كيفكم يا شباب؟؟ أخباراتكم ؟؟ أهراماتكم؟؟ جمهورياتكم؟؟
طبعا النهاردة ان شاء الله زى ما قلت لكم المرة اللى فاتت هأتكلم عن الحبيب صلى الله عليه و سلم و بعض اللى استفدته من سيرته ، و المرة دى هأتكلم عن حياته بشكل عام ...
طبعا كلنا عارفين ان الرسول صلى الله عليه و سلم نشأ يتيما و تربى راعيا للأغنام ثم عمل بالتجارة حتى جاءه الوحى ، فعمل بالدعوة و لكن ... هل تفرغ للدعوة فقط؟؟ ...
لم أقرا فى السيرة خلال مرحلة الدعوة المكية عن عمل الرسول صلى الله عليه و سلم ، و لكن حينما انتقل رسول الله صلى الله عليه و سلم إلى المدينة ماذا عمل ؟؟ ... ربما لم يذكر بنص صريح عن عمله صلى الله عليه و سلم ، و لكن بديهيا أن رسول الله صلى الله عليه و سلم وقتها كان .... كان .... ؟؟؟ كان حاكم الدولة الاسلامية
أيوا ، لما رسول الله انتقل الى المدينة ، تولى حكم الدولة الاسلامية التى كانت مثل بذرة مشتاقة إلى ضوء الشمس لتنمو و تترعرع ، فكان القاضى و المفتى و قائد الجيش و المصلح الاجتماعى ... الخ
و بجانب هذا ، كان الزوج و الصديق و الاب ...
كان بيخرج على رأس الغزوات ، و يبعث السرايا ،
و كان يخرج فى نزهات الصيد مع أصدقائه و يلاعب زوجاته ..
عاوزة أقول إن حياة الرسول صلى الله عليه و سلم كانت تقريبا شاملة كل شئ ، لكن اللى عاوزة أركز عليه النهاردة ، ان بعثته صلى الله عليه و سلم ، و رغم انها كانت بوحى من الله عز و جل عن طريق أمين الوحى جبريل ..
إلا أنه صلى الله عليه و سلم لم يفرغ حياته للدعوة ، لم يقصر فى حق رحمه بحجة الانشغال بالدعوة ، لم يقصر فى حق زوجاته و ابنائه بحجة الانشغال بالدعوة ، بل لم يترك العمل الدنيوى بحجة الانشغال بالدعوة ، و النقطة دى اللى هأقف معاها النهاردة أوى ...
فى أول التزامى و زى ما قلت لكم قبل كدا ، كنت فاكرة بئا انى هأقرب من ربنا ، يبئا لازم اعتزل كل شئ كنت باعمله ، بس اصلى و اقرأ القرءان و احفظه ، احفظ الاحاديث ، اقرأ السيرة .... و هكذا ..
طب أضحككم على واحد لما أتسأل ايه المواصفات اللى تحبها فى الانسانة اللى ترتبط بيها؟؟ قال عاوزها واحدة حافظة ستين جزء و الصحاح الاثنى عشر ، و مش عارف ايه و ايه و ايه ... (طبعا هو كل حاجة ضاربها فى اتنين ) ..ههههههههههههه
فبجد مش عارفة ليه بيكون الانطباع الاول عند اى حد بيلتزم انه لازم يتفرغ للأمور الشرعية فقط و يكرس لها حياته ، بل الاكثر ان بعض الدعاة عند حديثهم عن الامور الدنيوية يحقرون من شأنها و كأنها شئ ثانوى ،
بالعكس .. دا حتى ربنا سبحانه و تعالى ، لم يأمر رسول الله صلى الله عليه و سلم باعتزال الدنيا ابدا ، و كان أول وصف وصف الانسان بيه " إنى جاعل فى الأرض خليفة" .. و ذكر الارض قبل خليفة ، لأن دى سنة ربنا فى خلقنا ، و فطرته اللى فطرنا عليها و هى الاهتمام بشئون الدنيا ...
بل كمان وعد الذين ءامنوا ايه ؟؟؟ " وعد الله الذين ءامنوا منكم و عملوا الصالحات ليستخلفنهم فى الأرض " ... إذن فنقطة الاقتصار على الشئون الشرعية و تفضيلها على الشئون الدنيوية مش صح ... الاتنين مطلوبين ، لأن بيهم هتقوم الخلافة على الارض زى ما ربنا عاوز
طبعا أن اتكلمت فى النقطة دى اكتر من مرة ، لكن بردوا هأفضل أتكلم فيها ، لأن النقطة دى لازم تترسخ جوانا كعقيدة ، ان شؤون الدنيا مهمة تمام زى شئون الاخرة ، النهى كان دايما عن ان امور الدنيا تطغى علينا لدرجة اننا ننسى الاخرة ، لكن طالما عارفين ان السعى فى الدنيا و طلبها شئ من الدين و بنطلبها ابتغاء مرضات الله ... فخلاص ، أكيد بناخد عليه حسنات زى بالظبط ما نطلب الامور الشرعية ابتغاء مرضات الله ...
كل ما أسأل واحدة من صحباتى عن نفسها تبئا ايه او اولادها فى المستقبل ان شاء الله يكونوا ايه ؟؟؟ الاقى الرد الغالب انها تحفظ القرآن ، و ان ولادها واحد قارئ ، و التانى داعية أو شيخ مسجد أو شئ من هذا القبيل ...
طبعا قدر التحفيظ او قراءة القرآن محفوظ ، لكن اللى عاوزة أقوله ان دا واجب علينا أصلا بجانب عمل دنيوى ، يعنى رسول الله صلى الله عليه و سلم ، كان يعلم الصحابة القرآن ، و يفتيهم فى أمور دينهم ، و يحكم فى قضاياهم ، و كان بينظم أمور الدولة ، و يولى الامارة ، و يطمئن على أصدقائه ، و كان زوجا و ابا بما يحمله كل لقب من مسؤليات ...
عشان كدا ان شاء الله ولا واحد من اولادى بإذن الله هيكون قارئ و لا شيخ و لا داعية ، عاوزاهم دكاترة او صيادلة او مهندسين ... ولاد و بنات ... مفيش فرق ... معنديش بنات يقعدوا فى البيت :) ... كله لازم بإذن الله يكون له هدف دنيوى زى ما هيكون له هدف أخروى بيسعى ليه ...
و دا طبعا اقتداءاً برسول الله صلى الله عليه و سلم ....
و محدش يقوللى نساء الرسول كانوا ستات بيوت ،
صح هما كانوا مش بيشتغلوا بالمعنى اللى معروف عندنا الوقتى ، لكن كانوا بيفتوا الصحابة ، و يقولولهم على أفعال الرسول صلى الله عليه و سلم ، و فى اعتقادى << باقول اعتقادى اهو عشان محدش يتكلم ..
ان لو كان على عهد الرسول صلى الله عليه و سلم التعليم و العمل زى ايامنا كدا .. كانت نساء النبى عالمات كل فى مجال العلم الذى تختار .. << لكن طبعا بالالتزام بتعاليم الاسلام و عدم الاختلاط القبيح اللى بنشوفه كل يوم و التانى
و محدش يضرب نار .. أنا باقول اهو ؟؟؟
أشوفكم البوست الجاى ان شاء الله :)
