السلام عليكم و رحمة الله و بركاته
كيفكم يا شباب ؟؟؟ عاملين ايه؟؟؟
بدأتوا العشرة و لا لسه ؟؟؟
لا شدول حيلكوا عاوزين نستغل العشرة الباقيين << كفاية اللى ضاعوا ...عااااااااااااااااااااااااا
طيب مش هأطول عشان بصراحة مش فاضية << عاوزة ألحق العشرة ...;)
طيب الوقفة التانية و الأخييييييييرة فى سورة التوبة إن شاء الله ، هى قول الله تبارك و تعالى " يا أيها الذين آمنوا مالكم إذا قيل لكم انفروا فى سبيل الله إثاقلتم إلى الأرض ، أرضيتم بالحياة الدنيا من الآخرة ، فما متاع الحياة الدنيا فى الآخرة إلا قليل "
طبعا هى نزلت فى أحداث غزوة تبوك ... لكن بصراحة أنا شايفة إن حالنا الوقتى زى حال المسلمين فى غزوة تبوك بالظبط ..
" يا أيها الذين آمنوا " ...
الذين آمنوا؟؟!!!. يعنى اللى احنا قلنا عليهم؟؟....
آه هما .....
مالهم؟؟
" مالكم إذا قيل لكم انفروا فى سبيل الله اثقالتم إلى الأرض ؟؟!!" ...
مالكم ؟؟ كل مايتقال لكم أمر من أمور الله ، قلتم : والله مش قادرين ، تعبانين ....
قوموا صلوا ... مش قادر والله ، أريح بس شوية و بعدين أقوم أصلى ...لسه راجع من الشغل تعبان ، أو نايم متأخر مش قادر أقوم أصلى الفجر ...
اتصدق على جارك الفقير ... ياعم هو حد لاقى ، ماكلنا فقرا ، و بعدين أنت شايف الحال ، و اللى يحتاجه الببيت ....- على الرغم من عدم صحة المقولة – دا أنا عاوز اللى يتصدق عليا
قول لصاحبك اللى عمله دا غلط .... و أنا مالى ، كل واحد حر فى نفسه ، مش بأدخل فى اللى ماليش فيه .. أتصرفوا مع بعض
و غيره و غيره ... طب ليييه؟؟؟
" أرضيتم بالحياة الدنيا من الآخرة "
عاوزين الراحة فى الدنيا ، و ناسيين متاع الآخرة ، أد كدا مش فى دماغنا ؟؟؟، و خلاص بئا نظرنا تحت رجلينا و بس ، كل واحد همه نفسه و راحته و بس .
" فما متاع الحياة الدنيا فى الآخرة إلا قليل " الراحة و النعيم اللى انتوا عاوزينه دا و لا شئ بالنسبة للآخرة ، و قديما قال أحد السلف مقولة فيما معناها " قليل دائم خير من كثير فانى ، فما بالك و كثير دائم و قليل فانى "
لو فعلا عندنا عقيدة صح و فاهمين الاسلام صح ماكنش دا يبقى حالنا ...
بس أوعى نفتكر بئا إننا عشان قلنا لا اله الا الله محمدرسول الله ، و مافيش عمل إننا كدا كدا ربنا مش هيعاقبنا ...لااااااااااااااااااااااا
" إلا تنفروا " بجد اللهجة صعبة جدا ... حاسيين لهجة الوعيد ،
ايه اللى يحصل لو ماحققناش اللى ربنا أمرنا بيه
" يعذبكم عذابا أليما " ...
بس إحنا مسلمين ...
فين مسلمين دا ؟؟؟.. إذا كان الصلاة نفسها ، مش بنواظب عليها بنصلى سطر و نسيب عشرة ...
و آدى احنا شايفين اللى بيحصل فينا كل يوم و الغلا اللى بئينا فيه ... هو دا مش عذاب بردوا ؟؟؟..و لا مش حاسيين بكدا؟؟
و ياريت كدا بس " و يستبدل قوما غيركم"
إدا دا؟؟؟؟ بجد ؟؟!!... يعنى أد كدا هنهون على ربنا ، و هنبئا مالناش لازمة فى الدنيا دى .؟؟..
آه ،" و لا تضروه شيئا " ..
. يااااااااااااااااه ،
بجد صعبة جدا ،صدمة !!!!... صح؟؟
يعنى بجد ممكن دا يكون عذاب من ربنا ، و ممكن ربنا يذهب بنا و يستبدل قوما آخرين ؟؟؟...
ييجى التوكيد " و الله على كل شئ قدير" .
طب ....... بس أنا لوحدى ، مش معايا حد ، و أنت شايف الاحوال و الدنيا ، و.....
" انفروا خفافا و ثقالا "....
يعنى ايه؟؟؟ ....
يعنى لوحدك بغيرك ، لازم تقوم ...لازم تبقى مسلم بجد ،
أصل محدش هينفعك فى الآخرة ، محدش هيتحاسب بدل منك ،
" و جاهدوا بأموالكم و أنفسكم فى سبيل الله " مالكش حجة ...
آدى مرة تانية ربنا يذكرك بالعهد اللى بينك و بينه ، هتنفذ " ذلكم خير لكم إن كنتم تعلمون " ، مش هتنفذ " و لا تضروه شيئا "
لاااااااااا ....بصى بئا ، ربنا لو كان رايد أصلا كان هدانا ، و بعدين مش كل شئ بإرادته ، هو اللى عاوزنا نكون كدا ، يعنى هو بإيدنا شئ ؟؟؟
" لو أراوا الخروج لأعدوا له عدة " ... اللى عاوز بيعمل ، أنت لو فعلا عاوز طريق ربنا ، كان زمانك دورت عليه من زمان ، أصل مافيش واحد توكل على ربنا و أخد بالاسباب و ربنا خذله .... أبدا .
إنما نايمييين و إن الله غفور رحيم ؟؟.... طب إزاى يعنى ؟؟؟
أمال فين " والله شديد العقاب "؟؟؟؟
" و لكن كره الله انبعاثهم " ربنا مش شايف مننا غير كل تخاذل ، و مش عاوزين نتعب نفسنا فى أى طاعة ...عاوزين الحسنات تيجى لحد عندنا ، و عاوزين الدنيا وردى ، ومافيش أى مشاكل خااااااالص ...
طب إزاى يعنى " أحسب الناس أن يتركوا أن يقولوا آمنا و هم لا يفتنون "؟؟؟!!..
دا الدنيا دار بلاء ، الآخرة هى اللى دار النعيم ... لكن لما قلبنا الموازين بئا و عاوزين الدنيا دار راحة ، فخلاص ربنا مش عاوزنا " فثبطهم و قيل اقعدوا مع القاعدين "
مش انتوا عاوزين الراحة و مش عاوزين التعب .... خلاص بس بئا مانلومش إلا نفسنا لما نقف بين إيديه و يسألنا عن عمرنا فيما افنيناه و عن شبابنا فيما أبليناه ...
الآيات صعبة جدا جدا ، و فيها إنذار ووعيد صعبين ....
هل ياترى هنكون من المؤمنين ...و لا من الذين علم الله فيهم ضعف فثبطهم ؟؟؟؟
يارب فعلا نرى لربنا من أنفسنا قوة ... و آدى العشرة الاواخر بدؤوا اهم ..
عاوزين بئا همة و نشاط ...فى كل حاجة ،
و أوعوا تنسونى من صالح دعاؤكم ... لا أزعل اوى اوى اوى ...
كل واحد يدخل يدعيلى دعواية ...مش هأكتر عليكو ...ماشى؟؟؟
اللهم تقبل منا القليل ، و تجاوز عما كان من تقصير
و اكتبنا عندك من عتقائك من النار
اللهم آمين
خالص تحياتى لكم جميعا ...
10 comments:
جزاكم الله خيرا ياإيمان ربنا يبارك لك
الأيات بجد مؤثرة جدااا
( أَيُّهَا الَّذِينَ آمَنُواْ مَا لَكُمْ إِذَا قِيلَ لَكُمُ انفِرُواْ فِي سَبِيلِ اللّهِ اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيلٌ * إِلاَّ تَنفِرُواْ يُعَذِّبْكُمْ عَذَابًا أَلِيمًا وَيَسْتَبْدِلْ قَوْمًا غَيْرَكُمْ وَلاَ تَضُرُّوهُ شَيْئًا وَاللّهُ عَلَى كُلِّ شَيْءٍ قَدِيرٌ *)
الأيات فى كانت من أقوى الأسباب اللى خلى ربنا يمن عليه بالنقاب
لانها صعبه جدا زى ماشرحتى (إِلاَّ تَنفِرُواْ يُعَذِّبْكُمْ عَذَابًا أَلِيمًا وَيَسْتَبْدِلْ قَوْمًا غَيْرَكُمْ وَلاَ تَضُرُّوهُ شَيْئًا )
يعنى لو فضلنا ندعى يارب إستخدمنا ولا تستيدلنا بدون أن ننفر فى سبيل الله
فكيف لنا بالإستخدام وربنا يعدنا بالإستبدال إن لم ننفر
مشكلة الصباغ والدكتور \سباح في بحور الظلام
بنظرة حيادية لصديق كليهما
مدون يدعى محمد الجوهري
http://goharyblog.blogspot.com/
شوفوها ضروري
بسم الله ما شاء الله
بجد سعيد جدا وفخور بيكي يا ايمان انك كنتى زي واحسن مما توقعت وان نظرتي ليكي كانت على حق لما قولتلك تكتبي موضوعات اجتماعية ودعوية وان اسلوبك جميل ويقدر يوصل رسالة للناس بسهوله
سعيد جدا جدا جدا
انا كنت جاي ارد على الخناقة اللى عاملاها عندي في الصحيفة في موضوع الواد عسقول
بس ما شاء الله لا قوة إلا بالله
والحمد لله رب العالمين على انسانه زيك
ربنا يباركلك ويبارك فيكي
وده من اخلاص النية وعلامة من علامات حب الله للعبد ان يفتح له على يديه فتحا يصيب به قلوب الناس وعقولكم
ربنا يكرمك يا رب
وكل سنة وانتى طيبة
ندى ...
جزانا و اياكى كل خير
ربنا يثبتك يارب
و يجعلنا من الذين ينفرون فى سبيله
خالص تحياتى
تابعو الجديد
ربنا يهدى النفوس و يصلح الحال
الباااااااااااااااااحث
يااااااااااه ، عاش من شافك يا راجل
حمد لله ع السلامة و نورت بلدكم ...:)
و ألف سلامة عليك
و بعدين يعنى يا باحث بلاش احراج
يعنى عاوز تقفل على الخناقة ، بلاش تحرجنى بئا
ههههههههههههههه
ربنا يكرمك يارب أنت كمان
و الحمد لله أولا
ثم لك أنك كنت من ضمن الاسباب اللى شجعتنى
ثالثا : كل سنة و أنت طيب و عيد سعيد ان شاء الله
خالص تحياتى
كل سنه وانتى طيبه
كل سنه وانتى طيبه
عيدك سعيد
و حضرتك طيب يا ا. محمد
و آسفة على التأخير
د/ أجدع بنوتة
و أنتى طيبة يارب و بصحة و سلامة و معلش آسفة على التأخير
Post a Comment