مسسسسسسسسسسسسسسح القيم -2

السلام عليكم و رحمة الله و بركاته

إزيكم يا شباب ؟؟ أخباركم ايه ؟؟

أولا : أحب أقولكم كل سنة و انتو طيبين ،
و أيام سعيدة على الكل إن شاء الله ..
و نحاول نقرب من ربنا كدا ، لعل و عسى ...

ثانيا : بأعتذر للكل عن انشغالى عنكم الفترة اللى فاتت
و عدم زيارة مدوناتكم ، بجد كنت مشغولة جدااااااااااااا
فمعلش سامحونى .. إن شاء الله قريب أوفى الدين اللى عليا ..

ثالثا : أعزائى القراء نتابع معا المسسسسسسسسسسح الخطيييييييير
للقيم العالمية .. على النطاق المصرى ..

نبتدى و نقول : بسم الله الرحمن الرحيم
استعنا عـ الشقى بالله ...

المرة اللى فاتت أتكلمنا عن نقطتين ،
و مش عارفة ليه حاسة إنكم مش فهمتوا قصدى ؟؟!!
طيب نخلص النقط كلها عشان الرؤية تتضح ..

نيجى لنقطة الهوية المصرية
و ما أدراك ما الهوية المصرية ،
حيث أن 98% أعربوا عن فخرهم بكونهم مصريين ، و 25 % فخورين جدا ...
<< شوف بردوا الشهامة مش بيفرطوا بالساهل ...عششششششششرة بردوا ..ههههههههههه
بصراحة لو كانوا سألونى ، كانت النتيجة بدل 25% هتبئا 26% .. : )

أيوا .. فخورة و فخورة وفخورة جدا كمان بكونى مصرية ..
كفاية إن مصر أتذكرت فى القرآن أكتر من مرة ،
كفاية إن رسول الله صلى الله عليه و سلم قال فينا " إذا فتح الله عليكم مصر فاتخذوا بها جنداً كثيفاً، فذلك الجند خير أجناد الأرض " فقال له أبو بكر : ولم يا رسول الله ؟ فقال : لأنهم وأزواجهم في رباط إلى يوم القيامة".
أيوا فعلا إحنا فى رباط أهو ... ربنا يقدرنا بئا و نعمل اللى علينا و نبطل سياسة الرضا بالأمر الواقع اللى احنا عايشينها دى ..
و دا يمكن يرد على التساؤل اللى قبل كدا بتاع هل أنت مستعد للدفاع عن بلدك؟؟

صحيح بأحبها ، بل أعشقها .. لكن لازم اشغل عقلى بردوا ..
يعنى صحيح قلت مش مستعدة ، لكن دا لحظة ما اتسألت السؤال ، لكن دا لا يمنع إنى أبدأ أشوف اللى ممكن أعمله، و يساعدنى فعلا لو فى حرب إنى أكون مستعدة .. << إلى الجهاااااااااااااد ...معتدلللللللللللللل مارش ههههههههههههههههه

و كمان الفخر حق لنا لأننا أصهار إبراهيم خليل الله وأصهار محمد – صلى الله عليه وسلم –
مش كدا بس ، لا كمان القرآن نزل بالعربية ، و التوراه نزلت بالهيلوغرافية ..
كمان أرضنا مصر الحبيبة ، تقلد فيها يوسف منصبا ، و بعث فيها موسى مبشرا و نذيرا ، و أتاها إبراهيم زائرا ، و هرعت إليها مريم و ابنها حصنا و ملاذا ...
يعنى أصغر مصرى فيكى يا كرة يا أرضية يمشى كدا يقول : يا أرض اتهدى ما عليكى أدى ... : )

طب بالنسبة لكونى فخورة ،و فخورة جدا ... و بشدة ، و مش عارفة هافضل أشد لحد امتى ؟؟
بس أعتقد إنكم هتوافقونى ، و مش معنى اللى بيحصل جوا بلدنا إننا نكرهها ، لا بالعكس ..

أذكر أحد المعارف قال لى أنه قابل أمريكى أو أمريكية لا أذكر ، فأخذ يكلمه عن سياسة بوش و أنهم شعب سئ يحب نفسه فقط ، و ليس أدلّ عما يفعله بوش على ذلك .. فاستشاط الأمريكى غضبا و قال له : هل تحب أن نحكم عليكم كمصريين من خلال رئيسكم ، فأجاب هو : لاااااااااااااااااااااا طبعا ، فهو لا يعبر عنا إطلاقا ، فأجابه الأمريكى : و نحن كذلك ، لا نحب بوش و هو لا يعبر عنا ...

يعنى يا جماعة الحكومة حتى فى أعلى شعوب العالم تقدم مش شرط تكون موافقة لهوا الشعب عشان يحب بلده ،
دا شئ فطرىىىىىىىىىىى .. مالوش دعوة لا بحكومة ،و لا معارضة ..
متفقييييييييييييين ؟؟؟...


طيب النقطة اللى بعد كدا هى نقطة الدين
و دا اللى استعجبت منه صراحة ..
فــ 95% من المبحوثين <<و أقول المبحوثين لأن الظاهر إنهم كانوا حالة شاذة من المجتمع المصرى ،
95% قالوا إن الدين يحتل عندهم مكانة كبيرة ..
امممممممممممم ..امال السجون مليانة ليه؟؟
.. و جرايد الحوادث و صفحة الحوادث فى كل الصحف كل يوم تنادى بمساحة أكبر ليه؟؟
الادمان اللى فى الشباب دا ايه؟؟؟ البؤس و الاحباط اللى فى الناس دا ايه ؟؟؟
أصلا يعنى ايه دين عند الناس عشان يقولوا إنه يحتل عنده مكانة كبيرة ؟؟؟
أصل اللى اعرفه إن الواحد لما بيحب شئ بيجرى وراه لحد ما يحققه ..

لكن تلاقى الشاب ضارب شعره جل و واقف مع الجو ..و يقولك طبعا باحب دينى و باصلى و باقرأ قرآن !!!!!!!...
تلاقى البنت لابسة و مش لابسه ، و محجبة و يمكن لا ... و تقولك طبعا باحب دينى و باصلى !!!!....
تلاقى الشاب من دول مش فى الدنيا أصلا ، ولسه راجع من الغرزة ، و يقولك طبعا مسلم و باحب دينى !!...

بصوا ... أول شئ ربنا اعلم باللى فى القلوب ،و أنا مش بانفى عن أى شخص من دول أنه مسلم و يحب دينه ،
لكن كل فعل له رد فعل .. باحب الدين ، يبئا ألتزم بيه ، مش باحبه قولا و تعصبا ، لكن نيجى للفعل مافيش ..

بصراحة معلش و مع احترامى للجميع ، الدين بئا مظهر ، و وسيلة للهروب من الواقع اللى عايشينه .. و ياريت فاهمين صح !!
المنتقبة فى نظر الناس يا اما هى ..ما شاء الله ، تبارك الله ملتزمة و كويسة و ستنا الشيخة ،
يا اما هى .. أعوذ بالله دا المنتقبات كلهم ...؟؟؟
الملتحى .. ما شاء الله تبارك الله سيدنا الشيخ ،
يا اما ... دا ارهابى ، هما المستشيخين كلهم كدا ..
و الشاب الروش ... يا اما فاسق ، كافر ، عاصى ،
يا اما ... واااااااااااااااااو سو كوووووووووووول
البنت الروشة .. فاسقة ، متبرجة ، عليها لعنة الله و الملائكة و الناس أجمعين ،
يا اما .. واااااااااااااااااااو كيوووووووووت
و الناس العادية اللى ماشية فى الشارع بئا ... يا اما ربنا يهديهم ، أصلهم ما يعرفوش ....
يا اما يااااااااى بيئة ..

و هكذا بئا .. تعرفوا تقولولى مين فيهم صح و مين فيهم غلط ؟؟!!...
و ياترى فعلا الدين بالنسبة لنا ايه ؟؟؟... و فين الدليل على حبنا دا؟؟؟

لكن بردوا هأقول .. إن كل واحد فينا جواه البذرة ، لكن محتاج اللى يرويها و يتابعها و يفهّمها صح ، عشان تفهم و تعرف هيا رايحة فين ..


طيب النقطة اللى بعد كدا – النقط مش بالترتيب- هيا موضوع التعامل مع الناس ..
82 % قالوا إنهم أصبحوا يتوخوا الحذر فى تعاملهم مع أى شخص ،
و أنا بأوافقهم جدا ... أيوا صح ،
لأن بئا صعب جدا إنك تثق فى انسان ، و الضربة بتجيلك من أقرب الناس ليك ..

دا مش معناه بردوا إنى أخوّنهم .. لكن عشان تتعامل مش شخص ، يبئا لازم تفهمه ، و تتعامل معاه خاصة فى مسألة الفلوس عشان خاطر تحكم عليه حكم مبدئى<< و أقول مبدئى ، لأن الانسان بين لحظة و أخرى معرض إنه يتغير كل شئ فيه ..

و لأن بئا صعب جدا إنك تلاقى حب صافى فى الله ، بئا صعب إنك تقول لصاحبك حبيبك تقوله الغلط إذا غلط ، و ماشيين بمبدأ معاهم معاهم عليهم عليهم ...
و يا صاحبى يا عدوى ماففيش حاجة وسط .. عشان كدا أنت ماشى فى وسط الناس كلها باعتبار انهم أعداء إلى أن تثبت صداقتهم ...ههههههههههههههه

لكن السؤال .. هل يا ترى فعلا هو دا المبدأ الصح ؟؟؟ هل فعلا المسلم سئ الظن بالشخص اللى قدامه لحد ما يثبت له منه حسن النية ؟؟
امممممممممممممم ... يا ترى دا متعلق بالسؤال اللى قبله؟؟؟!!!...


طب النقطة اللى بعد كدا << هو احنا لسه قدامنا كتييييير ؟؟؟؟
هو الظاهر يا جماعة إننا هنحتاج بوست كمان .. مع إن كان نفسى نخلص النهاردة .. بس الظاهر إن الموضوع ليمتد ..هههههههه
طيب نقول كمان نقطة و الباقى نحوشه للمرة الجاية .. اهو بردوا عشان نلاقى كلام نقوله ..ههههههههههههههه


النقطة هيا قال ايه ... نظرة المصريين للمرأة ..
حيث جاءت فى موقع متأخر بين 55 دولة ..
طب دا بمناسبة ايه يعنى ؟؟.. أو السؤال كان ايه عشان يطلعوا بالنتيجة الرائعة دى ؟؟؟

شوفوا السؤال ... لو كانت هناك فرص نادرة للعمل ، فلمن نعطيها ؟؟؟ للرجال أم النساء ؟؟

فــ طبعا لرجعيتنا ، و الفكر السودوى للرجال عن المرأة فالرجال أجابوا بـ89 % نعطيها للرجال ..
طبعا ، من حقهم يقولوا إن المجتمع المصرى فى نظرته للمرأة فى موقع متأخر ..

إنما لما النساء نفسهم 84% منهم يقولوا نعطيها للرجال ... فياترى دا من إيه ؟؟
نظرة متأخرة بردوا ؟؟؟

طبعا المعظم هيدخل يقول نعطيها للرجال ؟؟؟
و طبعا ممكن البعض يقول للنساء ؟؟؟

و الكل طبعا على أهبة الاستعداد أنا هأقول ايييييييييه ؟؟<< دا بمناسبة إنى صاحبة المدونة ،و بالتالى رأيى هو الرأى الفصل ...ههههههههههه

بصراحة الموضوع بالنسبة لى مش كدا خالص ...
ماهو على حسب وجهة النظر اللى بنبص بيها للأمور ،

يعنى مثلا .. لو بصينا للأمر من جهة إقامة أسرة ، و فتح بيوت .. فالمكلف بيها شرعا هو الرجل ، و بالتالى نعطيها للرجال ،
لو بصينا لها من جهة التعصبات و إن كل واحد عاوز يحقق نفسه .. يبئا متساويين رجال و نساء ،
لو بصينا لها من جهة إقامة دولة ، و المصلحة العامة ... يبئا من جهة الكفاءات ، مش مرتبطة براجل و لا ست ..

و اللى هيقولى الدين .. هأقوله الدين كفل للرجل و المرأة العمل طالما أن كل واحد ملتزم بالحدود الشرعية ..
و طبعا إحنا فى زماننا و مجتمعنا عادى إن الرجل و المرأة يشتغلوا .. مش هنقول خروج المرأة فتنة ،
و إن كان يستحب لها أن تتستت فى بيتها ، لأن المعاكسات و التحرشات ماعدتش بتفرق ، والله حتى المنتقبات ..

لكن اللى باستغرب له جدا ، العلاقة بين السؤال و النتيجة ..
هما ربطوا إزاى بينهم ؟؟؟... مش عارفة ، يمكن هما ليهم رأى تانى ..
هههههههههههههههههههههههههههههههه
الله المستعان

رابعا :بئا أنا جبت لكم روابط الحلقة أهو
بالنسبة للمسسسسسسسسح ، فدا ..مسح أول – مسح تانى – مسح تالت – مسح رابع – مسح خامس – يا مسهل ياااااااارب
مسح سادس – مسح سابع – و الللللللمسسسسسسسسسح الأخييييييييييير ...هههههههههه
بالنسبة للقاء إليدا جيفارا .. فدا الأول – التانى – التالت – الرابع – الخامس


و ربنا يعينكم يا جماعة ..والله تعبنالكم سلف ...ههههههههه

خالص تحياتى

كل سنة و أنت طيب

السلام عليكم و رحمة الله و بركاته

كيفكم يا شباب ؟؟ أخباركم ؟؟

معلش عارفة إنى أتأخرت عليكو فى الجزء التانى من مسح القيم

<< مستعجلين أوى كدا ؟؟!!.. ههههههههه

بس معلش اسمحولى ببعض الخصوصية شوية فى البوست دا

لأنه هيكون إهداء لشخص غالى عليّا

و مميز بحياتى جدا

حبيت اقوله كل سنة و أنت طيب

صحيح بعيد عنى ، بس بقلبك معايا

و كل ما بافتكر أى موقف بينا

غصب عنى باضحك .... و أدعيلك من قلبى

بس هنعمل ايه ؟؟ .. هى سنة الحياة كدا

لكن حقيقى واحشنى جدا ، و مشتاقة لك كتير

و كل ما باسمع صوتك ، مش عارفة ليه بنرجع أطفال

و نئحد نضحك و نهزل مع بعتشينا

عاوزة أكتب لك كتير ، ولو أكتب من هنا لحد السنة الجاية

مش هأخلص ...

و لا هيخلص الكلام لك و معاك ،

بأتمنالك من كل قلبى التوفيق و النجاح و السعادة

كل السعادة ....

فى الدنيا اولا ، وفى الآخرة دائما و أبدا ..

و أتمنى أشوفك على خير ،

و قريب ...

خالص حبى و أشواقى

لك ... و ليها ...

و لحبيبى الصغنن ..

مسسسسسسسسسسسسسسح القيم

السلام عليكم و رحمة الله و بركاته

كيفكم يا شباب ؟؟ أخباركم؟؟

يارب تكونوا كلكم بخير ..

طبعا معظمكو بيتابع البرنامج الجميل الـ10 مساء ،

بس مش عارفة شوفتوا الحلقة بتاعت امبارح و لا لا

اللى هيا كانت منى مستضيفة فيها الاول اليدا جيفارا و السفير الكوبى

و بعدين ناقشت موضوع مسسسسسسسسسسسسسسسسح القيم

بداية الحلقة امبارح شدتنى لأقصى درجة ،

يمكن لأنى ماكنتش شايفة منى اللى ماسكة زمام الأمور

أو هى بطلة الحلقة ...

بصراحة اليدا حازت اعجابى كما فعل فعل ابوها ..

لكن مش دا اللى هناقشه حاليا ...

تعالو للموضوع التانى وهو موضوع مسسسسسسسسسسسسسسح القيم العالمية

صحيح مش عارفة هما عاوزين يمسحو فيها ايه أكتر ماهى ممسوحة

بس لما تكون عالمية ..دا يعطينا حافز إننا نمسحها اكتر و اكتر

ههههههههههههههههههههههههههههه

بجد يمكن من أكثر النقاشات اللى عجبتنى جدا

ممثل من الحكومة وممثلين مش هاقول معارضين لكن ممكن نقول غير متفقين مع الحكومة

أولا بالنسبة لأسلوب الحوار كان راقى جدا جدا

وهو دا بصراحة اللى نفسى يكون ، لأن بكدا ممكن نوصل لشئ

إنما لما يكون النقاش بس عشان أثبت أنك غلط و أنا الصح

يبئا مش هنوصل لحل

انما كان الطرفين – يمكن لأنهم اتعاملو مع بعض قبل كدا و اتعلموا من بعض – بيسعوا فعلا لأنهم يوصلوا لنقطة الخلل منين

و بشهادة منى فإن المركز مشهود له بالكفاءة ..لكن غالبا ما بتأتى النتائج بعكس المشاهد

و كمان مشاركة المشاهدين .. أعتقد بردوا انها كانت فعالة بإستثناء واحد أو اتنين ،

يعنى كانت مشاركتهم نظرة على واقع تجربة مروا بيها أو بيمروا بيها

مش عن الحالة العامة.

طب نيجى بئا لموضوع الحوار ، و اللى كان عن دراسة أجراها مركز المعلومات ودعم اتخاذ القرار عن دراسة عالمية لمسح القيم

<<مسحها مش إزالتها يعنى ...لا، يعنى Survey أو تقييم

المهم ... طبعا كانت النتائج راااااااااااائعة كالعادة ، و لازم قاعدة موافقون تسرى حتى على التقييم الفظييييع الجميل دا

لكن المناقشة صراحة كانت واقعية جدا ،

و الأسباب اللى أدت لكدا مش شرط إنها تكون تزوير من المركز

لا .. الأسباب ممكن تكون مننا ، أو من اللى قاموا بالبحث دا

سواء عن قصد أو من غير قصد

يعنى مثلا لما سألوا عن السعادة ؟ ..هل أنت سعيد؟؟

لقوا ان 94% من العينة المختارة سعيدين ،و إن 10% منهم سعيدين جدااااااااااااااااااا

<< يا حلاوة يا ولاد ... بيجبوها منين دووووووووول؟؟ ..الى يعرف يبئا يقوللى عشان اشترى انا كمان اهو حتى ننفع صاحب المحل ..

طيب تعالوا نشوف د/ ماجد عثمان قال إيه ؟؟ ( مدير المركز )

قال : إن دا سؤال استهلالى .. يعنى بداية لفتح حوار بس

و مش كل الناس السعادة عندها هى الفلوس أو الجانب الاقتصادى .. دى نقطة

النقطة التانية انهم يمكن بردوا ما أجابوش صراحة بنعم ..لكن من سمة المصرى إنك لما تسأله عن شئ يقولك الحمد لله ،

فكدا الباحثين حطوا الاجابة فى خانة السعادة << والله ناس فهيييييييمة ..بيجيبوها و هى طايرة : ) ..يا سلااااااااااااام مبسوطة أنا

النقطة التالتة و اللى بصراحة مش فاكرة هو اللى قالها ولا د. يحيى الرخاوى ..أستاذ الطب النفسى بجامعة القاهرة

و اللى بأوافق عليها بشدة .. إن الشعب المصرى مش بيعبر عن نفسه .. إنما بيشوف انت عاوز منه ايه ،و يجاوبك على اساسه

يعنى مثلا عارف ان التقييم دا من الحكومة ..يبئا ايييييييه؟؟... موافقووووووووووووون

انما لما كاميرا العاشرة سألت الناس قالوا : لااااااااااااااااااااااااا

<< مش باقولكو ان الشعب المصرى أجدع نااااااااااس .. مافيش أكتر من كدا لباقة ... محترم والله

النقطة الرابعة بردوا واللى اثاروها .. إن أساليب استخلاص الاجابة من المبحوث لها فنونها ،

يعنى مش شرط اروح أسأل الشخص فى وشه انت بتحب مصر ؟؟؟

طبعا هيقولك : أكيد يا أخى دا بلدىىىىىىىىىىى << أمال قاعد طول الليل و النهار يسب و يلعن فى مين مش عارفة ...ماعلينا

إنما د/ يحيى قال ممكن اسلوب تانى يبئا عامل زى لعبة كدا ..

مثلا : يقوله :عارف أنا لو ماكنتش مصرى ، كنت اتمنى أكون ....، و يسيب اللى قدامه يقول اللى عاوزه

و بالتالى هيعرف فعلا هل هو منتمى لبلده و لا لا ...<< والله العلم حلو يا جدعان ، بس خدوا بالكو .. أحسن تقوموا واقعين فى مطب و ماحدش سمى عليكو ... آه يعنى أنا بأقولكو اهو عشان محدش يضحك عليكو بشيكولاته و لا حاجة ...ههههههههههههه

النقطة الخامسة بئا ، هو بأى صفة خدوا العينة و أختاروها ؟؟

و بأى صفة بردوا الناس دى تمثل رأى المصريين ؟؟ ...

النقطة اللى بعد كدا .. هى صيغة السؤال نفسه

ممكن السؤال يتوجه بطريقة غلط ، أو يتفهم بشكل غلط ،

أو الإجابة فى وادى تانى أصلا .. و ممكن التلاتة مع بعض << و بكدا تتم الزوايا الثلاث لأى إجابة نموذجية لأى سؤال من طرف الحكومة ...ههههههههههههههههههه

بعد كدا .. هى صيغة السؤال نفسه

، لكن رضا عن حالى أنا ، عشان أعرف أعيش ، لكن دا ماينفيش إنى برسم لبكرة شكل تانى خالص ، و ب

الجميل فى الموضوع إن برغم إنى كنت حاسة ببعض الحساسية من بعضهم لبعض ..

لكن دا ماظهرش على أسلوب الحوار .. و الجميل بردوا انهم كانوا متفقين على كافة الأسباب اللى اشاروا إليها

و د/ ماجد نفسه مانفاش إن النتايج غير صحيحة ..

حتى منى نفسها قالت إنها تشهد للمركز بالكفاءة لكن النتائج غالبا ما تكون غير صحيحة ،

لييييييييييييييه ؟؟

عزيزى القارئ يرجى إعادة النظر فيما تقدم من اسباب ... : )

طب تعالوا بئا ناخد بعض الأسئلة اللى جت فى التقييم و نناقشها بجد ..

أولا : بالنسبة لموضوع السعادة دا

قال إيه 94 % كانوا سعداء و 10% منهم كانوا سعداء للغاية ..

طيب أولا هنقول إن لما الباحثين سألو المبحوثين (الناس يعنى) فالناس بطبيعة قالت الحمد لله ، فهما بذكاء المصريين المعهود حطوها فى خانة نعم ..

إنما المشكلة فى ال10% اللى سعداء بشدة .. ماهما اكيد بقية الناس ماقالوش الحمد لله ، و دول قالو الحمممممممممممممممممد للللللللللللللللللللللله ..عشان كدا حطوها فى خانة السعادة و بشدة ، أكيد كان فى كلمة حشروها جنب الحمد لله أو استغنوا عن الحمد لله بيها ..

طب على اساس ايه مثلا ..والله أنا مش بنفى سعادتهم ، ربنا يبسطهم أكتر و اكتر ، بس مقياس السعادة عندهم ايه يعنى ؟؟

ماهو عشان نفهم ..و بعدين يا بخت من كان سعيد و أسعد الناس معاه ، و هنيالك يا فاعل الخير و الثواب ...ههههههههههه

بالنسبة ليا .. كشخص ، لو كانوا سألونى أنتى سعيدة .. فالحقيقة كنت هأحتار ..

مش لشئ أو خوف منهم .. لا ، لكن هل اللى جوايا فعلا سعادة ، و لا هيا محاولة تأقلم مع الواقع فخلاص بأحاول ابص للنص المليان .. و باقول أحاول ..يعنى لسه بأدور ..آه عشان ماحدش ييجى يقولى طب هاتيلنا حبة و خدى اللى انتى عاوزاه

لما ألاقيه مش هأبخل عليكو ..بس لسه بأدور والله ... : )

يمكن اللى جوايا رضا ، مش رضا بالوضع الحالى ، لكن رضا عن حالى أنا ، عشان أعرف أعيش ، لكن دا ماينفيش إنى برسم لبكرة شكل تانى خالص ، و باحاول اغير فى اللى بأقدر عليه ...

يا ترى انتوا بئا رأيكو ايه ؟؟

طب نيجى لنقطة تانية ..نقطة فعلا أكدت لى إننا بنفكر بمشاعرنا لأقصى حد

هى نقطة هل أنت مستعد للدفاع عن وطنك فى حالة هجوم عدو ؟؟

80% قالو مستعدين ، 20% هما اللى مش مستعدين ..

النتيجة دى بالذات أنا متأكدة إنها صح ... لكن للأسف لو جينا نشوفها واقعيا هنلاقيها كلام

صحيح لو أى حد فى العالم سألك مستعد تتدافع عن بلدك .. طبعا هترد بالصوت الحيانى : أيوااااااااااااااااااااا

يمكن مش متأكدة لو قامت حرب فعلا ال 80% دول هيروحوا ولا لا

لكن اللى متأكدة منه اللى هيروحو بجد هيروحو حمية لا أكثر و لا اقل ، يعنى ماعندهمش خبرة باساليب القتال <<يمكن أكبر معركة قام بيها فى حياته خناقة مع جاره على فلوس استلفها منه ، و لا يمكن عشان بص على البنت اللى عاوز يخطبها كدا يعنى ..

انما لا عمره جرب يشيل سلاح << يمكن آخره كان بيشيل مطوة قرن غزال أو صواريخ رمضان .. و لا عمره تكتك لمعركة حربية << غير إزاى يوقع البنت اللى بيحبها ، أو يعمل مقلب فى واحد صاحبه ..

طب سيبكوا انتوا من دا كله ... ماجربش يشوف ناس متقتله ادامه و لا متقطعه و كل حته منها فى ناحية ..

علميا إن الدم لما بتشمه لأول مرة ..ممكن يتسبب لك فى إغماء << يا حلاوة يا جدعان تخيلوا مثلا صاروخ وقع على كتيبة ،الكتيبة نصها يموت و النص التانى يغمى عليه ... آدى الفرسان و لا بلاش

فى حين اللى قالو مش مستعدين بردوا ماقدرش اقول عليهم عقلانيين .. مش بعيد يكونوا من كتر ماهما شايفين فى البلد فمش فارق معاهم ، يعنى العدو هيعمل فيهم أكتر من الحكومة ؟؟

فى حين بلد زى اليابان برغم ماهو معروف عن وطنيتهم الشديدة ف75% منهم قالوا غير مستعدين ،

دول لأنهم ناس بيفكروا بعقلانية .. فعلا ، مش مستعدين ، لا أتدربوا كويس ،و دخلوا معركة قبل كدا

و بردوا ما ينفيش ان ممكن بعضهم غير مستعد لأنه شايف حياته فى المادة بس ...

عن نفسى كنت هأقول غير مستعدة ....

انتو بئا ايه رأيكو ؟؟؟

لسه فيه نقط تانية .. بس كفاية عليكو الجرعة دى

و بالشفا إن شاء الله .... المرة الجاية نكمل

خالص تحياتى