محاولة لـ " تعديل المفاهيم "... ؟؟

كيفكم يا شوباب؟؟؟ أخباراتكم؟؟

يارب تكونوا جميعا بخير و صحة و سعادة ..

طبعا كان مفروض انى أكمل معاكوا قصة العلم ، لكن بصراحة بئالى فترة حاسة بحالة من الـ .... no reaction

ماليش نفس لأى حاجة خالص .. و طبعا بمناسبة انى تميت ال6 شهور من أسبوع – فى التكليف يعنى – فبئيت حاسة بحالة من الروتينية غير طبيعى ، رغم ان الواحد والله مش بيلحق يستريح دقيقة على بعضها .. و لا مرة شربت النسكافيه أو الشاى سخن والله .. حاجة صعبة

لكن المشكلة الاكبر هى فى العهدة ، بئيت باعمل جرد شبه يومى ، عشان مفيش حاجة تزيد ، او تنقص .. أحسن بركات المركز دا والله مش عارفة أقول عليها ايه !!! .. و طبعا حاطة ايدى على قلبى لاحسن امبول يطلع زيادة أو نقص .. بجد مفيش حاجة بتعصبنى و تجننى و تنططنى غير انى الاقى امبول او فيال زايد او ناقص ، ماهو يا إما نسيت اصرف حاجة ، يا إما صرفتها مرتين!!

و اللى بيجننى اكتر .. ان زميلى اللى معايا فى العهدة اول ما أقوله ان كذا زايد مثلا .. يبتسم ابتسامة عريضة و يقولى : بييييييييس ، و انتى زعلانة ليه؟؟ ... بأجد ببئا هأنفجر فى وشه ، بييييس؟؟ بيييس مين بس يا بيييييس !! معنى كدا ان فى حالة مش أخدت جرعتها مظبوط ، او انها تشتريه من برا ... أو يمكن عندهم زيادات فأعطوهم منها .. و أنا الزيادات بتعفرتنى أكتر من النقص ..

وهو يقعد يقولى طب بس اهدى ، لو طلبوا فيال زيادة من الصنف دا نبئا نطلعه لهم ... يا سلااااااااااااااام !!! عشان يقولوا مدكنين بئا ، اى حاجة يطلبوها ، بس كدا!! اتفضلوا ....

ياااااااااارب .. الصبر من عندك ياااااااااارب

بجد دى أكتر حاجة بتضايقنى و انا لما اتعصب ضغطى بيوطى و الدنيا بتلف وبأفضل طول اليوم فاقدة الطاقة ..

و طبعا امبارح كان الخميس قلت أخش نت بئا بئالى قرون مادخلتش ، و لا شفت الناس ... أووووووووم ايه؟؟

اووووم ضياء – بيوتفل مايند- بكل سلامة نية يطمن عليا و عاملة ايه فى الشغل ؟؟ و طبعا كان جزاؤه انى صبيت عليه هذا الشلال الهادر السابق الذكر ..

فالراجل كتر خيره حاول انه يساعدنى باى حاجة لله .. و حسنة قليلة تمنع بلاوى كتيرة ...و هنيالك يا فاعل الخير و الثواب :) ...

بصراحة فكرته حلوة ، و قلت أقولهالكم انتوا كمان يمكن تستفادوا منها ..

ضياء اقترح عليا حاجة اسمها : تعديل المفاهيم ...

لالالا ... ركزوا معايا كدا ، و بلاش ها؟؟ ها؟؟؟ ... كل حاجة هنقولها :)

الفكرة باختصار زى ما قالهالى : إنى اجمع كل حاجة بتعصبنى ، خصوصا العصبية المؤثرة على الصحة – مخدرات دى و لا ايه؟؟هههههههه- و اكتبهم فى ورقة او ارتبهم فى دماغى حسب أهمية الحاجات دى ، و أبدأ بأقلها تفاهة ، وماسيبش نفسى حتى لو أنا مقتنعة ان الشئ دا مش صح ، أو انه فعلا يضايق إلا و أنا مبتسمة 6*9 – يعنى ايه 6*9 ... ماعلينا – و اعتبره نوع من البلاء اللى ممكن اتحكم فى رد فعلى ناحيته ...

لالالا ، احنا قلنا ايه؟؟؟ ركزوا يا جماعة ، والله كلام واعر جوى جوى ...

و افكر فى المشكلة دى بهدوء ، يمكن الاقى الحل فى : رد دبلوماسى ، او حل محدش فكر فيه قبل كدا ، المهم إنى أفكر و انا هادية مش متعصبة ، و لا ان دى كارثة أو مصيبة و ياللهول .. و كدا يعنى

و احاول دايما اوجد مبررات لكل شئ ، يعنى مثلا ان فلان الغلطان دا مبرره النظام اللى اتربى عليه ، او ضغوط اسرية او ضغوط فى العمل ، و هكذا ... و يكون رد فعلى النفسى – من جوه مش من بره- فى قمة الهدوء و رحابة الصدر << ابتسامة 6*9 ... :)

و بصراحة انا قعدت افكر فى الكلام دا كتير و احاول اطبقه ، و مش عارفة حقيقى التفكير دا نعمة و لا نقمة؟؟!!..

أصلى متعودة أخرج من الشغل ..خلااااااص يتقفل على مشاكل الشغل بالضبة و المفتاح و انساها خاااالص ، و مش باتكلم فيها ، لكن لما قعدت افكر ، لقيت حاجات كتيييييييير مستخبية جوايا ، كنت باتجاهلها ، و طلعت فعلا شايلة جوايا كتير !!!.. ايه داداداداداداااااااااااااااااا... لالالا، أنا مش متعودة على كدا ، يا خراشى يا ولاد !!! دا طلع فى حاجات كانت مرمية فى طى النسيان و لما قعدت افكر افتكرتها ..

بس التفكير نعمة لو فعلا اواجهه بئا كل الحاجات دى ، و افكر فيها بشكل ايجابى ، و يكون نقمة لو قعدت افكر بشكل سلبى و اشيل من كل واحد عمل معايا موقف وحش ... مش كدا و لا ايه؟؟؟

على العموم انا هاحاول اكتب كل حاجة مضيقانى فعلا ، لأنى حسيت لما بدأت أفكر فعلا فى كل حاجة بتضايقنى و عاوزة أشوف لها حل ، لقيتنى نفسيا أحسن ، و جوايا رغبة فعلا ان الحاجات دى ماعدتش تضايقنى ...

شكرا ليك جدا يا ضياء ، و تفضل على طول بيوتفل مايند :)

********************

على جنب بئا :

بخصوص الحرب الدائرة على النقاب و لجان الامتحانات و دخول الكليات و كدا.. و طبعا المحكمة حكمت ببطلان قرار رؤساء الجامعات بعدم دخول الطالبات المنتقبات للجان الامتحانات بالنقاب ..

فامبارح و انا فى الشغل ، فى دكتور فى كلية هندسة بييجى ياخد جرعة ليه عندنا فى المركز – ربنا يعافى مرضى المسليمن جميعا يارب – و طبعا فى كل مرة بيسألنى عن الجرعة بتاعته ولو لها جرعة تحضيرية .. ولو فى عرض معين حس بيه ، و مش عارف ممكن يكون من ايه ؟؟ << دا لأنى أنا اللى باصرف له الجرعة بتاعته .. و ربنا يستر

المهم ، لما جه امبارح و قبل ما يسأل كالعادة لقيته بيقولى : مبروك الحكم .. قلت له : الله يبارك فيك يا دكتور ..

قاللى : والله أنا فرحان بالحكم دا ، يعنى أنا مش عارف ايه اللى تاعبهم فى ان واحدة تلبس نقاب ، ماللى لابسة .... و للا .... ( الرقابة قصت الكلمتين دول :) ) محدش بيكلمها نص كلمة ، و لا بيقولها انتى خدشتى الحياء العام ، ماللى عاوزة تلبس ما تلبس .. شئ غريب جدا ..

بس دا على فكرة مش حكم نهائى ، دا حكم مبدئى ، لسه فى حاجة اسمها المفوضين ... تعرفى يعنى ايه؟؟

مممممممم ... لا ، يعنى ايه ؟؟

قعد يفهمنى بئا ، المفوضين دى لجنة من ثلاث أشخاص ، لما القاضى يحكم بحكم هما يجيبوا الحكم دا و يطابقوه بالشريعة و يشوفوا الحكم دا فين من الشريعة و تقريبا القانون الوضعى و شوية حاجات كدا هو قالها ، بس مش فاكراها بالظبط ... ممكن حد من اخواننا المحاميين يشرحهالنا .. لكن اللى فهمته ان لسه فى جلسة تانية للحكم النهائى

بس ان شاء الله بردوا يكون الحكم النهائى مطابق للحكم الاولانى ، و قاللى : ياللا يمكن تقدمى دراسات بئا و لا حاجة ، فمايرفضوكيش

قلت له : يمكن!!.. لالالاااا ، ماخلاص يا دكتور قدمت و اتقبلت من زماااااااان

قاللى باستغراب شديد : و قبلوكى بالنقاب!!!

والله فعلا الحمد لله ، كل يوم و التانى الواحد بيشوف قدرة ربنا ، و فعلا يمكرون و يمكر الله و الله خير الماكرين ، و فعلا لو ربنا مقدر شئ ، محدش بيقف فى طريقه ...

...........................

يمكن الكلام فى البوست دا مش مترتب اوى ، و كمان دماغى بردوا مش متظبطة اوى ، و مصدعة و شكلى داخلة عى دور برد جامد ...ربنا يستر

بس احتمال احتمااااااااااااااال ... أروح لقاء المدونين اللى فى القاهرة يوم 29 ان شاء الله ، فعاوزة اعرف اللى رايحين من المنصورة نظامهم ايه ، و هيعملوا ايه ... عشان ان كان كدا ، نروح كلنا مع بعض .... ماشى؟؟

اللى رايح يقوللى بئا

رمضان جـــــــــه ... و أنا كمــــــــان

كيفكم يا شباب؟؟؟ كل سنة و انتم طيبين و رمضان كريم على الجميع يارب ... و أسأل الله أن نكون جميعا من المقبولين فيه ... اللهم آمين

المهم ... بجد بجد وحشتونى جداااااااااا ، و أحب أبشركم إنى الحمد لله الحمد لله الحمد لله ... لالالالا ، لسه ماصلحتش الجهاز ، ماتفهمونيش صح ... ههههههههه

لا بجد الحمد لله من يومين جت الشاشة ، و خلاص الحمد لله نزلت الويندز رغم ان فى شوية مشاكل و الصوت مش راضى يشتغل مش عارفة ليه ؟؟!!... بس قلت بردوا لازم أدخل بئا و أهنيكم كلكم بحلول الشهر العظيم ، و ... ماقولتوليش صحيح إيه رأيكم فى النيو لوك؟؟؟ الحياة مع دخلة رمضان بئا لونها بمبى اهى ، بس عشان الدنيا حر قررنا التنازل عن بئيت مقاطع الاغنية : )

هو صحيح أنا لسه مجددة الدهانات و العفش من مدة صغيرة ، بس لأن التغيير كان غير واضح ، قلت لازمن و لابدن إنه يوضح كمان رمضان مش اى حاجة يعنى ، و بعديه العيد .. و مش ناقصة وجع دماغ تانى فى الترتيب و الترويق ، هى مرة واحدة و أخلص ... ماعدنيش وقت صراحة << ناس مهمة ... ; )

بجد وحشتونى جدا و كنت حاسة كدا لما الشاشة جت الحمد لله و دخلت نت احساس اللى كان غايب عن اهله و رجع ، اه والله العظيم .. ياااااااااارب مش نتفرق ابدا ، و تكون معرفة خالصة لله .

و قلت بئا ألكلك معاكوا حبة قبل دخول رمضان يعنى انتوا عارفين الواحد مش ناقص ذنوب فى رمضان ... : ) ،رأى شخص ما كان بيقول : أنا قلت اسرقه قبل رمضان ، اصل السرقة فى رمضان حرام << قال يعنى فى غيره حلال .... ماعلينا .

أحكيلكم بئا ايه و لا ايه .... أصل الاسبوعين اللى فاتوا دول كانوا حكااااااية ، بجد ...

صحيح الأول ، بالنسبة للبوست قبل اللى فات ، أستاذى العزيز / قيس بن الملوح قاللى انهم بيقولوا ان الاحتفال بالنصف من شعبان بدعة .. رغم انى مش عارفة هما انهى فيهم بالظبط بس هو اه .. الاحتفال بالنصف من الشعبان لانه النصف من شعبان بدعة .. لم يرد ان رسول الله و لا احد من التابعين احتفل بها ، و سأل أخى الفاضل / فارس عن ان كان فى حديث بالتواتر فى صيام ليلة النصف من شعبان و الحقيقى ان ما بلغنى فى فضل هذه الليلة أنها ليلة ترفع فيها اعمال السنة الى الله ، فمن كانت خاتمة سنته حسنة و بدايتها حسنة غفر الله له ما بينهما ، و أنا لما قلت نصوم اليوم أو نصلى ركعتين أو نقرأ شئ من القرآن ، فماكنش قصدى أبدا اننا نعمل كدا لانها ليلة النصف من شعبان ، لكن قلت لأنها ليلة ترفع فيها الاعمال ، فأكيد نحب ان ساعة مانيجى نقدم تقرير لرئيسنا فى الشغل مثلا انه يشوفنا بنشتغل و التقرير اول صفحات فيه جد و اجتهاد يقلب الصفحات يوصل للاخر يلاقى جد و اجتهاد ..فيتبسط منك ،

و لله المثل الاعلى ، رغم انه لا تأخذه سنة و لا نوم ، و رغم ذلك لما يشوفك على طاعة يفرح بيك و يغفر لك ما كان منك ... ربنا يغفر لنا جميعا و يعفو عنا يااااااااارب

و كمان كان رسول الله صلى الله عليه و سلم عندما يُسأل عن صيام الاثنين و الخميس يقول هى ايام ترفع فيها الاعمال فأحب أن يرفع عملى و أنا صائم .. فلهذا يحبب صيام هذه اللية و خاصة أنها ترفع فيها أعمال سنة كاملة ..

أتمنى تكون وجهة نظرى وضحت ليكم !!!

مممممممممممممم .. ياللا نبتدى رغى بئا؟؟ نرغى ؟؟

طب نبتدى من الاول و نقول بسم الله الرحمن الرحيم .. << هى القعدة لسه هتطول؟؟؟

لالالالا ، أنا مش عاوزة زهق من أولها ، اللى نفسه فى كيس لب ، كيس سودانى ، مكسرات .. عصاير ، تقعد كدا و تستربع مش عاوزين تكتيفه ، اه عشان تسمعوا من الاول للآخر ... استعنا عـ الشقى بالله ..

الاول الاسبوع اللى فات دا كان صعب عليا بجد ، لأن زى ما قلت لكم قبل كدا ان الصيدلية مش فيها غير اتنين صيادلة بس و ماسكين التلت فروع بتاعتها فطبعا ضغط جامد عليهم و ماصدقوا صيادلة جداد يروحوا علشان يستريحوا شوية ، و الاتنين دول اصلا من الدفعة اللى قبلنا على طول فدا شئ كويس جدا لأننا مش حاسين بفرق خالص مابينا ..

المهم ان مافيش اسبوع من الاستلام لقيت واحدة فيهم بتقولى ايه ، طبعا أنا بئالى سنة ماشفتش اجازات ، و الحمد لله انكوا جيتوا ، هآخد بئا أسبوع اجازة و انتى تشيلى مكانى لحد ما أرجع ... أنا واثقة فيكى ، و مطمنة والله و انتى قدها و قدود و قعدت تنفخ فيا لحد ما الفاس وقعت فى الراس و مضيت القائم باعمالها لحد ما ترجع .. و عينكم ماتشوف الا النور ، قضيت اسبوع ما يعلم بيه إلا ربنا ...

بجد تعبت جدا ، و مش حكاية المسئولية اللى كانت تعبانى اد احساسى انها حاجة واحدة تانية و هى أمانة فى رقبتى ، المهم .. طبعا كنت اقعد افقط التذاكر << ايوا هى اسمها تفقيط .. و اقوم اصرفها ،و اراجع الدفاتر و المنصرف اليومى و التسجيل فى الشهرى و افلام ..ماكنتش باحس فعلا الا و احنا مروحين

بس أكتر الايام فعلا اللى بتكون زحمة هو يوم الاربع ، دا مش بنعرف نبص حوالينا اصلا ، فعلا اليوم دا كان نااااااااار ، أنا ماحستش أصلا إلا و أنا بأقول للممرضة انزلى بعد نص ساعة أكون صرفت بأبص فى الساعة لقيتها 3:30 ...ياربىىىىىىىىىى ، نص ساعة مين ؟؟؟.... خليكى واقفة و دخلت أصرف كنت يادوب لسه مخلصة العيادة و بادئة فى القسم الداخلى ، طبعا كان لسه قدامى و لا ييجى 50 تذكرة ، و إذ فجأتن لقيت الصيدلية كلها داخلة تصرف معايا .. اه و ربنا << ماهما عاوزين يروحوا بردوا مش هيقعدوا يستنوا حضرتى .. : )

و دى تراجع و دى تصرف و انا اصرف و لو فى تفقيط يتفقط ، و كانت هيييييييييييييصة ، و الدكاترة يا ولاد ، و دى غلط الدكتور يصلحها و يمضى جنبها ، و دى اعمليها لاغى و امضى جنبها ، و ها .. قولى اللى موجود فى التذكرة و انا أجيبهولك عقبال ما تفقطى .. ههههههههههه بجد كان يوم عصييييييييب ، بس افتكره و اضضضضضضضحك ،

طبعا انا فضلت بأعيط لحد يوم السبت ، لأن طبعا حصلت فيه لخبطة جامدة و تذاكر اتصرفت مرتين و حاجات ماتصرفتش و عملت جرد يوم الخميس و لقيت الدنيا باظت رغم انى كنت جرداها الاربع الصبح قبل اللخبطة دى كانت الدنيا تمام ، فطيعا قضيت الخميس و الجمعة نفسيتى سيئة جدا و ماليش نفس أكلم حد ، و كوابيس بئا مش عاوزة أقولكم ، و قررت انى خلاص مش هاقدر اعمل حاجة الا لما صاحبة الحاجة تيجى و تشوف هنعمل ايه ...

بس الحمد لله ليلة السبت بئا حلمت ان التذاكر المصروفة مرتين رجعت و اننا ظبطنا الحاجة و كله بئا تمام ، و فعلا الحمد لله يوم السبت رجعنا الحاجات الزيادة و الدنيا اتظبطت و بئت تمام و تنفست الصعداء ... أخيييييييييييييييرا أخليت ذمتى هههههههههه .. بس كان أسبوع ، أحلف بيه والله

المهم بئا كمان انى رحت اتفسحت قضيت نهار فى دمياط و الليل على البحر فى بورسعيد ..بجد كان يوم راااااااائع ماعكروش غير احساسى بالذنب .. و طبعا رجعت أخدت دور برد أروع ، لسه يادوب النهاردة بادئة أفوق منه ... خير الحمد لله ..

ايييييييييييييه ... لكيت كتير أنا عارفة ، بس عاوزة أرغى معاكوا ، عندكوا مانع ؟؟

انتوا مابترضوش ليه؟؟؟ ها؟؟؟ ... يا جماعة؟؟؟ يا شباب؟؟؟ يا قوم؟؟؟

ماعلينا ... هأكمل رغى بردوا ، عاوزة أقولكم كمان انى الحمد لله والله رغم كدا باحب المكان و الناس اللى فيه ، رغم ان كل مكان فيه الحلو و الوحش ، بس الحمد لله حاسة إنى مستريحة ، خاصة المديرة بتاعتنا ، بجد مديرة رااائعة و أنا بحمد ربنا الحمد لله ان ليا مديرة زيها ... انسانة بجد ، و بتراعى كل واحد ، و مش بتحب ترسم نفسها ، بالعكس عادى يعنى تحس انها اختك الكبيرة ، و تنصحنا و تدينا من خبراتها و مش بتمنع عننا حاجة ، طبعا كل فترة تطمن علينا احنا الجداد و تحاول انها تحمسنا و تعينا على صعوبة الشغل لأنها عارفة اد ايه هو صعب ، بس الحمد لله لما بتكون مع ناس مستريح لها و حاببها دا بيهون عليك كتير ، و قعدت معانا فى يوم و قعدت تنصحنا و تنبهنا و أنا بصراحة من كلامها كنت هأعيط بس الحمد لله مسكت نفسى ، كنت هأتفضح قدام زمايلى ... ماعلينا ، هأحاول أقولكم شوية من الكلام اللى قالتهولنا -على وجه التقريب- :" طبعا أنا عارفة ان الشغل كله ورق و دفاتر و انكم ماخدتوش كدا فى الكلية ، بس بئا مانكابرش و نقول أصلنا ماخدناش دا فى الكلية ، انت مش بتتعلم فى الكلية عشان تقول اخدت و ماخدتش ،لا أنت بتتعلم عشان لما تتخرج و تمسك شغل زى دا تكون اد المسئولية ، و بعدين كلنا بنتعلم من بعضنا ، و اللى ميعرفش يسأل مش عيب ، أنا اهو لما حد يسألنى سؤال أحب الاول أسأل حد يأكد لى المعلومة أو لو مش عارفاها يعرفهانى ، و عادى مش عيب ، لا الولد يقول لا ماتعلمش من بنت ، و لا بنت تقول لا ماتعلمش من ولد ، كلنا بنتعلم من بعض و مفيش حد كامل ، و بالنسبة للتعامل مع المرضى أوعوا أوعوا أوعوا اسمع ان صيدلى زعق مع مريض و لا مريض اشتكى منه ، اوعوا يا ولاد .. دى ناس تعبانة ، عارفين يعنى ايه تعبانين ؟؟ دا الواحد لما بياخد دور برد بيبئا مش طايق اللى قدامه و اوعوا محدش يكلمنى أنا تعبان ، و يا ماما هاتيلى و يا ماما سويلى ، و انت نايم فى السرير ملك .. دى ناس يعنى عافانا الله ربنا ابتلاها بمرض مجرد اسمه بنخاف منه ، فيعنى الناس دى بتكون مش متحملة و بتكون جاية أصلا هى عاوزة تتشاكل ، مش نقمة عليك كشخص لكن من اللى بيها ، و كمان الدكتور يزعقله و يتحكم فيه و الممرضة تشخط فيه ، فيعنى مانكونش احنا و الزمن عليه ... أعوذ بالله هو مش الزمن ، يعنى هو امتحان ، بس يعنى مانزودتش الامتحان عليه ... هو عاوز حد يطبطب عليه و معلش يا حاج ، و ان شاء الله ربنا يخفف عنك ، و ان شاء الله ربنا هيكرمك ، انت مهمتك انسانية اكثر منها طبية ... و بالنسبة للممرضات أوعى اسمع ان حد شد مع الممرضات ، حتى و ان هما بدؤوا او قالوا كلام مايصحش ، تقولولهم لو سمحت كفاية كدا ، و دا مش مكان يتقال فيه الالفاظ دى و تنهوا الموضوع ، مش بئا انتى مش عارفة انتى بتكلمى مين ، و أنا دكتورة ماتكلمنيش بالطريقة دى ...لالالالا ، احنا ناس محترمين بتعامل باحترام "

و نكتفى بهذا القدر من المحاضرة و نتوقف مع فاصل اعلانى قصير و نعود لمواصلة الحوار ، قصدىىىىىىىىىىى الرغى ... : )

طبعا انا قلت كفاية عليكوا كدا عشان مانعيطش مع بعض ، يعنى كفاية الدنيا حر و الواحد مش مستحمل ...

فى حاجة تانية أحب أرغى فيها؟؟؟؟ امممممم ..... امممممممممم

مش عارف ... طب نخليها لمرة تانية بئا ، كفاية عليكوا كدا ، قوموا ناموا بئا تصبحوا على خير : )

دمتم جميعا فى رعاية الله ، و كل سنة و انتوا طيبين مرة تانية ، أروح أسلم عليكوا فى مدوناتكم بئا

سلااااااااااااااااامٍ

OCMU

السلام عليكم و رحمة الله و بركاته

ازيكوا ازيكوا ... وحشتونى كلكوا : )

بجد بجد بجد مفتقداكوا جدا جدا جدااااااااااا

محدش عنده كمبيوتر زيادة ؟؟؟ ... عاااااااااااااااا

بجد حاسة إنى فجأة بئيت فى كوكب تانى ... كوكب غريب ، مش هو اللى أنا متعودة عليه ...

المهم ... عاوزة أقولكم إنى الحمد لله ... الحمد لله ... الحمد لله استلمت التكليف ... هييييييييييييييييييه

لكنى اخليت طرففففففففففف ... نياهاهاهاهاهاها

بس بردوا استلمت انتدابى فى مركز الاورام ... كيك كيك كييييييييييييييييييك

ايوا ايوا ... اللى هو اختصاره اللى أنا حطاه فى العنوان دا

Oncology Center- Mansoura University

مركز الاورام - جامعة المنصورة

خلونى الاول أحكيلكم عن الوحدة اللى أنا استلمت فيها

و طبعا مش هأحكى عن اللف اللى لفيته عشان أخلص الورق ، عشان أنا من النوع اللى لما بأتخنق بجد مابعرفش أحكى

المهم .. بعد طول معاناة استلمت فى وحدة اسمها شرنقاش ..و محدش يقولى يعنى ايه عشان معرفش .. وهى كمان بلد باباتى العزيز .. دا غير كدا كمان الوحدة بجد جميلة اوى اوى اوى .. و الناس هناك شالونى على كفوف الراحة صراحة و نفسهم يخدمونى باى شئ .. و مديرة الوحدة يوم ماكنت ماشية – اه اصلى ماقلتلكوش انى استلمت هناك اسبوع، بس طلعت عينى والله عشان اجراءات الاستلام و اخلاء الطرف و حاجات كدا- المهم .. قالت لى لو حد فيهم بس كلمك كلمة واحدة تلغى انتدابك على طول و ترجعى .. احنا هنا نتمنى نخدمك باى حاجة و جرتلى العيلة كلها .. نفر نفر .. اسلم عليهم هههههههه –كووسة-

اه ..مقلتش ليكم كمان ان الوحدة دى واخدة الوحدة النموذجية و علامة الجودة .. و بجد المكان هناك اسرنى جدا لدرجة انى استلفت موبايل مخصوص عشان اصور لكم المكان هناك .. شوفوا شوفوا استلمت فين ...: )

دا المنظر من قدام الوحدة

و دا المنظر من جواها

و دى الواجهة بتاعتها

معلش التصوير وحش شوية بس استحملوا

و هذا عن اليمين

و هذا عن الشمال

و دا المنظر من فوق السطح - خلف الوحدة

و دى من الجنب

أما دى بئا فغرف الوحدة

و فى زيها على الجنب التانى

و دى بئا الاستراحة

سيبكوا من الكرسى المكسور دا ، أنا رحت تانى يوم ملقتوش : )

أما دا بئا فالمنظر من قدام باب الصيدلية

و دا من قدام الشباك

اللى يغيظ بئا إن كل حاجة مكتوب عليها USAID من الشعب الامريكى

و حيطة كاملة عليها بوستر عريض كدا ... يعنى شحاته علنى

حتى ياربى الموازين و دى لقطة استفزتنى جدا لميزان

ركزوا كدا فوق الكلمة ...شايفين مكتوب ايه؟؟

مكتوب MADE IN CHINA

طبعا ... لا تعليق D :

بس بجد ماكنتش متخيلة المكان حلو اوى كدا... دا كنت رايحة متعكننة والله ...بس لما رحت هناك فرحت اوىىىىى ...

طبعا بعد ماشفتم المكان و جماله ... كان نفسى أصور لكم بئا المكان اللى استلمت فيه فى الاورام لكن طبعا ماينفعش ... ليه؟؟؟

عشان ... انت مراقب بالرادار .. قصدىىىىىىىى انت مراقب بالكاميرات .. اه والله ، كل مكان كاميرا مراقبة .. و طبعا الحضور و الانصراف بالبصمة و كل واحد له كود ..يعنى لا مفرررر .. و الحضور رسميا آخرك 8:30 و الانصراف 3:45 لكن طبعا اللى بيحصل غيركدا ...

لالالالالالاااااااااااااااااا ..مش زى كل الناس يا بابا .. احنا لازم التميز ، يعنى الحضور رسمى 8:30 انت على 8:15 تكون على مكتبك ، و الانصراف 3:45 مش قبل 4 نكون ماشيين نياهاهاهاهاها

مش باقولكم تميزززززززززززززز

بصوا دى صور من على النت

الواجهة الرئيسية

و المبنى من الجنب

هييييييييييييييييييييه ... اقولكم ايه و لا ايه؟؟ .. بس والله .. ما شاء الله ، الشغل مش بيهدى لحظة واحدة ، يعنى اليومين اللى قضيتهم هناك مش حسيت بالوقت خالص ..و الشغل الى الان لذيذ جدا و حلو ..و الحمد لله والله أنا كان نفسى ربنا يستخدمنى فى مكان فعلا محتاج ..مش اروح زيادة مليش اى لازمة ..و شغل سبهللة ... و الحمد لله ربنا وفقنى للشغل دا و أنا الحمد راضية عنه جدا رغم انه تعب مش راحة زى الوحدة مثلا ..

أنا فعلا اول ما روحت الوحدة دى بعد كمية المشورة و التعب اللى شفتهم ... جه فى بالى على طول حديث رسول الله صل الله عليه و سلم عن يوم القيامة انه يؤتى بأشقى أهل الارض وهو من أهل الجنة فيغمس غمسة فى الجنة فيقال له هل ذقت بؤسا قط – أو شقاء قط - ؟؟ فيقول لا والله يارب ... فعلا والله أنا أول لما قعدت اتمشى فى الوحدة و اتفرج على المناظر دى نسيت كللللللل التعب و بئيت فرحانة اوى

بعكس امبارح لما رحت استلمت فى المركز و شفت كمية الشغل و الالتزامات و الحدود المسموح بها حسيت انى مقيدة و اتضايقت شوية ..و بردوا سبحان الله جه فى بالى الجزء التانى من الحديث انه يؤتى بأنعم أهل الارض و هو من أهل النار فيغمس غمسة فى النار ثم يقال له هل ذقت نعيما قط؟؟ فيقول : لا والله يارب ... فعلا كل انسان فينا بيكون فى مشاكل و هموم و لحظة الفرح بينسى كل همومه ..و بيكون فى نعيم دائم و لحظة الحزن ما يفتكرش غير حزنه بس .. سبحانك يارب

بجد أنا حسيت انه اختبار من ربنا .. يعنى الوحدة دى كنت اروح براحتى 9:30 – 10 و اروح الاقيهم مضولى حضور و كل الناس بتعاملك بصراحة بعاطفة جميلة ، و كمان على 1 او قبلها اكون ماشية و هما يبئوا يمضولى انصراف وقت الانصراف ، و اخرج و اروح و آجى براحتى ، ولو عاوزة كمان مجيش وحد يمضيلى انصراف براحتى ، و الجو بجد جميل اوى اوى و الشغل هادى اوى و مفيش ضغط

دا غير طبعا انى باخد مرتبى و حوافزى و بدلاتى و حقى تالت و متلت ...

اروح لمكان الشغل مابيهداش لحظة و الحضور و الانصراف بالبصمة و الكل طبعا مظبط ساعاته على ساعة البصمة – على رأى ماما ... ادببببببببب - و الكاميرات فى كل مكان .. يعنى حتى ممنوع الكلام فى الموبايل ..تتكلم و انت قاعد على مكتبك اه و سريع سريع .. مش بئا ازيك يا توتو و وحشتينى يا فوفو و نفتح بالساعة ساعتين .. أصلا مفيش وقت .. اااااااااه بالحق ..نسيت أقولكم ان موبايلى حبيبى رجعلى بالسلامة و طبعا بردوا ظبطوا على ساعة البصمة : )

دا طبعا غيران مفيش غير المرتب بس اروح اخده من الوحدة اللى انا مكلفة عليها و مفيش حوافز و يادوب كام جنيه بدلات ..كيك كيك كيييييييك ..يعنى من الاخر نظام من وجهة نظر البعض كله مساوئ و عيوب و ناس كتير هتقولى الغى انتدابك و ارجعى الوحدة و اولهم طبعا كانت انتيمتى ..

بس لا ، أنا الحمد لله مبسوطة و يارب اقدر اوفى فى المكان اللى ربنا اختارنى ليه ... و كفاية بس بجد انك تحس بذاتك و انك بتقدم خدمة جميلة لناس فعلا فعلا محتاجين ...

عارفين ... بجد الناس بتوع السرطان دول اكتر ناس عاوزين تبرع – و بالمناسبة دى بردوا عاوزة أقولكم ان المركز فعلا محتاج تبرعات جامدة جدا عشان يكمل و ممكن تقرؤا المقال دا اللى اقدر اقولكم بكل ثقة ان الكلام دا حقيقى 100% بعد ما شفت دا بعينى – عارفين ان العلاج هناك الحقنة الواحدة من جرعات الكيماوى بتعدى الالف ..الف و متين و تلتمية .. عارفين فى علبة دوا اقراص ب 11 ألف جنيه و طبعا الدوا دا المريض اقل مافيها بيمشى عليها 3 سنين و العلبة الواحدة بتكفيه شهر واحد .. انتوا متخيلين .. بجد بجد مبالغ رهيييييييييبة ، و للأسف مفيش ميزانية كفاية ..و هأقولكم ايه و لا ايه .. بجد ربنا يشفى كل مريض ياااااااااااارب ..

طولت عليكوا معلش .. بس فى خبر تانى بردوا حلو عاوزة أقولكم عليه وهو انى الحمد لله الحمد لله الحمد لله قبلت ماجستير ميكروبيولوجى .. و هابتدى دراسة مع السنة الجديدة ان شاء الله .. دعواتكم بئا ربنا ييسر لى الامور ..

بجد أنا سعيدة جدا بكرم ربنا عليا ، و يارب يارب يقدرنى و اشكره على نعمه دى ..اللهم لك الحمد كما ينبغى لجلال وجهك و عظيم سلطانك ..

و كمان كان فى مفاجأة بصراحة لم أتوقعها ... وهو انى فى اجتماع المدونين – مدونى الدقهلية- اللى فات ، فوجئت إذ فجأتن فى التعارف بواحد بيقول : أحمد – محامى – الصحيفة الكاشفة ... طبعا انا مكنتش واخدة بالى ، هوب الصحيفة الكاشفة دى لفتت انتباهى ...

فبقوله نعم؟؟

بيقولى الصحيفة الكاشفة ...

طبعا انا لسه باستوعب هى دى الصحيفة الكاشفة اللى اعرفها و لا واحدة تانية ...

قام قالى : الصحيفة الكاشفة و استراحة الكاشفة و بيدون معايا عسقول ...

انا بئا فى عقل بالى –يبئا انت الباحث - ...

قام قال و أنا الباحث ...

يا سلام ؟؟؟؟ انت الباحث ؟؟؟ و أنا سوووول ...

سوووول؟؟؟ اهلا اهلا يا دكتورة ، تخيلوا يا جماعة دى اكتشافى ...

اه ، سبحان الله اكتشافك و أول مرة أشوفك ... ههههههههههههههه ، بس طبعا يا باحث لسه مدين ليا باجابة السؤال : كنت بتعمل ايه فى المنصورة؟؟؟

ايه تانى ؟؟ ايه تانى ؟؟ ايه تانى ؟؟؟

ياللا كفاية عليكوا كدا رغيت معاكوا كتير و زمانكم زهقتوا ... بس أنا قلت آخد حقى بئا : )

.....................................

طبعا طبعا طبعا .. شكرى العميق لاستاذى الغالى بيرم المصرى اللى لقيته باعت لى رسايل بيطمن عليا و بيهنينى ب23 يوليو وحلول شهر شعبان و بيسأل عليا و انى غايبة .. معلش والله يا أستاذى العزيز ، بس والله مش نسياكم .. و لا أقدر أغيب عنكم ، ربنا ييسر و أجيب كمبيوتر جديد بئا عشان القديم خلاص سلم نمره ..

و كمان بجد بأشكر كل حد سأل عليا أو ساب تعليق فى البوست اللى فات .. معلش والله مفيش وقت خالص و كمان حكاية أنى اروح سايبر دى او استغل حد من الاقارب و الجيران باحرج جدا جدا .. فادعولى بئا ربنا ييسر ، و هأحاول كل فترة و التانية أطمن عليكوا و اطمنكوا عليا ..

ياللا بئااااااااااااا ...زمانكوا بتقولوا قومى روحىىىىىىى ..

حاضر حاضر... بالحق يا عمو فشكول ..ليه زهقان و طهقان و متضايق؟؟؟

يابنتى ارحمينا بئا ..امشىىىىىىىى

حاضر حاضر ...ابئا قولى فى تعليق يا عمو فشكول ..ماشى؟؟

ماتزقوش كدا ...خلاص ماشية اهو ....يا ساتر

ياللا سلام ........ : )