النملة ... و الطبق

قالت لى : هاتى طبق كبير ...

قلت لها : حاضر ..

و رحت جبت الطبق و جيت

و دلوقتى حطى النملة دى فيه

حطيتها

راقبيها كويس بئا و شوفى هتعمل ايه !!

راقبتها شوية .. فى الأول وقفت كدا حبة تتفحص المكان حواليها

و بعدين بدأت تتجول فى أنحاء الطبق

حطى لها حباية الرز دى كدا ...

حطيتها قريب منها ... بدأت تدور حواليها كدا شوية ، و بعدين طلعت عليها و نزلت ،

و بعديت قعدت تحاول تشيلها لحد ما شالتها ..

ياه .. قوية النملة دى ، سبحانك يارب ...

طب املى الطبق كدا بالمية ...

ليه؟؟

امليه بس ..

مليته بالمية ، ووقفت اراقب النملة وهى يا عينى بتصارع المية فى الطبق ..

حرام بئا كفاية كدا ... مش نشيلها؟؟

براحتك .. الطبق طبقك ، و النملة تحت إيدك ..

طبعا بسرعة انقذت النملة المسكينة من هذا البحر السحيق بالنسبالها ..

و فرغت الطبق من المية و نشفته و حطيت فيه كام حباية رز ، و سيبتها تلعب ... : )

قعدت على الكرسى قصادها و قلت لها : فهمت إنتى عايزه تقوليلى ايه !!..

ابتسمت و قالت لى : طب قولى ..

قلت لها : عاوزانى أعرف النملة أد ايه قوية الارادة رغم ضعفها ،

و إنها بتتحمل و تقاوم .. و لما مليت الطبق مية .. كنتى عاوزة تورينى إزاى هى جاهدت لحد مانا انقذتها ..

يعنى عاوزانى ابئا قوية الارادة و مايأسش ... صح؟؟

اتسعت ابتسامتها وقالت لى : حلو المعنى دا .. بس مش هو بالظبط اللى كنت عاوزة اوصلهولك ..

استغربت و قلت لها : أمال تقصدى ايه؟؟

سرحت شوية كدا ،و بعدين قالت لى : هى النملة بالنسبة لك ايه؟؟.. قيمتها عندك يعنى؟؟

قلت لها : النملة ؟؟ .. و لا شئ ، دا أنا فى ثانية واحدة أقضى عليها ..

طب ليه أنقذتيها لما كانت هتموت ؟؟؟

لا ، حرام... دى ضعيفة بردوا .. استقوى عليها يعنى؟؟؟

طب و الطبق ؟؟ بالنسبالك ايه؟؟

الطبق؟؟... طبق!!.. يعنى ايه يعنى؟؟

طب و الطبق بالنسبة لها؟؟؟

لاااااااااااااا .. دا مملكة بحالها .. هههههههههههه

قالت لى : اللى كنت عاوزة أوصلهولك يا حبيبتى إنك تعرفى قدرة ربنا علينا ،

دا مثل – ولله المثل الأعلى – إحنا عند ربنا أقل بكتير أوى من النملة دى ،

و الكرة الارضية بحالها أقل من الطبق دا ، و رزقنا فيها أقل بكتييييييير أوى من

حباية الرز اللى أنتى حطتيهالها ...

تأملى قدرته وهو خالقنا ،و خالق النملة اللى بالنسبة لك و لا شئ ،

و هناك ماهو أقل من النملة بكتيييييييييييير ...

بصراحة ذهلت .. ماعرفتش اقولها ايه ، يااااااااااااااه اد ايه باسمع

بس اول مرة أستوعب كدا ...

طب ليه خلتينى أحط مية فى الطيق و النملة كانت هتموت؟؟؟

ابتسمت و قالت لى : انتى حطيتى مية أد ايه؟؟

اممممممممم .. يعنى ، حبة صغيرين .

طب و بالنسبالها ، كانت المية دى أد ايه ؟؟

ياااااه ..بحر ، و للا محيط حتى ...

و هكذا المصائب و الاهوال فى حياتنا .. دايما بنشوفها الطامة الكبرى ،

بينما هى عند ربنا و لا شئ ... اطلاقا .

طب ليه سبتينى أختار ؟؟؟

الله بيده الأمر ... إن شاء أنقذنا مما نعانيه ، و إن شاء أغرقنا فيه ،

و فى كلا الامرين .. لن ننفعه أو نضره بشئ ..

ياااااااااااااااااااه .. بجد مش عارفة أقول ايه ؟؟!!!.

بجد ... سبحانك يارب .

و أنتى بفطرتك أنقذتيها ، والله أرحم منك .. خاصة بعباده المؤمنين الذى أخلصوا له كما أراد منهم ،

دايما معاهم و مش بيسيبهم يغرقوا .. ابدا .. و ينقذهم من المحن و الابتلاءات دى ..

طب ليه أصلا يبتليهم ؟؟ .. مش بتقولى انهم أخلصوا له كما أراد ؟؟؟

ضحكت و قالت : " أحسب الناس أن يُتركوا أن يقولوا آمنا و هم لا يفتنون " ..لازم ربنا يشوف مننا حسن توكلنا عليه ،

و الالتجاء فقط اليه ..

افترضى جدلا .. جدلا يعنى .. النملة دى كان بتتكلم ، و كمان لها ايدين و رجلين و بتتحرك زينا كدا ..

و بعدين لما أنتى حطتيها فى المية ، قامت قايلة هو انا يهمنى و قامت جايبة عوامة و عامت .. هتعملى ايه ؟؟

و لا حاجة .. خلاص بئا ماهى معاها العوامة تتصرف ... : )

طب لو قالت لك ساعدينى بالله عليكى ، و جابت العوامة و حاولت تعوم ؟؟؟

لاااااااااا .. دا أنا أشيلها فى ساعتها من المية أصلا ..

اممممممممم .. طب لو جنبها العوامة و سابتها ..و قعدت تحلف عليكى تنقذيها ؟؟

لا بردوا .. ما تتصرف .. ماهى جنبها العوامة ...

و لله المثل الأعلى ... احنا فى كل مشاكلنا تلت أقسام ، قسم منا بيقول ربنا قالنا خدوا بالأسباب ،

لكن من جوا معتمدين عليها ، لو معانا العوامة نفرح ، ولو مش معانا نسيب نفسنا تغرق ..

عشان كدا ربنا بيوكلنا للاسباب اللى احنا متعلقين بيها دى ... نتصرف بئا ..

و قسم مننا فاهم إن التوكل على ربنا يعنى اننا نحلف عليه و ندعيه ، و نسيب العوامة اصلها مالهاش لازمة

دا ربنا كبير و عظيم ، و ينقذنا من غير العوامة ..

و دا بردوا غلط ..لأن ربنا اعطانا أسباب و قالنا خدوا بيها ..

لكن لو فعلا نقول يارب خليك معانا .. و ناخد بالاسباب بدون ما نتعلق بيها .. ربنا بيخرجنا من كل مشاكلنا ،

صح؟؟؟

صحححححححححححح ... سبحان الله ، والله اول مرة افهم كدا ، و استشعر كدا ... ايه داااااااا !!!...

بس أنتى مش ملاحظة حاجة؟؟

ايه؟؟

إنتى عملتى ايه بعد ما انقذتى النملة ؟؟؟

عملت ايه ؟؟... ماعملتش حاجة ..

لاء ... عملتى ..

اممممممممممممممممم ... اه ، قصدك يعنى نضفت الطبق و حطيت لها رز؟؟؟

ضحكت و قالتلى : انتى عملتيها بعفوية .. بس هو دا فعلا اللى بيحصل ،

بعد الكرب الكبير ، و الاحزان الكتير اللى فى حياتنا ... بنشوف كرم ربنا علينا ،

و اد ايه هو لطيف بينا ...

ياااااااااااااااااااه .. بجد أول مرة أحس كدا ، لا بجد احساس فظيييييييييييييييييييييع

ايه داااااااا ... سبحانك يارب !!!...

...................................................

بجد الحكاية دى فرقت معايا أوى

وبئيت من يومها كل ما أحس بكرب أو ضيق وأشيل الهم...

اقول لنفسى: افتكرى النملة .. و الطبق

خالص ودى

oO تاج ... ذكريات Oo

ازيكم يا شباب؟؟ كيف الحال؟؟

مش عارفة ايه حكاية التاجات معايا ..

هو كدا .. أول ما تفتح باب حاجة ماتعرفش تقفله ..

و طبعا مش باعرف ولا بأرضى أزعل حد منى ،

خاصة أهالى بلوجر الكرام ... : )

طبعا زى مانتوا شايفين من العنوان " تاج .. ذكريات "

لالالالا .. مش على وزن تاج محل ، هو كل مرة ولا ايه ؟؟

لا المرة دى عشان حاجتين .. الأولى : لأن اللى اهدانى التاج دا د.جوهرى

فقلت بالمرة أقتبس حتة من اسم المدونة عنده ، أيوا دا أقتباس مش سرقة أدبية ..

حفظا للحقوق ...

تانى حاجة بئا إنه فعلا خلانى أعيش ذكريات حلوة ، أول ما دخلت بلوجر ..

ا

مممممممم .. كفاية كدا طولت عليكم ،

نخش بئا فى الاستجواب على طول ..

قصدىىىىىى .. فى الاجابات على طول .. : )

السؤال الأول: << يا ماما ..

بدأتِ التدوين إمتى؟؟ ودخلتِ العالم ده إزاي؟؟

ماعرفوش يا بيه .. هههههههههه

لا بجد دا يمكن المرة السبعتاشر الف ربعومية تمانية و خمسين اللى اجاوب فيها السؤال دا،

و محدش يسأل اشمعنا يعنى 17458 ؟؟.. بس تقريبا هو الرقم اللى بطلت من بعده اعد .. : )

المهم .. رغم كدا فأنا بأحب بردوا احكى الحكاية و محدش يزهق

شوف يا دوك << دا بمناسبة إنه هدانى التاج مش أكتر ..تتردلك قريب ان شاء الله

على بلوجر من يوليو 2007 .. إنما بالنسبة للتدوين عامة

فأول مرة كانت ليا صديقة من هندسة ، و بعدين لقيتها باعته على النت ماحدش يعرف فى المدونات ..

طبعا بكل طيبة قلب قلت لها : بصراحة آخرى أعرف ان المدونة دى حاجة زى كشكول تكتبى فيه يومياتك .. إنما يمكن مدونة الكترونية دى خاصة ببتوع هندسة

ضحكت و مش ردت عليا .. قلت لها طب لما تعملى المدونة دى قوليلى ..

و فعلا لقيتها بعدها بعتت لى لينك المدونة بتاعتها بس مش على بلوجر ،

و إذ فجأتننننننن فعلا ألاقى المدونة دى فعلا صفحة تكتب فيها حاجات خاصة بيك

يا سلااااااااااااااام ...قمت سجلت على نفس الموقع و عملت لى مدونة ، بس مش حبيت الموقع .. حسيت إنه صعب شوية ..خاصة كمان انى كنت مشتركة على منتديات كتير ،و كان ليا نشاطات كتير فمش كنت فاضية لها ..

المهم ... فى منتدى من المنتديات دى ، صديقة أهدت لى رابط مدونة مشهورة على بلوجر و قالت لى خشى شوفى الموضوع اللى بتناقشه المدونة دى ،و دا لأنها كانت عاوزانى اكتب فى نفس الموضوع بس على المنتدى ..المهم دى كانت أول زيارة ليا لبلوجر .. و حبيته جدا ، قررت إنى أعمل مدونة على بلوجر .. و مش كان اسمها فى الاول فويس اوف ماين ..

و مش كنت باهتم بيها اوى و كله كان خواطر بس.. بس الله يكرمه الباحث كان أول المدونين اللى شجعونى ، رغم فى ناس كتير اوى كانت بتقولى اكتبى بس مش مدونين ..

بس ... بعد حوالى توقف دام قرابة 6 شهور ، رجعت بفويس اوف ماين ،و بدأت كتابات واقعية ،

و آدى المدونة و آدى حكايتها ... : )

السؤال التاني:<< استر يا ستار ..

إيه كان إنطباعك ف البداية؟؟

اممممممممم فى الأول حسيت الموضوع صعب شوية .. خاصة إنى مش من النوع اللى بيدخل فى الحاجة فى أولها بقلب جامد .. لا ، لازم اقعد كدا شوية ادعبس و أشوف الحكاية و أصلها و فصلها ..

بس بعد ما أخدت على بلوجر بئا والجماعة البلوجرية ، خلاااااااااص ..

بئت مدونتى دى حتة منى ،و كمان البلوجرية دول ناس غاليين عليا أوى..

السؤال الثالث: مين أكتر حد بتحب تعليقه عـ البوست الجديد؟؟

حقيقى كل تعليق بيسعدنى .. لأن معناه إن الشخص دا بيقوللى كلامك مثّل لى شئ ، سواء بئا متفق أو ناقد أو معارض ... : )

بجد كل شخص كتب لى كلمة واحدة حتى ، أد ايه باحب انها مش تكون زيارة و السلام ..

خاصة كمان ان الشغل بياخد وقتى جدا ،و غصب عنى فى ناس فقدت التواصل معاها بس مش عن عمد والله ..

كل الناس اللى فى السايد بار و غيرهم بأحب إنهم يشاركونى همسى ، و يبادلونى وجهات النظر .. : )

و استغل هذه الفرصة << طبعا ماهى الحياة فرص و لازم نستغلها ..

استغل هذه الفرصة عشان أقول لكل شخص قصرت فى حقه مايزعلش منى ، وبإذن الله هأحاول أوفى الديون اللى عليا ... : )

السؤال الرابع: إيه أهــــم حاجة إتعلمتها في عالم التدوين؟؟

اتعلمت أقول رأيى بصراحة ، بس فيما لا يمس حرية و احترام الآخرين ..

اتعلمت إن أيا كان الرأى أو القضية المطروحة فهى تعبر عن فكر .. و لأن كل منا له فكر فلابد أن نختلف .. و لأننا جميعا لا نعرف بعض بصورة شخصية ، فلابد أن نستوعب بعض لأقصى درجة .. لنحقق تكامل فى وجهات النظر ..

و بغض النظر عن رأي فى فكرك ، فلك على حق احترام شخصك .. : )

السؤال الخامس: إيه أكتر حاجة كرهتها؟؟

أكتر حاجة كرهتها ..مش هأقول الانينموس (الوحشين منهم بس) اللى مايستحقوش إننا أصلا نهتم بيهم ..

لكن هأقول إن البعض بياخد الكلام بصفة شخصية ، مش كطرح لفكر .. بمعنى انه بياخد الاختلافات الفكرية كأنها مساس بشخصه ، و دا أنا بأرفضه .. لأن زى ما قلت فى السؤال اللى قبل دا مش كلنا نعرف بعض بصورة شخصية ..و بالتالى لما بنخاطب حد فإحنا بنخاطب فكره بس ، و بالتالى لازم ارد عليه من منطلق فكرى .. مش بمشاعرى ..

و الحكاية دى خلت ناس محترمة كتير تبعد عن بعض .. فى حين انهم سوا ممكن يعملو منظومة حلوة اوى ..

السؤال السادس: حاسس إن التدوين ليه تأثير؟؟

لا .. التدوين ماعتعقدتش له تأثير ..

الناس اللى ورا التدوين هما اللى لهم تأثير ... : )

أقل ما فيها إحساسى انهم أثروا فيا على المستوى الشخصى .. حاسة إن فعلا حاجات كتير اتغيرت فيا للأحسن .. و إذا كان دا بيحصل مع كل اللى بيدون ، و مع اللى بيقرأ .. إذن أعتقد أننا على أعتاب جيل جديد .. : )

السؤال السابع: تهدي التاج لمين؟؟

أن أن اااااااااااااااااااااااااااا

جينا لأصعب سؤال .. أصل فى ناس اول ما بتسمع سيرة تاج بتهرب و مش بترضى تقرب ههههههههه .. طيب بما إن دا أول تاج أهديه لحد فلازم أكون سخية و كريمة

فأنا بأهدى التاج دا لكل اللى فى السايد بار ..

بأهديه أولا بصفة ودية لأستاذى العزيز / بيرم المصرى ، لو حب يجاوبه

عشان عارفة إنه مش بيحب التاجات .. بس لعل و عسى : )

و بصفة رسمية للباقيين ..

فيلسوفى العزيز / فشكول

الأستاذة الغالية / أمل << لما ترجع بالسلامة

بنوتى الجميلة / بنات أفكارى

و صغنتوتى / عاشقة الفردوس لما النت يوصل لها بالسلامة ، و تفضى ..

كمان باهديه لكيورى " خيارا الجبارة " ... أعتقد دا اول تاج فى المدونة الجديدة

و طبعا أحب أكون أول من يضربها رصاص .. قصدى يهاديها بتاج..

و كمان ضودى هههههههه .. شريكتى فى الحزب الشمينى اليمالى المتطرف لمحاولة تقطيع خيارا على السلطة..

امممممممم و أعضاء رابطة الكآبة المتحدة " ليه تكتئب لوحدك ".. واللى اكتشفت إذ فجأتن و على حين غره .. إنى أحد الاعضاء

للرئيسة .. حرووووف

و المدير adel

و عضوية سمايلى روز .. و البت المشمشية رغم إنى لسه ما زرتهاش

بس باسم الرابطة اللى ما بينا باهدى لها التاج ..ههههههههه

اممممم .. القلم السكندرى

و فارس قومى عربى

و د. سمرمورة العسولة

و كل الحنان .. حنوووون

و الاخوة الاشقاء اللى بنبكى على أطلالهم ..مش عارفة ان كان وصلهم التاج دا قبل كدا و لا لا

بس لو ماكنش وصلهم يحلوه ... << طبعا اقصد الباحث و عسقول

محااااااااااااسن .. رغم أنك يا حبيبتى حكيتى قصتك مع التدوين مليون مرة ، حتى انك من كتر ما زهقتى مسكتى المايك مرة و طلعتى على التليفزيون و قلتيها علنا عشان تريحى نفسك .. بس معلش .. كمان مرة مش هتفرق ..ههههههههههه

اووووووووو.. و طبعا أستاذى العزيز / محمد ... شوية كلام

و د. كفراوى .. << ياريت تضيفوه للرابطة هنبئا فل الفل : )

و نودى .. أنا مسلمة ، مش عارفة هتدخل و لا لا

و د. اجدع بنوتة اللى بئالها قرن مش دخلت و لا شفناها ...

يااااااارب مش أكون نسيت حد ..

بالحققققققق .. كنت هانسى خالو الصباغ.. لو مش كنت حليته .. خده حله ..

<< زمانه وصله من عهد الهكسوس..

و كمان كل شخص فات على المدونة و شاف الاجابات ياريت يا جماعة نكون صادقين مع انفسنا << حلوة دى ،جامدة .. صح؟؟؟

نكون صادقين مع انفسنا و اللى يقرا التاج دا يقول أنا قرأته و هأجاوبه .. آه ، أنا بأقول أهو ..

يعنى أنا بس اللى اتدبس فيه ؟؟.. قصدى يعنى ، أنا لوحدى اللى آخد هدية ؟؟!!.. لا ، لازم أهادى أخواتى كمان : )

أى خدمة

خلاص .. أستريحت يا دوك ؟؟.. ياللا عقبال ما أردهالك قريب يارب

قصدىىىىىى ... عقبال ما أهاديك قريب يارب

خالص ودى