الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Jan 31, 2010

لـقـاء الـقـاهــــــرة




كيفكم جميعا يا شوباب؟؟؟ يارب تكونوا جميعا بخير و بصحة و سلامة


طبعا الفترة اللى فاتت كانت فترة مش ولابد... و لا تزال بردوا ، حيث ان دور البرد كان عامل عمايله معايا ، و عندما قرر الرحيل ..كانت قوات الجهاز المركزى تطب علينا على حين غرة .. و مازالوا بيعتبروا نفسهم فى مرحلة الضيافة .. << ربنا يكفينا شر كل جهاز مركزى ياااااااااااارب ...ههههههههههه


المهم أنا قلت ايييييييه؟؟؟ قلت مش معقول جو الشغل و الاكتئاب المزمن دا ، و لازم أغير جو ...اوووووووم ايييييييه؟؟ قوم قررت إنى أحضر لقاء المدونين فى القاهرة يوم الجمعة اللى فاتت ، ايوا اللى هيا أول امبارح ... أيوا يا سيدى اللى هيا كانت قبل يوم السبت بعد يوم الخميس على طول ...عرفتوها؟؟؟ يووووووووه ... مش مشكلة


المهم .. بجد أنا شفت كمية مدونين ، بسم الله الله أكبر ... كنا كتيييييييييير جدااااااااااا ، اللهم زد و بارك

طبعا كان فيهم ناس أنا أعرفها قبل كدا ، و شفتهم على الطبيعة ..و ناس كنت اعرفهم نت بس ، و ناس كنت لأول مرة أعرفهم ..


نبتدى الاول و نقول انى كان نفسى بجد أشوف د.ستيته ... و الحمد لله ربنا حقق لى أمنيتى و شفتها ...ياااااااااه أحمدك يارب ، الوقتى أقدر اودع و أنا مرتاحة ...هههههههههههه

بجد أنا اللى سعيدة جدا يا دكتورتى العزيزة برؤيتك و التعرف عليكى ... :)


طبعا صحبتنى فى رحلة الذهاب و العودة .. شيما العزيزة ، شدى حيلك يا شيما ، عشان تحرمى بعد كدا تخرجى من غير فطار << وش بيطلع لسانه


وصلنا للنادى كان فى انتظارنا طبعا فاتيما الجميلة .. ربنا يكرمك يا طمطم يارب ، و كان معاها طبعا عااااااااااادل ... طبعا مبسوطة جدا انى شفتك ، و تقولوش يا ولاد توم كان مستنى جيرى ... طول اليوم و عادل و شيما ناقر و نقير ... حاجة صعبة خالص


كان كمان موجد معاهم ABO ALI و اللى بجد بجد تشرفت جدااااااااااا بمعرفته هو و م. السيد عبد المنعم .. حقيقى بجد عقليات أقل ما يقال عنها أنها راااااااااااائعة .. حقيقى بجد و أنا باعتبر اليوم كله ماهو إلا النقاش اللى دار فى آخر اليوم و كانوا أبطاله ، و أنا عملت سيرش مبدئى على نظرية تريز .. و لسه إن شاء الله هاتابع فيها لأنها فعلا فوق الرائعة :)


كمان كان موجود محمد غالية ..و اللى مسافة ما اليوم ابتدى فجأة مالقنهوش .. فص ملح و دام هو و بطوط حبوب ( د. محمود ) ..

كان موجود كمان هانى زينهم ... و دار حديث بسيط ، بعدين جه ضياء (بيوتفل مايند ) و حبة و جت ساسو (سكرة ) يارب يا سكرة تكونى الوقتى بخير ، و أى حد على اتصال بيها يطمنا عليها يا جماعة ، و كان معاها كريم ( شاب فقرى) .. سعيدة بالتعرف عليك يا كريم .. بس حرام عليك بطل تدخين بالطريقة دى ... تعبتلك سلف والله .. :)


و انضم لينا بعدها وليد (KingTooT) و بوبو الجميلة و ابنهم عمر (بيكا ) و بجد كنت سعيدة جدا اول لما شفتهم ، لأنهم فعلا ناس جميلة


بعد كدا دخلنا جوا و انضم لينا خالد (همس الأحباب ) و معاه أم بتول و بنتها ... متشكرة ليك جدااااااااااا يا خالد ، و أعرف انى مدينة لك بواحد شاى ... :) ..و أنت مدين ليا ببرتقانة ..ماشى؟؟؟


الناس بدأت تتوافد بعد كدا ... و مش فاكرة بالظبط الترتيب لكن هأقول الناس اللى شفتها فى اللقاء دا و اتعرفت عليها ، و طبعا فى ناس تانية ملحقتش أتعرف عليها ...و طبعا لأن الزهايمر سمة أساسية فيا ، فأكيد فى ناس أنا أعرفها و انسى أقولها فياريت مش تزعل ..


طبعا كنت سعيدة جدااااااا لما قابلت صديقتى اللدودتين كيارا و وردشان ..فعلا بجد كنت سعيدة اوى ، و خاصة انى شفت جىجى كمان ، و يمكن مالحقناش نرغى مع بعض كتير ... لكن الدقايق اللى جمعتنا بجد حسيت انها عوضتنى جزء من طول الوقت اللى افترقنا فيه ..

و كمان فرحت اوى انى أخيرا أخيرا شفتك يا دودو .. و طبعا انتى كنتى منتشرة و متوغلة و مالحقتيش تقعدى مع حد ، بس مبسوطة اوى انى شفتك بجد ، و افتكرى انك مدينة ليا بوردة ..ها؟؟ ماشى؟؟


حبة و انضم لينا كل من بت خيخة و أى كلام ، و عسقول ، و أعتقد كان فى حد معاهم كمان ..بس حقيقى مش قادرة أفتكر كان مين ..

عادل من أول اليوم وهو قالنا هأستدرج لكم سووووووو ...نياهاهاهاها ...و فعلا استدرجه و وقعه فى الكمين ، سعيدة جدا برؤيتك يا سووو ..و يارب بالتوفيق دايما


انضمت إلينا سيادة المدونة صبرنى يارب و زوجها مسيو رضا << على رأى د.ستيتة .. و دقت أحلى فطيرة بالبلح .. بجد كانت روعة يا صبصب .. ابئى ابعتيلى الست دى :) ..و كان معاهم محمد ( عمود نور ) ..


كنت سعيدة كمان بالتعرف على أحمدين .. أحمد ( أسماء و أحلام فى وجدانى ) و أحمد ( رومنسى ) ...و اللى قعد يقولى : فاكرة الصيدلية اللى جبتهالك !!... خلاص يا أحمد ، ماكنتش صيدلية ... امال لو كانت على الحقيقة ،كنت عملت فيا ايه؟؟ مش بعيد كنت دفعتنى حقها ...ههههههههههه ... بجد تشرفت جدا بلقاؤكم

مممممممم ... كمان شفت كيمو (صوت من مصر ) و مينا (منامينو)، و كيمو كان منطلق و منشكح وهو يشرح الأسباب اللى مخلياه مكتئب ..و كان أهمها انه مصاحب ناس كسوووولة << طبعا بأحب أهدى النفوس .. :) ... واخدة بالك يا محاسن ؟؟ ههههههههه


بجد فرحت اوى لما شفت محاسن صابر ، و كان نفسى يكون بيرو معاها ..بس ياللا خيرها فى غيرها ، و كان معاها نهى ( بلاش فضايح ) و دعاء ( عايزة أطلق ) ... تشرفت جدا بالتعرف عليكم

طبعا كمان شفت داليا ( قوس قزح ) و ميرا (وومن ) .. و كنت مبسوطة اوى لما داليا عرفتنى على طول ، و قالت لى خلاص يا ماما ، هى أول مرة بس ...ههههههههههههه


و شوية ..و اووووووم اييييييييه؟؟ ... المفاجأة الجميلة أوى أوى أوى ... لما شموووسة (شمس النهار) جت ، بجد حاجة كدا ماتعرفش توصفها ، حقيقى انسانة راقية و ذوق جدا جدا جدا .. حسيتها كدا مش مامتى لا أختى الكبيرة .. اه والله ، ربنا يكرم حضرتك ياااااااارب ، و بجد أنا اللى كنت سعيدة جدا جدا بالتعرف على حضرتك وجها لوجه


و على نص اليوم ألتحق بينا كلا من الاخوين صلاح ( مسدس صغير ) ألف ألف مبرووووك الخطوبة يا صلاح ، و عقبال كتب الكتاب ، بس اعزمنا بئا ، دا احنا بلديات بردوا ... :) ، و ابراهيم ( كأنى أتكلم ) ألف مبروك ليك عودة رؤية مصرية يا ابراهيم ، و يااااااارب دايما بالتوفيق و النجاح ... و فى كلمة كدا بأحبها أوى .. اسمح لى اهديهالك ، ألا وهى : إذا وجدت من يطعنك من الخلف ، فاعلم انك فى المقدمة :) ..


و طبعا كانت بداية اليوم الحقيقية بالنسبة لى لما بدأ د.ياسر عمر ( ومضات ) يلقى قصائده اللى أكثر من رااااااااااائعة ..حقيقى ربنا يبارك لك يا د. و بجد سعيدة بلقاءك ... يا ديل الأسد :)

شفت كمان ميييييييين ؟؟ ... وليد ( هى و ظروفها ) .. كان أول مرة أعرفه أصلا ، بس بجد شخصية رائعة جدا ، و محترم جدااااا ..ربنا يبارك لك يا وليد يارب ، و نفرح بيك و سارة عن قريب يارب ..

كمان شفت مصطفى ريان ( ابداعات شاب ثائر) ...و اللى كان مندمج وقت ما د.ياسر كان بيلقى قصائده ، و اعتقد رد فعله لفت انتباه الجميع .. كان واضح فعلا انه بيسمعها بقلبه مش بودنه .. ربنا يوفقك يا مصطفى ، و من نجاح لنجاح يارب

كمان هيما (مواطن شجاع ) كان له حضور قوى فى النقاش ، و كل شوية يقوم يقف .. نقوله فى ايه << طبعا بنحسبه سخن من النقاش و هيعمل حاجة مش ولابد ..هههههههه ...يقوم يقولنا : لا أبدا تعبت من القعدة بس ...

و كمان هند اللى لحد الوقتى مش عارفة اسم مدونتها ، لكن عجبنى رأيها فى النقاش ، و ياريت أى حد يحط لى لينك مدونتها ،


بسكوتة الجميلة .. اللى فعلا بسكوتة خاااااااااالص ، كنت سعيدة بالتعرف عليها ..

كمان دريم ( فضفضة على السريع) اللى ماكنتش مصدقة بجد انها عندها بنتين ..دى آخرها ثانوية عامة ... بسم الله ما شاء الله ربنا يبارك لك يارب ، و على فكرة بدأت أطبق نصيحتك أهو ...و يا مسهل ... لعل و عسى ...


مش فاكرة مين تانى حضر ... بس فى اسماء ضربت فى ودنى من غير ما أتعرف على أصحابها .. زى منوووش ، و غادة محسن ( بستان أفكارى ) ريم ( رسائل بلا بريد ) أو (عين حماتى فيها عود ) سابقا ... و هانى ( نط فى الكوز ) و اللى مسح مدونته دون قصد .. سمعت كمان ان آبى جت .. بس ماشفتهاش للأسف .. ألف مبروك ليكى يا جميلة و عقبال الفرح ..


مش عارفة مين تانى حضر ... أنا كتبت اللى الذاكرة أسعفتنى بيه ، و طبعا سلامك يا حروووفى وصل .... ربنا ما يرحمنا منك ، كمان كنت فرحانة لما اتطمنت على والدة حنان ( رياح الحنين ) ... ربنا يتم شفاها على خير يا حنونة ، و يفرج عنك يا قمر ...


آسفة بجد لكل حد حضر و نسيت أكتب اسمه ، و كمان اى حد ماتعرفتش عليه ... و ان شاء الله أزوركم كلكم ...



كلمة بئا على جنب :

المناقشة اللى دارت فى آخر اليوم ... رغم انها فعليا كانت قصيرة بالمقارنة باليوم كله ، لكنها عوضتنى اليوم كله ، بجد ماتعرفوش اد ايه كنت محتاجة المناقشة دى ، لأنها كشفت لى ان لسه فى ناس بتفكر ، ناس بتفهم ... ناس برغم الظروف اللى حوالينا دى كلها ، فمش سبب أبدا اننا نكون ديل الأسد ، بل تدعونا بقوة إننا نكون راس القطة .. لأن راس قطة مع راس قطة مع راس قطة ، يعملوا راس أسد ..

كنت محتاجة بجد إنى أعرف ان أنا ماشية صح ، و مش لوحدى اللى بأفكر كدا ، محتاجة إنى آخد أمل لبكرة طالما فى ناس لسه عايشة بالرقى دا ... يمكن أنا لسه فى مرحلة انى اعمل كوبى لنفسى جوا نفسى ، و باحاول واحدة واحدة انى انقل ولو شئ بسيط من اللى جوايا دا للى حواليا ...و باقول يااااااارب ..طبعا ثقتى فى ربنا كبيرة اوى .. وواثقة انه فعلا مش هيخذلنى


من صميم صميم أعماق قلبى ... شكرا ليكى د.ستيتة ، شكرا ليك أبو على ، شكرا ليك م.السيد ... بجد ماتعرفوش كلامكم عمل فيا ايه .. شكرا شكرا شكراااااا .. و اتمنى ألقاكم مرة تانية فى حوار بمثل هذا الرقى و العقلانية و ... العملية الواقعية

دمتم جميعا بكل الخير


24 comments:

شمس النهار said...

انا اللي اتشرفت بمعرفتك
ولو ان مااتكلمناش كتير

وان شاء الله في اللقاء التاني نتكلم علي رواقه

ربنا يكرمك وشكرا علي مجاملتك اللطيفة

يارب نتجمع في الخير دايما

سلامي

لو عرفوه هيحبوه said...

جزاكم الله كل خير

اسال الله ان يوفقك لكل ما يحبه ويرضاه

نتمنى زيارتكم للحمله لتتعرفوا على صاحبه سر رسول الله صلى الله عليه وسلم

لو عرفوه هيحبوه....

ستيتة said...

وصفك لليوم أحلى من وصفي كتيييييييييير
بس كان ليكي رسالة عندي في بوست رسائل عشوائية للمدونين
مودموازيل دكتور اركان حرب همسة روح: الشرف بجد كان ليا لما اتعرفت عليكي
ويارب دايما اخوات وحبايب وميت فل واربعتاشر
تحياتي

رابطة هويتي اسلامية said...

السلام عليكم ورحمه الله وبركاته

جزاكم الله خيرا يا اختى

نتمنى زيارتكم لنا فى رابطه هويتى اسلاميه

يسعدنا تواجدكم

SHAPE YOUR LIFE (ABOALI) said...

ايه ده اسمى موجودددددددددد
(وش مكسسسسسسسسسسسوف)

ماشاء الله على كل من حضر اللقاء
ربنا يبارك للجميع كلنا جوانا ذلك الانسان الذى ينبض بداخله ويتمنى ان يرتقى ويسمو

استمتعت فعلا بالروح التى شعرتى بها وانتى تتكتبى ذلك البوست
وكم كانت عيونك باسمة وهى تنقل الحدث

ولا ينقل النقاء الا شخص نقى


تحية ودعاء بكل البهجة فى حياتك

الجواز و سنينه said...

خيانه يا ست سول
بقى كنتى جايه و مش قلتى
طيب سيبى اوف لاين ماسج
كان يمكن جمدت قلبى و رحت
كل اصدقائك باعوك يا ريتشارد
يلا تتعوض ان شاء الله المره الجايه

adel said...

انا انبسطت اكرت اني شوفتك
وتوم و جيري اه بيتخنقوا
بس ده مايسببش اي مشاكل حقيقة يعني
:):):)

ENG./ELSAYED,PMP said...

سول:
سعيد جدا لسعادتك
كتير عليه الكلام ده
اتمنى فعلا ان تكونى استفدتى
اتمنى ان يغفر لى الجميع اى إساءة قد اكون ارتكبتها دون قصد حتى ولو نظرة او عدم نظرة
سعيد جدا لتفعيلك لما سمعتى

TRIZ
LATERAL THINKING
BRAIN STORMING
6 HATS OF THINKING FOR EDWARD DEBONO

اشياء جميلة يتقدم بها العالم

ونحن ما زلنا لا نستطيع ان نحب او على اقل تقدير يقدر او يحترم كلا منا الاخر


طولت على حضرتك


تحياتى

سيد

♥نبع الغرام♥♪≈ said...

مليون مبروك الكاس لينا حبيبتى

وحشتينى ياقمر جامد

♥نبع الغرام♥♪≈ said...

يارب تكونى انبسطى جدآ باللقاء

يارب مجمعين بالخير دايما

Cute Kitty **sookra said...

مصدومه فى صاحبتها ساسو
يامفتريه عليكى ربنا البنت بس كانت عاوزانى ابقى هاديه
اللى يقرى كدا يقول ايه اتصدمت واخدت مقلب وخلاص قطعت علاقتها بيه
انتى خليتى شكلى وحش جدا يادكتوره
بقى نقعد معاكى دقيقتين تقومى تسيحيلنا كدا
ماشى
موش هااقولك انى كويسه والحمد لله ولاحاجه
بس بجد زعلتنى الكلمتين دول

romansy said...

يا اهلا يا اهلا
بالمنصوره واللى جم منها
ايوه ايوه احنا نورنا القاهره
وبعدين بقى مالها الصيدلي دى مكتمله وشيك كمان بكل محتوياتها
يلا بس علشان تعرفى انى المنوفيين مش بخلا
وبعدين بقى انا فاتنى نص عمرى
من اللقاء اللى تم بينكم بعد ما انا مشيت
وعلى فكره من وجهه نظرى اننا نكون راس قطه افضل بكتير من ديل اسد لا ن مهما كان ديل الاسد دايما فى التراب
وراس القطه فى السما
انا سعيد قوى قوى انى اتعرفت على شخصيات جميله زى الدكتور ستيته وشمش وانتى وشيما ووليد وضياء ومحمد غاليه وابو على
ومحمد
كتير كتير
مش عاوز انسى حد
اللقاء اللى جاى بقى وبعدين خليكى بيسسسسسسس

Remas said...

انا زعلانة لانى مش شفتك

كنت بجد اتمنى اشوفك

الجميل انك راجعة مبسوطة

وان شاء الله اللقاء القادم اقدر اشوفك ونتكلم كتير

تحياتى لكى

mohamed ghalia said...

انا الى اسعد انى شوفت حضرتك
معلش بقى كنت مرتبط بمعاد كان لازم أمشى

هي وظروفها said...

اولا الف الف مبروك لكل مصر

ثانيا ربنا يخليكي علي كلامك الجميل عن الكل وعني انا وساره بصفه خاصه

ويارب تتكرر القاءات

ويديم علينا المحبه والود من غير مصالح ولا اي شيء سوي تلاقي الأرواح

مش شغل عفاريييييييييت ابدا

شغل مدونين محترمين شرفنا التعرف عليهم كووووووووولهم وعليكي ويارب دوام التوفيق والخير ليكي في حياتك الخاصه

فارس عبدالفتاح said...

على فكرة يا سول انت بقيتي بتشتكي كتير اليومين دول وده شيء مش ايجابي خالص

مفيش موضوع من المواضيع الاخيرة اللى وانت بتشتكي في أوله او بتتأسفي على عدم الرد

هي ايه الحكاية

همس الاحباب said...

نورتى القاهرة يا دكتورة
واسفين جدا لاننا معرفناش نقوم معاكم بالواجب بصراحة
بس سعدنا بتشريفكم وان شاء الله نتعرف اكثر فى لقاءات قادمة
ومتفق معك ان الحوار فى نهاية اليوم كان مثمر جدا
تحياتى

Kiara said...

انتي كنتي وحشاني اوي عارفه اخر مره كنا شايفين بعض فيها في شهر 6 يامفترية عاااااااااااااا

blue-wave said...

ياريتنى كنت معاهم:))

صوت من مصر said...

عاوز اقولك شكرا
والناس كلها عارفه
ده مش سر

قوس قزح said...

انا سعيدة انى شوفتك تانى و المرة دى كمان شوفت اختك الجميلة
ربنا يسعدك فى حياتك
و يجمعنا على الخير دايما

dreem said...

ازيك يا جميلة
انا بجد اتبسطت انى شوفتط انتى واختك جدا
وبرافو عليكى شاطرة بتسمعى الكلام
وبرضه عرضى لسة قائم .. شهر واحد بس انتى واختك ومش هتعرفوا نفسكم ههههههه
اتمنالك كل السعادة

د. ياسر عمر عبد الفتاح said...

اللقاء فعلاً كان جميل جداً
وجزاكِ الله خيراً على كلامك الجميل في حقي

فشكووول said...

السلام عليكم

متهيأ لى انه كان اكبر لقاء للمدونين لان حضره ناس كتيره قوى
كنت مخطط لان احضر هذا اليوم
لكن منها لله نزلة البرد
ان شاء الله فى لقاءات قادمه
بس يا ترى فيه عواجيز مكحكحين زى كدا كانوا موجودين
اظن انا كنت حاكون نشاز فى وسط هذه الباقه من الورد
عشان كدا احسن انى ما رحتش
شوية ورد وشوية زهور ايش يعمل فشكول فى وسطهم

تحياتى