رحلة اللاعودة

ستة أشهر كاملة منذ آخر طرح لى هنا ...

كنت أظن أنه سيأتى الوقت الذى أشتاق فيه إلى كتاباتى ،

وسيطغى حنينى إليها على قرار التوقف الذى اتخذته على نفسى 

توقفت لأننى فقدت الامل فى ان نتفهم ان التغيير يكمن اولا فى انفسنا 

اعتقدت انه من الممكن ان نحاول تقبل الرأى و الرأى الاخر

ان نتعالى على اختلافاتنا ، و ان نمضى فيما اتفقنا عليه 

لكن لا بأس ببعض الاحلام !!!

الآن ...

تعترينى حالة من الاحباط الشديد 

و الأشد منها حالة من المرارة و الالم 

لما وجدته من البعض .. ليس لاختلاف الاراء فى حد ذاته

لكن كيفية الاعتراض على اختلافك معهم 

مثلما كنت دائما اعتقد ان الخطأ فينا نحن 

و ان اختلاف اولى السلطة لن يغير كثيرا 

طالما لم نبدأ نحن من أنفسنا

فقد ترسخ بداخلى ان الكثير لا يفكر حتى فى ان يعيد النظر فيما يفعل

و فيم يفكر؟؟!!

ختاما 

كنت أتمنى أن أغير تقديمة مدونتى فى يوم من الايام

خاصة بعد الثورة 

و لكن تبقى نتيجة ما توصلت اليه 

هو أول ما بدأت به 

" عندما يضيق بنا العالم ،

و لا نجد بأيدينا شيئا لنفعله ...
فإننا نعزى أنفسنا ببعض الكلمات ،
فلربما غيرت هذه الكلمات العالم ذات يوم ..."

تحياتى 

رحلة إلى الفضاء الخارجى :)

امبارح كنا فى سفرية تبع الشغل عشان نشوف نظام صيدلة اكلينيكى مطبق فى احدى مستشفيات المحروسة ..

طبعا مش هاقول كان فين و لا بيعملوا ايه ... مش اسرار ، بس لأن ناس كتير مش هتستوعب اللى هأقوله اولا ، ثانيا عشان ماقلش حاجة لسه فى علم الغيب ، لما نطبقه ان شاء الله هاقول على طول

طب انا باقول ليه يعنى ؟؟!!!

هو أولا : عشان تدعو انه يطبق عندنا فى المركز ..

ثانيا : عنصر تشويق ..

ثالثا : عشان دى مقدمة لابد منها عشان بئيت البوست :)

المهم بئا ان احنا كنا رايحين بكل تراخى ، و كانت فكرتنا عن الموضوع غير خالص ، و بصراحة مكنش لنا رغبة نسافر خالص (انا و زميلاتى يعنى)

لكن ارادة ربنا طبعا فوق كل شئ ، خاصة كمان ان الدكتور المشرف ع الموضوع كان دائم الالحاح و الاتصال عشان نسافر ..

و فعلا سافرنا ، و هناك يمكن قضينا داخل المستشفى ساعة واحدة ، لكن ساعة قلبت تفكيرنا خالص ، حتى انا علقت لواحدة زميلتى بأقولها لما نرجع زمايلنا هيقولوا للمديرة : لا .. دول حصلهم غسيل مخ ، احنا عاوزين زمايلنا اللى كانوا معانا .. :)

طبعا مستوى الصيادلة هناك ..ما شاء الله ، الله اكبر .. هما دول الصيادلة فعلا ، و علاقة ما شاء الله بالدكاترة ، فعلا فريق طبى متكامل ، و المهم فى الاول و الاخير هو مصلحة المريض .. خاصة و انه كان فى نفس التخصص بردوا ( الأورام)

اللى انا عاوزة اتكلم عليه بئا – دا بافتراض ان اللى فات دا كله مكنتش عاوزة اتكلم عليه!!!- هو الدكتور المشرف ع الموضوع ...

بجد باسم الله ما شاء الله ، دا فعلا واحد ربنا فاتح عليه ... لأنه اتعلم ، و عمل باللى اتعلمه ، و أصر على تنفيذ اللى فى دماغه و شايفه صح ... لحد ما مكانين دلوقتى طبقوا أفكاره ، و يااااااااااااارب يارب نكون احنا رقم 3 ..

المرحلة اللى شفنا عليها الصيادلة هناك ماكنتش آخر المطاف ، دى كانت نهاية المرحلة الاولى ، و بداية المرحلة التانية .. المرحلة الاولى دى اللى احنا رحنا و انبهرنا بيها ... دى اخدوها فى سنة و نص كورسات و تدريب ،و كانوا داخلين فى المرحلة التانية اللى هى اكثر تقدما ... و لسه فى مرحلة تالتة كمان ..ومعرفش فى مراحل بعدها و لا لا .. بس أكيد التعليم فى المجال الطبى مش بيخلص .. بس دول المراحل اللى شرحهم لنا ...

بجد الدكتور دا ربنا يبارك له و يكثر من امثاله و ياااااااااارب يارب نوصل فى يوم  اننا نكون زيه كدا ، تخيلوا لما يبئا بئاله 10 سنين او يمكن اكتر ماشى فى الموضوع دا .. و بنفس طويل و بحث و اصرار و خبرة ...
أكيد دا حد لازم ربنا واقف جنبه .. 

صحيح الموضوع دا يهمنى كصيدلانية جدا ، لأنه مجال جديد خالص و يمكن عدد اللى اتعلموه و بيتعلموه فعلى معدودين .. لكن انا نفسى الموضوع دا يتطبق بشكل عام ..

يعنى فعلا كل تخصص يعرف تخصصه بالظبط ، و يطبقه فى الحياة .. أكيد احنا كافراد هنستفيد و المجتمع ككل هيستفيد ..

و البلد اكيد هتطور باستغلال مواردها -خاصة البشرية- على الوجه الأمثل ..

أنا بدون مبالغة حاسة انى رحت رحلة لحته خارج مصر ( الفضاء الخارجى)..و بعدين رجعت تانى ..

و قاعدة باسأل نفسى .. هل يا ترى فعلا هيتطبق و نوصل للمرحلة دى؟؟ 

يااااااااااااااااااااااااارب يااااااااااااااااااااااااااارب يااااااااااااااااااااااااااااااااااااارب يتحقق يارب

ياللا ادعوا انتوا كمان  :)

الاخـــــــــــــر

يقول الله تعالى :( ادع إلى سبيل ربك بالحكمة و الموعظة الحسنة و جادلهم بالتى هى أحسن )

و يقول تعالى :( فبما رحمة من الله لنت لهم ولو كنت فظا غليظ القلب لانفضوا من حولك )

ويقول رسول الله – صل الله عليه و سلم- ( المؤمن الذى يخالط الناس و يصبر على أذاهم أعظم أجرا من المؤمن الذى لا يخالط الناس و لا يصبر على أذاهم )

من الآيتين السابقتين و الحديث الشريف نقدر نخرج بنقطتين مهمتين جدا ..

أولا : ان كدا كدا مدام موجود فى الدنيا دى هتتعامل مع الناس ، لأن الانسان مش لوحده فى الدنيا دى ، ولو عاش لوحده هيتجنن ..

ثانيا : ان عمرك ما هتعيش فى الدنيا بيس كدا و الناس كلها على هواك ... بالعكس الناس أغلبها ان لم يكن كلها مش طبيعتك و لا بيتعاملوا زيك ...و بالتالى هتقابل شرور كتير و المفترض انك تقابل دا بالاحسان

 

طيب انا ليه باقول الكلام دا ؟؟

أصلى اكتشفت ان الناس تقريبا ماتعرفش كدا .. و فاكرة ان الناس كلها بفكر واحد ، و حتى ماعندهاش استعداد انها تعدى .. دا طيعا اكيد راجع لاسلوب التربية و المجتمع 

لكن أنا كنت فاكرة ان كل ما الانسان ارتقى بنفسه ، كل ما دا بيكون له مردود على أخلاقه و تفكيره .. لكن اكتشفت انى بردوا غلط ...

المهم عشان شكل ماحدش فهم حاجة .. كنت سبب فى معرفة اتنين لمصالح مشتركة ، المهم الاتنين ماعرفوش يتعاملوا مع بعض ، و المفترض ان الاتنين دول مستواهم راقى يعنى ..حسب مانا شايفة 

قوم ايه بئا .. كل واحد فيهم يتصل بيا يجرح فى التانى و يشتم فيه ، لا وايه يقولى فى الاخر انا عارف ان مالكيش ذنب فى اللى حصل .. بس التانى دا انسان (......) والاحسن ماعدتش يتصل و لا يبئا فى اى نوع من انواع التواصل

الحقيقة ان انا اللى إتأذيت فى النص .. لأنى عمرى ما سمعت كلام جارح كدا ، و من ناس كنت فاكراها ارقى من كدا ..

ماتعودتش ابدا انى اخسر انسان عرفته ، حتى لو هأنهى علاقتى بحد انهيها بذكرى حلوة يمكن نتقابل فى يوم من الايام ..

لكن عشان تنهى علاقتك بحد تقوم تجرح فيه كدا؟؟؟ خاصة و ان الموضوع مش كرامة يعنى و لاهى مسألة حياة او موت؟؟

و إذا كنا كدا على الصعيد الشخصى ..

أمال ازاى بنفكر فى وحدة وطنية ، و تقبل الاخر ، و فقه الاختلاف ، و الكلام الكبير دا؟؟؟

اه ... ماهو بالشكل دا يبئا كلام كبير ، و كبير اوى ، و ممكن يبئا رابع المستحيلات لو فضلنا بالشكل دا..

زعلان من حد ، و عاوز تنهى علاقتك بيه ، او عندك مشاكل مأثرة على حياتك ... من فضلك ما تعاقبش حد تانى بزعلك او مشاكلك دى ..

انهى الامور بهدوء ، و بعيد عن العصبية و رفع الصوت و الشتيمة ، لأن والله والله والله بتترد لك ، و سبحان الله الاتنين قالوا فى بعض نفس الكلام بالظبط ... كما تدين تدان

انت مش صح على طول ، و لا التانى غلط على طول ... مختلفين اه بس فى نقط التقاء ممكن نساوى من خلالها الخلاف و المشاكل من دون ما نجرح بعض 

فى نظرى ان دى مشكلة مجتمع اولا.. دى ثقافة سائدة ، انك تاخد حقك بالزعيق و الشتيمة ، و تجريح الاخر و اعتبارها قوة .. لكن للاسف مش كل الناس بتعتبرها قوة ...و يكفى انكوا انتم الاتنين خسرتوا نقاط من حسابكم عندى ، و ان ماكنتش هاخسركوا .. فما زالت هناك نقاط للالتقاء ... :(

إلى أيـــــــن ؟؟؟

فى موقف كنت عاوزة أبدأ بيه البوست دا بس للأسف دورت كتير و مش عارفة أوصل للنص تماما ..

المهم هو كان تقريبا فى المصرى اليوم و كان لقاء مع باكوس مرشح الفيس بوك لرئاسة الجمهورية ، و تقريبا كانوا بيسألوه لو انت رئيس الجمهورية ، إزاى هتواجه المليونيات ، فرد عليهم : بسيطة ، أشيل واحد منهم و بالتالى يكونوا 99999 واحد ، و بكدا مايوصلوش لنصاب المليونية و تتأجل للجمعة اللى بعدها عقبال ماكون دورت على حل !!!

و برغم فكاهة الرد ، إلا ان دا بالفعل اللى حاصل النهاردة ...

حد فاهم حاجة؟؟... طيب ماهو دا المطلوب إثباته :)

مبدئيا صدقونى هأحاول اكون حيادية قدر الامكان ، و أرجو ممن يخالفونى الرأى أن يحاولوا تفهم وجهة نظرى ..

حقيقى أنا مش عارفة الجمعة دى بالذات ليه عليها كل الحوارات دى؟؟

هل لأن البعض فى الاول أطلق عليها ثورة الغضب 2؟؟ و لا أصلا بعض القوى السياسية ضاقت ذرعا بمليونيات كل جمعة فقالت ياللا اما نتلكك ؟؟ و لا المجلس العسكرى هو اللى ضاق بينا ، و عاوز يريح حبة فقال اما اجيبها فيهم؟؟

أولا : الثورة دى ، ثورة مصرية حتى النخاع .. يعنى بالبلدى كدا كل واحد مصرى و كل واحدة مصرية له/ـا الحق انه ينزل الميدان يقول اللى هو عاوزه ، و يرفع الشعار اللى هو عاوزه ، طالما فى حدود السلمية و عدم تجاوز الحدود مع الآخر ..

و أنا عن نفسى بصراحة شايفة ان الناس كان لازم تفضل فى الشارع من أول يوم لحد ما مطالبها تتحقق ، ماينفعش أحِد السكينة و احطها على رقبة حيوان و اقول بسم الله ، الله أكبر ..و أول ما أبدا ، أقول كفاية كدا انا قطعت شريان لما اسيبه ينزف بئا لحد ما يموت من نفسه ...

لا ، يا إما من الاول اسيبه يموت موتة ربنا ، يا إما اقطع عرق و اسيح دم ...

يعنى بكلمات تانية ، بعد التنحى كان لازم كل القيادات يطلع قرار بتنحيتهم جميعا ، سواء محليات ، سواء جامعات ، فى كل المناصب و الاماكن ...و يبئوا فقط قائمين بالاعمال لفترة بسيطة ، يتم خلالها اجراء انتخابات لمن هو الكفء لتولى هذه المناصب ...

وزارة المالية تقدم صورة عامة لموقفها المالى ، و إزاى هيتم وضع موازنة جديدة و هيكلة الاجور ...

سرعة اتخاذ قرارات بمنع كل المسئولين من السفر لحين محاكمة كل المسئولين عن الفساد و قتل المتظاهرين ..

و غيره و غيره من مطالب الثورة ...

لكن طبعا بما إن دا محصلش ، و بلاش نبكى على اللبن المسكوب ، يبئا خلونا فى النهاردة ، و المفترض الاجراءات دى تتم بأسرع وقت ..و أعتقد دى المطالب اللى الشعب كله متفق عليها ..

و بناء عليه ، إلى ان يتم تحقيق المطالب دى فللشعب انه ينزل وقت ما يعجبه .. يفكر القيادات انه مش ناسى حقه ، و ياللا بسرعة لو سمحتوا ...

ماشى ؟؟؟ حد عنده اعتراض ؟؟ حد عنده تعليق؟؟

طيب روحوا على التعليقات قولوا اللى فى نفسكوا هناك ...

خلونا نروح للنقطة التانية

ألا و هى المجلس العسكرى و المجلس الرئاسى ..

أنا عن نفسى و من بعد ما المجلس العسكرى مسك البلد ، كنت باقول ياريت لو يعمل له مجلس استشارى من المدنيين ، يساعدوه فى مهمته لأن دى مهمة صعبة وهو مش واخد على كدا ..

طلعت أصوات بتنادى بمجلس رئاسى .. قلت يا سلااااااااام كدا تمام ، بس يارب فعلا يتحقق ..

جت الاستفتاءات ،و قلنا يا جماعة فرصتنا نمارس الديموقراطية و النتيجة اللى تطلع كلنا نرضى بيها و نكمل المشوار مع بعض ... و جت النتيجة بنعم ، و بغض النظر عن هى جت ازاى .. بس قلنا خلاص ،و مدام الشعب قال كلمته ، يبئا دا اللى يمشى ...

جه الاعلان الدستورى عشان يضرب بنعم و لا عرض الحائط ... قلنا ماشى مش مشكلة  ... ورضينا بالمجلس العسكرى حاكم و مسير للبلاد خلال هذه الفترة ...

تطلع بعض الناس بئا بعد كل دا تقولك الاستفتاء مش قانونى ...ماشى تمام ،دا رأيك و أنا مقتنعة .. بس من فضلك مش وقته ..الكلام دا وقته انتهى عاوزين نبص لقدام ..

ناس تقولك مجلس رئاسى ... والله عظيم جدا ، بس بردوا مش وقته خلاص ... خلونا الوقتى حتى فى المطالب الاساسية اللى لسه ماشوفناش منها حاجة .. و شكلها هتروح علينا ..

لكن دا لا يبرر أبدا لبعض القوى إنها تستغل توجهات بعض الناس دى عشان توقع بينا و بين بعض ... من فضلكوا ياريت نمارس الديموقراطية بكل ديموقراطية .... بلاش نظام أنا اللى فاهم و انت متعرفش حاجة .. أو انتوا هتودوا البلد فى داهية ..

لا معلش محدش وصى عليا ، واللى انا مقتنعة بيه هأقوله .. حضرتك شايف ان رأيى غلط ، انزل قول و نادى باللى انت عاوزه ، مش عاوز تنزل و تقاطع النزول ، يبئا من فضلك تقعد ساكت و بلاش تقطع فى فروة اللى نازل .. هو انت شفت هما هيعملوا ايه ؟؟ و لا هو تصور انت تخيلته يبئا خلاص دا اللى هيحصل ، والله العظيم هيحصل ... صدقونى هيحصل !!

و ماحصلش .. اهو الناس اللى نزلت نزلت ، و هتفوا للجيش ، و محدش خرب حاجة ،و اللى شايف ان الدستور اولا رفع اللافتة ...رغم ان ماكنش فيه غير واحدة باين و لا اتنين ..

محدش جرح فى المجلس العسكرى ، و اليوم كان رائع جدا .. على الاقل حسب ما شفت

و جمعة زى بئيت الجمع اللى الناس بتنزل فيها مؤكدة على حقها فى تحقيق مطالبها ملتزمين بـ" سلمية سلمية" ..

حد عنده تعليق ؟؟ حد عنده اعتراض؟؟ ... حق الكلام مكفول فى التعليقات ، تقدروا تتفضلوا هناك :)

نيجى بئا لتالت نقطة ، و للأسف دا الفخ اللى الكل وقع فيه .. و اللى كان سبب فى الموقف اللى ذكرته فى اول البوست ..

وهى ان الناس تفرغت لعد الناس اللى نزلت الميدان ، اللى موافق على النزول يقولك أعداد غفيرة ، مليونية عظيمة .. و اللى معارض يقولك يا عم دول مكملوش ..هنضحك على بعض ؟؟

و ناس تصورلك من زوايا تبان الاعداد فيها لا تذكر ، و ناس تصورلك من زوايا و كأن العالم كله جاى يزور مصر .. و الناس نازلة تجريح فى بعض .. و كأن النهاردة مباراة بين المؤيدين و المعارضين هل سنكمل النصاب ام تؤجل المليونية للجمعة المقبلة؟؟

هو أصلا يعنى كل الجمعات كان الناس بتكمل المليون ؟؟ يعنى انتوا عدتوهم ولا ايه ؟؟

و بعدين هى الجمعة بالمليون؟؟ و لا بان الناس تنزل تعبر عن رأيها؟؟؟

حسسونى ان الجمعة دى هى جمعة النهاية ،و بانها كدا فشلت !!!

كون ان الناس تنزل برغم الحر دا فى المحافظات .. بغض النظر هى كملت المليون و لا لا ، فدا تأكيد ان الثورة دى ثورة شعبية و محدش ليه الكلمة عليها .. فياريت اللى مش عاوز يشارك يقعد ساكت و مايتكلمش

حد عاوز يتكلم ؟؟؟... طبعا عرفتوا المكان :) 

نيجى بئا للنقطة الرابعة .. ومعلش طولت عليكوا ، وهى ان الاعلام للاسف مازال اعلام غير حيادى بالمرة ..

قناة محترمة من اللى كانت مغطية ايام الثورة الاولى امبارح فضلت تجيب اتصالات مع ناس معارضة للنزول ، وكانوا بيتكلموا بطريقة مستفزة بجد .. طب لما كل واحد بيتكلم نيابة عن منطقته او محافظته ... امال كل الناس اللى نزلت دى منين ؟؟؟ من المريخ؟؟؟

و واحدة تانية النهاردة .. فضلت كل شوية مركزة على شعار الدستور اولا مع ان والله ما شفت غيره هو وحيد اوحد اللى مرفوع .. و باقى اللافتات عن المطالب الشعبية ..و تتصل بناس يقولك احنا كنا عاوزين مجلس رئاسى ...و المفروض الدستور الاول ... مع ان الناس كانت واقفة رافعة لافتات المطالب المشتركة و عادى يعنى ...

هو فى ايه؟؟؟ هو احنا مش هنبطل بئا شعار " رأيى صواب و لا يحتمل الخطأ و رأيى غيرى خطأ لا يحتمل الصواب" ؟؟

كل واحد متنبى وجهة نظره هو فقط ، وفارض سوء النية فى الطرف الاخر ؟؟؟

عن نفسى بئا , كنت و لازلت مقتنعة ان الثورة كان مفروض تستمر و الناس ماتروحش بيوتها الا بعد تحقيق مطالبها ، بس خير .. خلينا فى مظاهرات الجمعة .. مع افتراض حسن النية دائما فى الطرف الاخر ، لأن المسئولية فعلا كبيرة ، بس ما ينسناش ..

كان نفسى فى مجلس رئاسى ، أدرى ازاى يدير البلد ، و يخفف عن المجلس العسكرى ، بس خلاص قضى الامر و موافقة على المجلس العسكرى ، بس لنا الحق اننا نقول رأينا ، و نقوم بعض الاخطاء التى تقع دون قصد او لقلة خبرة .. مع خالص احترامنا للمجلس و سيادته بس على المستوى العسكرى .. انما السياسة اخد و عطا ..

كل واحد له الحق انه يقول رأيه ايا كان مخالف ، طالما مابيحجرش عليا و لا بيجرح فيا .. و مش شرط مليون يعنى عشان نقول جمعة نجحت ، دا معيار لاحساس الشخص بحريته فى انه يقول رأيه .. يارب حتى واحد بس اللى ينزل ... هنقول فى مصر واحد قادر يقول رأيه بحرية و زى ماهو عاوز .. احنا مش فى صراع على قوة الحشد ..

و أخيرا .. نفسى فى اعلام محايد ، مش كل واحد متبنى وجهة نظره بس ، اعلام يعبر عن نبض الشارع .. و يعرض الرأى و الرأى الاخر ...

خلاص بئا انا كدا خلصت كل الطاقة اللى عندى .. اما اروح اشحن :)

سلام