توبة صااااااااااااااااااااااااااادقة !!..

السلام عليكم و رحمة الله و بركاته

إزيكم يا شباب ؟؟ أخباركم ايه؟؟ و أخبار رمضان معاكو ؟؟

ياااااااااااااااااااه 8 أيام فاتوا بسرعة جدا مين يصدق؟؟!!..

يارب تقبل منا و أعنا على ذكرك و شكرك و حسن عبادتك

و أقل عثارنا و سامح فى تقصيرنا يالله

بصراحة يا جماعة أنا جاية النهاردة أقولكم على محاضرة سمعتها ..والله كأنى بأسمع خيال

قصة بتهيألى ماحدش فينا يتوقع انه لسه فى ناس كدا فى زماننا

معقول ممكن حد يتوب توبة كدا ؟؟

كلنا بنذنب و نتوب و سرعان ما نرجع للذنب تانى ...بل فينا اصلا اللى مش حاسس انه مذنب و مالهاش لازمة التوبة

الله المستعان

بجد انا لما سمعتها قلت لازم أجيبها تسمعوها ..انتوا هتلاقوها مكتوبة كمان و دا شئ رائع لكن سماعها اروع بكتير من قرائتها بس

دا الرااااااابــــــط ..ياريت تسمعوه و بعدين تعالوا نتناقش فى الموضوع

بتهيألى سمعتوها ..نتناقش بئا ..ههههههههههههههه

طيب .. نقول القصة باختصار

شاب سافر فى عمل لمدة يوم ..تقابل بشاب باكى وعندما سأله عن السبب عرف انه وقع فى الزنا_ و كانا من نفس البلد _ أخذ رقمه و عندما عاد لبلده قام الشاب التائب بالاتصال عليه و هو-الراوى- يعتقد انه قد نسى ذنبه و أصبح يعيش حياة عادية..

فإذا بالشاب وقد قرر أن يسلم نفسه للمحكمة لاقامة حد الزنا عليه وهو المحصن

حاول اقناعه و لكن لم يقتنع فاتصلوا بشيخ كبير فافتى بعدم تسليم نفسه و يحاول الشاب اقناعه بتسليم نفسه و لكن ابدا

رجع حزينا مكسورا الى اهله ..استقام أكثر،حفظ القرآن ..لكن مازال على حزنه و انكساره

و خاصة عندما قرأ قصة الربيع بن خثيم من السلف و كان شابا عالما بالله صالح ..فاجتمع المفسدون على افساده بالزنا لكن الله منّ عليه بأن كان سببا فى صلاح من ارادت غوايته ..فانفجر باكيا يقول : الربيع يردها و أنا اذهب لأزنى بها ...و ظل على انكساره و حزنه ...حتى اتاه صديقه يبشره بالآيات "وَالَّذِينَ لا يَدْعُونَ مَعَ اللَّهِ إِلَهاً آخَرَ وَلا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلا يَزْنُونَ وَمَنْ يَفْعَلْ ذَلِكَ يَلْقَ أَثَاماً * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَاناً * إِلَّا مَنْ تَابَ وَآمَنَ وَعَمِلَ عَمَلاً صَالِحاً فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُوراً رَحِيماً" ففرح و استبشر ..بل و صلى اماما بهذه الايات ثم بعدها بفترة تأتى المنية ليفيض وجهه بشرا وحبورا و ابتسامة جميلة ما ابتسم مثلها ..

طيب تعالوا نقف وقفـــــات مع القصة دى ..

بجد والله أنا بأستعجب جدا ...

1- شوف تصريف ربنا ... يعنى الاتنين من بلد واحدة و يتقابلوا فى بلد تانية خالص

لا و الاكتر من كدا ان ربنا يكتب انه يسافر فى عمل ليوم واحد بس .. عشان احمد الراوى يقابل احمد التائب ..سبحان الله بجد

2- ان احمد الراوى يذهب لمكان فيه زنا و فجور فربنا ييسر له اللى يبعده و يمشيه من المكان لكن احمد التائب يذهب لمكان فيه زنا فيقع فى الزنا ...

لا و كمان مايلاقيش مكن ينام فيه ..عشان يروح ينام فى مسجد المطار عشان يقابل احمد التائب ...بردوا سبحان الله

3- أكيد احمد التائب دا كانت نشأته أصلا على الدين و كان عنده عقيدة بدليل انه لما وقع فى الذنب قال ايه ... فقدت حور الجنة !!! ...يالله مين فى شبابنا بيفكر بالمنطق دا ؟؟؟ ... لا و لما عرض عليه الخمر أبى ..عشان مايفقدتش خمر الجنة كمان ...سبحانك ربى ...بجد أنا مذهولة

4- شوفوا حر المعصية فضل معاه اد ايه ...و برغم التوبة و رغم آيات الرجاء ورغم فتوى الشيخ و كل دا لكن شايف انه لا يمكن ربنا يغفر له ...و ان غفر له فدا منه و كرم من ربنا ، مش لانه تاب و عمل صالح فخلاص ربناغفور رحيم !!... بتهيألى احنا بنروح نعمل المعاصى أصلا و احنا بنقول ربنا غفور رحيم ..مش نروح نعمل صالح ونقول ربنا غفور رحيم ... يااااااااااااه على التناقد ...بجد سبحانك يارب

5- نقف كمان معلش مع حاله اللى اتبدل تماما ... يعنى شوفوا مش بينام ...و هو التائب المنيب .. و احنا بتهيألى مش بنصحى من النوم أصلا ..هتقولولى دا زنا ...يعنى معصية كبيرة ..انما احنا الحمد لله ماوقعناش فى معصية زى دى ... طيب كويس جميل ... بس الزنا اللى ارتكبه احمد زنا كامل ..لكن كل عضو فينا له زناه ..بمعنى اللى واقف يعاكس بنات و لا يصاحب بنات و يتساهل معاهم بكلام مالوش لازمة ...كدا يبقى لسانه زنا ..و كمان سمعانه لكلامها اللى مالوش لازمة بردوا آدى أذنه زنت ..و طبعا هاتك يا نظرات ..آدى العين زنت و كل دا خطوات للزنا الاكبر عافانا الله و اياكم .. لكن طبعا مش فى دماغنا ...الله المستعان ، بجدربنا يستر علينا ... يارب احفظنا بحفظك و استرنا بسترك

6- بجد لما باسمع و باقرا كلمات احمد التائب ...والله باحتقر نفسى ..طيب اقرؤوا كدا تانى كلماته "ما زلتم بي حتى فقدت حور الجنة بفعل هذا الزنا! وتريد أن تحرمني خمر الجنة تقدم لي هذا الكأس! ""يا ليتهم أخذوا مالي! لقد مضوا بي إلى الزنا! لقد أفسدوا وكسروا ديني وإيماني! " يالله .. معقول حد كدا ؟؟ حد فعلا عايش باليقين والعقيدة دى ؟؟ .. "ما قولي أمام الله يوم أن يسألني ويقول: عبدي زنيت؟ فأقول: نعم. زنيت وسرت بقدمي هاتين إلى الزنا،" بجد مين بيفكر فى الآخرة زىماحنا بنجرى على الدنيا ومالناش هم إلا هيا ..

اللى بيسمح لنفسه بالرشوة ..هيقول ايه لربنا لما يسأله عبدى ارتشيت؟؟ ...اللى بيبص لبنات و يعاكسهم ..عبدى انتهكت حرماتى و زنيت بعينيك و لسانك و أذنيك ؟؟... البنات اللى مش محجبين حجاب شرعى ... أمتى لم تسمعى و تطيعى بل سمعتى و عصيتى ؟؟و أغويتى شبابا كثيرين و أغريتهم بمعاكستك؟؟؟ .. يااااااااااااااااااه ..بجد لو نفكر بالشكل دا ؟؟!!...

7- " قال: أسلم نفسي إلى المحكمة، وأعترف بجرم الزنا حتى يقام حد الله علي. فقلت له: أمجنونٌ أنت؟! أنسيت أنك متزوج؟! أنسيت أن حد الزاني المحصن الرجم بالحجارة حتى الموت؟! قال: ذاك أهون على قلبي من أن أبقى زانياً، وألقى الله زانياً غير مطهرٍ بحدٍ من حدوده. قال صاحبنا: أما تتقي الله! استر على نفسك، استر على أسرتك، استر على جماعتك. قال: كلهم لا ينقذونني من النار، وأنا أريد النجاة من عذاب الله. " هو بغض النظر عن حرارة المعصية اللى خلته عاوز يروح يسلم نفسه .. انا ليا وقفة غير خالص ، شوفوا لما قاله أنت كدا هتفضح نفسك ...قاله كلهم لا ينقذونى من عذاب الله ... تعالوا احنا لما نقول لشاب اتق الله ... يقولك مش قادر ما كل الشباب بيعمل كدا ..اشمعنى انا ، ولو يعرف انه ماحدش هيفيده يوم القيامة ولاحد هيشيل عنه حاجة من ذنوبه ماكنش قلدهم .. تعالى لبنت و قوليلها التزمى بالحجاب ...تقولك أنا لسه صغيرة و بعدين كل البنات بتعمل كدا ...عاوزة أعيش شبابى ، ولو تعرف انه دا مش هيشفعلها يوم القيامة بشئ ماكنتش عملت كدا ...و الموظف اللى بيرتشى عشان خاطر بيته و اسرته دول هييجوا يتعلقوا فى رقبته يوم القيامة و يقولوا يارب انبتنا من حرام ... هو مع فارق التشبيه طبعا ... بس شوف دا مهموش حد مع إن ماحدش فيهم كان ليه ايد فى الموضوع ... سبحان الله على حالنا والله ..

8- شوفوا حتى بعد ما احمد صاحبه بشره بالايات ...لم يفرح ويقول الحمد لله انام بئا ..لا ظل حاله مع ماكان عليه إلا انه تعلق بباب الرجاء عسى ان يتوب الله عليه .. بردوا جزءالخوف مازال موجود ..فالانسان ماينفعش يعيش بواحد منهم بس ..شفتوا لما كان خايف بس ..كان هيضيع حياته كلها و يفضح نفسه ... طبعا لا تعليق ..

9- وأخيرايا جماعة وقفة مع حسن خاتمته ... فعلا واحد زى دا فى زمن زى زماننا ... اعتقد انه اجره مضاعف ..مش فى حديث للرسول صلى الله عليه و سلم فيما معناه انه هييجى علينا زمن اجر العامل فيه ب50أجر من الصحابة و ذلك للفتن التى فيه ؟؟!!...

بجد ربنا يرحم أخونا احمد و يرزقه جنة الفردوس ولا يحرمه من الحور و لا الخمر لانه طلبهم بصدق و ندم على تفريطه فيها ندم صادق و صدق فى توبته الى الله ...

بجد ربنا يتوب علينا جميعا كى نتوب ...عارفة انى طولت اوى ..بس بجد ماقدرتش اقف ...اعتقد قصة احمد فيها اكتر من كداعبر ووقفات ..لكن هو دا اكتر اللى دهشنى و ذهلنى فى القصة ..

يااااااااااااااااااارب ارزقنا توبة زى توبة احمد كدا و احسن خاتمتنا جميعا و ارزقنا الفردوس الاعلى

كل سنة و انتو طيبين و رمضان كريم ...:)