إحســـــاس ....... زمــــــــــــــــــــــــــان

أفتح الباب ...

أنتظر مَقْدِمه ..

فلما يرتئينى ..

يَحُثَ خطوته ..

أُسرع إليه ...

تحوينى ضمته ...

تسحرنى بسمته ...

تعجبنى هيئته ...

و يمضى بنا العيد ...

نشتاق عودته ...

......................

سلام الله عليكم و رحمته و بركاته

عيدكم مبااااااااااااااارك يا شباب ...

و إن شاء الله تكونوا كلكم بخير و صحة و سلامة و رضا

و قضيتم و بتقضتم وقت جميل ....

العيد فرحة ... و أجمل فرحة

تجمع شمل قريب و بعيد ...

أيوا فعلا .. العيد بيجمع شمل القريب و البعيد ،

تلاقى كله بيتصل على كله ...و نهنى بعض ..

و تلاقى النفوس كدا صافية ،

و استعداد كامل للمسامحة و الصفح ..

بجد شعور تانى خااااااااااااااااااالص ..

بس بردوا ، الفرحة بالعيد زمان مش زى دلوقتى ..

مش عارفة ليه كل ما بنكبر فرحتنا بالعيد بتقل ،

أو يمكن مظاهر احتفالنا بيه ..

أو حتى عادات و تقاليد الفرحة و الاحتفال بالعيد قلت و أختلفت ...

أفتكر لما كنت صغيرة ...

كان والدى ياخد اخواتى الصبيان ،و يروحوا يكبروا فى ميكروفون المسجد اللى جنبنا ،

<< ماكنش حد ساعتها بيهتم بالخلا ، و لا حتى إحنا البنات كنا بنروح نصلى صلاة العيد ..

بس كنت أحب أوى أقف فى البلكونة و اسمع صوت أخواتى الطفولى و هما بيكبروا فى المسجد ...

يااااااااااااه ...و الصبح لسه بيشقشق كدا و الهوا رائع رائع راااااااااااائع ...

كانت جدتى لوالدى هى الوحيدة اللى كانت بتحافظ على صلاة العيد بس فى البيت ..

ربنا يرحمك يا تيتة يارب بجد كانت من الأفراد القلائل اللى لهم تأثير جامد جدا بحياتى ...

المهم بعد صلاة العيد ... بابا ييجى و يعطينا العيدية ...

و طبعا مجهزين الهدوم الجديدة ، و اتصالات بين بابا و اعمامى عشان نتفق على لفة العيد ..

و نقوم مجهزين الفطار ... و ممكن كمان اعمامى و أسرهم بالكامل ييجوا يفطروا معانا أو لا ،

حسب ما بيوصلوا ...

بعد كدا من بدرى بدرى يمكن من 9 الصبح بنكون برا البيت ...

نزور قرايبنا اللى حوالينا سيرا على الأقدام ...

بعد كدا يبدأ مهرجان السيارات ..حيث أن بابا و كل واحد من اعمامى ياخد العربية بتاعته و نطلع على البلد ،

نقضى أغلب اليوم هناك ..ساعات كنا بنتغدى هناك ..

أو نرجع نتغدى فى البيت عندنا – اه ، أصل بيتنا هو بيت العيلة ، أو بيت الأمة على رأى صحباتى ههههههههه –

المهم بعد كدا نطلع بئا على قرايبنا البُعاد فى أطراف المنصورة .. نكمل اللفة لحد بالليل ..

طبعا كنا بنرجع نكمل سهرة أنا و أخواتى لحد الصبح ....

يعنى تنفض القعدة على 1-2 بالليل كدا ...

كله ينام لحد الفجر نقوم نصلى و نرجع نكمل نوم لحد مثلا 9-10 الصبح ،

و تبدأ جلسة المداولات بين بابا و أعمامى تانى عشان نشوف تانى يوم هنروح فين ،

و اللى غالبا بتكون بردوا فى البلد ...

بس بلد غير .. أصل أحنا يا جماعة الحمد لله عيلتنا لها فروع فى تلتتتتتتتتتتتتتت بلاد ..

فبنروح الأصل أول يوم ... بعد كدا نروح الاتنين التانيين تانى يوم ...

و الأغلب عقبال ما بنروح و نلف عليهم بيكون اليوم خلص ..

نرجع بردوا ممكن نسهر أنا و أخواتى لحد الصبح ...

بعد كدا تالت يوم ، لو مكناش روحنا لحد بنروح له ... ثم نبدأ فى استقبال زوارنا ثالث يوم فقط ..

و دا لأنهم بيكونوا عارفين إننا مش فى البيت أول و تانى يوم ...

و ياه ياه يااااااااااااااااااه .. لما كان بابا و اعمامى بتسابقوا على الطريق

و احنا نشجع بابا و اولاد عمى بيشجعوا اعمامى و كدا ...

كانت حاجة فوق الوصف صراحة ....

اااااااااااااااااااااااه ... فينك يا أيام زمان ..

الوقتى كل واحد أنشغل فى حاله ..

لكن يمكن لسه فى بعض التقاليد دى ..

الوقتى بئا .. فالحمد لله من حاولى 6 سنين كدا و لا حاجة بئينا كلنا نروح الخلا لصلاة العيد ..

يااااااااااااااه ... بجد احساس تانى خالص وقفتك وسط الحشود دى ،

و الفرحة مالية العيون ، و كله بيهنى بعضه ...

بجد سبحان من شرع صلاة العيد دى ، أنا الوقتى بئيت لو مش رحت صلاة العيد ،

مش باحس إن العيد جه ..

بعد كدا نرجع البيت ، نجهز الفطار ..و نسيت أقولكم إن لينا طقوس محددة فى الفطار..

يعنى الأصناف اللى بتكون موجودة على السفرة و كدا ..

و بعدين لسه الاتصالات بين بابا و أعمامى ، لكن الأغلب إن الصحبة بئت تقتصر على

قرايبنا اللى حوالينا ... أو يمكن لو هننزل البلد الأصلية حاجة بسيطة كدا ..

و نرجع ..

ممكن اليوم يتقضى كدا بس ، و أفضل حاطة ايدى على خدى بئيت اليوم ..

أو ممكن نروح – نروح دى يعنى أنا و بابا و ماما و أختى بسسسس- حيث أن اخواتى الولاد

خلاص واحد متجوز و مسافر برا ..و التانى له حياته الخاصة

و اعمامى طبعا لكل واحد ظروفه ... فبئيت مش باحس بنفس شعور اللمة و الخروج مع بعض و كدا ..

و ممكن بئيت أيام العيد نقضيها فى البيت من غير مرواح و لا مجى ... يعنى لو حد جالنا زيارة ..

و كمان بئالى كام عيد مش جبت هدوم العيد ...عااااااااااااااااااا

دا بالنسبة ليا أنا ... إنما فى ناس العيد بالنسبة لها بئا الخروج و الفسح بس

و مافيش زيارات لأقارب و لا شئ .. و دا أنا بارفضه و بشدة ..

و ناوية إن شاء الله لو ربنا أحيانى كدا و رزقنى كدا بأسرة جميلة ..

لازم لازم لازم بإذن الله ... معنى صلة الارحام دا يكون فى دمهم ..

آه ...و ان شاء الله لازم آخدهم لكل قرايبهم سواء من جهتى أو جهة والدهم

و كمان تقاليد الفطار دى ...

لالالالالا ... مش هتنازل عنها أبدااااااااااااا

و اللى طبعا قبل دا كله صلاااااااااااااااااااااة العيد فى الخلااااااااااااااااااا

دا شئ اساسى ، و أصلى و حتما و لابد ... : )

امممممممممممممم

عاوزة أتكلم كتير بصراحة عن العيد و عن زمان و دلوقتى ..

و حاجات بئت غريبة بتحصل فى العيد ...

بس كفاية كدا ...رغيت كتير النهاردة ..

و أنا أصلا مافياش نفس ...و صوتى رايح خالص

و ...........

لا تنسونى من صالح دعاؤكم ..

و .........

باحبكم فى الله