لا بجد الحمد لله من يومين جت الشاشة ، و خلاص الحمد لله نزلت الويندز رغم ان فى شوية مشاكل و الصوت مش راضى يشتغل مش عارفة ليه ؟؟!!... بس قلت بردوا لازم أدخل بئا و أهنيكم كلكم بحلول الشهر العظيم ، و ... ماقولتوليش صحيح إيه رأيكم فى النيو لوك؟؟؟ الحياة مع دخلة رمضان بئا لونها بمبى اهى ، بس عشان الدنيا حر قررنا التنازل عن بئيت مقاطع الاغنية : )
هو صحيح أنا لسه مجددة الدهانات و العفش من مدة صغيرة ، بس لأن التغيير كان غير واضح ، قلت لازمن و لابدن إنه يوضح كمان رمضان مش اى حاجة يعنى ، و بعديه العيد .. و مش ناقصة وجع دماغ تانى فى الترتيب و الترويق ، هى مرة واحدة و أخلص ... ماعدنيش وقت صراحة << ناس مهمة ... ; )
بجد وحشتونى جدا و كنت حاسة كدا لما الشاشة جت الحمد لله و دخلت نت احساس اللى كان غايب عن اهله و رجع ، اه والله العظيم .. ياااااااااارب مش نتفرق ابدا ، و تكون معرفة خالصة لله .
و قلت بئا ألكلك معاكوا حبة قبل دخول رمضان يعنى انتوا عارفين الواحد مش ناقص ذنوب فى رمضان ... : ) ،رأى شخص ما كان بيقول : أنا قلت اسرقه قبل رمضان ، اصل السرقة فى رمضان حرام << قال يعنى فى غيره حلال .... ماعلينا .
أحكيلكم بئا ايه و لا ايه .... أصل الاسبوعين اللى فاتوا دول كانوا حكااااااية ، بجد ...
صحيح الأول ، بالنسبة للبوست قبل اللى فات ، أستاذى العزيز / قيس بن الملوح قاللى انهم بيقولوا ان الاحتفال بالنصف من شعبان بدعة .. رغم انى مش عارفة هما انهى فيهم بالظبط بس هو اه .. الاحتفال بالنصف من الشعبان لانه النصف من شعبان بدعة .. لم يرد ان رسول الله و لا احد من التابعين احتفل بها ، و سأل أخى الفاضل / فارس عن ان كان فى حديث بالتواتر فى صيام ليلة النصف من شعبان و الحقيقى ان ما بلغنى فى فضل هذه الليلة أنها ليلة ترفع فيها اعمال السنة الى الله ، فمن كانت خاتمة سنته حسنة و بدايتها حسنة غفر الله له ما بينهما ، و أنا لما قلت نصوم اليوم أو نصلى ركعتين أو نقرأ شئ من القرآن ، فماكنش قصدى أبدا اننا نعمل كدا لانها ليلة النصف من شعبان ، لكن قلت لأنها ليلة ترفع فيها الاعمال ، فأكيد نحب ان ساعة مانيجى نقدم تقرير لرئيسنا فى الشغل مثلا انه يشوفنا بنشتغل و التقرير اول صفحات فيه جد و اجتهاد يقلب الصفحات يوصل للاخر يلاقى جد و اجتهاد ..فيتبسط منك ،
و لله المثل الاعلى ، رغم انه لا تأخذه سنة و لا نوم ، و رغم ذلك لما يشوفك على طاعة يفرح بيك و يغفر لك ما كان منك ... ربنا يغفر لنا جميعا و يعفو عنا يااااااااارب
و كمان كان رسول الله صلى الله عليه و سلم عندما يُسأل عن صيام الاثنين و الخميس يقول هى ايام ترفع فيها الاعمال فأحب أن يرفع عملى و أنا صائم .. فلهذا يحبب صيام هذه اللية و خاصة أنها ترفع فيها أعمال سنة كاملة ..
أتمنى تكون وجهة نظرى وضحت ليكم !!!
مممممممممممممم .. ياللا نبتدى رغى بئا؟؟ نرغى ؟؟
طب نبتدى من الاول و نقول بسم الله الرحمن الرحيم .. << هى القعدة لسه هتطول؟؟؟
لالالالا ، أنا مش عاوزة زهق من أولها ، اللى نفسه فى كيس لب ، كيس سودانى ، مكسرات .. عصاير ، تقعد كدا و تستربع مش عاوزين تكتيفه ، اه عشان تسمعوا من الاول للآخر ... استعنا عـ الشقى بالله ..
الاول الاسبوع اللى فات دا كان صعب عليا بجد ، لأن زى ما قلت لكم قبل كدا ان الصيدلية مش فيها غير اتنين صيادلة بس و ماسكين التلت فروع بتاعتها فطبعا ضغط جامد عليهم و ماصدقوا صيادلة جداد يروحوا علشان يستريحوا شوية ، و الاتنين دول اصلا من الدفعة اللى قبلنا على طول فدا شئ كويس جدا لأننا مش حاسين بفرق خالص مابينا ..
المهم ان مافيش اسبوع من الاستلام لقيت واحدة فيهم بتقولى ايه ، طبعا أنا بئالى سنة ماشفتش اجازات ، و الحمد لله انكوا جيتوا ، هآخد بئا أسبوع اجازة و انتى تشيلى مكانى لحد ما أرجع ... أنا واثقة فيكى ، و مطمنة والله و انتى قدها و قدود و قعدت تنفخ فيا لحد ما الفاس وقعت فى الراس و مضيت القائم باعمالها لحد ما ترجع .. و عينكم ماتشوف الا النور ، قضيت اسبوع ما يعلم بيه إلا ربنا ...
بجد تعبت جدا ، و مش حكاية المسئولية اللى كانت تعبانى اد احساسى انها حاجة واحدة تانية و هى أمانة فى رقبتى ، المهم .. طبعا كنت اقعد افقط التذاكر << ايوا هى اسمها تفقيط .. و اقوم اصرفها ،و اراجع الدفاتر و المنصرف اليومى و التسجيل فى الشهرى و افلام ..ماكنتش باحس فعلا الا و احنا مروحين
بس أكتر الايام فعلا اللى بتكون زحمة هو يوم الاربع ، دا مش بنعرف نبص حوالينا اصلا ، فعلا اليوم دا كان نااااااااار ، أنا ماحستش أصلا إلا و أنا بأقول للممرضة انزلى بعد نص ساعة أكون صرفت بأبص فى الساعة لقيتها 3:30 ...ياربىىىىىىىىىى ، نص ساعة مين ؟؟؟.... خليكى واقفة و دخلت أصرف كنت يادوب لسه مخلصة العيادة و بادئة فى القسم الداخلى ، طبعا كان لسه قدامى و لا ييجى 50 تذكرة ، و إذ فجأتن لقيت الصيدلية كلها داخلة تصرف معايا .. اه و ربنا << ماهما عاوزين يروحوا بردوا مش هيقعدوا يستنوا حضرتى .. : )
و دى تراجع و دى تصرف و انا اصرف و لو فى تفقيط يتفقط ، و كانت هيييييييييييييصة ، و الدكاترة يا ولاد ، و دى غلط الدكتور يصلحها و يمضى جنبها ، و دى اعمليها لاغى و امضى جنبها ، و ها .. قولى اللى موجود فى التذكرة و انا أجيبهولك عقبال ما تفقطى .. ههههههههههه بجد كان يوم عصييييييييب ، بس افتكره و اضضضضضضضحك ،
طبعا انا فضلت بأعيط لحد يوم السبت ، لأن طبعا حصلت فيه لخبطة جامدة و تذاكر اتصرفت مرتين و حاجات ماتصرفتش و عملت جرد يوم الخميس و لقيت الدنيا باظت رغم انى كنت جرداها الاربع الصبح قبل اللخبطة دى كانت الدنيا تمام ، فطيعا قضيت الخميس و الجمعة نفسيتى سيئة جدا و ماليش نفس أكلم حد ، و كوابيس بئا مش عاوزة أقولكم ، و قررت انى خلاص مش هاقدر اعمل حاجة الا لما صاحبة الحاجة تيجى و تشوف هنعمل ايه ...
بس الحمد لله ليلة السبت بئا حلمت ان التذاكر المصروفة مرتين رجعت و اننا ظبطنا الحاجة و كله بئا تمام ، و فعلا الحمد لله يوم السبت رجعنا الحاجات الزيادة و الدنيا اتظبطت و بئت تمام و تنفست الصعداء ... أخيييييييييييييييرا أخليت ذمتى هههههههههه .. بس كان أسبوع ، أحلف بيه والله
المهم بئا كمان انى رحت اتفسحت قضيت نهار فى دمياط و الليل على البحر فى بورسعيد ..بجد كان يوم راااااااائع ماعكروش غير احساسى بالذنب .. و طبعا رجعت أخدت دور برد أروع ، لسه يادوب النهاردة بادئة أفوق منه ... خير الحمد لله ..
انتوا مابترضوش ليه؟؟؟ ها؟؟؟ ... يا جماعة؟؟؟ يا شباب؟؟؟ يا قوم؟؟؟
ماعلينا ... هأكمل رغى بردوا ، عاوزة أقولكم كمان انى الحمد لله والله رغم كدا باحب المكان و الناس اللى فيه ، رغم ان كل مكان فيه الحلو و الوحش ، بس الحمد لله حاسة إنى مستريحة ، خاصة المديرة بتاعتنا ، بجد مديرة رااائعة و أنا بحمد ربنا الحمد لله ان ليا مديرة زيها ... انسانة بجد ، و بتراعى كل واحد ، و مش بتحب ترسم نفسها ، بالعكس عادى يعنى تحس انها اختك الكبيرة ، و تنصحنا و تدينا من خبراتها و مش بتمنع عننا حاجة ، طبعا كل فترة تطمن علينا احنا الجداد و تحاول انها تحمسنا و تعينا على صعوبة الشغل لأنها عارفة اد ايه هو صعب ، بس الحمد لله لما بتكون مع ناس مستريح لها و حاببها دا بيهون عليك كتير ، و قعدت معانا فى يوم و قعدت تنصحنا و تنبهنا و أنا بصراحة من كلامها كنت هأعيط بس الحمد لله مسكت نفسى ، كنت هأتفضح قدام زمايلى ... ماعلينا ، هأحاول أقولكم شوية من الكلام اللى قالتهولنا -على وجه التقريب- :" طبعا أنا عارفة ان الشغل كله ورق و دفاتر و انكم ماخدتوش كدا فى الكلية ، بس بئا مانكابرش و نقول أصلنا ماخدناش دا فى الكلية ، انت مش بتتعلم فى الكلية عشان تقول اخدت و ماخدتش ،لا أنت بتتعلم عشان لما تتخرج و تمسك شغل زى دا تكون اد المسئولية ، و بعدين كلنا بنتعلم من بعضنا ، و اللى ميعرفش يسأل مش عيب ، أنا اهو لما حد يسألنى سؤال أحب الاول أسأل حد يأكد لى المعلومة أو لو مش عارفاها يعرفهانى ، و عادى مش عيب ، لا الولد يقول لا ماتعلمش من بنت ، و لا بنت تقول لا ماتعلمش من ولد ، كلنا بنتعلم من بعض و مفيش حد كامل ، و بالنسبة للتعامل مع المرضى أوعوا أوعوا أوعوا اسمع ان صيدلى زعق مع مريض و لا مريض اشتكى منه ، اوعوا يا ولاد .. دى ناس تعبانة ، عارفين يعنى ايه تعبانين ؟؟ دا الواحد لما بياخد دور برد بيبئا مش طايق اللى قدامه و اوعوا محدش يكلمنى أنا تعبان ، و يا ماما هاتيلى و يا ماما سويلى ، و انت نايم فى السرير ملك .. دى ناس يعنى عافانا الله ربنا ابتلاها بمرض مجرد اسمه بنخاف منه ، فيعنى الناس دى بتكون مش متحملة و بتكون جاية أصلا هى عاوزة تتشاكل ، مش نقمة عليك كشخص لكن من اللى بيها ، و كمان الدكتور يزعقله و يتحكم فيه و الممرضة تشخط فيه ، فيعنى مانكونش احنا و الزمن عليه ... أعوذ بالله هو مش الزمن ، يعنى هو امتحان ، بس يعنى مانزودتش الامتحان عليه ... هو عاوز حد يطبطب عليه و معلش يا حاج ، و ان شاء الله ربنا يخفف عنك ، و ان شاء الله ربنا هيكرمك ، انت مهمتك انسانية اكثر منها طبية ... و بالنسبة للممرضات أوعى اسمع ان حد شد مع الممرضات ، حتى و ان هما بدؤوا او قالوا كلام مايصحش ، تقولولهم لو سمحت كفاية كدا ، و دا مش مكان يتقال فيه الالفاظ دى و تنهوا الموضوع ، مش بئا انتى مش عارفة انتى بتكلمى مين ، و أنا دكتورة ماتكلمنيش بالطريقة دى ...لالالالا ، احنا ناس محترمين بتعامل باحترام "
و نكتفى بهذا القدر من المحاضرة و نتوقف مع فاصل اعلانى قصير و نعود لمواصلة الحوار ، قصدىىىىىىىىىىى الرغى ... : )
طبعا انا قلت كفاية عليكوا كدا عشان مانعيطش مع بعض ، يعنى كفاية الدنيا حر و الواحد مش مستحمل ...
فى حاجة تانية أحب أرغى فيها؟؟؟؟ امممممم ..... امممممممممم
دمتم جميعا فى رعاية الله ، و كل سنة و انتوا طيبين مرة تانية ، أروح أسلم عليكوا فى مدوناتكم بئا
سلااااااااااااااااامٍ
Aug 14, 2009
السلام عليكم و رحمة الله و بركاته
كيفكم يا شباب ؟؟ يارب تكونوا كلكم بخير و بصحة و سلامة
و كل عام و انتم إلى الله أقرب و على طاعته أدوم ... و رمضان كريم للجميع
النهاردة ان شاء الله هاكمل معاكوا بقية الموضوع اللى فات و نشوف النص التانى عشان نكون ألمينا بالموضوع كله ، و الله المستعان ...
طبعا إحنا قلنا إن زينة الحياة الدنيا من مأكل و مشرب و ملبس و غيره و غيره هو أمر مكفول شرعا ، و مفيش حد يقدر يقولنا حرام طالما احنا بنعمل حاجة حلال مش حرام .
لكن فى نقطة مهمة جدا جدا جدا ، هل معنى كدا إنى أعيش طول حياتى بئا آكل و أشرب و البس طالما إنى مش باعمل حاجة حرام؟؟ << باعمل حلال ... ها ، واخدين بالكم ؟؟ أصل فى ناس بتعمل حرام و تقولك مش هو من متع الدنيا ؟؟... بنقول حلااااااال ....ماشى؟؟
طب تعالوا نشوف هو ربنا أصلا خلقنا ليه ؟؟
ماحنا قلنا " و ما خلقت الجن و الانس إلا ليعبدون " ، بس إحنا قلنا ان التمتع بمتع الدنيا بردوا ربنا مانهاش عنه ... يبئا الحل ايه؟؟؟
الحل إننا نحول المتع دى لعبادات ... : )
إزاى يعنى ؟؟؟؟
الحل بسيط جدا ، وهو انك تنوى نية لله و أنت بتاكل و انت بتشرب و غيره ... و بكدا تبئا بتاكل و عمال تاخد حسنات و تشرب و عمال تاخد حسنات ...
و بالمثال حتى يتضح المقال ، هأنقل لكم جزء من رد أخى الفاضلsakayar تعليقا منه على أحد الموضوعات ، قال ايه ؟؟
" أولاً : نفتكر قول ربنا (وما خلقت الجن والانس إلا ليعبدون) يبقى نخلينا أي حاجة بنعملها نعملها بنية التعبد لربنا ... حتى المذاكرة حتى النوم حتى الأكل ...
بذاكر علشان أكون مسلم نافع لاسلامي ، ءأدي شكر نعمة ربنا عليا إنه أنعم عليا بالحياة باكل علشان أقوى على الحياة وشئونها اللي هي أصلاً كلها خالصة لربنا (قل إن صلاتي ونسكي ومحياي ومماتي لله رب العالمين) بنام علشان أعطي جسمي بعض الراحة (إن لنفسك عليك حقاً) فأقوم أقوى وأنشط . ثانياً : لو عرفنا إن حياتنا كلها ملك لربنا ... وإننا هنعمل كل حاجة لربنا ... حتى ركوب السيارة المرسيدس والبي إم ... تخيلي حتى البي إم لربنا؟؟ آه والله ع الأقل مش هركب ف تاكسي ممكن يطلع سواق مش تمام ... أو أركب في ميكروباص وأزاحم الرجالة والستات وده يخبطني ودي تلمسني وكده ومش هركب عربية أي كلام تقف مني ف الطريق وتخليني أغضب ...
لأ هركب عربية مكيفة كمان علشان وانا راكبها احس بالراحة واقعد اذكر ربنا واشكر نعمته كمان إيه رأيك ف الدين بالطريقة دي؟؟ متهيألي لا ينافي الدين إني أكون ملتزم وشاكر لنعمة ربنا الآية كانت بتقول لقارون (ولا تنس نصيبك من الدنيا) لكن للأسف هو نسي نصيبه من الآخرة وانشغل بالدنيا بس "
تمام جدا الكلام دا ، و على هذا النظام قيسوا بئا ... و على فكرة موضوع النية دا كمان بيخليك ماتعملش حاجة غلط أو حرام ، بمعنى ... واحد مثلا بيعاكس البنات ، ياترى هينوى ايه؟؟؟ .... يارب أنت أمرتنى بغض البصر بس أنا ناوى اعاكس البنت دى طاعة ليك؟؟ أصل يمكن لما أعاكسها تحس على دمها و ماتلبسش ضيق و لا تحط مكياج؟؟؟ << يا سلااااااااااااااااام ...
و البنت اللى مش محجبة ... يارب انت أمرتنى بالحجاب ، بس بصراحة أنا مش مقتنعة بيه ، فمش عاوزة ألبسه إلا لما أقتنع عشان ماخلعوش تانى ؟؟؟ و كمان يارب أصل بصراحة الحجاب شكله وحش و بيوقع شعرى؟؟ << لا والله !!...
واحد مثلا اتخانق معاك و لا شتمك ... يارب انت أمرتنى بالاعراض عن الجاهلين ، و إن إذا خاطبهم الجاهلون قالوا سلاما ، بس أسكت عن حقى يعنى؟؟ لا طبعا أرد << نظرية بردوا ...
و بكدا يا جماعة هتلاقوا والله حاجات كتير فى حياتكوا اتغيرت ، و بجد والله هتلاقيك بتعمل كل حلال و طيب بنفس راضية كدا و سعيد من جواك ، لأنك هتستشعر رضا ربنا عن العمل اللى بتعمله .
لكن نقطة مهمة جدا جدا جدا بردوا ، و هى ان الدين مش تمتع بالحلال بس و محدش له عندى حاجة ، لا ...
زى مانت عاوز تتمتع بنعم ربنا عليك ، يبئا لازم تؤدى شكرها بردوا ، يعنى ما ينفعش واحد مابيصليش ، و لا يعرف اى حاجة فى باب الطاعات و العبادات ... و يقولك هو أنا باعمل حاجة حرام؟؟
لا أنت مابتعملش حاجة حرام ، بس انت كدا بتاخد من الدين اللى يعجبك و ماتخادش اللى مش يعجبك ، هو الدين كله على بعضه .. ياتاخده كله ، يا تسيبه كله ، مش آخد الجرى و التنطيط ، و أسيب الاركان و العبادات .. لا مينفعش
و مش معنى ان ربنا أكرمك و فتح عليك من خير الدنيا و أنت مش بتطيعه انه كدا راضى عنك ، لا ... تعالوا نشوف ربنا قال ايه لما جه يخاطب الناس كلها ، و لما جه يخاطب الفئة المؤمنة بس ..
قال تعالى – مخاطبا الناس كافة –" يا ايها الناس كلوا مما فى الأرض حلالا طيبا و لا تتبعوا خطوات الشيطان إنه لكم عدو مبين "
ايه دا؟؟؟ يعنى ممكن الواحد يكون مش مسلم و عادى يعنى ربنا فاتح عليه؟؟
اه ، بالعكس دا ربنا أمر الناس كلها بالتمتع بمتاع الحياة الدنيا بردوا ... بسسسسسسسسسس من غير ما يعملوا الحرام بردوا ، لأنهم كدا يبئوا ماشيين ورا الشيطان ، و تخيلوا واحد ماشى ورا عدوه ، تتخيلوا ان ممكن يوصله لبر الامان؟؟؟
طب تعالوا بئا ننتقل لخطاب المؤمنين بعدها :" يا أيها الذين آمنوا كلوا من طيبات ما رزقناكم و اشكروا لله إن كنتم إياه تعبدون "
أول شئ (من طيبات ما رزقناكم) ... ايوا أصلنا عارفين ان اللى بيرزق هو ربنا ، انما غيرنا ممكن يكون فاكر انه عشان بيشتغل و بياخد مرتب بيشترى بيه اللى هو عاوزه ان هو اللى بيرزق نفسه ، و مع ذلك ربنا امره بالتمتع ...
احنا بردوا هنتمتع بس مع فارق بينا و بين غيرنا ، إننا هنشكر لربنا ، لأننا عارفين ان هو اللى رزقنا
( إن كنتم اياه تعبدون ) أصل يا جماعة استحالة واحد يكون ما بيصليش و لا يعرف طريق ربنا – مسلم صحيح لكن بالاسم- و يشكر ربنا على نعمة ينعمها عليه و ينوى فيها نية لله ... حاجة اصلا العقل مايقبلهاش ، كان الاولى انه يؤدى الفروض اللى عليه طالما مستشعر نعمة ربنا كدا .
و بكدا اعتقد ان شقى المعادلة اكتملوا ، و يارب تكون واضحة للجميع ... و بالشفا إن شاء الله : )
ممممممممممممم ... بصوا يا جماعة ، مش عارفة نظام رمضان معاكوا ايه ؟؟ اصلى بافكر شهر رمضان مش بيكون حد فاضى للنت و كدا ... فآخده أجازة من غير بوستات << احم احم ... بجملة الاجازة اللى أنا واخداها يعنى
فإيه رأيكم ؟؟
...............................................
أستاذى الفاضل بيرم المصرى حقيقى بجد محرجة من حضرتك و سؤالك الدائم و معلش مش عارفة أرد على حضرتك بس أنا بخير الحمد لله
وبالنسبة لاستاذى الفاضل ( قيس بن الملوح) و أخى الفاضل ( فارس) فإن شاء الله هأرد عليكم قريب
