المنصفون

عجبنى جدا وصف العقاد للـ -الكتاب- المنصفين :

"فالناس قد تعودوا ممن يسمونهم بالكتاب المنصفين أن يحبذوا و ينتقدوا ، و أن يقرنوا بين الثناء و الملام ،

و أن يسترسلوا فى الحسنات بقدر ، لينتقلوا من كل حسنة إلى عيب يكافئها ، و يشفعوا كل فضيلة بنقيضة تعادلها ،

فإن لم يفعلوا ذلك فهم إذن مظنة المغالاة و الإعجاب المتحيز ، و هم أقل من الكتاب المنصفين الذين يمدحون و يقدحون،

و لا يعجبون إلا و هم متحفزون لملام"

طبعا هنتجاوز عن (تعودوا) لان اللى احنا متعودين عليه غير اللى الناس على أيامه كانت متعودة عليه ^_*

لكن وصف المنصفين نفسه و ان كان هو قاله على الكتاب ، فإحنا بحاجة ليه فى كل المجالات

خاااااااااااااااصةالاعلام

و فى تقبلنا احنا للرأى و الرأى الأخر .. لأن احنا ثقافتنا بتقول " انت معانا و لا مع الناس التانيين ؟؟"

وصف المنصفين لم تقدمه لنا ثقافة فرضت علينا فى العقدين الاخيرين ، بل فرضت علينا ثقافة التملق و شوف هما يعجبهم ايه و قوله او اعمله

او انك تكون خلقت لتعترض ... و فقط

و الآن و نحن على أعتاب مرحلة جديدة ، هل سنتقبل ثقافة الانصاف ؟؟

و ان نتقبل النقد كما نتقبل المدح ؟؟

ام سنظل معهم ... او مع الناس التانيين ؟؟

اى الفريقين ؟؟!!!

تفتكروا السناريو دا ممكن يحصل ؟؟!!

الناس هايجة فى الشارع و مظاهرات

و يوم الخميس 14/6 

تقضى المحكمة الدستورية ببطلان مجلسى الشعب و الشورى

و بناء عليه فكل القوانين التى صدرت منه غير دستورية

كدا قانون العزل باى باى

الاخوان باى باى

الثورة باى باى 

شفيق جاى على مية بيضا 

نياهاهاهاهاها

بلا دستور

بلا مجلس شعب

بلا مجلس شورى

و يربى مصر على ايده !!!

........................................

الوجه الاخر للعملة 

ان يقرروا يضحوا بشفيق - و دا مستبعد شوية- 

و تعلن المحكمة دستورية مجلسى الشعب و الشورى 

و تقر قانون العزل 

و أساسا مرشحى الرئاسة عمالين يتفاوضوا على مجلس رئاسى

فهوب نلاقى نفسنا اتفرقنا بين المرشحين التانيين 

اللى مفروض أعضاء منهم هيكونو من ضمن اعضاء المجلس الرئاسى

- بافتراض يعنى- 

يقوم الاخوان يقولك لا خلاص نستمر فى الانتخابات

- على اساس انهم وافقوا على المجلس الرئاسى -

و طبعا طالما دخل احد مرشحى الثورة - باعتباره- 

يقوم مؤيديه يهتفوا له 

و الناس مربوكه بعد ما خلاص قررت هتنتخب مين 

بئيت الناس اللى مخدتش نصيب تهيج عليهم 

و البلد تولع بين مؤيدى هذا و ذاك 

و نراكم فى ثورة أخرى ان شاء الله ^_^

لعلها تذكرة ...

رغم ان الناس كلها كانت موقنة ان المحاكمة كانت تمثيلية ،

لكنهم عيشوا نفسهم وهم العدالة ، 

لحد ما اتصدموا بالحكم ...

بالظبط زى ما هما عرفوا و اتاكدوا ان الانتخابات دى تمثيلية ،

و رغم كدا لسه عندهم أمل ان الصناديق هتجيب لهم الديموقراطية ،

و بعدين يتصدموا بالنتيجة ...

أفيقوا يا سادة ،

و اعلموا انما الحياة دروس ...

وعيها من وعيها ،

و جهلها من جهلها ..

الاخـــــــــــــر

يقول الله تعالى :( ادع إلى سبيل ربك بالحكمة و الموعظة الحسنة و جادلهم بالتى هى أحسن )

و يقول تعالى :( فبما رحمة من الله لنت لهم ولو كنت فظا غليظ القلب لانفضوا من حولك )

ويقول رسول الله – صل الله عليه و سلم- ( المؤمن الذى يخالط الناس و يصبر على أذاهم أعظم أجرا من المؤمن الذى لا يخالط الناس و لا يصبر على أذاهم )

من الآيتين السابقتين و الحديث الشريف نقدر نخرج بنقطتين مهمتين جدا ..

أولا : ان كدا كدا مدام موجود فى الدنيا دى هتتعامل مع الناس ، لأن الانسان مش لوحده فى الدنيا دى ، ولو عاش لوحده هيتجنن ..

ثانيا : ان عمرك ما هتعيش فى الدنيا بيس كدا و الناس كلها على هواك ... بالعكس الناس أغلبها ان لم يكن كلها مش طبيعتك و لا بيتعاملوا زيك ...و بالتالى هتقابل شرور كتير و المفترض انك تقابل دا بالاحسان

 

طيب انا ليه باقول الكلام دا ؟؟

أصلى اكتشفت ان الناس تقريبا ماتعرفش كدا .. و فاكرة ان الناس كلها بفكر واحد ، و حتى ماعندهاش استعداد انها تعدى .. دا طيعا اكيد راجع لاسلوب التربية و المجتمع 

لكن أنا كنت فاكرة ان كل ما الانسان ارتقى بنفسه ، كل ما دا بيكون له مردود على أخلاقه و تفكيره .. لكن اكتشفت انى بردوا غلط ...

المهم عشان شكل ماحدش فهم حاجة .. كنت سبب فى معرفة اتنين لمصالح مشتركة ، المهم الاتنين ماعرفوش يتعاملوا مع بعض ، و المفترض ان الاتنين دول مستواهم راقى يعنى ..حسب مانا شايفة 

قوم ايه بئا .. كل واحد فيهم يتصل بيا يجرح فى التانى و يشتم فيه ، لا وايه يقولى فى الاخر انا عارف ان مالكيش ذنب فى اللى حصل .. بس التانى دا انسان (......) والاحسن ماعدتش يتصل و لا يبئا فى اى نوع من انواع التواصل

الحقيقة ان انا اللى إتأذيت فى النص .. لأنى عمرى ما سمعت كلام جارح كدا ، و من ناس كنت فاكراها ارقى من كدا ..

ماتعودتش ابدا انى اخسر انسان عرفته ، حتى لو هأنهى علاقتى بحد انهيها بذكرى حلوة يمكن نتقابل فى يوم من الايام ..

لكن عشان تنهى علاقتك بحد تقوم تجرح فيه كدا؟؟؟ خاصة و ان الموضوع مش كرامة يعنى و لاهى مسألة حياة او موت؟؟

و إذا كنا كدا على الصعيد الشخصى ..

أمال ازاى بنفكر فى وحدة وطنية ، و تقبل الاخر ، و فقه الاختلاف ، و الكلام الكبير دا؟؟؟

اه ... ماهو بالشكل دا يبئا كلام كبير ، و كبير اوى ، و ممكن يبئا رابع المستحيلات لو فضلنا بالشكل دا..

زعلان من حد ، و عاوز تنهى علاقتك بيه ، او عندك مشاكل مأثرة على حياتك ... من فضلك ما تعاقبش حد تانى بزعلك او مشاكلك دى ..

انهى الامور بهدوء ، و بعيد عن العصبية و رفع الصوت و الشتيمة ، لأن والله والله والله بتترد لك ، و سبحان الله الاتنين قالوا فى بعض نفس الكلام بالظبط ... كما تدين تدان

انت مش صح على طول ، و لا التانى غلط على طول ... مختلفين اه بس فى نقط التقاء ممكن نساوى من خلالها الخلاف و المشاكل من دون ما نجرح بعض 

فى نظرى ان دى مشكلة مجتمع اولا.. دى ثقافة سائدة ، انك تاخد حقك بالزعيق و الشتيمة ، و تجريح الاخر و اعتبارها قوة .. لكن للاسف مش كل الناس بتعتبرها قوة ...و يكفى انكوا انتم الاتنين خسرتوا نقاط من حسابكم عندى ، و ان ماكنتش هاخسركوا .. فما زالت هناك نقاط للالتقاء ... :(

إلى أيـــــــن ؟؟؟

فى موقف كنت عاوزة أبدأ بيه البوست دا بس للأسف دورت كتير و مش عارفة أوصل للنص تماما ..

المهم هو كان تقريبا فى المصرى اليوم و كان لقاء مع باكوس مرشح الفيس بوك لرئاسة الجمهورية ، و تقريبا كانوا بيسألوه لو انت رئيس الجمهورية ، إزاى هتواجه المليونيات ، فرد عليهم : بسيطة ، أشيل واحد منهم و بالتالى يكونوا 99999 واحد ، و بكدا مايوصلوش لنصاب المليونية و تتأجل للجمعة اللى بعدها عقبال ماكون دورت على حل !!!

و برغم فكاهة الرد ، إلا ان دا بالفعل اللى حاصل النهاردة ...

حد فاهم حاجة؟؟... طيب ماهو دا المطلوب إثباته :)

مبدئيا صدقونى هأحاول اكون حيادية قدر الامكان ، و أرجو ممن يخالفونى الرأى أن يحاولوا تفهم وجهة نظرى ..

حقيقى أنا مش عارفة الجمعة دى بالذات ليه عليها كل الحوارات دى؟؟

هل لأن البعض فى الاول أطلق عليها ثورة الغضب 2؟؟ و لا أصلا بعض القوى السياسية ضاقت ذرعا بمليونيات كل جمعة فقالت ياللا اما نتلكك ؟؟ و لا المجلس العسكرى هو اللى ضاق بينا ، و عاوز يريح حبة فقال اما اجيبها فيهم؟؟

أولا : الثورة دى ، ثورة مصرية حتى النخاع .. يعنى بالبلدى كدا كل واحد مصرى و كل واحدة مصرية له/ـا الحق انه ينزل الميدان يقول اللى هو عاوزه ، و يرفع الشعار اللى هو عاوزه ، طالما فى حدود السلمية و عدم تجاوز الحدود مع الآخر ..

و أنا عن نفسى بصراحة شايفة ان الناس كان لازم تفضل فى الشارع من أول يوم لحد ما مطالبها تتحقق ، ماينفعش أحِد السكينة و احطها على رقبة حيوان و اقول بسم الله ، الله أكبر ..و أول ما أبدا ، أقول كفاية كدا انا قطعت شريان لما اسيبه ينزف بئا لحد ما يموت من نفسه ...

لا ، يا إما من الاول اسيبه يموت موتة ربنا ، يا إما اقطع عرق و اسيح دم ...

يعنى بكلمات تانية ، بعد التنحى كان لازم كل القيادات يطلع قرار بتنحيتهم جميعا ، سواء محليات ، سواء جامعات ، فى كل المناصب و الاماكن ...و يبئوا فقط قائمين بالاعمال لفترة بسيطة ، يتم خلالها اجراء انتخابات لمن هو الكفء لتولى هذه المناصب ...

وزارة المالية تقدم صورة عامة لموقفها المالى ، و إزاى هيتم وضع موازنة جديدة و هيكلة الاجور ...

سرعة اتخاذ قرارات بمنع كل المسئولين من السفر لحين محاكمة كل المسئولين عن الفساد و قتل المتظاهرين ..

و غيره و غيره من مطالب الثورة ...

لكن طبعا بما إن دا محصلش ، و بلاش نبكى على اللبن المسكوب ، يبئا خلونا فى النهاردة ، و المفترض الاجراءات دى تتم بأسرع وقت ..و أعتقد دى المطالب اللى الشعب كله متفق عليها ..

و بناء عليه ، إلى ان يتم تحقيق المطالب دى فللشعب انه ينزل وقت ما يعجبه .. يفكر القيادات انه مش ناسى حقه ، و ياللا بسرعة لو سمحتوا ...

ماشى ؟؟؟ حد عنده اعتراض ؟؟ حد عنده تعليق؟؟

طيب روحوا على التعليقات قولوا اللى فى نفسكوا هناك ...

خلونا نروح للنقطة التانية

ألا و هى المجلس العسكرى و المجلس الرئاسى ..

أنا عن نفسى و من بعد ما المجلس العسكرى مسك البلد ، كنت باقول ياريت لو يعمل له مجلس استشارى من المدنيين ، يساعدوه فى مهمته لأن دى مهمة صعبة وهو مش واخد على كدا ..

طلعت أصوات بتنادى بمجلس رئاسى .. قلت يا سلااااااااام كدا تمام ، بس يارب فعلا يتحقق ..

جت الاستفتاءات ،و قلنا يا جماعة فرصتنا نمارس الديموقراطية و النتيجة اللى تطلع كلنا نرضى بيها و نكمل المشوار مع بعض ... و جت النتيجة بنعم ، و بغض النظر عن هى جت ازاى .. بس قلنا خلاص ،و مدام الشعب قال كلمته ، يبئا دا اللى يمشى ...

جه الاعلان الدستورى عشان يضرب بنعم و لا عرض الحائط ... قلنا ماشى مش مشكلة  ... ورضينا بالمجلس العسكرى حاكم و مسير للبلاد خلال هذه الفترة ...

تطلع بعض الناس بئا بعد كل دا تقولك الاستفتاء مش قانونى ...ماشى تمام ،دا رأيك و أنا مقتنعة .. بس من فضلك مش وقته ..الكلام دا وقته انتهى عاوزين نبص لقدام ..

ناس تقولك مجلس رئاسى ... والله عظيم جدا ، بس بردوا مش وقته خلاص ... خلونا الوقتى حتى فى المطالب الاساسية اللى لسه ماشوفناش منها حاجة .. و شكلها هتروح علينا ..

لكن دا لا يبرر أبدا لبعض القوى إنها تستغل توجهات بعض الناس دى عشان توقع بينا و بين بعض ... من فضلكوا ياريت نمارس الديموقراطية بكل ديموقراطية .... بلاش نظام أنا اللى فاهم و انت متعرفش حاجة .. أو انتوا هتودوا البلد فى داهية ..

لا معلش محدش وصى عليا ، واللى انا مقتنعة بيه هأقوله .. حضرتك شايف ان رأيى غلط ، انزل قول و نادى باللى انت عاوزه ، مش عاوز تنزل و تقاطع النزول ، يبئا من فضلك تقعد ساكت و بلاش تقطع فى فروة اللى نازل .. هو انت شفت هما هيعملوا ايه ؟؟ و لا هو تصور انت تخيلته يبئا خلاص دا اللى هيحصل ، والله العظيم هيحصل ... صدقونى هيحصل !!

و ماحصلش .. اهو الناس اللى نزلت نزلت ، و هتفوا للجيش ، و محدش خرب حاجة ،و اللى شايف ان الدستور اولا رفع اللافتة ...رغم ان ماكنش فيه غير واحدة باين و لا اتنين ..

محدش جرح فى المجلس العسكرى ، و اليوم كان رائع جدا .. على الاقل حسب ما شفت

و جمعة زى بئيت الجمع اللى الناس بتنزل فيها مؤكدة على حقها فى تحقيق مطالبها ملتزمين بـ" سلمية سلمية" ..

حد عنده تعليق ؟؟ حد عنده اعتراض؟؟ ... حق الكلام مكفول فى التعليقات ، تقدروا تتفضلوا هناك :)

نيجى بئا لتالت نقطة ، و للأسف دا الفخ اللى الكل وقع فيه .. و اللى كان سبب فى الموقف اللى ذكرته فى اول البوست ..

وهى ان الناس تفرغت لعد الناس اللى نزلت الميدان ، اللى موافق على النزول يقولك أعداد غفيرة ، مليونية عظيمة .. و اللى معارض يقولك يا عم دول مكملوش ..هنضحك على بعض ؟؟

و ناس تصورلك من زوايا تبان الاعداد فيها لا تذكر ، و ناس تصورلك من زوايا و كأن العالم كله جاى يزور مصر .. و الناس نازلة تجريح فى بعض .. و كأن النهاردة مباراة بين المؤيدين و المعارضين هل سنكمل النصاب ام تؤجل المليونية للجمعة المقبلة؟؟

هو أصلا يعنى كل الجمعات كان الناس بتكمل المليون ؟؟ يعنى انتوا عدتوهم ولا ايه ؟؟

و بعدين هى الجمعة بالمليون؟؟ و لا بان الناس تنزل تعبر عن رأيها؟؟؟

حسسونى ان الجمعة دى هى جمعة النهاية ،و بانها كدا فشلت !!!

كون ان الناس تنزل برغم الحر دا فى المحافظات .. بغض النظر هى كملت المليون و لا لا ، فدا تأكيد ان الثورة دى ثورة شعبية و محدش ليه الكلمة عليها .. فياريت اللى مش عاوز يشارك يقعد ساكت و مايتكلمش

حد عاوز يتكلم ؟؟؟... طبعا عرفتوا المكان :) 

نيجى بئا للنقطة الرابعة .. ومعلش طولت عليكوا ، وهى ان الاعلام للاسف مازال اعلام غير حيادى بالمرة ..

قناة محترمة من اللى كانت مغطية ايام الثورة الاولى امبارح فضلت تجيب اتصالات مع ناس معارضة للنزول ، وكانوا بيتكلموا بطريقة مستفزة بجد .. طب لما كل واحد بيتكلم نيابة عن منطقته او محافظته ... امال كل الناس اللى نزلت دى منين ؟؟؟ من المريخ؟؟؟

و واحدة تانية النهاردة .. فضلت كل شوية مركزة على شعار الدستور اولا مع ان والله ما شفت غيره هو وحيد اوحد اللى مرفوع .. و باقى اللافتات عن المطالب الشعبية ..و تتصل بناس يقولك احنا كنا عاوزين مجلس رئاسى ...و المفروض الدستور الاول ... مع ان الناس كانت واقفة رافعة لافتات المطالب المشتركة و عادى يعنى ...

هو فى ايه؟؟؟ هو احنا مش هنبطل بئا شعار " رأيى صواب و لا يحتمل الخطأ و رأيى غيرى خطأ لا يحتمل الصواب" ؟؟

كل واحد متنبى وجهة نظره هو فقط ، وفارض سوء النية فى الطرف الاخر ؟؟؟

عن نفسى بئا , كنت و لازلت مقتنعة ان الثورة كان مفروض تستمر و الناس ماتروحش بيوتها الا بعد تحقيق مطالبها ، بس خير .. خلينا فى مظاهرات الجمعة .. مع افتراض حسن النية دائما فى الطرف الاخر ، لأن المسئولية فعلا كبيرة ، بس ما ينسناش ..

كان نفسى فى مجلس رئاسى ، أدرى ازاى يدير البلد ، و يخفف عن المجلس العسكرى ، بس خلاص قضى الامر و موافقة على المجلس العسكرى ، بس لنا الحق اننا نقول رأينا ، و نقوم بعض الاخطاء التى تقع دون قصد او لقلة خبرة .. مع خالص احترامنا للمجلس و سيادته بس على المستوى العسكرى .. انما السياسة اخد و عطا ..

كل واحد له الحق انه يقول رأيه ايا كان مخالف ، طالما مابيحجرش عليا و لا بيجرح فيا .. و مش شرط مليون يعنى عشان نقول جمعة نجحت ، دا معيار لاحساس الشخص بحريته فى انه يقول رأيه .. يارب حتى واحد بس اللى ينزل ... هنقول فى مصر واحد قادر يقول رأيه بحرية و زى ماهو عاوز .. احنا مش فى صراع على قوة الحشد ..

و أخيرا .. نفسى فى اعلام محايد ، مش كل واحد متبنى وجهة نظره بس ، اعلام يعبر عن نبض الشارع .. و يعرض الرأى و الرأى الاخر ...

خلاص بئا انا كدا خلصت كل الطاقة اللى عندى .. اما اروح اشحن :)

سلام

لـمـاذا هـذه الـمـدونــة؟؟؟

"عندما يضيق بنا العالم ،
و لا نجد بأيدينا شيئا لنفعله ...

فإننا نعزى أنفسنا ببضع كلمات ،
فلربما غيرت هذه الكلمات العالم ذات يوم ...."

لهذا السبب أنشأت هذه المدونة ،

و لهذا السبب أخرجت فيها خلاصة ما كتبت و ما فكرت

تمنيت أن يستفيد أحدا بكلمة مما كتبت فتؤثر فيه بالإيجاب ، و أكون قد قدمت شيئا خيّرا في حياتي

فحين أنشأت هذه المدونة لم يكن بيدي شيء إلا أن أقول .. و حتى الآن ليس بيدي سلطة سوى أن أقول

و إلزام نفسي – فقط- بالفعل ... و على من يرى في نفسه القدرة على الفعل فليفعل – حين يقتنع-

و كانت تلك الكلمات عن قناعة عندي بأنه لابد من تجهيز أنفسنا لمستقبل أفضل ستكون بيدنا فيه مقاليد الأمور

كان و لا يزال قائدي في الحياة هو الأمل و التفاؤل ... برغم كل العيوب و السلبيات ، فدائما ما يبزغ شعاع الأمل حتى في أحلك المواقف

و لكم تلقيت من سخريات سواء من أصدقاء أو غيرهم ، كلهم أثرت عليهم ضغوط و مشاكل الحياة

حتى كانوا يرون من تفاؤلي مادة للتندر فيما بينهم ، و رغم ذلك لم أغضب .. بل كنت أشعر في كثير من الأحيان بالشفقة تجاههم ، فما أصعب الحياة دون أمل !!!

إنه الموت بجسد مازال فيه قلب ينبض

و ها قد حدثت المعجزة ... و صار ما كان خيالا بالأمس ، واقعا على أرض اليوم

و حدث ما كنت أخشاه ، فالكل في حالة تخبط ، كان أسيرا لدور الفريسة ، فلم يحسن دور الصياد!!

أصبح معظمنا فريسة خوفه ، و تلهفه لأخذ حقه فوق كل اعتبار ، و مازال الكثير – خاصة من البسطاء- لسان حالهم يقول : هذا ما جنيناه من الثورة ... وقف الحال!!!!

إن هذا ليس تقريعا ، و لا توبيخا .. و لكنها وقفة لنأخذ من الماضي عبرة و طريقا إلي المستقبل

من هذه اللحظة على كل منا أن يبذل كل ما في يده ، سواء رأى فيها نبته لبذره ، أو لم ير

سواء أكان سيحصد أم سيظل طول طريقه يزرع ، فلربما سيحصد من سيجيء بعده

علينا أن نثق في أنفسنا و في قدراتنا .. أن نصنع مستقبلنا بأيدينا نحن كما صنعنا ثورتنا بأيدينا نحن 

علينا أن نبدأ .. و البدء دائما بالعلم و الثقافة .. على كل فرد فينا أن يتقن علمه ، و ينمى ثقافته فى باقى العلوم

على كتابنا و مثقفينا إحياء ثقافتنا و إيماننا بتاريخنا مرة أخرى ...

و لعلى هنا أقتبس كلمات الراحل / مصطفى محمود .. فى كتابه / علم نفس قرآنى جديد ،قوله :

" العلف الثقافي الذي تعيش عليه دول العالم الثالث و منها دولنا العربية .. تحكمه قوانين انسياب المعلومات من دول امتازت بالتفوق التكنولوجي و الالكتروني و الفضائي و بالمليارات التي ترصدها تلك الدول الغنية لإنتاج الأفلام و المسلسلات .. إلى الدول النامية الفقيرة و المدينة و المكبلة بالقروض .. و هي مؤهلات لا تتوافر حاليا إلا لأمريكا و أوروبا

و ما هذه "العولمة" سوى هذا العلف الثقافي الردى الذي يلقى به الإعلاميون الكبار إلينا .

و هذه " العولمة الثقافية" هي الاسم الجديد للاستعمار المهين و غسيل المخ المتواصل الذي كتب علينا أن نعيش فيه .

يا مؤلفين و يا كتاب السيناريو و يا منتجين لا تقلدوا الإنتاج الغربي .. و كفانا فيديو كليب .. و أغاني الصراخ و المغص الكلوي .. و رقصات الهستيريا ..و أفلام الرعب و الدم و الجنس .

لا تجعلوا من الاستعمار الواحد .. استعمارا مضاعفا نتطوع نحن بتكبيل عقولنا بهذه التبعية و بهذا التقليد .

أبدعوا أشياء من بيئاتكم و من تاريخكم و من عقائدكم و أحلامكم.

انبذوا هذا العلف المسموم الذي أتخمتم به عقولنا و عقولكم .. و عودوا إلى هويتكم .. إلى مصر أم الحضارات و أم الفنون و نبع الأديان .. إلى النبع العربي الذي خرج منه المتنبي و أبو تمام ..و إلى نبع الضياء الذي خرج منه تاج الأنبياء و خاتم العظماء محمد رسولنا و رسول العالمين .. و كفانا عولمة ثقافية هي في حقيقتها خلطة أعلاف للبهائم و للببغاوات التي تقلد بلا عقل و بلا تفكير .. و اذكروا تاريخكم .

اعملوا يا شباب في همة .. و لا تتهالكوا على هذا العلف الرخيص .. و لا تركنوا إلى التقليد .. فلن تتفتح لكم زهور خارج بلدكم قبل أن تمتد لكم جذور في أرضكم و لن تكون لكم عالمية قبل أن تكون لكم مصرية ."

كذلك ليس قبل أن نصبح جميعا يدا واحدة نبني معا هذا الوطن ...

القادم أحلى إن شاء الله ...و لكن بالثقة في الله أولا ، ثم في أنفسنا ثانيا 

و إلى لقاء