+ تحديييييييييييث^^ ذ كــــــر يـــــــــــا ت ^^

تحدييييييييث : خلاص يا ولاد ... اهئ اهئ

بكرة راجعة الشغل من تانى ... و ربنا يستر من بكرة و بعده ،و كمان الاسبوع الجاى هيبئا شغل نااااااار

دعواتكم بئا ربنا يعديهم على خير

و طبعا قبل مامشى قلت أحل الفوازير ...

طبعا المعظم قال حل رقم 4 و إن ماكنش كامل يعنى و دول عادل و أيوشة

و مصطفى (درش)و تأثير الفراشة

و اضافوا عليهم حل رقم 3 و اللى ضد قالت انها عارفاه و ماقلتهوش ... لما أشوفك يا ضد

و عاشقة الرومانسية اللى قالت انها عارفة رقم 2 و بردوا ماقلتش الحل ... صبرك عليا يا دودو

طب نشوف الحل:

1- يا بنّى ابنى .. اللى هو بيبنى البنت بتقوله يا بنّا ... ابنى

و بنىّ ابنى ... يعنى ابنى بالطوب النىّ

الواد دا أخويا ... معروفة خلاص ، و أنا بنت (مش ولد يعنى ) أخته ... يعنى هما اخوات

<< يااااااااااه نورتى المحكمة يا سول والله ... شكرا شكرا أخجلتم تواضعنا والله

2- ما رأيك يا قاضى تُها ... هو القاضى اسمه تها

فى امرأة تزوجتها .. يعنى انت اتجوزتها

هى امى ... معروفة ، و أنا ولد تُها .. يعنى أنا ابنك ... و الست دى تبئا مرات القاضى :)

3- جبنا جبنا .. يعنى اشترينا جبنة

بقعت جبنا .. بقعيت الجيب فى الهدوم :)

4- طرقت الباب حتى كلّ متنى .. قعدت أخبط على الباب لحد ما دراعى وجعنى

فلما كل متنى كلمتنى .. يعنى و لما دراعى وجعنى ردت عليا

قالت يا اسماعيل صبرا ... قالت له يا اسماعيل اصبر شوية

قلت يا اسما عيل صبرى .. هى اسمها اسما ، فيقول لها يا اسما نفد صبرى

و دمت جميعا بكل الخير ... اتمنى أشوفكم قريب ، ابئوا اسألوا عليا يا ولاد ... ربنا يستر اهئ اهئ

......................................

كل سنة و انتوا طيبين يا شباب و عيد سعيد عليكوا يارب و على كل الامة الاسلامية ...

و ربنا يعفو عنا جميعا و يعافينا من كل شر و سوء ، و يجعل أيامنا كلها أعياد ... اللهم آمين

و طبعا داخلين على العيد كان لازم أجيب تامبلت جديد للمدونة ، يعنى الناس تعيد و هى لا ؟؟

من نفسها مرة ... اللا ...

بس يعنى ماتخدتش على كدا هو العيد دا و بس ، اه باقولك اهو .... اتفقنا؟؟؟

طييييييييييييييب

ها؟؟ ايه رأيكوا فى الطقم الجديد؟؟؟

******

طبعا زى ماحنا متعودين كل عيد ... هنقعد نلكلك شوية و نحكى عن ذكرياتنا ،

و طبعا بردوا أنا أحلى لحظات حياتى لما باقعد مع نفسى و استعيد ذكرياتى مع الناس اللى باحبها

ياااااااااااه بجد احساس تانى خااااااااالص

و النهاردة بئا قررت إنى هأحكى عن شخصية من أغلى و أحب الشخصيات لقلبى و اللى أثرت فيا جدا جدا جدا

و هى .......... جدتى لوالدى اللى فقدتها من حوالى 9 سنين تقريبا ربنا يغفر لها و يرحمها ... اللهم آمين

و تيتة بئا يا ولاد كانت شخصية مميزة أصلا فى العائلة و كان لقبها ( أديبة العائلة )

و دا لأنها كانت بسم الله ما شاء الله موسوعة أدبية متنقلة ، شعر .. قصص .. حكايات .. مواعظ .. حكم

كل كل حاجة ، و كانت مثقفة و مطلعة ما شاء الله عليها ، و طبعا كان لى النصيب الأوفر منها

و طبعا لقبى كان و مازال ( الخليفة )

و دا لأنى ورثت منها حب الشعر و الأدب عموما ... و القراءة و الكتابة بالنسبة لى متعة لا تفوقها متعة بصراحة

هى مش سمة ليا لوحدى ... هى متأصلة فى العيلة كلها ، بس يمكن زيادة عندى شوية

نرجع لمرجوعنا الاساسى و هى تيتة ...

تيتة بجانب كدا كانت موسوعة فى الطب الشعبى ، و ماكنتش ترضى تاخد دوا ابدااااااا << وريثتها بردوا فى الموضوع دا

و كانت دايما تحب كل حاجة من الطبيعة و تعمل خلطات كدا غريبة و مش عارف ايه على ايه ... بس بصراحة كانت بتجيب نتيجة

دا طبعا غير الاكلات المميزة ليها ، افتكر و أنا صغيرة يمكن كنت 3 سنين و لا حاجة ، و كانت تعمل لى العيش بالعسل الاسود كان بجد جنااااااااان ... تقوم مسيحة حتة سمنة صغيرة على النار و بعدين تقطع العيش حتت صغيرة و تحمصه فى السمن و بعدين هوب تحط العسل الاسود و تقعد تقلب شوية و بعدين تسيبه يبرد حبة و مع نفسى بئا ... آكل ماكلش ، ماكنتش تقعد فوق راسى زى ما كانت ماما تعمل معايا ... اصلى كنت مجنناهم فى الاكل دا ...ماكنتش باكل خاااااااااااالص ههههههههههه

و كمان الرز بالطماطم ياااااااه كان خطير بجد بس للاسف مش عارفة لحد الوقتى كانت بتعمله ازاى ، كل محاولاتى بعد كدا بائت بالفشل فى حاجة كدا كانت مميزه فيه بس مش عارفة هى ايه ؟؟!!!...

و طبعا مش هأحكى على كمية القصص اللى كانت بتتحكالى ، و قصة قبل النوم دى كانت شئ مقدس و حكايات سندريلا و الشاطر حسن و ذات الرداء الاحمر ، و ذات الرداء القشى ،و حكاية التلت بجعات ،و ... و... و.... كتييييييييييييييير جدااااااااا

بس بصراحة اكتر حاجة كنت باحبها منها كانت قصيدة صراع بين الملايكة و الشياطين و الانسان ... بس للأسف تلت أرباعها طار من الذاكرة ... كنت كاتباها بس للاسف بردوا ضاعت منى ..

هاكتب لكم اللى فاكراه منها و عادى جدا لما تلاقوا الارسال قطع فى النص ...

أولها كان الشيطان بيقول للانسان :

أيها الانسان دوما ... كن ظلوما للعباد

إن تركت الظلم يوما ... لم تنل منهم مراد

يقوم الملاك يقول :

أيها الانسان حاذر ... إن للناس إله

و الارسال قطع ...........

فى النص يعنى صراع بين وسوسة الشيطان و نصح الملاك

و بعدين الشيطان يستغيث :

يا شياطين الجبال ... يا عفاريت الظلام

ساعدونا فى القتال ... نحن نخشى الانهزام

<< طبعا فى الحتة دى كنت باضحك اوىىىىى .. أصلى كنت باتخيل الشيطان وهو لا حول له و لا قوة و عمال ينادى و صوته مقطوع و مش قادر ياعينى ... ههههههههههه

يقوم الملاك يقول :

ربى يارب البرية ... ليس للعبد سواك

فاهده فعلا و نية ... رب و ارزقه رضاك

ييجى الانسان فى الاخر بئا يقول القول الفصل :

أءقتل الناس و هم اخوانى ... و اظلم الناس وهم أعوانى << هى تقريبا كانت كدا

و كيف ألقى نعمة الأمان ... إن قابلوا العدوان بالعدوان

و بردوا الارسال يقطع

بس التكملة كانت دعاء بئا ان ربنا يثبته على الخير و يبعد عنه الشيطان

معلش عارفة انها بتبئا رخمة أوى قطع الارسال بس دا اللى فاكراه منها بئا

و طبعا يا ولاد كان فضل من ربنا ان تيتة كانت معايا معظم طفولتى بصراحة ، و دايما كانت تربط لى كل حاجة بربنا ، عشان ربنا يحبك ... لا كدا ربنا يزعل منك ، و كانت ماشاء الله عليها لازم ختمة للقرآن كل أسبوع ، و السنن الرواتب طبعا ...

دا غير خفة دمها اللى كانت محببة كل الناس فيها صراحة ، و بجد ماقبلتش حد عرفها إلا حبها جدا

بس طبعا مش قد حبى لها ... و كانت خاتمتها اللى ربنا يرزقها لنا جميعا فى العشر الاواخر من رمضان و قبل الفطار بحاجة بسيطة خالص ، فكرتنى بعثمان لما شاف فى الرؤية رسول الله و قال له ستفطر عندنا اليوم ، فهى أحسبها على خير و لا أزكيها على الله ، احسبها تمرح فى جنان الخلد ان شاء الله

و طبعا الفترة اللى فقدتها فيها كنت اصلا فى فترة امتحانات الاعدادى دا غير شوية ظروف كدا و خبوا عليا فترة بس قلبى كان حاسس ، و كل ما اسألهم عليها يقلولى بخير و كويسة ... بس بعد كدا لما عرفت ، عرفت ان احساسى كان صح ، طبعا كان حزنى عليها شديد ، و على طول بادعى لها ربنا يجازيها عنى كل خير ، و يغفر لها و يرحمها و يدخلها جنات و نهر فى مقعد صدق عند مليك مقتدر ... اللهم آمين

انتوا كمان ادعولها ... و لجميع موتى المسلمين

معلش طولت عليكوا بس انا لما بافتح بافتح بئا ... حظكوا

و اختم معاكوا بئا بكام فزورة من اللى كانت بتقولهالى ، طبعا كانت أغلب الفوازير لعب بالكلمات ولف و مش مباشرة و أنا عليا اعرف الحل

ياللا نبدأ و أول واحدة سهلة خالص طبعا هأكتبلكوا الكلمات زى ما بتتنطق و انتوا اعرفوا الحل ...

1- يا بنّا ابنى و بنىّ ابنى ، الواد دا أخويا و أنا بنت أخته ... فسروا

2- ما رأيك يا قاضى تُها ، فى امرأة تزوجتها ، هى أمى و أنا ولدتها ؟؟

3- جبنا جبنا بقعت جبنا !!!

4- طرقت الباب حتى كلمتنى فلما كلمتنى كلمتنى ...

قالت يا اسماعيل صبرا قلت يا اسماعيل صبرى

و طبعا هاستنى الاجابات فى التعليقات ، أوعوا تنسوا

ياللا سلااااااااااااااام

فلولا قرية آمنت

كيفكم يا جماعة أخباركم ايه؟؟؟ يارب تكونوا كلكم بخير ...

و خلاص رمضان خلص و العيد بعد أربع ايام كل سنة و انتوا طيبين ...

و طبعا للمستجدات العصرية قررنا نعمل فاصل اعلانى و نعود لقصة الخلق بعده ، و طبعا الفاصل الاعلانى هيكون عن ايييييييه؟؟؟ شطااااااار .. عن انفلونزا الخنازير ..

طبعا داء انفلونزا الخنازير الكلام عنه كتر جدا و الكل خايف منه ، طب نعمل ؟؟ و الوقاية منه ازاى ؟؟؟ ...

و أجهزة الاعلام شغالة ( و احنا على أهبة الاستعداد لمواجهة المرض الدخيل )<< تقولش احنا فى حرب عصابات ... ما علينا

و الدراسة أتأجلت أسبوع ، والله أعلم هتتأجل كمان و لا لا ... و كمان فى الكليات السكشن اللى هيظهر فيه عدوى ،السكشن كله هيتحجز اسبوعين ، و اسبوعين فى اسبوعين ...و الحمد لله ماعدتش علام يا ولاد ...

و احتمال نقعد فى بيوتنا بئا و نقفل علينا ... ان لزم الامر يعنى ، و مفيش أى مشاكل خالص ....

كل دا من فيرس؟؟؟.... حكمتك يارب ، يجعل سره فى اضعف خلقه

و طبعا للاسف مش واخدين بالنا من حاجة مهمة جدا جدا ، ألا وهى ان الفيرس دا ما كان ليظهر إلا بأمر الله ، و إنه جند من جنود الله زى ما أى حاجة فى حياتنا هى جند من جنود الله يصرفها كيف يشاء ...

محدش فكر إن دا بلاء بذنوبنا؟ محدش فكر إن الحل ممكن يكون بتوبة عن الذنوب و التقصير ،و الاستغفار؟ محدش فكر إن الفترة من ساعة ما بدئنا نسمع عن الفيرس لحد ما يبئا وسطنا فعلا دى فترة انذار و امهال من ربنا لينا ، ها .. هترجعوا و تتوبوا و لا اسلطه عليكوا؟؟

للأسف يا جماعة إحنا مش عارفين إن دى سنة إلهية ... و السنن الالهية دى علم كامل لوحده ممكن نبئا نتكلم عنه بعدين ، لكن اختصارا هو علم يختص بأفعال الله فى خلقه ، و دى أفعال ثابته بالنسبة للبشر ، و القرآن مليان بسنن الله فى خلقه لكن للاسف محدش بيتكلم عنها و لا بناخد بالنا منها ...

يقول الله تعالى :" و ما أصابكم من مصيبة فبما كسبت أيديكم " يعنى أى مصيبة أو بلاء فى حياتنا ، فدا مننا احنا و بسببنا احنا ، نشوف إحنا بنعمل ايه ، عشان ربنا يعاقبنا كدا ...

و سنن الله من صفاتها الثبات ... يعنى اللى هيعمل كذا هيتعاقب بكذا ، العقاب دا ثابت على مر القرون ، مش بيتغير ، و لا بيتحول ، يعنى مايكونش نازل لـ(س) يقوم رايح لـ (ص) ... لا ، هو عارف طريقه ...

و السنة اللى احنا فيها دى اللى قال عنها رسول الله صل الله عليه و سلم :" لم تظهر الفاحشة في قوم قط حتى يعلنوا بها إلا فشا فيهم الطاعون والأوجاع التي لم تكن مضت في أسلافهم الذين مضوا ".

و طبعا الحديث مش عاوز شرح ، و لا ضرب أمثلة ، و اللبيب بالاشارة يفهم ...

فبالتالى الامراض اللى ظهرت بصورة غريبة فى عصرنا هذا مش محض صدفة ، و لا عبث قدر ، و انما عن حكمة و تخطيط و علم من رب العالمين .. و بردوا بما كسبت أيدينا

و طبعا رفع البلاء لا يكون إلا بزوال المسبب ... يعنى من الآخر يا جماعة ، الحل ربنا قالهولنا فى قوله تعالى :" فلولا قرية آمنت فنفعها إيمانها إلا قوم يونس لما آمنوا كشفنا عنهم عذاب الخزى فى الحياة الدنيا و متعناهم إلى حين " ، و دى بردوا من ضمن سنن الله فى خلقه ، الايمان بالله و تطبيق شرعه بيحميك و يبعد عنك الشر ، و دى مش لقوم يونس بس ... دى لأى حد استحق عقاب الله بس لحق نفسه و رجع لربنا ، فحق على ربنا انه يتقبله و يرفع عنه العقاب دا ... و طبعا مش معنى كدا إننا ماندورش على علاج بئا و لا ناخد المصل – دا لما يتوفر ان شاء الله - و لا كدا... لالالالالا طبعا ، بالعكس طلب الدواء من ضمن التوكل على الله ...

بس نعرف ان السبب الاول و الاساسى هو بعدنا عن ربنا ، و اتجاهنا للدنيا بدون استشعار رقابة الله و لا تطبيق شرعه ، و ان الحل الاول و الاساسى هو الرجوع لربنا و المشى على طريقه ...

و أولا و أخيرا بردوا ... "قل لن يصيبنا إلا ما كتب الله لنا" ، و ان كل واحد الساعة و الدقيقة و اللحظة اللى مكتوب له فيها انتهاء عمره مكتوبة من قبل خلقه ، فليه الخوف و الهلع اللى احنا عايشين فيه ؟؟؟

ربنا يعافينا جميعا يارب و يكتب لنا السلامة ، بس مع البحث عن أسباب الوقاية ياريت نعرف ان دا كله بذنوبنا ، و النجاة ممكن تكون بتوبة و استغفار ...و كمان الدعاء – سلاح المؤمن- ماننساش الدعاء دايما ان ربنا يحفظنا و يبعد عنا كل مكروه

و أوصيكم بئا بـ " بسم الله الذى لا يضر مع اسمه شئ فى الأرض و لا فى السماء و هو السميع العليم " 3 مرات صباحا و مساء

و الاخلاص و المعوذتين 3 مرات و آية الكرسى بردوا صباحا و مساء ، و خواتيم سورة البقرة قبل النوم ..

و ربنا يعافينا جميعا .... و سلااااااااااام

وعد الله ... و وعد الشيطان (2)

كيفكم يا شباب ؟؟.. و أخبار رمضان معاكم ؟؟؟

إنا لله و إنا إليه راجعون ... خلاص الشهر بيودع

ربنا يااااااااااارب يتقبل منا جميع أعمالنا و يجعلها خالصة لوجهه ، و يوفقنا و يبارك لنا فيما بقى ... اللهم آمين

و سريع سريع نكمل مع بعض ان شاء الله الجزء التانى من وعد الله ... و وعد الشيطان ، و وقلنا ان الشيطان عمره ما كان صادق و انه بيغرر بينا عشان نعصى و بعدين يوم القيامة يتنصل مننا و يقولنا ان وعد ربنا هو الحق و انه ماكنش له علينا سلطان ، و قلنا ان هدى الله واصلنا كلنا ، و ان الاختيار بايدنا مش بمعجزة إذ فجأتن ..

و شفنا ان الاعراض عن امر من اوامر ربنا بيدخلنا فى دائرة الكفر ..اللى هو مش الكفر المخرج من الملة ، بس يكفى انه كفر يغضب ربنا علينا و ندخل بسببه النار ، ولو حتى مش خلود فيها ... ربنا يعافينا جميعا من عذاب النار ..

و طبعا اللى يسمع الكلام و يطبق الكتالوج – على رأى د.اسلام – دول سماهم ربنا مؤمنين ، واللى ربنا قال عنهم فى القرآن " و ما كان لمؤمن و لا مؤمنة إذا قضى الله و رسوله أمرا أن يكون لهم الخيرة من أمرهم " يعنى ربنا يقول اعملوا كذا .. يعملوا على طول ، ماتعملوش كذا ينتهوا فورا ... و دول بردوا اللى مفروض نكون منهم .. و طبعا اوامر ربنا فى القرآن و صفات المؤمنين دول مذكورة منها واحدة أو اتنين تقريبا فى كل سورة ، و اللى مايعملش او مايتصفش بالصفات دى غالبا مذكور بالظلم او الكفر .. و احيانا بيذكر بالنفاق ، ربنا يعافينا جميعا يارب ..

طيب ... مش هاستفيض حاليا فى ذكر صفات المؤمنين ، كل واحد يقعد مع نفسه يطلعها و يشوف فعلا بيعمل كدا و لا لا ...ماشى؟؟؟ عشان مانرجعش نقول ليه يارب ليه؟؟ ليه الظلم ليه؟؟؟... حاشا لله ان يكون ظالم ..

طيب الاول نشوف قول الله فى حقيقة هذه الدنيا ، يقول تعالى : " اعلموا أنما الحياة الدنيا لعب و لهو ( و اعتقد محدش فينا يقدر ينكر دا ، كلنا نفسنا نجرى و نلعب و حياتنا كلها لهو و محدش يقولنا نعمل حاجة ، و اللعب : اللى بيكون فى مرحلة الطفولة ، اما اللهو فكل تمتع بحلال لهو .. و اللهو مش عيب و لا حرام ، لكن ان كل حياتنا تبئا كدا بس ، طبعا حياة بلا معنى ، و اعتقد اتكلمت فى النقطة دى قبل كدا ) و زينة و تفاخر بينكم ( صح ... مين فينا مش نفسه فى كل زينة ، و اللى بيجيب حاجة جديدة بيبئا نفسه كل الناس تتكلم عن الحاجة دى ، ولو واحد متكبر شوية بيبئا فكره انه ملك الناس باللى عنده ..مش كدا و لا ايه؟؟ ) و تكاثر فى الاموال و الاولاد ( طبعا محدش هينكر انه بئا بيعمل اى حاجة بس عشان خاطر الفلوس ،و ماعندوش مانع يشتغل 24 ساعة مدام هيجيله فلوس ..مش كدا و لا ايه ؟؟، و اللى معاه قرش يساوى قرش و الكلام اللى كلنا حافظينه دا ، و طبعا الاولاد اللى لو ربنا اراد لشخص يتأخر شوية بيصرف كل الفلوس اللى بيجرى عليها دى عشان يجيله ولد ..مش كدا بردوا؟؟؟) كمثل غيث أعجب الكفار نباته ( تمام زى الفلاح اللى بيحط البذرة فى الارض و يستنى المطر لما ييجى يسقيها عشان يشوف نتيجة تعبه ... لكن النتيجة بتكون ايه؟؟؟) ثم يهيج فتراه مصفرا ثم يكون حطاما ( و دا طبعا يا جماعة للى بيجرى على الحاجات دى دون طاعة لربنا و عاوز الدنيا بس ... لأننا طبعا قلنا ان كل الحاجات دى لنا التمتع بيها فى الحلال ...المشكلة تكون لما نسعى ليها فى الحرام لإننا كدا بنغضب ربنا علينا فيكون الجزاء فى النهاية ...) و فى الآخرة عذاب شديد ( واخدين بالكم .. عشان الناس اللى بتعمل حرام و تقولك ان الله غفور رحيم .... لا ، هنا قدّم العذاب لأن ربنا عدل ، اللى هيعمل غلط أو حرام هيتعاقب ، و ان ماكنش فى الدنيا ففى الاخرة ) و مغفرة من الله و رضوان ( اللا ... ماهى المغفرة اهى و الرضوان !!!... ماحنا قلنا يا جماعة ان ربنا أمرنا بيهم فى الحلال ، فاللى هيسعى ليهم فى الحلال دا اللى ليه المغفرة و الرضوان ... بدليل انه قال بعدها ) و ما الحياة الدنيا إلا متاع الغرور ( يعنى اللى هيتغر بيها و يقولك ياعم اضمن اللى فى ايدى و لما نبئا نروح عند ربنا يبئا يحلها ألف حلال ... غلطان ، و غلطان جدا كمان ، لأنه خلاص الدنيا بالنسبة له هى المتعة و الاخرة دى مش فى حساباته )" الحديد <20>

طيب بعد كدا نشوف بئا وعد ربنا للمؤمنين دول على مر الحياة كاملة ...الحياة الدنيا و حياة البرزخ و الحياة الاخرة ، و طبعا مش هاقول تانى ان المؤمنين اللى ربنا ذكر صفاتهم و أفعالهم فى القرآن ، و لما نلاقينا مابنعملش حاجة من الافعال دى و لا متحلين بالصفات اللى ربنا قال عليها ، يبئا لا نلومن إلا أنفسنا ... مش كدا و لا ايه؟؟؟

تعالوا نشوف فى الحياة الدنيا ربنا وعد المؤمنين بإيه ، و دا تأكيد للآية اللى فاتت ... يقول تعالى : " قل من حرم زينة الله التى أخرج لعباده و الطيبات من الرزق ( تانى؟؟؟ ... الاية دى تانى؟؟ ... ايوا تانى و تالت ، عشان بس نعرف ان القرآن مش فيه تضاد ... و مش معنى ان ربنا قال ان الحياة الدنيا متاع الغرور انها محرمة على المؤمنين ، بالعكس المؤمنين اولى بيها لأنهم بيطيعوا ربنا ، و آدى وعد ربنا ليهم أهو ) قل هى للذين آمنوا فى الحياة الدنيا خالصة يوم القيامة ( و دا وعد من ربنا ،و طبعا لا يخلف الله وعده ... يعنى فعلا اللى هيؤمن هيتمتع مش ربنا هيضيق عليه و حياته دايما ابتلاءات بس زى ما الناس فاكرة ) " الاعراف<32>

و كمان إيه ... الحكاية مش بس اكل و شرب و متعة ، عشان الناس اللى بردوا بترتاح على كدا و تنام ، لا كمان " وعد الذين ءامنوا منكم و عملوا الصالحات ( واخدين بالكوا بردوا من عملوا الصالحات دى؟؟.. أصل فى ناس تقولك أهم حاجة القلب ، طالما القلب أبيض خلاص اعمل اللى انا عاوزه ... لا غلط ، العمل بيدل على قلبك فعلا ، بتعمل صالح يبئا قلبك فعلا صالح ، بيتعمل فاسد بيئا قلبك فاسد ) ليستخلفنهم فى الأرض كما استخلف الذين من قبلهم ( اه .. أصل كان من ضمن عملهم الصالح انهم بيسعوا انهم يكونوا الاوائل فى كل شئ ، أخدوا بالاسباب انهم يكونوا قادة رغم كل الظروف السيئة اللى حواليهم ، فربنا عمل ايه؟؟... حقق لهم وعده ، نوح عمل ايه ؟؟ بنى السفينة رغم انهم فى بيئة صحراوية ، فربنا عمل ايه؟؟؟ نجاهم من الطوفان .. لوط سار بأهله من اول الليل و مبصش وراه ..فربنا عمل ايه؟؟؟ نجاه من مطر السوء ...و هكذا ، أنت عليك تؤمن بربنا ، تعمل اللى قالك عليه ، هو هينفذ وعده ليك ) و ليمكنن لهم دينهم الذى ارتضى لهم ( ايوا هيمكن ليهم و بإديهم ، مش هيستبدلهم ) و ليبدلنهم من بعد خوفهم أمنا ( ناس بئت قادة الارض ، هتخاف من حد؟؟ هيخافوا من مين و خلاص بئوا هما المتحكمين فى كل شئ ... بسسسسسسسسس اييييييييه؟؟ ) يعبدوننى لا يشركون بى شيئا ( أيوا يعنى ماينسوش نفسهم و ينساقوا مع الدنيا و يبعدوا عن ربنا ... لالالا دايما فاكرينه و يعبدوه وحده لا شريك له ، انما اللى هينسى ) و من كفر بعد ذلك فاؤلئك هم الفاسقون ( و طبعا عقابهم معروف مش محتاج تفاصيل ) " النور <55>

" إنا لننصر رسلنا و الذين ءامنوا فى الحياة الدنيا ( وعد من ربنا اهو ... و للذين ءامنوا فى اى زمان و مكان ، و مش فى الدنيا بس ) و يوم يقوم الأشهاد ( أيوا على رؤوس الخلائق كمان يوم القيامة )" غافر <52>

طيب الشيطان بئا بيوعدنا ايه؟؟؟.... يقول تعالى : " الشيطان يعدكم الفقر و يأمركم بالفحشاء ( و الفقر مش اللى هو نقص الفلوس بس ، لا الفقر فقر مادى و معنوى ... بلاش تتصدق او تزكى ، ليه؟؟؟... اصل الفلوس تخلص ، و بعدين هتجيب منين ؟؟ و اللى يعوزه البيت يحرم على الجامع و الكلام الغريب اللى كلنا بنتحجج بيه دا .... بلاش تروح الجامع ، ليه؟؟ أصل كل اللى بيروحوا الجوامع ارهابيين و متعصبين و أمن الدولة بيخدوهم تحرى ... يا سلاااااام .... اوعى تبئا طيب و تقابل الاساءة باحسان ، ليه؟؟ اصل هيقولوا عليك اهبل و عبيط و بعد كدا هيعاملوك دايما وحش لأنهم عارفين انك ساذج ...مممم ، نظرية بردوا ....و غيره و غيره و غيره ، طب نشوف على النقيض ) و الله يعدكم مغفرة منه و فضلا ( أصلك لما بتعمل حاجة بتعملها لله ، فأكيد ربنا هيغفر لك لو غلطت فى شئ ، لا و كمان هيعطيك من فضله ، يعنى مش هتعمل الخير و ترميه فى البحر ، بجد هتلاقى المقابل لعملك دا من ربنا ، و كمان بزيادة لانه هيعاملك بفضله مش بعدله ، و شوف ختم الاية بإيه؟؟) والله واسع عليم ( واااااااااااسع ، و الملك كله بإيده ، هيعطيك و لا يقلل ذلك من ملكه شئ ، و عليم .. عليم انك فعلا عملت كدا ليه ن فيجازيك بيه ، و عليم ان فلان دا قابل الاحسان بالاساءة فيعاقبه عليها ، عليم انك بتجاهد رغم كل شئ غلط حواليك فيساندك و يساعدك )" البقرة <>

و يحذرنا ربنا " إنما ذلكم الشيطان يخوف أولياءه ( أولياءه ،ها؟؟ واخدين بالكم ... اللى سمحوله انه يكون له سلطان عليهم ) فلا تخافوهم و خافون ( يعنى اللى يخوفك من عمل الخير و الطاعة سواء من الشيطان او من اولياؤه من الانس ... ماتسمعوش كلامهم و لا تخافوا ... أنا معاكم ، و افتكروا انكم لو سمعتوا كلامهم كدا هأغضب عليكم فخافوا غضبى ...اللى هو طبعا أشد من ألف وسوسة ، أصلا الوسوسة دى و لا شئ جنب غضب ربنا ) إن كنتم مؤمنين ( مؤمنين ... لو مؤمنين فعلا مش هتخافوا إلا منى ، و محدش هيقف فى طريقكم ) " آل عمران <175>

و يرجع ربنا يفكرنا تانى " يا ايها الناس إن وعد الله حق ( ربنا مابيخلفش وعده ، و مدام قال هيوفى ) فلا تغرنكم الحياة الدنيا ( أوعوا تمشوا فى غلط و لا تعملوا حاجة حرام عشان هدف عاوزينه ) و لا يغرنكم بالله الغرور ( و لا الشيطان يضحك عليكم ، اه أصل هو اللى بيغريكم بالدنيا عشان كدا هو غَرور)* إن الشيطان لكم عدو فاتخذوه عدوا ( و دى طبعا حقيقة محدش ينكرها ) إنما يدعو حزبه ليكونوا من أصحاب السعير ( آدى كلمة ربنا فاللى هيتبعوه ... حزب الشيطان ، اللى هيسمعوا كلامه ، دول أصحاب السعير) " فاطر <5-6>

طبعا القرآن مليان وعود من ربنا للمؤمنين ، و تحذير من الشيطان و توضيح لوعوده الكاذبة ، و دا بئا الواجب بتاعكوا ... تطلعوا انتوا بئا بئيت الوعود و نحاول تكون حافز لينا عشان بجد نمشى على طريق الطاعة ... ربنا يهدينا جميعا الى صراطه المستقيم و يسددنا لطاعته و يثبتنا عليها ... اللهم آمين

و المرة الجاية إن شاء الله نشوف وعد ربنا فى حياة البرزخ و يوم القيامة ... دعواتكم

سلاااااااااااااااام