تـــأمــــــــــــــلات

السلام عليكم و رحمة الله و بركاته

كيفكم يا شباب ؟؟ أخباركم ايه؟؟

و أخبار رمضان معاكو؟؟؟

ويااااااااااااااااااااااااه .......

سمعتوا الخبر اللى سمعته ، لا أكيد مش صحيح ...

لالالالالالا .. يا شيخ؟؟

يعنى بجد الخبر صح!!...

النهاردة 10 رمضان؟؟؟...

إهئ إهئ إهئ

ياعينى عليك يا رمضان ... أنت بتخلص بسرعة ليه ... هاه؟؟

لا بجد قوللى يعنى !!..<< يا عينى البت اتجننت ..

معلش ، أصل يا جماعة الصدمة قوية بردوا ...

ياللا ، ماعلينا ...

طيب ... النهاردة بصراحة بما اننا يوم 10 و داخلين فى 11 رمضان ، فدا معاد سورة التوبة

سبحان الله يا جماعة والله ماكنتش مخططة ان موضوع البوست اللى فات كان عن التوبة و النهاردة سورة التوبة

بس برغم كدا باحس سورة التوبة مش عن التوبة قد ماهيا وقفة جامدة قوى لنفسك عشان تقول انا فين ؟؟ أنا مين؟؟

هل فعلا انا فاهم صح؟؟ و ياترى انا ماشى صح؟؟؟

بجد السورة دى كل ما باحس بكسل او انى باقع ... كلماتها بتهزنى جدا

............

اول آية هاقف معاها – مش بترتيب السورة- هى قول الله تعالى :-

" إن الله اشترى من المؤمنين أنفسهم و أموالهم بأن لهم الجنة ، يقاتلون فى سبيل الله فيَقتُلون و يُقتلَون ، وعدا عليه حقا فى التوراة و الانجيل و القرآن ، و من أوفى بعهده من الله ، فاستبشروا ببيعكم الذى بايعتم به و ذلك هو الفوز العظيم "

بجد الآية دى صعبه جدا ... أولا ربنا هو خالقنا كلنا ،و أرواحنا بإيده ...فهو مش محتاج يشترى مننا ..بل هو السيد المتصرف ، ورغم كدا كرم المؤمنين – من يهود و نصرى و مسلمين لقوله تعالى فى التوراة و الانجيل و القرآن – بان يقايضهم ..أنفسهم و أموالهم بالجنة ...يا ترى احنا فعلا فاهمين النقطة دى صح؟؟ ولو فاهمنها بنطبقها؟؟؟

اشترى انفسنا و أموالنا ... يعنى يقولنا صلوا ، نصلى ، يقولنا صوموا ، نصوم ، يقولنا غضوا البصر ، نغض البصر ، يأمرنا فنقول سمعنا و أطعنا ..ليه؟؟؟ لأنه اشترى مننا أنفسنا و أموالنا بالجنة .. يعنى لو احنا عاوزين الجنة نسمع و نطيع ..مش نسمع و نعصى ، نسمع و نطنش و نقول ياعم احنا مالنا ..انت شايف الزمن اللى احنا عايشين فيه؟؟

ماهو لازم نفهم ان ربنا مش هنضره و لا هننفعه بشئ و انما اولاوأخيرا احنا بنعمل لنفسنا ... رضينا نكون من المؤمنين اللى ربنا كرمهم و رفعهم لمرتبة انه يشترى منهم انفسهم و أموالهم بالجنة ،كان بها ... مش عاوزين و عاوزين نعيش حياتنا و نروق على شبابنا ، هنعيشو هنروق ، بس بجد مش بنحس بسعادة ، و بنحس دايما بشئ ناقص ،لا و كمان هناخد قسطنا من النار و لو أدركتنا رحمة الله ندخل الجنة ... يعنى بنلعب على الحبل ...و اعتقد دى حاجة ماترضيناش خالص

طيب نقطة تانية فى الآية بردوا بأقف عندها كتير أوى " فاستبشروا ببيعكم الذى بايعتم به " ياااااااااااااه ، باحس بتواضع و عظمة ربنا هنا اوى ...ياه يارب أنت بنفسك جاى تقولنا فاستبشروا ... يعنى اللى عنده ذرة شك انه مش هياخد حقه ان كان فى دنيا و لا اخره ... لااااااااااااا فوق ..دا ربنا بنفسه وهو الغنى بيقولك : استبشر ، " وذلك الفوز العظيم " مش هاضيع جهدك و تعبك .. " ومن أوفى بعهده من الله " .. ونعم بالله ، فعلا .. هو ربنا وعد بشئ و ماحققوش –حاشاه –

طيب تعالوا نشوف صفات المؤمنين دول ايه .. ياترى احنا فعلا منهم ؟؟؟ طب ياترى هنحاول نكون منهم ؟؟؟

1- التائبون : ياترى احنا فعلا تبنا لربنا توبة نصوح .؟؟ طب ياترى بجد عاقدين النية على التوبة .؟؟؟ واللى تاب هل ياترى بيجدد توبته .؟؟؟ و لابيقول كفاية تبت مرة ، هو كل شوية؟؟!!..

2- العابدون : هل فعلا احنا مدركين معنى العبادة ؟؟.العبادة الحقيقية ....مش بس مجرد آداء الفرائض والعبادات ؟؟ بصراحة موضوع العبادة دا عاوز بوست لوحده ..بس ياترى بجد حاولنا نعرف يعنى ايه عبادة؟؟

3- الحامدون : و الحمد برأيى ...يعنى اولا : ذكر ربنا ...فهل فعلا احنا ربنا فى كلامنا و ذكرنا و بالنا ؟؟ و لا لما بنسمع درس أو خطبة بس؟؟؟ ثانيا: الحمد بيكون فى السراء و الضراء ...يعنى على الحلوة و الوحشة ...فهل فعلا لما بيصيبنا خير أو شر بنقول الحمد لله بيقين ... فعلا بنقول انت حكيم يارب أكيد دا الخير و لحكمة احنا مش عارفينها؟؟؟

4- السائحون : الصائمون ...

5- الراكعون الساجدون : أىالمصلين .. و دابيأكد إن العبادة أعم و أشمل من مجرد آداء الفرائض ....فهل فعلا احنا بفهمنا الغير مكتمل للعبادة على انها اداء الفرائض ..ياترى بنأدى الفرائض على وجهها الاكمل ؟؟ ياترى فعلا بنصوم نقول .. فعلا ، صيامى النهاردة حاسس ان ربنا هيتقبله منى .. اصلى فعلا حاسس انى صمت بجد ..و الصلاة ، هل فعلا بنخرج من صلاتنا نقول ...ياه ، فعلا صدق رسول الله صلى الله عليه و سلم لما بيقو لبلال أرحنا بها يا بلال؟؟؟.... و لا بنقول امتى الصلاة تخلص بئا ...طولت اوى ..مع انها بتكون ماكملتش 5 دقايق

6- الآمرون بالمعروف و الناهون عن المنكر : أعتقد دى فعلا اللى صعبة بجد ... هل فعلا بنأمر بالمعروف و ننهى عن المنكر ...طبعا مش باقول اننا مؤمورين نمشى ورا كل واحد وواحدة نشوفهم بعملوا ايه و نقولهم صح ، غلط ..حلال ، حرام .. لا، مش كدا خالص ...بس شفت موقف مش حلو قدامى ..باسلوب حلو و مؤدب أقول لصاحب الموقف ان كدا مش صح .. أو أقول باسلوب غير مباشر لحد يوصله الكلام لو مش عارف ..اللى عاوز حاجة بيوصل لها ..لكن احنا بنكسل ، و نقول مش عارفين ...انما لو فيلم و لااغنية ..بنعمل مهرحانات و نقول لكل اصحابنا و اللى نعرفهم و مانعرفهمش ... يعنى الاية اتعكست ..

7- و الحافظون لحدود الله : هنا بردواوقفة كبيرة ... الحافظون لحدود الله ...طب هى ايه اصلا حدود الله ؟؟!!.. ياترى احنا اصلا عارفين حدود الله عشان نحفظها و نبتعدعنها؟؟؟ ...القرآن مليان و بنعدى عليها كل يوم فى قراءتنا ..لكن هل ياترى بنقف فعلا و نفهم ان دا حد من حدود الله .. و ياترى حتى الحدود المعروفة اللى كل الناس حافظاها ....هل فعلا بتحافظ عليها و مابتقربلهاش؟؟؟...

أهى هيا دى صفات المؤمنين اللى ربنا اشترى منهم أنفسهم و أموالهم بالجنة و بعد التفصيل دا .. رجع ربنا تبارك و تعالى يأكد تانى لينا ...و بشر المؤمنين

طولت الكلام أنا عارفة ...بس الكلام لسه كتير أوى و ماخلصتش ..عارفة إن اسلوبى المرة دى قد يكون صعب شوية ...بس لأن فعلا الموضع صعب جدا ...و فعلا عاوزين نفهم ..أو على الاقل انا عاوزة أفهم وأوصل اللى فهمته دا ...بس يارب أكون فاهمة صح ووصل ولو شئ بسيط من اللى عاوزة أقوله ...

هاحاول فى اقرب وقت إنى أكمل الكلام عن سورة التوبة ..

تحياتى ليكم ... و تذكرونى من صالح دعواتكم