خـدعــوك فـقـالوا ... تااااااااااااااااااااااااج

أولا و قبل كل شئ ، بأشكر كل شخص سأل عليا ، و زارنى رغم انى مقصرة معاكو الفترة اللى فاتت ..

ثانيا بأعتذر لكل شخص قلقته أو كنت سبب فى شعوره بالالم من البوست اللى فات ، لكن بس حبيت أعرض لكم نماذج من حياة ناس بأشوفها و بأسمع عنها ،عشان نعرف أد ايه فعلا احنا فى نعمة كبييييييييييييييييييرة .. بس مش حاسيين بيها ..

بجد ربنا يرضينا كلنا ،و يرضى عننا ..

ثالثا حبيت أقولكم إنى والحمد لله والله كويسة ،و مش بالصورة اللى انتوا رسمتوها ليا دى إنى يائسة أو قاعدة طول الوقت أعيط و أعتزلت الدنيا خلاص .. لا ، أنا أصلا بأكره حاجة اسمها اليأس ،و بأرفض الاستسلام ،صحيح زعلت فى اللول حبة و نفسيتى تعبت بس رجعت تانى لنفسى .. و زى ما قلت لكم إنى كنت عاوزة وقت أقعد فيه مع نفسى ... أفكر ، لأن الحمد لله يمكن فعلا بأعتبرها أكبر نعمة ربنا أنعم عليا بيها ، إنى مش أستسلم للحزن ،و أحاول أشوف ربنا بيقولى ايه من كل موقف بيقابلنى .. فكنت عاوزة بس استوعب الحكمة من كل اللى فات دا .. رغم إنى لسه مش وصلت لحد الوقتى ، بس اذا ماكنش غير التسليم بإنه الخير رغم عدم معرفة الحكمة ، فكفى بها حكمة ... : )

طب ندخل بئا فى موضوع البوست بتاع النهاردة و اللى كنت وعدت بيه استاذى العزيز / بيرم المصرى من حوالى أسبوع ، و الحمد لله وفيت بوعدى أهو ،عشان مايزعلش منى .. : )

طبعاالموضوع هو ...تااااااااااااااااااج

لالالا ... ماتتخضوش ، هو مش تاج ، مش أسئلة يعنى ،

انما هو نقاش عن ماهية التاج؟؟؟ و ايه المقصود بيه ؟؟

طبعا، أنا كنت مبسوطة بجد بأول تاج يجينى .. دى حقيقة ، بس ماكنتش أعرف ان أول الغيث قطرة ، و لقيت مدفع التاجات أشتغل ،و كل اللى عنده تاج زيادة يضربنى بيه ، خاصة آخر تاج دا ... أكتر تاج احترت فيه ،و طبعا زى ما شفتوا كانت الاجابات مبببببببببببببببهرة ... هههههههههههههههه

المهم يا جماعة أنا لقيت اييييييييييييه ؟؟

لقيت استاذى العزيز باعت لى الرد دا على أول تاج : " صباح الخير دخلت عندك للاطلاع لقيت تاج فاصابنى الفزع والهلع رحت جارى بسرعة ، هذة اللعبة مغرضة ومشبوهة وساذجة "

قلت ايه أنا بئا ؟؟ عشان تعرفوا بس إنى طيبة ..

قلت يمكن استاذى العزيز بيضحك معايا بالكلمات دى ... و إنه مش بيحب التاجات ، فحب يهرب بالحجة دى ... ماشى ، مش مشكلة ، و عدت الحكاية ..

امممممممممممم ، قلت اضحك مع استاذى و اعمل انى اهديته التاج التانى ، راح ماعلقش خالص ...هههههههههههههههههه

طب نيجى لتالت تاج ، قمت لقيته قالى ايه:" اااااااااااه الحمد لله سقط القناع عن وجه الشيطان ، واسفر عن وجه المردة صناع التيجان ، المضللين للسزج من الشباب الغارق فى البلاهة واشعة القمر والاحلام ، والزاهل عن المكائد التى يحيكها الابالسة من بنى صهيون واتباعه فى ركب التخاذل تحت مسمى السلام ، انها وسيلة لكشف العورات واظهار اماكن الفساد والضعف ، انها وسيلة تجسس على شعب بايدى الاغبياء من المدونين ( كنت عندك ومن اول سطر رايتك يقظه لشر سيسقط فيه غيرك ، انشرى هذه الفقرة ) "

؟؟؟؟؟؟؟!!!!!!!!!.... طبعا انا استغربت ، يعنى التعليق على أول تاج دا ماكنش هزار ، كان جد ...

و بصراحة قعدت أفكر فى الموضوع شوية ، لقيته فعلا يستحق إننا نفكر فيه ، لأن الاحتمال دا وارد جدا ،و مقبول جدا ، خاصة بعد ما قرأت مقال من زمان عن ان الفيس بوك وسيلة تجسس أصلا على المشتركين فيه من كل انحاء العالم ، لكن حديثا قرأت هذا البوست ... عن انه بالفعل فيه استقصاد للشارع العربى بصفة خاصة مابين مستخدمى الفيس بوك .. إذن مش مستبعد أبدا تكون المدونات هى كمان تحت المراقبة ،و وسيلة للتجسس بأفراد من الشعب ذاته .. و قد تكون فكرة التاج فعلا فكرة دخيلة و احنا بئا عجبتنا الفكرة ،و بئينا نتبارى فى ازاى نكشف شخصية اللى قدامنا من خلال اسئلة توجه لشخصه ..

قمت طلبت من أستاذى العزيز إنه يشرح وجهة نظره باستفاضة أكتر عن الموضوع ، و بصراحة مش أتأخر عليا ،و كتب لى التعليق دا : " السلام عليكم ورحمة الله وبركاته
لقد حزنت كثيرا عند دخولى مدونتك وصدمنى رؤية هذا الفخ اللعين المسمى بالتاج ، وما يجلبه من شر الى هذه الامه بايدى شبابها الذاهل عن الواقع ، الغارق فى احلام الرومانسية ، والمبهور بالاسم البراق ، ولم يدرك انه لا يتعدى كونه تاج الجزيرة اى السلطنية، وهى دليل السذاجة والتخلف
ان مخترع هذه المكيدة عالم بامانى الشباب الغر ، فداعب احلامة بتاج قوامه اسئلة مؤداه الوقوف على ايجابات بها يتعرف على مكنون النفوس دون ان يجتهد فى تجنيد الجواسيس ، بل جعل الشباب يتجسس على نفسة ويكشف له عن عوراته دون وعى ، ليسهل ضربة فى مقتل
لم تعد الحاجة ملحة فى التجسس على القوة العسكرية فالاقمار الصناعية تقوم بالغرض وزيادة ، وباتت دراسة السلوكيات المجتمعية اهم واجدى فى اخضاع الشعوب ببث المفسدات بالدعاية الاعلامية والتخدير بالاشاعات
واسمحى ابنتى العزيزة ان اضرب مثلا :
سؤال اذكر سبعة بتحبهم غير بابا وماما
واحد يقول مفيش هههه
فى التحليل فى مراكز الدراسات انه لا ولاء له او منطوى او..... والتعامل معه ادخال مخادع يلعب باحلامة مع المزيد من دواعى الانحراف
واحد اخر يقول بحب الله ورسولة
وفى التحليل ومن اجابات اخرى يعرف ان ثقافتة سطحية لصغر سنه فيوجه له دعى كاذب تحت مسمى الدفاع عن الاسلام ليشكك فى العقيدة ويدعوه للمشاركة فى تفسير القران بعد ان يضع سمة ويسخر من القدور والجفان الممنوحة لسيدنا سليمان ويرى ان اطباق الدش اكثر اعجازا ، او يقول ان الغرب يسخر من ان الرسول امى وكيف يعلم الناس ، عمى بصرك وبصيرتك ايها المتشكك المرتاب ، ان الرسول صلى الله عليه وسلم صاحب دعوة سماوية لا ينفعها الدراسة فى الجامعات لانه لا ينطق عن الهوى انما هو وحي يوحى
ابنتى معذرة على الاطالة ، انما هى الغيرة على شباب اثبتت الدراسات انه من اذكى الاطفال فى العالم غير ان .... "

أعتقد فعلا تفسير منطقى .. رغم اعتراضى على نقطة بعينها فى الامثلة المذكورة .. لكن الفكرة العامة وهى وسيلة التجسس ممكنة جدا ، و لما قلت له بس التاجات دى وسيلة بتقرب بينا و تعرفنا على بعض ، قاللى اللى عاوز يتعرف يضيف الميل و يتعرف ..مش لازم يتعرف على الملأ ..

امممممممممممم .. أنا بئا اللى شاغلنى الوقتى ، هل عشان الفيس بوك ،و لا المدونات وسيلة تجسس ..ننكر ان الفيس بوك و المدونات قربوا اوى بينا و عرفونا على ناس ماكناش نتخيل انهم بينا ؟؟.. أصبحنا حاسيين ان فى ناس بيفهمونا ،و بيحسوا بينا ،و إننا مش لوحدنا؟؟

طب إذا كان الاعتراض على التاج ، طب ما المدونات نفسها ، كل مدونة بتعبر عن شخصية صاحبها ، هى و ان كان التاج بيكون اسئلة مباشرة ، إلا أن البوستات وسيلة غير مباشرة يفهم منها شخصية الانسان دا ، فهل نمنع التدوين و نعتزله ؟؟

أعتقد ماحدش فينا هيقبل ، مش كدا؟؟ طب يبئا ايه الحل لاستخدام أمثل لمساحة من الحرية فرضت نفسها كجزء من حياتنا ،و شايفين انها بتخفف عننا كتييييييييير أوى ؟؟؟

و هل فعلا لو احنا اعتزلنا الفيس بوك و المدونات .. مافيش وسائل تانية هيعرفوا من خلالها ايه توجهاتنا و افكارنا؟؟

و هل فعلا المدونات مالهاش دور ايجابى فى حياتنا خالص ، الا انها عبارة عن فضفضات بتعبر عن شخصية الانسان دا فيبعتوا اللى يعرف ازاى يستقطبه و يضيعه ؟؟

هل فعلا إحنا سذج اوى للدرجة دى ن و ماحدش فينا عنده عقل خالص يستخدمه؟؟

مش عارفة بجد يا جماعة ... وجهة النظر مقبولة جدا ،و مش معترضة عليها أبدا ، إنما اللى شاغلنى ، هو ازاى هنتعامل معاها ؟؟

و هل عدم الرد على التاجات كفيل بحل المشكلة ؟؟؟!!!..

اعتقد إننا عاوزين نعرض الميزات و العيوب ادام بعض ، عشان نعرف هنوازن الامور ازاى ؟؟؟!!

طبعا الاسئلة مش موجهة لشخصك العزيز يا أستاذى ، إنما هى تساؤلات دارت فى عقلى ،وعاوزاكو تشاركونى بآراءكم ...

يا مسهل يارب ..

هأروح أرد عليكم بئا ،و أزوركم عشان بجد افتقدتكم جدااااااااااااااااااااا

و نلتقى بعد الفاصل ... : )

صــرخـــة ألـــــــــــم

أنا آسفة جدا يا جماعة على غيابى المرة دى ، صدقونى غصب عنى ..

طبعا بأعتذر لأستاذى العزيز / بيرم المصرى أولا لأن المفروض من البوست اللى فات كنت ناقشت موضوع أنا وعدته بيه .. بس والله أنا مش ناسية ، و معلش سامحنى فى البوست دا كمان ..

ثانيا أنا كنت فاكرة إنى هآخد يومين أجازة أستريح فيهم .. للأسف جدت امور زيادة ،

بجد يا جماعة طالبة منكم طلب .. أدعو من قلبكو أوى لـ أ/ محمد مدير المخزن ،و أخو صاحب الصيدلية .. لأنه بجد تعبان أوى أوى ، و طبعا كالمعتاد فالدكاترة المخضرمين لسه مش وصلوا لتشخيص حالته ،و ياعينى بئاله يومين مش بينام و صراخ من الالم .. بجد أنا بس سمعت صوته حسيت قلبى بيتقطع .. آه والله ،ماعرفتش صوته من شدة الالم و بيخرج بصعوبة و بعد مجهود ، معقول دا اللى ماكنش بيبطل ضحك و هزار!!.. بجد ربنا يكون فى عون والدته و زوجته و أولاده .. فعلا احساس العجز وحش و أنت شايف انسان قريب منك بيتألم ...

اللهم أشف مرضى المسلمين جميعا ..

لا و كمان جانى مندوب النهاردة بيسأل عليه ، فلما قلت له على حالته ، قعد يشكى لى هو كمان ، ان بئاله أسبوعين تعبان و احواله مش مستقرة ، و زوجته كانت فى المستشفى بتولد ، كانت حامل فى توأم الولد مات و البنت فى الحضانة .. حاولت أواسيه ، قلت معلش ماتعرفش الخير فين ، و يمكن كان هيكون مش بار بيك ..قاللى الحمد لله والله ..أنا باحمد ربنا على كل حال ، بس كان حلم جميل بئالى 13 سنة باحلم بيه ،و لما خلاص هيتحقق يروح منى ؟؟!!.. بجد حاولت اقوله اى حاجة، قلت له والله كل شئ بحكمة ماتعرفش حكمة ربنا فين و أهم شئ ربنا يبارك لك فى البنت و تبئا قرة عين لك ، قالى البنت فى الحضانة بئالها 3 أيام دفعت فيهم 10 آلاف جنيه ،و مش عارفة 11 ألف تانيين فى ايه ، و حالتى صعبة خالص .. طبعا اتكتمت و معرفتش أقوله ايه !!..

أما بئا بالنسبة لليومين اللى فاتوا ، فطبعا بعد زن الاخوة الاصدقاء قلت هأقولكم انا كنت متضايقة فى الاول ليه ،عشان تعذرونى ..

طبعا أنا كنت من أسبوعين تقريبا مسافرة دمنهور ..أزور انسانة ،تعتبر عمتى ..

و أد ايه باكون سعيدة لما باكون عندهم .. لأن حقيقى عندهم باحس الحب الصافى

باحس انى فى عالم تانى خااااااااااااالص غير الكرة الارضية دى

سواء هى أو أولادها و أحفادها .. ياااااااااااااااه ، بجد بأحس ان لسه فى بشر فى الدنيا دى

المهم ان يوم الجمعة أختى بترن عليهم عادى ، لقيت ابنها بيتصل و يقول البقاء و الدوام لله

طبعا اتصدمت .. امتى؟؟ ... لسه حالا اهو ..

كان جوايا احساس مش قادرة اوصفه من قبل مانسافر ، وهو انى هافقد حد ، و بصراحة لسه جوايا ..ربنا يستر..

قعدت أهيئ نفسى ، بابا ممكن؟؟ -بعد الشر عليه يا رب و يخليه ليا -..

طب ماما ؟؟ -بعد الشر عليها و يخليها ليا يارب- ..

المهم لما سمعت الخبر دا .. قعدت اقول معقول الاحساس دا كان ليها؟؟ ، سبحان الله ..

لينا نصيب نشوفها ، و تشوفنا قبل ما تنتقل إلى رحاب الله ..

ياااااااااااااه لو قلت لكم يوم الجمعة مر عليا ازاى ،و أنا لسه مش مستوعبة ،

حاولت أهرب و مافكرش فى الموضوع خاااااااااالص .. دخلت اتكلم مع صافى (بنات أفكارى )

لقيتها بتحكيلى حكاية البنت اللى حطيت اللينك ليه فى البوست اللى فات ..

طبعا نفسيتى بئت تحت الصفر .. و افتكرت نماذج كتييييييييير للاهمال والسلبية

و قصص اتحكت لى خلتنى عاوزة أهرب من الدنيا دى ..

أولها واحد معرفة حكالى انه كان فى مرة هو وواحد صديقه فى زيارة لبلدة ما ،

و بعدين كان ساعة صلاة فدخلوا مسجد يصلو .. فلقو واحد فى ركن المسجد بيتأوه و بينزف

الراجل كان بيموت ...و الناس حواليه اللى بيصلى –قال بيصلى قال – و اللى بيتوضا ، و اللى ...

و سايبين الراجل ينزف .. بيقول أنا مصدقتش اللى شايفه ، جريت على الراجل قعدت ازعق فيهم ان حد يلحقنا بعربية او تاكسى

مافيش ..

المهم صاحبه اللى كان معاه وقف تاكسى و أخدوه للمستشفى ..و الحمد لله الراجل كان لسه له عمر ..

بجد أنا كنت مذهولة و أنا باسمعه ... فى مسجد ؟؟!!!.

وفى ناس واقفة تصلى ؟؟ بيصلوا بأنهى وش دووول ؟؟

و لا العبادة بئت حركات بتتأدى و خلاص؟؟... فين الشهامة و النخوة بتاعتنا؟؟؟

أد كدا بئينا بنهون على بعض؟؟؟

يعنى لولا كرم ربنا بإنه كان معدى ..كان الراجل دا راح فيها ..

كمان حكاية طنط اللى قلت لكو انها تعبانة و دا قد يتوقف عليه كل حياتها ..

طنط طلع عندها ورم على الحبل الشوكى .. دا خلاها ماعدتش قادرة تحرك جسمها اطلاقا

و كمان عامل التهاب فى كل اعصاب جسمها ..اى حركة تصرخ منها

و لو كانت فضلت شوية ،كان لاقدر الله عمل لها شلل كامل

بس الحمد لله كانت عناية ربنا ألطف بيها ، و عملت العملية الحمد لله وهى الوقتى افضل و ان كانت الخطورة لسه

و شوف تصريف ربنا ..ان يوم ماكنت بازورها ، كان سكشن طب داخل و الدكتور شرح حالتها ،

و قال طبعا هى وصلت لمرحلة متأخرة جدا ،و كل دا بسبب اهمال الدكتور اللى عالجها فى الاول

و قعد يقولها دى خشونة .. لحد ما الورم ما كبر ،و بئت بالحالة دى ..

فعلا .. الدكتور قعد يقولها دى خشونة ..دى خشونة ،و يعطيها مسكنات مسكنات ،

و جلسات ، و غيره و بعد كااااااااااااام شهر ، لما اكتشف ان حضرته تشخيصه غلط

قالها : أنا متأسف يا حاجة .. دى مطلعتش خشونة ..

والله ؟؟!!.. طب صح النوم يا دكتور .. و سلام للنوم فى العسل ، و الاستهانة بحياة انسان كان ممكن يصاب بشلل كامل بسبب استهانة حضرتك ... طب بلاش ، مش مقدر حالة الناس اللى بتحبه؟؟ حالة اولادها ممكن تكون عاملة ازاى .؟؟

طب سيبكو من دا ، دا اعترف بغلطه و الحمد لله لحقناها ..

الاسوء بئا ..حكاية قالتهالى جارة لى ، أخوها دكتور و كان بيشتغل فى مستشفى ، المفروض انها من أنظف المستشفيات –طبعا خاصة -،

دخلت حالة مستعجلة ، كان لازم يعملولها عملية ،أو رجله تتبتر ، قام بسرعة اتصل بالرئيس بتاعه ، اللى هو مفروض أستاذ دكتور فى الجامعة .. قام سعادته قال له عين الحالة للصبح – دا مثلا بمناسبة انه كيس دم هيحفظوه فى التلاجة لحد الصبح – المهم هو قعد يفكر لو سابه للصبح ، كدا هيبئا بتر بتر ،من غير رجعة ..

قام اتصل بجراح زميله جه و عملوا العملية للراجل و أنقذوه من بتر محقق ، يقوم ييجى الاستاذ الدكتور الصبح ، يزعق و يهدد و يتوعد ، يقوله يا دكتور كانت رجله هتتبتر ، يقوله ما تتبتر ، أنا قلت لك عينه للصبح يبئا تعينه للصبح ، و قام محوله للتحقيق ، تخيلو !!..

عارفين بئا قاله تعينه للصبح ليه؟؟ عشان كل ساعة بالشئ الفلانى ..دا أولا ، ثانيا هياخد فى عملية البتر أكتر ماكان هياخد فى العملية اللى أخو جارتى دى عملهاله !!!!!...

فأخو جارتى ماسكتش رفع عليه قضية ، قامت الست الدكتورة مديرة المستشفى لما لقت ان الموضوع هيكبر و ممكن يجر ناس كبيرة فى الموضوع قامت شاهده ضده ، و طبعا قضيته اتحفظت ، بل كمان اخد جزا هو و زميله .. و الاستاذ الدكتور اتكرم و خد اللى فيه النصيب ..

بجد ، أنا أسوء انسان عندى فى الدنيا دى ، هو الطبيب اللى بيبيع ضميره ، أصله انسان شال بارادته امانة حياة الناس ، و أقسم على كدا ، يبئا لما يدوس على الحلفان دا عشان خاطر مادة .. معلش سامحونى ، يبئا واحد لا يستحق أن يطلق عليه لفظ آدمى ..

دا انا ساعة ما كنا بنقسم القسم .. والله حسيت الدنيا لفت بيا ، و لسانى تقل ، و قعدت أقول يارب قوينى ، أنا مش أد الامانة دى ..

ما بالك بئا وهو طبيب ؟؟؟

بجد كنت هأتجنننننننننننننننننننننن ..

طب سيبنا من الدكاترة و الناس اللى نقول انها مالهاش صلة بينا فعادى مش مقدرين ،

تعالو بينا و بين بعض ، بين ناس المفروض العلاقة بينهم تخليهم يخافو علي بعض من نسمة الهوا ...

صديقتى بتحكيلى عن زميل لها.. حكالها ، انه تعبان و مخنوق و مش طايق حد ، و لما سألته قالها أصلى باحب بنت ، بس مش هينفع .. قالت له ازاى يعنى ؟؟

طبعا هو لسه بيدرس ، وهى لسه بتدرس بردوا .. قالت له الحكاية بدأت ازاى ؟؟.. قالها كدهو ، لوحدها .. كانت تسلية فى الاول بس قلبت بجد ، قالت له يا سلاااام ،كانت تسلية؟؟ طب ماكنتش عارف انها بتقلب بجد .؟؟... قالها لا كنت حاسس ، بس كنت سايبها ، كان احساس حلو .. و بعدين اكتشفت فى البنت حاجات حلوة اوى اوى ..مش متخيل انى ممكن ألاقيها فى بنت ..

قالت له و بعدين ؟؟.. قالها بس انا لما فكرت فيها بئا بجد الوقتى ،لقيت مش هينفع ،أنا لسه بأدرس و هى كمان ، يعنى حتى لو تم الموضوع هأفضل رابطها جنبى لحد ماكون نفسى .. و ماكنتش عارف ابلغها ازاى .. و سبحان الله ساعتها حصلت خناقة ، و سيبنا بعض ، بس رجعت ترن عليا تانى ..و أنا عاوز اكلمها .. اعمل ايه؟؟

تعمل اييييييييييييه؟؟.. والله ماعرفت أجاوب عليها أقولها ايه ؟؟.. قلت لها الحكاية من الاول غلط ، بس مش وقت أولها ، احنا فى الوقتى نعمل ايه؟؟ قلت لها يكلم اهله لو فعلا عاوزها؟؟.. حكى لمامته على انه واحد صاحبه ، مامته قالت له صاحبك دا هايف .. طبعا سكت ماتكلمش ، طب ايه العمل ؟؟ و ايه شعور البنت ؟؟ هى كمان غلطت ، طبعا مافيش غير انه يسيبها ..

بس ليه بنستهين بمشاعر بعض اوى كدا ؟؟؟ ليه بنلعب على بعض و ساعة الجد ننجرح اوى ؟؟

كمان موقف لواحد جالى الصيدلية طلب ازازة و شريط دوا ..جبتهومله ، قام مفرغ الشريط فى ساعتها و فتح ازاة الدوا و خدها جرعة واحدة .. طبعا انا اتصدمت و فضلت مذهولة ..ايه اللى حصل ادامى دا؟؟؟ قاللى هترميها يا دكتورة و لا أخدها معايا ؟؟ أنا ماحستش غير و الازازة فى ايدى ؟؟ازاى ؟؟؟ماعرفش ... لما لقانى كدا ، قاللى والله يا دكتورة غصب عنى ، أصل أهلى عودونى عليه من صغرى .. أوعى يا دكتورة تقربى ناحية الحاجات دى ، والله ماهى حلوة .. و مشى ...

انا محستش غير جسمى بيتهز جامد و بارتعش و قعدت اعيط .. ايييييييييييه داااااااااااااااااا؟؟؟ مش مصدقة ، و مش مستوعبة .. أهله؟؟!!..هو طبعا بيكون مش قصدهم ، بس ماحاولوش يعالجوه ؟؟ والله صعب عليا ..

و اللى افظع و أفظع .. حكاية بنت ، فى يوم لقيت أخت –فاعلة خير- جايبة لى روشتة من مصحة نفسية ، الروشتة كلها ادوية للاكتئاب الشديد بتاع حوالى 8 أصناف

و لما سألت عن الحكاية ، قالت البنت دى والدها مدمن ، و كان دايما يضرب مامتها و هى و أخوها ، بس مامتها دايما تحوش عنهم ، المهم أول ما بلغت السن القانونية جوزها على طول ، بس الصراحة زوجها انسان قمة فى الاخلاق .. المهم بعدها بفترة مامتها اتوفت ، قام ابوها فضل بينها و بين جوزها لحد ماطلقها منه ، و زوجها صراحة اعطى لها كل حقها ..

يقوم ايه ؟؟ يقوم الاب الهمام حابس بنته فى اوضه ،و بعد ما يظبط الدماغ يخش عليها يعاشرها ..نعمممممممممممممممممممممممممممم؟؟؟

بجد اتصدمت دى كلمة قليلة .. ماصدقتش ، قالت والله ، و فضل على كدا فترة لحد ما البنت جالها اكتئاب شديد و حاولت تنتحر بانها ترمى نفسها من البلكونة ، بس الحمد لله لحقوها و نقلوها المستشفى و ركبولها شرايح فى الضهر و الرجلين ، و الوقتى هى فى المصحة بتتعالج من الاكتئاب بئالها شهور ...

و طبعا أخوها هرب من البيت أصلا ، لا و غير كدا أبوها مارضاش يضمنها ، و خلاها مرمية كدهو فى المصحة ، لا و الاحلى بئا خد كل عفشها و حاجتها و راح محافظة تانية اتجوز بيهم واحدة اد بنته ..

بصو انا مش هأعلق على القصة دى ..

أنا عاوزاكو تستوعبو ان فى ناس كدا .. انا بجد اول ما سمعت القصة دى حسيت أنى مش فى وعيى ، بجد حسيت باضطراب جوايا شديد خلانى زى ماكون ذاهلة عن كل حاجة حوليا ...

و نرجع نشتم فى الحكومة و أعوان الحكومة , حكومة ايه و بتاع ايه؟؟؟ مانشوف احنا بنعمل فى بعض ايه الاول ؟؟

بجد أنا باسمع حاجات و باشوف حاجات ..

باقول يارب استرنى فوق الارض و تحت الارض ... اييييييييييييييييييه دااااااااا بجد ؟؟؟ هو احنا بئينا فين؟؟؟

والله حتى الحيوانات فى الغابة مش بيعملوا كدا !!....

و لما رحت اجتماع المدونين يوم السبت لقيتهم بيحكوا عن الوحدة و الناس اللى الوحدة جابت لهم امراض نفسية و حاجات كدا ..انا بجد كنت راجعة باقول : لاااااااااااااااا .. أكيد فى حاجة مش طبيعية .. مش معقولة يومين ورا بعض بالشكل دا ؟؟!! ..

بجد كنت عاوزة فترة استرجع فيها نفسى ، احس انى لسه عايشة ، و ان لسه فى بشر ..فى بنى آدميين ..

معلش أنا آسفة إنى عكننت عليكو بالبوست دا .. بس بجد دول بس بعض مواقف ،و ما خفى كان أعظم ..

و لسسسسسسسه ... القادم أحلى .. : ((((((

أنا الحمد لله كويسة و والله مش باحاول استسلم للحالة دى ، بس المواقف كلها جت ورا بعضها ، فعاوزة بس شوية وقت اشعر بالاتزان تانى ..

بجد ادعولى كتير و ادعو لكل مريض ربنا يشفيه ، ولكل مكروب ربنا يكشف كربته ..

سلام