نـحـن .. و القــدر

طبعا يا جماعة أنا كنت عاوزة أكمل السلسلة
بس قلت آخد فاصل اعلانى تانى

و البوست دا إهداء لكل شخص حزين
أوتعبان
أو شايف ان العيب بس على الحياة

...............................................

عندما تسير فى رسم القدر ..
لا تدرى ماذا هو فاعل بك ؟؟!!..

لكن...
لأنه يرضى غرورك .. و يساير هواك ..
فلا تقف لتتفكر ..

بل تسير معه .. باسط زراعيك على صفحاته ...
تحملك أمواجه ،
تترفق بك نسماته ،
فترتسم على شفتاك ابتسامة ...تتسع

ثم عندما تهب الريح ..
و يتقلب بك الموج ..
و تشتد بك العواصف ..

يقتطب جبينك ،
و يرتسم الفزع على ملامحك ،
ثم تأتى العاصفة الأخيرة ..
لتقول كلمة النهاية

فإذا بك حطام على أشلاء الحياة تتناثر ...
تبكى بقاياك ...
و تعيب القدر الذى فعل بك هذا ..
و لا تدرى أنك انت سلمت نفسك للقدر ..

فلم تتمهل ،
و لم تترفق ،
بل ظننت الموج دائم الهدوء ..
و النسيم صفته الرفق ..
و لم تدرى أنه دائما هناك ما يسمى بـ..
الهدوء الذى يسبق العاصفة

فانظر فى مدك و جزرك ..
و لا تركن إلى هواك ..
فالنهار حتما يصرعه الليل ..

إنه ليس القدر ،
بل نحن من نفعل هذا بأنفسنا ،
فلا تلومن القدر ..
و تحسس لمواضع قدمك ..

عندها حتما ستوقن أن..
الليل يغلبه النهار ..

صدمات !!! ... و تساؤلات ؟؟؟

فى الجامعة .. طبعا حياة تانية ، و مجتمع تانى ..

و بالتبعية كان بردوا مفهوم تانى للاسلام خالص ..

فترة الجامعة أنا باعتبرها فترتين

فترة صدمات و تساؤلات ..و بعد كدا فترة البحث و المعرفة ..

هأبتدى معاكوا فترة الصدمات و التساؤلات ، و اللى ابتدت تقريبا مع لبسى للنقاب ،

طبعا يوم مالبست النقاب كان يوم مميز جدا بحياتى لأنه كان فى رمضان و كمان ليلة القدر ..

فبصراحة عزيز عليا جدا ، وبأعتبره هدية من ربنا ليا .. ربنا يثبتنى عليه ياااارب

المهم بئا أنا كنت قلت لكم إنى كنت متصورة بمجرد لبسى ليه ، إنى هأتحول إنسانة تانية خالص ،

و أكون إنسانة مثالية ، بلا أخطاء بلا ذنوب ، بلا مناقشة فى أوامر الله ..

هو حلال حلال ، حرام حرام ، متع و هوى النفس دول سيذهبوا إلى غير رجعة .. حاجات كتير أوى ،

و كأن عدم لبسى ليه يعطينى رخصة للغلط ، إنما لما ألبسه خلاص هيحمينى من أى غلط ..

و هنا نقطة عاوزة أقولها بردوا إن للأسف الناس واخدة الفكرة دى عن الملتزمين ،

يعنى فى مرة شخص ملتحى كان بيحكى بيقول أنه لما أكرمه و ربى لحيته بئا زمايله فى الشغل يستفزوه أوى و يعملوا فيه حركات مش حلوة ، و لما يفيض بيه و يقول كلمة كدا و لا كدا ..

يقولك شوف.. آدى الملتزمين ،

اللـه .. طب مانتوا اللى استفزتوه ،

يقولك لا بردوا .. الملتزمين ما يطلعش منهم كدا ،

و كأن الملتزمين دول بئوا ملايكة بقدرة قادر ..

المهم بئا لما لبسته و ربنا ثبتنى عليه الحمد لله ..

آه ، أصل أى حد فينا ييجى يعمل أى خطوة تقربه من ربنا يلاقى شوشو قاعدله بين عيدان الدرة ..

عشان مش يرجعه خطوة ، لا دا يرجعه عشرة عشرين خطوة ..

المهم إنى لقيتنى لسه باعمل حاجات غلط ؟؟!! .. لسه فى معاصى و ذنوب فى حياتى ؟؟؟!!..

اللـه ،لالالا أكيد أنا وحشة ، و أصلا ماينفعنيش النقاب اللى أنا لبساه دا ..

أنا فعلا لو ملتزمة معملش غلط .. معصاش ربنا ..

لما آجى أعمل طاعة جديدة ألاقى لها ثقل على نفسى لسه ،و عاوزة مجاهدة ..

لالالا على فكرة أنا مش كويسة خالص ، لو كنت فعلا مخلصة مكنتش الاقى الطاعة تقيلة على نفسى كدا ..

لما ألاقى نفسى رايحة لأى متعة من متع الدنيا ..

الطاااااااااااااامة الكبرىىىىىىىى ..

لسه عاوزة حاجة من الدنيا ؟؟ لالالا .. ثكلتك أمك يا فتاة .. إيه اللى بتعمليه دا ؟؟ ..

لما حد يعمل فيا موقف مش ظريف ، أو يقول كلام مش ولابد ..

إيه دا؟؟ أنا لسه بيأثر فيا الكلام دا؟؟ يبئا أنا نفسى دونية،

و هأفضل على طول كدا إن شاء الله و لا ايه؟؟

و بجد كانت نفسيتى بتتعب جدا جدا يعنى ..

هو أنا ليه لسه كدا؟؟ وهو أنا لوحدى اللى كدا ،و لا كل اللى بيلتزموا زيي كدا؟؟ طب هى فترة و لا هاستمر كدا على طول ؟؟

و فى خضم هذه المعركة .. يشاء الله سبحانه و تعالى إنى أسمع لبعض الدعاة

اللى كانوا بيتكلموا إزاى نُحيى الدنيا بالدين ، و إن الدين و الدنيا مش حاجتين منفصلتين ، بل هما شئ واحد ..

و البعض الاخر بيتكلم فى جوهر الاسلام ، و يعنى ايه مسلم بجد .. مش مجرد الفروض و السنن و خلاص .. يعنى ايه الاسلام دين عالمى ، و كيف أن الاسلام تكلم فى الحياة الاجتماعية و الثقافية و العلمية و العملية و السياسية و الاقتصادية و .. و .. و .. كل كل مناحى الحياة ..

إنتوا عارفين اللى عمال ياخد بالبوكس فى وشه و لسه مش مستوعب إنه بيتضرب ؟؟!! ..و حتى مش لاقى وقت إنه يركز و لا يفوق بين بوكس و التانى ؟؟!! .. اهو أنا كنت حاسة كدا ..

كنت حاسة إن الجرعة أكبر من مقدرتى ، و كان كم التساؤلات جوايا بيكبر بطريقة رهيييييييييبة .. حاجة جوايا بتقولى فى حاجة غلط ، أكيد فى حاجة غلط ..

مش معقول دول كلامهم صح ،و اللى أنا سمعته قبل كدا غلط ..

طب اللى فات كان الصح ، و دول اللى غلط؟؟؟!! ..

لالالا الناس دى كلامها يتقبله عقل أى انسان سوى .. طب ليه محدش بيتكلم عن الاسلام من النواحى دى ؟؟..

ليه مابنسمعش عن عالمية الاسلام إلا الاسم بس ، فى حين الحيز اللى بيوصل لنا منه ضيق جدا؟؟ و حاسين انه غير متناسب اطلاقا مع متطلبات العصر؟؟

هو أكيد الاسلام فيه الشق التعبدى ، دا لازمن و لابدن ..

بس أكيد الامور التانية دى لازم يكون لها حيز من وقتنا .. مش معقول وقتنا كله صلاة و طاعات بس ؟؟

و هكذا ظلت التساؤلات تتوالى ..و غيرها و غيرها الكثير ..

بس نكمل بئا المرة الجاية عشان طولت عليكم : )

سلااااااااااااااام

.............................

بالحق ... لازم تروحوا عند سالى .. مدونة حاجات جوايا
عاملة حرب شاملة على شوشو ;)

الـوجـه الآخـر للـعـملـة + تحديييث

تحدييييث : أنا بأعتذر للكل عن تأخيرى فى زيارتكم و الرد على تعليقاتكم .. و طبعا الكل حاطط فى دماغه انى بالعب مع شذى بئا
عارفة أنا الحقد الدفين دا ..
لالالا اطمنوا أنا أخدت الدور منها ، و نايمة فى السرير من ساعتها
عاااااااااااااااااااااااا
ماشى .. ماشى .. ماعدتش هأقولكم على حاجة
هه .. بس
أما أروح أرد عليكم بئا

................................




أولا يا جماعة أحب أقولكم خبر جمييييييييل جدااااااااااا ..على الاقل بالنسبة لى .. :)
عاوزة أقولكم إن ..شذى جتتتتتتتتتتتتتتتتتتت ..هييييييييييييييييييييييه
و طبعا إذا حضرت شذى .. غابت سول عن المدونة و الدنيا كلها

فمعلش لو هأقصر معاكوا شوية سامحونى
طبعا لازم آخد حقى منها
بس بجد أدعولها جامد .. البنت ياعينى أخدت دور برد جامد و مولعة نار .. ربنا يتم شفاها على خير يارب



ثانيا بئا ..نكمل مع بعض مغامراتى الرائعة مع مفهومى للاسلام :)

طبعا كنت من أشد المعارضين للحجاب الشرعى ..

كنت رافضة تماما فكرة الخمار دى .. و لا متصورة أصلا انى ألبس جيبة ..

و بابا و ماما : يابنتى يهديكى .. يرضيكى ،

و أنا أبداااااا : ..هو أنا كدا وحشة ؟؟ مانا لبسى واسع و محتشم أهو .. لازم الجيبة يعنى ؟؟

يابنتى بس كدا ماينفعش ..المفروض بئا نلتزم ..

يعنى أنا كدا مش ملتزمة ؟؟

و هكذا نقاشات لا تنتهى ، و أنا أرفض لمجرد الرفض .

و فى يوم ، فاكراه كويس أوى .. كنت بأكوى الخمار و النقاب لماما عشان نازلين المسجد .. قوم اييييييييييه ؟؟

ضربت فى دماغى و هالبس الخمار-هو طبعا كله بفضل الله و توفيقه-

يابت اعقلى ..ايه اللى انتى هاتعمليه دا؟؟

لا هو كدا .. و قرار يعنى قرار ،و هانفذه اللحظة دى

<< تقريبا هما كانوا داعيين لى بقلب جامد فى ساعة إجابة : )

المهم رحت لماما قلت لها : عاوزة خمار من بتوعك لحد ماشترى واحد ..

طبعا ماما ماكنتش مصدقة ..بس فرحت اوى و قامت بسرعة تجيب لى واحد قبل ما أغير رأيى ،

و لبست جيبة .. اه والله تخيلوا ؟؟.. طبعا انجااااااااااااااز

المهم .. طبعا أنا نازلة بأتنطط على السلم عادى يعنى و فرحانة ..و نزلت اول دور و على اول سلمة من الدور التانى ...هوب ..

تاك .. تاك .. تاك .. طرااااااااااااااااااخ

و الدنيا بئت سوداااااااااااا .. و محستش بأى حااااااااجة .. شوية كدا حاولت أفتح ، طبعا مش شايفة حاجة .. أوبا ، فى ايه ؟؟..حبة كدا و الرؤية بدأت تتضح – طبعا انتوا عرفتوا ايه اللى حصل : ) – قعدت حبة كدا آخد نفسى ..

شفتى ، آدى آخرتها .. كان لازم يعنى تلبسى خمار و جيبة ؟؟ يابنتى انتى مالكيش فى الكلام دا ..

بصى .. انا أخدت قرار ، و مش راجعة فيه ،و اللى عاوزة تعمليه اعمليه ..-طبعا الثبات من عند ربنا ، فلله الحمد-

طيب ياختى لما نشوف ..

طبعا قررت إنى هأعاند نفسى و أنزل الدرس بردوا .. بس ايه نزلت واحدة واحدة ..

و طبعا تانى يوم .. بئا وشى ميكب ناتشورال ..هههههههههه

المهم بعد ما الحمد لله ربنا ثبتنى على الخمار .. بدأت نظرتى تتغير بالنسبة للدروس اللى كنت بأحضرها ، يعنى مابئتش اسمع بس ، لا .. اسمع و بأحاول أطبق ..

بس طبعا لأن الدروس بردوا ماكنتش الاسلام كله ،و إنما الاسلام المتقشف ، جانب الزهد ..

فكنت بأعمل حاجات أووفر شوية ..

مثلا : بصى يا ماما ،خلاص بئا هما جيبتين و بلوزتين و خمارين .. هأعمل إيه بكل دا ؟؟.. شيلى ..

إيه دا يا ماما؟؟ أنام على سرير !! .. حاشا و كلا و بئيت أنام على الأرض <<بس ساعات كنت بأنزل المرتبة على الارض لما أتعب :D

طبعا ماكنتش حياتى كدا على طول ..ساعات كنت باتمرد على نفسى ، و اطلع عليها اللى بتعمله فيا : )

و بردوا حكاية التساؤلات اللى كانت تيجى فى دماغى دى بئيت أقفل عليها خالص .. هو أنا اللى مش فاهمة ، لما أعرف اكتر أكيد كل حاجة هتوضح ..و بعدين هو ربنا قال كذا يبئا كذا .. مش عاوزين كلام كتير ..

كمان بئا بئيت بأشوف الاخوات اللى بيعطوا دروس دول أو الشيوخ ..كأنهم ملايكة الله فى أرضه ، و ماينفعش دول أصلا يغلطوا ..

و الدنيا وحشة و كلها معاصى ،و إن الواحد لازم يبعد عن كل الحاجات دى ،

و كنت طلبت من بابا كمان إنى ألبس النقاب ، بس هو رفض تماما .. لأن ساعتها كانوا بيرفضوا دخول البنات المدارس منتقبات ،و كمان كان عندنا مدرسات انتقبوا فبئوا يخلوهم من على بوابة المدرسة يكشفوا وشهم ..

و قعد يقولى: كدا انتى هتضرى نفسك و النقاب فضل مش فرض ، المهم .. وافقت على مضض إنى أءجل الموضوع شوية .

بس كان فى حاجات اووفر أوى صراحة بأشوفها من البنات اللى التزموا الفترة دى ، يعنى فى بنات فيهم فضلوا يغيبوا لحد ماتفصلوا عشان التعليم مالوش لازمة ،و ان البنت مكانها البيت ،و هتعمل ايه بالتعليم؟؟ و خلاص حياتهم بئت للعبادة و القرآن و الصلاة ..

الصراحة كنت بأرفض المبدأ دا خالص ، يعنى صح نفسى أتفرغ لعبادة ربنا و حفظ القرآن .. بس مش كدا ..

و ياه بئا على التصورات اللى كانت وقتها ، يعنى مثلا مدام واحدة التزمت يبئا خلاص اللى ترتبط بيه ماينفعش غير انه يكون شيخ و حافظ القرآن .. و لما يرزقهم بأولاد ، يبئا واحد فيهم القارئ الفلانى ،والتانى الشيخ الفلانى .. و .. و .. و .. لالالا ، كانت أفكار عظيمة جدا : )

و لا بئا كنت حاطة فى دماغى انى لما انتقب ايه ..خلاص بئا هأبئا الملاك اللى مش بيغلط و مثالى فى كل شئ ، و ابئا حد زى الصحابة كدا .. و شوية أفكار يعنى بجد .. ساااااااااااااااااااذجة جداااااااااا ..

بلاش ضحك ..ماشى ، شايفاكوا بتضحكوا اهو ..

لا بجد كنت عايشة مع نفسى خالص ، يمكن كمان لأن فترة ثانوى كنت مقفولة خالص وكان حيز التعامل و الخروج للحياة قليل ، فكان الواحد بيرسم تصوراته و يعيش معاها ..و فضلت كدا لحد ما جيت داخلة الكلية .. اللى كان فيها أكتر من مرحلة مروا عليا .. بس بجد أحلى أيام كانت أيام الجامعة ..

المرة الجاية نشوف بئا عملت ايه فى الجامعة ، او هى عملت ايه فيا !!!!..

و .. سلاااااااااااااااااااام

هكذا عرفت اسلامى ..

طبعا أنا بأعتذر لكم عن التأخير .. و بأشكر كل اللى سأل عليا

أنا الحمد لله بخير ، ربنا ما يحرمنى منكم يارب ..

ان شاء الله زى ما قلت لكم البوست اللى فات ، انى هأتكلم عن فهمى للاسلام

لكن ...

حقيقى احترت كتير .. ابدء بإيه ؟؟ و اتكلم عن ايه؟؟

لكن ..قررت مبئيا أتكلم عن المراحل اللى مريت بيها لحد ما وصلت لفهمى للاسلام دا ..

و طبعا كله بفضل الله و برحمته

هابتدى باولى فترات حياتى و اللى كان مفهومى فيها للاسلام لا يتجاوز مفهوم اى شخص من انه صلاة و صوم .. و لما أكبر يبئا زكاة و حج ان استطعت لذلك سبيلا ..

لكن يمكن بحكم التربية و الاتجاه الدينى فى العيلة .. كان الحس الدينى عالى شوية ، لكنه لم يرتقى إلى هدف فى حد ذاته .

لما دخلت الابتدائى كنت بأحفظ القرآن فى مسجد قريب مننا ، و فى مرة سمعت درس لاحدى الاخوات عجبنى أوى الكلام .. رجعت قلت لماما لازم تيجى معايا ، و من يومها بئيت أواظب على الدرس دا .. طبعا ماكنتش دروس منهجية ، يعنى ماشية بمنهج معين .. لا ، كان مجرد مثلا كتاب أو درس صوتى و الأخت تيجى تقول اللى قرأته أو سمعته ..

طبعا الكلام كان بيكون حلو أوى و بيأثر فى الواحد ، و أصلا أى حد فينا بفطرته بيكون عنده استعداد يسمع أى حاجة عن ربنا ، بس كان أغلبيته طبعا من نوع الزهد و التقشف ، و إزدراء الدنيا ، و عبادة ربنا بالطاعات بس ، سواء صلاة ، صوم ، تصدق .. أوعن أهوال يوم القيامة .. كدا

طبعا كنت بأحس إنى كرهت الدنيا ، و كرهت نفسى و إن ذنوب الدنيا كلها فوق راسى ، و مش طايقة أكلم حد ، و إنى انسانة وحشة جدا .. و إن ربنا مش بيحبنى .

يوم ... اتنين ، ارجع تانى للدنيا ،و حياتى ، و طبعا كل متع الدنيا ،و عادى ... يعنى هى كل الناس غلط؟؟.. يعنى معقول ربنا مش بيحب كل دول ؟؟..

طب يعنى أعيش حياتى بلبس واحد مايتغيرش ، و لا كل شوية لبس جديد؟؟

أنام على الارض ، و لا سرير جميل؟؟..

ماكلمش حد خالص ،و اكره كل الناس –ماكلهم بيعملوا غلط- و لا أحب الناس كلها و إن الله غفور رحيم؟؟

و طبعا حدث و لا حرج عن الاغانى و الافلام و الخروج ....

فطبعا الحياة حلوة و انا لسه صغيرة .. انا لسه صغــ احم احم ..

المهم إن الجو اللى حواليك بردوا كان بيساعدك – على الفسق و الفجور طبعا ;)

يعنى محدش يقولك كدا غلط ، لا .. عادى ، دى لسه صغيرة خليها تعيش حياتها زى ما عشناها ، و المشكلة إن الكلام دا كان بيخرج من المحجبات و اخوات نحسبهم على خير ، و مازال منطق بعضهم إلى الان ... الله المستعان .

طبعا المقارنة كانت لا توصف بين الحياتين ..

بجانب انفتاح الحياة و راسمة لنفسى صورة معينة .. و عاوزة لما أكبر أعمل و أسوى ..

دا طبعا ماينفعش اطلاقا لو انى التزمت و قفلت الباب و فضلت بس اصلى و اعيط على مافات من عمرىّ المضيّع ..

كمان بئت حملات الشرطة تنزل تقفل المساجد و يمسكوا أى حد بلحية أو المننتقبات ، و أفتكر وقتها أخوات خلعوا النقاب ..

و ساءت صورة الملتزمين خالص ، وخوفوا الناس من الالتزام بالمرة ..

و فضلت لحد ماجيت داخلة ثانوى رافضة الزى الشرعى لأنى شايفاه هيمنعنى عن أحلامى و طموحاتى و أنا الحمد لله لبسى مش وحش ، و بأصلى و بأصوم و مش حارمة نفسى من حاجة و مش مختلفة عن أى حد فى الدنيا ... فخلاص يعنى هى جت عليا؟؟

يمكن كمان لأنى كنت بأنفر من بعض الاراء اللى كانت بتتقال فى الدروس ، و شايفة انها اووفر شوية .. فدا كان بردوا بعض الاحيان بيخلينى كل الكلام اللى بيتقال مش باخده على رمته كدا .. و ساعات كنت بتساءل عن حاجات ، لكن ماكنتش بأسألها .. يمكن كنت بأخاف ليقولوا عليا مش كويسة ،أو بأسأل فى حاجات ماليش فيها ..

الخلاصة كانت الفترة دى فترة تلقى بس ..لكن صراحة ماكنش فى تطبيق ، يعنى الواحد يسمع ، يهرى فى نفسه شوية .. و بعدين الدنيا ترجع تاخده تانى ..

بس دايما خلال الفترة دى كنت دايما بأسأل نفسى .. هما ليه الغرب بيدخلوا فى الاسلام ؟؟

طبعا معرفة ربنا نعمة ما بعدها نعمة ، و شئ رائع جدا ، بس لما تسمعهم و هما بيتكلموا ..و عياطهم طبعا تحس انهم حد من الذين رضى الله عنهم و رضوا عنه .. كدا يعنى ..

طبعا كنت معجبة بحضارة الغرب لا أنكر .. و طبعا بالصورة اللى كانت مرسومة ساعتها عن الملتزمين .. و بالصورة اللى كنت راسماها للالتزام كنت بأسأل نفسى ليه يعنى ؟؟

دا عندهم الدنيا كلها .. إزاى يسيبوها كدا ؟؟

و إيه الفارق يعنى ؟؟

ليه هما لما بيدخلوا فى الاسلام بيحبوه أوى كدا و يحسوه كدا ، و احنا لا ،

يعنى يادوب الصلاة و الصوم ..انما اى شئ فى حياتنا بنحاول نغربه بأى شكل؟؟

يمكن عشان احنا اتولدنا لقينا نفسنا مسلمين ، فخلاص بئا واخدين عليه ، انما هما عشان لسه بيعرفوه أول مرة ؟؟

المهم كنت حاسة إن فى حاجة مفقودة ..

بس طبعا بأرجع تانى أتوه فى الدنيا ، و عادى .. أشمعنا أنا ؟؟

دى كانت أول مرحلة فى معرفتى بالاسلام .. لكن بعد كدا بدأت تتغير سبحان الله من حيث لا أدرى و لا أحتسب .

و نكمل الحلقة القادمة بإذن الله

و ...سلاااااااااام