نهاية الصيد

معلش يا جماعة إنى قطعت الخاطرة بالبوست اللى فات ... بس قلت يعنى ... فاصل و نواصل :)

يكمل ابن الجوزى كلامه قائلا :( فغاية الأمر أننى أشرع فى التقلل من الدنيا ، و قد ربيت فى نعيمها ، و غُذيت بلبانها ، و لطُف مزاجى فوق لطف وضعه بالعادة " يعنى من الآخر مالقيتش غير انى أقلل بئا من الدنيا ، و أنا اللى اتربيت على الترف و النعيم ، و خلاص اتعودت على المستوى دا ، و كنت مبسوط و مستريح بكدا " فإذا غيرت لباسى و خشنت مطعمى-لأن القوت لا يحتمل الانبساط- نفر الطبع لفراق العادة " فلما بدأت ألبس لبس بسيط ، و يادوب أكل على الأد ، و مش حاجات فخمة زى ما كنت متعود -و دا طبعا لأن اللى باكسبه مش هيكفى انى أصرف و أعيش زى ماكنت متعود- نفسى تقلب عليا لأنها مش متعودة على كدا " فحل المرض فقطع عن واجبات ، و أوقع فى آفات " و تلاقينى مرضت ، و طبعا دا بيخلينى أقصر فى الواجبات اللى عليا ، و طبعا فى سلبيات بتترتب على كدا " ومعلوم أن لين اللقمة بعد التحصيل من الوجوه المستطابة، ثم تخشينها لمن لم يألف سعى فى تلف النفس " و طبعا لما الواحد يكد و يتعب و يلاقى لقمة حلوة ،حاجة كدا تفتح النفس ، بيكون سعيد ، لكن يقوم قالب نظامه مرة واحدة من غير ما يكون متعود على كدا ... دا فيه تلف لنفسه ، و هتقلب عليه "

فأقول : كيف أصنع و ما الذى أفعل ؟ و أخلو بنفسى فى خلواتى ، و أتزيّد من البكاء على نقص حالاتى " فأقعد اقول : طب يارب أعمل ايه؟؟ و اتصرف ازاى الوقتى؟؟ ..و اقوم واخد بعضى و قافل عليا ، و اقعد ابكى على انى مش قادر احقق نفسى فى أى حاجة من اللى فاتوا ..."

و أقول : أصف حال العلماء و جسمى يضعف عن إعادة العلم ، و حال الزهاد و بدنى لا يقوى على الزهد ، و حال المحبين و مخالطة الخلق تشتت همى و تنقش صور المحبوبات من الهوى فى نفسى ، فتصدأ مرآة قلبى و شجرة المحبة تحتاج إلى تربية فى تربة طيبة لتسقى ماء الخلوة من دولاب الفكرة " فلا أنا قادر أكون من العلماء اللى قاعد بوصفهم ، و دا لأنى مش قادر على طلب كل انواع العلوم ، و لا قادر أكون من الزهاد لأنى مش واخد على التقشف و الحياة الصعبة دى ، و لا قادر أكون من المحبين بجد ، و دا لأن اختلاطى بالناس بتخلينى مشتت الذهن ، و غصب عنى بأشوف حاجات اللى من الطبيعى اننا كلنا بنحبها و نشتهيها و نفسى بتروح لها فتلاقى قلبى ماعدتش صافى لحب ربنا و بس ، فتلاقيه قسى ، و شجرة المحبة عشان تكبر و ترعرع عاوزة تربة طيبة تكون المية اللى بتسقيها هى الخلوة و البعد عن الناس و بالتالى عقلى و قلبى يكونوا صافيين خالصين لحب ربنا و القرب منه بس " و إن آثرت التكسب لم أطق ، و إن تعرضت لأبناء الدنيا مع أن طبعى الأنفة من الذل ، و تدينى يمنعنى ، فلا يبقى للميل مع هذين الجاذبين أثر، و مخالطة الخلق تؤذى النفس مع الانفاس " و إن قلت خلاص بئا خلينى أنزل أشتغل أهو أجيب فلوس و أعيش زى ما الناس عايشة ، مش بأقدر لأنى ماتعلمتش صناعة ، و إذا قلت خلاص خلينى أشتغل مع حد من اللى عارفين ازاى يكسبوا بردوا مقدرش لأن طبعى ماقدرش أتذلل لحد ، و كمان تدينى يمنعنى انى أعمل زيهم و أظلم الناس .. و بالتالى بردوا مش عارف أكسب لقمة عيش ، دا غير ان مخالطة الناس أصلا بتتعبه نفسيا و جسديا " و لا تحقيق التوبة أقدر عليه ، و لا نيل مرتبة من علم أو عمل أو محبة يصح لى " فلا أنا قادر أتوب توبة صحيحة نصوح ، و لا قادر أتفرغ للعلم أحصل فيه ، و لا قادر أعمل فأتكسب من وراه ، و لا محبة نافعة لأنها محبة بدون دليل عليها ...")

و توتا توتا خلصت الخاطرة ...

ياللا مرة من نفسكو يكون البوست قصيييييييييير شوية ههههههههه ...

و أشوفكو المرة الجاية ان شاء الله

عندما نتوه

عندما نتوه فى دروب الحياة ، و لا نجد من يقودنا إلى الطريق الصحيح ...

و نقف حيارى مذهولين ...

متسائلين : ماذا حلّ بنا ؟؟ و ماذا سيحل بنا؟؟!!

أين نحن ؟؟ و من نحن ؟؟!!!

نتلفت حولنا ، فلا نجد سوى صحرا قاحلة ،و شمس آفلة ...

و ظلام يتقدم نحوك فى سكون قاتل ...

تشخص ببصرك إلى أعلى ، فتجد الغيوم قد حجبتك عن باب السماء ...

تشعر بضباب كثيف يكتنفك ..

تصرخ ، تضرب بذراعيك فى اللاشئ ...

تحاول أن تتشبث بأى شئ ...

لا شئ سوى الضباب و الظلمة ...

تشعر بأنك تسقط ...

تتهاوى إلى قاع سحيق ...

الضغط حولك سيفجر رأسك ، دموعك تنهمر فى غير تحكم ...

تضرب بكلتا يديك ، بكلتا قدميك ...

ترتطم ... ليتضعضع جسدك ...

تعتقد أنك قد انتقلت إلى العالم الآخر ...

تفتح عيناك بروية متوجسا ، ماذا عساى سأرى فى هذا العالم المهيب !!...

تصطدم عيناك حال تفتحها بذاك الضباب الكثيف ، الذى ما يلبث أن يخفت تدريجيا ،

لتتضح معالم المكان أمام ناظريك ...

تنهض لتتفحص ما حولك ...

هنا .. تجد بعضا من بقايا طفولتك ، ضحكتك البريئة فى تلك الصورة أثارت شيئا بداخلك ...

طيش الشباب و سكرته ارتسم بكل ملامحه فى تلك اللوحة المعروضة أمامك ...

أما ما تقف أمامه الآن ، فمازال خافت الألوان ، لم تتضح ملامحه بعد ..

لتكتشف ، و ياللقدر .. أنك هبطت إلى قرارة نفسك ...

فرصة من فرص الحياة كفلتها لك لتكتشف حقيقة أمرك ...

و لتعلم أن بيدك أن ترسم ملامح كل لحظة تمر بها ، و لكنك غافل ساه ٍ عنها

تترك ما حولك ليرسمها لك كما يحلو له ...

ثم تجلس أنت لتبكى على ملامحها ، و تندب من فعل بك هذا ،

و لا تدرى أنك من فعلت هذا بنفسك !!!

حقيقة التكليف !!!

طبعا البوست اللى فات شفنا كلام ابن الجوزى – رحمه الله- وإزاى هو شايف انه مثقل بالتكاليف ، و أخد نفسه كمثال يشرح عليه عبء التكاليف دى ، و طبعا فى تكاليف مفروضة علينا جميعا ، و فى تكاليف حسب كل فرد و القدرات اللى ربنا معطيهاله ...

و أحب يا جماعة أنوه عن شئ ربما هأحاول أتكلم عنه بالتفصيل بس لما أخلص الخاطرة دى ، و هى إنى أوردت الخاطرة دى بالذات لسببين ، الأول : التأكيد على ان السلف كانوا فاهمين التكليف صح ، و مش انى أعتزل الدنيا و كل همى هأصلى اد ايه ، و اذكر ربنا كام مرة و بس – و طبعا الكلام دا أصلا أساسى و مفيش عليه خلاف – لكن بردوا فهموا ان السعى فى الدنيا و التنعم بطيباتها ،و دورة الحياة اللى احنا بنسميها سنة الحياة داخلة فى حيز الدين ، و لما نحاول ندخل الدين فى تعاملاتنا و احداثنا اليومية دا مش استحداث للدين داخل الدنيا ، لا .. دا المفروض يكون فهمنا الصحيح للدين و احنا بنتعامل فى حياتنا عادى ...

السبب التانى بئا : وهو شخصى شوية ، هو انى كل ما بأتعب من مشاكل بأمر بيها من مشاكل الحياة اللى ممكن تصيب اى واحد فينا بالاحباط ... الخاطرة دى بتفوقنى ، و تصبرنى ، و تقولى مش انتى لوحدك اللى كدا ، اللى قبلك بردوا مروا بأشد من كدا ... و رغم ان كلماتها بتجيب لى اكتئاب زيادة ، لكن لما أشوف صاحبها ماستسلمش ،و كفاية ان سيرته و اعماله باقية ليومنا هذا ... بأقول لنفسى دا حجة عليكى ، لأنه فهم صح و حاول يطبق اد ما يقدر ، و رغم انه ماوصلش للى عاوزة تمام ، لكن سعى ، و ماقعدتش يعيط و خلاص ، و يقول هأقدر على ايه و لا ايه ... و أكيد ان شاء الله ربنا هيؤجره على نياته دى كلها اللى هنشوفها فى باقى الخاطرة ، و كفاية بجد ان ذكره لسه باقى لحد النهاردة و بياخد حسنات عليه ، و ان شاء الله يوم القيامة يكون و احنا معاه من أصحاب الجنة ... يااااااااااااارب

نكمل بئا كلامه بيقول ايه؟؟... ( ثم إن العلم دلنى على معرفة المعبود ، و حثنى على خدمته ، ثم صاحت بى الأدلة عليه إليه ، فوقفت بين يديه ، فرأيته فى نعته ، و عرفته بصفاته ،و عاينت بصيرتى من ألطافه ما دعانى إلى الهيمان فى محبته، و حركنى إلى التخلى لخدمته ، و صار يملكنى أمر كالوجد كلما ذكرته ، فعادت خلوتى فى خدمتى له أحلى عندى من كل حلاوة " بيقول لما اتعلمت ، العلم دا عرفنى بربنا – و احنا قلنا قبل كدا ان اى علم نافع لازم فى النهاية بيقودك لربنا – و دفعنى انى اتقرب له بالطاعات ، و لما شفت أدلة محسوسة بتنطق فعلا بوحدانيته ، دا دفعنى بزيادة انى اعبده ، فرحت له ووقفت بين ايديه ، و حاولت انى اعرف صفاته و انى اتلمسها حواليا ، فلما حسيت دا فعلا و شفته ببصيرتى ، و فهمت اللى ورا الاحداث ، و حكمة ربنا منها ... دا خلانى احبه بزيادة ، و اهيم فى حبه ، و بئيت عاوز بس انى اختلى بيه ، و فعلا بئيت اختلى بربى و اعبده بس – خلوا بالكوا هو قال ايه؟؟ دعانى إلى الهيمان و حركنى ، يعنى مش كفاية شعورنا ايه، لا لازم عمل كمان – و بئا كل ما يذكر اسم الله أحس احساس المشتاق لحبيبه ، فأجرى اختلى بيه ، فأصبحت الخلوة دى عندى أحلى من أى حاجة تانية " فكلما ملت إلى الانقطاع عن الشواغل إلى الخلوة، صاح بى العلم : أين تمضى؟ أتُعرض عنى و أنا سبب معرفتك؟ " يعنى خلاص لما جهزت نفسى انى ماعدش اى حاجة هتشغلنى و انى اعيش حياتى فى خلوة بربنا بس ، ألاقى العلم بيوقفنى و يقولى ايييييييه ؟؟ رايح فين؟؟ أنت هتسيبنى و أنا السبب فى انك تعرف ربنا و تحبه كدا ؟؟" فأقول له : إنما كنت دليلا ، و بعد الوصول يُستغنى عن الدليل " فأرد عليه و اقوله : لالالا، انت كنت دليل بس عشان ماكنتش عارف السكة ، انما لما عرفتها خلاااااص ، شكرااااااا كفاية عليك لحد هنا " قال : هيهات! كلما زدت ، زادت معرفتك بمحبوبك ، و فهمت كيف القرب منه ، و دليل هذا أنك تعلم غدا أنك اليوم فى نقصان ، أوما سمعته يقول لنبيه صلى الله عليه و سلم ( و قل رب زدنى علما ) " رد عليه العلم و قاله : بيتهيئلك ، لأنك كل ما هتتعلم ، كل ما هتعرف عن حبيبك زيادة ، و هتعرف ازاى تقرب منه ، و الدليل على كدا بكرة لما تعرف أكتر ، هتعرف انك اليوم كنت ناقص فى علمك ، انت ماسمعتوش وهو بيقول للرسول صلى الله عليه و سلم فى القرآن ( وقل رب زدنى علما ) – و دا يا جماعة الأمر الوحيد فعلا فى القرآن اللى ربنا أمر الرسول صلى الله عليه و سلم بالاستزادة منه ، وهو العلم ، ربنا يعلمنا جميعا يارب ، و يزيدنا علما " ثم ألست تبغى القرب منه ، فاشتغل بدلالة عباده عليه ، فهى حالات الأنبياء – عليهم الصلاة و السلام- أما علمت أنهم آثروا تعليم الخلق على خلوات التعبد لعلمهم أن ذلك آثر عند حبيبهم؟ أما قال الرسول – صلى الله عليه و سلم-( لأن يهدى الله بك رجلا ، خير لك من حُمُر النعم ) ؟ " و بعدين مش أنت عاوز تقرب منه؟؟ خلاص روح علم الناس ازاى تقرب من ربنا طالما انت عارف ، مش دى كانت حال الانبياء عليهم السلام ؟؟ لأنهم عرفوا ان دا أحب لحبيبهم ؟؟ اه ، مانت تقرب للى بتحبه بطريقته هو ، مش طريقتك انت ، انت ماسمعتش حديث رسول الله صلى الله عليه و سلم ( لأن يهدى الله بك رجلا ، خير لك من حُمُر النعم ) "

فلما فهمت صدق هذه المقالة ، تهوّست على تلك الحالة ، و كلما تشاغلت بجمع الناس تفرق همى ، و إذا وجدت مرادى من نفعهم ، ضعفت أنا ، فأبقى فى حيز التحير مترددا ، لا أدرى على أى القدمين أعتمد " لما فهمت كلامه و عرفت انه صدق ، اتجننت ... فعلا لازم اعمل زى ماهو بيقول ، فأقوم أجمع الناس عشان أكلمهم عن ربنا ، فألاقينى مشتت لأنى لازم اكلم دا بطريقة و دا بطريقة ، و أشرح لدا و أفهم دا .. و لما ربنا يوفقنى و أوصل للى عاوزه أكون خلاااااااااص خلصت ، فأبئا متردد و متحير ، يارب أعمل ايه؟؟ أختلى بيك و اعبدك؟؟ و لا أروح أعلم الناس؟؟ " فإذا وقفت متحيرا ، صاح العلم : قم لكسب العيال ، و ادأب فى تحصيل ولد يذكر الله " فلما اتحير كدا يجيلى العلم : انت مش هتروح تشتغل و لا ايه؟؟ انت مش وراك عيال عاوزين اكل و شرب و غيره ، و كمان تعليمهم ، هما مش دول أمانة عندك و لا ايه ؟؟؟ " فإذا شرعت فى ذلك ، قلص ضرع الدنيا وقت الحلب، و رأيت باب المعاش مسدودا فى وجهى " فأروح عشان أشتغل ، ملاقيش ولا باب مفتوح ممكن أكسب منه ، وصور الحالة زى الضرع لما ييجى وقت حلبه ، متلاقيش فيه لبن !!! " لأن صناعة العلم شغلتنى عن تعلم صناعة " و دا لأن تعلم العلم أخد وقته كله ، و ماقدرش يتعلم اى صناعة .. يعنى بجانب العلم كمان لازم نشتغل و نكسب ، دا من الدين ، مش نتحجج بالعلم !!"

فإذا التفت إلى أبناء الدنيا ، رأيتهم لا يبيعون شيئا من سلعها إلا بدين المشترى ، و ليت من نافقهم أو راءاهم نال من دنياهم ، بل ربما ذهب دينه و لم يحصل مراده " ياااااااااااااه دا الكلام دا كان على ايامه بردوا !! إنه لما بص لحال الناس اللى عاوزين الدنيا حواليه ، لقى انه لازم يتنازل عن حاجات كتير اوى من الدين عشان يقدر يتعامل زيهم و يكسب زيهم ... اه ، لازم يطفف فى الميزان ، و يخدع الزباين ، و يزين الوحش ...و غيره و غيره ، و ياريت فى الآخر بيكسب أكيد ، لا دا ممكن يمشى وراهم و يفقد التعاملات اللى الدين قاله عليها ، و بردوا مايكسبش " فإن قال الضجر : اهرب، قال الشرع :( كفى بالمرء إثما أن يضيع من يقوت " وفى رواية يعول" ) ، و إن قال العزم : انفرد ، قال : فكيف بمن تعول " يعنى لما بتضيق بيا و خلاص مش قادر يجيلى الضجر – القلق من الغم – و يقولى :خلاص اهرب و سيب الدنيا دى ، فيجيلى الشرع و يقولى : اقف .. انت مش عارف انه اثم كبير اوى انك تضيع اللى انت بتعولهم ؟؟ ... ايه دا؟؟ يعنى اقوم الصبح من بدرى و انزل الشغل و اتبهدل فى المواصلات و دمى يتحرق فى الشغل و أرجع نفس موال المواصلات عشان انام مهدود و اصحى تانى يوم عشان اجرى الحق .. كل دا مفروض اتحمله ، و ربنا هيؤجرنى عليه .. اه ، أكيد ، طيب مش قادر بردوا ، فيقوم العزم يقولى : خلاص خليك فى نفسك ، كفاية تعول نفسك ، يقوم الشرع يقف لى بردوا : واللى أنت مسئول عنهم دول؟؟؟ " .....

طبعا أنا لو كنت مكانه كنت قلت لكم : غطونى و صوتوا عليا ... :)

اه .. يعنى صراحة ربنا يكون فى عون الشباب ..

و لحد كدا و المأساة لسه مخلصتش صراحة .. بس أنا طولت عليكم اوى ، و المرة الجاية ان شاء الله نختم الخاطرة دى ...

دمتم فى رعاية الله

رحلة صيد

كيفكم يا شباب؟؟ أخباراتكم؟؟؟

يارب تكونوا كلكوا تمام ، و مزاجكم عال العاااااااااال .. زيى كدا بالظبطططططططططط :(

الله المستعان ...

معلش أنا مقصرة فى الزيارات و الرد على التعليقات ، لكن بجد فى حالة لا تسمح ...

وكنت ناوية الحقيقة إنى أكئبكم بكام بوست كدا ، اشمعنى أنا يعنى اللى عايشة فى الحالة دى – حقد دفين بعيد عنكم ، يا ساااااااااتر يارب ...

لكن أنا قررت إنى أخرج نفسى من الحالة دى لأنى فعلا تعبانة ، و محتاجة شوية أوكسجين ، شوية refreshment

و قلت أخدكم رحلة صيد تانية ... ايه رأيكم ؟؟

خاصة إنى بئالى فترة طويلة مااصطدتش بصراحة ، و نفسى أغير جو ...

طيب ، هيا بنا نصطاد .. و معلش هتكون رحلة طويلة شوية ، ممكن نقسمها على مرتين :)

يقول ابن الجوزى – رحمه الله- : ( قلت يوما فى مجلسى : لو أن الجبال حَمَلَت ما حُمِّلتُ لعجزت " من كتر ماهو شايل و حاسس ان فى حمل كبير اوى عليه ، خلاص حاسس ان حمله دا ماتقدرتش حتى الجبال عليه " ، فلما عدت إلى منزلى، قالت لى النفس: كيف قلت هذا؟ و ربما أُوهم النّاس أن بك بلاء، و أنت فى عافية فى نفسك و أهلك؟ و هل الذى حملت إلا التكليف الذى يحمله الخلق كلهم ؟ فما وجه هذه الشكوى؟ " طبعا نفسه لامته- ربنا يجعلنا من الناس اللى ضميرها صاحى دى – المهم، قعدت تؤنبه انت قلت كدا ليه؟؟ كدا الناس هتفتكر انك تعبان و لا حاجة ، و انت الحمد لله ربنا ساترها معاك فى نفسك و أهلك – شايفين بيفتكر فضل ربنا عليه ازاى ، مش الناس اللى مش شايفه غير السواد ، يا ساتر!! – و بعدين انت ماشلتش اكتر من طاقتك ، ما كل الناس زيك ... يبئا ليه تشتكى بئا ؟؟!!!" ...

فأجبتها : إنى لما عجزت عما حملت، قلت هذه الكلمة لا على سبيل الشكوى، و لكن للاسترواح، و قد قال كثير من الصحابة و التابعين قبلى : ليتنا لم نُخلق! و ما ذاك إلا لأثقال عجزوا عنها " يعنى أنا لما حسيت ان خلاص ماعدتش قادر ... قلت الكلمة دى باصبر بيها نفسى ، مش باشتكى بيها .. و بعدين مش أنا لوحدى اللى قلت كدا ، ماكتير من الصحابة قبلى قالوها ، لأنهم حاسين انهم شايلين حاجة تقيلة مش قادرين عليها – و دا طبعا مش تمرد ، لكن دا من احساسهم انهم لم يؤدوا واجبهم كما ينبغى ، فالشعور بالتقصير فى أداء حق الله مفروض نحس بيه دايما لأننا فعلا مش بنأديه كما ينبغى ، لكن دون القنوط من رحمته – " ، ثم من ظن أن التكاليف سهلة، فما عرفها ، أترى يظن الظان أن التكاليف غسل الأعضاء برطل من الماء ، أو الوقوف فى محراب لأداء ركعتين؟ هيهات؟ هذا أسهل التكليف ، و إن التكليف هو الذى عجزت عنه الجبال " يعنى اللى يفتكر ان التكاليف سهلة و هينة غلطان ، بس مهما كان التكليف فهو مش خارج عن قول الله ( لا يكلف الله نفسا إلا وسعها ) يعنى هى كدا كدا نقدر نتحملها ، بس لازم يكون فى تعب و اجهاد و ألم ( أم حسبتم أن تدخلوا الجنة و لما يعلم الله الذين جاهدوا منكم و يعلم الصابرين) زيادة على كدا خوفك و رجاءك ، يارب هتقبل منى عملى دا و لا لا؟؟ و اللى فاكر ان التكليف دا هو الوضوء او الصلاة ، فدا اسهل حاجة فى التكليف ، لكن التكليف بجد ، التكليف الحقيقى هو اللى الجبال فعلا ماقدرتش تشيله " ...

و من جملته : أننى إذا رايت القدر يجرى بما لا يفهمه العقل، ألزمت العقل الإذعان للمقدر، فكان من أصعب التكاليف، و خصوصا فيما لا يعلم العقل معناه، كإيلام الأطفال، و ذبح الحيوان، مع الاعتقاد بأن المقدِّر لذلك و الآمر به هو أرحم الراحمين " يعنى كمثال ع السريع –للتكليف اللى بجد- ان أمور جدا فى حياتنا بتحصل بنكون مش فاهمين هى بتحصل ليه ؟؟ و لا شايفين لها اى لازمة، أو نستغرب اوى من حدوثها و نتعجب ، لكن المفروض مننا إن يكون جوانا ايمان حقيقى ان اللى بيحصل دا لحكمة ، و إن ربنا ماقدرش شئ عبثا، و فوق كدا كل دا رحمة ، مهما كان الحدث ، زى مثلا أمراض الاطفال و تألمهم – فاكرين قصة موسى مع الخضر؟؟- " ، فهذا مما يتحير العقل فيه ، فيكون تكليف التسليم، و ترك الاعتراض، فكم بين تكليف البدن و تكليف العقل ! " كتير من الاحداث فعلا تحير العقل ، و نقعد نقول هو معقول ربنا يكون رايد كذا من الحدث الفلانى .. لالالا أكيد فى حاجة غلط ، طب هو ليه ربنا خلى كذا يحصل؟؟ ..لااااااااا أقف هنا ، مدام حصل ، يبئا أكيد ربنا قدره لحكمه ، و هنا أنت مأمور بالانقياد و التسليم بإن ربنا أمر بيه لحكمة خافية عليك ، لكنها معلومة عند ربنا ... قدرت على نفسك و عقلك و خليته يسلم ، هنا انت كدا بدأت تنفذ بعض التكليف اللى انت مأمور بيه ... فضلت تئاوح ، و مش مقتنع .. أعرف ان انت اخفقت فى حمل بعض التكليف اللى انت مأمور بيه ، لكن يا جماعة دا مش معناه انى لا أبحث وراء حكمة حدوث الامور .. لا، أبحث و أدور ، لكن جوايا يقين راسخ انه لحكمة ، و انه أكيد الخير ، و انه أرحم بكتير من امر أكبر كان ممكن يحدث ، هنا أنت بتدور و انت مسلم لربنا بقدرته على تصريف أموره ، و حكمته فى تقديره دا ... لكن انك تدور و انت مش مقتنع أو بتشكك ، فأنت هنا بتقول لربنا انك مش مقتنع انه حكيم لطيف رحيم ، و بكدا عمرك ما هتوصل .. لأنك مقبل بروح تحدى ، و اللى يتحدى ربنا بيوريه انه و لا شئ و يفضل فى ضلاله مايخرجش منه ، انما اللى يدور على الحق ، لله .. ربنا بيوصله " ..

ولو شرحت هذا لطال، غير أنى أعتذر عما قلته، فأقول عن نفسى و ما يلزمنى حال غيرى " يعنى لو قعد يشرح قصده من جملته ، و التكاليف و كنهها و صعوبتها مش هيخلص ، لكن هو هياخد نفسه كمثل يشرح عليه صعوبة التكاليف اللى بتقابله ،و هنا هيكون مثل واقعى و دا اللى يهمه لأنه ( لا تزر وازرة وزر أخرى ) " : أنى رجل حبب إلىّ العلم من زمن الطفولة فتشاغلت به، ثم لم يحبب إلىّ فن واحد منه ، بل فنونه كلها، " يعنى هو من صغره بيحب العلم ، و انشغل بيه جدا لدرجة انه حب فنونه و انواعه كلها ، و ماقدرش يتخصص فى واحد و يسيب التانى – أيوا تمام والله ، و أنا زيك كدا ...اهئ اهئ – " ثم لا تقتصر همتى فى فن على بعضه، بل أروم استقصاءه " يعنى باحب كل فنونه صحيح ، بس مش آخد من كل واحد حبة و خلاص ، لاااااااا دا أنا عاوز أعرف كل حاجة عن أى حاجة – طماااااااااااع زيى بالظبط هههههههه – " و الزمان لا يسع ، و العمر أضيق، و الشوق يقوى و العجز يظهر ، فيبقى وقوف بعض المطلوبات حسرات " بس أجيب منين وقت لكل دا ؟؟؟ دا لو أخدت الزمن كله مش هيكفى ، ما بالك بئا بعمرى بئا اللى هو أقل كتير من الزمان ؟؟ و شوقى للعلم كل ما اعرف فيه زيادة بيقوى و يدفعنى لأنى اعرف اكتر ، لكن أكيد بردوا عاجز عن تحصيل آخر العلم دا ... ففى الآخر ، مش باقدر غير انى اتحسر على آمالى دى فى انى أعرف كل فنون العلم و أجيب آخرها " ...

هنتوقف هنا الوقتى ، ناخد بريك ...:)

والمرة الجاية نستأنف الرحلة ... إن شاء الله

سلام مؤقت