الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Nov 17, 2009

لـعـلـه خـيـــــــــــر



احساس غريب اوى لما تحس إنك مش عارف هو فى ايه بالظبط؟؟؟

هو دا حلم و لا كابوس؟؟


أمل بيشدك للشئ دا ... لكن مش عارف ، ياترى هو دا الطريق الصح ؟؟ و لا كان مفروض تروح له من طريق تانى !!!


و عايش الحلم و ماشى فيه ، و سعيد لأنك حاسس انك ممكن تحقق الشئ دا ، لكن فى وسط الحلم بتخاف ليكون كابوس و تصحى على الحقيقة الصعبة ...

و يرجع يراودك الأمل و يخليك تمشى على اعتبار انه حلم و ماشى فيه ، و بعدين تخاف ليكون كابوس ... و هكذا


و فجأة فى وسط الحلم .. تصحى على أرض الواقع ، لتكتشف انه مكنش الطريق أصلا ، يعنى لا ينفع يكون حلم و لا كابوس .. ماكنش ينفع يشغل تفكيرك أصلا ...


صحيح ممكن تزعل شوية ، بس مش سخط و غضب على حكمة ربنا ، بالعكس دا مفيش حاجة بتخليك تحس بثقة شوية ساعتها غير لما تقول من قلبك اوى " أنا واثق فيك يارب ، و عارف انك مش هتكتب لى الا كل خير "

بس يمكن الزعل دا لأنك ضيعت وقتك فى طريق مش طريقك ، أو يمكن الأمل فى شئ مش وقته الوقتى !!!!... الله أعلم


بس أحلى شئ بجد ، لما تحس من قلبك اوى ان ربنا معاك ، و تقعد تفكر و تقلب الامور و تشوف فعلا ان الخير كان فى اللى حصل ، و تتعلم من اخطاءك ... و تفكر ألف مرة قبل ما تاخد قرار معين ..

الكلام دا رجعنى لبوست كنت كاتباه من أكتر من سنة ، كان عن القدر و إزاى ممكن فعلا حاجات كتير ظاهرها شر و باطنها كل الخير ... أسيبكم مع البوست بعد بعض الإضافات البسيطة ....


"طبعا كل واحد فينا فيه اللى مكفيه ، بس فعلا والله اكتشفت ان فعلا زى ما ربنا ما قال " إنا كل شئ خلقناه بقدر "

فعلا مافيش شئ ربنا قدره هباء ، و لا خلقه و نساه – حاشاه سبحانه –


لكن احنا اللى عشان نظرتنا قاصره ، و أملنا و طموحنا على أدنا ... فمش بنشوف غير اللى بيحصل ادام عنينا

لو شايفينه خير ... يبئا الحمد لله ربنا معانا و بيحبنا

ولو شايفينه شر ... يبئا ربنا بيعاقبنا و مش بيحبنا


لكن فعلا لو نظرنا للامور بنظرة بعيدة شوية هنكتشف ان كله خير ...

حقيقى أكتر حاجة بأقف قدامها فى الموضوع دا ...

هى قصة سيدنا موسى و الخضر – عليهما السلام –


أول موقف ليهم لما سيدنا الخضر خرق السفينة ...


دى مورد رزق للمساكين دول ، و هما عملو فيهم معروف انهم ركبوهم فيها عشان يعدو البحر ، و رغم كدا اول ما وصلو سيدنا الخضر خرقها . .. أنتو متخيلين احساسهم عامل ازاى ؟؟

يعنى عملنا فيكو معروف ...و تيجو تبوظولنا السفينة ؟؟.. اللى هيا مورد رزقنا ؟؟

يعنى هو دا جزاءنا؟؟ ماعدناش نعمل خير لحد أبدا ؟؟

متخيلين حجم المرارة اللى هما حاسين بيها؟؟

عشان كدا جه استنكار سيدنا موسى " لقد جئت شيئا إمرا " ...شئ شنيييييع ،

طب متخيلين احساس سيدنا الخضر لما يكون سيدنا موسى رايح عشان يتعلم منه ، يقوم أول موقف يتعلمه منه رد الخير بالشر؟؟؟


و رغم كدا شفتوا لما جه التفسير .... " كان وراءهم ملك يأخذ كل سفينة غصبا " ... ياترى لو كان سابها سليمة و فرحانين هما بسفينتهم ، و الملك جه اخدها منهم ...كان يبئا افضل ؟؟؟..ولا لما يعيبها فماياخدهاش و يصلحوها و يرجعوا بيها تانى بلدهم ؟؟؟

يا ترى أنهى أرحم بيهم ؟؟؟


يا ترى الوقتى اللى ربنا مانع عنه مورد رزق معين ..حامد ربنا و حاسس إن دا خير ؟؟

ياترى فعلا موقن إن ربنا كاتب له الخير و ان كدا كدا رزقه هياخده حتى لو مين مش عاوز دا ليه؟؟

بجد ... ربنا اد ايه رحيم بينا .. بس احنا مش حاسيين .


نيجى للموقف التانى " لقيا غلاما فقتله " ....


كدا ؟؟؟ يقتل طفل برئ لسه مايعرفش حاجة فى الدنيا ؟؟

انتو متخيلين موقف سيدنا موسى ؟؟ ربنا يبعته عشان يشوف اعلم اهل الارض يلاقيه أول حاجة رد الخير بالشر و تانى حاجة بيقتل فى الاطفال ؟؟

يا ترى ايه صدمته لما يتقتل طفل ادامه؟؟؟ ... " لقد جئت شيئا نُكرا "

غير كدا ...انتوا متخيلين صدمة أهله ؟؟

طفل برئ و كان لسه معاهم ..يخرج يتقتل ؟؟

طب ليه يارب كدا ؟؟؟ دا لسه ما يعرفش حاجة فى الدنيا؟؟؟

و قرة عين لينا ؟؟


تيجى الاجابة ... " كان ابواه مؤمنين فخشينا أن يرهقهما طغيانا و كفرا "

ياترى كام أب و أم الوقتى بيتمنوا ان ابنهم دا ماكنش جه أصلا

و اد ايه كانوا بيتمنوا انهم ماكنوش خلفو بسبب العقوق اللى بئا فيه شباب النهاردة

نعمة و لا مش نعمة إن ربنا ياخده منهم ؟؟؟


و ياريت كدا بس ،لا ... " فأردنا أن يبدلهما ربهما خيرا منه زكاة و أقرب رحما "

كمان يارب ؟؟؟.... يعنى مش بس هترحمهم من ابن عاق ، لا كمان هتديهم ابن بار

سبحانك يارب ..

بجد اد ايه ربنا لطيف حكيم عليم ...


اد ايه الموقف دا بالذات علمنى لما أشوف طفل صغير ربنا ابتلاه باى مرض من امراض الدنيا

أو أى شئ ..انى ماقولش ليه يارب دا لسه طفل برئ ؟؟..!!

بالعكس ... أكيد ربنا ليه حكمة من كدا بس إحنا اللى مش حاسين

أكيد دا لطف و كرم من ربنا ...بس إحنا اللى بنبص تحت رجلينا بس


الموقف التالت ... " أتيا أهل قرية استطعما أهلها فأبوا أن يضيفوهما "


انتو متخيلين ان سيدنا موسى من قبل ما يقابل سيدنا الخضر وهو جعان و ما أكلش

بعد اللفة دى كلها و المواقف اللى شافها منه ...خلاص ميت من الجوع

يقوموا يرفضوا يعطوهم أكل ؟؟!!..

أنت متخيل حجم النقمة اللى كانت هتبقى فى نفسك لو أنت فى مكانه

و رغم كدا " فوجدا فيها جدارا يريد أن ينقض فأقامه "...


أكيد لو أنا مكان سيدنا موسى كنت هأتجنن ..

هو رغم انه قدم لهم مساعدة ... رغم أنهم رفضوا يقدمولهم أكل ،

لكن تيجى على أهل القرية اللى رفضوا يساعدونا و تخدمهم ، و أهل السفينة اللى ساعدونا و تخرق لهم السفينة .؟؟؟ طبعا عقلك يشت ...

هى الأمور بئت بالعكس ولا ايه؟؟؟ تقابل الخير بالشر ، و الشر بالخير؟؟ ..


لكن هو حس انه كدا وصل من اعتذاره مبلغه فقاله: " لو شئت لاتخذت عليه أجرا "

يعنى أقل ما فيها يردوا لك الواجب اللى أنت عملته

أد ايه كل واحد فينا بيعمل للتانى خدمة بيبئا منتظر منه انه يردهاله ضعفين و تلاته ...سبحان الله


ييجى الرد ..." فأما الجدار فكان لغلامين يتيمين فى المدينة "

غلامين ؟؟؟ يتيمين ؟؟؟

" و كان تحته كنز لهما "... كنز؟؟؟؟

" و كان أبوهما صالحا ، فأراد ربك أن يبلغا أشدهما و يستخرجا كنزهما رحمة من ربك "

فعلا يارب ..رحممممممممممممممممة

يعنى غلامين لا حول لهما و لا قوة ...ربنا يحفظ حقهم كدا ؟؟؟

أيوا أصله أولا مال حلال " أبوهما صالحا " ، ثانيا دول أيتام


يعنى يارب أد كدا انت مقسم لكل واحد رزقه و حافظه ليه ؟؟؟

أيوا ... ربنا مقسم لكل واحد رزقه ، و ماحدش يباخد حق حد


بجد سبحانك يارب ... رحمة فعلا

بس احنا للاسف اللى مش شايفين كدا ،

و كل واحد بيحصل له موقف ... يقوم متضايق و زعلان و يسب و يلعن

و سبحان الله بعد فترة يقول : فعلا لو ماكنش حصل كذا ... ماكنش كذا حصل

و يبئا فرحان و مبسوط


كلمة جميلة جدا سمعتها من معلمتى – ربنا يكرمها و يحفظها لينا يارب – قالت : هو مش اللى مقدر لينا دا ربنا اللى كاتبه ؟؟؟ .... و فى نفس الوقت بردوا لو ربنا أراد ...كان رفعه عنا أو ماكنش كتبه علينا ؟؟؟ صح ؟؟

أمال ليه كل دا بيحصل ؟؟؟

بسسسسسسسس ...عشان ربنا يشوف مننا هنتصرف إزاى ؟؟؟

هنرضى و لا مش هنرضى ؟؟؟

اللهم ارض عنا و رضنا بما قسمت لنا "

..........................................

كلمة على جنب :

فصبر جميل ...

ربنا...و لا تجعل فى قلوبنا غلا للذين آمنوا ...



23 comments:

صوت من مصر said...

ابقى شيلى الخطوط البيضاء مش شايفين منها حاجه

صوت من مصر said...

كنت اول وتانى تعليق
ياهااااااااااااااااه من سنين معملتش كده

فارس عبدالفتاح said...

اقلبي الصفحة بسرعة

Unknown said...

بسم الله الرحمن الرحيم
السلام عليكم ورحمه الله وبركاته
شيئ غير معقول
ان ينشغل عنك من تحبه
او يتشاغل *

فاتيما said...

كلام جميل
و صح جدا يا سووول
بس للأسف حالة السخط و الغضب
و قلة الثقة ف الله بتخلى البنى آدم
فى المحنة ينسى كل الكلام
اللى قولتيه
و اللى بيعظم المسالة أكتر أن الناس حوالينا قد بحكم احكام خاطئة
يعنى اديكى مثال شخصى جدا
انا مريت بيه
و لهذا حاسة كلامك
و مستوعباه
اول ما بدأت المشاكل بينى
و بين ابو ابنى و اهله
قعدنا نستقبل منهم ضربات موجعة واحدة ورا التانية
و نحاول نقاوم
و نخسر قضية ورا قضية
و الحق (كما اظن) معانا
و مع ذلك هما كسبوا فى آخر الامر تقريبا كل شىء
و خسرنا احنا تقريبا برضو كل شىء
الناس حوالينا
كانت اغلبها بتحكم جهرا او صمتا حتى باننا ممكن نكون
زى ما هو ردد
مفتريين
و وحشين
و عشان كدا ربنا نصره
و خسف بينا
لما خدت ف وشى انا و يوسف
و مشينا .. كنت بقعد اقول يا رب انصرنى
و رجعنى مرفوعة الراس عشان الناس تعرف انى مظلومة
و مستاهلش البهدلة دى
ست سنين يا سووول
ست سنين بحالهم
شفت فيهم كتيييير قوى
فقدت ايمانى ببكرة كتييييير
و يئست من رحمة ربنا كتييير
و فى الآخر رجعت ... محطمة
خايبة الامل
و يائسة من كل شىء
قولت يوسف اللى فاضل ...
لكن إتاخد منى برضو
و المنظر العام من برا يقول
انى اللى رميته
و مش عاوزاه و سلمته لأبوه بغيدى
لكن الحقيقة غير كدا ...
الاول كنت بطلب من ربنا ينصرنى
عشان الناس متفتكرش
انى انسانة سيئة
و استاهل كل اللى جرالى
لكن شوية بشوية حسيت
و اتاكدت أن فيه حكمة
من وراء كل هذا
و ربنا اكيد كاتب خير
و مش مهم رأى الناس و نظرتهم يعنى
اللى عاوز يعرف الحقيقة اهلا و سهلا
و اللى هيحكم حكم سىء مش مهم عندى
بس الخير جايز انا مش شيفاه دلوقتى لسبب ما مؤجل
و ربنا يصبرنى
و يمد ف عمرى لحد ما اشوفه
و يوسف يشوفه معايا
يمكن ربنا اراد يروحلهم
عشان يوسف بكدا يحبنى اكتر
و يعرف حاجات بنفسه عمرى ما كنت هقولها عشان احافظ على نفسيته
يمكن مقسومله يعيش بعيد
عشان يتعلم يبقى راجل
و يرجعلى اقوى مما كان معايا
يمكن مكتوب يرجع
لما حالتى المادية تتحسن احسن
و اقدر اوفرله بيت
و حياة مناسبة
و يمكن كماااان وقتها ابوه
و اهل ابوه يكونوا اتهدوا
و يسبونى اربيه فى هدوء
الله اعلم
الخير بيد الله
و الصبر حل وحيد
بس اثناء ذلك الأشتياق
و الحنين و رغبة الانسان فى الاحساس بنصر الله له
أمر طبيعى و انسانى جداااا
لأننا مهما قوينا ..ضعاف
و محتاجين يد الله تطبطب علينا
خالص حبى ليكى يا سوووول و معلش رغيت كتير
و دوشتك
بس الموضوع حلو قوى

romansy said...

ازيك يا سوووووول اخبارك ايه

اد ايه كنا محتاجين الكلام دا
اد ايه محتاجين الرحمه من ربنا
اد ايه محتاجين الرضا من ربنا
اد ايه نفسنا يكون الامل جوانا
والخير جوانا
يااااااااااه
ربنا يرضينا ياااااارب
اللهم عافانا واعف عنا ياارحم الراحمين

د. ياسر عمر عبد الفتاح said...

كلام جميل فعلاً
ولازم كلنا نتعلم فن تقبل البلاء
لازم نعرف إن ونفهم كويس أوي الكلمة دي

عجباً لأمر المؤمن أمره كله له خير

جزاكِ الله خيراً

ريمان said...

السلام عليكم


ازيك عامله ايه يا رب تكونى بخير


هقولك حاجه واحده


عجباً لأمر المؤمن أمره كله له خير

قلم رصاص said...


السلام عليكم ورحمة الله وبركاته

كيف حالك دكتورة سول .. ان شاء الله بخير

جزاك الله خيرا والله على البوست الرائع ده

ما احوجنا بالفعل للتفكر في قدر الله وحكمته

والموقف اللي حكتيه في مطلع البوست نفس الاحساس بالموقف ده مر علي في اوقات كتيره من حياتي

ربنا اقسم لنا من خشيتك ماتحول به بيننا وبين معصيتك

دمتي في أمان الله

♥نبع الغرام♥♪≈ said...

فعلا صدقتى سول نحن لانرى ماوراء السطور

اعلم قصة نبينا موسى مع الخضر وفعلا رايت فيها حالنا ننزعج جدا من نقص الشىء بحياتنا رغم انها اكيد خير مؤجل ومانع لشىء غير مرضى فعلا ربنا خلقنا وادرى باحوالنا ويعلم ما ينفعنا ومايضرنا ينقصنا فقط التوكل على رب العباد والرضا والصبر اللهم اجعلنا نرضى بقضائك
شكرا غليتى دامت كتابتك وصدقتى لايوجد افضل من التوكل على خالق الحياه
تحيااااتى عسوله

حـــلـــم كـــان said...

أنا واثق فيك يارب ، و عارف انك مش هتكتب لى الا كل خير "


صح ياسول ربنا شايل لينا الاحسن

امشى بمقوله لعله يمنعك ليعطيك

هتستريحى بجد

blue-wave said...

من سلم امرة لله
ضمن ان لا يصيبه الا الخير
تحياتى

sakayar said...

السلام عليكم ورحمة الله وبركاته
اسمحيلي أحيي حضرتك على التدوينة دي
من أول سطر حسيت ان حضرتك بتكتبي اللي ف دماغي وكإني حكيتلك اللي بفكر فيه وانتي بتكتبي ورايا
وجميل الربط بقصة الخضر للاستفادة منها
جزاكي الله كل خير لا أجد كلام أعقب بيه على كلام حضرتك فعلاً
أدام الله حفظك ورزقك كل سعادة وأقر عينك بكل خير

فشكووول said...

ازيك يا سول

الانسان امره كله خير شره خير وخيره خير
لان الشر مقدر من الله سبحانه وتعالى لحكمه يقصر عقلنا عن فهمها

وايضا الخير مقدر من الله سبحانه وتعالى
وما ذكر فى قصة الخضر خير دليل

والله سبحانه وتعالى يقول (انا كل شيئ خلقناه بقدر.. كله مقدر وكله مقدور
يعنى مثلا لما سواق يصحى من نومه الساعه كذا ويفطر ويشرب الشاى ويخرج يركب عربيته وفى نقطه معينه ومكان معين يحصل له حادث من سياره اخرى اللى هو كمان صحى من نومه وفعل ما فعله الاخر وعشان يوصل لنفس النقطه وفى نفس الزمن وفى نفس المكان عشان قدر الله لهما هذا ان يصلا الى نقطه واحده والى مكان واحد والى زمن واحد ويحدث لهما ما يحدث خيرا او شرا .. شوفى كيف ان الله قدر لهما وقت وكيفيه خروجهما حتى يتقابلا فى الوقت المقدر من الله سبحانه وتعالى

لا حول ولا قوة الا بالله

سجود said...

فعلا لو الواحد يصبر بس ويحمد ربنا ع كل حال كانت الناس ارتاحت
وخدت ثواب وربنا في كل الامور مش عايز شر للانسان كل حاجه ربنا بيعملهالنا بتبقي خير
وجزاكم الله خير

Anonymous said...

إيمان
أنا عاوزة أكلمك والله وكل البنات اللي كانت موجودة :)
مش عارفة
أبعت ليكي وسيلة التواصل بإذن الله ولا لأ:)

اقصوصه said...

اكيد كل شي من الله خير :)

mohamed ghalia said...

الرضا لما نحققه بجد حقيقى شىء رائع وراحة نفسية

mahasen saber said...

شوفى يا سول كل امر ابن ادم خير

انا مؤمنه بكدا ايمان جزرى وقطعى

لو شئ كويس فهو خير
ولو وحش برضه خير لانه ممكن واكيد لو صبرنا عليه بيبقا جزاءه خير

عاشقه الرومانسيه said...

اول بوست اقراه لاخره وازعل انه خلص
يعنى عجبنى
بجد رائع
تسلم ايدك
والحمد لله على كل حال
وعسى ان تكرهوا شئ وهو خير لكم

Tamer Nabil Moussa said...

بوست رائع


القرب من ربنا بيريح الانسان وبينور لية طريقة

ربنا يوفقك ويكرمك

مع خالص تحياتى

salma mohamed said...

ربنا يكرمك,
كلام موفق وجميل جدا,
جزاكِ الله خيرا على التذكره وربنا ينفعنا بيها.

جلال كمال الجربانى said...

السلام عليكم

فعلاً لعله خير

ودمتِ فى أمان الله وحفظه