الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

May 3, 2010

مواهبى المدفونة


السلام عليكم و رحمة الله و بركاته

كيفكم يا شباب؟؟؟
بصراحة كنت عاوزة أتكلم معاكم فى كذا حاجة كدا

لكن من فترة كدا و أنا بأقلب فى أوراقى القديمة
لقيت كذا رسمة كنت راسماهم و أنا فى أولى ثانوى
و ياااااااااااااااااه
أفتكرت هوايتى مندثرة فى الرسم

أصل باحب الرسم اوىىىىىىى
و كانت مدرسة الرسم فى اولى ثانوى عاوزة تتبنانى
بس ياللا معلش
هههههههههههههه

المهم
قلت اشارككم هذه الموهبة اللى أول مرة أعرضها على صفحة مدونتى
و قولولى رأيكم فى هذه الموهبة التى كادت تندثر اللهم الا بعض تعبيرات فى مواقف بأتأثر بيها


نبدأ الاول بالرسمة دى
و دى كانت المدرسة فرحانة بيها أوى و بفكرتها
رغم انى شايفاها عادية يعنى

بس قولولى رأيكم فيها


-معلش الموبايل كان بيلفظ أنفاسه الاخيرة-


ماعلينا ... بس انا أصلا بأعشق حاجة اسمها الرسم بالقلم الرصاص أو القلم الفحم
ساعات كنت بارسم بالقلم الكحل ... << أستغلال الموارد المتاحة هههههههه

و كمان بأحب أنقل الرسمات بتكبير أو تصغير
و بأعشق كل ماهو عربى

مثلا الصورة دى


دا عقبال عندكم كان مشروع حصان
هههههههه
هو صحيح فى بعض تشوهات
بس الحمد لله
أصل الحادثة كانت صعبة أوى

و دى بتفصيل شوية



أما الصورة دى
فنقلتها من لوحة بتكبير
و اللوحة دى بجد باحبها اوى
مش عارفة ... بس بأحسها بتمس شئ جوايا


و دى فى ضوء خافت شوية



لكن بصراحة بئالى فترة طوييييييييييييلة جدا مش رسمت رسمة على بعضها
بس بعض المواقف بتخلينى ارسم شئ رمزى

يعنى مثلا دى تعتبر من أحدث الحاجات



" أمارات الألم ترتسم فى ملامحه
لينكس رأسه فى أسى ...
و يبتعد فى خطوات وئيدة تنم
عن خيبة امله ، وحسرته
على قصر ذات اليد ..
فمن أين له ببضعة مئات
من الجنيهات أجر جرعته من
ذاك الدواء ... "


و دا طبعا كان لموقف مر عليا فى الشغل اتأثرت بيه جدا


ياللا بئا قولولى رأيكم فى مواهبى المدفونة
:)

16 comments:

AhMeD RaDy said...

يا سيدى يا سيدى

ايه يا باشا الفن الجامد دا ..بلا حلوة فعلا ..

تسلم ايدك ياريت بس ترسمى تانى بقى ...

وتورينى الجديد كدا كل فترة

عطش الصبار said...

واللهى يا سول الرسم فعلا رائع اول رسمه حقيقى حلوه هو الرسم ده بيعكس الروح وداخلها
طيب يا سول ما تحاولى تانى لانك مش بترسمى بس انت بتقولى فكره
شكرا على زيارتك وطبعا مش زعلانه لان ما فيش ام بتزعل من ولادها ولا ايه
تحياتى

اسماء واحلام فى وجدانى said...

السلام عليكم ورحمة الله وبركاته

ازيك يا همس الروح

اللى قبلنا قالوا

إن غاب القط العب يا فار
يا ترا اخبارك ايه واخبار الاسهم ايه اكيد طبعا قلت الواد مات واعمل اعلام وراثة وارجع حقى بس انسى يا عمرو انا بسبعة ارواح زى القطط طبعا ما انتى عارفة الكلام ده انا جاى وعايز حقى49 %
ازيك يا دكتورة سول اخبارك ايه باعتذر عن الغياب ده كله وادينى راجع اهو باذن الله اتعب فيكم تانى
بس يارب تتحملونى

فارس عبدالفتاح said...
This comment has been removed by the author.
فارس عبدالفتاح said...

أولاً : أشكرك على الزيارة الجميلة .. وأرجو أن تستطيعين فك شفرة اللهجة المغاربية في تلك الابتهالات .

ثانياً : يقولون أن الفنون هي إحدى الطرق التي تعبر بها النفس البشرية عن ما بداخلها بعد اللغة . وأنا أظن بل أرجح أن ما بداخل الإنسان لا يستطيع الجسد الذي خلق من الطين أن يعبر عن النفس ووجدانها أو أن يعرض أحوالها من قريب أو بعيد قد يعرض تحولاتها من حال إلى حال من الفرح إلى السرور أو من الغضب إلى الغبطة .

لكن هناك أشياء حقيقية وجوهرية لا يستطيع الجسد الذين خلقه الله من الطين أن يعبر عن تلك الخلجات سواء باللغة التي تعجز عن التعبير في أوقات كثيرة عن تلك الخطرات أو بتلك الرسوم أو الغناء أو أي شيء آخر على الإطلاق .

اعتقد أن النفس لابد لها من هيكل آخر غير هذا الجماد الطيني حتى تعبر من خلاله عنها بطريقة صافية شفافة ودالة ..وقد يعتقد الإنسان واهماً أن تلك العبارات أو تلك الرسوم أو الأفعال الأخرى تعبر عن تلك الحال أو ذاك المائل للوجدان والفؤاد .. وهذا أيضا من الأشياء القاطعة على أن تلك الأشياء التي يتعلق بها الإنسان ما هي إلا تعبير عن عجز حقيقي عن تجسيد تباريحه الوجدانية
.. لكنة يظن واهماً أن هذه هي أنقى وأصفى تعبير عن التفاعلات الداخلية التي لا يفهمها غيره ..
ولما كان الإنسان لا يستطع أن يعبر عن تلك المشاعر وتلك الأحاسيس عليه أن يعيش فيها وان يشرب منها إلى حد الثمالة .. دون أن يفقد الإحساس بالواقع المادي .. ودون أن يدخل في الأوهام


لأنه إذا دخل في مرحلة الأوهام فإنها إذا خطرت وقف فوق المجرة وهو قعيد في الأرض ذو زمان .. ولن يبرح مكانه إلا أن يشاء الله


عفواً


على فكرة قد يستطيع إنسان آخر أن يفهم ويشعر بوجود تلك الخلجات والتباريح عند شخص آخر ويفهمهاً جيداً

لكنه أيضا لا يستطيع أن يوصفها له بالطريقة التي هو نفسه ( أي الشخص الآخر ) ، أن يرضى بها عن ذاك الوصف ويعتقد انه قد بلغ الكمال والجمال في وصفها تجسيدها عبر الكلمات أو الرسوم أو غيرها من التعابير

وهذه أيضاً مشكلة حقيقية وجوهرية في وصف أحوال الذات البشرية

أحــوال الهـوي said...

فنان يا دكتور

و بعدين صورة الحصان من زاوية صعبه جدا

التفاصيل الصغيرة بتدل علي موهبة جميلة

تحياتي

راء said...

هههههههههههه

يجامد يجامد
ده بلوجر مليان مواهب غيري طبعا انا عارفة اني موهوبة من زمان ^_^
(احلى ما فيا التواضع ديه ميزتي الوحيدة )

عجبتني اكتر حاجة صورة الراجل ..والكلام بتاع اخر صورة ده راااائع

الحصان منظوره غريب اوي ومش واضح شوية بس شكله امور من قريب (بعاكسه ايوه عندك مانع )

يللا سلام عاوزة انام :)

فشكووول said...

لأ .. مش معقول ياسول
وانت كنتى فى تانيه ثانوى كانت دى رسوماتك

دى رسوم تشكيليه ما يعرفش يعملها الا ناس كبيره وفاهمه
لكن انت تعملى كده
على فكره انت دخلتى الصيدلة غلط ولو كنتى دخلتى فنون جميله كان زمانا بنسمع عنك فى التليفزيون والجرايد والمجلات
تحياتى

Tarkieb said...

والله صور جميلة ومش تقليدية يعني وانت صغيرة كنت موهوبة بجد ودماغ كمان يارب الموهبة والدماغ تكون عوامل الدراسة والشغل ما تكن طيرتها بجد حاجة حلوة اوووي

Soul.o0o.Whisper said...

AhMeD RaDy
...........

متشكرة جدا لكلامك
و ادينى باحاول اهو

انت متخصص رسم و لا ايه؟؟؟
:)

...........................

أستاذتى الغالية اوى اوى / عطش الصبار
..........

حقيقة ان زيارة حضرتك هى الاروع و سعيدة جدا بيها
أنا فعلا مش بأقدر أكتب أو أرسم إلا لشئ أنا باعبر عنه
شئ لمجرد الهواية و خلاص
يمكن عشان كدا بتطلع معبرة !!...
هههههههههههه

طبعا شرف ليا و انا فعلا باعتبر حضرتك والدتى

دمتى بكل الخير

........................

أسماء و أحلام فى وجدانه
..................
و عليكم السلاااااام و رحمة الله و بركاته

يااااااااه
عشان من شافك

الحمد لله بخير .. انت اخبار حضرتك ايه؟؟؟
و أخبار قطط حضرتك ايه؟؟
:)

بعد الشر عليك يا أحمد
هو صحيح مفيش مانع أحاول استرد ممتلكاتى ، بس هو مفيش غير الطريقة دى؟؟

نورت بلوجر من تانى

Soul.o0o.Whisper said...

فااااااارس
..........

يافندم بعض ما عندكم :)

أما بخصوص الفن
فأنا أوافقك الرأى تماما ان يمكن مفيش انسان بيقدر يعبر عن اللى جواه زى ماهو
و بردوا ماعتقدتش ان فى انسان هيحسك من تعبير انت عبرت بيه

يمكن يحسك لو انت قدامه
او لو هو قريب منك

لكن ماقدرش انكر بردوا ان فى ناس ابدعت عن التعبير عن فكرة ما
او احساس ما هى حست بيه

الرسمة او اقصوصة ادبية بالنسبة لى هى وسيلة تنفيس و تعبير عما يجول بالخاطر
و هى أولا قبل كونها رسالة إلى الآخر ليفهم مابى
فهى بالدرجة الاولى متنفس لفكرة او احساس محبوس داخلى يجد صداه مايبن سن القلم و الورقة فيخفف عما يعتمل داخلى

يعنى فعلا باستريح جدا لما اعبر عن اللى جوايا سواء برسم او كتابة :)

ارجو تكون فكرتى وصلت
و أظن انها كذلك

.......................

أحوال الهوى
.........
دكتورى العزيز

كلمات حضرتك دايما بتدينى دفعة للامام
شكرا ليك جدا
:)

....................

مقهوووووووورة
............

خلاص أنا سميتك مقهورة :)

طبعا يا بنتى انتى موهوبة من زمان
دا الناس بتحاول تقلدك بس مش عارفة
( وش بيغمز

الحمد لله ان الصور عجبتك
و عاكستى الحصان
ياااااه دا هيفرح اوى
ههههههههههه

انتى لسه نايمة من ساعتها
ربنا يكون فى عونه
( السرير يعنى
هههههههههه

Soul.o0o.Whisper said...

عمو فشكووووووول
...............

ياه ياعمو فشكوووول
بجد مبسوطة اوى اوىىىىىى ان حضرتك شرفتنى و نورتنى و كل حاجة فيها ... تنى تنى
ههههههههههههههههه

اه شفت بئا ازاى يا عمو
مش باقولك موااااااااااهب
انا خسارة فى البلد دى مش مصدقين
هههههههههههههههه

ياللا ملحوقة ان شاء الله
انا بس أخلص الماستر
و آخد الدكتوراه ان شاء الله
و بعدها اكمل فنون جميلة :)
شفت ناس متفائلة اكتر من كدا؟؟؟


يارب تكون بخير دايما
..............

Tarkieb
........

أولا : شرفتنى فى صفحتى المتواضعة
ثانيا : شكرا جدا لكلامك
بس أشك فى حكاية الموهبة و الدماغ
أصل عوامل التعرية فوق المستوى الطبيعى فى بلدنا :)

فارس عبدالفتاح said...

وصلت بوضوح شديد


اههاههاهاهاهاهههههه

اسماء واحلام فى وجدانى said...

أسماء و أحلام فى وجدانه
بداية مبشرة جدا
انا الحمدلله بخير وعايش وباتنفس كمان
والقطط بخير الحمدلله يا افندم
بعد الشر عليك يا احمد
ربنا يكرمك يا همس يارب
بس رجاء بلاش تحاولى تستردى شىء لانك مش هتعرفى لان اللى يدخل ارض الهامى مش بيخرج منها ابدا
وبعدين انا محافظ وهاحافظ عليهم طبعا و ده شىء مفروغ منه
ادعيلى بس ربنا يقدرنى على السهمين الباقين دول عشان تبقى مشاركة ابدية باذن الله
صحيح اخبار شذى ايه وياسمين يا ترا لسة بتكتبلها جوابات ولا بقت تكتب بنفسى السلام مش امانة لكن بقدر المستطاع لو قدرتى شوفتى بقى انا بارعى ظروفك ازاى

اسماء واحلام فى وجدانى said...

نسيت اقولك حاجة مهمة جدا
مش هو ده بردو الحصان اللى كان بيجرى وراكى فى الغيط ولا ده حصان تانى
هو لو كان واحد تانى يبقى اكيد هما الاتنين قرايب لان الحصان بطبيعته طيب وحنين اوى مش معقول يجرى ورا حد طيب زيه اللى لو كان عنده اخبارية ان الحد ده حاول يشوه صورته فى المجتمع البيطرى

Soul.o0o.Whisper said...

فارس
....

:)
منور المدونة

...........
احمد الهامى
........

أنت محافظ و لا وزير؟؟
على فكرة الناس دى انا ماليش تعامل معاها :)

اه ... يعنى صباح الخير يا جارى انت فى حالك و انا فى حالى


اما ياسمين ... فللاسف ماعدتش باشوفها خالص
و شذى ... اهئ اهئ ، وحشانى مووووووت

اممممممممم
حاول يشوه صورته فى المجتمع البيطرى؟؟
أنا حاولت نشويه صورته بس فى المجتمع الفنى
تفتكر تكون الاخبارية وصلت له بردوا؟؟؟