الحــــــــــــــــــــب فى الله

لقد قالوا و قد صدقوا زمانا ... بأن جنان دنيانا التلاقى

و لكنا و إن طالت خطانا ... فهمس الحب فى الرحمن باقى

نسافر فى أمانينا و نغدوا ... و فى أحداقنا حب الرفاقِ

تمازجت القلوب على ودادٍ ... بلا زيف خفىٍ أو نفاقِ

Mar 1, 2009

تعليقا على التااااااااااااج



بداية يا جماعة أحب أشكر كل اللى شاركنى بوجهة نظره فى مناقشة البوست اللى فات ،

بأشكر د.خالد أمين .. دايما منور ، و حروف .. اللى كل مرة تقولى هأقرا و أرجع و مش بترجع تانى : )، و سويت (ضد سابقا و أحتمال يبئا لاحقا كمان ) ، ا.أحمد (أسماء و أحلام فى وجدانى ) ، أستاذى العزيز بيرم المصرى ، حضرة جناب المدير عادل << مظبطاك أهو ، فيلسوفى العزيز الواقف على خط النار / فشكول ..هههههههه ، د.عمرو (بلو ويف ) ، سلمى عماد .. معلش سامحينى على التأخير ، و البت المشمشية .. الحلوة بس شقية، و ا.عمرو (اللؤلؤة) ..بردوا يسامحنى على التأخير ، أيوشة ،و غربتى ، وعاشقة الرومانسية .. أحلى بنات ، و كيتى أم مثاثة ، و ريمى اللى وحشانى ، و محاسن سنسن اللى ماقدرش أخالفها أبدا ..موافقون طبعا يافندم ...هههههههههههه ، و طبعا الاخ الفاضل / فارس عبد الفتاح ..معلش أنا اللى مقصرة معاك و يارب تكون دلوقتى نفسيتك كويسة ، و عود حميد .


طبعا بأشكر كل الناس اللى شرحت وجهة نظرها ،و أنا شايفة ان كل واحد عنده حق فى كل وجهة نظر قالها ، بس أنا بصراحة ماقدرش أبنى رأيى و لا أقول حاجة إلا بعد بحث و تمحيص على رأى عمو فشكول ،عشان نحط النقط على الحروف ...و دا اللى كنت باعمله اليومين اللى فاتوا فسامحونى على التأخير .. و بردوا هأقول ان محاولتى دى ،مجرد محاولة ..و ياريت اللى عنده إضافة يقولها .. و بردوا انتوا اللى ليكو الفضل فى البوست دا عشان خلتونى أدور و أبحث ..


طيب أولا بس ..اللى داخل المدونة لأول مرة ياريت يقرأ البوست اللى فات و التعليقات عشان يعرف إحنا بنتكلم عن إيه ،

و ثانيا أنا هأقول شوية حاجات كدا بناء التعليقات اللى جت ،و بعدين أقولكم نتايج البحث ،و استحملوا معلش البوست طويل شوية ...


أولا هأقول اللى فهمته من كلام البعض ... إن التاج وسيلة للاستقصاء ، و معرفة الحال العام .. مش حكاية تجسس على الشخص نفسه ، أد ماهو معرفة الوضع العام للبلد أو تفكير الناس ..و دا يتطلب مننا معرفة الاسس العلمية اللى على اساسها بتتاخد الاستبيانات ..

ثانيا إن التاج فعلا وسيلة للتعرف على الشخص نفسه .. و بكدا فالأولى دراسة مدونته كاملة ..لأن فعلا زى ما البعض قال إن التاج ناس كتير بتاخده فكاهة ،و بتجاوب عليه هزار ..و مش شرط حتى اللى كاتب كلام جد إنه صدق ..ماممكن بيكون بيتجمل ..


مثلا مثلا يعنى واحد فعلا جاوب فى التاج أحب الله و رسوله .. و تلاقى المدونة كلها عن البنات و مشى مع مين النهاردة ،و مين اللى ضحكت عليه ، و أحدث الاغانى اللى نازلة فى السوق .. و حفلة مين النهاردة .. يبئا دا فعلا عارف يعنى ايه بأحب الله و رسوله ..دا بيتهيألى ان لو فعلا حد بيتجسس عليه هيفطس على نفسه من الضحك .


طيب تعالو نقول حتى لو التاجات وسيلة تجسس ، فأنا مع الرأى القائل إن زمان لما كانوا بيبعتوا جواسيس أيام الاندلس و شافوا فعلا إن الشباب كان همه حفظ كتاب الله و المحافظة على الدين و الوطن ..كانوا بيرجعوا يقولوا للقيادة بتاعتهم ، لسه مش هتعرفوا تغزوا المسلمين الوقتى ، طب لما فات الوقت ،و رجعوا يشوفوهم تانى ، و لقوا هم الشباب هو : البنت اللى بحبها سابتنى ،و الكلام دا ..رجعوا قالوا للقيادة بتاعتهم .. الآن يمكنكم غزو المسلمين ، و بالفعل سقطت الاندلس ..

يبئا ليه أنا بئا ، ماجاوبش فعلا و أخليهم ياخدوا فكرة إننا لسه على ديننا ،و إن محدش هيقدر علينا ؟؟.. ليه دايما سلبيين و خوفنا بيخلينا نبعد عن أى شئ ،لأننا مش شايفين غير عيوبه .. فعلا أنا أكتشفت بعد ما خلصت الكلية إن كان ممكن أعمل حاجات كتير جدا و أنا فى الكلية بس كنت دايما شايفة نماذج اليأس و الاحباط و خايفة أجرب لأفشل .. لكن الوقتى بأتمنى لو كنت جربت فعلا ، مش يمكن كنت نجحت ؟؟!!..


التاج فعلا وسيلة قربت بين كتير منا ، و عرفتنا أكتر ببعض ، و مش أقدر أقول أو احكم انها مش وسيلة تجسس و لكن أعجبتنى جملة لأحد الاخوة المدونين قال لى : " أن التجسس موجود ولا يمكن لأحد أن يمنعه مهما كان قدره ، ولكن العبرة والعظة في حال الشباب أنفسهم "

و كمان رأى أخ آخر " ولكن رداً على اسئلتك عن الفيس بك والمدونات وغيرها من المواقع النقاشية فليس الاعتزال حل انما الحل في التثقيف الصحيح والواعي لما يحيط بنا وبمجتمعاتنا من جميع الاتجاهات ، فالوعي الصحيح الذي يصب في مصلحة الامة العربية والاسلامية ومرجعياتها القومية والدينية هو الحل وبعد ذلك فليكن ما يكون "

بافتراض ان التاجات اتجاوبت صح ، و فعلا الامر يتعلق بموضوع يهم بلدنا أو فى ديننا ، ليه مش نقول رأينا بصراحة ؟؟


بالعكس دا احنا هنعرفهم إن لسه فينا شباب بيفكر ، كدا يخافوا أكتر ،و نغيظهم أكتر ، مش احنا اللى نخاف و نكش ، زى ما كل واحد على الحق قافل على نفسه ، و ماعدناش شايفين فى الدنيا غير كل شئ وحش ..



و بالنسبة للتدوين عامة ، ففعلا ماحدش اصلا هيفكر ولو للحظة فعلا إنه يبطل تدوين ، التدوين قرب بينا كتير ، و عرفنا على ناس أصلا مش نحلم اننا نشوفهم ، بالعكس كمان يمكن كان شباب ضايع كتير بعد ما دخل التدوين و شاف الناس الحلوة دى عرف ان الدنيا لسه بخير و بدأ يفوق تانى ..


فإذن فعلا فى مميزات أهى مانقدرش نتغاضى عنها أبدا ،و فى رأيى إنها أكتر كتير من عيوب التاج و التدوين..



طيب نيجى بئا لموضوع فعلا إن التاج وسيلة للاستقصاء و جمع البيانات ..


أولا عشان نعمل استقصاء على ناس أو مجتمع ، و طبعا مع كبر المجتمع دا مثلا المجتمع المصرى مش هأقول العربى ، فلازم ناخد عينة تعبر عن المجتمع دا ..


طب ليه اصلا ياخدوا عينة ؟؟ ماهو أصلا المجتمع مفتوح ادامهم ؟؟


أول حاجة قلة التكاليف ، وإن ممكن أفراد معينين يكون سهل أخد معلومات منهم أكثر تفصيلا و دقة ، كمان لو مافيش وقت كفاية عشان دراسة شاملة ، أو مافيش إمكانية لاجراء حصر كامل لمجتمع الدراسة

بشررررررررررررررررررط : أن تمثل العينة ( الأفراد يعنى) تمثل كل المجتمع تمثيلا صحيحا .

طيب سؤال بس صغير .. هل فعلا مجتمع التدوين المصرى يمثل الشعب المصرى (كمثال) ؟؟

أو حتى الناس اللى بيتبعت لها التاجات تمثل المجتمع المصرى ؟؟... طب نقول مجتمع التدوين المصرى ؟؟


طب تعالوا نشوف إزاى بيختاروا العينة دى ؟؟


أول حاجة يشوف فعلا هل هو محتاج يدرس المجتمع الاصلى .. و بعدين بيعمل قايمة كاملة بكل أفراد المجتمع دا .. و بعدين ياخد أفراد يمثلوا فعلا المجتمع دا .. و بعدين من الافراد دى .. يختار العينة اللى هيدرسها

بشرووووووووووط بردوا .. إن الأفراد دى يتوافر فيها الاتى :

درجة الدقة و الثقة بالنتايج اللى الشخص دا عاوزها ،و الدقة بتيجى كل ما العدد يكبر ، و الثقة يعنى يكون واثق إنه لو أخد عينة تانية هتكون النتايج هيا هياها أو قريبة منها .

كمان درجة التعميم ، يعنى لو فعلا الناس دى صادقة هل ممكن اجابتهم تعمم على المجتمع كله ، ولا هتكون مقتصرة على العينة دى بس ، كمان هل المجتمع كله متجانس (زى بعضه يعنى ) عشان لما حد يقول اجابة يبئا فعلا عبر عن مجتمعه ولا هيكون اتكلم عن فئة معينة بس ، كمان حجم العينة اللى هياخدوها دى (العدد يعنى ) كل ما زادت عناصر الدراسة فى المجتمع كل ماحتاجنا عدد أكبر


طب ياخدوا كام واحد كدا مبدئيا ممكن فعلا ياخدوا منهم معلومات أكيدة ؟؟


قالك ممكن من 30 -500 فرد ، دا بافتراض إن المجتمع واحد و عاوز استبيان عن نقطة واحدة ، إنما لو مثلا هتقسمهم مثلا طبقات زى مثلا ذكور و إناث أو شباب و شيوخ و كدا يعنى يبئا أقل ما فيها 30 لكل طبقة .. أما لو هتعمل استبيان للكل بس عن موضوعات متنوعة يبئا حجم العينة 10 أضعاف عدد الموضوعات أو النقط اللى انت اخترتها .


صعبة و مجهدة ...صح ، بس طبعا ناس بتفكر زى دول ،و عاوزين فعلا معلومات أكيدة هيعملوا كدا .. مش كوسة و اقلب زى حالاتنا .


طب تعالوا نشوف بئا أنواع العينات دى ايه ؟؟

<<أوعو تفصلوا منى ..اه باقول اهو ، عشان الحتة دى بالذات مهمة جداااااااااااا ..


فى نوعين من العينات : العينة الاحتمالية العشوائية ، و العينات الغير احتمالية .

معلش يا جماعة أنا عارفة والله ..ماتعملوش كدا فى نفسكو ، صحتكو تهمنى بردوا ، أنا هأشرح أهو استنوا بس ..


العينات الاحتمالية العشوائية .. يعنى أنا باختار الافراد بشكل عشوائى بس بشرط لو انا باعمل استبيان على فئات معينة إن خصائص الفئات دى تظهر من خلال الافراد دول ، و مش شرط يكون العدد متساوى ..بمعنى لو مثلا هاعمل استبيان عن الاغنياء و متوسطى الدخل و محدودى الدخل و معدومى الدخل .. طبعا الاغنياء ممكن آخد اتنين تلاتة << لأن اصلا مفيش غيرهم كيك كيك كيك كيك ، و متوسطى الدخل ممكن ناخد بتاع 20 مثلا ، و محدودى الدخل بتاع 100 مثلا و معدومى الدخل بتاع 1000 مثلا ..و بكد يبئا مظلمناش أى من الطبقات : ))))

و دى ليها انواع بردوا :

فى النوع العشوائى البسيط : و دا بنحصر فيه كل الافراد ، و نختار بينهم بأى وسيلة زى القرعة أو انام أحلم بأسماء الناس اصحى اختارهم : )) كدا يعنى .. و دى اسهل الطرق بس دى لا تضمن تمثيل المجتمع .

فى النوع العشوائى المنظم : دا لو المجتمع كله افراده نفس الخصائص فى كل حاجة ، و بالتالى اى افراد فيه هيمثلوا المجتمع دا تمثيل منظم .

فى النوع الطبقى البسيط : يعنى هنقسم المجتمع طبقات حسب العنصر اللى عاوزين ندرسه ، و بعد كدا نختار من كل طبقة عينة بحسب نسبتها فى المجتمع ، يعنى زى المثال اللى قلناه فوق ..

العينة المزدوجة : دا لما الافراد يمتنعوا عن الاجابة .. يقوم واخد عينة تانية يعمل عليها الاستبيان .. مش قلت لكم ناس مابتغلبش ..ههههههههه

العينة العنقودية : و فى النوع دا يقوم مقسم المجتمع لمجموعات و بطريقة عشوائية يختار مجموعة واحدة بس او اتنين ،و بعدين يقسمها مجموعات تانى ،و يقوم مختار بردوا مجوعة واحدة بس او اتنين ، و بعدين يقسمها مجموعات .. و نقعد نلعب بئا كدا لحد ما تصفصف فى الاخر على افراد معينين ،و دى طبعا مش بتمثل المجتمع .. خاصة لو فيه متغيرات كتيرة جدا زى مجتمعنا دا


أما بئا النوع التانى : اللى هوا العينات الغير احتمالية :

و دول بئا مش بيختارهم الشخص اللى عامل الاستبيان عشوائى .. و بردوا انواع :

فى العينة الصدفة أو الملائمة : و دى فيها الشخص بيبعت الاستبيان للكل اللى عاوز يشارك يشارك و اللى مش عاوز خلاص ، بس طبعا دا لعب عيال و مش بيعطى أى ايجابات دقيقة لان الناس بتجاوب على هواها ..

و فى العينة الحصصية : و دى زى العينة الطبقية البسيطة فوق بس بئا بيختار المجموعة اللى عاوزها حسب مزاجه أو حسب ماهو شايف ..

فى بئا العينة الفرصية أو العمدية (عن عمد يعنى ) : و دى فيها بيكون الشخص عاوز ناس بعينها يقوم منشن عليها و يفضل وراها لحد ما يجيبها ..و طبعا دى لا تمثل اى حد فى حاجة ..


لا خلاص خلصت الانواع ..انتوا مستنيين ايه ؟؟...ههههههههههههههههههههههه

طبعا بتتشاهدوا ...معلش معلش ، خلاص قربنا نخلص المحاضرة المملة دى ، فات القليل ما بئا الا الكتيييييييير ..قصدىىىىىىىىىى فات الكتير ما بئا الا القليل .. : ))))


طب بالنظر بئا فى موضوع التاج اعتقد انه ممكن يكون عينة الصدفة دى .. بس كدا بئا مش هيكونوا عاوزين اجابات تمثل المجتمع ، اعتقد ممكن يكونوا بيرموا الصنارة عشان يطلعوا بشخص او أشخاص ما بعينها ..و بكدا ارجع تانى أقول يبئا لازم يدرسوا المدونات كلها .. و يحددوا منها شخصية كل واحد عشان يقدروا يختاروا الشخص اللى عاوزينه ..

ولو بصينا للموضوع اللى حاطه لينكته فى البوست اللى فات ، يبئا بيختاروا عينة الفرصة او العمدية دى ،و دول فعلا الناس اللى بيجندوها من غير ما يعرفوا ...


و بكدا بردوا يبئوا عاوزين يعرفوا شخصية كل واحد فيهم الاول ..

<< والله انا خسارة فى البلد دى ...ههههههههههههههههههههههههه


طب آخر حاجة بئا مميزات و عيوب العينة :


المميزات :

طبعا بعد كل الجهد المبذول فوق دا فيارب يكونوا بيمثلوا المجتمع الاصلى ، كمان توفير الوقت و الجهد ، كمان بتحقق اهداف الشخص اللى عاوزها من الاستبيان او لو هيختار شخص بعينه ، زيادة نسبة الرقابة و الدقة ، ولو كان المجتمع له خصائص واحدة يبئا ممكن نعمم النتائج على جميع المجتمع .

أما عيوبها :

طبعا لا تمثل المجتمع لو خصائصه مش واحدة ..و طبعا استحالة فى مجتمع زى مجتمعنا تكون اى عينة تمثله اصلا ..و اللى مش متأكد يرجع لمواضيع مسح القيم واحد و اتنين عشان يصدق .. و طبعا دا هيأدى إلى زيادة حجم العينة << ما قلنا اللى هما العدد يعنى ..انتوا فصلتوا و لا ايه؟؟

و النقطة اللذيذة بردوا هو عدم الدقة و بالتالى لا يمكن تعميم النتائج و أصلا مفيش صدق من الاول يبئا فين الدقة بئا؟؟ و بعد دا كله يا عينى ممكن فى الاخر يطلع بخفى حنين لأن الشعب المصرى شعب لئيم و ما ينفعش معاه أى نوع من أنواع العينات السابق ذكرها ..نياهاهاهاهاهاها

هههههههههههههههههههههههههههههههههه


معلش طولت عليكو ..و تقريبا أنا اللى فصلت عشان بئالى يومين بأجهز فى الموضوع دا ...ياللا بئا أنا نازلة الشغل و عاوزة لما أرجع أعرف رأيكوا فى الموضوع الشيق و اللذيذ من مدونة فووووووووووووويس اوف ماااااااااااااااااااااين ..

كان معكم من خلف المايك : سووووووووووووول ويسبر... << أيوا اللى هيا على جوووست كاسبر ..هههههههههههه

و نلقاكم فى حلقة أخرى من برنامج : مش عاوزين نشوفك تااااااااااااانى

ههههههههههههههههههههههههههه


سلاااااااااااااااااااام



71 comments:

حرررررررروف said...

يا جماعه حرام متزعليش والله منا حقرا يعني حقرا

حررررروف said...

اية دة انا طلعت اولللللللللللللللل تعليق

من غير عنـــوان said...

أكيد ممكن يكون التاج وسيلة استقصاء..

إذا سلمت الأسئلة والإجابات

أمنياتي

marmar said...

فكره التاج جميله بالفعل وبتعرف الناس على شخصيه الانسان اللي بتتعامل معاه سواء هاتفيا تدوينيا
يعني انا هشرح عن نفسي حاجات فيه من خلاله ممكن حد يعرفني من وقت بعيد جدا ميعرفش الحااجات دي
زي ما تقولي التاج وسيله اتصال ما بين المدونيين ببعضهم والشعب المصري
وزي ما قلتي وسألتي هل التاج ده يعبر عن الشعب المصري اه يعبر من وجهة نظري جدا لان كل اللي بيجاوبه بصدق شديد رأيو بيحتسب عندنا
لما تعملي تاج وخمسين واحد مثلا يجاوب عليه يبقى كده عرفتي خمسين شخصيه مصريه من خلال ردودهم ورأيهم وشخصيتهم وبعد كده تقري كمان رد خمسين واحد على تاج تاني وهكذا
ف دي طبيعي عمليه تعارف على اللي قدامك فكريا
اما بالنسبه للناس اللي بتجاوب بس عشان الناس تتخدع فيهم وتقول يااااه دول ناس مؤمنه جدا ف دول طبعا ناس تعتبر مريضه نقدر نصنفهم مريضين نفسيا او تدوينيا عشان يخلو الناس كلها تتكلم عليهم وعلى رأيهم وشخصيتهم الخلابه وهما في الاصل عكس ده
موضوع جميل يا سكرة وبيناقش بالفعل نقطه مهمه اوي في التدوين
تسلم ايدك اللي تعبت وكتبت كل ده وصدعتنا قصدي ومتعتنا بالقرايه
"وش بيطلع لسانه"
هههههههههههههههههه
دمتي بكل خير

اسماء واحلام فى وجدانى said...

اولا انا عايز اعرف انتى كتبتى الكلام

ده كله فى كام شهر

انا فصلت منك حوالى 64 مرة

مش من الملل لكن من التفكير فى حالنا

وما زال شكى فيكى كتعليقى السابق

مستمر

لكن فى حاجة كانت دايما بتلفت نظرى

فى حياتى

وللاسف يمكن تكون خارج موضوعك خالص

لامة باكون عيان واروح اكشف

الاقى البلد كلها عيانة وبتكشف

لو حبيت اجيب عيش الاقى البلد كلها بتجيب عيش

انزل المترو مع انى اسكندرانى الاقى البلد

كلها فى المترو

ادخل المجمع الاقى البلد كلها فى المجمع

اروح احشى درسى

الاقى البلد كلها سنانها واقعة

انا مش هاقولك

هههههههههههههههه

ولا هاقولك

نياهاهاهاهاهاها

انا هاقولك

لالالاع لالالاع لاع لاع لاع لاع

بالصعيدى البحت

اللى يفكر يضحك على واحد مصرى

ده اكيد عبيط لانه هيروح بلده

بيكلم نفسه

احنا ربنا حمينا

واكيد انتى فصلتى منى

اسف على التطويل

هذه حياتي said...

السلام عليكم ورحمة الله وبركاته

أختنا العزيزة همسات الروح
لقد أحسست أنني أستذكر محاضرة من محاضرات الإقتصاد والإحصاء ....هههههههههههه
ولكن بشكل عام كلام جميل جدا أختي العزيزة ولقد استفدت من كلامك كثيرا وبارك الله لك وعلي درب الرقي والتقدم دوما سائرة

خالص شكري وتقديري

ايوشة said...

بصى كلامك صحيح فعلا وخصوصا اننا خايفين ليه ان العالم يعرف افكارنا الا اذا واثقين ااننا بنفكر غلط ممكن التاج يكون وسيلة تكشف شخصيات السيئة ومحاولة اصلحها وممكن يظهر الجوانب الجميلة فى الانسان ودى هتفيد غير اكيد هرجع اقرا البوست تانى بس لما اصحى من النوم بعد المشوار الفظيع اللى كنت فيه النهاردة:(

فركشاوي ..ناوي said...

بسم الله الرحمن الرحيم
عزيزتي..
السلام عليكم ورحمه الله وبركاته
ليه تدخلي من الباب الخلفي ؟
ما المكان كله محاصر...عموما نورتي المدونه وطفيتي النار الولعه فيها
شكرا لك
عايزه تفهمي ايه الموضوع؟
مش أما افهم انا الاول
انا محتار اتكلم عن الموضوع من وجه نظري ولا من وجهه نظر فشكول ولا من وجهه نظر المدونين ولا اتكلم بشكل عام
وفي هذه الحاله لن نقوم من امام الكومبيوتر
خلينا قاعدين..
سبب الحرب كلها سواء بينك وبين المعلقين عندك او بيني وبين فشكول او بين مصر وبلاد الواق واق سببها واحد
وممكن تنتهي ببساطه
لو اجبنا عن السؤال بأمانه
ممكن نتفق؟
=========

Sweet Violet said...

طبعا احييكِ على المجهود الرائع ده

بجد بوست جميل جدااااااا و مفيد

و طبعا معاكى فى الكلام كله بس بردو هرجع و اقول ان الكلام ده ينطبق على فئه معينه فى مجتمع التدوين

الفئه دى هتلاقيها اصلا مافيش تاجات عندها على فكرة ولا بتهتم بيها

و هى الفئه اللى بيبقى عندها التدوين اظهار الاحداث اللى على الساحه

اللى بتناقش فعلا مسائل سياسيه واجتماعيه

ولو لاحظنا ان التاج بيروح فى معظم الاحيان لاشخاص بيستخدموا المدونة كادفتر يوميات ..مع العلم ان كتييير اقواله غير افعاله اصلا

يعنى لما مثلا نتكلم عن مشكله معينه احنا بنعانى منها فى الواقع و هقول مثال بسيط زى الكدب فى العلاقه سواء صداقه او حب

هتلاقى الكل بيدخل و بيكون مؤيد للشخص و ان فعلا المجتمع كله بقى كده

طيب نيجى بقى نشوف عدد الاشخاص المؤيدين دول هتلاقى بيزيد عددهم عن المئات .. طيب يبقى فين بقى المشكله ؟؟؟ و فين اصلا الكدب مع ان الكل بيقول انه بيكره ؟؟

المدونات او العالم الافتراضى بالنسبه للمجتمع العربى او المصرى عموما

من الصعب جداا يتاخد منه معلومات صحيحه يقدرو بيها يتجسسوا علينا

و هرجع اقول طبعا ماعدا بعض المدونات اللى فى الغالب هتلاقى ان التاج مش بيوصل ليهم لان اتجاهات المدونة معروفه

بس بجد بجد موضوعك فوق الرائع

kafrawy said...

تمام
والله اللى عايز يتجسس هيتجسس يا دوك
اعتقد ان الموضوع ابسط من كدة
ان شايف ان التاج دة حاجه لذيذة بنرفه بيها عن نفسنا بالكلام وسط الكلام الكبير و العميق اللى بيتقال و كمان بنتعرف
بيه على شخصيه المدون من قريب



تحياتى

adel said...

حلو قوي ردك

و رائعة المعلومات بتاعت الاستقصاء دي لاني مكنتش اعرف كل الحاجات دي

نيجي بقي لنقطة مهمة قوي

الناس اللي بتجسس علينا دول مش مستنين تاجات المدونين ولا حتي المدونات اساسا
المندونات دي جزء من الف جزء غيره

انتي عندك دلوقتي بطالة و فقر يخلي اي شاي معندوش انتماء و دول كتير قوي يبيع بلده قصاد 100 جنية

اعرف اخبار كذا و هتاخد كذا ولا مين شاف ولا مين دري

الناس بقيت بتبيع شرفها و اخواتها البنات و زوجاتهم للي يدفع اكتر تفتكري هيفكروا قبل مايبيعزا بلدهم

كفاية صفحة الحوادث في اي جرنال كفيلة تعرفك الشعب وصل لفبن

لما رجل الاعمال يقتل و ياخد براة
و لما واحد تاني يغرق 1000 واحد و ياخد براة
و لما واحد تالت يبوظ اكياس الدم و برضه ياخد براة

و لما موطن هو و مراته يعملوا شبكة لتبادل الزوجات

و لما كل يوم يمسكوا 3 او 4 طن محدرات غير اللي بيعدي تحت الترابيزة

اظن بعد المثال الصغير ده
نفهم ان المسالة مش تاج ولا مدونة ولا فيس بوك .....المسالة في الناس و اللي وصلناله

المدونات و التاجات و الفيس بوك بالعكس دول بقوا عكس ما الناس بتقول
وسيلة لتقريب وجهات النظر و محاولة التفاعل مابين كل الناس و ده هو اللي موجود
حتي لو اتفقوا انهم بيكرهوا تامر حسني
او ان رامي صبري بيقلد عمرو

ده كفاية لحد مايجي يوم و يقولوا لا لكل حاجة وحشة

---------------------
سوري علي التطويل

sakayar said...

مجهوود يستحق التحية بجد
والموضوع يستحق التفكير أكتر
لكن هل الأمر بهذه الدرجة ... كده الواحد ممكن يجيله هاجس من أي حاجة
ومش يثق ف أي حاجة
:(
تحياتي على المجهووود مرة تانية وهحاول أقرأ الموضوع تاني

كيــــــــــــارا said...

ساعديني اني اقتلك


طب تحبي تموتي بمسدس ولا سوكينه ولا ثم قاتل الدواء فيه ثم قاااااااتل ولا بالمشنقه ولا رميا بالمشابك ولا ايه

جننتييييييييني انا عندي ريدر مش بيخلص وكومنتات بالعبيط

هجييييييييييب وقت اقرا البوست دا كله منييييييييييين

عااااااااااااااااااااااااا

ها اختارتي انهو موته

قوووووووووووولىىىىىىىىى

***********

جد بقي لما كانو بيبعتوا جواسيس في الاندلس او غيرها مش ان الشاب بيقول انا بقرا القران او بحب ربنا ورسوله

مكنش بالسذاجه دي

ليس كل مايقال يفعل وكل ما يفعل يقال

الجواسيس بيشوفوا انهم بيقروا وانهم علي ثقافه عاليه مش الشباب الللي بيقولوا احنا بنقرا هوناك فرق

اللي انا بنادي بيه ان مش نسؤ شكل البلد قدام غيرنا اه لان نظرتنا للبلد هي دي اللي بتفرق
معاهم

بس يامجناننننننننننننننى

fashkool said...

انت يا بت شقيه ومش عايزه تبطلى شقاوه
يعنى احنا نخلص الكليه من ييجى 150 سنه وانت تقعدى تذاكرى لنا العينات والعشوائيه والحتماليه والحاجات دى
احنا ما صدقنا ان خلصنا مذاكره من زمان ولا عايزه تفكرينا بالايام اللى مش حلوه وساعات حلوه
الاستقصاء يبقى مظبوط لو من عينه عشوائيه وكبيره عشان تمثل كل فئات المجتمع
لكن عينة المدونين مش عشوائيه دى عينه انتقائيه لانها تمثل شريحه متعلمه او مثقفة من المجتمع
هى ممكن تقول ان المتعلمين والمثقفين احتمالهم المعيارى قد كدا
لكن على كل حال هى وجهات نظر
وفى العموم التاجات مش بحبها وخلاص
تحياتى

hayatcemresi said...

السلام عليكم ورحمة الله وبركاته....
My dear sister,
Which are your verse of Koran?(your to be influenced)
Please write me orijinal arabic.
Example:
وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ
الشورى
30
في امان الله

ريمان said...

السلام عليكم


انا كيييييييييييت


وكمان انتى وحشانى ورب الكعبه


ربنا يخليكى يا قمر يا رب

بقولك ايييييييييه


انتى بجد طلعتى جامده اوى

والله معاكى حق المره دى

انتى اما شرحتى وجهه نظرك انا فهمتك

وانا بتفق معاكى وبشده


تحياتى ليكى يا سكرررررررر


خلى بالك من نفسك

وطمنينى عليكى

د.خالدأمين said...

حرام عليكي واله العظيم

والله العظيم انا دخلت عالموضوع اول ما كتبتيه خالص ومفهمتش حاجه خالص خالص خالص خالص

اه والله العظيم ما فهمت ولا كلمه

قولت هادخل كمان يومم يمكن افهم حاجه

ودخلت تاني ومفهمتش تاني


كده بقي مش هينفع


الكلام ده مش مظبوط خالص


انا درست الكلام ده في اوحش ماده شوفتها في حياتي


وبالرغم اني جبت فيها امتياز لكن والله العظيم مافهمت فيها ولا كلمه وكنت بحفظ

طب وانا هاحفظ الكلام ده ليه طيب


ايه اللي جبرني طيب


بس عالعموم بصي ياستي



انا مش عارف اقول ايه



مع ومش مع

بس حكايه التاجات دي انا محضرتهاش ومكنتش اعرفها بس فهمت هيه عباره عن ايه بس دلوقتي


عالعموم ممكن اوي تكون طريقه للتجسس فعلا لان الناس اللي بتتجسس دي بتهتم بكل كبيره وصغيره

بس ما الياهو برده سهل جدا مراقبته
ايه المشكله يعني
في حكايه التاجات دي


انا فكرت ولقيت ان الموضوع عادي

ولان فعلا لان الناس اللي بتجاوب التاجات دي اكيد مش بيقولوا كل حاجه كل حاجه



سلامات

Soul.o0o.Whisper said...

حرررررروفى

اه شفتى ازاى ؟؟
يعنى كمان كرماكى و سبتلك اول تعليق

مش تعملى فيا معروف و تردى بئا
ههههههههههههههههه


مستنياكى

Soul.o0o.Whisper said...

من غير عنـــوان


أستاذى الفاضل
صح ممكن يكون فعلا لو سلمت الاسئلة و الاجابات

و الناس بردوا ..
مش كدا و لا ايه؟؟


حقيقى حضرتك نورتنى





دمت بود

Soul.o0o.Whisper said...

marmar

مرمرتىىىىى

أولا نورتى المدونة
فينك يا بنتى ؟؟

بصى يا ستى
أنا معاكى إن التاج وسيلة قربتنا و عرفتنا ببعض

لكن انها تعبر عن الشعب ؟؟!!
أعتقد صعبة شوية
يعنى بافتراض مثلا ان فعلا ال50 جاوبوا التاج
هل 50 يمثلوا ال 80 مليون؟؟؟
استحااااااااااااالة



ممكن آه بيعبروا عن نفسهم
انما مش عن المجتمع


و انا اللى متشكرة على زيارتك
و تعليقك الجميييييييييييل دا
ههههههههههههههههههه





خالص ودى يا جميل

Soul.o0o.Whisper said...

اسماء واحلام فى وجدانى


أولا : جمعته و كتبته فى شهر إلا 26 يوم ونص (( دا باعتبار شهر فبراير

بس سعيدة حقيقى سعيدة انك فصلت 64 مرة بس
:)))
انجااااااز


بص بئا أنت تبطل شك
ماشى
عورتنى
هنا تشك و عندك تشك

خلاص بهدلتنى


صحححححححححححححححح
عندك حقققققققق
دا هيكلم نفسه أقل الاضرار
هههههههههههههههههه



بس انت عرفت منين انى فصلت
انا قلت امارس حقى فى الفصلان اشمعنى انت


حقيقى اسعدنى مرورك
و بانتظارك دائما








دمت بود

Soul.o0o.Whisper said...

هذه حياتى

و عليكم السلام و رحمة الله و بركاته
و حقيقى اسعدنى مرورك


و الحمد لله انها جت على اد الاقتصاد و الاحصاء
فة ناس بتوصل معاهم لاكتر من كدا
ههههههههههههه

بس الحمد لله انك استفدت الحمد لله
و متشكرة جدا على الدعوات


ربنا يتقبل يارب









دمت بود

Soul.o0o.Whisper said...

ايوشة


كلامك منطقى بردوا جدا
و فعلا التاجات فى بعض الاحيان الواحد بيستفيد من اجابات الاخرين


منورة يا جميل
و بانتظارك بعد الفاصل
هههههههههههههههههههههه






دمتى بود

Soul.o0o.Whisper said...

فركشاوي ..ناوي

أستاذى العزيز...
و عليكم السلام و رحمة الله و بركاته


معنى كدا انك بتقولى ماجيش خالص بئا
ههههههههههههههههههههه
والله حضرتك اللى نورتنى بجد

بص يا أستاذى العزيز
بالنسبة لى المشكلة مش حكاية ممكن نتفق

الحكاية هيا
هنتفق على ايه؟؟؟


حضرتك فهمت حاجة؟؟؟






دمت بود

Soul.o0o.Whisper said...

Sweet Violet

سويتىىىىىىىىى

شكرا شكرا ..مش عارفة اودى جمايلك فين بس
ههههههههههههههههههههه

فعلا انا معاكى فى نقطة فئة المدونين اللى فعلا ممكن تكون العين عليهم
و تلاقيهم اصلا مش بيوصلهم التاج
:)



و بردوا حكاية ان كل الناس تبئا معاك فى كلامك و لما تيجى تشوف تتعجب
امال مين الغلط
هههههههههههههههههههه

حقيقى بجد نورتينى بتعليقك دا
مش عارفة اقولك ايه؟؟

اردهالك قريب يارب
هههههههههههههههه




خالص ودى يا قمرى

Soul.o0o.Whisper said...

kafrawy


كلامك صح
التاج فعلا بيقربنا من بعض
و يعرفنا على شخصيات بعض


حقيقى نورتنى يا دوك
و بانتظارك دائما





دمت بود

Soul.o0o.Whisper said...

adel

منور يا فندم
:)
و الحمد لله انك استفدت


و كلامك صح
و دى نقطة بردوا انا فكرت فيها

اخبار الناس و المجتمع أصبحت لا تخفى على حد
يبئا ليه أجهد نفسى فى حاجة
ممكن تفيدنى و ممكن لا؟؟؟


وانت قلت الخلاصة فعلا
اننا لازم كلنا نقول للوحش لا
و نقاومه لحد ما نخرجه من حياتنا و مجتعنا خالص



و مافيش تطويل و لا حاجة
بالعكس
انا سعيدة بتعليقك جدا





دمت بود

Soul.o0o.Whisper said...

sakayar


حقيقى حضرتك شرفتنى بالزيارة و التعليق
و يارب مش تكون زيارة و السلام


بس عاوزة أقول لحضرتك
اهم شئ تكون واثق من نفسك
و ان اللى بتعمله فعلا صح


و بردوا ناخد بالنا الحذر واجب
انما مش يبئا مرضى




بانتظارك دائما


و دمت بود

Soul.o0o.Whisper said...

كيــــــــــــارا


جبــــــــــــارا


عاوزة ايه انتى ؟؟؟
اه .. انتى عاوزة ايه؟؟

حلو اوى دى
يعنى كمان متأخرة على الناس
و بتأجلى عمل اليوم الى الغد
ههههههههههههههههههههههههههه


و بعدين عاوزة تلقى باللوم على الناس التانيين
غريبة والله؟؟!!

..........................

صح يا كيتى
و انا مش قصدى اننا لما نجاوب التاج
و نظهر ديننا اننا بنقول كلام و خلاص

لا فعلا نكون مقتنعين
و متمسكين بيه
ساعتها فعلا مش هايقدروا علينا




و الله انتى اللى مجنانىىىىىىىىىىىىىى


سلاااااااااااام

Soul.o0o.Whisper said...

fashkool

عمو فشكوووووووول
ههههههههههههههه
حمدلله ع السلامة
انت رجعت من الجبهة امتى؟؟؟


انا شفت
شقية خالص خالص يعنى
و بعدين150 سنة؟؟؟
طب خليها فى سرك اصل فى ناس هنا بتحسد
ههههههههههههههههههههههههه


يا عمو فشكول عاوزة اقول لحضرتك
ياما ناس متعلمين
لكن قليل جدا اللى مثقفين
و قليل جدا اللى بياخدوا دا منهج حياتهم


و بعدين على رأى أحد الاشخاص
كل واحد عنده كمبيوتر ووصلة نت
بيعمل مدونة
و ما نقدرش نحكم دى




المهم
حمدلله ع السلامة و دايما منورنى






خالص ودى

Soul.o0o.Whisper said...

hayatcemresi

و عليكم السلام و رحمة الله و بركاته

So happy for your visit

My verse of Koran is :

(يَا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الأرْضِ أَرَضِيتُمْ بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ (٣٨)إِلا تَنْفِرُوا يُعَذِّبْكُمْ عَذَابًا أَلِيمًا وَيَسْتَبْدِلْ قَوْمًا غَيْرَكُمْ وَلا تَضُرُّوهُ شَيْئًا وَاللَّهُ عَلَى كُلِّ شَيْءٍ قَدِيرٌ (٣٩)
التوبة


thanks a lot

Soul.o0o.Whisper said...

ريمان

ريمىىىى

و عليكم السلام و رحمة الله و بركاته

نورتى المدونننننننننننننة

:)
الحمد لله انك فهمتى قصدى
و بجد متشكرة خالص على كلامك الجميل




انا الحمد لله كويسة
و يارب تكونى انتى كمان بخير






خالص ودى يا جميل

عاشقه الرومانسيه said...

ايه يابنتى ده كله
هبقى اخد يوم اجازه من اوله واجى اقرا البوست اللى اطول من السنه الكبيسه ده
ورأى مش هيتغير
راجعى تعليق البوست اللى فات
وكلامك بيثبت ان اللى قال الكلام ده صاحب نظره سوداويه شويتين
ههههههههههههه

Soul.o0o.Whisper said...

د.خالدأمين

اممممممممممم
هو انا حسدتك و لا ايه؟؟؟

طب بس اهدى
ماتعملش فى نفسك كدا
صحتك يا دوك بردوا .. عاوزينك حتى تتخرج
ههههههههههههههههه


الحممممممممممممد لله
مش العلم نور بردوا؟؟

بالنسبة للتاج فعلا انا مانفتش الفكرة
لكن كطريقة ...هل فعلا مجدية؟؟؟

هى دى النقطة





منور دايما
و دمت بود

Soul.o0o.Whisper said...

عاشقة الرومانسية


ههههههههههههههههههه
ههههههههههههههههههه
الاجابة : انظر البوست السابق
صفحة التعليقات
التعليق مش عارفة رقم كام


والله انتى تحفة
هههههههههههههههههههههههه
و دمك زى العسل




خلاص يوم الجمعة الجاى هاستنى تعليقك
هههههههههههههههههههههههههه

بس نظرة سوداوية ايه بس
دى وجهة نظر و تستحق فعلا انها تناقش

انتى بس اللى بيضاوية خالص
و شايفة الدنيا حلوة زيك كدا
هههههههههههههههههههههههههههه






خالص ودى يا قمر

أحــوال الهـوي said...

لن استطيع ابدا الراي في زيالرتي الاولي بشكل كامل و لكني ساقف امام نقطتين
اولي مجتمع التدوين هل هو انعكاس او صدي لراي شريحة معينه من الشعب ؟؟
هل التباين الواضح بين الميول و الثقافات و المكتسبات المسنهدفه من وراء التدوين تخبرنا بان طبقة المدونين هم الطبقة المثقفة الجديدة في المجتمعات فجل الدوانيات و التجمعات الادبيه و السياسيه زمان كانت تقام بالقهاوي او في المجالس الخاصه
و فيها يتقابل النثقفون يتبادلون هموم المجتمع و مآثرة و كانت نتائجه جميلة فهل ترقي مستوي المدونات الي افراز عباقرة في الفن و الادب والابداع؟

مقالك رائع و اشعر بالمجهود الخارق بتجميع العلومات و تنظيمها و محاولة تبسيطها لتناسب استعاب القراء

تحياتي

فارس عبدالفتاح said...

بصي اسمحيلي بخمسة ومش هطول عشان الشباب كلهم مطولين وأنا طولت المرة اللى فاتت طولت وعاوز اقصر عشان متطلبش لك لك معايا

أولا :

الموضوعية والمنهجية بتاعت الاستبيانات والمسح والدراسات أسلوب موضوعي وجميل وممتاز وأنا أحب هذا الأسلوب جداً حتى نكون محترمين أنفسنا قبل ما احد يحترمنا .

الثانية :

ويمكن أنا أخذت الموضوع بشمولية وأنت ركزتي على التيجان فقط .

فإذا كان الأمر في التيجان فهذا أمر لا يستطيع أن يبني عليه باحث إي استبيان أو دراسة أو مسح اجتماعي لمجتمع معين عشان يفقد المنهجية والموضوعية بشكل كبير وهذا أمر نرفضه فضلاً عن عدم احترامه لنفسه قبل أن نقوم بتقييمه وأنا اعلم تمام العلم أن الغرب وإسرائيل منهجيين إلى ابعد مما قد نتخيل نحن عنهم .

ثالثا :

أنا أخذت الأمر بشمولية بشأن المدونات والمواقع الحوارية الجادة والفيس بوك .

هذه الأمور المدونات والمواقع والفيس بوك يستطيع أي باحث أو دارس أو من يعمل المسوح الاجتماعية أن يبنى عليه كل ما يري ببساطة لان المدونات والمواقع الحوارية والفيس بوك والتصويت عبر الانترنت وغيرها يعبر عن رأي وفكر وعقل وشخصية الفرد في المجتمع دون رقيب وبدون خوف ويتحدث ويكتب دون أن يضع الأمور السياسية أو الاقتصادية أو الاجتماعية أو الدينية حاجز دون أبدا رأيه وهذا أمر يصلح للبحوث والدراسات والمسوح والاستبيانات الاجتماعية بشكل كبير .

وهذه ليست مشكلة المشكلة أن ليس هناك من يدرك أن هذه المسوح والدراسات والاستبيانات التي تأتي على صورة تصويت على موضوع معين وغيرها .

تتحول في مراكز البحوث والدراسات إلى عمل على ارض الواقع في اقل وقت ممكن وهذا بالنسبة إليهم أما نحن فإننا نأخذ سنين عديدة حتى نتبين أن هذا العمل أو هذه الظاهرة المستجدة على المجتمع ظاهرة دخيلة وأنها موجهه وأنها تستهدف النسيج الاجتماعي سواء فكريا أو دينيا أو سياسيا أو اقتصاديا أو اجتماعيا أو صحيا ... الخ ،، وهذه هي المشكلة عدم الوعي وخاصة بين الشباب .

وارجع وأقول الوعي الصحيح الذي يصب في مصلحة الأمة دينيا وقوميا

مع خالص الشكر والتقدير

واحــ الفكر و القلم ــة said...

ما شاء الله عليكى يا جميلة
دماغك عجبانى بجد
متحبيش تفوتى حاجة كده للزمن
بوستين على تاج
هههههههههههه
بس عندك حق الموضوع مهم جدا والله وممكن اوى فعلا يكون وسيلة تجسس

بس ده على حسب مين اللى عمل التاج ده
المفروض بعد كده منقبلش تاجات غير لما نعرف مين اللى عاملها ؟؟

انا نفسى عملت تاج قبل كده اسمه تاج العيد
بس والله والله والله ما كنت أقصد أى تجسس ولا حاجة وحشة خاااااااااالص
ده كان تاج ترفيهى خفيف كده بس عن طقوس وذكريات العيد
برئ يا بيه
برئ يا بيه

ههههههههههههههههه


بس احلى جزء عجبنى فى البوست ده :

النقطة اللذيذة بردوا هو عدم الدقة و بالتالى لا يمكن تعميم النتائج و أصلا مفيش صدق من الاول يبئا فين الدقة بئا؟؟ و بعد دا كله يا عينى ممكن فى الاخر يطلع بخفى حنين لأن الشعب المصرى شعب لئيم و ما ينفعش معاه أى نوع من أنواع العينات السابق ذكرها ..نياهاهاهاهاهاها


الشعب المصرى فعلا على أد ما هو طيب ويبان عليه الغلب إلا أنه لئييييييييييييييم لؤؤؤؤؤؤم

ههههههههههههههههه

صباح الهنا على عيونك يا جميلة

سالى

حنان الشافعي said...

بصراحه مجهود جباااااااار كتر خيرك جدا جدا
اكيد تعبتي في كل ده
بصراحه الكلام ده جديد عليا واول مره اسمعه بس يمكن بقي انا مش من هنا
فعلا التاج فكره كويسه ولو مكنتش مقتنعه بيه مكنتش عملته
اظن بعيد اوي ان التاج يكون وسيلة تجسس او استقصاء ممكن يكون تحليل ماشي
الاسئله كتير منها عادي وسطحي والاجابات مش شرط ابدا تكون صادقه
يعني هيبقي تجسس علي اساس احتمالات هتبقي معلومات ايه دي
لو عايزين يتجسسوا اصلا يهمهم نفسية الناس اوي كده في ايه
صحيح مهم بس مش للدرجه دي
ولا التاج هيكون الاسلوب المتبع في الحالات دي
الدراسات الميدانيه سهله جدا ولا يشترط فيها اكثر من تصريح عبيط
وفيها يقدر المتقصي يسأل اسئله عميقه ومهمه يوصل بيها للنتيجه المرجوه
كمان عندك حق
لو التاج وسيلتهم للتجسس
احنا بقي شعب قوي ومؤمن جدا وعزيمتنا من حديد يبقوا يفكروا يجوا ناحيتنا
بشكرك مره تانيه علي موضوعك ومجهودك وربنا يجعله في ميزان حسناتك
تحياتي

ghorBty said...

ياربي انا ما صدقت خلصت الكليه

ايه دا كله كنت لخصتي المنهج شويه

والا نروح نصور تلخيص من المكتبه

ناويه تغرمنا شكلك كدا

لا بجد تحليل دقيق وجميل

ولو كانت العينه بتاخذ علي مجتمع التدوين

دعيني اتسال ما الذي دفع هؤلاء الشباب بالذات دون غيرهم الي التدوين ؟

والرد علي السؤال يوضح وجهه نظري

بارك الله فيك

فركشاوي ..ناوي said...

فركشاوي ..ناوي

أستاذى العزيز...
و عليكم السلام و رحمة الله و بركاته


معنى كدا انك بتقولى ماجيش خالص بئا
ههههههههههههههههههههه
والله حضرتك اللى نورتنى بجد

بص يا أستاذى العزيز
بالنسبة لى المشكلة مش حكاية ممكن نتفق

الحكاية هيا
هنتفق على ايه؟؟؟


حضرتك فهمت حاجة؟؟؟






دمت بود

====
بأختصار شديد جدا علي رأي عمي فشكول ليا يجي 150سنه في التدوين ما حدش رد علي بعقل غيرك ...نتفق علي ايه؟
هو دا السبب الأول والأخير اللي اشعل الحرب بيني وبين فشكول (المقهور
قريبا سنحدد علي ما نتفق؟بالأشتراك مع عمنا المهزوم فشكول...

Beram ElMasry said...

الاخت العزيزة . Soul.o0o.Whisper
السلام عليكم ورحمة الله وبركاته
شئ جميل ان تكون لك هذه القدرة على العرض والصبر على المواصلة مع الردود المحبطة والسطحية احيانا بل والهزلية وهذه الفئة هى التى اعنيها
عندما اخبرتك ابنتى بان التاج هو تاج الجزيرة اى السلطنية ، وما هو الا خدعة لاستدراج الغر من الشباب ، كطبق العسل يسقط فيه الهوام والاسوء من هذا ، ان صانع التاج الاول القى تاجه فينا فحاكيناة كالقردة وبائع الطرابيش ، وتنافسنا فى صناعتة والاجابه علية ، وقدمنا لمن يشاء نموذجين :
الاول اجابات جادة تفيدة فى التعرف على الوضع من رضى اوعدمه الترابط الاسرى او تفككه ، والقيم والولاء ، يعرفون هذا واكثر ، بالاستدلال ، كابناء ربيعة الاربعة عندما قالوا لصاحب البعير المففود اهو اعور قال نعم ، قالوا اهو ازور قال نعم ، فالوا اهو ابتر قال نعم ، قالوا اهو شرود قال نعم ، وصفوه ولم يروه ولكن استدلو بالاثر
الثانى اجابات فكهة او مرحة ، صاحبها مهزار او عبيط وهو الاسوء ، وله فى التقيم ربع الدرجة لانه العورة التى يسهل اختراقها لتدمير اى مجتمع مستهدف ، وشوفوا اثر اى ربع ضارب ، وهذه النوعية من الشباب تذكرنى باصحاب السندباد فى بلاد اكلى لكوم البشرعندما سخروا منه واقبلوا على الملذات ، وقالو له عييشنى النهار ده وموتنى بعد يومين ، فعاشوا كالبهائم وماتوا على السيخ
لك تحياتى والسلام عليكم ، ولا سلام مع اليهود

اسماء واحلام فى وجدانى said...

مادام حضرتك بانتظارى

ادينى جيت تانى

بس المرة دى مش علشان اشك

لكن علشان اقولك انى كنت بهزر

بجد من قلبى ربنا يحمى بلدنا من كل سوء

ويحميكى انتى كمان من شكى المستمر

اللهم امين

حروف (دلو مرة ثانية وجرح ثاني سابقا) said...

قريت وتعبت والعينات الاحتمالية والعشوائية دية دراستي حرامممممممممممم فكرتيني ليه بصي بئا انا شايفة الموضوع ابسط من كدة بكتير يعني نفترض انة تجسس هل كل المجتمع حيجاوب بجدية او بهزلية اكيد في كدة وفي كدة وهل لو عرفنا انه تجسس نعتزله وهل اللي بيجاوب مش بلحقيقة انة بيحب الله ورسولة نقول منافق احنا مش بنحاسب حد بل بلعكس اخد حسنة علي كلام كتبة في يوم العرض علي ربنا حيتكتب في ميزانة نيجي بئا للحقيقة هل المجتمعات الخارجية محتاجة وسيلة لتجسس زي التاج عشان تعرف ودامها التلفزيون ودامها الشارع نفترض انهم شايفنا طبقة المثقفين وعايزين يشوفوا اجابتهم ايه طب فينا صغار السن فينا كبار السن فين الوسط ومش الكل حيجمع علي اجابة ولو نزلوا الشارع حيلاقوا التباين في الاراء بردوا انا شايفه حتي لو كانت اجابات هزلية او اسئلة ساذجة فما هي الا محاولة التقرب الي الاشخاص واقامة صدقات وتقارب بين اشخاص بعيدة جغرافيا بل علي العكس قد يكونوا افضل كثير من اشخاص تراهم كل يوم امامك فكل شي موجود بشكل نسبي وليس شكل مطلق وعام وايضا ليس الجميع يحب ويجمع علي شيء واحد حتي في اهيف الاشياء ولكل شيء مزاياة عيوبة ولو كان التاج وسيلة مدمرة لشعوب لماذا لا نحولها في صالحنا ونستخدمها بشكل يفيدنا بدل منعترض ونعتزل الاشياء فقط وفي اعتقادنا اننا بعاد عن الخطر؟؟؟؟؟؟؟؟؟؟؟؟؟؟؟
دمتي بالف خير

حروف (دلو مرة ثانية وجرح ثاني سابقا) said...

حوضح حاجة بلنسبة لجملة نفاق من يقول انة يحب الله ورسولة وهو يتكلم عن بنات مثلا طب مكلنا بنحب الله ورسولة بس هناك من يكون اقوال وهناك من يفعل ويطيع اقوال الله ورسولة دلالالة علي هذا الحب وكلنا نطقنا الشهادة ولكننا كثيرا ما نفعل معاصي فهل نقول اننا منافقون
ان الله من يحاسب وليس لنا انا ناخد الكلام بحسن نية ونساعد الاخرين علي ان يكون حقييقه

حروف (دلو مرة ثانية وجرح ثاني سابقا) said...

وليس لنا انا ناخد الكلام غير انه **بحسن نية

Soul.o0o.Whisper said...

أحــوال الهـوي

أستاذى العزيز
حقيقى سعيدة بزيارة حضرتك

و طبعا معنى كدا إنى هأتشرف بزيارة حضرتك تانى و تالت و الى مالا نهاية
:)

كلام حضرتك فعلا مظبوط
و تساؤلات فى محلها


طبعا نتمنى أن نصل إلى هذه الدرجة
لكن هل فعلا حاليا بهذا الواقع الذى نراه
هل التدوين بصفة عامة
و التاجات بصفة خاصة
محل اهتمام هؤلاء

أم كما ذكرت سويت فى تعليقها
أنها خاصة بفئة معينة
هى أصلا لا تعير التاجات اهتماما؟؟




منتظرة حضرتك
و دمت بود

Soul.o0o.Whisper said...

فارس عبدالفتاح

قبل أولا :
أنت تشرف وقت ما تحب
المدونة مدونتك

و طول براحتك
بعد كدا التعليقات هتغلى
:)

أولا بئا :
عندك حق
كمان الاسلوب العلمى بيخلينا نفكر صح و نعرف عشان مانخليش الخوف يمنعنا من حاجات حلوة كتير


ثانيا :
فى أعتقادى أن ما ذهبت إليه صحيح لو أخذ كاستبيان
اما كحالات مفردة
فممكن

ثالثا :
وقفت قدام كلماتك دى
(المشكلة أن ليس هناك من يدرك أن هذه المسوح والدراسات والاستبيانات التي تأتي على صورة تصويت على موضوع معين وغيرها .)

أنا عن نفسى أى استبيان أو تصويت مش بأشارك فيه
لأنى كنت باعتقد انه ضحك علينا
يعنى إذا كان يتعلق بشئ على أرض الواقع

زى مثلا أخيرا
الافراج عن الزيدى
و تفكيك اسرائيل
و التصويتات و تجميع التواقيع دى

باعتبرها حالة من تفريج الغضب المكتوم داخلنا

زى بالظبط بعد ضرب بوش بالجزمة
نزلت لعبة جديدة على النت لو عاوز تضرب بوش بالجزمة
و مش عاوزة أقولك على حجم الزوار للعبة دى



مش عارفة
دى وجهة نظرى
و ياريت لو عندك توضيح أكتر توضح





دمت بود
و اعذر لى تقصيرى

Soul.o0o.Whisper said...

واحــ الفكر و القلم ــة

سالى الجميلة

يا هلا يا هلا

اممممممممممم ...ماشى
هأحاول أصدقك
هههههههههههه

طبعااااااااااااااا
الشعب المصرى دا
تلاقى فيه كل التناقضات والله
هههههههههههههههههههه



مساء النور والسعادة عليك يا جميل

Soul.o0o.Whisper said...

حنان الشافعي

حنووووووووووووون
عاش من شافك يا وحشة
بجد وحشانى
و معلش مقصرة معاكى

عندك حق
و دا اللى قصدى عليه
ممكن فعلا يكون وسيلة تحليل شخصية
إنما مش أبدا وسيلة استقصاء



يارب تكونى بخير
و طمنينى عليكى ضرورى
:)






خالص ودى يا قمرى

Soul.o0o.Whisper said...

ghorBty

هههههههههههههه
خلاص نزليه للدفعات اللى جاية
حتى يبئا صدقة جارية
هههههههههههه



بس انتى كدا شكلك هتحرقى موضوع البوست الجاى
خليه فى سرك
ها
ماشى؟؟





معلش سامحينى على تقصيرى

خالص ودى يا قمرى

Soul.o0o.Whisper said...

فركشاوي ..ناوي

أولا : حقيقى بجد سعيدة بتواجدك

ثانيا : الحمد لله انك لقيت عقل تطس فيه
بس يارب يصمد
مش يعمل زى عمو فشكول
(( يارب يارب يارب ...انت القوى
هههههههههههههههه


منتظرة حضرتك تانى
و يارب فعلا يكون النقاش مثمر





دمت بود

Soul.o0o.Whisper said...

Beram ElMasry

استاذى العزيز /
وجهة نظر حضرتك صح

بس أعتقد دا لو مفيش أى وسيلة تانية يعرفوا بيها غضبهم من رضاهم
انما لما تكون وسائل الاعلام خلت العالم كله قرية صغيرة
و كل حاجة واضحة و باينة

يبئا مافيش غير ان التاج يكون وسيلة من وسائل تحليل شخصيات معينة
دا ان كان فعلا كدا

و ياريت لو توضح وجهة نظر حضرتك كمان شوية
لأنى حاسة ان فى حاجة لسه حضرتك ماقلتهاش
:)




دمت بود

Soul.o0o.Whisper said...

اسماء واحلام فى وجدانى

يا أهلا يا أهلا
تانى و تالت و رابع

مادام مفيش شك
خلاص و لا يهمك
:)


ياااااااااااااارب اللهم آمين
خاصة تانى واحدة
هههههههههههههههه





دمت بود

Soul.o0o.Whisper said...

حروف (دلو مرة ثانية وجرح ثاني سابقا)

هيييييييييييييييييه
هيييييييييييييييييه

حروف جت
حروف جت

ههههههههههههههههههه

نورتينى بجد
أيوا كدا
تغيبى تغيبى
و تيجى محملة

طب خلاص عفونا عنكى
ههههههههههههههههههههه





بجد كلامك جميل جدا
و فعلا اللى عاوز حاجة او يتجسس و يشوف وضع البلد
الاعلام خلى العالم كله قرية صغيرة

و ياااااااااااه على برامج المعارضة
او المناقشات
بتعرض كل شئ فى حياتنا اليومية

انما ارجع بردوا اقول
أنا شايفة التاج لو فعلا بياخدوه كوسيلة
فهتكون للتحليل ليس أكثر

و إن كنت باعتبره بوست عادى زى اى بوست
لأنهم هيبئوا سطحيين اوى لو بصوا لتاج
سواء اجابات حقيقية أو هزلية
من غير ما يشوفوا المدونة ككل
و يعرفوا حقيقةالشخصية





منورة يا جميل بجد




و خالص ودى

علي محـمــــــد said...

ألسلام عليكم

معلش أنا دخلت المدونه بدون ما أخبط عالباب ..
أول شيء لازم إني أقوله لحضرتك هو إني لما وصلت لنص الموضوع رحت لمدونتي وأضفت مدونتك لمدوناتي المفضله هذا أولاً ..

ثانياً - حضرتك فتحتي موضوع جميل جداً ويمكن يكون معقد وصعب أحياناً وعشان كذا رأيي فيه .. الإحصائيه أو الإستبيان مستحيل وصولها لنتائج صحيحه بأكثر من عشرين بالميه مهما كانت درجت دقة هذا الاستبيان ,, أنا ما أهتم في موضوع نتائج الإحصائيات لسبب بسيط وهو عدم الثقه في طريقة الإستبيان وتأهيل وأمانة القائمين عليها .. وحضرتك ذكرتي هذي النقطه في الموضوع .. لكن أنا حابب اركز على نقطة التأهيل وكفائة اصحاب الاستبيان ,, يعني لو سألنا .. الإستبيان هذا مين الجهه اللي بتقوم بيه ,, بالنسبه لي إذا كانت هذي الجهه حكوميه فعينات الإستبيان أغلبها حتقول الحياه لونها بانبي وهنا احط عليهم وعلى عيناتهم حرف X ولنفترض إن الجهه مش حكوميه وخلينا نبعد عن الجامعات لانها تحت عبائة الحكومه ونفترض انها قناة الجزيره على سبيل المثال فقط ,, برضي مش حقبل بيهم عشان أهدافهم وتوجهاتهم معروفه ,, ولو افترضنا ان الجهه هي جهه محايده نزلت علينا من السما زي المطر أه أه زي المطر عشان مفيش جهه محايده حتنزل علينا الا بالطريقه دي .. وخرجت لنا احصائيه تكاد تكون معقوله برضها مش مقياس نقدر نبني عليه أفعالنا لأنها نتائج عشوائيه مهما كان إجتهاد أصحابها ,, لكننا مضطرين اننا نقبلها لأنها أفضل شيء موجود على إفتراض إنها موجوده ,, الموضوع موضوع ثقه يا أستاذتي الكريمه وأنا ثقتي معدومه في أصحاب الإحصائيات يعني إزاي أقبل إحصائيه لواحد متحرر من القيم الإسلاميه مثلاً وانا واثق ان كل إحصائيه لها أهداف معينه ولا تخلوا من لمسات وتوجهات صاحبها :)

أعتذر منك عالإطاله وانا عارف ان تعليقي على جزء من موضوعك ومش كله وكمان ما قدرت اني اقرأ تعليقات اخواني ممن سبقوني

في أمان الله

فارس عبدالفتاح said...

بص يا سول انا معاك في كل ما ذهبت إليه وهذا صحيح ووارد

لكن لابد لنا بان لا نغفل أن هنا فعلا توجد مثل هذه المسوح والاستبيانات والدراسات أيضاً على شبكة النت هذا أمر مفروغ منه .

فالمطلوب منا كشباب أو كمجتمع أن يكون لدينا القدرة على التمييز بين الأمور وان لا نغفل حقيقة مثل هذه فإذا كان هناك الساذج والتافه فهناك الماكر واللئيم


وأنا كنت أقصد بهذه الجملة مقدمة لما بعدها وهو المراكز البحثية والدراسية الموجودة في الغرب سواء المدنية والحكومية والعسكرية منها حتى المخابراتية .

وهنا علم لا اذكر المصطلح الذي يطلق عليه ولكن في ما معنا اسمه قراءة الدراسة أو تحليل البحث أو الاستبيان وسوف أتي بهذا المصطلح العلمي إن شاء الله في الغد لأني كنت أقوم بطباعة احدها أمس القريب .

المهم

هذا الاستقراء أو التحليل للبحث أو الدراسة وغيرها عبارة عن قراء دقيقة لهذه الدراسة وعليه يقوم الباحث الذي يستقرا هذا البحوث والدراسات والاستطلاعات والاستبيانات والمسوح وغيرها قراءة علمية بحته وإحصائية بحته ثم بنا على ما تقدم يقوم الباحث بشرح هذه الدراسة وإظهار قوتها أو ضعفها ثم يظهر نتيجة الاستطلاع أو الدراسة ثم يعرض التحليل لهذه الدراسة ثم يرتب الأمور الاجتماعية التي أظهرتها الدراسة ثم يقوم بوضع التوصيات المطلوبة لمكافحة ظاهرة معينة أو أمر معين .

أما بخصوص إذا كان هذا التحليل موجه لمجتمع معين فانه يوصي بالأمور التي تصب في مصلحة جهة المضادة لهذا المجتمع ويكون في هذا التحليل الجانب النفسي .

فتأخذ بهذه التوصيات الجهات القائمة على التطبيق في ارض الواقع تجاه الجهة التي تراها معادية لها وفي أسرع وقت ممكن وببساطة وسلاسة ودقة .

ومن واقع كلامك الذي كتب عن موضوع الجزمة والاستبيانات عن هذا الموضوع والتصويت وغيرها وتفاجئين بعد ذلك بلعبة الجزمة التي ذكرتي ، وأنا قد تابعت بعض الشيء هذه التصويتات ورأيت أن اكبر نسبة من التصويت هي من أيدت الزايدي وبعد ذلك تقولي أن انتشرت هذا اللعبة المزعومة .

أليس هذا أمر يستدعي التوقف عنده والمراجعة والبحث والدراسة من المتخصصين هذه أمور تستحق التدقيق فيها وليس من منطلق نظرية المؤامرة ولكن بالعقل والمنطق فان أيضاًَ في جوهر نظرية المؤامرة عقل ومنطق أيضاً إذا تفحصنا جيديا

وأنا لا ادري أن كنت قد كتبت عن ما تقصدين أو أخذت منحى آخر فإذا كان فانا لم اقصد هذا


ولكي كل التقدير والاحترام

وعلى فكرة أنا لم أكن في حالة نفسية سيئة ولكن كنت أقصدك أنت واني أنا المقصر في حقك حينما كنت في إجازة جئت فوجدتك تشكين من هذا الأمر .

وأحيطك علماً بان حالتي النفسية سيئة على طول الخط اههههههههههااهاهاهاها بسب الغربة التي أعاني منها والضغوط المادية والعائلية ومشكلة التفكير في المستقبل وما يتعلق به وما يقوم عليه وأمور لا حصر لها ولا عدد ، لكن في الأخير لدي تصميم وإرادة قوية وعزيمة لا تلين وأمل في الله سبحانه كبير باني سوف أحقق ما أريد ولكن المشكلة في الوقت فان قد ضيعت كثير من الوقت ولكن هناك مثل غربي يقول تأتي متأخر أفضل من أن لا تأتي أبداً أو كما قالوا

اهههههاهاهاهههههههههه


شكراً لكي على الاهتمام وأسف على شرح قصة حياتي مع خالص العرفان

فارس عبد الفتاح ... قومي عربي

القلم السكندري said...
This comment has been removed by the author.
القلم السكندري said...

السلام عليكم ورحمة الله وبركاته

بداية أعتذر عن تأخري في المتابعة والتعليق.. حيث أني أدور بين فكّي الدنيا ونادرا ما أستطيع فكاكاً.. فأرجو تقبل العذر

نأتي بعد ذلك للتاج..

بالنسبة للتجسس .. التجسس أو جمع المعلومات من خلال الوسائل الاعلامية عن أحوال المجتمع لا يتم من خلال المدونات او الفيس بوك فحسب.. بل يتم علي مستوي جميع الأدوات الاعلامية .. ومساحة التاجات اقل بكثير من ان تمثل معلومات ذات قيمة (مقارنة) إلي غيرها

ولكن هل الحل هو أن نصمت فلا نتكلم خوفا من ذلك الشبح؟

أم هو ترشيد الاستخدام والتحدث بوعي؟؟

البعض قد يفضل عدم الاجابة علي الملأ عن اسئلة شخصية وهذه حرية شخصية.. ولكن هناك مساحة اكبر من المعلومات الشخصية نستطيع التحرك فيها بمطلق الحرية من باب نشر عقيدتنا وافكارنا


تقبلي وافر التحية أختي الكريمة

ودمتِ بكل خير

اسماء واحلام فى وجدانى said...

يحتاج القلب

الى ثلاثة شهور على الاقل نقاهة

حتى يزال منه كل اثار الشك نهائيا

وخلال هذه الفترة

ستكونى للاسف الشديد

تحت المراقبة

فاحذرى

من نبضاتى

ومن كلماتك

وفى الاول وفى الاخر

احنا جاين نهدى النفوس

بس الاول طبعا لازم نصفيها

فتافيت said...

رغم انى مش فاهمة حاجة وعمري ما جالي اي تاج

بس حبيت اجي اقولك وحشتيني جدااااااااااا

وعارفة انى مقصرة في حقك

بس معلش بقى والله مشغولة

بعبك يا جووووومر

عاشقة الشهاده said...

السلام عليكم
اختى سلمت يداكى موضوع رائع
فاصبح من السهل معرفه كل شئ
من السهل جدا
نشكرك على التدوينه
وننتظر المزيد
اختك
عاشقة الشهاده

سجود said...

جزاكم الله خير على الموضوع
وهذه الزياره الاولى لى والمدونه جميله جدا
مدونة قل يا قلم

Soul.o0o.Whisper said...

علي محـمــــــد

أولا : أهلا و سهلا بحضرتك

حقيقى نورتنى
و يسعدنى و يشرفنى إنك تضيفنى لمدوناتك المفضلة
و شرف ليا بردوا إنى أضيفها عندى


و بعدين حضرتك تطول براحتك
حقيقى أسعدنى تعليقك
و حضرتك كلامك صح بخصوص الحكومات او المؤسسات هنا
لكننا نتكلم عن المؤسسات المعادية

التى اعتقد تحاول ان تجمع اكبر قدر من المعلومات الصحيحة

و التى اعتقد انها لن تجدها فى عالم المدونات
بشكل رئيسى
بغض النظر عن التاجات


اتمنى لو حضرتك تتطلع على البوست السابق




دمت بود

Soul.o0o.Whisper said...

فارس عبد الفتاح

أولا حقيقى بجد أنا بأشكرك على تعليقك اللى فعلا بيثرى الموضوع

و كلامك مظبوط جدا
و متفقة معاك
احنا نفسنا عاوزين نفهم نفسنا
و نثق بنفسنا
و نعرف صح ..نتعلم

عشان نعرف نتعامل معاهم صح



بجد سعيدة بتعليقك
و منتظرة المصطلح





و بعدين مش تقول من الاول انك بتتكلم عليا
طب خلاص يا نفسى
يارب تكونى بخير الوقتى
اه ..الحمد لله بخير
طيب الحمد لله يارب دايما
هههههههههههههههههههه




و بعدين ربنا يهون عليك غربتك
و ثقتك بالله احلى حاجة

من وجد الله فماذا فقد
و من فقد الله فماذا وجد؟؟؟




دمت بود

Soul.o0o.Whisper said...

القلم السكندري

أولا عذر مقبول
و ربنا يعنك يا بشمهندس يارب

بالطبع ليس الحل أن نصمت
مانت شايف لما سكتنا حصل فينا ايه

اكيد طبعا لازم نتعامل بوعى

بس انا عاوزاك تشرح الجزء دا بتفصيل لو سمحت
بعد إذنك يعنى
:)
(ولكن هناك مساحة اكبر من المعلومات الشخصية نستطيع التحرك فيها بمطلق الحرية من باب نشر عقيدتنا وافكارنا)



دمت بود

Soul.o0o.Whisper said...

اسماء واحلام فى وجدانى


تلااااااااااااااااااات شهوووووووووووووووور

و تحت المراااااااااااااااقبة


ربنا يحمينى من طلقاتك
قصدىىىىىىىىى
نبضاتك
و كلماتى
ههههههههههههههههههههههه


اه
واخدة بالى
بس هتصفيها بأنهى طريقة؟؟!!.

الرحمة
هههههههههههههه





دمت بود

Soul.o0o.Whisper said...

فتافيت

فتفوتى العسووووووووولة
حمدلله ع السلامة

ايه دا يابنتى؟؟؟
خضتينى عليكى
أنا قلت البت انفجرت


بس الحمد لله
طلعت خدعة
ههههههههههههههههههه




و لا يهمك يا جميل
اهم شئ تكونى بخير وتطمنينى عليكى
عشان انتى اللى وحشانى بجد





خالص ودى

Soul.o0o.Whisper said...

عاشقة الشهاده

أهلا بيكى
نورتى المدونة
و اتمنى مش تكون زيارة و خلاص


و متشكرة جدا على كلماتك



دمتى بود

Soul.o0o.Whisper said...

سجود

جزانا و اياكى يارب
و شكرا لكلماتك الرقيقة


و بانتظارك دائما

القلم السكندري said...

السلام عليكم مرة أخري

مقصدي من العبارة السابقة أنه::

ما المانع من أن نصوغ نحن أسئلة التاجات ونوجهها نحو نقاش أمورٍ فكريةٍ أعمقُ غلي الجانب الفكريّ منها إلي الجانب الشخصي

إدارة الدفة إلي العمق الفكري يقودنا إلي "شبه" اتفاقٍ سواءً من الذين لا يفضلون الإجابة علي المعلومات الشخصية أو من غيرهم..

كذلك يعطي مساحة أكبر للفائدة وهي مناقشة الفكرة بدلاً من مناقشة الشخصية
لا أدري هل وفقتُ في الإجابة؟؟

أترككم هنا لاذهب أعلق علي التدوينة الأخيرة

تقبلي وافر التحية