الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

May 1, 2010

بداية ... من جديد



ازيكم يا جماعة ؟؟؟ أخباركم ايه؟؟؟

يارب تكونوا كلكم بخير .. و كل سنة و انتوا طيبين ، و يوم أجازة سعيد على الجميع ...


و يارب ايام السنة كلها أجازات ههههههههه ، نفسى اترحم من جرد كل يوم ، احسن خلاااااااص بجد

هنجت هنجت هنجت آخر تلت اربع خمس ست سبع تمن ....الخ حاجات .... :)


المهم ... انتوا اخباركم ؟؟ و أهرامكم؟؟ و جمهوريتكم ؟؟؟

بصراحة أنا ماليش عين اتكلم أصلا و عارفة انى مقصرة – اسطوانة قديمة و محفوظة


طيب الجديد إنى قرأت قدرا كدا عن حملة اسمها ( 30 يوم تدوين )

و بصراحة الكلام اللى كان مكتوب فى الاعلان بتاعها خلانى فى شديد الاحراج منكم كلكم ...

خلانى اقف مع نفسى و أعيد شوية حسابات ، و بردوا اتكلم معاكم بصراحة شوية ولو انها ممكن تزعل البعض


أولا : يعنى ايه واحد ييجى يزور مدونتى ، و يعلق عندى ، و تاعب نفسه حتى ان كانت ضغطة زر ... او حتى ماعلقش بس عداد الزوار بيقول ان عدد كذا النهاردة زارنى .. و أنا ماردتش على الناس دى ؟؟ بالذمة دى أصول؟؟

صحيح انى وقتى ضيق ، صحيح ان كتير بتكون نفسيتى لا تسمح انى ازور حد او اعلق عنده ، صحيح المذاكرة كتمت على نفسى و حاسة انى اغرق اغرق اغرق ... بس بردوا مش مبرر انى اقطع و اسيب الناس اللى بتزرونى كل يوم و التانى عشان جديد ... و المدونة لا حياة لمن تنادى

اللى بيعلقوا مش بيلاقوا رد فعل لتعليقهم ، و بصراحة دا مايصحش خالص ، على الاقل ردود مجمعة ...

و بالتالى يا جماعة فعلا فعلا بجد و عن صدق نية بإذن الله هأحاول أرجع زى ما كنت ، أكتب ولو مرة فى الاسبوع ، و أرد على التعليقات ولو مجمعة ، و أزور ولو مدونة واحدة فى اليوم ...


بس بشررررررررررررط

أرجوكم أرجوكم محدش يزعل ... يعنى مش معنى انى زرت النهاردة فلان او علان انى بافضله ، و ليه علقت عنده و ماجتش علقت عندى ، و يزعل منى ...

الزعل مرفوض مرفوض مرفوض يا ولدى ... :)


هأحاول انى أزور الكل ، و أعطى لكل واحد حقه ، بس بردوا بالراحة عليا ، لأن فعلا مضغوطة جامد .. لكن ليكم حق عليا ، لأنى لما بدأت فى المدونة دى بدأت عشان أتواصل مع ناس و يتواصلوا معايا ... صحيح ماكنتش فاكرة اننا نوصل لدرجة انى حاسة اننا فعلا عيلة واحدة ، بس دا يكتر من واجباتى تجاهكم ...

فمن هنا ، و من هذه الاراضى السولية ، بأعلن يا جماعة انى هأحاول ارجع للتواصل معاكم ، و هأشيل المنشور اللى محطوط فوق دا ... خلاص آسفون

لكن هذا لا يعنى إنى مشتركة فى الحملة ، لأنى مش هأقدر أدون كل يوم ، و صحيح جميل اننا نرجع لعالمنا و تواصلنا مع ناس عرفناهم و ارتبطنا بيهم ... لكن حرام ، هيلاحقوا على مين و لا مين و لا مين :)

عندى اكتر من 250 مدونة فى الريدر لو كل يوم واحد كتب بوست ، يبئا اعتزل التدوين بئا هههههههههههههههه

يعنى اعتبروا دى مقدمة كدا ... و يااااااااارب يااااااااااارب فعلا ارجع تانى

بس زى ما قلت ... مفيش زعل


ياللا سلام مؤقت .... :)


14 comments:

beautiful mind said...

السلام عليكم
والله دي مش مشكلتك وحدك دي مشكلتنا كلنا
لان الوقت ضيق والمفروض اننا نزور كل الناس ونرد بردو علي مواضعهم زي ماهم كمان بيعملوا نفس الحكايه
بس انا بقدر اتغلب علي المشكله دي لاني بقسم وقتي علي المدونات كلها
يعني احنا بس محتاجين نظبط وقتنا وكل شىء هايبقي تمام
تقبلي كل تحيه
وربنا يعينك

Soul.o0o.Whisper said...

بيوتفل مايند

و عليكم السلام و رحمة الله و بركاته
هى فعلا مشكلة عامة
خاصة لما يكون عندك وقت كبير فى الاول و مقضيه فى المدونات
و فجأة تتقطع لأن فى مسئوليات تانية جدت فى الامر

الامر فعلا محتاج تنظيم وقت و ربنا يعين الجميع

متشكرة جدا لزيارتك
و دمت فى رعاية الله

راء said...

جود جود جود :)

اول مرة ااجي وقريت كل حرف
بس اني افهم كلمة ^_^

لا بصراحة عداكي العيب يا بونيتي وأزح

استمري

كيكى عوووووو said...

ياستى
تكونى بينا وخلاااااااااااااااااااص

د/على خميس said...

السلام عليكم و رحمة الله و بركاته
خطوة ممتازة .... يا ريت أقدر أخدها انا كمان
ربنا يقويك
بارك الله فيك
تحياتى

رحلتنا في الحياة said...

ازيك ياجميل
ربنا يعنيك يارب واحنا مقدرين طبعا ظروفك
والمهم انك تكونى بخير
واهو بنحاول نوفق بين اوقاتنا والمدونة وساعات كتير جداااا انا فعلا مش بقدر اتابع باستمرار
بس فكرة الحملة دى باذن الله تشجع الواحد يتابع من تانى

Anonymous said...

السلام عليكم
ازيك الاول
صراحه مقصره فعلا
فعلا زيي كده بالظبط
مش عارف هذا الفيس بووك اللعين شكله هيقضى على التدوين
عودا احمدا
وشدى حيلك
وانا هاجى كل يوم العشر ايام اللى جايين ان شاء الله
بعدين هاختفى فى ظروف غامضه
تحياتى

واحد من الناس said...

السلام عليكم

طبعا ربنا ما يجيب زعل

وطبعا مقدرين الظروف والجوابات وكده

لأن كلنا في الهوا سوا

كلنا ساعات كتير أوي بنبأى مش فاضيين حتى ناكل

ولازم كل واحد يلتمس العذر لأخوه

والا نمشي بأى كل واحد مخاصم التاني وضارب بووووووز

طبعا مينفعش

عموما بتمنى بس تقدري تبتدي من جديد فعلا

أصلي ياما نويت ومقدرتش

والحمد لله إن النيه كان محلها القلب

وإلا كنت اتفضحت ع الملأ

والناس قالت إني بقول كلام مبعملوش

ربنا يعينك..ويعينا

سلام

Soul.o0o.Whisper said...

مقهورة
.......

اوووه ثانك يو ناثك يو
(( وش مكسوف
هههههههههه

شكرا جدا لزيارتك الاولى و اتمنى تكرارها

.........................

كيكىىىىىىىى
...........
تسلمى يا جميلة
و أسعدنى نعليقك

و ان شاء الله ربنا ييسر الامور

Soul.o0o.Whisper said...

د. على
......
و عليكم السلام و رحمة الله و بركاته

ربنا يعين يارب
و ياريت فعلا ترجع تفيدنا ببوستاتك الجميلة
و ربنا يبارك فيك و الاسرة الكريمة

..........................

أيووووووووووشة
..............
صديقتى الجميلة
الحمد لله بخير يا جميل

و يارب يقدرنا فعلا و نقدر نشجع بعض نرجع زى ما كنا
و هأحاول اتابع مشاركاتك فى الحملة ان شاء الله :)

Soul.o0o.Whisper said...

م . محمد
........

و عليكم السلام و رحمة الله و بركاته
الحمد لله بخير

احم احم
ايوا تمام حضرتك كدا بالظبط
:)

بصراحة أنا مش باحاول ادخل فيس بوك خالص
عشان عارفة انا لو دخلته مش خارجة منه
(( فكرة بردوا

مممممممممممم
طب استغل ال10 أيام دول ازاى؟؟؟
انزل كل يوم بوست؟؟؟

طب يارب ظروف غامضة ماتجيش عشان ماتختفيش فيها
ههههههههههه

......................

د.شادى
......

و عليكم السلام و رحمة الله و بركاته

شكرا شكرا
بصراحة مش عارفة اقولك ايه
:)

ربنا يعينا جميعا و نقدر نرجع تانى

جارة القمر said...

انا جاية اسلم عالحلوين

ويارب تكوني بخير

وصدقيني في ظروف كتير ممكن تمنع الناس انهم يتواصلوا

لكن مكانهم بيكون بالقلب محفوظ


وحشتيني

Soul.o0o.Whisper said...

جارة القمر
..........

الله يسلمك يا جميلة
و بجد مبسوطة جدا بزيارتك
و الف حمدلله على سلامتك

انتى كمان وحشانى كتير و يارب تكونى بخير

تحياتى

marmar said...

هههههههههههه ازيك يا حبيبه قلبي
يا ترى فكراني ولا نسياني يلا اذا كان انا ناسيه انا مين ههههههههه
شكلك هتعملي زيي وتخديلك كم شهر كده اجازه مع نفسك اصل انا مريت بظروفك والحمدلله شكلي كده تخطيتها ورجعت التدوين تاني ههههههههههههههه
خلي بالك من نفسك يا سكره
و ريحي بالك خالص ولو حتى غبتي هترجعي تلاقي ناس بتحبك وبتموت فيكي ومستنياكي