمعية ربنا معاه ، كافى انه يحس انه بتاع ربنا و محدش له سلطان عليه الا ربنا بسسسسس


طب تعالوا نشوف ليه الفئة دى بالذات ربنا قال عليها " عباد الرحمن " و خص الرحمن دون غيره من الأسماء !!!


يقول الله تعالى " و عباد الرحمن الذين يمشون على الأرض هونا ( شوفوا الوصف ... ماشيين محدش حاسس بيهم ، مش بيعملوا مشاكل فى كل مكان يروحوه ، مش بيكرهوا الناس فيهم ، مكان ما يروحوا تلاقى أرواحهم طايرة معاهم و محببة الناس فيهم ) و إذا خاطبهم الجاهلون قالوا سلاما ( و حتى إذا جه حد يتشاكل معاهم و لا قل ادبه عليهم ... قالوا سلاما يعنى اتكلموا بطريقة سلمية ، ضحكوا فى وشه قالوا له كلمة حلوة ، مصوا غضبه ، و خلوه يحترمهم ... تخيلوا انتوا كدا لو رايح تتشاكل مع حد و قام ضاحك فى وشك و قالك كلمة حلوة ... يا ترى هيكون ايه رد فعلك!!) * و الذين يبيتون لربهم سجدا و قياما ( أصلهم بشر بردوا ، و أكيد مخالطتهم بالناس هتأثر فيهم بالسلب ، فيقوموا يجروا على ربنا ، يارب خلينا أنقياء زى ماحنا ، خلينا كويسين زى ماحنا ، مش عاوزين نبئا وحشين و لا نعامل الناس زى ما بيعاملونا ، و يقعدوا يعيطوا لربنا ... يارب ، أصل مالناش غيرك ، قلوبهم رقيقة قوى بين ايديه ، فبيخليها رقيقة للناس كلها ) * و الذين يقولون ربنا اصرف عنا عذاب جهنم إن عذابها كان غراما * إنها ساءت مستقرا و مقاما ( دايما يوم القيامة فى بالهم ، و عارفين ان ربنا حق عدل ، اى شئ غلط هيعملوه او اذى يسببوه للناس ربنا هيقتص منهم يوم القيامة و ياخد حق اللى ظلموه بعذاب فى النار ، و هما عارفين انهم مش حملها ، فدا كمان بيخليهم يعاملوا الناس برحمة ، و حتى لو غلطوا فى حقهم شوية ، مفيش مانع نسامح و نرجع تانى ... أهو نستحمل شوية فى الدنيا و لا اننا نتعذب بنار الاخرة ) * و الذين إذا أنفقوا لم يسرفوا و لم يقتروا و كان بين ذلك قواما ( يعنى عايشين حياتهم وسط ، ياكلوا و يشربوا و يلبسوا زى ما لاناس بتاكل و بتشرب و تلبس ، لا بيتكبروا عليهم فيسرفوا فى مصاريفهم ، و لا يخلوا منظرهم رث و يصعب على الناس و يقولوا اهو اللى يقرب من ربنا كدا ... لا ، بين ذلك قواما )* و الذين لا يدعون مع الله إلها آخر ( إزاى أصلا بعد ما عرفوا ربنا كدا ، و هو اختصهم بنسبهم له ، يقوموا يخافوا من حد غير ربنا ، و لا يجروا على دا و دا أصل من غيرهم ماعرفش أعيش ؟؟!!!) و لا يقتلون النفس التى حرم الله إلا بالحق ( إزاى أصلا ناس قلوبها طايرة كدا و تقدر تؤذى حد فضلا عن انها تقتل ؟؟؟ إلا طبعا لو حد من حدود ربنا ، حدود ربنا فوق الكل و لازم تتنفذ ، لكن غير كدا ... مايقدروش) و لا يزنون ( إزاى يتجرؤوا على حرمة من محارم الله ، و هما عارفين ان ربنا بيغضب لانتهاك حرماته ... يقدروا يغضبوا ربنا؟؟؟) *..................... و الذين لا يشهدون الزور ( مش بيخافوا من حد إلا ربنا ، فليه يشهدوا زور؟؟ هيخافوا من مين؟؟ و لا دول أصلا ناس ماتعرفش الكره ، فهيكون فى قلوبها كره لمين عشان تؤذيه ؟؟؟ و حتى لو مش بتحب حد تقدر ربنا يقولها قولوا شهادة الحق و هى تقول شهادة زور ؟؟؟ ) و إذا مروا باللغو مروا كراما ( حتى لو غصب عنهم قعدوا فى مكان فيه معصية ، و لا ناس مش كويسة ، تلاقيهم بيترفعوا انهم يعملوا زيهم ، و اى فرصة تناسب انهم يمشوا بيمشوا ، كرامتهم محفوظة و تخلى اللى حواليهم يحترمهم ) * و الذين إذا ذكروا بآيت ربهم لم يخروا عليها صما و عميانا ( دا ده كلام حبيبهم ، تتخيلوا انهم ممكن يسمعوه و يطنشوه ، أو مايهتموش انهم يفهموا هو بيقولهم ايه؟؟ بالعكس ، دول هيجروا يسمعوا هو بيقولهم ايه ، هيسمعوه بكل احساسهم و جوارحهم ، هيعملوا اللى بيقولهم عليه )* و الذين يقولون ربنا هب لنا من ازواجنا و ذرياتنا قرة أعين ( يااااااااااارب خلى أزواجنا و أولادنا قرة عين لينا لما نشوفهم هما كمان بيحبوك ، و بيعملوا اللى تقولهم عليه ، و تخليهم شفعاء لينا يوم القيامة و تجمعنا بيهم فى الجنة ... من كتر الخير و الحب اللى جواهم عاوزين كمان أقرب الناس ليهم يكونوا معاهم فيه ، اصل حتى لو هما متنعمين و حد من اللى قريبين منهم دول مش بيطيع ربنا و لا بيحبه هتلاقى حياتهم متنغصة ، و يابنى دا ربنا بيحبك ..معقول ماتحبوش زى ما بيحبك ... يابنى طيع ربنا عشان تهنا فى حياتك ... يابنى و يابنى ... و تلاقيهم رغم راحتهم فى قربهم من ربنا ، لكن زعلانين ان اللى حواليهم مش بنفس الدرجة ... بجد ما شاء الله عليهم ) و اجعلنا للمتقين اماما ( انانيين فى حبهم لربنا ، و دا حقهم ... عاوزين يستأثروا بأعلى درجة ، و يكونوا هما أقرب حد ليه ، غذا كنا احنا فى حياتنا العادية لما بنتعلق بحد بنكون عاوزين نستأثر بيه ، ما بالكم بئا و دا حب ربنا ... يارب خلينا احنا اقرب حد لييييك ، حتى المتقين ، عاوزين نكون احنا اللى مقدمتهم ... يااااااااااه )*"


بجد تخيلوا ناس قلوبها كدا ... أكيد حقهم لما ربنا ينسبهم لنفسه انه يقول عليهم "عباد الرحمن " دون غيره من الاسماء ، لأن زى ماهو من الصعب جداااااااااا نوصل لشخص بالرحمة دى ، فربنا نسبهم للاسم اللى مابيتوصفش بيه غيره ...


و شوفوا بئا جزاءهم عن ربنا قال عنه ايه " أولئك يجزون الغرفة بما صبروا ( أيوا ، أصلهم شافوا كتييييير أوى ، شافوا اذى ، قابلوا جاهلين ، قابلوا ناس معندهاش قلب بتقتل ، ناس بتشهد زور ، مروا بلغو ، و منهم اللى ولاده عاصيين ... و رغم كدا ثبتوا و صبروا ، فكان جزاؤهم الغرفة ... اللى أهل الجنة بيبصوا عليها زى ماكانوا بيبصوا للنجوم لما كانوا على الأرض ..) و يلقون فيها تحية و سلاما ( فاكرين لما كان الجاهلين بيكلموهم كانوا بيقولهم ايه ؟؟؟ مش كانوا بيقولوا سلاما ؟؟!!..... اهو جه الوقت اللى الملايكة نفسها ترد لهم اللى كانوا بيعملوه فى الدنيا .. وزيادة على السلام التحية .. :) ) * خالدين فيها حسنت مستقرا و مقاما ( فاكرين لما كانوا بيقولوا ربنا اصرف عنا عذاب جهنم إن عذابها كان غراما ... إنها ايييييييييييه؟؟ ساءت مستقرا و مقاما ، مش كدا؟؟... شوفوا بئا ربنا اللى بيقول فى وصف الجنة ... حسنت مستقرا و مقاما ، ياترى هيكون فيها ايه ؟؟ و الحياة فيها شكلها ايه ؟؟ مالا عين رأت و لا أذن سمعت و لا خطر على قلب بشر )" الفرقان


ربنا ياااااااااااااااااارب يجعلنا من " عباد الرحمن " اللهم آآآآآآآآآآآمييييييييييييييييييييييييين ، و يرزقنا الغرفة برفقة النبيين و الصديقين و الشهداء و الصالحين و حسن أولئك رفيقا ، و يمتعنا بلذة النظر إلى وجهه الكريم ...

كفاية عليكوا بئا ... عارفة إنى طولت

ياللا سلاااااااام


26 comments:

أحــوال الهـوي said...

ازيك يا دكتور

ربنا يبارك في لقاء المدونين في المنصورة و انا حاضر معاكم بروحي و السلام امانة لصبرني و مسدس لانهم تولوا مهمة شاقه لتجميع الاخريين

و عباد الرحمن الذين يمشون على الأرض هونا
من الايات التي احبها و اتمني ان اكون من عباد الرحمن

اححي فيك التبسيط في الشرع بارك الله فيك و لك

تحياتي

وحي القلم said...

السلام عليكم
ازيك يا دكتورة
ياااااااااااااااه كان نفسي احضر اللقاء دا
بس طبعا دا من 80000000000000 المستحيلات

---
اللهم اجعلنا من عباد الرحمن

♥نبع الغرام♥♪≈ said...

عااااااااااااااااا

انا من المنصورة بس مش نفسها ابعد بساعه ونصف كده


همووووووووووووووووووت واحضر بقا

♥نبع الغرام♥♪≈ said...

ربنا يقدم الخير يارب

والاحوال تكون كويسه واعرف اجى ادعيلى بس اللهى يكرمك

♥نبع الغرام♥♪≈ said...

يارب يكرمك خير

وربنا يجعلنا من عباده الصالحين

وجزاك الله كل الخير يارب وربنا يسعدك يارب

وعلى فكرة انتى وحشتينى قووووووووووووووووووى
وعاوزة اكلمك ميل
عشان ابقا اطمن عليكى

اموووووووووووووووووووووووواة

د. ياسر عمر عبد الفتاح said...

كثير بقف قدام الأيات دي
ايات في قمة الروعة
زيها زي أيات سورة المؤمنون
الأيات اللي بتصف عباد الرحمن

ربنا يجعلنا جميعاً منهم

يارب يكون لقاء مثمر وجميل

سجود said...

يارب يجعلنا من عباد الرحمن اللي بيحبهم ويدخلهم الجنه
اللهم استخدمنا ولا تستبدلنا
ربنا يباركلوا ف اللقاء واعتبروني معاكم واتعاملوا علي كده
هههههههههههه

قلم رصاص said...

السلام عليكم ورحمة الله وبركاته

انا فاهم انتوا بتعملوا كل ده ليه

بتخططوا تجروا رجلي تحت مسمى تبرع بالدم
والحقيقة انكم عاوزين تخطفوني وتخدروني
وتعملولي عملية على النت وتاخدوا مني
مدونتي حبيبتي ههههههههههههههههه

بس عاوز اقولك على حاجة :

انتوا اللي عملتوا مني مدون .. أيوووه
انتوا اللي عملتوا مني مدون .. روحي للبلوجر وقوليله : قلم ازاي اتعلم يخطف مسدس .. ويخبط ع الإزااااااااااز

هههههههههههههههههه

طبعا يزيدني شرف اني اجي اللقاء ان شاء الله .. ومش هقول حجج .. لأني نفسي احضر فعلا .. دا اللقاء على أرضنا وملعبنا وفي وسط جمهورنا .. ازاي صاحب الأرض ميحضرش ؟! أمال مين اللي هيتحشى اجوان هههههههههههههه

وكمان نفسي اوي اتبرع بالدم ..تصوري عمري ماعملتها ؟! اه والله .. بس مش بخل لا عدم انسانية مني ؟ لا ابدا والله .. بس المشكلة انه مجاش فرصه تخليني اتبرع .. واهه جت بس ربنا يسهل يارب بس واعرف اجي حقيقي

----------

وبخصوص لعب العيال ده

هل انا ممكن اجي كده واقول لك وانا بشاور على مدونتك : دي تاعتي زي العيال الصغيرة

ههههههههههههههههه

بوست جميل جدا

واللهم اجعلنا من عبادك المخلصين اللذين اصطفى واحشرنا مع سيد الخلق اجمعين الرسول عليه الصلاة والسلام في جنة عرضها السموات والأرض

دمتم في حفظ الله

كيكى عوووووو said...

يعنى هتروحى لقاء
ماشى ماشى
انبسطى ياستى ع قد ما تقدرى
وربنا يجعلنا من عباد الرحمن

رحــــيـل said...

زى الفل
لولولولولولوي
اخيرا هيتعمل لقاء زى ده فى المنصوره احمدك واشكر فضلك يارب ان الموضوع ده حصل قبل مااموت هههه
خبر حلو بجد
اكيد ان شاء الله جايه لو مثلا يعنى موقعتش على رجلى زى كل مره بابقى هموت واحضر لقاء جامد طحن كده
بلغينى بالميعاد الاكيد عشان اعمل ايفينت على الجروب وانزل على المدونة
يارب يوم الجمعه يجى بسرعه
:))

Anonymous said...

سول الغالية
ربنا يبارك فيكى يابنتى
وربنا يبارك فى لقائكم وحنكون معاكم بقلوبنا
اللهم اجعلنا جميعا من عباد الرحمن ونتصف بصفاتهم
دعواتك الدائمة ياسول لاتحرمينى منها

مسدس صغير said...

ماشى يا دكتور
متشكرين جدا على الشغل الجامد ده
ان شاء الله هنعلن بكرة عن التفاصيل
خلاص المعاد الجمعة القادم لا محالة ان شاء الله
اما بقى لباقى الترتيبات هنعلن عنها
كله يعمل حسابه ع الجمعة ويعمل حسابه على دم بس الدم مش اجبارى يا جماعة انا عن نفسى ههرب
ههههه
والواد قلم رصاص شايفه جايب سيرتى
متلعبش فى عداد الكهربا لو سمحت
احسن تتكهرب
ههههههه
هتيجى يعنى هتيجى ان شاء الله

اما بقى عن عباد الرحمن فنسأل الله أن نكون هم
دائما ما نستفيد من موضوعاتك الشيقة
بساطة الاسلوب والادلة تجعلنى متشوق للقراءة
جزاكم الله خيرا

Darsh Basha said...

امين يارب العالمين
اللهم جعلنا من عباد الرحمن

لقاء مدونين وبالمنصورة
احمد يارب
ان شاء اله معاكم

بس اوعى حد يفكر ياخد من دمى
لانة هيتعب نفسة على الفاضى
هيقعد يدور مش هيلاقى .

على العموم ..المكان فين
وتقولوش بنك الدم
على العموم ..لو ملقتوش حد ياخد دمكوا
انا عندى يعنى متخفوش

واللى فصيلتة
a موجب
يجهز نفسة

اة عايزين نعرف المكان والزمان
وهناكل اية بالظبط

mimi said...

رغم ان البوست طويل

نفسي أخلصه للأخر

أنا بعد إذنك هاخده عندي أقراه براحتي

تحياتي

أم أحمد المصرية said...

اللهم اجعلنا من عباد الرحمن يارب العالمين كلمات جميلة جدا بجد
------------------
بالنسبة للقاء مدوني المنصورة سلمي لي عليهم

خواطر شابة said...

اللهم اجعلنا واياكم من عباده الصالحين
تقبلي خالص تحياتي

د.خالدأمين said...

ازيكيايادكتوره




ايه الاخبار





ياربتكونيبخيريارب


وايهحكايه اللقاء ده زامتيهيكونوفين انشاء الله


مشعارف انتيكاتبهالتفاصيل ديوانا مقريتهاش والااهي عمومااناهرجعتاني




ربنايرب يكرمك



ربنا يجعلنا واياكيمن عباده اللذيناختصهم بالنسبهاليه


عباد الرحمن

مااحلاهامنصفه




وفعلا انامعراي احوالالهوي


ان منالايات الجميله واللتي لها وقع خاص تماما علي النفس


ايه وعباد الرحمن اللذين يمشون علي الارض هونا واذا خاطبهمالجاهلون قالوا سلاما






ادعي لنا يا سول

Kiara said...

سووووووول

لا صوووووووووووول هه بث

وحشتيني يابت اوي

اولا ان شاء الله اللقاء هيكون حلو اوي

اما بالنسبه للبوست

فبجد انا بعتبره رساله من ربنا

ومش تقوليلي ليه هقولك بيني وبينك بئا

بس يااااااااااااارب يجعلنا من عباد الرحمن ويهدينا ويصلح شأننا

د/عرفه said...

سلام عليكم
ازيك دكتورة

كان نفسى احضر اللقاء بس اظن انه صعب جدا
لظروف الامتحانات وكده رغم ان المنصورة قريبة جدا


بالنسبة للموضوع ايات عباد الرحمن فعلا من أكتر آيات القرآن اللى بتأثر فيا وربنا يجعلنا منهم

فارس عبدالفتاح said...

كان نفسي اكون في مصر وروح المنصورة مش عشان اتبرع بالدم لالالالا طبعاً لانه مفيش دم اصلاً لكن عشان اتفرج على البنات اللى هتيجي


هع هع هع هاي

يمكن اللاقي عروسة ... مع اني متأكد مسبقاً اني مش هلاقي اللى انا عايزة بس مش هنخصر غير الموصلات

يله زي بعضه من جمله الخسائر

على فكرة حكاية الشكولاته رحت اتقدم لوحدة فقالولي خد معاك شكولاته عشان العروسة بتحبها اوي

رحت جبت شكولاته سويسري محشية بندق ولوز وعين جمل بـ 350 جنية وبعد ما قعدنا ومتفقناش اطريت اسيب علبه الشكولاته

وده كانت اول خسارة في موضوع الجواز وتوالت بعدها سلاسلة من الخسائر المادية الجسيمة


هع هع هع هاي

مش بقلك مش هتلاقي دم اصلاً


على فكره انا مش بخيل بس كل المصاريف دي من غير فايده


يعني عملت زي الاطفال بيضيعوا فلوسهم على البومب



وواسفاه على الشكولاته

هع هع هع هع هاي

فارس عبدالفتاح said...

طبعاً

هتسألي طيب هو بيضحك ليه المغفل ده


اقلك بيضحك علي نفسه البت اخدت الشكولاته ووحده خدت حمل جمل فاكهة ووحده صعيديه خدت خروف صاحي وقفص خضار و 2 كيلوا سمنة بلدي وكرتونه فاكهة

لما اتخرب بيتي وبعدين خت على قفايا

البنات ضحكوا عليا واخدوا فلوسي

هع هع هع هع هاي


عمرك شفتي مغفل زي كده .. بس اعدك انه مش هيحصل الكلام ده تاني ولو مش هتجوز طول حياتي

خلاص .. لن اشرب من نفس الكاس مرة ثانية

وسوف تكون عوده المنتقم

رابطة هويتي اسلامية said...

السلام عليكم ورحمه الله وبركاته

جزاك الله كل خير على موضوعك الهام

اسال الله ن يوفقك لكل ما يحبه ويرضاه

نتمنى مشاركتنا النقاش حول شعار الوطنى من اجلك انت !!

رابطة هويتي اسلامية said...

السلام عليكم ورحمه الله وبركاته

جزاك الله كل خير على موضوعك الهام

اسال الله ن يوفقك لكل ما يحبه ويرضاه

نتمنى مشاركتنا النقاش حول شعار الوطنى من اجلك انت !!

فشكووول said...

ازيك يا سول

طب وحاعرفك ازاااااااى؟

غروب said...

جميل جداااااا

اتمنى بجد اقدر اجى انا نفسي اشوف ناس كتير اوووووى

بس يومها عندى تدريب الحقيقه مش عارفه هيخلص الساعه كام

بس ان شاء الله احاول

ادعيلي

Nostor Azzuro said...

امين يارب
نكون من عباد الرحمن
قولى امين
يالا