الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Nov 13, 2009

هيا بنا نصطــــــــــــــاد



" جواذب الطبع الى الدنيا كثيرة ، ثم هي من داخل ، و ذكر الآخرة أمر خارج عن الطبع ، ثم هى من خارج و ربما ظن من لا علم له أن جواذب الآخرة أقوى ، لما يسمع من الوعيد في القرآن ، و ليس كذلك ، لأن مثل الطبع في ميله إلى الدنيا ، كالماء الجاري فإنه يطلب الهبوط ، و إنما رفعه إلى فوق يحتاج إلى التكلف .
و لهذا أجاب معاون الشرع : بالترغيب و الترهيب يقوي جند العقل . فأما الطبع فجواذبه كثيرة ، و ليس العجب أن يَغلب ! إنما العجب أن يُغلب . "



طبعا محدش فاهم حاجة !!... مش مشكلة


تعالو اقولكم الأول حكاية العنوان .. و حكايته ان أنا و انتمتينى لما كنا نقعد نذاكر و نزهق شوية تقوم واحدة فيهم تقولنا " هيا بنا نصطاد " و تفتح كتاب صيد الخاطر لابن الجوزى ، و نصطاد من الخواطر ما شاء الله لنا ان نصطاد :)


الكتاب دا بالنسبة لى بجد علمنى حاجات كتير أوى ،

أزداد يقينى فعلا ان النفس البشرية واحدة ، فطرة واحدة فعلا ، و احنا اللى بايدنا نخليها حلوة أو وحشة ... حسيت انى مش لوحدى بافكر فى حاجات كنت شايفاها غريبة و باخاف احكى عليها لحد يفتكرنى مجنونة ، لا فى ناس فكرت فى كدا من قبلى ، و نفس الهواجس و الافكار فكرت فيها بردوا ...


و لما يكون الشخص دا حد زى ابن الجوزى ، بيداعبنى شعاع الأمل ، و أحس إنى لسه فيه فيا أمل ....


بأحس أد ايه الناس دى كانت فاهمة صح ، و أد ايه احنا اللى فاهمين غلط ، الناس دى عاشت حياتها لأنها فهمت ان مش مطلوب منها أكتر من انها تعيش انسانيتها و بشريتها ، و احنا ظلمنا نفسنا لما افتكرنا اننا لازم نكون ملايكة عشان نعرف نعيش ...


طولت عليكو معلش ، بس أنا استفضت لأنى فعلا حسيت الكتاب و خواطره اوى ...

و قررت انى اكرر معاكو نفس الحكاية ، و كل شوية ابئا اخدكو رحلة صيد :)



و المرة دى أصطدت لكم خاطرة يمكن بتمس كل واحد فينا ، و يمكن لأنى بردوا كنت فاهمة غلط ، وهو صحح لى الفهم دا ،


ندخل على الفريسة على طول ...قصدىىىىى الخاطرة : -

بيقول " جواذب الطبع إلى الدنيا كثيرة " يعنى فى حاجات كتيرة جدا بتشدك للدنيا من شهوات و ملذات و متع و غيره ...

" ثم هى من الداخل " يعنى أصل الجواذب دى من داخل فطرتنا ، حاجة من جوانا بتشدنا ليها و تخلينا نسعى ليها ...

" و ذكر الآخرة أمر خارج عن الطبع " يعنى مش من ضمن فطرتنا اننا نفضل ليل نهار نفكر فى الاخرة ، و نخاف منها و نسعى ليها ...

" ثم هى من خارج " يعنى دايما فى حد او حاجة هى اللى بتفكرنا بالاخرة ، محاضرة أو درس سمعناه ، او مشهد شفناه ، دا اللى يفكرنا بيها ، إنما غير كدا .. تايهين فى دنيتنا ، و مطالبها ...

" و ربما ظن من لا علم له أن جواذب الاخرة أقوى ، لما يسمع من الوعيد فى القرآن " فعلا – من لا علم له – و دا اللى بيخلي كتير مننا مش عارف يعيش او كاره نفسه ، لأنه فاكر ان لازم يكون كل تفكيره فى الآخرة ، بس مش عارف ، و تفكيره متجه للدنيا ، و لما يقرأ عن وعيد ربنا فى القرآن عن اللى عايش حياته للدنيا و ناسى الآخرة يجيله اكتئاب ، و الحكاية مش كدا خالص ، و اعتقد اتكلمنا عن النقطة دى قبل كدا ... فاكرين و لا نسيتوا؟؟

" و ليس كذلك " يعنى الأمر مش كدا خاااااااااااااالص ...

" لأن مثل الطبع فى ميله إلى الدنيا ، كالماء الجارى فإنه يطلب الهبوط " يعنى سعينا للدنيا و طلبنا ليها و سعينا لمطالبها ، زى المية اللى نازلة فى شلال ... شايفين انسيابيتها بتبئا عاملة إزاى ؟؟!!! ...

" و إنما رفعه إلى فوق يحتاج إلى التكلف " يعنى تذكرنا للآخرة و عملنا ليها زى ما نكون بنرفع المية عكس اتجاه سقوطها ، فهى تقيلة على النفس ... محتاجة مننا مجهود عشان نروضها على كدا ...

" و لهذا أجاب معاون الشرع بالترغيب و الترهيب يقوى جند العقل " يعنى عشان كدا آيات الترغيب و الترهيب فى القرآن ، عشان تديك القوة الدافعة اللى تخليك قوى كفاية انك تشد المية عكس التيار ... تخليك مش ماشى تبع هواك و خلاص ، لا تخليك تفكر بعقلك ، و بالتالى هتقدر توازن و تعرف ان الاخرة هى الأبقى ، و تبذل مجهود عشان توصل لها ...

" فأما الطبع فجواذبه كثيرة ، و ليس العجب أن يَغلب ! إنما العجب أن يُغلب ." فالنفس و هواها بتميل للدنيا و بالتالى هتلاقى ميت حاجة بتشدك ليها ، و لما هواك يغلبك ما تتعجبش ... لأن دا الطبيعى ، إنما العجب فعلا لما تقاوم نفسك و تتغلب عليها :)



ها .... إيه رايكم فى رحلة النهاردة؟؟؟


أظن محتاجين حد فاهم كدا ، عشان يفهم احتياجاتنا و يفهمنا اننا مش غلط لما نطلب حاجة من حاجات الدنيا ، بس بردوا يقولنا إننا مش مخلوقين عشان كدا بس ... لا لازم نقاوم شوية عشان نوصل لبر الآخرة .. اللى هو بر الأمان ...


مش كدا و لا ايه؟؟؟؟

و ألقاكم فى رحلة صيد اخرى ان شاء الله ...

سلااااااااااااام



22 comments:

BoBo said...

صباح الفل
حلوة اوي رحلة الصيد دي.. بس انا على فكرة باعتباري خريجة دار علوم فهمت الكلام من قبل ما تشرحيه وبصراحة انتي شرحتيه حلو اوي.. يا ريت تكرري رحلات الصيد دي كتير

واحد من العمال said...

السلام عليكم

رحله صيد جميله ورائعه
بس لازم مننساش الموت وان رحلتنا فى الحياه هى رحله الى ما هو أفضل وأعظم كمسلمين محطتنا الأخيره هى الجنه ولازم نتذكر ولازم مننساش محطتنا الأخيره أبداً
ثم اننا منذ لحظه ميلادنا بنعيش رحله الموت حولنا وأيضاً بموت خلايانا المستمر وبتتولد جوانا خلايا جديده
ثم تموت
وسلام بقى أحسن مستعجل

ودمتِ بخير وقناصه

Sweet Violet said...

سوووووووووووووووووووول
جميلة رحلة الصيد
على فكرة بقى وحشااااااااااااانى موت ياوحشة انتى
فينك بقى هه هه
يارب تكونى بخير و ياااااارب تطمنينى عليك

بســـمة انور said...

موضوع جميل جدااااا

ورحله صيد ممتعه

romansy said...

صباح الخير على اشطر صياده
اخبار الدرر ايه
رحله جميله
يا دوك
بس معرفش انك شاطره فى كل حاجه حتى الصيد والشرح انتى مدرسه ولا دكتوره
ولا ايه بالظبط
دايما منتظرين صيدك الجميل

كيكى عوووووو said...

احسنتى الاصطياد

اسماء واحلام فى وجدانى said...

همس الروح
الحقيقة ان مواهبك كترت اليومين دول
بس انا مش كنت اتوقع انك بتصطادى كمان بس مهما عرفنا عن النفس البشرية بردوا مازالت مجهولة





وزى ما بيقولوا فاضلك نص واكون شريك

'' حطام (ك) بقايا '' said...

الله
رحلة صيد جميلة قوي
بجد اسلوبك حلو قوييي

في انتظار الرحلة الاتية

sookra said...

صباح الخير
حلوه الفريسه بتاعه النهارده
وانا الحمدلله فهمت الفريسه دى النهارده
ياريت نخرج رحلات صيد كدا كتير
تحياتى

احساس طفلة محبة للرومانسية بس واقعية said...

الله يا سوووووووول
جميلة اوى الرحلة
دى مطلعتناش من زمان لية ؟
دا حتى فى كتير مننا بيحبوا الصيد

ربنا يبارك فيك
البوست حقيقى جميل
دمتى بكل خير
تقبلى مرورى

smilyrose said...

السلام عليكم

اخبارك يا صاحبة القلب القلق على

دائما معلش انا تعباكى دائما

بس اتعلمين ما اجمل ما تتصيدين

وما اجمل ما تحصلين عليه من رحلة صيدك

جميلة جدا وجميل ما تعلمته منك

اكرمك الله دائما بروحك الجميل

ملحوظة نفسى اشوفكم بقى

أحــوال الهـوي said...

الله يفتح عليكي و يكرمك

عجبتني حكاية يلا نصطاد و الجميل ان يعين الصاحب صاحبه علي الخير و المنفعه

جزاكما الله خيرا و رزقكما الخير عاجله و اجله

تحياتي

ستيته حسب الله الحمش said...

ما شاء الله
اختيار رائع
وصيد ثمين
سلمت يداك
وجعله الله في موازين حسناتك

الأحــــــ إيناس ــــــزان said...

رحلة روعه بجد

انتى رائعة
وحشششششتينى قووووووووووووووى

تحياتى

قلم رصاص said...


السلام عليكم

احييكي يادكتورة عى اختيارك الجميل والله

فعلا رحلة مفيدة جدا وننتظر المزيد

دمتي في حفظ الله

blue-wave said...

هوا انا مفهمتش حاجه علشان غبى ولا علشان تفكيرى كله فى ماتش الجزائر بكرة؟؟؟

sakayar said...

ربنا يبارك ف حضرتك يا أستاذة
رحلة مفيدة عملت رفريش للنفس ف أقل من 5 دقائق
حقاً كتابات ابن الجوزي وابن القيم بتودينا لرحلات بعيدة كأنك بين السحاب ترى الحياة من أعلى وبتدور بينا بين التفاؤل واليقين وبين التفتح الذهني والعمل والهمة العالية
ربنا يبارك ف حضرتك وجزاكم الله خير على التدوينة والاصطياد الغني بالفوائد

mohamed ghalia said...

الكتاب فعلا تحفة
ومش اى حد بيقدر يحس الكلمات دى
ربنا يسعدك دايما

فارس عبدالفتاح said...

فقد زل آدم عله السلام وهفا ، وعصى ربه وغوى ، وغره عدوه وخدعه خصمه ، وعيب باختلال عزمه وسكون قلبه إلى خلاف ثقته ، هذا وقد خلقه الله بيده ، واسكنه في دار أمنه ، واسجد له ملائكته ، ورفع فوق العالمين درجته ، وعلمه جميع الأسماء بجميع المعاني ، ولا يجوز أن يعلمه الاسم ويدع المعنى ، ويعلمه الدلالة ولا يضع له المدلول عليه ، والاسم بلا معنى لغو ، كالظرف الخالي ، والأسماء في معنى الأبدان والمعاني في معنى الأرواح ، واللفظ للمعنى بدن ، والمعنى للفظ روح ، ولو أعطاه الأسماء بلا معانٍ لكان كمن وهب شيئاً جامداً لا حركة له وشيئاً لا حس فيه ، وشيئاً لا منفعة عنده . ولا يكن اللفظ اسماً إلا وهو مضمن بمعنى ، وقد يكون المعنى ولا اسم له ، ولا يكون اسم إلا وله معنى . فإذا زعمت أن الله تبارك وتعالى علم آدم الأسماء كلها بمعانيها ، فإنما تعني نهاية المصلحة لا غير ذلك ، هذا آدم هو الشجرة ، وأنت ثمرة ، وهو سماوي وأنت ارضي ، وهو الأصل وأنت الفرع ، والأصل أحق بالقوة والفرع أولى بالضعف . فلست أسالك أن تمسك إلا ريثما تسكن إليك نفسك ، ويرتد إليك ذهنك

م/ الحسيني لزومي said...

ممكن اقدر اقول زي يوسف وهبي ما الدنيا الا رحة صيد كبيره بدلا من مسرح كبير
-----------------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك

Ibrahimsamir said...

دراسة ماجستير تتناول المدونات المصرية
بعد التحية،اسف للخروج عن مضمون التدوينة فى التعليق أنا اسمى إبراهيم سمير أعمل صحفى بمجلة الإذاعة والتليفزيون وأقوم بعمل رسالة ماجستير تحت عنوان "استخدامات الشباب المصرى للمدونات ومنتديات النقاش الإلكترونى على الإنترنت.. دراسة مسحية" وكما يظهر من عنوان الدراسة أنها تتعلق بالمدونات المصرية والتى ينشئها مدونون مصريون ولقد اخترت المدونة الخاصة بكم لتكون من ضمن المدونات التى يتم تضمينها بالدراسة ليتم دراستها وهناك جزء بالدراسة يتعلق بالقائم بالاتصال وهم المدونون المصريون ولذلك قمت بتصميم استبيان للتعرف على أنماط ودوافع استخدام المدونون المصريون لمدوناتهم واتمنى ملئ استمارة الاستبيان المرفقة مع الرسالة وهى الجزء الأهم بالدراسة واتمنى المساعدة فى دقة الإجابة للأسئلة حرصاً على دقة النتائج. والاستبيان يتكون من مجموعة من الأسئلة المتعددة الاختيارات يقوم المدون باختيار الإجابة الصحيحة وهناك أسئلة يمكن اختيار أكثر من إجابة وهى الأسئلة التى يرفق بها عبارة (يمكن اختيار أكثر من بديل) وهناك أسئلة يمكن أن تضيف الإجابة التى تراها من وجهة نظرك. وبعد الإجابة على الاسئلة تضغط على ايكونة submit.
ولقد ارسلت لك على الايميل الخاص بك الاستبيان ولكن لم يصلى الرد ارجو أن تدخل على الرابط الخاص بالاستبيان وتجيب عليه وهذا هو الرابط
http://spreadsheets.google.com/viewform?formkey=dHFZMENoU194OGpza0RzRUpaeXRWV1E6MA
ولك منى وافر التحية
إبراهيم سمير
صحفى بمجلة الإذاعة والتليفزيون
تليفونى 0128460141
ibrahimsamir@hotmail.com

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت