طيفى الأثر .. و أجازة سفر

كيفكم جميعا .؟؟؟ يارب تكونوا بصحة و سعادة يااااااااااااااااااارب

أعزائى المدونين ..

طبعا تضاربت الاراء حول ماهية البوست الماضى ،

فمن المدونين من زعل ..و طالب بتعويض مادى و معنوى ... : )

و منهم من قال أننا بهذا قد نضع رأيا فى شخص بصورة سطحية،

أو نكون كونّا رأيا من موقف ثم يتضح العكس ...

فطبعا حبيت بس إنى أوضح وجهة نظرى بالموضوع ،

وحتى لا يحدث لبس ... وجب التنويه : )

طبعا طبعا .. من أكتر الناس اللى زعلت ، شخص ماقدرش أزعله خالث خالث

هو فيلسوفى العزيز فشكول .. و اللى أشترط للمصالحة إنى أنزل بوست كله ورد

و فل و حاجات كدا كتير أنا مش قدها ..: )

بس طبعا طلباته أوامر و أنا ماقدرش أزعله أبدا ..

طبعا دا لفيلسوفى العزيز الاول ..ها ؟؟

كدا مرضى؟؟

طب حبة بئا للمدونين عشان مايزعلوش هما كمان : )

طيب نيجى بئا لموضوع " عابرون بلا أثر "

الموضوع أولا مش حكاية حكم على الناس

و لا حكاية تقلبات مزاجية

الموضوع كله بيتكلم عن احساس أو شعور

أو انطباع بيسيبه كل واحد منا جوا شخص ما ، قابله فى لحظة ما ،

فى مكان ما ..

مش حكم عليه ، لأنه يمكن ماعملهوش أصلا .. بس هو بيكون شعور داخلى

بمعنى ..

أنا مثلا لو ماشية الصبح .. و لقيت كل الناس فى الشارع ، ماشية مبتسمة ،

تلقى تحية الصباح .. أكيد بالتبعية هتلاقينى مبتسمة ، مبسوطة

و بأصبح على كل الناس ..

دا مش حكم إن الناس دول حلوين .. لكن جوايا شئ ممكن نسميه تفاؤل .

مثلا .. دخلت الصيدلية لقيت زمايلى بيضحكوا و يهزروا ، هأبئا مبسوطة و أشاركهم ضحكهم

كدا .. دا الأثر اللى هما سابوه جوايا .. لكن مش ابدا حكم ..

لأن أصلا مش ممكن أحكم على شخص إلا بالمعاشرة و التعاملات ،

و دا صعب جدا جدا من مجرد لحظة أو موقف .

مثلا .. أنزل الصبح ، ألاقى اتنين ماسكين فى خناق بعض ،

و بيسبوا بعض .. دا يؤذينى أيما إيذاء ..

من جوايا هأبئا مقفولة .. متضايقة ، مش مستحملة كلمة..

مثلا .. جه شخص يطلب دوا ، مثلا كان ناقص أو كدا

و انتوا مستقصدينا و مش بترضوا تطلعوا الادوية الا للمعارف و حاجات كدا

دا طبعا بيسيب جوايا أثر سئ للغاية ..

مش أبدا حكم بالعقل .. لا دا شعور من غير ما تقصد بتلاقيك حسيته

تبعا لمواقف و أمور حياتية تمر عليك فى كل لحظة ..

عشان كدا بأحاول إنى أكون مبتسمة على طول ، مش أتعصب

أمتص كل شخص أدامى .. أعامله باللى يحبه ..

خاصة لو شخص الله أعلم هأشوفه تانى و لا لا

مثلا مريض جه الصيدلية .. أو أنا بأشترى شئ من محل

دايما بأحاول إنى ماضيقهوش .. أحس إنه مرضى و مبسوط

و أنا بردوا أكون مبسوطة ..بس بأسلوب هو يحبه و يقبله

و اللى فعلا لو دورنا جوا ديننا الجميل ..هنلاقى تعاليم الرسول –صلى الله عليه و سلم-

" تبسمك فى وجه أخيك صدقه "

" افشوا السلام "

" لا تغضب "

" ما كان الرفق فى شئ إلا زانه ، و ما نزع من شئ إلا شانه "

" ليس المؤمن بطعان و لا لعان و لا فاحش و لا بذئ "

اعتقد بس دول لو التزمنا بيهم .. أعتقد من مجرد لحظة واحدة بس

هنسيب أثر جميل فى نفس كل شخص بيقابلنا فى حياتنا

أتذكر كلام شخص قريب إلى قلبى ، أمضى جل حياته بالخارج ،

قال : بتلاقيهم هناك اسلام بدون مسلمين ..

ماشيين فى الشارع ، أو الشغل ، فى أى مكان ،

مبتسمين ، و هاى ...هاى .. بالظبط " أفشوا السلام "

تحس إن الدنيا كلها بتضحكلك ..

و دا اللى انا كان قصدى عليه .. إنى أكون طيف جميل لكل شخص مر بمدونتى

مش شرط يكون كون رأى فيا

لكن لما مر من هنا ..حس إنه ارتاح ، او انه مبسوط ..

أو على الأقل مقلش ايه المدونة الكئيبة دى ؟؟.. و راح و مش رجع تانى ..

أما بئا الناس اللى مننا و علينا .. و خاصة الجماعة البلوجرية من الأهل

و الاصدقاء و الجيران ...

اللى دايما الابواب متفتحة على بعضيها ، و عارفين بعض

فأكيد لو حصل مرة و كنت متضايقة و قلت كلمة مش و لابد ..

أولا هتعذرونى ..

ثانيا هتسألونى مالك ؟؟

ثالثا هتواسونى و تحاولو تطلعونى من المود اللى انا فيه ..

مش كدا و لا ايه؟؟؟

لالالالالا ... اوعو ، أزعل أوى ..

عشان انتو ماتعرفوش بأعزكو أد ايه ..و بعدين آخد فيكو مقلب ،

يبئا منظرى وحش اوى قدام نفسى ..

اه .. اصلى كل ما تقوم عليا و لا تقولى كلمة كدا و لا كدا أشكمها على طول

أقولها باقولك اييييييييييه ؟؟.. خليكى طيبة أحسن لك : )

تقوم تسكت و تبئا طيوبة و عسولة .. شفتوا بئا .. : D

يارب أكون قدرت أوصلكو اللى انا قصدته بالبوست اللى فات ،

هو إننا نحاول نعيش الحياة ببساطة .. و باقبال رغم الظروف ، و رغم كل شئ بيقولنا

اتضايقوا و اتنرفزوا و اتعصبوا ..

ازعلوا و اظلموا و ايأسوا ..

انهشوا فى بعض ، و كشروا فى وش بعض ،

و شيلوا من بعض ...

لااااااااااااااااااااااااااااااء ... احنا لسه جوانا قلبنا الابيض

برغم كل الظروف ، برغم كل المثبطات ..

بردوا هنضحك .. بردوا هنهزر ..

بردوا هنسأل على بعض ..

و نبتسم فى وش بعض ..

و مش هنشيل من بعض ..

يعنى كفاية الظروف تكون علينا ،

مش الظروف و انفسنا كمان ...

و بكدا نكون ... طيفى الأثر .. : )

ملحوظة كبيييييييييييييييييييييرة جدااااااااااااااااااا :

هتأخر عن زيارتكم شوية ، أصل بإذن الله ممكن النهاردة بعد الشغل أروح لقاء مدونى الدقهلية – ربنا ييسر-

و بعدها يادوب أرتب حاجتى عشان بإذن الله مسافرين الجمعة الصبح ..

مش عارفة هنقعد أد ايه بس اكيد بإذن الله مش هيزيد عن أسبوع

عاوزة أرجع بئا ألاقى كل شعب بلوجر عامل انقلاب ،

و بيطالب بعودتى ... : )

أستودعكم الله الذى لا تضيع ودائعه

و دمتم جميعا بكل ود ..