الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

May 27, 2011

إلى أيـــــــن ؟؟؟



فى موقف كنت عاوزة أبدأ بيه البوست دا بس للأسف دورت كتير و مش عارفة أوصل للنص تماما ..

المهم هو كان تقريبا فى المصرى اليوم و كان لقاء مع باكوس مرشح الفيس بوك لرئاسة الجمهورية ، و تقريبا كانوا بيسألوه لو انت رئيس الجمهورية ، إزاى هتواجه المليونيات ، فرد عليهم : بسيطة ، أشيل واحد منهم و بالتالى يكونوا 99999 واحد ، و بكدا مايوصلوش لنصاب المليونية و تتأجل للجمعة اللى بعدها عقبال ماكون دورت على حل !!!

و برغم فكاهة الرد ، إلا ان دا بالفعل اللى حاصل النهاردة ...
حد فاهم حاجة؟؟... طيب ماهو دا المطلوب إثباته :)

مبدئيا صدقونى هأحاول اكون حيادية قدر الامكان ، و أرجو ممن يخالفونى الرأى أن يحاولوا تفهم وجهة نظرى ..

حقيقى أنا مش عارفة الجمعة دى بالذات ليه عليها كل الحوارات دى؟؟
هل لأن البعض فى الاول أطلق عليها ثورة الغضب 2؟؟ و لا أصلا بعض القوى السياسية ضاقت ذرعا بمليونيات كل جمعة فقالت ياللا اما نتلكك ؟؟ و لا المجلس العسكرى هو اللى ضاق بينا ، و عاوز يريح حبة فقال اما اجيبها فيهم؟؟

أولا : الثورة دى ، ثورة مصرية حتى النخاع .. يعنى بالبلدى كدا كل واحد مصرى و كل واحدة مصرية له/ـا الحق انه ينزل الميدان يقول اللى هو عاوزه ، و يرفع الشعار اللى هو عاوزه ، طالما فى حدود السلمية و عدم تجاوز الحدود مع الآخر ..
و أنا عن نفسى بصراحة شايفة ان الناس كان لازم تفضل فى الشارع من أول يوم لحد ما مطالبها تتحقق ، ماينفعش أحِد السكينة و احطها على رقبة حيوان و اقول بسم الله ، الله أكبر ..و أول ما أبدا ، أقول كفاية كدا انا قطعت شريان لما اسيبه ينزف بئا لحد ما يموت من نفسه ...
لا ، يا إما من الاول اسيبه يموت موتة ربنا ، يا إما اقطع عرق و اسيح دم ...
يعنى بكلمات تانية ، بعد التنحى كان لازم كل القيادات يطلع قرار بتنحيتهم جميعا ، سواء محليات ، سواء جامعات ، فى كل المناصب و الاماكن ...و يبئوا فقط قائمين بالاعمال لفترة بسيطة ، يتم خلالها اجراء انتخابات لمن هو الكفء لتولى هذه المناصب ...
وزارة المالية تقدم صورة عامة لموقفها المالى ، و إزاى هيتم وضع موازنة جديدة و هيكلة الاجور ...
سرعة اتخاذ قرارات بمنع كل المسئولين من السفر لحين محاكمة كل المسئولين عن الفساد و قتل المتظاهرين ..
و غيره و غيره من مطالب الثورة ...

لكن طبعا بما إن دا محصلش ، و بلاش نبكى على اللبن المسكوب ، يبئا خلونا فى النهاردة ، و المفترض الاجراءات دى تتم بأسرع وقت ..و أعتقد دى المطالب اللى الشعب كله متفق عليها ..
و بناء عليه ، إلى ان يتم تحقيق المطالب دى فللشعب انه ينزل وقت ما يعجبه .. يفكر القيادات انه مش ناسى حقه ، و ياللا بسرعة لو سمحتوا ...
ماشى ؟؟؟ حد عنده اعتراض ؟؟ حد عنده تعليق؟؟
طيب روحوا على التعليقات قولوا اللى فى نفسكوا هناك ...

خلونا نروح للنقطة التانية
ألا و هى المجلس العسكرى و المجلس الرئاسى ..
أنا عن نفسى و من بعد ما المجلس العسكرى مسك البلد ، كنت باقول ياريت لو يعمل له مجلس استشارى من المدنيين ، يساعدوه فى مهمته لأن دى مهمة صعبة وهو مش واخد على كدا ..
طلعت أصوات بتنادى بمجلس رئاسى .. قلت يا سلااااااااام كدا تمام ، بس يارب فعلا يتحقق ..

جت الاستفتاءات ،و قلنا يا جماعة فرصتنا نمارس الديموقراطية و النتيجة اللى تطلع كلنا نرضى بيها و نكمل المشوار مع بعض ... و جت النتيجة بنعم ، و بغض النظر عن هى جت ازاى .. بس قلنا خلاص ،و مدام الشعب قال كلمته ، يبئا دا اللى يمشى ...
جه الاعلان الدستورى عشان يضرب بنعم و لا عرض الحائط ... قلنا ماشى مش مشكلة  ... ورضينا بالمجلس العسكرى حاكم و مسير للبلاد خلال هذه الفترة ...

تطلع بعض الناس بئا بعد كل دا تقولك الاستفتاء مش قانونى ...ماشى تمام ،دا رأيك و أنا مقتنعة .. بس من فضلك مش وقته ..الكلام دا وقته انتهى عاوزين نبص لقدام ..
ناس تقولك مجلس رئاسى ... والله عظيم جدا ، بس بردوا مش وقته خلاص ... خلونا الوقتى حتى فى المطالب الاساسية اللى لسه ماشوفناش منها حاجة .. و شكلها هتروح علينا ..

لكن دا لا يبرر أبدا لبعض القوى إنها تستغل توجهات بعض الناس دى عشان توقع بينا و بين بعض ... من فضلكوا ياريت نمارس الديموقراطية بكل ديموقراطية .... بلاش نظام أنا اللى فاهم و انت متعرفش حاجة .. أو انتوا هتودوا البلد فى داهية ..

لا معلش محدش وصى عليا ، واللى انا مقتنعة بيه هأقوله .. حضرتك شايف ان رأيى غلط ، انزل قول و نادى باللى انت عاوزه ، مش عاوز تنزل و تقاطع النزول ، يبئا من فضلك تقعد ساكت و بلاش تقطع فى فروة اللى نازل .. هو انت شفت هما هيعملوا ايه ؟؟ و لا هو تصور انت تخيلته يبئا خلاص دا اللى هيحصل ، والله العظيم هيحصل ... صدقونى هيحصل !!
و ماحصلش .. اهو الناس اللى نزلت نزلت ، و هتفوا للجيش ، و محدش خرب حاجة ،و اللى شايف ان الدستور اولا رفع اللافتة ...رغم ان ماكنش فيه غير واحدة باين و لا اتنين ..
محدش جرح فى المجلس العسكرى ، و اليوم كان رائع جدا .. على الاقل حسب ما شفت
و جمعة زى بئيت الجمع اللى الناس بتنزل فيها مؤكدة على حقها فى تحقيق مطالبها ملتزمين بـ" سلمية سلمية" ..
حد عنده تعليق ؟؟ حد عنده اعتراض؟؟ ... حق الكلام مكفول فى التعليقات ، تقدروا تتفضلوا هناك :)

نيجى بئا لتالت نقطة ، و للأسف دا الفخ اللى الكل وقع فيه .. و اللى كان سبب فى الموقف اللى ذكرته فى اول البوست ..
وهى ان الناس تفرغت لعد الناس اللى نزلت الميدان ، اللى موافق على النزول يقولك أعداد غفيرة ، مليونية عظيمة .. و اللى معارض يقولك يا عم دول مكملوش ..هنضحك على بعض ؟؟
و ناس تصورلك من زوايا تبان الاعداد فيها لا تذكر ، و ناس تصورلك من زوايا و كأن العالم كله جاى يزور مصر .. و الناس نازلة تجريح فى بعض .. و كأن النهاردة مباراة بين المؤيدين و المعارضين هل سنكمل النصاب ام تؤجل المليونية للجمعة المقبلة؟؟

هو أصلا يعنى كل الجمعات كان الناس بتكمل المليون ؟؟ يعنى انتوا عدتوهم ولا ايه ؟؟
و بعدين هى الجمعة بالمليون؟؟ و لا بان الناس تنزل تعبر عن رأيها؟؟؟
حسسونى ان الجمعة دى هى جمعة النهاية ،و بانها كدا فشلت !!!

كون ان الناس تنزل برغم الحر دا فى المحافظات .. بغض النظر هى كملت المليون و لا لا ، فدا تأكيد ان الثورة دى ثورة شعبية و محدش ليه الكلمة عليها .. فياريت اللى مش عاوز يشارك يقعد ساكت و مايتكلمش
حد عاوز يتكلم ؟؟؟... طبعا عرفتوا المكان :) 

نيجى بئا للنقطة الرابعة .. ومعلش طولت عليكوا ، وهى ان الاعلام للاسف مازال اعلام غير حيادى بالمرة ..
قناة محترمة من اللى كانت مغطية ايام الثورة الاولى امبارح فضلت تجيب اتصالات مع ناس معارضة للنزول ، وكانوا بيتكلموا بطريقة مستفزة بجد .. طب لما كل واحد بيتكلم نيابة عن منطقته او محافظته ... امال كل الناس اللى نزلت دى منين ؟؟؟ من المريخ؟؟؟

و واحدة تانية النهاردة .. فضلت كل شوية مركزة على شعار الدستور اولا مع ان والله ما شفت غيره هو وحيد اوحد اللى مرفوع .. و باقى اللافتات عن المطالب الشعبية ..و تتصل بناس يقولك احنا كنا عاوزين مجلس رئاسى ...و المفروض الدستور الاول ... مع ان الناس كانت واقفة رافعة لافتات المطالب المشتركة و عادى يعنى ...

هو فى ايه؟؟؟ هو احنا مش هنبطل بئا شعار " رأيى صواب و لا يحتمل الخطأ و رأيى غيرى خطأ لا يحتمل الصواب" ؟؟
كل واحد متنبى وجهة نظره هو فقط ، وفارض سوء النية فى الطرف الاخر ؟؟؟

عن نفسى بئا , كنت و لازلت مقتنعة ان الثورة كان مفروض تستمر و الناس ماتروحش بيوتها الا بعد تحقيق مطالبها ، بس خير .. خلينا فى مظاهرات الجمعة .. مع افتراض حسن النية دائما فى الطرف الاخر ، لأن المسئولية فعلا كبيرة ، بس ما ينسناش ..

كان نفسى فى مجلس رئاسى ، أدرى ازاى يدير البلد ، و يخفف عن المجلس العسكرى ، بس خلاص قضى الامر و موافقة على المجلس العسكرى ، بس لنا الحق اننا نقول رأينا ، و نقوم بعض الاخطاء التى تقع دون قصد او لقلة خبرة .. مع خالص احترامنا للمجلس و سيادته بس على المستوى العسكرى .. انما السياسة اخد و عطا ..

كل واحد له الحق انه يقول رأيه ايا كان مخالف ، طالما مابيحجرش عليا و لا بيجرح فيا .. و مش شرط مليون يعنى عشان نقول جمعة نجحت ، دا معيار لاحساس الشخص بحريته فى انه يقول رأيه .. يارب حتى واحد بس اللى ينزل ... هنقول فى مصر واحد قادر يقول رأيه بحرية و زى ماهو عاوز .. احنا مش فى صراع على قوة الحشد ..

و أخيرا .. نفسى فى اعلام محايد ، مش كل واحد متبنى وجهة نظره بس ، اعلام يعبر عن نبض الشارع .. و يعرض الرأى و الرأى الاخر ...

خلاص بئا انا كدا خلصت كل الطاقة اللى عندى .. اما اروح اشحن :)
سلام

2 comments:

فارس عبدالفتاح said...

انتي بتتكلمي بروح ثورية وبحزم ثوري للاسف هذا لم يحصل لعدة اسباب ومن اهمها هو التضليل الاعلامي والحرب النفسيه .

فعندما قام انقلاب 23 يوليو 1952 وبعد اعلان الجماهير ( الشعب ) الاعتراف به والالتفاف حوله وتأييده واصبحت ثورة .

تم التعامل مع النظام السابق له بحزم ثوري ومثاليه في الاداء ومرت بعدة مراحل عصيبة في المخاض الثوري من 1952 الى 1954م، الى ان وصلت الى ازمة مارس .

ومن هذا المنطلق تم التشنيع والتشويه والتخوين والاتهام بالخراب والدمار الذي حققته الثورة بسبب هذا الحزم الثوري .


ولهذا فقد اصر الشباب ، شباب 25 شباب الثورة اقصد ان تكون تجربتهم تجربة ديمقراطية كما يقولون ،، والثورة بمعناها الحرفي والاصطلاحي هي انقلاب اجتماعي ثقافي سياسي على حالة قائمة الى حالة جديدة .


فلا ينفع فيها ديمقراطية نحن نريد تداول السلطة عبر صناديق الانتخاب وليس راي اغلبية او اقلية هذه هي بيت الداء لانه سوف تدخلنا في متاهة كبيرة نحن في غنا عنها وهي الثغرة التي سوف يدخل منها العملاء والمرتزقة والمأجورين والاستعمار اذا حدث لا قدر الله .


فقد اتهم عبدالناصر بالدكتاتورية بسبب انه كان يحقق الحزم الثوري ، من معارضوه من الرجعيين والقوى المتحالفة مع الرجعية والقوى المتحالفة مع الاستعمارية بانه فاشي وانه دكتاتور وانه سبب كل البلاء .

وهذا ما اثر في عقول شباب 25 باللاوعي وادى بهم الامر الى هذا التخبط .


ملحوظة

عندما قامت الثورة تحققت من الوضع الاقتصادي لمصر وادركت ان مصر على حافة الانهيار الاقتصادي ،، وعندها كان مشروع السد العالي لتوسيع الرقعة الزراعية وترشيد استهلاك المياة لتفادي الجفاف والفياضانات وتدعيم الصناعة بالطاقة الكهربائية الرخيصة .. الخ


الان مصر تحتاج الى مشروع قومي جبار لا يقل اهمية عن السد العالي .. لان المعلم حسني مبارك سلمنا البلد على الجنط

هههههههههههههههههه

وهذه حقيق لا نقاش فيه .. فلابد من مشروع اقتصادي حضاري لا يقل اهمية عن المشاريع العملاقة التي اقامها عبدالناصر لانقاذ ما يمكن انقاذة والا فالحتمية بالانهيار هي النتيجة البديهية الاولية لتلك الحقيقة

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت