الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Aug 14, 2009



السلام عليكم و رحمة الله و بركاته

كيفكم يا شباب ؟؟ يارب تكونوا كلكم بخير و بصحة و سلامة

و كل عام و انتم إلى الله أقرب و على طاعته أدوم ... و رمضان كريم للجميع


النهاردة ان شاء الله هاكمل معاكوا بقية الموضوع اللى فات و نشوف النص التانى عشان نكون ألمينا بالموضوع كله ، و الله المستعان ...

طبعا إحنا قلنا إن زينة الحياة الدنيا من مأكل و مشرب و ملبس و غيره و غيره هو أمر مكفول شرعا ، و مفيش حد يقدر يقولنا حرام طالما احنا بنعمل حاجة حلال مش حرام .

لكن فى نقطة مهمة جدا جدا جدا ، هل معنى كدا إنى أعيش طول حياتى بئا آكل و أشرب و البس طالما إنى مش باعمل حاجة حرام؟؟ << باعمل حلال ... ها ، واخدين بالكم ؟؟ أصل فى ناس بتعمل حرام و تقولك مش هو من متع الدنيا ؟؟... بنقول حلااااااال ....ماشى؟؟


طب تعالوا نشوف هو ربنا أصلا خلقنا ليه ؟؟

ماحنا قلنا " و ما خلقت الجن و الانس إلا ليعبدون " ، بس إحنا قلنا ان التمتع بمتع الدنيا بردوا ربنا مانهاش عنه ... يبئا الحل ايه؟؟؟

الحل إننا نحول المتع دى لعبادات ... : )

إزاى يعنى ؟؟؟؟

الحل بسيط جدا ، وهو انك تنوى نية لله و أنت بتاكل و انت بتشرب و غيره ... و بكدا تبئا بتاكل و عمال تاخد حسنات و تشرب و عمال تاخد حسنات ...

و بالمثال حتى يتضح المقال ، هأنقل لكم جزء من رد أخى الفاضل sakayar تعليقا منه على أحد الموضوعات ، قال ايه ؟؟

" أولاً : نفتكر قول ربنا (وما خلقت الجن والانس إلا ليعبدون)
يبقى نخلينا أي حاجة بنعملها نعملها بنية التعبد لربنا ... حتى المذاكرة حتى النوم حتى الأكل ...

بذاكر علشان أكون مسلم نافع لاسلامي ، ءأدي شكر نعمة ربنا عليا إنه أنعم عليا بالحياة
باكل علشان أقوى على الحياة وشئونها اللي هي أصلاً كلها خالصة لربنا (قل إن صلاتي ونسكي ومحياي ومماتي لله رب العالمين)
بنام علشان أعطي جسمي بعض الراحة (إن لنفسك عليك حقاً) فأقوم أقوى وأنشط .
ثانياً : لو عرفنا إن حياتنا كلها ملك لربنا ... وإننا هنعمل كل حاجة لربنا ... حتى ركوب السيارة المرسيدس والبي إم ... تخيلي حتى البي إم لربنا؟؟
آه والله
ع الأقل مش هركب ف تاكسي ممكن يطلع سواق مش تمام ... أو أركب في ميكروباص وأزاحم الرجالة والستات وده يخبطني ودي تلمسني وكده
ومش هركب عربية أي كلام تقف مني ف الطريق وتخليني أغضب ...

لأ هركب عربية مكيفة كمان علشان وانا راكبها احس بالراحة واقعد اذكر ربنا واشكر نعمته كمان
إيه رأيك ف الدين بالطريقة دي؟؟
متهيألي لا ينافي الدين إني أكون ملتزم وشاكر لنعمة ربنا
الآية كانت بتقول لقارون (ولا تنس نصيبك من الدنيا)
لكن للأسف هو نسي نصيبه من الآخرة وانشغل بالدنيا بس "


تمام جدا الكلام دا ، و على هذا النظام قيسوا بئا ... و على فكرة موضوع النية دا كمان بيخليك ماتعملش حاجة غلط أو حرام ، بمعنى ... واحد مثلا بيعاكس البنات ، ياترى هينوى ايه؟؟؟ .... يارب أنت أمرتنى بغض البصر بس أنا ناوى اعاكس البنت دى طاعة ليك؟؟ أصل يمكن لما أعاكسها تحس على دمها و ماتلبسش ضيق و لا تحط مكياج؟؟؟ << يا سلااااااااااااااااام ...

و البنت اللى مش محجبة ... يارب انت أمرتنى بالحجاب ، بس بصراحة أنا مش مقتنعة بيه ، فمش عاوزة ألبسه إلا لما أقتنع عشان ماخلعوش تانى ؟؟؟ و كمان يارب أصل بصراحة الحجاب شكله وحش و بيوقع شعرى؟؟ << لا والله !!...

واحد مثلا اتخانق معاك و لا شتمك ... يارب انت أمرتنى بالاعراض عن الجاهلين ، و إن إذا خاطبهم الجاهلون قالوا سلاما ، بس أسكت عن حقى يعنى؟؟ لا طبعا أرد << نظرية بردوا ...


و بكدا يا جماعة هتلاقوا والله حاجات كتير فى حياتكوا اتغيرت ، و بجد والله هتلاقيك بتعمل كل حلال و طيب بنفس راضية كدا و سعيد من جواك ، لأنك هتستشعر رضا ربنا عن العمل اللى بتعمله .

لكن نقطة مهمة جدا جدا جدا بردوا ، و هى ان الدين مش تمتع بالحلال بس و محدش له عندى حاجة ، لا ...

زى مانت عاوز تتمتع بنعم ربنا عليك ، يبئا لازم تؤدى شكرها بردوا ، يعنى ما ينفعش واحد مابيصليش ، و لا يعرف اى حاجة فى باب الطاعات و العبادات ... و يقولك هو أنا باعمل حاجة حرام؟؟

لا أنت مابتعملش حاجة حرام ، بس انت كدا بتاخد من الدين اللى يعجبك و ماتخادش اللى مش يعجبك ، هو الدين كله على بعضه .. ياتاخده كله ، يا تسيبه كله ، مش آخد الجرى و التنطيط ، و أسيب الاركان و العبادات .. لا مينفعش

و مش معنى ان ربنا أكرمك و فتح عليك من خير الدنيا و أنت مش بتطيعه انه كدا راضى عنك ، لا ... تعالوا نشوف ربنا قال ايه لما جه يخاطب الناس كلها ، و لما جه يخاطب الفئة المؤمنة بس ..

قال تعالى – مخاطبا الناس كافة –" يا ايها الناس كلوا مما فى الأرض حلالا طيبا و لا تتبعوا خطوات الشيطان إنه لكم عدو مبين "

ايه دا؟؟؟ يعنى ممكن الواحد يكون مش مسلم و عادى يعنى ربنا فاتح عليه؟؟

اه ، بالعكس دا ربنا أمر الناس كلها بالتمتع بمتاع الحياة الدنيا بردوا ... بسسسسسسسسسس من غير ما يعملوا الحرام بردوا ، لأنهم كدا يبئوا ماشيين ورا الشيطان ، و تخيلوا واحد ماشى ورا عدوه ، تتخيلوا ان ممكن يوصله لبر الامان؟؟؟

طب تعالوا بئا ننتقل لخطاب المؤمنين بعدها :" يا أيها الذين آمنوا كلوا من طيبات ما رزقناكم و اشكروا لله إن كنتم إياه تعبدون "

أول شئ (من طيبات ما رزقناكم) ... ايوا أصلنا عارفين ان اللى بيرزق هو ربنا ، انما غيرنا ممكن يكون فاكر انه عشان بيشتغل و بياخد مرتب بيشترى بيه اللى هو عاوزه ان هو اللى بيرزق نفسه ، و مع ذلك ربنا امره بالتمتع ...

احنا بردوا هنتمتع بس مع فارق بينا و بين غيرنا ، إننا هنشكر لربنا ، لأننا عارفين ان هو اللى رزقنا

( إن كنتم اياه تعبدون ) أصل يا جماعة استحالة واحد يكون ما بيصليش و لا يعرف طريق ربنا – مسلم صحيح لكن بالاسم- و يشكر ربنا على نعمة ينعمها عليه و ينوى فيها نية لله ... حاجة اصلا العقل مايقبلهاش ، كان الاولى انه يؤدى الفروض اللى عليه طالما مستشعر نعمة ربنا كدا .

و بكدا اعتقد ان شقى المعادلة اكتملوا ، و يارب تكون واضحة للجميع ... و بالشفا إن شاء الله : )


ممممممممممممم ... بصوا يا جماعة ، مش عارفة نظام رمضان معاكوا ايه ؟؟ اصلى بافكر شهر رمضان مش بيكون حد فاضى للنت و كدا ... فآخده أجازة من غير بوستات << احم احم ... بجملة الاجازة اللى أنا واخداها يعنى

فإيه رأيكم ؟؟

...............................................

أستاذى الفاضل بيرم المصرى حقيقى بجد محرجة من حضرتك و سؤالك الدائم و معلش مش عارفة أرد على حضرتك بس أنا بخير الحمد لله

وبالنسبة لاستاذى الفاضل ( قيس بن الملوح) و أخى الفاضل ( فارس) فإن شاء الله هأرد عليكم قريب

...............................................

و كل سنة و انتم كلكم بألف صحة و سلامة

سلاااااام


20 comments:

مسدس صغير said...

قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ، لاَ شَرِيكَ لَهُ وَبِذَلِكَ أُمِرْتُ وَأَنَا أَوَّلُ الْمُسْلِمِينَ

عاشقة الأحزان said...

السلام عليكم


وحشتنى قووى خالص مالص حبيبتى وكل سنه والامه الاسلاميه وانتى بالف خير بمناسبة قدوم شهر مضان


والله على كلامك بجد بسيط قووى
يارب يجعل كل حرف كتبتيه بميزان حسانتك

وربنا يتقبل منك

اللهم بلغنا رمضان

مودتى

صوت من مصر said...

رمضان كريمممممممممممم

hasona said...

السلام عليكم

موضوع جميل
والاجمل أن نضع نصب أعيننا أن كل شئ لله وننوي ذلك في كل أفعالنا
وأن نراقب الله في كل عمل نقدم عليه

،،،،
كل سنة وانتم طيبين
وربنا يعيد علينا رمضان
لنستزيد من الخير فيه

adel said...

يعني مكنتش قريت نهاية البوست اشاسا بقي

انا كنت هقزلك فرصة رمضان داخل زودتي البوستات دي هتلاقي صدي
لان الناس هتفضل راشقة علي النت صدقيني
بنظام سلي صيامك بقي او الفطار فضله شوية


البوست حلو و حتي لو معترض علي حاجات فيه
بس متفق علي شئ واحد
الاسلوب في الصياغة و توصيل المعلومة سواء رفضتها او قبلتها
ودي نقطة تستحقي عليها التحية برضه

Darsh Basha said...

هو كلامك جميل ورائع وبممتع
وبجد الواحد بيستفيد منة كتير جدا
سلمتى بكل خير ووفققك الله الى ما تحبية وترضاة
وعايزين يبقى فى تواصل فى رمضان ان شاء الله ..هتبقى كلمات فى ميزان حسناتك ان شاء الله

عاشقه الرومانسيه said...

بالعكس مش تغيبى فى رمضان
عايزين بوستات زى دى
تساعدنا على الطاعه وتزود ميزان حسناتك
اه يامحظوووووووووظه
هههههههههههههه
اخبار الكمبيوتر ايه؟
لسه محتله بيت الجيران؟

assafo anaroze said...

السلام عليكم
اتمنى تكوني بالف خير
رمضان كريم و كل عام و انت في صحة و هنا
مودتي

Nostor Azzuro said...

الله يفتح عليكى ويبارك فيكى

ولازم كلنا نهتم بموضوع النية

ورمضان كريم

وانا مبسوط جدا انى فى مدونتك

كيــــــــــــارا said...

ميه ميه ياقمر
كل سنه وانتي طيبه ورمضان كريم

تذكره ربنا يجعلها في ميزان حساناتك

آيوشة said...

السلام عليكم ياسول اخبارك ايه ياقمر
كل سنة وانتى طيبة يارب ورمضان كريم عليكى وعلى كل اسرتك الكريمة
اسفة على تقصيرى فى زيارة المدونة
جزاكى الله خيرا على البوستين ده واللى قبله انا كنت متابعة وربنا يجعله فى ميزان حسناتك باذن الله
بخصوص موضوع النوايا فعلا دايما الواحد بينسى يحط النية لاى عمل بيعمله
عجبنى جدا كلمتك ان لو الانسان فى نيته لاى عمل مش هيقدر يعمل معصية ابدا
جزاكى الله خيرا مرة تانية ياقمر

mahasen saber said...

كل رمضان وانتى بالف خير وسلام يا سولو

بجد ليكى وحشه جامده يا حبيبتى

يا رب تكونى بافضل حال دايما ان شاء الله

kafrawy said...

كل سنه و انتى طيبه يا دوك

و رمضان كريم

فارس عبدالفتاح said...

ثانياً : لو عرفنا إن حياتنا كلها ملك لربنا ... وإننا هنعمل كل حاجة لربنا ... حتى ركوب السيارة المرسيدس والبي إم ... تخيلي حتى البي إم لربنا؟؟
آه والله


هذا المنطق منطق عثمان راضي الله عنه وارضاه

وكان سبب كبير في الفتنه ... التبسط والوسطية شيء جوهري في الاسلام


حتى لو كان ركوب البي ام دبليو والمرسيدس والطائرات الخاصة والبواخر الفاخرة والقصور العالية والحدائق والوارفة والملابس الانيقة والمطاعم والمشارب اللذيذة


كلها مباحة ما دامت من حلال ومادامت يودي العبد شكرها بذكاتهاوصدقتها وحمدها بالثناء على الله الابتهال والتبتل

ولكن التبسط اقرب الى التقوى .. والله اعلم

طالبه الفردوس said...

السلام عليكم

جزاك الله اختى كل خير على التذكره

اللهم اجعل حياتنا كلها لك

اسماء واحلام فى وجدانى said...

مرة واحد غاب

اتعود على الغياب

قالك يلا

نقضيها غياب فى غياب

كل سنة وانتى طيبة

رمضان كريم

maha zein said...

كل هفوة في حياتنا نقدر ناخد عليها ثواب و أجر عظيم لو نوينا نية خالصة لوجه الله

و النية اساس العمل

طريقتك مميزة
ولذيذة جدا

كل سنة وانتي طيبة
رمضان كريم

Beram ElMasry said...

رمضان كريم
أعاده الله عليكم وجميع الأهل والأحبة باليمن والخير والبركة

الحب بين العرب فطرة وشئ مألوف
ولا يحسدوه من الخلق غير القرد والحلوف

rssamet_algera7 said...

ربنا يهدي الجميــــع

كل عام وانتى بالف خير
رمضان كريم

تحيتي

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت