تـــأمــــــــــــــلات 2

السلام عليكم و رحمة الله و بركاته

كيفكم يا شباب؟؟؟ و اخبار رمضان معاكم ؟؟

و جرى جرى بئينا فى نص الشهر ....

سبحان الله بجد ، فعلا الايام ماعدتش فيها بركة ..

ايييييييييييييييييييييييييييييه ....دنيا << هههههههههههههههههههههه

المهم يارب تكونوا كلكم بخير و ماشيين فى رمضان تمام

عارفة إنى أتأخرت عليكم ..جاية النهاردة نكمل مع بعض تأملات فى سورة التوبة

يمكن موضوعنا النهاردة هيتطرق لحاجات خارجها شوية بس بردوا كلو فى النهاية بيصب فى نقطة واحدة

ياللا يا جماعة بما إنكو صايمين ، فيسعدنى و يشرفنى أعزمكم و بقلب جامد على شاى ...قهوة ... اللى عاوزينه

و ببلاش ... بس لحد قبل المغرب بسسسسسسسسسسس

بعد كدا كلو بحسابه ..ههههههههههه

أصل الموضوع عاوز مخمخة ، و انتوا عارفين مامنعش عنكو حاجة ...ههههههههههه

طب ياللا نكمل طبعا قلنا ان ربنا قايض المؤمنين بأن اشترى منهم انفسهم و أموالهم مقابل الجنة

و دا طبعا تكريم لهم ، و رفع لمنزلتهم ...لأن طبعا ربنا غنى عن كدا و مش هننفعه بشئ و لا هنضره بشئ

إنما أولا وأخيرا هو لانفسنا احنا .....

طيب ... ياترى سألنا نفسنا ، يعنى ايه اشترى مننا أنفسنا و أموالنا ؟؟

طبعا هتقولولى اننا نبذلها فى سبيله ...

طيب ماشى ، بس إزاى بردوا مش فاهمة ؟؟؟!!..

هل دا يعنى جهاد ، و لا بالطاعات و العبادات ، و لا ايه بالظبط ؟؟

طب أنا أقول اللى انا فاهماه ، و كل واحد يقول اللى عنده ...اتفقنا؟؟

برأيى إننا عشان نجاوب على السؤال دا ...يبئا لازم نعرف الاول هو ربنا خلقنا ليه؟؟؟

ياترى ربنا خلقنا ليه ؟؟؟ نيجى لأوائل سورة البقرة آيه 30 " و إذ قال ربك للملائكة إنى جاعل فى الأرض خليفة " ... إذن نحن خليفة الله فى أرضه

طب و ايه كمان ... سورة الذاريات آيه 56 " و ما خلقت الجن و الانس إلا ليعبدون " ... إذن ربنا خلقنا للعبادة

طب إزاى خليفة فى الأرض ، و إزاى عبادة ؟؟؟

المشكلة عندنا ... إننا دايما فاصلين الدين " كعبادات " فى كفة و الدنيا " بكافة مافيها " فى كفة ... ويا إما نتقوقع على نفسنا و نقعد فى صومعة نصلى ... يا إما ننطلق للدنيا بكافة ملذاتها و مالناش فى الطاعة ...

فى حين إننا لو فعلا فكرنا شوية مش هنلاقى أى تعارض ...بس الأول نفهم .... يعنى إيه عبادة !!

العبادة برأيى هى تطبيق تعاليم الاسلام ...لأنى لو طبقتها يبقى فعلا كدا أنا بأعبد ربنا ،

طب هيا ايه اصلا تعاليم الاسلام ، أو ماهى جوانب التى يشتمل عليها الاسلام ؟؟؟

طيب عشان نكون واقعيين بردوا و ماشيين على الطريق الصح و ما نقعش نستشهد بآيات وأحاديث فقط ، طبعا عارفين إن الرسول صلى الله عليه و سلم هو خير من طبق الاسلام ، قالت عنه السيدة عائشة " كان قرءانا يمشى على الارض " و بما ان القرآن هو شريعتنا ... يبقى تطبيق القرآن هو الاسلام

طب تعالو نشوف الرسول صلى الله عليه و سلم كيف كانت حياته ؟؟

هل اقتصرت على صلاة و صوم فقط؟؟

لا ...فبجانب الصوم و الصلاة و بقية أركان الاسلام ....كان رسول الله صلى الله عليه و سلم كريما عطوفا رحيما، بمعنى أصح كان أحسن الناس أخلاقا ... كان بارا بأهله ، بارا بأصدقائه ، حسن المعاشرة ... يعنى بردوا بمعنى أصح أحسن الناس تعاملا ... و طبعا مش هنختلف إنه كان أحسن الناس فى أدبه مع ربه و مع نفسه و غيره ... يعنى أحسن الناس أدبا .. و بردوا مش هنختلف إنه كان أيقن الناس إيمانا .. و أطهرهم عقيدة

طب ياترى ماسألناش نفسنا هو الرسول صلى الله عليه و سلم كان هذا الشخص ليه ؟؟ ياترى بس عشان عادات و تقاليد صقلته ؟؟ طب و الصحابة ...طب و تابعى الصحابة .... طب و تابعى التابعين ؟؟؟ لا طبعا ...التفسير الوحيد إن

الإسلام = عقيدة + طاعات + أخلاق + آداب + معاملات

بدليل إن كتير من الصحابة أخلاقهم اتبدلت بعد ما انتقلوا للاسلام و ناس كتير اوى لحد يومنا دا

طب تعالوا نفصل مع بعض أكتر عشان نفهم ....

أولا : الاسلام عقيدة :-

فالمسلم يؤمن بالله و الملائكة و بالرسل و بالكتب و بالغيب و بالقضاء و القدر و بالبعث و باليوم الآخر و بالجنة و النار ...

و لو فعلا احنا آمنا بالحاجات دى كلها حق الايمان ..لكفتنا ، و لقينا نفسنا أصلا دون تفصيل لبقية الجوانب بتيجى لوحدها ...

طب إزاى يعنى ...سحر و لا ايه؟؟؟

هههههههههه ....لالالالالالا ،تعالوا نشوف

أولا المسلم يؤمن بالله : لو فعلا مؤمنين بالله و عارفين إنه معانا دايما و انه سندنا و به الحول و القوة ، و إن ماحدش يقدر يعمل أى حاجة إلا بإرادته ...هتلاقينا مطمئنين ، مش خايفين من حد .. لأن كله بإرادة ربنا

لو مؤمنين بالقضاء و القدر : هتلاقينا راضيين بكل اللى ربنا كاتبهولنا سواء إحنا شايفينه حلو أووحش ، لأن أكيد ربنا مش هيكتب علينا شئ وحش .. بالعكس بعد لما بنفهم الحكمة من ورا كل حاجة ، بنقول سبحانك يارب فعلا كان خير

لو مؤمنين إن الرزق من عند ربنا : هنسعى ليه بالطريقة اللى ترضيه عننا ، مش هنمد إيدنا لقرش حرام أوهنبص للى فى إيد الناس ...

لو مؤمنين بجد باليوم الآخر والبعث : كنا هنعفو عمن ظلمنا ، أو على الاقل هنبقى عاوزين ناخد حقنا فى الآخرة لأنها أحلى وأدوم من الدنيا ....

حاجات كتير جدا ، بل كل حياتنا هتتغير لو بس عقيدتنا تبقى صح

ثانيا : الاسلام فروض و طاعات :-

طبعا عارفين أن الاسلام هو شهادة ألا إله إلا الله و أن محمدا رسول الله ، و إقام الصلاة و إيتاء الزكاة و حج البيت و صوم رمضان ...

ماشى جميل ...بس دى هى الاعمدة .. الاركان

مش أنتوا عارفين إن أى بيت لازم له عواميد ، طب ينفع الناس تيجى تسكن فيه كدا؟؟؟

امممممممممممممم .... اعتقد مش كفاية، صح؟؟

يعنى لازم له طوب و مونه و بعدين يتوصل له ميه و كهربا و يتغفأ و ياخد له كام وش ، و يتدهن و بعدين نجيب العفش و الديكورات ...هه ، لا دا الموضوع طويل

ربنا يكون فى عون الشباب ،واحنا نقول مابيتجوزوش ليه ...هههههههههههههه

خلينا بس فى موضوعنا الاول ... إذا كان دا الحال فى بيوتنا العادية ..ما بالك بئا بيت روحك ...البيت اللى هتوصل بيه لربنا ..مش لازم نتعب فيه شوية ... على العموم مش هاقول هنعمل فيه إيه ... كل واحد و حسب ما يعيش نفسه بئا

أنا قلت و خلاص

ثالثا : الاسلام أخلاق و آداب :-

هل حد فكر مرة إن أخلاقه جزء من دينه ؟؟... و لا هى عادات و تقاليد كل واحد يتشربها حسب مجتمعه؟؟؟

اعتقد لو فعلا فكرنا فيها كجزء من الدين هتفرق جامد معانا ، و هى فعلا جزء من الدين ...بدليل قول السيدة عائشة ،و كمان قول رسول الله صلى الله عليه و سلم " إنما بعثت لأتمم مكارم الأخلاق " يعنى بجد أهو الأخلاق أصلا أساس ديننا ...كمان حديث رسول الله صلى الله عليه و سلم مش فاكره نصه بالظبط انما فيما معناه " أن أقربكم منى مجلسا يوم القيامة أحاسنكم أخلاقا " الأخلاق دى مش منه و لا فضل مننا إذا قمنا بيه ماشى ماقمناش بيه خلاص ...لا ، دا حتى يوم القيامة ممكن ربنا يسامحك إذا قصرت فى حقه ، إنما لا يمكن أبدا يسامحك إذا قصرت فى حق عبيده ..

من أجمل ما قرأت فى شأن الاخلاق ما كتبه الشيخ محمد الغزالى رحمه الله " و فرق بين المطالبة بأدب ما على أنه خلق عام ، و بين التكليف به على أنه دين كسائر العبادات المفروضة فى هذا الدين "

إيه دا ؟؟؟ يعنى أخلاقى فرض عليا ؟؟؟

أيوا و لازم تقومها حسب تعاليم دينك ،

و من هنا هنفهم ليه كان رسول الله يقابل الاساءة بالحسنة ، و واجب علينا احنا كمان نقابل الاساءة بالحسنة ... أصل الشخص اللى بيسئ دا مش مجرد إساءة ، لا دا عصى ربنا ، و لم يقم بعبادته تجاه خلقه على الوجه الامثل ، لكن أنا ... أُحسن ، أصل أنا كدا فى عبادة و لازم اقوم بيها مرضاة لله ولو على حساب نفسى ...

و أدل حاجة على كدا حديث رسول الله فيما معناه " ليس الواصل بالمكافئ و إنما الواصل من إذا قطعه الناس وصلهم " أنا باعمل كدا عشان ربنا أمرنى بكدا ...مش عشان هما عملوا و لا معملوش ...

مشكلتنا إننا اتربينا على صح و غلط و عيب ... مش على ربنا اللى أمرنا بكدا ..لاربنا نهانا عن كدا

و دا اللى لازم نفهمه و نعلمه لأولادنا فيما بعد إن شاء الله

كما إن الاخلاق مؤشرخطير على صحة العقيدة ..زى ما شفنا فوق ، و غيرها كمان

عارفة إنى طولت أوى .... معلش أعذرونى الكلام خدنى

بس لسه بردوا ماخلصتش ... و لسه الكلام كتير ... هأحاول أرجع بسرعة و نكمل كلام

و .... سلاااااااااااااااااااااااااااام