حد عنده حــــــــــــــــــــــــــــــــل؟؟؟؟

ازيكم يا جماعة ؟؟ اخباركم ايه؟؟

طبعا مش محتاجة أقول إنى آسفة على التأخير ..

ياريت تعتبروا انكوا بتقروها فى بداية كل بوست من هنا لحد ما ربنا ييسرها و يفرجها من عنده .. يا مسهل يارب

معلش انا آسفة على التأخير فى الرد على تعليقاتكم ، بجد والله التعليقات كلها مهمة ،و أنا سعيدة بيها ، و شكلى هأعمل بوست تانى ليها ، بس حاليا حاجات تانية شغلانى ،و قلت أدخل أفضفض معاكو شوية ، يمكن حد عنده كلمة يقولهالى ، تكون سبب لحل اللى انا فيه دا ... الله المستعان .

طبعا أنا قلت لكم إنى حاليا الوقتى بأظبط ورق التكليف ، ربنا ييسر و يكتب لى شئ كويس عشان بجد شكلى هأعتزل و اقعد فى البيت على رأى صاحبتى .

طبعا أنا دخلت حملت دليل التكليف بتاعنا ، قعد يحمل يحمل << أصل النت كان بطئ ..

و بعد ما خلص بأفتح ... لقيت بسم الله الرحمن الرحيم ..خير اللهم اجعله خير.. حاجة كدا 96 صفحة ...ليييييييييييه؟؟ منهج دراسى؟؟

المهم قعدت بتاع أربع ساعات بس اقرؤه << طبعا قررت انى أءجل الفهم لمرحلة قادمة لأنى كنت خلاص هنجت ، المهم بعد ما خلصت بأبص بئا فى الاستمارة اللى فى آخر الدليل ألاقى ايييييييييه؟؟؟ ألاقى انها لدفعة 2007 طب فين بتاعت 2008 يا جماعة ؟؟ مش عارفة!!.

المهم .. بعد فترة من محاولة الفهم ، أكتشفت انى نزلت الدليل بتاع السنة اللى فاتت ، و طبعا مطلوب منى انى انزل بتاع السنة دى ...عاااااااااااااااااااا .. طبعا كان نفسى اخبط دماغى فى اى حيطة ..

مش مشكلة .. خير خير ، و نزلت الدليل بتاع السنة دى ..الحمد لله طلع 39 صفحة بس .. كانوا طبعا تكرار لبتاع السنة اللى فاتت مع بعض الاختلافات فى الجهات المطلوب لها صيادلة و العدد المطلوب للادارات و كدا يعنى ... قلت الحمد لله ،و قفلت ما قرأتش : )))

بس يا جماعة اكتشفت ايه دا ؟؟ بجد احنا لو دخلنا مسابقة احلى كلام تحميس و تشجيع ناخد الجايزة الاولى بجدارة ..

حبيت بس أبدأ الاول ..بسم الله الرحمن الرحيم كدا بمقتطفات من "الدليل الخيالى ، لكل صيدلى مثالى" ..

طبعا نبدأ بكلمة الوزير ... ربنا يخليهولنا يارب ..

" أبنائي الصيادلة والصيدلانيات

يسعدني أن أتقدم بخالص التهنئة متمنيا لكم التوفيق في مرحلة التكليف بالمجال الصيدلي بوزارة الصحة والسكان التي تعمل جاهدة علي توفير الصحة للجميع و ذلك بتقديم الخدمات الوقائية و العلاجية والتاهيلية من خلال تنفيذ الإستراتيجيات التالية "

يا سلاااااااااااااااام يا سلام .. ايه الحلاوة دى .. قول يا وزيرنا قول ..

طبعا مش هأقول ايه الاستراتيجيات دى ، عشان اكيد كلنا عارفينها و حافظينها ، فمافيش داعى نضيع الوقت ..

و بعدييييييييييييييين ... " و أملي كبير في أن تكون لكم رؤية واضحة ليس في مجال عملكم الصيدلي فحسب بل في كل مجالات الحياة" .. طبعاااااااااااااااااا ، أنت بتتكلم ازاى ؟؟ واضحة وضوح القمر ليلة واحد فى الشهر العربى .. : )

" وأن تقوموا بدراسة وتحديد المشاكل الصحية وتكون لديكم القدرة علي الإبداع والابتكار لتقديم الحلول والبدائل المناسبة لحل مثل هذه المشاكل و أن تبذلوا الجهد لمواكبة التطور العلمي و التكنولوجي وذلك باستخدام وسائل المعرفة والاتصالات الحديثة وأن تؤدوا واجبكم في منظومة العمل الصحي بروح الفريق والتعاون المثمر البناء للحصول علي المؤهل الأعلى لتقديم أفضل خدمة ممكنة. "

أى نعمن ..اى نعمن .. لتقديم افضل خدمتن ممكنتن .. و تحيا مصر ، و تسقط اسرائيل ...هههههههههههههههههه

" ختاماً فإن الاهتمام بالمريض المصري وحسن استقباله ومعاملته المعاملة الطبية هي الغاية والمقصد حتي نواصل العمل معاً لإعلاء شأن الصيدلي في مصر ولكي نحافظ علي المكانة التاريخية لمصرنا الحبيبة "

أكيد أكيد .. أنا بردوا بأقول الكلام دا مر عليا قبل كدا ، بس مش فاكرة فى أى ورقة بردى صراحة ... ياااااه يا مصر ، حبيبتى والله ..

و طبعا بعد كلام السيد الوزير .. ربنا يعلى مراتبه كمان و كمان .. ندخل بئا فى الجهات اللى طالبة صيادلة .. دا طبعا غير الادارات و الوحدات اللى اصلا بنتوزع عليها اجبارى ..

طبعا تحتل صدارة الجهات دى بجدارة فى كل السنين تقريبا .. " هيئة النقل العام بالقاهرة" ؟؟؟؟؟ .. أكيد عاوزين صيادلة يعطوها حبوب مسهلة لتسهيل الحركة بها .. حيث انها تعانى من تقلصات و امساك مزمن !!

و طبعا كنت أول مرة اسمع عن " الهيئة القومية للرقابة والبحوث علي المستحضرات الحيوية " و " الهيئة القومية للرقابة والبحوث الدوائية " .. يا راجل ، و الهيئات دى تفصيل و لا جاهز؟؟

و بردوا طالبين صيادلة لـ " معهد بحوث الحشرات " .. اممممممممم ، و ياترى العهدة فى الحالة دى ايه ؟؟ اقراص ؟؟ حقن؟؟ لبوس؟؟ مراهم و كريمات؟؟

و ياترى الحقن عضل ؟؟ ولا وريييييييييييييد ؟؟؟

و طبعا انشكحت اوى لما قريت " أمانة المراكز الطبية المتخصصة مستشفي .... " ، أصلى ما سمعتش أمانة دى إلا فى حاجتين بس فى حياتى .. أمانة الحزب الوطنى ،و أمانة المرأة ... فالحمد لله الامانة امتدت لنا فى أراضى الوزارة المهيبة .. حمدلله ع سلامتها : )

و فى بردوا " صدر وحساسية امبابة " .. يا شييييخ ؟؟ هى امبابة بئالها صدر و حساسية؟؟ يااااااااه ربنا معاها ، و يارب متوصلش المنصورة .. مش ناقصين حساسية والله ... عندنا ربانى ..

بس دا طلعت المنصورة عاوزة صيادلة كتير والله .. ربنا ييسر ...

و طبعا الحمد لله إن الدليل السنة دى خالى من السجون ... اه والله .. بتاع السنة اللى فاتت كان تقريبا كل السجون طالبة صيادلة ... تقريبا اللى كانوا موجودين قضوا الفترة و طلعوا .. الحممممممد لله ،

بس دا يعنى ان الدفعة التانية دخلت : (((

و على رأى واحدة صاحبتى " ايييييييييييييييه ، التكليف علينا حق " ..هههههههههههههههه

طب ندخل بئا فى العكننة ،و وجع الدماغ و ركزوا معايا .. ركزتوا ؟؟ طب ركزوا كمان شوية ..

بجد الموضوع تاعبنى جدا ، لأنى كنت فاكرة الموضوع وحدة ،و ظبط مع زمايلك ، و روح يوم ولا اتنين فى الاسبوع ،و خلاص يعنى .. طبعا ، عشان طيبة و ماليش فى الحاجات دى ..عااااااااااااااااااااا

المهم امبارح بئا ،و انا قاعدة مع صاحبتى انتيمتى و بنتكلم بئا و باقولها على الجهات اللى فوق دى ، و قاعدة باضحك بئا و منشكحة ، قامت قالت لى اصلك ماسمعتيش اللى سمعته ، قلت لها خييير؟؟؟ ، قالت لى الدكتور صاحب الصيدلية هو اللى كان مسئول عن توزيع الدكاترة " الاطباء مش الصيادلة " فى الادارة يعنى .. فقمت سألته باقوله يا دكتور بما اننا على اعتاب التكليف ، فياريت حضرتك تدينى من خبراتك بئا ، و تقولى اتصرف ازاى ؟؟...

قام قالها ايييييييييه ؟؟

قالها .. لا بصى التكليف دا بئا مش عاوز تأفيل .. اه ، لازم تكونى مصحصحة كدا و مفتحه ،و بعدين علاقات بئا ، عشان الناس تحبك .. و بعدين ياما هتشوفى ،طبعا انتى هتكونى مسئولة عن عهدة ، العهدة دى ممكن تكون حقن أو اشربة او اقراص ..كدا يعنى ، و طبعا مش كل حاجة حلوة و جميلة ..

يعنى مثلا ، فى الطلبية اللى جت كام امبولة مكسورين ، واحدة اتكسرت من الممرضة ، كدا يعنى .. هتتصرفى ازاى ؟؟ و دى عهدة ؟؟

إزاى يا دكتور ؟؟...

طبعا انتى عندك تذاكر المرضى متسجلة عندك و محتفظة بيها ، تقومى على كل تذكرة ، ضايفة امبولة من دول ، هما مااخدوهاش و لا اتصرفوا أصلا ، بس دى عهدة و هتتسألى عنها ، ولو فى نقص طبعا هتتعاقبى فيها ... و دا طبعا بتعمليه بالاتفاق مع الدكتور المسئول ..

<< يا سلااااااااااااااااااام .. والله؟؟؟.. حاجة حلوة خالص

و بعدين ممكن الاشربة تجيلك فى عبوات كبيرة ، حاجة زى الصفيحة كدا .. انتى مثلا طالبة 3 ، يقوم يجيلك تلاتة ، تفتحى تلاقى اتنين كويسين و التالتة محطوط فيها اى حاجة .. حتى ممكن تلاقى قالب طوب ..

<< يا سلاااااااااااااااااااااام ... ايه الحلاوة دى ، تخيلوا يا جماعة بافتح الاقى قالب طوب .. طب ادوبه باى مذيب دا عشان اعمله شرب؟؟

تقومى تعملى ايه بئا ؟؟ ... طبعا بردوا هتطلعى التذاكر القديمة و تقعدى تقسمى الدوا دا عليهم لحد ما تخلصى العبوة دى ،

نعممممممممممم ... طب يا دكتور مفيش حد بيشتكى ، مفيش أى وسيلة للاعتراض على كدا ؟؟

لا ، ماهو انتى اللى هتضرى فيها ، لانك ماضية على العهدة دى و انك استلمتيها ، يعنى لو قدمتى شكوى او بلاغ انتى اللى هتتحطى فيها ، هو يعنى حد شاف؟؟ ..و السرقة غالبا بتكون فى المخزن الرئيسى ، او اثناء النقل منه .. كدا يعنى .. و طبعا أغلب الحاجات اللى بتتسرق دى بيسرقها مدمنين ..و لازم تمشى امورك عشان يحبوكى ..

<< ياعم انشاله ماحبونى ... ايه دا ؟؟؟ يعنى ايه يعنى ؟؟

و بعدين ممرضة جت طلبت منك سرنجات ، علب دوا ،كدا يعنى ... عشم لنفسها ، بردوا صرفى امورك ، و اديها ،هى لسه هتروح تقطع تذكرة بـ 3 و لا 4 جنيه ؟؟ مشى أمورك عشان يحبوكى ..

<< لا والله ... حاجة لذيذة لذيذة يعنى ..

طب و الناس اللى تروح تتعين فى جهة من الجهات القضائية و كدا ..

لالالالا ... دى ألعن ، لأنهم هيضطروا يشهدوا على حاجات غلط ، تقارير لازم يطلعوها صح مهما كان ، يا إما هيضروا فيها ، و الشاطر اللى يمشى أموره ..

<< طبعا انا مصدومة و مش هأعلق ...

و قالت لى ..طبعا أنا سمعت الكلام دا من هنا ، و سبحان الله بعدها قدرا كان تفسير آية " إِنَّا أَنزَلْنَا التَّوْرَاةَ فِيهَا هُدًى وَنُورٌ يَحْكُمُ بِهَا النَّبِيُّونَ الَّذِينَ أَسْلَمُوا لِلَّذِينَ هَادُوا وَالرَّبَّانِيُّونَ وَالأَحْبَارُ بِمَا اسْتُحْفِظُوا مِنْ كِتَابِ اللَّهِ وَكَانُوا عَلَيْهِ شُهَدَاءَ فَلا تَخْشَوُا النَّاسَ وَاخْشَوْنِ وَلا تَشْتَرُوا بِآيَاتِي ثَمَنًا قَلِيلًا وَمَنْ لَمْ يَحْكُمْ بِمَا أَنزَلَ اللَّهُ فَأُوْلَئِكَ هُمُ الْكَافِرُونَ "

و إزاى ان ربنا نزل التوراة و وضع فيه الحكم ، النبيون بلغوا احكامه دى لليهود و الربانيون ( اللى هما تفرغوا للعبادة) و الاحبار ( اللى عندهم العلم ) واستحفظوا عليه ..لكن هما اخفوه ،و ما أظهروش الحق ...لأن الحق شديد ، و أد ايه هو صعب ،عشان كدا جه بعدها " فلاتخشوا الناس و أخشون " .. يقينك بس بربنا هو اللى هيدفعك انك تصر على الحق مهما كان ضرره عليك ..

قلت لها : فعلا الحق صعب ، و محدش بيرضى بيه .. بس انتى الوقتى هتبئى بين حاجتين بيشدوكى ، انك الوقتى محطوطة فى مكان و لازم تظهرى الحق ،و التانى الضغوط اللى هتبئى عليكى و انك ممكن تضطرى تعملى حاجة غصب عنك "

قالت لى : بصى أنا شايفة ان البيت بيشدنى .. يا ستى أنا اتجوز و اقعد فى البيت ، بلا عهدة ،بلا بتاع ، مالها القعدة فى البيت ؟؟

و طبعا ضحكنا على مرارة .. فعلا الوضع صعب ، و فعلا عشان تحافظ على مبادءك و قيمك شئ مش سهل

قالت لى بصى احنا نسيبها لله ،

ايوا ماهو الظاهر كدا ان دا اللى هيحصل

قالت لى بس الوقت بيأزف علينا و لازم نقرر .. كدا ماينفعش ، بس بردوا بنقعد نفكر ، و نفكر و نفسيتنا بتتعب و فى الاخر بردوا بنسيبها لله

قلت لها بصى مفيش غير اننا ندعى ان ربنا يحطنا فى المكان اللى يستخلفنا فيه ، خلاص أنا تعبت ..

بجد تعبت .. و حاجات كتير جت فى دماغى ، و قصص كتير اتحكت لى ، و مواقف شفتها .. بجد كله صعب ،صعب .. بجد عاوزة نصيحة حد مجرب ، و اللى عنده خبرة ياريت مش يتأخر عليا ...

انا فى صراع رهييييييييب بجد ... و ربنا بجد يختار لنا الخير ، و حاجة ترضيه

معلش طولت عليكم .. بس حبيت أفضفض معاكوا ، و قولولى نصيحتكم ..