كل عام ونحن إلى الله أقرب ، و على طاعته أدوم ...
و السنة الجاية يااااااااااااااااارب ، يارب نكون على عرفات جميعا ..
و حتى لو ماكنش بس بجد ياااااااااارب يارب نكون دايما قريبين منك ، و ماشيين فى طريقك ...
أخباركم ايه كلكم؟؟ بجد لكم وحشة كبيرة يعلم الله ، و التدوين وحشنى بشدة ، و نفسى أرجع
لكنها الحياة ... :)
حبيت استغل العيد و آجى أعيد عليكم ، و أتمنى لكم جميعا عيد سعيد ، و يارب تحققوا كل أمانيكم ،
و أهنى كل واحد وواحدة فيكم بكل حلم كان بيحلم بيه و حققه ...
بصوا أنا مش محضرة كلام اقوله ، لكن هأسيب الكلام يخرج زى ما يخرج ...
حاسة العيد دا إنى مبسوطة من قبل ما ييجى ... :) ،
يمكن لأنى مشتاقة له عشان ماعيدتش العيد اللى فات و كنت حبيسة اوضتى و المذاكرة !!!...
ماهو بردوا حرام سنة كاملة ماخرجتش خروجة محترمة ، و لا شفت قرايبى
هأحاول إنى أقضى وقت حلو ، و حاولوا انتوا كمان قضوا وقت كويس ...
مش عاوزة أطول عليكم ، أو أدخل فى موضوع من المواضيع اياها ، عشان احنا داخلين على عيد ، بس هأثير تساؤل بسيط عن حاجة قرأتها من كام يوم ، خلتنى مذهولة يمكن ، بحاول أستوعب يمكن ، مش عارفة ...
بس هأنوه عنها مؤقتا ، و بعدين نتكلم فيها ...
طبعا عيد الأضحى ، و ذكرى فداء اسماعيل بذبح عظيم ، و اللى هو و ابراهيم عليه السلام فى الأساس أقاموا البيت العتيق .. و أرجع لدعائهم " ربنا و ابعث فيهم رسولا منهم يتلوا عليهم آياتك و يعلمهم الكتاب و الحكمة و يزكيهم انك انت العزيز الحكيم " .. الأية دى اتكررت فى اربع مواضع فى القرآن ، مش بالنص ، بس المضمون ...
و أول مرة فيهم ذكرت على لسان ابراهيم عليه السلام ، و اشتملت أسس الاسلام ... تلاوة الآيات ، تعليم الكتاب ، تعليم الحكمة ، التزكية ...
و لما نتلو آيات ربنا ، فنجد انه سبحانه عندما حمد نفسه قال " الحمد لله الذى خلق السماوات و الأرض و جعل الظلمات و النور" ثم نجده فى موضع آخر يقول " الحمد لله الذى أنزل على عبده الكتاب و لم يجعل له عوجا "
ثم نجده سبحانه يقول " تبارك الذى بيده الملك وهو على كل شئ قدير " ثم فى موضع آخر يقول "تبارك الذى نزل الفرقان على عبده ليكون للعالمين نذيرا "
و عندما نتعلم كتاب الله فنجد قوله تعالى " و بالحق أنزلناه و بالحق نزل " ثم نجده يقول " ما خلقنا السماوات و الأرض و ما بينهما إلا بالحق "
فبالتأكيد أن هناك حكمة لابد ان نتعلمها ، هذه الحكمة تؤدى إلى زكاة النفس و الروح ، لأنها ستعرف ربها عن يقين و علم
حد فاهم حاجة؟؟؟
أعتقد ان محدش فاهم حاجة ...
طيب ملاحظين ان مرة ربنا بيذكر كتابه المنظور ( الكون ) ، و مرة كتابه المقروء ( القرآن )
حد بدء يفهم؟؟؟
طيب هأسيبكم كدا شوية و بعدين نرجع نتكلم ... :)
و مرة تانى ... عيد سعيد على الجميع ، و حاولوا قضوا وقت كويس
