الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Nov 10, 2009

على هامش اللقاء




البوست دا يعتبر تكملة للبوست اللى فات ...

بس أنا لقيته طويل اوى فقلت أقسمه على اتنين ...

هنا بئا هأقول على حاجتين أثروا معايا و كنت عاوزة أكتب عنهم ، لأن كل حاجة فيهم موضوع مهم جدا ، و بتأثر فى حياة كل شخص فينا ..



الحاجة الأولى كانت فى حوارى مع عسقول ، و طبعا بما إن أنا و عسقول بنتحاور و نتناقش فلابد ان الحديث هيكون عن المذاهب ، و الرأى و الرأى الآخر ، و فقه الإختلاف ...


لكن أنا هنا هأتكلم بشكل عام ، و هأركز أكتر على نقطة الاختلاف ، لأن دى سنة ربنا فى خلقه ،

ربنا ماخلقش ابدا اتنين زى بعض ، دايما فى نقط التقاء و نقط اختلاف ... و الشطارة مش فى انى اكون نسخة طبقة الاصل من فلان او فلانة ، أو انى انتهج خطى الجماعة الفلانية و لا العلانية ... لكن الشطارة إنى اقدر اتأقلم و اتكيف مع اختلافات الاخرين ، سواء كانوا افراد أو جماعات ...

و بردوا هأكون فى حاجة إن التانيين يعاملونى على نفس الأساس ، مش يعاملونى كأنى شئ منبوذ ، أو غريب و كل فعل من أفعالى يقابل كاتهام موجهه ليا ، و عليا إنى أدافع عن نفسى ...

و أعتقد إن كتير مننا بيواجه دا فى حياته سواء فى اعماله اليومية او معتقداته او افكاره ...


عشان كدا حبيت إنى أركز على كذا نقطة كدا ، أولا إن هدفنا فى أى فعل أو عمل أو حتى اعتقاد هو البحث عن الحق و الصح ، مع اضافة قليل من المرونة فى تقبل اخطاء الاخرين لأنهم أكيد بردوا مش قاصدين انهم يعملوا الغلط عن عمد ... ثم توجيه النصيحة لهم باسلوب مهذب مايجرحهمش ...


و بردوا لما آجى أشرح وجهة نظرى فى نقطة معينة ، بلاش دايما أطرحه فى شكل نقد لوجهة نظر فلان ، أو تصحيح لوجهة نظر علان ، و إنما هأتكلم بشكل مطلق ، و هأضيف عليها منظورى انا للأمر ...


إنما لما دايما أتكلم بس عشان انقد ، او اقول ان فلان على غلط و الصح كذا ، دايما هتلاقى فى نفس الشخص التانى دا شئ منك ، و عمره ما هيسمع كلامك -حتى لو صح- من منطلق العند ليس إلا ...


عارفة ان كلامى كتير هيحس انه صعب فى تطبيقه ، و دا لأنه بيعتمد على ثقافة شعب كاملة عاوزة تتغير ، لكن فى الاول و الاخر كل نفس بما كسبت رهينة ، و الواحد مش هيتحاسب غير عن نفسه ، فياريت نرتقى بنفسنا ، و صدقونى بتكتسبوا احترام المختلف معاكوا قبل اللى موافقكوا فى الرأى ...



أما بئا الحاجة التانية فهى جملة قالتها إيمان ( سما مصر ) و احنا فى آخر اليوم على المركب ، قالت :" ما الدنيا حلوة أهى ، أمال ليه دايما شايفنها وحشة و كئيبة ؟؟!! من زمان أوى الواحد ماخرجش مع نفسه ، ليه مابنخرجش مع نفسنا نفسحها و نشوف الدنيا ؟؟!!! بدل ماحنا قافلين على نفسنا و عمالين بنشتكى بس !!! "


حقيقى يا إيمان ماتعرفيش جملتك دى فضلت أفكر فيها أد ايه ، و لحد الوقتى لسه مأثرة معايا و كل شوية بأفكر فيها ...


هو إحنا ليه فعلا شايفين الجانب الوحش فى الحياة ؟؟ ليه مش نحاول نمتع نفسنا رغم كل السلبيات و المشاكل اللى بنقابلها فى حياتنا ؟؟؟

دايما خانقين نفسنا و محملينها فوق طاقتها ، حتى صحوبيتنا لنفسنا نسيناها ، و بردوا مستنيين الحد اللى ييجى يخرجنا من مود الحياة و يفسحنا و يضحكنا و يثبت لنا ان الحياة لسه بخير !!!!

حتى دى بخلنا على نفسنا بيها؟؟؟!!!


معظم الناس إن لم يكن كلها تلاقيها عمالة بتكتب عن مشاكل و هموم ، و بتقرأ بردوا فى مشاكل و هموم ، و بتسمع بردوا مشاكل و هموم ، و مابتبصش بردوا إلا لمشاكل و هموم !!!!

لحد ما الدنيا بالنسبة لها بئت كتلة من المشاكل و الهموم ، و إن جت لحظات الفرح ، فهى لحظات وهمية – فى رأى الاشخاص – و مش بيحاولوا حتى يستمتعوا بيها ، و إن ضحكوا شوية يقولوا : خير اللهم اجعله خير ، الواحد ضحك كتير ، ياترى مصيبة ايه اللى جاية فى السكة !!!



يا جمااااااااااااااعة تفائلوا بالخير تجدوه ، و بطلوا كآبة شوية بئا لو سمحتوا ، و حاولوا صاحبوا نفسكوا شوية ، و اسمعوا بتشتكى من ايه ، و حاولوا خرجوها من اللى هيا فيه ... يعنى مش معقول قاعدين تسمعو لدا و دا و تقرؤوا لدا و دا و تكتبوا عن دا و دا و ناسيين نفسكوا كدا ؟؟!! ... بصراحة يبئا عندها حق لما تعلن عليكوا حالة من العصيان متمثلة فى التمرد و الكآبة ، و مش بعيد تلاقيك كمان شوية بتكره نفسك ....

تفاؤل شوية لو سمحتوا ...

ايوا ... ايوا ...



كدا مظبووووووووووط :)

و ياللا أشوفكم على خير ... سلاااااااااااااام


20 comments:

بوبو said...

صباح الفل على الناس الحلوين
ايه الجمال دا؟ اصحى من النوم بدري تعبانة ادخل الاقي التفاؤل والكلام الحلو دا؟
بصي يا ستي.. انتي قلتي ان رفض الاختلاف هو ثقافة مجتم ودا حقيقي.. نادر اوي لما تلاقي حد بيقبل اختلاف الاخرين عنه مش بس ف الراي لكن في كل حاجة.. الدين.. التفكير.. اللبس.. الهوايات ..حاجات كتيرة اوي ، والغريب ان الناس بتنسى ان عدم تقبل الاخر دا مش من الدين في شيء
وبالنسبة للمشاكل فمتشغليش بالك.. ادخلي عندي وانتي تلاقي الحياة وردي
صباحك سكر

فاتيما said...

صباح الورد علىعيونك
يا أحلى همس للروح
كلامك ألف صح يا هسمتى
تعرفى ؟
كان ليا زميل ايام الجامعة
الله يصبحه بالخير بقى
كنت طول الوقت عندى مشاكل
و آجيلهم ضاربة بوز
و مكشرة و معيطة و بتاع
و بعدين ايام تانية
ية تبقى الدنيا روقان و عادى ..
برضو يلاقينى زعلانة
فمرة قالى إنتى ايه حكايتك
يا بنت انتى ؟
حزينة ليه علطول كدا
قولتله الدنيا مليانة هم
لما تيجى حاجة تفرحنى بجد ..هفرح
قالى إنتى عايشة الدنيا
بالعكس !!!
الواحد المفروض يبقى سعيد
و راضى طول الوقت
لحد ما تيجى حاجة تعكننه .. فيزعل
متمشيش عكس الاتجاه يا فاطمة
قعدت افكر فى جملته قووووى
و حسيت إنه فعلا .. عنده حق
انا عايشها بالعكس ليه؟؟
ليه النكد دا
الواحد يفضل متمسك بالخير
و الفرح لحد ما ربنا يبتليه
و حتى دى كمان يحاول يكون قدها
و ربنا يعينه
كلامك مع عسقول
فى موضوع كبيييير قوى
الواد دا دماغه متكلفة
و آخر تمام
دماغ علم مش حاجة تانية
خالص حبى ليكى
و الحضونة و البوسة أهو حاجة

فارس عبدالفتاح said...

اهاهاهاهاهاااااي

تعرفي يا سول اللى أنت بتقوليه ده هو شيئين من ضمن جوهر الصراع البشري في الحياة الدنيا


طبعاً فيه أشياء كثيرة جداً لا حصر لها ولا عدد وكلما فكر الإنسان في أن يقضي عليها واحده تلك الأخر حتى يصل إلى درجة الصفاء والنقاء التي ترجين ... خرجت له مشاكل أكثر منها عدداً واعقدها وأشكلها نوعناً ممل تم القضاء عليها سواء باستخدام العقل لتسهيل حركة الحياة وجعل الرفاهية مطلب أو المطالبة بالمبادئ والأخلاقيات أن تسود في العام أو البحث في المادة للوصول إلى كيفية وجودنا على هذا الكوكب وكيف نشأ الكون ومن خالقه وكيف خلق وما من هو الله سبحانه وتعالى وكيف شكله وما مدى قدرته وكيف تكون الحياة الأبدية في الآخرة ... إلى ما لانهاية من الأسئلة التي لن يتم الإجابة عليها لأنها ببساطة في عالم غير العالم الذي نعيش فيه عالم آخر غير عالمنا هذا لا نستطيع أن يدركه ونعيه بحواسنا أو بعقولنا المحدودة بعوارض المادة والتي لم تستطيع أن تصل إلى جوهر المادة فكيف بعالم ما وراء المادة

من أسئلة لم لان يتم الجواب عليه ومصاعب لان يستطيع الإنسان أن يحلها ولو وصلة إلى أرقى التكنولوجيا والتقنية الخيالية التي نشاهدها في الأفلام الأجنبية التي تعتمد على الاستخفاف بعقول المشاهدين


المهم طلب الكمال في كل شيء هذا مستحيل بل محال لأنه ببساطة وسوف أجاوب عليك من الكتاب ولن أجاوبك من الفلسفات الغربية حتى لا ندخل في حسبة حيص بيص ونتوه من بعضنا


يقول الله سبحانه وتعالي " لقد خلقنا الإنسان في كبد " ويقول أيضا " ولولا دفع الله الناس بعضهم ببعض لهدمت صوامع وبيع وصلوات ومساجد ذكر في اسم الله كثيراً ولينصرنا الله من ينصره أن الله قوياً عزيز "

يعني العناء والتعب هذه صفة الحياة الدنيا ولا جدال في هذا كذلك الاختلاف والتدافع أي الاصطدام أو الصراع أو القتال ليصل إلى أعلى درجات الاختلاف بطريق الدم هو من نواميس الله في هذا الكون وهذا أيضاً لا جدال فيه


لان الله يمحق الظلم والضلال والتخلف والضعف والسكون بالحركة الدائمة إلى الأفضل حتى تصل إلى ذروتها في نهاية الحياة الدنيا ويبدأ الحياة الأخرى

فالاختلاف والتصارع والتصادم والقتال أي الدفع هو ناموس كوني ولان يستطيع ابن ادم أو بني البشر أو الإنسان حتى في أصفى إنسانيته إذا وبعد أن نستثني الشيطان وهوى النفس وضغوط الحياة لن يصل إلى أن يرتفع فوق مشاكله واختلافاته

لأنه إذا وصل إلى هذا الحد فهو ليس إنسان بل خلق آخر يختلف عن بني ادم الذي خلقه الله وجعل جميع الأضداد في داخلة وجعله في هذا الصراع لكي يختبر قدرته وعناءه بان يرتقي فوق ماديته ليصل إلى هدى الله الذي هو خلاصه من هذه المشاكل والصعاب والصراعات والتدافع في الآخرة


فلا تطلبي ما هو ليس من نواميس الله في كونه بل اطلبي أن نحاول أن نكون بشر فقط ولا نكون أرقى من بشريتنا فالحب والكره والشجاعة والجبن والكرم واللؤم

كلها من صفات الإنسان وليست من صفات الملائكة

قلب ارهقته الاحلام said...

عارفه ياسول فعلا سيماهم علي وجوههم

بجد الروح الجميلة دي انا شفتها ولمستها فيكي من اول لما شفتك

بجد حسيت انك حد جمييل اوي ومتفائل اوي وضحكتك حلوة اوي بجد

حسيت ان مش اول مرة اقابلك واني عرفاكي من زمان بجد

بجد مبسوطه اوي اني شوفتك


بوست جمييل اوي

وفعلا احنا مختلفين ولازم نكون مختلفين لان ربنا خلقنا كده

مينفعش نبقي نسخ من بعض والا كانت حياتنا مع بعض هتبقي غريبه اوي سبحان الله

تصدقي فعلا سعات بقول لنفسي هي المصيبه ال جايه اتأخرت ليه ؟ ههههههه

مش تشاؤم ولا سوداوية بالعكس بضحك

وبعيط بحزن وبفرح بس تحسي ان الوجع جواكي اخد مكان بين كل ده ومش عارفه تخلي حاجه تانيه تحتل المكان ده

برغم ان يمكن كل ال بيشوفني لايمكن يتخيل ان جوايا سعات بيبقي حزين

وسعات ف اشد المواقف ألم بالنسبالي ببقي عامله زي الصخرة

لدرجه ان ال حواليا ممكن يفتكروا معنديش دم :)

بس طبعا الدنيا حوالينا فيها حاجات كتير جميله

احنا مش شايفنها علشان مش عاوزين نشوفها ومغميين عنينا عنها

بوست رائع زيك بجد

يارب تكوني بخير دايما

romansy said...

اد ايه حاسس ان اللقاء كان جميل قوى
واد ايه كانت رحله ممتعه فى المركب
بس احنا قافلين على نفسنا لاننا لسه خايفين اننا نواجهه الحياه
خايفين اننا نشوفها
ولما نشوفها ونفرح بيها بنحس انها جميله دايما ياريتنا نبص ليها من الجانب الحلو دايما

رحــــيـل said...

شوفى ياسول ياقمر

كل واحد مش شايف غير رأيه وبس لان هو اللى ده اللى مريحه
المشكله فعلا مش اننا نختلف المهم نختلف ازاى؟

جملة ايمان حلوه قوى ومعاكى حق فى كلامك
بس اوقات بنكون اضعف من احنا نتغلب على حزننا مش بنقدر نهرب منه او نواجهه غير بعد وقت معين نكون هدينا فيها
ربنا يروق بالك ويسعد قلبك وينور ايامك دايما يااااااااااااارب

'' حطام (ك) بقايا '' said...

كل اللي قبلي كفوا ووفوا بجد
عجبني اوي كلام زميل فاتيما ايام الجامعة
فعلا لما جيت افكر لقيت نفسي عايشة عكس الاتجاه فعلا بس داخليا
اما قدام الناس فتلاقيني اكثر واحدة بتتكلم عن التفائل و عدم الياس و كده
يمكن لاني مش عايزة حد يعيش حالة الاكتئاب و التشاؤم اللي عايشاها
ويمكن لاني عارفة اني غلطانة و مش عاوزة حد يغلط زيي

وفعلا لقيت اني ظالمة قوييي
انا ظالمة نفسي قويييي
بعدبها و بانبها كثير و معيشاها في زوبعة من الالام و الاشجان و الاحزان
حسيت اني مقصرة مع نفسي كثييير
دايما بوجه ليها بس رسائل الحزن و الهم و الغم عمري ما فكرت اقولها لا تياسي يا نفسي و لا تحزني
فكله في ميزان حسناتك
لا تياسي فلك رب كبير و رحيم
نسيت ان ربنا الاعلى اللي هو الخالق و هو الملك رحيم بعباده
ليه العبد اللي هو مجرد عبد لله مبيرحمش حتى نفسه

بجد بلقائاتكم شوقتوني و زدتوا من ارادتي في اني ازور مصر
ربنا يخليكم لبلدكم يا شعب يا مصري
بجد انتوا عندنا هنا في المغرب قدوة في حبكم لبلدكم
لسه قبل امبارح كنا بنتكلم انا وصحبتي عن ماتش كورة قالت لي لو كان اللاعبون المغاربة بتوعنا بيحبوا بلدنا زي حب المصريين لبلدهم كنا فيين

ربنا يوفقكم و يكرمكم يارب
وكونوا على يقين انكم كنتم خير سفرا لبلدكم الحبيبة

بحبكم في الله

د. ياسر عمر عبد الفتاح said...

كلام مظبووووووووووط
حلوة دوز التفاؤل دي

ودي الحاجة الوحيدة اللي منخافش فيها من الأوفر دوز

أحــوال الهـوي said...

انت عارفه ليه
لاننا بنخاف نفرح
اذا ضحكنا نقول اللهم اجعله خير لاننا في وسط سعادتنا بنخاف من الغم
و لو ضحكنا بنخبي احسن نتحسد



لازم اوافق علي كلامك لانك صوت العقل

تحياتي

Anonymous said...

:)

♥نبع الغرام♥♪≈ said...

كلامك جميل قووى يارب دايمآ متفئلين كده على طول
وحشتينى يا ارق سول قوووووووووووووووووى

يارب يطمنى عليكى
اموووووواة

فارس عبدالفتاح said...

اشكرك جزيل الشكر يا سول والله بعتز بمعرفتك

لكن عفواً

من قال لك ان الصحابة لم يختلفوا

ومن قال لك انهم لم يحتكموا الى حد السيف ارجعي المصادر الاولى لنشأت الدولة الاسلامية بعد موت الرسول وخلافهم على الامور السياسية والفكرية حتى احتدم الامر ووصل الى القتال في الفتنة الكبرى بين على كرم الله وجهه ومعاوية وكان جل جيش علي كرم الله وجهه من الصحابة والتابعين وايضا كان هنا في جيش معاوية الكثير من الصحابة والتابعين ولكنهم لم يكون بمقدار الذين كانوا مع على كرم الله وجهه

وكان ايضا هناك من هم على الحياد واثروا ان يكون من الحياد السلبي بالسكوت


وكذلك في اخذ الخلافة لابي بكر وكذلك اخذ الخلافة لعمر وكذلك اخذ الخلافة لعثمان رضوان الله عليهم اجميع

الم تسمعين بخلاف ثقيفة بني سعد

ارجوا ان تدققي في مصادرك وانا اعلم انه توجد لديك كتب ومراجع فانظري فيها


مع خالص الشكر والعرفان


فارس عبدالفتاح .. قومي عربي

فارس عبدالفتاح said...

عفواً

سقيفة بني ساعدة وليست سعد

لو عرفوه هيحبوه said...

السلام عليكم ورحمه الله وبركاته

جزاكم الله كل خير

تابعونا فى الحمله ومع بدايه الشيقه فى الدعوه للاسلام

يسعدنا تواجدكم

كيكى عوووووو said...

(***
ادينى منشكحة اهو

فشكووول said...

السلام عليكم سووول

تحياتى

من وجهة نظر الاختلاف مع الاخر واحترام هذا الاختلاف واحترام وجهة نظر الآخر ادعوك للاشتراك فى الحوار والاختلاف مع الاستاذه امل فتحى عزت (ن)يمكن ربنا يفتح عليكى بكلمتين حلوين يا اما الاقى رد حاسم عندك مع ن يا اما الاقى رد قد يحسم هذا الجدل الدائر .. عشان هى ومواطن مصرى مقطعينى على الاخر ومش ملاحق عليهم واى حد يدخل النقاش يمكن يكون عنده حاجه حلوه ولا كلمتين حلوين .

سجود said...

انا اصبحت متفائله يارب بقي نكسب في ماتش مصر والجزائر 4 صفر

blue-wave said...

متفق معاكى تماما

اسماء واحلام فى وجدانى said...

الشريط يسف فى تعليق فى اتنين مش فى تلاتة

وبعدين احان قلنا مفيش ضرب نار عشان البلوجر طيب من هنا احب اقولك ان الـ 49 % بقوا 49 ونص
ومفيش كلام تانى
انا تعبت لحد ما هديت البلوجر من اللى حصل هناك وطبعا انتى عارفة ان المنطقة اليومين دول مشتعلة يعنى اى بمبة ممكن تعمل حرب اهلية

علي محـمــــــد said...

ألسلام عليكم
بالعمد أتيت هنا لأتصفح القناعات حتى وإن مضى عليها أشهر أو سنوات وفوجئت بما اتفقنا عليه هنا ،، نعم اننا متفقين اذا قارنا ماكتب هنا بما أفكر به أنا ، هي مفاجأه جميله أن أجد مايقنعني هنا بتواريخ قديمه :) .
..........
ربنا ماخلقش ابدا اتنين زى بعض ، دايما فى نقط التقاء و نقط اختلاف ... و الشطارة مش فى انى اكون نسخة طبقة الاصل من فلان او فلانة ، أو انى انتهج خطى الجماعة الفلانية و لا العلانية ... لكن الشطارة إنى اقدر اتأقلم و اتكيف مع اختلافات الاخرين ، سواء كانوا افراد أو جماعات ...

و بردوا هأكون فى حاجة إن التانيين يعاملونى على نفس الأساس ، مش يعاملونى كأنى شئ منبوذ ، أو غريب و كل فعل من أفعالى يقابل كاتهام موجهه ليا ، و عليا إنى أدافع عن نفسى .
.........
المتأملون يعانون المشكله ذاتها :)
^_* هل تعرفين استحالة تطابق البصمات ؟ :)
.........
بالنسبه لتفاؤل أقول
ربما أكون قد ذكرت لك في احدى تعليقاتي السابقه مثال جميل وهو في حال افتراض وجود شخصين احدهم متفائل والأخر متشائم ! وعاشو مائة عام في هذه الدنيا بدون نجاح يذكر لأيٍ منهم ! وتأملنا كيف مارس كل واحد منهم حياته وبأي روح عاشها ؟! سنجد أنهم لم يحققوا شيء أبداً لكن المتفائل كان يستمتع وهو سعيد بتلك السنوات الطويله رغم عدم تحقيق ما تمناه والسبب هو تفاؤله فقط :) .. اما المتشائم فعاش نفس السنوات لكن بمراره والم وهم وربما تشائمه يكون قد ضيع عليه الكثير من فرص النجاح التي قد تكون اتيحت له ولم يستثمرها والسبب في هذا تشاؤمه :( ! .. اذاً نستنتج من هذا المثال ان المتفائل حتى وان لم يحقق نجاحاً في حياته الا انه قد عاش حياةً سعيده وان المتشائم عاش نفس عدد السنوات تحت ضغط عصبي ومزعج والسبب تشاؤمه ، وبهذا نصل لنتيجه رائعه أو أسلوب حياة مميز اذا حاولنا ان نستفيد من ذلك المثال فالحياه كلُ منا يراها بمنظروه الخاص وبحدود محور عينه فقط سواء كان ضيقاً ذلك المحور ام واسعاً وهو انعكاس لتركيبته النفسيه .. وبهذا أستطيع أن أجزم بأن لدي القدره على اسعاد نفسي أو إحباطها بكل بساطه بشرط أن أجيد إدارة أفكاري كما أريد :).
في أمان الله